<a href="https://kyzylorda-news.kz/">Kyzylorda-news.kz</a> Бұрынғылар «Отан отбасынан басталады» деп ұрпақтан-ұрпаққа өсиет еткен. Қоғамдағы отбасының құндылығына ерекше назар аударған. Мықты мемлекеттің қалыптасуы үшін әрбір үй мен шаңырақтың береке-бірлігі жарасымды, ынтымағы ырысты болуы керек. Үлкенге ізет көрсету, кішіге құрмет қылу – қазақ тәрбиесінің алтын діңгегі. Ықылым заманнан қазақ ұғымында отбасының орны ерекше. Себебі төскейде малын жайып, түстікте егінін орған қазақ қоғамы отбасы институтының беріктігі мен татулығына мән берген. Осындай шаңырақтың шаттығын ұйыстырып, күнделікті жұмыс барысын да, үйлестіре білетін жандар аз емес. Солардың қатарына – Аманқос Бекеев пен Аманкүл Ақметоваларды қосуға болады. Ерлі-зайыптылардың ерекшелігі – ортақ мамандықты бірге алып жүруінде.Қазір Аманқос пен Аманкүл Қазалы теміржол ауруханасында халыққа қызмет етеді. Аманқос жансақтау бөлімінде анестизеолог қызметін атқарса, Аманкүл емханада күндізгі бөлімде әйелдерге гинекологиялық кеңес береді. Қос дәрігер М.Оспанов атындағы Батыс Қазақстан Мемлекеттік медицина университетінде білім алған.Жалпы, анестезиология мен реаниматологияның негізгі мақсаты – науқастарға операция, диагностика жасау мен емдеу кезеңінде өмірлік қажетті ағзалардың қызметін реттеп, оны қалпына келтіру, медицина қызметкерлеріне жүрек-өкпе-ми реанимациясын, жансақтау әдістерін жүргізуге үйрету болып табылады.<blockquote>– Анестезиология мен реаниматология ең қажетті үш бөлімнен тұрады: реаниматология, үстемелеп емдеу, анестезиология. Анестезиологияның белгіленген әдістері тек қана ота салдарынан болатын ауырсынуды жою үшін, сонымен бірге емдік шараларды жүргізу үшін де қолданылады.</blockquote>Бір сөзбен айтқанда, науқастың операциядан, не болмаса аса қауіпті төтенше жағдайлардан аман-есен шығып, сауығып кетуінде дәрігер анестезиолог-реаниматологтардың үлесі үлкен, – дейді Аманқос Сайлаубайұлы.Аманқос ақхалатты киіп, науқастарға жәрдем беруді жасынан армандап өсті. Бұл күні өз ісінің маманы. Ұжымдастарының арасында абыройлы. Қызметіне адал, әрі тиянақты, дертке шалдыққандарға жанашырлығы зор.Аманкүлдің айтуынша, Аманқос қамқор әке, жан-дүниесі игілікке толы, сенімді сырлас. Әрдайым жұмыс кестеден тыс уақытта пациенттер хабарласып жатқанын көріп, жұмысына деген сүйіспеншілігіне риза болады. Науқастарға дұрыс бағыт-бағдар беріп тұруына кеңес береді.<blockquote>– Қай саланың болмасын өзіндік қиындығы болады. Дегенмен, өзің қалап таңдаған мамандығыңды ерекше ықыласпен атқарасың. Негізінде, гинекология әйелдің организміне ғана, тән аурулар мен репродуктивтік жүйесінің дерттерін зерттейтін медицинаның бір бөлігі саналады. Врач-гинекологтардың көпшілігі, қазіргі кезеңде акушер болып жүр. Гинекология жүктілік пен тууға қатысты, бастапқы кезеңнен соңғы кезеңге дейінгі, әйел организміндегі көріністерді зерттейтін, акушерлікпен тығыз байланысты. Күні бойы қаншама әйел көрінуге келеді. Сол аралықта олардың анатомия-физиологиялық, психикалық ерекшеліктерін қадағалаймын. Кейбіріне шұғыл ем қажет болса, порталға салып, ауруханаға ем алуға жолдама беремін. Тіпті, кей кездері облысқа жібереміз, – дейді Аманкүл.</blockquote>

Науқастарға шаттық сыйлаған отбасы

<a href="https://kyzylorda-news.kz/">Kyzylorda-news.kz</a> Бүгінде бір мамандықта өмірін тоғыстырған жандар аз емес. Бір әулетте төрт дәрігер – екі терапевт пен тіс дәрігері және реаниматолог. Отбасымен денсаулық күзетінде. Балтыр сыздап, бас ауырса, ақ халаттылардың алтын қолына жүгінетіміз жасырын емес. Олар негізгі жұмысымен қатар, шаңырақтың тірегі, балаларына қамқор ата-ана. Солардың бірі – Бақытбек Оңбосынұлы мен Перизат Серікқызы деуге болады. Бұл жұп үлкен жауапкершілікті жүктейтін дәрігерлік мамандықты таңдаған. Олар М.Оспанов атындағы Батыс Қазақстан мемлекеттік университетінде білімін жетілдіріп жүргенде танысқан. Осылайша, ортақ кәсіпті меңгерген екеуі басқосып, шаңырақ көтерген.Қазір бірі – Қазалы теміржол ауруханасының жансақтау бөлімінде анестезиолог-реаниматолог қызметін атқарса, екіншісі халыққа терапевт кеңесін беруде. Нақты айтсақ, Бақытбек М.Оспанов атындағы Батыс Қазақстан мемлекеттік университетін 2014 жылы жалпы тәжірибелік мамандығы бойынша меңгеріп шықты. Еңбек жолын сол жылы Қазалы теміржол емханасында бастады. Ал зайыбы Перизат екі жылдан соң терапевт мамандығын иеленді. Осы күні ересектер және балалардағы жұқпалы аурулар, яғни инфекционист мамандығы бойынша екі жылдық резидентурасын оқуда.Бүгінде ерлі-зайыптылар қаншама науқастың өміріне араша түсіп, адам анатомиясын терең меңгерген. Олар кез келген жағдайда қиындыққа мойымайды. Қос дәрігер күйзеліске төзімді, жүйкесі мықты жандар қатарында. Осы қасиеттерді үш баласына дарытуда.Анестезиология және реанимация мамандығы бойынша даярлық курстан өткен Бақытбек теміржол ауруханасының жансақтау бөлімінде ауыр науқастармен жұмыс істеп келеді. Күн-түн демей, дертке шалдыққандарға барынша, дәрігерлік кеңесін береді. Өнегелі отбасы әріптестері арасында абыройлы, қызметте үлгілі дәрігер. Екеуі де, көптеген аудандык, облыстық марапатты иеленген.<blockquote>– Айығудың ең негізгі шартының бірі – жазылуға деген құлшыныстың болуы. Егер, іс-әрекеттеріңізде емделуге деген құлшыныс болмаса, жалғыз дәрігердің емі нәтиже беруі екіталай деп Сенека Луций айтқаны бар. Жұмыс барысында әртүрлі адамдар кездеседі. Кейбір жандар аяққа тұруына мүмкіндік бола тұра, өздерін -тастап жібереді. Енді бірі – ауыр жағдайда түссе де, өмірге құштарлығы арқылы денесіне дендеген дертінен тез айығады. Ал, дәрігерлер науқасты аман алып қалуда өзінің үш қаруын қолданады. Ол – сөз, дәрі-дәрмек және ота жасап, дертті жеңу болып табылады. Бізге түскен әрбір жанмен жылы сөйлесіп, жанына медеу болуға барымызды саламыз. Оның аз уақытта ем алып, айығып шығатынына сенім артамыз, – дейді Бақытбек Төлегенов.</blockquote>Бақытбектің айтуынша, бала кезден ақхалатты киіп, ауруханада дертке шалдыққандарды емдеуді армандаған. Себебі, ағасы Сахи мен Ғалымжан Төлегеновтер де, осы саланың мамандары. Бірі – дәрігерлік қызметті ұзақ жыл атқарып, құрметті зейнетте болса, екіншісі – тіс дәрігері ісімен көпке сыйлы.<blockquote>– Егер, сен дәрігер болсаң, тек, медицинамен айналыс, ғылымдағы танымыңды арттыр. Қасиетті Құранда: «Алла тағала адамның кеудесіне екі жүрек жасаған емес» дейді. Сондықтан, медицина білгірі бола тұрып, келесі бір мамандықтың да, шебері бола алмайсың. Бизнесте жетістікке жеткен дәрігерлер бар. Олар ем-дом жүргізіп жатқанда, өзге кәсібі кедергі келтіріп, науқас зардап шегуі мүмкін. Немесе, дін шеңберінде білгенін алға тарта беретін де, дәрігерлер кездесіп қалады. Олар үшін ең жақсы, қайырлы нәрсе – өз ісімен айналысу. Сондықтан, бар білік, жігерімізді медицина саласына жұмсауға тырысудамыз. Әркез басшы тарапынан қолдау жасалады. Дәрігерлік білімді жетілдіру курсына сала мамандары жіберіледі, – дейді Перизат Сейдахметова.</blockquote>Біздің тараптан Ибн Синаның: «Дене шынықтыру жаттығуларымен шұғылдансаң, дәрігерге пысқырып та, қарамайсың» деген сөзі ойға келеді. Сондықтан, ауырып ем іздегенше, ауырмайтын жол іздеуге әркез ұмтылайық. Салауатты өмір салтын қалыптастырудан қол үзбейік.

Бір мамандықта өмірін тоғыстырған

<a href="https://kyzylorda-news.kz/">Kyzylorda-news.kz</a> Ата-әжесінің ерке қызы Жұлдыз мектепті беске бітірді. Ол Қазалы ауданының Бозкөл ауылының тумасы. Мектептен соң арман қуып, Алматы қаласына келді. Колледж, университетте білім алып, қызыл дипломмен тәмамдады. Үнемі үйренсем, білсем, білімімді одан әрі жетілдірсем деп алға ұмтылатын ару магистратуралық білімді жалғастырды. Ай артынан жыл келіп, уақыт жылжи берді. Қуанышты сәттер, жетістікке толы бақытты күндердің бірінде Германия елін көруді де, Алла нәсіп етті. Осылайша, жайраң қағып, жадырап жүрген Жұлдыздың жүзін әп-сәтте мұң торлады. Оған себеп – дәрігерлердің «Өкпенің қатерлігі ісігіне шалдыққансыз» деген сөзі.Бұны алғаш анасы Сарбиназ естіді. Емтихан алдында дәрігерлік тексерістен өткен қызының өкпесінен онкологиялық аурудың белгісі табылды дегенде төбесінен жай түскендей болды. Өзі де, медицина саласының қызметкері болғандықтан ауру туралы жете түсінді. Егіле жылап, Алладан ғана, жәрдем сұрай берді. Қызына қалай жеткізерін білмей жүрегі қан жылаған ана уақыт оздырмай дәрігерлермен бірлесе отырып, Жұлдызға мән-жайды айтты. Алайда, қайсар қыз бұл ауруға алғашында көндіге алмады. Тіпті, өзіне хабарласып, хал-жағдай сұраған жақындары әңгіме ауанын сырқатына қарай бұрса, сөйлескісі келмей, телефон тұтқасын тастай салатын еді.Алайда, уақыт өте келе ем-дом алудың керектігі айқын сезілді. Жұлдызды жиі жөтел қысып, бойын әлсіздік биледі. Аяғы домбыға ісіп, көңіл-күйі де пәс еді. Ота жасайтын сәт те жетті. Санасын түрлі ой торлап алды. «Жарық дүниенің сәулесін енді көре алар ма екенмін?» деп іштей сан мыңдаған сұрақпен арпалысты. Үйдің үлкені болған соң, атасы Оңдаш пен әжесі Қалаудың қызы атанып, әке-шеше тілін көп алмағандығы ойына оралды. Анасын атымен атайтын. Еркеліктен болар, кейде ауыр сөздер айтып, ана жүрегін жаралаған кездері де жоқ емес. Балалық, жастық шағы көз алдынан кино лентасындай көлбеңдеп өте берді. Іштей өкініп, қынжылған қыздың жанарына жас үйірілді. Жанына жалау болып, қай кезде де қасынан табылған анасының алақанына басын қойып: «Мен сізді ренжіткен сәтім болса кешіріңізші!», – деп мұңлы жанарын төмен салды.«Алла, баламның жанын аман қалдыр» деп күн-түні дұға тілеген ана: «Алтыным, мен саған ешқашан ренжіген жоқпын. Барлық қылығыңды кешірдім, ештеңе ойлап, уайымға берілме», – деп тұңғышын бауырына қысты.Дәрігерлер тікесінен тік тұрып, тоғыз сағат бойы ауыр сырқаттан өмірін сақтауқаракетімен айналысты. Өкпенің обыр жеген үштен бір бөлігін алып тастады.<blockquote>– Бір кезде біреу бетімнен шапалақпен тартып жібергендей болды. Бір дауыс: «Болды, Жұлдыз тұр!» дейді. Көзімді ашып, жан-жағыма қарадым. Не екенін түсіне алар емеспін. Сәлден соң есімді жидым. Ояу екенімді біліп, «Аллаға шүкір, мен тұрдым» деп қуанғаным есімде, – дейді Жұлдыз Самалбекқызы бізбен әңгімесінде.</blockquote>Бір ай дегенде нәтижесі белгі берді. Алайда оншалықты көңіл қуантпады. Дегенмен аурудың төртінші сатыдан үшінші сатыға түсуі көңілге демеу. Ендігі үміт – химия-терапияда. Алғашқы химиялық емнен кейін, үш күннен соң Жұлдыздың шашы, қас-кірпігі түсе бастады. Тамаққа тәбеті қашып, су ішіудің өзі мұңға айналды. Он келідей салмақ тастады. Осы сәтте Жұлдыздың үміті үзілуге шақ қалды. Жұлдыз: «Айналамдағы жандардың бәрі маған мейірімін төгіп, қамқор қолын созуда. Мен неге өмір үшін күреспеймін. Мен мықтымын, бәрін жеңіп шығамын!», – деп өзін жігерлендірді. Күні-түні ем қабылдап жатса да, қанша қиын тисе де, түнде тұрып, намазын оқып, Алла Тағалаға мінәжат етті. Дұрыс тамақтануға аса мән беріп, санасын сәулелендіруге күш жұмсады. Ауру меңдеп, өңі қурап, көркі тайса да, күнде айна алдында отырып: «Мен әдемімін. Мен жазылған соң, ауруды қалай жеңгендігім туралы әлі-ақ, көпшілікке айтып беремін», – деп өзіне уәде берді.Бүгінде жүрек түкпіріндегі сенімі сырқатын жеңуге жетелеген ару аурудан құлан-таза айығып, қатарға қосылды. Әрқашан күлімсіреп жүретін Жұлдыз Оңдаш:<blockquote>– Өмірдегі ең қиын нәрсе – ол өліммен бетпе-бет келу. Атақ-мансабың, байлығың, барың бәрі-бәрі көмектесе алмайды. Адамдар кішкене қиыншылыққа кезіксе, көтере алмай, сынып кетіп жатады. Аурухана төсегіне таңылып, үміттен күдігі басым аурумен арпалысқан сәтте мен осыны ұқтым. Көп іздендім, жан-жақты мәлімет жинадым. Адамдармен, тіпті әлеуметтік желі арқылы болсын байланысты үзбедім. Ештеңеден, ешкімнен қымсынбай, ауруымды ашық айттым. Адамдардан ақшалай емес, рухани қолдау сұрадым. Аллаға шүкір, қайта қатарға қосылдым. Менің ең басты арманым – қолымнан келгенше, адамдарға жақсылық жасау, көмек қолын созу, – деген Жұлдыздың жігерлілігі мен қайсарлығы тәнті етті.</blockquote>

Жігерлігінің арқасында қауіпті дертті жеңген ару

<a href="https://kyzylorda-news.kz/">Kyzylorda-news.kz</a> &nbsp;Айдынды Аралдың Шөмішкөл бөлімшісінен түлеп ұшқан Анар Ибраймова медицина саласына еңбегі сінген дәрігер. Қарапайым отбасынан шыққан Анар Жаңабайқызы қай кезде де, биязы қалпынан таймайды. Саламатты өмір салтын ұстанатын дәрігер мектепті үздік бітіріп, ата-анасының мақтанышына айналған.Негізінен, Анар Жаңабайқызы Ақтөбе қаласындағы Марат Оспанов атындағы Батыс Қазақстан мемлекеттік университетінде «Педиатрия» мамандығы бойынша білімін жетілдірген. Сала маманы медцинаға келмес бұрын білім саласында аз ғана уақыт қызмет еткен. Ал өзінің сүйікті мамандығы бойынша Сырдария аудандық «Өкпе аурулар» ауруханасында рентгенолог дәрігер ретінде еңбек жолын бастаған. Өз кезегінде кәсіби біліктілігі жоғары маман 2008 жылдан бері фтизопедиатр болып қажырлық танытуда. Айта кетейік, Анар Жаңбайқызы жеңіл атлетикамен тұрақты түрде айналысады.&nbsp;<blockquote>– Өзім сүйікті қызметіме қызығамын. Балалармен жұмыс жасау асқан жауапкершілікті жүктейді. Балалар арасында туберкулез дертінің болдырмау үшін барымызды саламыз. Үнемі түсіндірме жұмысын жүргізіп, денсаулықты жақсартуға байланысты кешенді іс-шараларға иек артамыз. Дене қимылына көңіл бөлген адамның денсаулығы мықты болады. Жеңіл атлетиканың жүгіру спортымен ұдайы айналысамын, – деді дәрігер.</blockquote>

Балалар денсаулығын жақсыртуға көңіл бөлген жан

<a href="https://kyzylorda-news.kz/">Kyzylorda-news.kz</a> Күн сайын қаншама сәби дүниеге келеді. Жарық өмірдің есігін ашып, ана мейіріміне бөленеді. Айналасына бақыт сыйлайды. Осы бір ғажайып сәтті сезінуде ақ халатты абзал жандардың үлесі зор.Көпбейінді облыстық аурухананың акушерлік бөлімінің бас акушері Гүлзат Жолдасбекқызы 30 жылға жуық ана мен баланың аман-есен қауышуына себепкер болып, өзіне жүктелген міндетті абыроймен атқарып, аналар алғысын арқалаған абзал жан.Жастайынан жазуға бейім, шығармашылыққа жаны жақын кейіпкеріміз әуелде журналист болуды армандаған екен. Алайда мектеп қабырғасында жүріп шығармашылық қабілетін шыңдап, осы салада қызмет етемін деген оның мақсаты басқа арнаға бұрылады.<blockquote>– Әр адамның бала кездегі арманы болады ғой. Менің де арманым журналист болу еді. Бірақ дәм-тұз медицина саласынан бұйырған екен. Мектеп бітіретін жылы ағам менің медицина саласын таңдауым керектігін, осы салаға икемім барын, мықты маман болатынымды айтты. Көп ұзамай ағам ауыр дерттен көз жұмды. Сол сәтте оның бұл айтқандарын өзіме аманат ретінде қабылдадым. Солай 1991 жылы Жезқазған медицина училищесіне оқуға түсіп, акушер мамандығы бойынша үздік дипломмен аяқтадым, – дейді кейіпкеріміз.</blockquote>Жалпы денсаулық саласындағы әрбір маманның ісі жауапкершілікті, біліктілікті қажет етеді. Ал акушерлік сала мамандары бір емес екі адамның өмірі үшін жауапты. Білім, біліктілікпен бірге тиянақтылық, жауапкершілік қасиет дәрігердің бойынан табылуы тиіс. Отыз жыл осы саланың қызығы мен шыжығын көріп, 10 мыңнан астам баланың кіндік шешесі атанған Гүлзат Жолдасбекқызы алғашқы еңбек жолын Қармақшы аудандық перзентханасынан бастаған. Еңбек жолын ел үшін қиын-қыстау кезеңде бастаған ол бүгінде медицина саласының қарқынды дамып жатқанын айтады.<blockquote>– Еліміз тәуелсіздік алғаннан кейінгі жылдар оңай болған жоқ. Тек денсаулық емес барлық салада құлдырау болды. Ол тұста жаңа босанған аналарға жағдай жасалмаған, тіпті дәрі-дәрмекте тапшы болатын. Соған қарамастан мамандар ана мен бала өмірін сақтау үшін аянбай еңбек етті. Қазір денсаулық саласы күн санап дамып келеді. Перинаталдық орталықтар соңғы үлгідегі құралдармен жабдықталған. Ананың жеңіл босануы, баланың аман-есен тууы үшін бар мүмкіндік қарастырылған. Осыған қуанамын, – дейді өткенді саралаған&nbsp;Гүлзат Жұмабекова.</blockquote>Кейіпкеріміз 30 жылдық еңбек жолында Қармақшы, Байқоңыр қалаларындағы перзентханада жұмыс істеп, 2009 жылы Қызылорда қалалық перзентханасына ауысады. Бүгінде жоғары санатты акушер Гүлзат Жолдасбекқызы облыстық денсаулық басқармасының штаттан тыс бас акушері, көпбейінді облыстық аурухананың акушерлік бөлімінің акушері. Үнемі ізденіс үстінде жүретін маман Астана, Алматы, Ақтөбе қалаларында бірнеше рет білімін жетілдірген. Өзінің тәжірибесін ауыл-аймақтан келген акушер, жас мамандармен бөлісіп, акушерлік көмектің сапалы атқарылуына үлесін қосуда. Қашанда жас мамандарға үйретуден жалықпайтын кейіпкеріміз олардан жұмыс барысында жауапты, тиянақты болуды талап етеді. Ана мен бала өмірі үшін жауапкершілікті сезінбей сапалы қызмет көрсету мүмкін емес. Сондықтан еңбек жолын енді бастаған шәкірттерінің&nbsp;білікті маман болып қалыптасуына үнемі ақыл-кеңесін беріп, тәжірибесімен бөлісіп келеді.&nbsp; &nbsp; &nbsp;Кейіпкеріміз «білімділікті, біліктілікті, қырағылық пен жауапкершілікті талап ететін қызмет жолын таңдап, ана мен баланың аман-есен қауышуына себепкер болуды өмірдің өзіне жүктеген міндеті деп түсінеді. Жуырда акушерлер арасында өткізілген облыстық байқауда жеңімпаз атанып, «Үздік акушер» атанған Гүлзат Жұмабекова отыз жыл аға аманатына адал, халыққа алғаусыз қызмет көрсетіп келеді.Айдана СЕЙІЛ

Гүлзат Жолдасбекқызы: Денсаулық саласындағы әрбір маманның ісі жауапкершілікті, біліктілікті қажет етеді

<a href="https://kyzylorda-news.kz/">Kyzylorda-news.kz</a> &nbsp;Аудан орталығынан шалғайда орналасқан Айдарлы ауылында 1300-ден аса халық бар. Бірлігі бекем, тірлігі көркем ауылда білікті дәрігер Ерболат Орынбасаров халық денсаулығын жақсарутға үлес қосуда. Үнемі аудан орталығы мен ауыл арасын жол қылған сала маманы Шаған ауылының тумасы. Алғаш жас дәрігер Қызылорда қаласындағы медициналық колледжін бітірген. Сонымен қатар «Жалпы тәжірибелік дәрігер» мамандығы бойынша Ақтөбе қаласындағы Марат Оспанов атындағы Батыс Қазақстан мемлекеттік университетінде білімін жетілдірген.Осыдан 11 жыл бұрын әскери орышын өтеген сала маманы халыққа қалтқысыз көмек көрсетуге дағдыланған. Күнделікті жұмыс барысында үйлерді аралап, төсек тартып жатқан науқастардың жағдайын назарда ұстайды. Уақытпен санаспайтын дәрігердің зайыбы Гүлназ Кәрімжанқызы Шымкент қаласында дүниеге келген. Жас ерлі-зайыпты бір салада еңбек етеді. Оның аяулы жары да, «Жалпы тәжірибелік дәрігер» мамандығын игерген. Қазіргі уақытта Қызылорда қаласындағы №1 емханада жұмыс жасайды. Бүгінде жарысымды жұп 1 перзенттің ата-анасы.<blockquote>– Айдарлы ауылында жергілікті халыққа медициналық кеңес беріп, сырқатынан айықтырамыз. Созылмалы дерті бар жандарды бақылауда ұстауға мүдделіміз. Әрдайым халық алығысына бөленіп, ауыл медицинасының алға басуы үшін жұмыс жасаймыз, – деді жас дәрігер.</blockquote>

Ауыл халқының сүйікті дәрігері

<a href="https://kyzylorda-news.kz/">Kyzylorda-news.kz</a> &nbsp;Жаныңа шипа дарытып, тіпті ажал құрсауынан арашалап алатын дәрігерлер қашанда қоғамда айрықша бағаланады. Елеулі еңбегі мен жылулыққа толы мейірімді қалыппен халықтың ақ батасын алып жүрген қызметкерлер кез келген мақтауға лайық.Бүгінде басы ауырып, балтыры сыздаған жанға демеу, антына адал дәрігерлер ауданымызда жетіп артады. Солардың қатарына Ерболат Жасанов пен Салтанат Қабылованың отбасын қосуға болады. Ерлі-зайыптылар Қазалы теміржол ауруханасында қызмет атқарады. Ерболат дәрігер уролог болса, Салтанат осы аурухананың провизоры. Отбасында Нұрай, Ердәулет, Рамазан мен Медина және Хансұлтан есімді ұл-қыздарын тәрбиелеуде. Қос дәрігер тұрғындар мен ұжымдастары арасында абырой мен беделге ие. Екеуі де ең алдымен адамгершілігі әрі біліктілігімен танылып, өзгелерден озық тұрады.Ерболат мұғалімдер отбасында тәрбиеленсе де әке жолын қумады. Ол өз арманын медицина саласымен ұштастырды. Бала кездегі қиялын 1998 жылы Ақтөбе қаласындағы М.Оспанов атындағы Батыс Қазақстан мемлекеттік медицина академиясында жүзеге асырады. Таңдаған білім ордасында әрбір сабаққа ықыласпен қатысып, оқу орнындағы емдеу ісі факультетін хирургия саласы бойынша бітіреді. Қызылорда облыстық медициналық орталығында хирургия мамандығы бойынша бір жыл интернатурада жүріп, алғашқы тәжірибеден өткен соң жолдамамен Қазалыдағы теміржол ауруханасында дәрігер уролог қызметіне келеді.Қазір білікті маман гемодиализ бөлімінің меңгерушісі лауазымын атқаруда. Яғни созылмалы бүйрек жетіспеушілігімен сырқаттанатындарға қажетті ем-дом жүргізеді.Білікті дәрігердің айтуынша, урология – ерлердің бүйрек, қуық, простатит ауруларын және несеп жолдарындағы тастарды хирургиялық және дәрі-дәрмекпен емдеу саласына жатады.– Бүгінгі күні еркектер денсаулығының басты мәселесіне айналған простатит суықтан және инфекция жұқтырып алудан да болады. Мұндай дертке бір орында ұзақ отыратын жүргізуші, есепші және басқа да кәсіппен шұғылданатын кісілер шалдығады.<blockquote>Простатитке 20-60 жас аралығындағылар жиі ұшырайды. Десек те уақыт өткізіп алмай урологқа уақытылы қаралған дұрыс. Тағайындалған емді қабылдағандар одан айыға алады. Жалпы 18-40 жастан асқан ер-азаматтар жылына бір рет урологқа қаралып тұрғаны жөн. Себебі соңғы жылдары ерлер арасында бедеулік белең алуда. Егер ер азамат шаңырақ көтеріп, 6 айда әйелі жүкті болмаса дереу урологтың көмегіне жүгіну керек. Қазір ерлердің көбі намыстанып, дәрігерге көрінбей ем алу мерзімін өткізіп алады. Есесіне олар ұрпақ сүю қабілетінен айырылып қалуы мүмкін, – дейді Ерболат Жасанов.</blockquote>Ерболат қосымша дәрігер трансфузиолог қызметін жүргізеді. Оның өз міндетіне деген жауапкершілікті жақсы сезінетінін Қазалы теміржол ауруханасының бас дәрігері Құбыл Ршымбетовтың пікірінен айқын аңғардық.<blockquote>– Ерболат Жасанов ауруханада жатқан урологиялық науқастарға өз бетінше ота жасайды. Соның арқасында ересектер мен балалар арасында диспансерлік науқастардың есебі азайып, санитарлық ағарту жұмыстары жақсарған. «Андро-Гин» аппаратымен простатиттің барлық түрін: созылмалы везикулит, эрекцияның бұзылысы, ер бедеулігін емдейді.</blockquote>Бүгінде Ерболат Арал, Қазалы, Қармақшы аудандарының созылмалы бүйрек жетіспеушілігінің науқастарына аптасына төрт сағаттық жоспарлы гемодиализ сеансын жасап, жұртшылықтың алғысына бөленіп жүр. Әріптестері мен халық арасында беделі жоғары, сауатты маман саналады, – дейді бас дәрігер.Салтанат Егізбайқызы да М.Оспанов атындағы Батыс Қазақстан мемлекеттік медицина академиясында фармацевт мамандығы бойынша білім алды. Қазір дәріхана бөлімінің меңгерушісі. Ол ауруханадағы емделушілерге дайындалған дәрілердің сапасын тексеріп, бөлімшелерге қажетті мөлшерін босатады. Жұмысын тиянақты орындайтын маман он жылдан аса медицина саласында сүбелі үлес қосып келеді.Қай кезде де бірінші байлық – денсаулық екені заңдылық. Солай бола тұра, бұл қағиданың орындалуы үшін білікті мамандардың да рөлі ерекше екенін ескерген жөн. Сондықтан, түн ұйқысын төрт бөліп, науқастардың айығуына себепші – ақ халаттылардың халық денсаулығын жақсарту жолында қайраттары қажымасына сенім мол.

Отбасылық дәрігер – медицина ертеңі

<a href="https://kyzylorda-news.kz/">Kyzylorda-news.kz</a> &nbsp;Медицинаның ең күрделі саласының бірі – травматология екені даусыз. Әркез адамның денсаулығын қатты зақымдайтын дене жарақаты, сынық секілді бірнеше дертке ем-шара жүргізетін дәрігер үнемі біліктілігін арттырып отырады. 2004 жылдан бері Сырдария аудандық ауруханасының травматолог-дәрігері қызметін абыроймен атқарып келе жатқан Аман Аманкелдіұлының есімі көпшілікке таныс.Білікті дәрігер әрқашан жүйелі жұмысымен даралана білген. Тынымсыз еңбектің арқасында орасан зор жетістіктерге қол жеткізген. Ол – Қарағанды қаласындағы медициналық акадамияда білім алған. Сәкен Сейфуллин ауылының тумасы науқастарды емдеп-жазуға күш-жігерін салып келеді. Әрине, кәсіби тұрғыдан науқастарды емдеп жазуға күш-жігерін жұмсауда.<blockquote>– Күн сайын жанына шипа іздеген жандарға қолғабыс ету – басты парызымыз. Әрине, травматология саласы нағыз асқан ыждағаттылықты қажет етеді. Аудан тұрғындарына кәсіби тұрғыдан ем-шара тағайындап, сырқатынан айықтыруға үле қоса береміз, – деді тәжірибелі дәрігер.</blockquote>20 жылдық жұмыс өтілінде Аман Самалықов бірнеше марапат иесі атанған. Алдағы уақытта ел-халықтың сенім үдесінен шығып, аянбай еңбек ете бермек.

Күрделі салада шыңдалған маман

<a href="https://kyzylorda-news.kz/">Kyzylorda-news.kz</a> Маусым айының үшінші жексенбісі &nbsp;медицина қызметкерлерінің төл мерекесі. Асқан шеберліктің иесі ақ халатты абзал жандар &nbsp;құрмет пен алғысқа лайық. Мереке қарсаңында &nbsp;“AMANAT” партиясы Байқоңыр филиалының Атқарушы хатшысы М.Есбенбетов Байқоңыр қаласының көпбейінді ауруханасының қызметкерлерін Халықаралық медицина қызметкерлері күнімен құттықтады.<blockquote>Ақ халатты абзал жандармен кездесу барысында Байқоңыр партия филиалының Атқарушы хатшысы М.Есбенбетов: "Денсаулығымыз сыр беріп, жанымыз қысылғанда көмек қолын созуға қашанда дайын тұратын дəрігерлерді əрдайым дəріптеуіміз керек. Медицина саласының мамандары қандай мəртебеге, марапатқа болсын əбден лайық. Сондықтан да, ақ халатты абзал жандарға құрмет көрсету – əрбіріміздің азаматтық борышымыз", - деп атап өтті.</blockquote>Бүгінгі мерекелік кездесу барысында "Денсаулық" бастауыш партия ұйымның төрағасы, Байқоңыр қаласының көпбейінді ауруханасы бас дәрігерінің орынбасары Е.Игенбаев, аймақтық қызмет көрсету бөлімінің меңгерушісі Г.Тенелбаева "AMANAT" партиясының Атқарушы хатшысы Д.Кәрібектің Алғыс хаттарымен марапатталды.Бiлiм мен мейiрiмдiлiктi ұштастыра бiлген барлық медицина қызметкерлерін төл мерекесімен құттықтап, дендеріне саулық, еңбекте табыс, отбасыларына бірлік, береке тілейміз.&nbsp;

Байқоңырлық ақ халаттылар марапат төрінен көрінді

<a href="https://kyzylorda-news.kz/">Kyzylorda-news.kz</a> &nbsp;Маусым айының үшінші жексенбісі – медицина саласы қызметкерлерінің кәсіби мерекесі. Бүгінде өңірде 150-ден астам медицина ұйымы бар болса, онда 3000-ға жуық дәрігер мен 11 мыңнан астам орта буынды маман қажырлы еңбек етіп келеді. Бұдан бөлек, Сыр медицинасын серпінді дамыту мақсатында аймақ басшысының қолдауымен өткен жылы 21 денсаулық сақтау нысанының құрылысы жүргізілсе, биыл 17 медицина ұйымының іргетасы қаланды. Сонымен қатар, облыс орталығында бір ауысымда 100 келушіге арналған емханасы және онкологиялық бөлімшесі бар 300 орындық көпбейінді аурухананың құрылысы жүргізілуде. Осы және өзгеде саладағы жағымды жаңалықтар туралы Өңірлік коммуникациялар қызметінің ақпарат алаңында облыстық денсаулық сақтау басқармасының басшысы Олжас Искаков БАҚ өкілдеріне баяндап берді.<blockquote>– Сыр медицинасы уақыт өткен сайын серпінді дамып келеді. Мәселен, жыл көлемінде тәжірбиелі мамандардың шақыртуымен шеберлік сағаттары өткізіліп, 21 түрлі ота жаңадан енгізілді. Сондай-ақ, осы жылы араға 9 жыл салып бүйрек трансплантациясы жасалды. Бұл біздің сала үшін үлкен жетістік деп айтуымызға болады. Соңғы жылдары өңірімізде денсаулық сақтау ұйымдарының саны едәуір артып келеді. Атап айтсақ, жақын арада 5 мыңнан 10 мыңға адамға дейін қызмет көрсетуге қауқарлы, соңғы үлгідегі қан орталығы ел игілігіне пайдалануға беріледі. Сонымен қатар, Мемлекет басшысының бастамасымен қолға алынған «Ауылдық денсаулық сақтауды жаңғырту» ұлттық жобасы аясында аймағымызда 27 медициналық нысанды салу көзделген болатын. Былтыр аталған жоба бойынша елді мекендерде 15 жаңа дәрігерлік амбулатория, 1 медициналық бекет пайдалануға берілді. Қалған нысандар Арал, Қазалы, Шиелі, Жаңақорған ауданаралық көпбейінді ауруханалары жанынан қосымша нысан ретінде салынатын болады. Алдағы уақытта Жаңақорған ауданындағы көпбейінді аудандық аурухана базасында «Қамқорлық» оңалту орталығы ашылмақ. Сондай-ақ, биыл өңірдегі барлық елді мекендердегі денсаулық сақтау ұйымдарына 200 санитарлық автокөлік табысталды. Осылайша, биыл елді мекендердегі жедел жәрдем көлігінің жетіспеушілігі түбегейлі шешілмек. Бұдан бөлек, денсаулық сақтау ұйымдарына 560 дана қажетті медициналық құрал-жабдық сатып алынып, қамтылу көрсеткіші 87,10 пайызға дейін артты, - деді Олжас Ермекұлы.</blockquote>Сыр медицинасының әлеуетін арттыру мақсатында 2018 жылдан бүгінге дейін сұранысқа ие мамандықтар бойынша 155 резидентке, 162 жалпытәжірибелік дәрігерді даяулау мақсатында облыс әкімінің арнайы гранты бөлінген болатын. Осының нәтижесінде, 2023 жылы 590 дәрігер, 738 орта буынды медицина қызметкері біліктіліктерін арттырып, тәжірибе жинады. Ал биыл облыстаға 10 реаниматолог, 5 кардиолог маман Түркия елінде өз білімдерін жетілдірді.Фото: Қызылорда облысының Өңірлік коммуникациялар қызметі

Денсаулық сақтау саласы дамып келеді

<a href="https://kyzylorda-news.kz/">Kyzylorda-news.kz</a> &nbsp;Медицина саласында жасанды интеллекттің (ЖИ) қолданылуы қарқынды дамып келеді. ЖИ технологиялары ауруларды ерте анықтау, дәл диагноз қою, емдеу әдістерін таңдау және пациенттердің күтімін жақсарту бағытында үлкен жетістіктерге қол жеткізуде. Бұл мақалада медициналық ЖИ-дің қазіргі жетістіктері мен мүмкіндіктерін талқылағанды жөн көрдік.<h2 style="text-align:justify;">Медицина жетістігі</h2>Жасанды интеллектке дейін облыстағы медицинаға тоқталсақ. Бүгінде облыстағы 150-ден астам медицина ұйымдарында 3000-ға жуық дәрігер, 11&nbsp;мыңнан астам&nbsp; орта буынды маман қызмет етеді. 2018 жылдан бүгінге дейін 155 резидентке, 162 жалпы тәжірибелік дәрігерді даярлауға облыс әкімінің арнайы гранты&nbsp; бөлінiп, өткен жылы 590 дәрігер, 738 орта буынды медицина қызметкерлері біліктіліктерін арттырды. Биыл мамандардың біліктілігін еліміздің алдыңғы қатарлы медицина орталықтарымен қатар озық тәжірибелі шет елдерде арттыру көзделіп отыр. Осы жылдың сәуір айында&nbsp; 10 реаниматолог, 5 кардиолог маман Түркияның Стамбул қаласындағы «Мемориал» клиникасында білімдерін жетілдіріп қайтты.&nbsp;Сондай-ақ, қан орталығының құрылысы ашылуға дайын. Оған республикалық бюджеттен 2 млрд 900 млн теңге бөлінген. Жылына 5000-нан10000 адамға дейін қызмет көрсетуге мүмкіндігі бар орталық соңғы үлгідегі заманауи құралдармен жабдықталған.Мемлекет басшысының бастамасымен қолға алынған «Ауылды қденсаулық сақтауды жаңғырту» ұлттық жобасы аясында өңірімізде жалпы құны 11млрдтеңгені құрайтын 27&nbsp;нысан салу көзделген болатын. &nbsp;Өткен жылы Ұлттық жоба аясында елді мекендерде 15&nbsp;жаңа дәрігерлік амбулатория,1медициналық бекет пайдалануға берілді. &nbsp;Қалған 11 нысан және Арал, Қазалы, Шиелі, Жаңақорған ауданаралық көпбейінді ауруханалары жанынан қосымша құрылыс салынып, халық игілігіне берілмек.Жақын күндері Ұлттық жоба аясында 2 млрд 300 млн теңгеге Шиелі ауданында 30 төсектік инфекциялық бөлімше құрылысы басталады. Одан бөлек жергілікті бюджет есебінен 922,0 млн. теңгеге Жаңақорған ауданы, Төменарық дәрігерлік амбулаториясымен қоса, 15 төсекке арналған ауылдық аурухана құрылысы аяқталып, жыл соңына дейін пайдалануға беріледі.Өткен жылы 3млрд 800млн теңге қаржыға 9&nbsp;медициналық нысанға күрделі жөндеу жүргізіліп,5 нысанның жылу жүйесі газға ауыстырылды. &nbsp;Биылғы жылы 4 млрд қаржыға 8 медициналық нысанға күрделі жөндеу жүргізіліп, 5 нысанның жылу жүйесі газға ауыстырылады. 2023 жылы денсаулық сақтау ұйымдарын материалдық техникалық жабдықтармен қамтамасыз ету үшін 5,1 млрд теңге қаржы қаралды. Оның ішінде 4,4 млрд теңгеге 560 дана медициналық&nbsp; құрал-жабдықтар сатып алынып, медицина ұйымдарының жабдықталу деңгейі 84&nbsp;пайыздан 87,10 пайызға дейін көтерілді (Республикалық көрсеткіш 85,6 пайызды құрайды).Өткен жылы медицина ұйымдарына құны 512,5млн теңгеге жаңа 25 санитарлық автокөлік табысталды. Биылғы жылы өңірдегі барлық елді мекендердегі денсаулық сақтау ұйымдарына 200 санитарлық автокөліктер алынды.<h2 style="text-align:justify;">Мүмкіндіктер</h2>Диагностика. ЖИ алгоритмдері медициналық бейнелерді талдау арқылы диагноз қою кезінде жоғары дәлдікке ие болуда. Мысалы, тері ісік ауруын анықтауға арналған ЖИ жүйелері дерматологтардан да жақсы нәтиже көрсетуде. Радиология саласында ЖИ өкпе, кеуде, ми және басқа да ағзалардың МРТ, КТ және рентген суреттерін талдау арқылы ісіктер мен басқа да патологияларды анықтауда көмектеседі.Пациенттерді басқару.&nbsp;ЖИ пациенттердің мәліметтерін талдау арқылы емдеу жолдарын оңтайландыруға және пациенттердің жағдайын бақылауға мүмкіндік береді. Электрондық медициналық жазбаларды (EMR) қолдану арқылы ЖИ пациенттердің ауру тарихын, лабораториялық нәтижелерін және дәрі-дәрмектерін талдап, жеке емдеу жоспарларын құруға көмектеседі.Дәрі-дәрмек дайындау.&nbsp;ЖИ дәрі-дәрмектерді зерттеу және әзірлеу процесін жеделдетуде маңызды рөл атқарады. Алгоритмдер үлкен деректер жиынтығын талдап, потенциалды дәрілерді анықтау, олардың тиімділігін болжау және клиникалық сынақтарды жоспарлауда қолданылады. Бұл жаңа дәрідәрмектерді нарыққа шығару уақытын қысқартады.Қашықтықтан мониторинг және телемедицина.&nbsp;ЖИға негізделген құрылғылар пациенттердің физиологиялық көрсеткіштерін үздіксіз бақылауға мүмкіндік береді. Бұл қант диабеті, жүрек-қан тамырлары аурулары және басқа да созылмалы аурулары бар пациенттер үшін өте маңызды. Телемедицина арқылы дәрігерлер қашықтықтан кеңес беріп, ЖИ арқылы диагноздарды нақтылау мүмкіндігіне ие болуда.<h2 style="text-align:justify;">Алдағы мүмкіндіктер</h2>Жеке медицина.&nbsp;ЖИ көмегімен генетикалық деректерді талдау арқылы әр пациентке жеке емдеу жоспарын құру мүмкіндігі артады. Бұл пациенттердің жеке ерекшеліктерін ескеріп, емдеу тиімділігін жақсартуға және жанама әсерлерін азайтуға мүмкіндік береді.Роботты хирургия.&nbsp;ЖИ басқаратын хирургиялық роботтар жоғары дәлдікпен және аз инвазивтілікпен операция жасауға мүмкіндік береді. Бұл хирургияның сапасын арттырып, операциядан кейінгі қалпына келу уақытын қысқартуға ықпал етеді.Мобильді денсаулық сақтау қолданбалары.&nbsp;ЖИ-ға негізделген мобильді қосымшалар денсаулық сақтау саласында кеңінен қолданылады. Бұл қосымшалар пациенттердің күнделікті денсаулығын бақылап, аурулардың алдын алуға көмектеседі.Деректер қауіпсіздігі және этика.&nbsp;ЖИ қолдану кезінде деректер қауіпсіздігі мен этикалық мәселелерге назар аудару маңызды. Пациенттердің жеке мәліметтерінің қорғалуын қамтамасыз ету және ЖИ шешімдерінің әділдігі мен ашықтығын сақтау қажеттілігі артады. Медицинадағы жасанды интеллект қазір үлкен жетістіктерге жетіп, болашақта медициналық қызметтердің сапасын арттыруға, диагноз қою және емдеу процестерін оңтайландыруға ықпал еткен. Алайда ЖИ қолдану барысында этикалық және деректер қауіпсіздігі мәселелерін шешу маңызды болып қала береді. Жасанды интеллекттің дамуы медицина саласында жаңа мүмкіндіктер ашып, денсаулық сақтау жүйесін жаңа деңгейге көтереді деп жоспарлануда.&nbsp;Нұржан НҰҒЫМАДИЛЛА Фото: inpearls.ru

Өңірдегі медицина мен AI

<a href="https://kyzylorda-news.kz/">Kyzylorda-news.kz</a> Қоғамдағы сұранысқа ие мамандықтардың көшін бастап тұрған ақ халатты абзал жандар. Күндіз-түні тынбай еңбек етіп, халықтың алғысына бөленіп жүрген бұл жандар туралы айтарымыз көп-ақ. Неге десеңіз, адам өмірін ұзартуға септігін тигізіп, ажалдан арашалаушы дәрігер мамандығын халқымыз ежелден қастерлеп, құрметтегендігі баршамызға ақиқат.&nbsp;&nbsp; Бүгінгі таңда қазақстандықтардың денсаулығын жақсарту – еліміздің мемлекеттік саясатының басым бағыттарының бірі болып саналып, медицина мамандығын таңдаймын деген жандар үшін де барынша жеңілдіктер қарастырылуда. Елімізде денсаулық саласын дамыту, тұрғындарға заман талабына сай, қолжетімді және сапалы медициналық қызмет көрсету жолында бар мүміндіктер жасалуда. Бұл білікті дәрігерлердің де арқасында демекпіз. Бүгінгі біз сөз еткелі отырған кейіпкеріміз де өз саласының майталманы атанып, көптің алғысына ие болып жүрген жан.&nbsp; Мақаламыздың арқауы ақ халатты абзал жан – Алмира Дауылбаева. Ол ІІІ Интернационал ауылында 40 жылдан бері акушер болып еңбек етеді. Саналы ғұмырын ана мен баланың амандығына арнаған ол қиын кезеңдерде де мамандығына адалдық таныта білді. Бұлай дейтініміз, тәуелсіздіктің алғашқы қысылтаяң жылдарында ауылдағы дәрігерлік қызметті ақсатпай алып шыққан майталман ақ халаттылардың бірі. &nbsp;&nbsp; Ол ІІІ Интернационал ауылының тумасы. Осындағы №108 мектепті бітіріп, Қызылорда қаласындағы медициналық училищенің Акушер бөлміне оқуға түседі. 1982 жылы қолына диплом алған жас маман аудандық аурухананың жолдамасымен Ақжар ауылына жұмысқа орналасады. 2 жылдан соң ІІІ Интернационал ауылдық ауруханасына маман тапшылығына байланысты ауысқан. Содан бері 40 жыл тапжылмай халыққа адал қызмет көрсетіп келеді.&nbsp;&nbsp; Бұл мамандықты алып жүру үшін сабыр мен шыдам, білім мен білікті қажет ететіні айтпаса да түсінікті. Білікті маман басты жетістік мақтау, мадақтау, алғыс хаттары емес көптің көңілінен шығып, тұрғындардың жылы лебізін есту екенін алға тартады.&nbsp;&nbsp; Уақыт көшіне қарай медицина дамыған сайын дәрігерлерге артылатын салмақта арта түсуде. Тәжірибе жүзінде жүктелген міндетті орынды орындап жүрген ел анасы Алмира Дауылбаева отбасында жолдасымен 3 перзент өсіріп отыр. Жарты ғасырға жуық медицина саласында адам жанының арашашысы болып келе жатқан ақ халатты абзал жан өзінің адал еңбегі арқасында халықтың ыстық ілтипатына бөленіп отырған кейіпкеріміз зейнеттік демалысқа аяқ басқалы отыр. Бір ғана салада, бір мекемеде 40 жылдан астам ғұмырын арнаған ақ халаттының мамандығына адалдығы көпке үлгі боларлық. Еңбегінің зейнетін көрер шағы берекелі болсын дейміз. &nbsp;

Қазақстан және Қызылорда облысының жаңалықтары: Денсаулық