<a href="https://kyzylorda-news.kz/date/2020/09/10/">Kyzylorda-news.kz.</a> Бүгін аймақ басшысы Гүлшара Әбдіқалықованың төрағалығымен облыстағы іске қосылатын нысандар туралы мәжіліс өтті. Мәжілісте облыс әкімінің орынбасары Серік Сүлейменов, облыстық мемлекеттік сәулет-құрылыс бақылау басқармасының басшысы Марсбек Молдабаев және облыстық құрылыс, сәулет және қалақұрылысы басқармасы басшысының міндетін атқарушы Арнұр Нұрмағанбетов атқарылған жұмыстар туралы баяндады.
Ағымдағы жылдың 8 айында мемлекеттік бюджет және жеке инвестициялар есебінен салынатын 322 нысанда құрылыс-монтаждау жұмыстары басталған. Оның 165 бюджет қаражаты есебінен, 157 жеке қаражат есебінен салынуда.
Нысандарда құрылыс жұмыстарының сапасына бақылау күшейтіліп, жеке және заңды тұлғалардың өтініштері бойынша жалпы 53 жоспардан тыс тексерулер ұйымдастырылып, анықталған ақаулар мен кемшіліктерді жою жөнінде 11 нұсқама берілді. Анықталған бұзушылықтар бойынша 33 нысанға қатысты әкімшілік шара көрілді. 
Сонымен бірге, жыл басынан бері заңнама талаптарын бұзған тұлғаларға қатысты 33 әкімшілік іс қозғалып, 9 млн. 280 мың тенге айыппұл салынды.
Айта кетейік, шағын және микрокәсіпкерлік субъектілерін тексеруге мораторий енгізілуіне байланысты өткен жылдың 8 айымен салыстырғанда ағымдағы жылы жалпы жүргізілген тексерулер саны 41-ге %, қозғалған әкімшілік істер 59 % азайған.
Мемлекет тапсырысы бойынша салынып жатқан құрылыс нысандары туралы барлық ақпаратқа халықтың қолжетімділігін, ашықтығын қамтамасыз ету, құрылыстың сапасына қатысты тұрғындармен кері байланыс орнату жолымен орын алған бұзушылықтарды дер кезінде жоюға жағдай жасау мақсатында Halyq Monitoring» сайты жұмыс жасауда.
Бұған қоса, техникалық қадағалау сарапшыларының айлық есептерін электронды форматқа көшіру мақсатында «Цифрлы Қазақстан» бағдарламасының «Smart city» тұжырымдамасы аясында “TexStroi-Smart” жобасы әзірленді.
Бұл жобаны іске қосу нәтижесінде “TexStroi-Smart” электронды платформасына 100-ден астам техникалық қадағалау сарапшылары тіркеліп, оларға ай сайынғы есептерін электронды платформа арқылы тапсыруларына жағдай жасалды.
Жалпы барлық нысандар құрылысына мемлекеттік бюджет есебінен 9,7 млрд.теңге қаржы бөлінді, 10 қыркүйектегі жағдай бойынша жоспарланған 4,1 млрд.теңге қаржы толықтай игеріліп, жоспар 100%-ға орындалды.
Бүгінгі күні 30 әлеуметтік нысанның құрылысы жүргізілуде. Оның ішінде 22 әлеуметтік нысан жыл соңына дейін, 8 нысан келесі жылы пайдалануға беріледі деп жоспарлануда.
Биылғы жылдың 7 айының қорытындысымен 2 нысан пайдалануға беріліп, құжаттандыру жұмыстары жүргізілуде.
«Нұрлы жер» мемлекеттік бағдарламасы аясында тұрғын үй құрылысы мен инженерлік-коммуникациялық инфрақұрылым желілерін дамытуға мемлекеттік бюджет есебінен барлығы 15,6 млрд.теңге қаржы бөлінді, оның ішінде республикалық бюджеттен – 9,6 млрд.теңге, облыстық бюджеттен – 6,0 млрд.теңге бағытталып отыр.
Ағымдағы жылы облыста сатып алу құқығынсыз жалға берілетін тұрғын үйлердің құрылысын жүргізуге қаржы бөлініп, 815 пәтерлі 20 тұрғын үйдің құрылысы жүргізілуде. Оның ішінде, Қызылорда қаласында 725 пәтерлі 15 тұрғын үй, Шиелі ауданында 90 пәтерлі 5 үй. 
Жыл аяғына дейін 698 пәтерлі 15 тұрғын үй пайдалануға берілетін болады.
Кредиттік тұрғын үйлер бойынша барлығы 215 пәтерді құрайтын 57 тұрғын үйдің құрылысы жүргізілуде. Оның ішінде, Қызылорда қаласында 100 пәтерлі 2 көпқабатты тұрғын үй 2021 жылға өтпелі және төрт ауданда 115 пәтерлі 55 бірқабатты тұрғын үйлер биылғы жылы пайдалануға берілетін болады.
Жеке коммерциялық құрылыс салушылар есебінен 376 пәтерлі 10 тұрғын үйдің құрылысы жүргізілуде, жыл аяғына дейін 156 пәтерлі 4 тұрғын үйді пайдалануға беру жоспарлануда.
Жиын соңында облыс әкімі Гүлшара Әбдіқалықова құрылыс жұмыстарын сапалы жүргізуді, бақылау жұмыстарын күшейтуді және мерзімінде аяқтауды тапсырды.
<img src="https://kyzylorda-news.kz/wp-content/uploads/2020/09/119117527_2716822151754170_2312577541907158950_o.jpg" alt="" />

Қызылорда облысында құрылыс жұмыстары қарқынды жүргізілуде

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаев Қарауылтөбе ауылдық округінің егіс алқабында болып, Сыр салысына алғашқы орақ салу рәсіміне қатысты.
Шаһар басшысы алдымен ауыл шаруашылық саласының биылғы көрсеткіштері мен Ы.Жахаев атындағы «Қазақ күріш шарушылығы» ҒЗИ ЖШС-нің ғылыми жетістіктерімен танысып, дала маржанына орақ түсу науқанын ашып берді.
Биыл қала дихандары жалпы аумағы 8 мың 747 гектар жерге ауыл шаруашылығы дақылдарын орналастырса, оның ішінде 4 мың 75 гектарға басты дақыл күріш егілді. Кейінгі кезде саннан бұрын сапаға ынта қоя бастаған қала күрішшілері биылғы жылы да айтарлықтай табысты көрсеткіштерге қол жеткізуді межелеп отыр.
<blockquote>
 «Бірінші кезекте диқандардың жаздың аптабында, күтіп баптаған, маңдай терінің жемісін шашпай-төкпей, жауын-шашынға қалмай жинап алу мәселесі тұр. Ол үшін қажетті техника сақадай сай, жұмыс күші жеткілікті. Болжаммен биыл әр гектердан 50-55 центнер шамасында өнім аламыз деп болжап отырмыз » – деген, Ы.Жахаев ҒЗИ ЖШС-нің өндіріс жөніндегі орынбасары Рүстем Оңдашов.
</blockquote>
Ғылыми зерттеу институты ағымдағы жылы тәжірибелік алаң саналатын Қаруылтөбедегі егіс даласының 275 гектарына «Сыр сұлуы» сұрыбын еккен.
<blockquote>
 «Отандық сорт басқа күріш түріне қарағанда суды аз қажет етеді және аймақтың стресстік табиғи-климаттық, топырақ мелиоративтік жағдайына бейімделген, потенциалды өнімділігі мен дәмдік қасиеттері жоғары, ору, бастыру және өңдеу кезіндегі механикалық әсерлерге төзімді, соның нәтижесінде бүтін дәндердің жоғары шығымдылығын қамтамасыз ететінін» – дейді институт директоры Бақытжан Дүйсембеков.
</blockquote>
Биыл аймақтағы су тапшылығына байланысты қала дихандары егін шаруашылығын әртараптандыруға басымдық берген. Бұл бағытта 70 гектарға қант құмайын, 100 гектарға соя, 302 гектарға жаздық, 90 гектарға күздік бидай егілді.
<blockquote>
 «Әртараптандыруға уақытылы ден қою қалаға қарасты шаруашылықтардағы су тапшылығын болдырған жоқ» – дейді, ауыл шаруашылық бөлімінің басшысы Дәулетбек Абдирасулов.
</blockquote>
Қазіргі таңда бидай, сұлы, арпа, картоп, көкөніс, бақша дақылдары толығымен жиналып, картоптың әр гектарына 127,0, арпадан 2,4, сұлыдан 4,7,жаздық бидайдан 12,2, күздік бидайдан 7,0, көкөністен 127,6, бақшадан 131 центнерден өнім алынуда.
Алдын ала жасалған кестелер бойынша егілген күріш алқабының суын тарту жұмыстары 1 қыркүйекте аяқталып, күріш ору жұмыстары қыркүйек айының 9 күні басталды. Ағымдағы жылы егілген 4075 гектар күріш егістігінің шығымдылығын сала мамандары зерделеу барысында 2852 гектары (70,0 %) «жақсы», 1018 гектары (25,0 %) «орташа», 205 гектары (5,0 %) «қанағаттанарлық» деп бағаланып отыр.
<img src="https://kyzylorda-news.kz/wp-content/uploads/2020/09/119049339_2653249041608504_6722295986485817019_o.jpg" alt="" />
<img src="https://kyzylorda-news.kz/wp-content/uploads/2020/09/119048946_2653249911608417_215375564120126128_o.jpg" alt="" />
<img src="https://kyzylorda-news.kz/wp-content/uploads/2020/09/119056892_2653249591608449_104578613138716007_o.jpg" alt="" />
<img src="https://kyzylorda-news.kz/wp-content/uploads/2020/09/119065002_2653249691608439_3176602006052461924_o.jpg" alt="" />

Қызылорда қаласында егінге алғашқы орақ түсті

<a href="https://kyzylorda-news.kz/date/2020/09/09/">Kyzylorda-news.kz.</a> Бүгін облыс әкімінің орынбасары Бақыт Жаханов Президент Жолдауынан туындайтын негізгі міндеттер туралы баспасөз мәслихатын өткізді.
Облыс әкімінің орынбасары өңірдегі аграрлық саланың даму перспективасына тоқталып, агрокешенді дамыту мәселелері бойынша облыста атқарылған істерді атап өтті.
<blockquote>
 “Ауыл шаруашылығы – экономиканың негізгі тірегі. Бұл ретте агроөнеркәсіптік кешенді дамыту маңызды. Біздің алдымызда әлеуметтік маңызы бар азық-түлік тауарларымен өз-өзімізді қамтамасыз ету, ауыл тұрғындарының табысын тұрақты өсіру, еңбек өнімділігін 2,5 есеге және агроөнеркәсіптік кешен өнімдерінің экспортын 2 есеге арттыру міндеті тұр. Қазіргі таңда, мал шаруашылығының жалпы ішкі өндірісі 27,5 млрд. теңгені құрап, өткен жылмен салыстырғанда 2,4%-ға өсіп отыр”,-деді ол.
</blockquote>
<img src="https://kyzylorda-news.kz/wp-content/uploads/2020/09/119074670_2714496235320095_1067102080942805113_o.jpg" alt="" />
Брифингте Бахыт Жаханов кооперация арқылы жеке қосалқы шаруашылықтарды пайдалана отырып жаңа жұмыс орындарын көбейтуге мүмкіндік барын қоса кетті. Айтуынша, кооперация нәтижесінде 86 мың үй шаруашылықтары тұрақты жұмыспен қамтамасыз етіліп, ауыл шаруашылығы өндірісін кем дегенде 3-4 есеге ұлғаяды. Бұл ретте өңірде субсидиялау, жеңілдетілген несие беру, жер бөлу, инфрақұрылымын жүргізу мәселелері бойынша тиісті шаралар қабылданады.
Сондай-ақ, брифингте облыс әкімінің орынбасары суармалы егіс көлеміндегі негізгі мәселелер, тауарлы балық өсіру, балық өндеу көлемін арттыру бағытында қолға алынған жұмыстарды баяндады.

Қызылордада агроөнеркәсіптік кешен аясында өнім өндіру көлемі артады

<a href="https://kyzylorda-news.kz/">Kyzylorda-news.kz.</a> Қызылорда облысында «Батыс Еуропа – Батыс Қытай» автокөлік дәлізінің бойында инвестицияның жалпы сомасы 6 млрд. 361 млн. теңгені құрайтын 30 нысан жұмыс істеп тұр. Онда 737 адам тұрақты жұмыспен қамтылған.
Қолданыстағы 30 нысанның 23-і «Google maps» және «Yandex карта» жүйесіне енгізілген. Айта кету қажет, іске қосылған жобалардың барлығы жоба бастамашыларының қаражаты есебінен жүзеге асырылған. Жыл соңына дейін тағы 2 нысанды іске қосу жоспарлануда.
Бағдарлама аясындағы туристендіру картасына облыстан 3 туристік нысан енгізілді: «Қамыстыбас» демалыс аймағы, «Жаңақорған» шипажайы, «Байқоңыр» ойын-сауық туристік аймағы. Айта кету керек, «Байқоңыр» ойын-сауық туристік аймағын құру туристендіру картасының ТОП-10 басым нысандар тізіміне, ал «Қамыстыбас» демалыс аймағы мен «Жаңақорған» шипажайы ТОП-50 нысандар тізіміне енгізілді. Қазіргі таңда, «Байқоңыр» ойын-сауық туристік аймағын құру жобасы бойынша біршама жүйелі жұмыстар жүргізілуде.
Жоба толығымен жүзеге асқан жағдайда жылына 250 – 500 мың аралығында туристерді тартатын болады деп күтілуде.

Қызылордада туризмді дамытуға арналған жаңа жобалар іске қосылады

<a href="https://kyzylorda-news.kz/">Kyzylorda-news.kz.</a> Қазалы ауданындағы іргелі елді мекендердің бірі – Бекарыстан би ауылында «Ауыл – ел бесігі» жобасы аясында ауқымды жұмыстар атқарылып жатқанын бұған дейін де айтқан болатынбыз.
Бүгінгі күні елді мекендегі ауыз суды сервистік желіге қосу жұмыстары қарқынды жүргізілуде. Аудандық құрылыс, сәулет және қала құрылысы бөлімінің басшысы Нұрбек Күзембаевтың айтуынша, жобада барлығы 19,3 шақырым полиэтиленді құбырларын жүргізу және 153 дана көру құдықтарын орнату қаралған. Бас мердігер «Намыс Құрылыс» ЖШС жергілікті жерден 8 ауыл тұрғынын жұмыспен қамтып отыр. Құрылыс жұмыстары толық аяқталғанда елді мекенде 464 тұрғын үй және 3 әлеуметтік нысан сапалы ауыз сумен қамтамасыз етілетін болады.
Қазіргі таңда Бекарыстан би ауылында 17,7 шақырым ауыз су желілері тартылып, 92 дана темірбетон құдықтар монтаждалып, орнатылды. 430 тұрғын үйге және 3 мекемеге сервистік құбыр жүргізілді.
Келісім-шарт бойынша ауылдағы ауыз суды сервистік желіге қосу желтоқсан айында тапсырылуы қажет. Алайда серіктестік жұмысшылары құрылысты қарқынды жүргізуіне байланысты қазан айының алғашқы он күндігінде жұмыс толық аяқталады деп жоспарлануда.
<img src="https://kyzylorda-news.kz/wp-content/uploads/2020/09/1.jpeg" alt="" />
<img src="https://kyzylorda-news.kz/wp-content/uploads/2020/09/0.jpeg" alt="" />

Қазалы ауданы: Ауыз су сервистік желіге қосылады

<a href="https://kyzylorda-news.kz/date/2020/09/08/">Kyzylorda-news.kz.</a> Биыл облыс бойынша184,2 мың гектарға ауыл шаруашылығы дақылдары орналастырылды. Оның ішінде дәндi дақылдар 99,9 мың гектар, майлы дақылдар 5,7 мың гектар, мал азықтық дақылдар 61,0 мың гектар, картоп, көкөнiс, бақша 17,6 мың гектар. Негізгі дақыл күрiштің көлемі 89,5 мың гектар.
Облыстық ауылшаруашылық басқармасының дерегінше аймақта егісті әртараптандыру бағытында алғаш рет перспективалы дақылдар қант құмайы 70 гектарға, соя 240 гектарға, жүгері дақылы 1 667 гектарға дейін жеткізіліп, ылғал сақтағышаквагельдерді пайдалану арқылы 80 гектар богарлы жерлерге күздік бидай дақылы егілді.
Жалпы егілген ауыл шаруашылығы дақылдарынан жоғары өнім алу мақсатында59,8 мың тонна минералдық тыңайтқыштар,74,6 мың литр гербицидтер сатып алынып, күріш егістіктерінің65,6 мың гектары арам-шөптеріне қарсы өңделіп, 67,5 мың гектары тыңайтқыштармен толық үстеп қоректендірілді.
Қазіргі таңда, күріштен басқа ерте егілетін дәнді дақылдар толығымен жиналып, майлы және мал азықтық дақылдары мен картоп, көкөніс, бақша дақылдарын жинау жұмыстары жүргізілуде. 
Егін жинау жұмыстарына қатысатын техникалар толық дайын. Егін жинауға 1640 дана трактор, 843 дана комбайн, 458 дана жатка, 308 дана жүк көлігі және 764 дана трактор тіркемесі қатысуда.
Күзгі егін жинау және дала жұмыстарын жүргізу үшін 12,5 мың тонна арзандатылған дизель отыны бөлінді. Операторлар дизель отынының әр литрін165 теңгеден жеткізуде.
Бүгінгі күні күріш танаптарынан су тартудың бекітілген кестесіне сәйкес 89,4 мың гектар немесе жалпы күріш егісінің 99,8 пайызының суы байланды.
Облыста күрішке орақ салу жұмыстары 22 тамызданбасталды.Бүгінгі күні9766 гектар күрішке орақ салынды. Әр гектарынан орташа 45,6 центнерден өнім алынуда.
Жалпы мамандардың болжамына сәйкес, биылғы жылы жиналатын өнім өткен жылғы көлемненкем болмайды. 
Егін жинау жұмыстарын 15 қазаннан кешіктірмей толық аяқтау көзделіп отыр.

Қызылордалық диқандар жоғары өнім жинап жатыр

<a href="https://kyzylorda-news.kz/date/2020/09/08/">Kyzylorda-news.kz</a>. Бүгінгі күнге облыста 2239 жеке қосалқы шаруашылықтарды біріктіру арқылы 88 кооператив тіркелген. Оның ішінде, 65 ет бағытында, 10 сүт бағытында, 8 бақшалық, 4 құс шаруашылығы және 1 балық шаруашылығы бағытында.
2016 жылдан бүгінгі күнге кооперативтерді дамыту мақсатында жеңілдетілген несиелендіруге 3,7 млрд.теңге қаржысы бөлініп, қосымша 1 910 жұмыс орындары ашылды.
2 қыркүйекте жарияланған Жолдауда Президент ауылдық жерлердегі кооперацияны ынталандыру үшін тиісті шаралар топтамасын әзірлеу қажет деген болатын.
<blockquote>
 «Алайда кооперативтердің дамуында проблемалар баршылық. Тіпті кейбір алғашында тіркелген кооперативтер арасында «тиімді емес, жауып тастау керек» деген тенденция пайда болды. Оның себебі кооперация жүйесін Қазақстан Республикасы Ауыл шаруашылығы министрлігінің басым бағыттар секторынан алып тастауы. Мәселен, алғашқы кооперативтерді қолдау кезеңінде қолжетімді несиелер мен субсидиялар көп болды. Ал осы мемлекеттік қолдау тетіктерін алуда кооперативтер алғашқы кезекте болды. Екі жыл бұрын бұл артықшылықтар жойылып, кооперативтер үшін осы бағытта кәсібін жүргізуге ынталары күрт төмендеп кетті», – дейді Кәсіпкерлер палатасы директорының орынбасары Пірмұхаммед Сыздықов.
</blockquote>
Палата директорының орынбасары кооперациялар дамуындағы келесі кезеңді қалыптастыру үшін екі ұсыныс беріп отыр.
<blockquote>
 «Біріншісі – ауыл шаруашылық кооперативтерінің тұрақты дамуы және бәсекеге қабілетті болуы үшін «Мемлекеттік сатып алу» туралы заңда жергілікті кооперативтерге байқау кезінде артықшылық беру. Сол кезде ғана, кооперативтер мемлекеттік қолдауды (субсидия, несиені) күтпей, өздігінен дамып, аяққа тұратын бизнес модельге айнала алады. Мұндай норманы нормативтік құжат қабылданғанша, қала және аудан әкімдіктері жергілікті кооперативтердің «Мемлекеттік сатып алудағы» сүт-ет сияқты ауылшаруашылық өнімдерімен қамтамасыз ету лоттарына қатыстыруға ынталандырып, жүйенің тез дамуына септігін тигізуге шақырамын. Жалпы өңірде жеке қосалқы шаруашылықтардың әлеуетін пайдалана отырып орталықтандырылған азық-түлік белдеуін қалыптастыратын уақыт келді», – дейді Пірмұхаммед Сыздықов.
</blockquote>
Палата тарапынан беріліп отырған екінші ұсыныс мынадай.
Өңірде 2017 жылдары несие мен субсидия алған кооперативтер баршылық. Солардың көбісі мемлекеттік қолдау тетіктері тоқтағаннан кейін, несиелерін төлеуі қиындап кеткен. «ҚазАгро» ҰБХ» АҚ-на қарасты қаржы институттары және басқа да несие ұйымдары кәсібін тоқтататын шаралар қолданбай, мүлкін мәжбүрлеп өндіріп алу әрекетіне бармай, аяққа тұру мүмкіндіктерін қайта қарастыруы керек деп есептейді Палата.
<blockquote>
 «Бұл жұмысты облыстық ауыл шаруашылық басқармасымен бірлесе зерделеп, проблемалық жобаларды анықтап, санкцияларды тоқтатуға шешім қабылдауды ұсынамыз», – дейді Палата өкілі.
</blockquote>
<img src="https://kyzylorda-news.kz/wp-content/uploads/2020/09/pirmwhammed-syzdykov-1-scaled.jpg" alt="" />

Қызылорда облысында 88 кооператив тіркелген

<a href="https://kyzylorda-news.kz/date/2020/09/08/">Kyzylorda-news.kz.</a> Қызылорда өңірінде әлеуметтік нысандар жөнделіп, қайта жаңғыруда. «Жұмыспен қамту 2020-2021» Жол картасы аясында ескі ғимараттар күрделі жөндеуден өтіп, ел игілігіне бағытталуда.
Облыстық мәдениет, архивтер және құжаттама басқармасының дерегінше биылғы жылдың өзінде өңірдегі 22 мәдени нысанды қайта жөндеуге қаржы қаралған. Яғни 5 нысанға қайта жаңғырту, 3 нысанға күрделі жөндеу, 14 нысан ағымдағы жөндеу жұмыстарынан өткен. Мәдениет саласындағы құрылыс жұмыстары нәтижесінде уақытша 376 жұмыс орны ашылып, азаматтар жұмыспен қамтылып отыр.
Бағдарлама шеңберінде Қызылорда облыстық филармониясының ғимараты және Шиелі ауданындағы тарихи-өлкетану музейіне қосалқы құрылыс жұмыстары жүргізілген. Сондай-ақ, 150 орындық Шиелідегі Жиделіарық елді мекенінде ауылдық клуб пен Қазалы ауданы, Ақсуат елді мекеніндегі ауылдық клубтың орнына жаңа ғимарат салынып жатыр. Ал, Жаңақорғандағы Түгескен елді мекеніндегі ауылдық клубты қайта жаңғырту жұмыстары аяқталуға жақын.
Биыл күрделі жөндеуді қажет ететін мәдениет нысандарына да қаржы бөлінген. Мәселен, Арал аудандық архиві филиалының ғимараты күрделі жөндеуден өтуде. Сонымен бірге Шиелідегі “Жаназар батыр” ауылдық мәдениет үйі мен Жаңақорған ауданы, Жаңаарық ауылындағы ауылдық клубын күрделі жөндеу жұмыстары іске асуда.
Жауапты мамандардың сөзіне сүйенсек, қазіргі уақытта 22 нысанның ішінде ағымдағы жөндеуді қажет еткен 14 нысанның жұмысы толық аяқталған. Қалған нысандарды мердігер компаниялар белгілі мерзім ішінде аяқтамақ.

Қызылорда облысында 22 мәдени нысан жөндеуден өтуде

<a href="https://kyzylorda-news.kz/date/2020/09/04/">Kyzylorda-news.kz</a>. Өңірде 22 мұнай компаниясы жұмыс жасайды, оның 11-і өндірумен, ал қалған 11-і барлаумен айналысады. Бұл туралы Өңірлік коммуникациялар қызметінің ақпарат алаңында өткен брифингте облыстық индустриялық-инновациялық даму басқармасының басшысы Ринат Сұлтангереев мәлімдеді.
Бүгінде кен өндіру өнеркәсібінің ішінде шикі мұнайдың үлесі 84 пайызды құрайды. Жалпы өңірлік өнімнің 37 пайызы және өңірдегі барлық өнеркәсіп өндірісінің 70 пайыздан астамы мұнай өндіріп, экономиканың барлық салаларына тікелей және жанама әсер етуде. Өңірдің әлеуметтік-экономикалық дамуының кешенді жоспарында республикалық бюджеттен қаржы бөлініп, Шу-Сарысу, Оңтүстік Торғай және Сырдария бассейндерін геологиялық зерделеу көзделіп, жұмыстар жүргізілуде.
Пандемия кезінде мұнай-газ кен орындарында өндірісті тоқтатуға жол бермеу мақсатында, тиісті шешімдер қабылданып, нәтижесінде қызметкерлердің 15 күндік вахталық мерзімі 28 күнге ұзартылды. Басқарма тарапынан вахталық аусымға мониторинг жүргізілуде. Сондай-ақ, кен орындары мен кеніштерде қосымша медициналық эвакуация жағдайлары үшін медициналық персонал және кезекші жедел жәрдем машинасымен қамтамасыздандырылды,-деді Ринат Қалдыбекұлы.
Брифингте өңірдегі мұнай өндіретін ірі екі кәсіпорынның жұмысы туралы баяндалды.
<blockquote>
 “ПетроҚазақстан Құмкөл Ресорсиз” акционерлік қоғамында 1600 адам жұмыс істейді, оның 30-ы шетел азаматы. Бүгінде 504,7 мың мұнай өндірілсе, жыл соңынан дейін белгіленген межеге жету үшін жұмыстар жүргізілетін болады”,-деді «ПетроҚазақстан Құмкөл Ресорсиз» АҚ күрделі құрылыс және сыртқы байланыстар жөніндегі вице-президенті Болат Көшербаев.
 “Қазгермұнай» БК» жауапкершілігі шектеулі серіктестігінде 760 адам қызмет атқарады, оның ішінде 10-ы шетел азаматы. Биылғы жылға мұнай өндіру көлемі 1,5 миллион тонна болатын, қазір жоспардан тыс 17 мың тонна артығымен өндірілді. Және қала тұрғындарына қажетті газбен де қамтамасыз етіп отырмыз”,-деді – «Қазгермұнай» БК» ЖШС бас директоры Мұрат Кеңесбайұлы.
</blockquote>
Сондай-ақ, мұнай өндіретін екі кәсіпорында пандемия кезінде жұмыс істеген қызметкерлерге екі есе үстемақы беріп, уақытылы еңбекақыларын төлеуде.
<img src="https://kyzylorda-news.kz/wp-content/uploads/2020/09/118772558_1106673069728204_8399582907361958133_o.jpg" alt="" />

Қызылордада мұнай өндіретін 11 кәсіпорын бар

<a href="https://kyzylorda-news.kz/date/2020/09/03/">Kyzylorda-news.kz.</a> Қызылордада кәсіпкерлер биыл айналым қаражатына 5 млрд.теңгеге жуық қаражат алған. Бұл туралы облыс әкімінің қатысуымен өткен активте Кәсіпкерлер палатасының директоры Ғалымбек Жақсылықов айтты.
<blockquote>
 «Біздің облыс бойынша экономиканың аса зардап шеккен салаларында 11 мыңнан аса кәсіпкерлік субъектісі қызмет атқарады. «Атамекен» Ұлттық кәсіпкерлер палатасы тарапынан кәсіпкерлер арасында сауалнама жүргізілді. Оған облыс бойынша 3650 кәсіпкер қатысты. Сауалнама нәтижесіне сәйкес, облыс бойынша кәсіпкерлік саласында қызметкерлердің 31 пайызы қысқартылған және 32 пайыз қызметкерлер жалақысы сақталмайтын еңбек демалысына жіберілген. Осыдан-ақ пандемияның зардабын анғаруға болады», – деді Палата басшысы бас қосуда.
</blockquote>
Ол мемлекет тарапынан кәсіпкерлікті қолдау шаралары қабылданып жатқандығын, 460 кәсіпкерлік субъектісінің несиелері бойынша төлемдер кейінге шегеріліп, 49 кәсіпкерлік субъектісі Шағын және орта бизнеске жеңілдетілген несие беру бағдарламасы шеңберінде айналым қаражатын толықтыруға 8 пайызбен бір жылға 5 млрд.теңгеге жуық кредит алғандығын айтты.
<blockquote>
 «Қазіргі күрделі ахуалға байланысты Президент Жолдауында аталған бағдарламаны жүзеге асыру мерзімін 2021 жылдың соңына дейін ұзарту және оның аясын кеңейту тапсырылды. Осы мақсатқа қосымша 200 млрд.теңге бөлінді. Демек, несие алған 49 кәсіпкердің несие мерзімі созылды және басқа кәсіпкерлер де несие алуға мүмкіндік алды. Өңір кәсіпкерлері осы 200 млрд.теңгеден лайықты, қомақты үлесін алу қажет деп есептеймін және бұл бағытта біз түсіндірме жұмыстарын жалғастыратын боламыз», – деді Ғалымбек Жақсылықов.
</blockquote>
Палата басшысы, қазіргі таңда кәсіпкерлер үшін басты проблема – қолданыстағы несиелері екендігіне тоқталды. Ол жөнінде Жолдауда шағын және орта бизнеске қосымша көмек ретінде экономиканың зардап шеккен салаларындағы кәсіпкерлердің қазіргі барлық несиелерінің 6 пайызбен мемлекеттік субсидия беру тапсырылды.
Ұлттық банктің 1 тамыздағы статистикалық мәліметі бойынша өңірде шағын кәсіпкерлік субъектілерінің 28,7 млрд.теңге несиелері бар екен. Бұл кредиттердің басым бөлігі&nbsp; банктерден 15-18 пайызбен тікелей алынған.
<blockquote>
 «Қарап отырсақ, ауқымды жұмыс күтіп тұр. Қажетті бағдарлама, нормативтік актілер әзірленгенге дейін әкімдіктер, кәсіпкерлер палатасы, даму институттары және банктермен бірлесіп, осы бастан дайындық жұмыстарын жүргізуіміз қажет. Қажет болса, жұмыс тобын құру да қажет шығар. Жергілікті кәсіпкерлер мейілінше осы қолдауды алып қалуы қажет», – дейді Кәсіпкерлер палатасының директоры.
</blockquote>
<img src="https://kyzylorda-news.kz/wp-content/uploads/2020/09/zhaksylykov-zholdaw.jpg" alt="" />

Қызылордада кәсіпкерлер биыл айналым қаражатына 5 млрд.теңгеге жуық қаражат алған

<a href="https://kyzylorda-news.kz/date/2020/09/03/">Kyzylorda-news.kz.</a> Қазалы ауданында «Жұмыспен қамтудың 2020-2021 жылдарға арналған жол картасы» мемлекеттік бағдарламасының аясында ауқымды жұмыстар атқарылып жатыр.
Соның бірі Әйтеке би кентіндегі «Аймақаш» мөлтек ауданынан жаңа тұрғын кварталдарды инфрақұрылыммен (газ, ауыз су, электрмен жабдықтау) қамтамасыз ету жұмыстары болатын. Бүгінгі күні аталған аймақта электрмен жабдықтау жұмыстары аяқталып, түнгі жарықшамдар самаладай жарқырап тұр.
Қазіргі таңда ауыз су және газбен қамтамасыз ету жұмыстары қарқынды жүргізіліп жатыр. Аталған жұмыстарды мердігер мекеме «Жылу – ХХІ» ЖШС қыркүйек айының соңына дейін аяқтауды жоспарлап отыр.
Құрылыс-монтаж жұмыстары аяқталған соң, 115 жер учаскесі ашылып, халықтың игілігіне пайдалануға беріледі.
Айта кетейік, «Жол картасы» бағдарламасының негізгі мақсаты жұмыссыздықтың алдын алып, халықты еңбекпен қамту болатын. Осыған сәйкес «Аймақаш» мөлтек ауданынан жаңа тұрғын кварталдарды инфрақұрылыммен қамтамасыз ету жұмыстарына аудандық жұмыспен қамту орталығынан 25 адам жұмыспен қамтылды.

Қазалы ауданында электрмен жабдықтау жұмыстары аяқталды

<a href="https://kyzylorda-news.kz/date/2020/09/02/">Kyzylorda-news.kz.</a> Өткен жылдың аяғында аймақта өткен ХІ «Baikonur invest» инвестициялық форумының аясында 100 млрд теңгеге жуық жобаларды жүзеге асыруға 25 меморандум мен 1 келісімшартқа қол қойылған еді. Соның ішінде аудандағы «Ақжарма-2» шаруа қожалығы «Күріш ақтап, тазалайтын және кіші пастерленген сүт зауытын, жылыжай және көкөніс қоймасын салу» жобасын жүзеге асыруға келісімге келген болатын.
Қазіргі таңда шаруашылық осы жобаларды кезең-кезеңімен іске&nbsp;асыруды қолға алған. Оның ішінде бүгінде күріш тазалау цехының құрылысын салып, егінге орақ түскенде іске қосуда. Осы жұмыстардың барысымен аудан әкімі Руслан Рүстемов танысты.
«Ақжарма-2» шаруа қожалығының төрағасы, аудандық мәслихат депутаты Марат Бисенов аталған жоба «Қарапайым заттар экономикасы» бағдарламасы бойынша қаржыландырылғанын жеткізді.
<blockquote>
 “Егін шаруашылығымен айналысатын қожалық жұмысын дамытып және әртараптандыру үшін түрлі жобаларды жүзеге асыруды жоспарладық. Соған орай бүгінде күріш тазалау цехының құрылысын аяқтап қалдық. Құны 65 млн теңгені құрайтын жоба «Қарапайым заттар экономикасы» бағдарламасымен қаржыландырылып, Чехия мемлекетінен арнайы аппарат әкелдік. Қазіргі таңда цехтың агрегатын орнатып, бір-екі күнде іске қосамыз. Цех жұмысына 10 адам тұрақты жұмыспен қамтылады”, — деді шаруашылық төрағасы.
</blockquote>
Күріш тазалау цехына Чехиядан жеткізілген «VibroMAX» агрегатының құны 52 млн теңгені құрайды. Бұл аппарат тәулігіне 50 тонна астықты тазартады. Шаруашылық төрағасы өз сөзінде 2023 жылға дейін күріш ақтайтын зауыт, кіші пастерленген сүт зауыты, жылыжай және көкөніс қоймасын салу жұмыстары жүргізілетінін жеткізді.
Цех жұмысымен танысқан аудан басшысы бұл жобалар толық іске асырылғанда ауыл халқы жұмыспен қамтылатынын атап өтті.
<blockquote>
 “Аудандағы ірі шаруашылық саналатын «Ақжарма-2» шаруа қожалығы өндірістік бағытта жақсы жобаларды жүзеге асыруды қолға алуда. Соның нәтижесінде күріш тазалайтын цех жұмысы іске қосылмақшы. Мұның қазіргі егін жинау науқанында қажеттілігі зор. Осы жобалар жүзеге асқанда жергілікті тұрғындар тұрақты жұмыспен қамтылады. Жұмыстарыңызға сәттілік тілеймін”, — деді аудан әкімі.
</blockquote>
Шаруашылық екі күн бұрын егінге орақ салғанын ескерсек, қырманға түскен астықты тазартуға цехтың тиімділігі мол.

Қазақстан және Қызылорда облысының жаңалықтары: Экономика