<a href="https://kyzylorda-news.kz/">Kyzylorda-news.kz.</a> Денсаулық сақтау министрі Елжан Біртанов коронавирус инфекциясының таралуына жол бермеу мақсатында қандай бұқаралық іс-шаралар өткізілмейтінін айтып берді.
<blockquote>
 «Коронавирус инфекциясының қаупіне байланысты тиісті шектеу шаралары күшіне еніп жатыр. Ең бірінші кезекте мерекелік іс-шаралар болмайтын болды. Баспасөз мәслихаттары мен көптеген сайыс ұйымдастырылмайды», – деді Елжан Біртанов ОКҚ-да өткен баспасөз мәслихатында.
</blockquote>
Министрдің айтуына қарағанда, кейбір шаралардың өтпейтіні күні бұрын белгілі болған.
<blockquote>
 «Әсіресе спорттық және мәдени шаралар. Келешекте тағы бір мемлекет коронавирус қаупі жағынан бірінші санатқа енгізілуі мүмкін. Сол себепті алдын ала ескертеміз. Сапарды кейінге қалдырып, ешқайда шықпаған абзал. Ауруға байланысты жағдай күн сайын өзгеріске ұшырайтындықтан ахуалға күнделікті жаңадан баға беріледі», – деді министр.
</blockquote>
Десе де Елжан Біртанов орталық деңгейде қандай да бір шараларды шектеп, қоғамдық орындарды жабу туралы бұйрықтың шықпағанын айтады.
<blockquote>
 «Әкімдер немесе аймақтардың өзге де жауапты адамдары қандай да бір шараларды қабылдап, жариялайтындай тиісті жоспар баршылық. Өңір-өңірге байланысты эпидемиологиялық ахуал да әртүрлі. Мәселен бір өңірде карантин енгізудің қажеттігі болмаса, екінші өңірде халықаралық әуежай болғандықтан онда тәуекелдер баршылық. Себебі ол жерге күн сайын адамдар келіп-кетіп жатады», – деді спикер.
</blockquote>
Министр өз сөзін мысалмен шегелей түсті.
<blockquote>
 «ҚХР-да көргеніміздей, Хубей провинциясында ғана карантин енгізілді. Бейжіңде белгілі бір шектеулер болды. Қалған қалалар кәдімгі күнделікті тірлігін жалғастыра берді. Оңтүстік Корея мен Италияда да жағдай сол. Бәріне салмақты қараған абзал. Шығын болмастан жасқанудың реті жоқ. Карантинде жатқандардың ішінде спортшылар да, бизнесмендер де, мұғалімдер де бар. Бәріне ереже ортақ», – деді министр.
</blockquote>

Коронавирус: елімізде қандай бұқаралық шаралар өткізілмейді?

<a href="https://kyzylorda-news.kz/">Kyzylorda-news.kz.</a> Коронавирус инфекциясы жайлы шу шыққалы бері медициналық масканы жаппай сатып алып, қымбатқа өткізіп жатқан алыпсатарларға қандай шара қолданылады? ОКҚ-да өткен баспасөз мәслихатында бұл сұраққа Денсаулық сақтау министрі Елжан Біртанов жауап берді.
<blockquote>
 «Медициналық маска бойынша отандық өндірушілер тәулік бойы жұмыс жүргізіп жатыр. Маскалар екі бағыт бойынша өндірілуде: біріншіден медициналық және санитарлық, полиция және шекаралық қызметкерлерге «СК-Фармация» арқылы сатып аламыз. Екіншіден жеке дәріханаларға маскалар дистрибютор арқылы жеткізіледі. Сонымен қазір карантинге жатқан азаматтардың саны көбейгендіктен, біздің медицина саласындағы маскалар мен басқа да құрылғыларға деген қажеттілік көтеріліп келеді. Біз зауыттардан маскаларды аламыз. Қалғандары дәріханаларға жөнелтілуде», – деді Елжан Біртанов ОКҚ-да өткен баспасөз мәслихатында.
</blockquote>
Министрдің айтуынша медициналық маска бойынша жұмысты үйлестіретін арнайы штаб та құрылған.
<blockquote>
 «Қай қалада тапшылық жоғары, сол жаққа жіберіп жатырмыз. Қазір бүкіл зауыттар тәулік бойы жұмыс істеуде. Тапшылық болса да ол ұзаққа бармайды деп сенеміз. Көп жағдай халықтың түсінігіне байланысты. Дәріханаларға салсақ, қазір бәрін сатып алады. Одан кейін ауруханаларда науқастарды қалай емдейміз? Медициналық қызметкерлерде сондай қорғау құралдары болмаса инфекция тез тарайды. Сондықтан ең біріншіден медициналық қызметкерлерге, пациенттер жатқан ауруханаларға маскалар керек», – деді ол.
</blockquote>
Елжан Біртанов өз сөзінде инфекция болмаса масканы тағудың қажеті жоқтығын тағы да еске салды.
<blockquote>
 «Олардың да (алыпсатарлардың – авт.) мәселесі белгілі. Кеше де, бүгін де құқық қорғау органдарына арнайы тапсырма берілді. Мысалы кеден органдарына да тиісті жүктемелер беріліп отыр. Шекара қызметкерлері көп көмектесуде. Контрабанда болса тоқтатып, ұстап, тиісті ақпараттарды бізге жолдайды. Жалпы біздің негізгі мақсатымыз – экспортқа жібермей, бүкіл масканы дәріханаларға тарату», – деді ол.
</blockquote>

Медициналық бетперделерді қымбатқа сатып жатқан алыпсатарларға қандай жаза қолданылады?

дәрігер-терапевт Кенішкүл Мақсұтованы ауылдастары ерекше құрмет тұтады
<a href="https://kyzylorda-news.kz/">Kyzylorda-news.kz.</a> … Қармақшы аудандық «Шипагер» жанұялық емханасының іші толған адам. Жасы мен жасамысы, егде тартқан қария, әйтеуір не керек, дертіне шипа іздеген жандардың бәрі – осында. Барлығы демесек те, науқастанып емханаға келген жандардың көбісі бір есіктің алдына жиналып қалыпты. Кезекте тұрған адам қарасы қалың. Емхананың кезекші медбикесі болса, емхана қабылдауына келген емделушілерді дәрігерлерге бөліп, зыр жүгіріп әлек.
– Әже, сіз өзіңіз көрінуге келдіңіз бе? – деді әлгі кезекші медбике емхана есігінен немересін жетектеген күйі аттаған ақ жаулықты кейуанаға.
– Мына «құдайдың бере салғаны» салқындап қалыпты, соны Кенішжанға көрсетейін деп келіп едім, қарағым, – деп тіл қатты әжей.
– Әже, бері қарай жүріңіз, келесі бөлмеде балалар дәрігері бар. Немереңізді соған көрсетіңіз әрі кезек те аз екен, – деп жол сілтеді медбике.
– Мен немеремді Кенішкүлге көрсетемін. Оным балалар дәрігеріне деген сенбегендігім емес. Балалар дәрігерін де жақсы танимын. Бірақ, мүмкін, Кеніш қалқамның шипалы алақандары менің құлынымның денесіне тисе – дәрісіз-ақ жазылып, ойнақтап шыға келер…
Медбике одан әрі кейуанаға ештеңе демеді. Әжей ақыры аудандық емхана бас дәрігері бөлмесінің алдындағы орындыққа жайғасып, өз кезегін күтіп отырды. Осылайша, талай науқасты аяққа тұрғызып, аудан халқының сеніміне ие болған ақ халатты абзал жан Кенішкүл Мақсұтқызына көрінуге келген жандар қарасы көбеймесе, азайған жоқ. Сағат артынан сағат өтті. Түскі үзіліс болса да, адам аяғы әлі толастар емес. Үзіліс уақыты келді деп дәрігер де бөлмесінен шыға қоймады. Қабылдауын, науқастарды қарауын жалғастыра берді. Сөйтіп, Кенішкүл дәрігердің жұмысы түскі үзіліссіз өтті.
Адам өмірінің арашасы атанған жанға жүгінуге келген тұрғындар саны түс ауа да бәсеңдемеді. Сол күні «Кенішжанға көрінеміз» деп келген қария-кейуаналардан бастап, «Кеніш құрбымыз қайда екен?» деген замандастары да, «Кеніш өзінде ме екен?» деп іздеген орта жастан асқан кісілер де, «Кенішкүл апайға келдік» деген жастар да, одан қалды әжесіне ере келген кішкене бүлдіршендер де, бәрі-бәрі – емхана дәрігерінің бөлмесінен жайдары көңілмен шықты.
Осылайша, бір сәт тыным таппастан тағы бір жұмыс күні аяқталған Кенішкүл дәрігер үйіне қайтуға жиналып, емханадан сыртқа шығып келе жатқан. Кенет жанұшыра айқайлаған бейтаныс келіншектің дауысынан кілт тоқтай қалды. Тура өзіне қарай жүгіріп келе жатыр.
– Кеніш апай, көмектесіңізші! Балам ойнап жүріп қораның төбесінен құлап қалыпты. Ес-түссіз жатыр. Мен мына үйде тұрамын, – деді емхана жанындағы қызыл шатырлы үйді нұсқап. – Үйіміз емханаға жақын болған соң сізге жүгіріп келе жатырмын. Жедел жәрдемге де хабарластым. Ол арғы беттен келемін дегенше, біраз уақыт өтеді. Жалынамын, баламды аман алып қалыңызшы!
– Сабыр сақта, айналайын! Әрине көмектесемін! Бәрі жақсы болады! Кәне, үйіңе тезірек барайық, – деп келіншекті сабырға шақырған Кенішкүл дәрігер оның соңынан ере жүгірді…
Бұл – біз бүгінгі мақаламызға арқау еткелі отырған ақ халатты абзал жан, аялы алақаны талай жандардың дертіне шипа болған дәрігер Кенішкүл Мақсұтқызының бір ғана қызметтік күні. Ал, бақандай 45 жыл бойы қаншама күні осылай қауырт, түскі үзіліссіз, демалыссыз, ұйқысыз өтіп келе жатқанын есептесеңіз, кейіпкеріміздің аудан тұрғындарына деген адал еңбегін өзіңіз-ақ салмақтай беруіңізге болады.
Бұл күндері Қармақшы аудандық амбулаториялық-емханалық қызметі бар орталық ауруханаға қосылған жанұялық емханада абыройлы еңбек етіп келе жатқан Кенішкүл Мақсұтова ауданға қарасты қазіргі Ақтөбе ауылында дүниеге келеді. Осы ауылдағы алғашқы көлік жүргізушілерінің бірі, автомеханик Мақсұт Торшаев пен Шәмшия Балабаеваның отбасында дүние есігін ашып, қарапайым жанұяда тәрбиеленген Кенішкүл кішкентай кезінен үйдегі он баланың алғыры, зерегі болып өседі. Көп балалы жанұяда тәрбиеленген ол анасының қолғанаты, көмекшісі болып қана қоймай, бауырларына қамқор бола біледі. Мектепте есеп-қисап, химия секілді пәндерден алдына жан салмаған зерек қыз 1976 жылы №109 мектептің 10 сыныбын аяқтағанда да есімі үздік бітірушілердің қатарында болады. Жастайынан алдына қойған мақсатына жетпей тынбайтын еңбекқор Кенішкүл сол жылы сыныптастарының арасынан алғашқы болып Ақтөбе мемлекеттік медициналық институтына оқуға түседі. Институт қабырғасында да еңбекқорлығынан, оқып-тоқудан, ізденуден танбаған бұрымды қыз алты жылды да оңай еңсеріп, 1982 жылы туған жеріне кәсіби маман болып оралады. Аталмыш институттың «Емдеу ісі» факультетін үздікке тәмамдаған ол еңбек жолын өзі дүниеге келген Чапаев ауылдық дәрігерлік амбулатория меңгерушілігінен бастайды. Осылайша, Кенішкүлдің тынымсыз күндері мен ұйқысыз түндері басталып кете барады. Тынымсыз еңбек, қауырт қызмет, қиындыққа толы дәрігерлік жұмысты жауапкершілігі мол меңгерушіліктен бастаған өжет қыз көп ұзамай-ақ адал да абыройлы еңбегімен бұл қызметке әбден лайық екенін дәлелдеп шығады.
1984 жылы қуанышынан қайғысы, үмітінен қорқынышы көп, дәрігерлік салада ең қиын бөлім саналатын «Жедел жәрдем» бөліміне өз еркімен ауысқан оның бұл бөлімде де бағы жанып, талай жанды өлім аузынан арашалап алып қалады. Көптеген науқастарға дер кезінде көмек көрсетеді. «Адам өмірінің арашасы» деген атқа лайық екенін күн сайын дәлелдей түседі. Оның осы бөлімде жүріп танытқан қырағылығы мен өжеттілігі, дәрігерлік батыл шешімдері ертеңіне-ақ аудан тұрғындарына аңыз болып тарап кетеді. «Дәрігер Мақсұтова» деген есімі қасиетті Қармақшы ауданы халқына кеңінен танылып жүрген кезі де – осы бөлімдегі кездері болатын. Тек науқастанған емделушілер, аудан тұрғындары ғана емес, әріптестерінің арасында да өзінің лайықты орнын таба білген оның еңбекқорлығына сол қызметтестері қызыға да, қызғана да қарайтын. Себебі, ол қандай бөлімде немесе емханада қызмет атқарса да өзінің ақ халаты мен абыройына ешқандай кір жұқтырмай, дәрігерлік қызметін кіршіксіз орындайтын. Мерейі әркез үстем бола білген Кенішкүл Мақсұтованың абыройлы қызмет жолдары 1990 жылдан 1999 жылға дейін Қармақшы аудандық емхана филиалында аймақтық дәрігер, 1999 жылдан аудандық емхана филиалының меңгерушісі, 2000-2004 жылдары жанұялық емхана аға дәрігері, 2004-2007 жылдары аудандық емхананың терапия бөлімінің меңгерушісі, 2007 жылдан бастап жалпы практикалық дәрігер және бөлім меңгерушісі болып жалғасып кете береді.
Тағы бір айта кетерлігі – алғаш еңбек жолын бастаған кезінен осы уақытқа дейінгі оның 45 жылдық қызметтік кезеңінде ешқандай қателік, заң бұзушылық орын алмапты. Аяқ астынан оқыс жағдайға ұшыраған адамның болмаса ауыр дертке шалдыққан науқастың тірі қалу-қалмауы Алланың қолындағы іс десек те, ауылдастары: «Әлгі науқасқа дәрігер Мақсұтова араша түсе алмапты. Дер кезінде көмектесіп үлгермепті» деген пікірді ешқашан айтып көрген емес. Қазіргі таңда аудандық амбулаториялық-емханалық қызметі бар орталық аурухананың бас маманы және жалпы тәжірибелік дәрігері қызметін зор сеніммен атқарып келе жатқан жоғары санатты терапевт-дәрігер Кенішкүл Мақсұтова 2009 жылы аудан бойынша Бас терапевт болып тағайындалады.
Бүгінде өз ісінің шебері, майталман маман атанған, ақ халатты абзал жандардың арасында есімі әрқашан құрметпен аталатын Кенішкүл Мақсұтқызы осылайша қандай қызмет болмасын, өзіне артылған сенім жүгін абыроймен ақтап шығып, Гиппократ антына адал екендігін әркез дәлелдеп келеді. Оның әр жылдары Денсаулық сақтау министрлігінің түрлі марапаттарына ие болуы – өз саласында үздік әрі өз ісінің шебері екендігін айғақтай түседі.
Ешқашан қарапайым мінезінен танбаған Кенішкүл апайдың біреуге жекіп, дауыс көтеріп сөйлегенін аудан тұрғындары кездестіріп көрмепті. Керісінше, еңбектеген кішкентай баладан бастап, үлкен қарияларға дейін ілтипатпен қарайтын оның үлкен жүректі дәрігер екендігі аудан халқының аузындағы аңызға айналған. Жүзінен мейірім, жүрегінен жылу төгілген кейіпкеріміз білікті маман болуымен қатар, сегіз қырлы, бір сырлы өнер иесі. Оның түрлі сахналардан әуелете салған әуезді әндері тыңдарманын бірден ұйытып әкетіп, ерекше дауысы жаныңды жіпсіз байлап, өзіне баурап алады.
Дәрігер болғаның – өміріңді халқыңа арнағаның. Дәрігерлік анттың сыртында, «дәрігер» деген сөзді «адам жанының арашасы» деп түсінеді халық. Яғни, дәрігер болу – ақ халат қана кию емес, үлкен жауапкершілік жүктейді деген сөз. Адамның тағдыры – ойыншық емес. Қазір жан-жақты терең білімді, жағдайыңды жанымен түсініп, жүрегімен сезіп тұратын, ақ халатына аппақ көңілі жарасқан Кенішкүл Мақсұтқызы секілді дәрігерлер көп деп те айта алмайтынымыз жасырын емес. Несін жасырайық, бүгінгі таңда Кенішкүл дәрігердің амандығын, тілеуін тілеген қармақшылықтар саны өте көп. Сірә, бақыт дегеніміз осы болар мүмкін? Өзіңнің басқаларға керек екеніңді сезіну, олардың сенің амандығың мен тілеуіңді тілесе – бұдан артық бақыттың не керегі бар?!
Олай болса, мамандық таңдауда қателеспеген Кенішкүл Мақсұтқызы да, өз өмірлерін қапысыз сеніп тапсырған Кеніштей дәрігерлері бар қармақшылық тұрғындар да бақытты.
Нұрсұлтан МЫҚТЫБАЙ,
Қармақшы ауданы.

Ақ халатына аппақ көңілі жарасқан

<a href="https://kyzylorda-news.kz/">Kyzylorda-news.kz.</a> Ғалымдар коронавирусқа шалдықпайтын адамдардың категориясын анықтады, деп хабарлайды&nbsp;<a href="https://stan.kz/koronaviruska-en-az-shaldigatin-adamdar-kimder-327987/">Stan.kz</a>.&nbsp;
Зерттеушілердің мәліметіне сәйкес, кәмелетке толмаған балалар індетті жұқтырғандарыдың тек 2%-ын құрайды екен.&nbsp;
Мамандар 70 мыңға жуық адамдарды бақылауға алыпты. Тәжірибе нәтижесінде COVID-19 коронавирусы жасөспірімдер мен балаларға сирек жұғатыны анықталыпты. Олар ауруға шалдыққандардың ең төменгі пайызын құрайтын көрінеді.&nbsp;
Сарапшылардың ақпаратына сәйкес, жұқпалы инфекция әсіресе қарт адамдар үшін өте қауіпті. Себебі бұл жастағы адамдардың иммундық жүйесі әлсіз екен.&nbsp;
Ресейлік маман Павел Волчков көп жағдайда балалардың аурға шалдықпауы ата-аналардың арқасы дейді. Себебі балалары үшін уайымдаған олар ұл-қыздарының гигиеналық тазалықты сақтап, медициналық мака киіп жүруін жіті қадағалайды. Ал ересектер болса көбіне өздерінің салғырттығы үшін коронавирусқа тап болып жатады.

Коронавирусқа ең аз шалдығатын адамдар кімдер?

<a href="https://kyzylorda-news.kz/">Kyzylorda-news.kz.</a> АҚШ-тың санитарлық билігі коронавирустың өмір сүру ортасына байланысты әртүрлі талдау жүргізуде, деп хабарлайды <a href="https://24.kz/kz/zha-aly-tar/bylu-manyzdy/item/377279-koronavirus-infektsiyasy-andaj-zattarda-za-sa-talyp-t-rady">«Хабар 24»</a>.
<blockquote>
 «Вирус мыс пен болат заттардың бетінде шамамен екі сағат бойы өмір сүреді. Ал қағаз бетінде немесе пластикте ұзаққа уақыт бойы сақталады. Қазіргі уақытта соны зерттеп жатырмыз», – деді Редфилд.
</blockquote>
Сондай-ақ орталық директорының айтуынша, Diamond Princess круиздік кемесінде коронавирустың өршуіне вирустың ауа тамшылары арқылы емес, заттар арқылы жұғуы себеп болуы мүмкін.

Коронавирус инфекциясы қандай заттарда ұзақ сақталып тұрады?

<a href="https://kyzylorda-news.kz/">Kyzylorda-news.kz.</a> Елдегі балалар мен жасөспірімдердің 38% ғана күн сайын жеміс жейді, 43% – көкөніс жеп жүр. Осындай жағдайға жеткенімізді ҚР БҒМ мен ҚР ДСМ-нің қолдауымен Ұлттық қоғамдық денсаулық сақтау орталығы жүргізген зерттеу көрсетті,&nbsp;деп хабарлайды&nbsp;<a href="https://kaz.zakon.kz/5008842-aza-standy-zhas-sp-r-mderd-shten-b-r.html">zakon.kz</a>.
Ұлттық орталықтың жастар мен балалар денсаулығын күшейту бөлімінің басшысы Ақбота Әбілдинаның айтуынша, 15 жасқа қарай жасөспірімдер арасында жемісті күн сайын жеу 33%-ға дейін азаяды.
Оның есесіне балалар күн сайын зиянды тамақтар жейді.
Сауалнама көрсеткендей, балалардың 60% күн сайын кола сияқты қанты көп сусын ішеді.
Зерттеу анықтағандай, көптеген мектеп оқушылары таңғы ас ішпейді.
Жеке бас тазалығына келсек, оқушылардың 49% ғана күніне екі рет тіс тазалайды, қыз балалардың 54%, ұл балалардың 45% пайызы жиі жуынып жүр.

Қазақстандық жасөспірімдердің үштен бірі ғана жеміс-жидек жейді

<a href="https://kyzylorda-news.kz/">Kyzylorda-news.kz.</a> 2025 жылға дейін дәрігерлердің жалақысы жыл сайын көтерілетін болады. Бұл туралы бүгін ҚР Денсаулық сақтау министрлігінің алқа отырысында ведомство басшысы Елжан Біртанов айтты, деп хабарлайды <a href="https://www.inform.kz/kz/2025-zhylga-deyin-darigerlerdin-zhalakysy-zhyl-sayyn-koteriledi-birtanov_a3619812">ҚазАқпарат</a>.
<blockquote>
 «Міндетті әлеуметтік медициналық сақтандыруды енгізудің нәтижесінде қаңтардан бастап дәрігерлердің жалақысы 30, мейірбикелердің жалақысы 20 пайызға көтерілді. Бұл көптен күткен өте маңызды нәтиже саналады. 2019 жылдың қаңтарын қоса есептесек дәрігерлерің жалақысы 60 пайызға көтерілді. Біз бұл жұмысты әрі қарай жалғастырамыз. 2025 жылға дейін мемлекеттік бағдарлама негізінде жыл сайын медицина саласы қызметкерлерінің жалақысы көтеріліп отырады», – деді Елжан Біртанов.
</blockquote>
Министр денсаулық сақтау саласын кадрмен қамтамасыз ету мәселесіне де тоқталып өтті.
<blockquote>
 «Шындығын айту керек, қазіргі күні елімізде дәрігерлердің және орта буын мейірбикелердің саны жеткілікті деп айтуға болады. Басқа дамыған мемлекеттерден көп айырмашылығы жоқ. Сонымен қатар ауылдық жерлердегі медициналық қызметкерлердің саны өте төмен. Жеке секторға дәрігерлердің ауысуы да байқалады. Ол түсінікті де. Қазіргі уақытта дәрігерлердің 21 пайызы жеке секторда жұмыс істейді. Жалпы, бұл жайт алдағы уақытта ұлғая түседі деп күтеміз», – деді ол.
</blockquote>
Елжан Біртановтың айтуынша, елімізде 4 мыңнан астам дәрігер жетіспейді. Дегенмен, медициналық университеттерде қажетті мамандар дайындалып жатыр. Мәселен, биыл 8 мыңға жуық адам медициналық университеттерді бітіреді. Олардың арасында 5 700-ге жуық дәрігер мемлекеттік тапсырыс аясында білім алып шығады.
<blockquote>
 «Әрине, қазіргі қолданыстағы заңға сәйкес, бұл дәрігерлер міндетті түрде 3 жылға өңірлерге жіберіледі»,- деді министр.
</blockquote>

2025 жылға дейін дәрігерлердің жалақысы жыл сайын көтеріледі – Біртанов

<a href="https://kyzylorda-news.kz/">Kyzylorda-news.kz.</a> Медициналық сақтандыруы бар азаматтар, соның ішінде кәмелетке толмағандар да емханалардағы дәріханалардан дәрі-дәрмекті тегін ала алады. Денсаулық сақтау министрі Елжан Біртанов рецепт бойынша дәрі-дәрмекті кез-келген клиникада алуға болатынын айтты, деп хабарлайды&nbsp;<a href="https://sputniknews.kz/society/20200228/12956171/densaulyq-tegin-dari.html">Sputnik Қазақстан</a>.
Министр тегін дәрі-дәрмек алу жүйесі бұрын тек коммерциялық дәріханаларда жұмыс істегенін алға тартты.
<blockquote>
 «Олар ақша сұрады. Сөйтіп, 2015 жылға дейін дәрі-дәрмек құнының 25% көлеміндегі үстемақы төленіп келді. Менің ойымша, бұл қомақты сома. Енді осы 25%-ті біреуге бергенше, адам емханаға келіп, рецепт бойынша дәрі-дәрмек алғаны тиімді деп санаймыз. Болашақта біз адамдардың кез-келген дәріханадан өзіне қажетті дәріні тегін алатын жүйеге оралғымыз келеді», – деді Біртанов.
</blockquote>
Бұдан былай дәріханалар арасында тендер өткізілмейді. Егер адамның қолында рецепт болса, барлық дәріханалар тегін дәрі береді.
<blockquote>
 «Ол үшін біз бүкіл жүйені цифрландыру арқылы бухгалтерлік есепті көріп отыруымыз керек. Мысалы, бір адам тегін дәрі-дәрмек алуға келсе, дәріхана сатушылары “бізде төлем жоқ” деуі мүмкін. Осындай әрекеттің алдын алу үшін тегін электронды рецепттер жүйесін жасадық. Қазір бұл жүйе жеке дәріханаларда сынақтан өтіп жатыр. Сынақ екі жылға созылады», – деді министр.
</blockquote>
Бүгінгі таңда адамдар тегін дәрі-дәрмек алу үшін емханаларға баруға мәжбүр.
<blockquote>
 «Көп жағдайда тегін дәрілер алдын ала бекітілген жоспар бойынша созылмалы ауруларға ғана (жұқпалы ауруларға емес) беріледі», – деп түсіндірді Біртанов.
</blockquote>
Үйге шақырылатын дәрігерлер үшін дене қызуын төмендететін препарат алу проблемасы да маңызды.
<blockquote>
 «Бұл мәселеден хабарымыз бар және оның шешімін жақын арада табамыз деп ойлаймын. Сол сияқты адамның жеке сәйкестендіру нөміріне рецептіні тіркеу арқылы тәулік бойы істейтін кез-келген дәріханадан дәрі-дәрмек алатын жүйені іске қосамыз», – деді министр.
</blockquote>
Қазақстанда қандай дәрі-дәрмектер тегін берілуі мүмкін
Елімізде 1 қаңтардан бастап әлеуметтік маңызды ауру санатындағы 32 топтың бірінде тіркелген пациенттер мемлекет есебінен дәрі-дәрмекпен қамтамасыз етіледі. Олардың қатарында онкология, туберкулез, ВИЧ, қант диабеті, В және С вирустық гепатиті, артериялық гипертензия сияқты сырқат түрлері бар.
Ал міндетті әлеуметтік медициналық сақтандыру қатысушылары үшін дәрі-дәрмектің 41 тобына тіркелгендерге қолжетімді болды. Министрлік өкілдерінің айтуынша, бұл шамамен 300-ге жуық диагноз түрі. Ауру мен дәрі-дәрмектердің тізімін&nbsp;<a href="https://egov.kz/cms/ru/law/list/V2000019852">мына</a>&nbsp;сілтемеден қарауға болады.

Қазақстанда тегін дәрі-дәрмекті қайдан алуға болады?

<a href="https://kyzylorda-news.kz/">Kyzylorda-news.kz.</a> Жапондық дәрігерлер тазалыққа арналған антиспектиктердің коронавирустан қорғайтын күшті құрал еместігін айтты, деп хабарлайды&nbsp;<a href="https://stan.kz/news-327758/">Stan.kz</a>.
Қазіргі кезде жұқпалы індеттің таралуына байланысты аталған дезинфекциялаушы құралдар жаппай сатылып жүр екен. Десек те мамандар қолдарға арналған антисептиктерді шамадан тыс қолдану денсаулыққа кері әсерін тигізетіндігін айтты.&nbsp;
Мұның себебі тазалаушы құралдардың құрамында спирттің көп мөлшері болғандықтан деп түсіндірді жапондық сарапшылар. Антисептиктер терінің қорғаныштық қызметінен зиян келтіреді, соның салдарынан ағзаның вирусқа тап болуы екі есе жоғарылайды.&nbsp;
Сондай-ақ мамандар сабынмен қолды 30 секундтан көп уақыт жумауға кеңес берді. Бұған қоса қолды жуғаннан кейін оны мұқият сүртіп, кептірген жөн. Себебі ылғалды тері&nbsp;жұқпалы вирустарды жұқтыруға бейім келетіні айтылыпты.

Ғалымдар: Қолға арналған антисептиктер коронавирусты жұқтыру қаупін жоғарылатады

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрі Елжан Біртанов ел азаматтарына Оңтүстік Кореяға бармауға кеңес берді, деп хабарлайды <a href="https://www.inform.kz/kz/elzhan-birtanov-el-azamattaryna-ontustik-koreyaga-barmauga-kenes-berdi_a3619328">ҚазАқпарат</a>.
<blockquote>
 «Біз Оңтүстік Кореядағы ахуалды жіті қадағалап отырмыз. Өткен тәуліктің ішінде одан арғы күнге қарағанда өсім қарқыны шамамен 48 пайызды құрады. Бұл өте жоғары қарқын саналады. Өкінішке орай, арту тенденциясы байқалады. Қытайда өсімнің ең жоғары қарқыны тәулігіне 65-70 пайыз болған еді. Сондықтан егер жағдай күрделеніп, пациенттер саны мен өсім қарқыны қауіп төндіретіндей болса, онда біз батыл шаралар қабылдаймыз. Бүгінгі күнгі мәселе қайтып келгендерді карантинге жатқызу болып отыр. Шекараны жаппағанмен 1 наурыздан тасымал санын қысқартамыз. Мүмкіндігінше ол жаққа бармауға кеңес береміз. Өйткені, олардың барлығын кейін алып келуге тура келеді. Қазіргі уақытта қанша азаматымыздың елге оралғысы келетіндігі туралы мәселені талқылап жатырмыз. Әзірше Кореяда қауіп деңгейі айтарлықтай жоғары емес», – деді министр.
</blockquote>
Оның дерегінше, бүгінде Оңтүстік Кореяда 30 мың Қазақстан азаматы жүр.
<blockquote>
 «Айталық, олардың 25 мың елге оралғысы келеді. Ал бұл өте үлкен мөлшер. Бізде жұқпалы аурулар ауруханаларында резервтік орындардың саны шамамен 7 мың ғана. Бұған қоса, шамамен 3,5 мың медициналық ұйымды карантинге айналдыра аламыз», – деді Елжан Біртанов.
</blockquote>
Министрдің айтуынша, бұл орындар да жетпей жатса, онда шетелден келген азаматтар оқшауланады. Оқшуланған адамдарға қолайлы тұрмыстық жағдай жасалады.
<blockquote>
 «Бұл бас бостандығынан айыру емес, тек карантин ғана. Айрықша жайттарда қабылданатын шара. Біздің ойымызша, көп жағдайда үй карантинінің өзі де жеткілікті болады. Өйткені, 14 күннен кейін біз оның ауырғанын не ауырмағанын біле аламыз. 14 күн күннен кейін ауру жұқтырмағанына, қауіптің жоқтығына көз жеткізгеннен соң карантинды жалғастыру қажет болмайды», – деді ол.
</blockquote>

Министр ел азаматтарына Оңтүстік Кореяға бармауға кеңес берді

<a href="https://kyzylorda-news.kz/">Kyzylorda-news.kz.</a> Қазақстанда мерзімдік әскери қызметке жарамсыз деп танылатын аурулар арасында психикалық және мінез-құлық ауытқушылықтары көш бастап тұр, деп хабарлайды <a href="https://www.inform.kz/kz/askerge-zharamsyzdar-arasynda-psihikalyk-auytkushylykka-ushyragandar-kop_a3618471">ҚазАқпарат</a>.
Бұл туралы ҚР Қорғаныс министрінің орынбасары Бақыт Құрманов айтып берді.
<blockquote>
 «Жыл сайын әскерге шақыру кезінде 200 мыңнан астам жас медициналық тексеруден өтеді. Оның 78-80% әскери қызметке жарамды болып шығады және 20-22% жарамайды. Бұл көрсеткіштер соңғы жылдары тұрақты болып отыр және әскерге шақыру үшін дені сау жастардың жеткілікті резервін көрсетеді», – деді Бақыт Құрманов.
</blockquote>
Сонымен қатар, кейбір әскерге шақыру бекеттерінің медициналық комиссиялары азаматтарды негізсіз әскери қызметке шақырған.
<blockquote>
 «2019 жылы 24 әскери қызметші жарамсыз деп үйіне қайтарылды. Оның басты себептері – жергілікті атқару органдарындағы медициналық комиссия жұмысының кемшілігі, әскерге шақырылғандарды медициналық тексерудің сапасыздығы, шектеулі зерттеу мүмкіндіктерінен кандидаттарды алдын ала жеткілікті түрде зерттемеу болып отыр. Денсаулық жағдайына байланысты мерзімдік әскери қызметке жарамсыз деп танылатын аурулар арасында психикалық және мінез-құлық ауытқушылықтары (25,4 %) көш бастап тұр», – деді министрдің орынбасары.
</blockquote>
Екінші орында қан айналымы мен жүйке жүйесі (12,7 %) аурулары, үшінші орында – несеп-жыныстық жүйесі (10,4%) мен ас қорыту мүшелерінің аурулары (10,4%) тұр.
Мерзімдік әскери қызметшілерді әскери қызметке жарамсыз деп жариялаудың себебі ретінде психикалық және мінез-құлық ауытқушылықтары жиі аталады. 2019 жылы бейімделу кезеңіне байланысты психикалық ауытқушылық үшін жарамсыз деп танылған мерзімдік әскери қызметшілер үлесі 25,4% құраған.
Оның айтуынша, мерзімдік әскери қызметшілер арасында дәстүрлі өмір салтының күрт өзгеруі, үйден алыстау, ауыр физикалық жүктеме, қарым-қатынас орнатудағы стресстік жағдайларға әкеп соғады.
<blockquote>
 «Көптеген сарбаздар психологиялық тұрғыда дайын болып келмейді. Өмір салтының күрт өзгеруінен психикалық ауытқуға бейім жандарда негативті эмоциялар пайда болады. Одан бөлек, әскерге дейінгі өмірдегі факторлар да көп ықпалын тигізеді. Қарулы Күштерге психикалық ауытқулармен ауыратын немесе оған бейім азаматтарды шақыру фактісі медициналық комиссиядағы психиатр-дәрігерлердің сапасыз жұмысын көрсетіп отыр», – деді Бақыт Құрманов.
</blockquote>
Спикер азаматтарды әскери қызметке негізсіз шақыру жағдайларын азайтудың бірқатар жолдарын көрсетті.
<blockquote>
 «Тіркеудегі (16-17 жас) ұлдарды скринингтік тексеруге қатысты ҚР Денсаулық сақтау министрінің халықтың мақсатты топтарына профилактикалық медициналық тексеру жүргізу ережелеріне өзгерістер енгізуді ұсынамыз. Қалқанша безін, іш құрылысы мен зәр шығару жолдарын ультрадыбыстық зерттеу, эхокардиография, қан мен гормондарды зерттеу әдістерін қосу керек. Бұл толықтырулар денсаулық сақтау органдарына жасырын аурулары бар жастарды әскерге шақыру учаскелеріне тіркеу кезеңінде анықтауға және алдын-алу, емдеу шараларын уақтылы жүргізуге мүмкіндік береді», – деді ол.
</blockquote>
Сонымен бірге, министрлік өкілі электронды денсаулық сақтау жүйесімен бірлесіп жұмыс істеуді ұсынды.
<blockquote>
 «Әскерге шақырылушы денсаулығының жай-күйі туралы сенімді ақпарат алмасу бойынша жергілікті денсаулық сақтау органдарымен өзара жұмысты күшейту қажет. Осы мақсатта жергілікті әскери басқару органдарының электрондық жүйесін ҚР Денсаулық сақтау министрлігінің электронды денсаулық сақтау жүйесімен біріктіру қажет. Бұл медициналық комиссия құрамына шақырылушының денсаулығы туралы толық ақпарат алуға мүмкіндік береді және бұрынғы аурулары туралы ақпаратты жасыруға жол бермейді», – деді Бақыт Құрманов.
</blockquote>

Әскерге жарамсыздар арасында психикалық ауытқушылыққа ұшырағандар көп

<a href="https://kyzylorda-news.kz/">Kyzylorda-news.kz.</a> 2020 жылдың 1 қаңтарынан бастап Қазақстанда міндетті әлеуметтік медициналық сақтандыру жүйесі күшіне енді.&nbsp; Бұл бағыттағы ағымдағы және маңызды мәселелер өңірлерде МӘМС-ды енгізуге дайындығын қамтамасыз ету бойынша жедел өзара іс-қимыл жөніндегі өңірлік штабтың көшпелі отырысында талқыланды.
Жиынға ҚР Денсаулық сақтау министрлігінің қоғаммен байланыс департаментінің директоры Ильяс Бакиров, “Әлеуметтік медициналық сақтандыру қоры” КЕАҚ басқарма төрағасының орынбасары Эрик Байжүнісов, “Қоғамдық денсаулық сақтау Жоғары мектебі” Қазақстандық медицина университетінің даму жөніндегі проректоры Құралбай Құрақбаев, Қызылорда облысы әкімінің орынбасары Науырызбай Байқадамов, “Әлеуметтік медициналық сақтандыру қоры” КЕАҚ облысы бойынша филиалының директоры Бақыт Исмаханбетов, «Республикалық электрондық денсаулық сақтау орталығы» облыстық филиалының директоры Сәуле Нәлібаева, Қызылорда облыстық денсаулық сақтау басқармасының өкілдері, өңірлік штабтың мүшелері, аймақтың медицина қызметкерлері қатысты.
Қазіргі уақытта Қазақстан халқының 90% астамы (17 млн адам) МӘМС&nbsp; қатысушылары болды. Оның ішінде 11 млн-ға жуық адам – бұл 15 жеңілдігі бар санаттағы азаматтар, ал олар үшін жарналарды мемлекет жүзеге асырады.
Облыс халқының жалпы санынан 802,3 мың адам, 471 мыңнан астам тұрғын (58,8%) азаматтардың 15 жеңілдік санатына жатады. МӘМС-тің қалған қатысушылары – жалдамалы жұмысшылар&nbsp; (231 694 адам), жеке кәсіпкерлер (26&nbsp;993 адам), Бірыңғай жиынтық төлем (БЖТ) төлеушілер (1&nbsp;186 адам).
Облыс тұрғындарының 21 520 өзектендіруді қажет етеді. Бұл бағыттағы жұмыстарды жақын күндері шешу тапсырылды.
&nbsp;&nbsp; Жүйе іске қосылған 2017 жылдың 1 шілдесінен 2020 жылдың 31 қантарға дейінгі аралықта Қызылорда облысының тұрғындары әлеуметтік медициналық сақтандыру қорына 7,6 млрд. теңге аударды. Республикада осы кезеңде 251,2 млрд.теңге түсті.
2020 жылға Әлеуметтік медициналық сақтандыру қорының филиалымен 56 медициналық қызмет көрсетушілермен келісім – шарт жасалды, оның ішінде – 28 мемлекеттік медициналық ұйым (50%), 28 жеке меншік (50%).
Дәрігерлердің жалақысын 30% – ға дейін, орта буын қызметкерлерінің 20% – ға көтеру мәселесі ерекше бақылауда. 2019 жылдың желтоқсан айына облыс көлемінде дәрігерлердің орташа айлық еңбекақысы – 159&nbsp;187,77 теңге болса, қаңтар айында бұл көрсеткіш 29% – ға артып 205&nbsp;800,52 теңгені құрап отыр. Орта буын қызметкерлерінің айлық еңбекақысы 2019 жылдың желтоқсан айында 112&nbsp;872,35 теңге болса, ол қаңтар айында 138&nbsp;731,14 теңгеге дейін өсіп, 23% артқандығын көреміз.&nbsp;&nbsp;&nbsp;&nbsp;
Әлеуметтік медициналық сақтандыруды енгізумен сәйкес, медициналық көмек ауқымының 25% ұлғаюына орай, 2020 ж. Қызылорда облысы денсаулық сақтау жүйесінің бюджеті&nbsp; 57&nbsp;124 851,8 мың тенгені құрап отыр.
Атап айтқанда, кеңес беру диагностикалық көмек түрі – 555%-ға, яғни 6 есеге, стационарды алмастыратын көмек – 85%-ға, қалпына келтіру емі және медициналық оңалту – 3554%-ға, яғни 13 есеге, паллиативтік көмек және мейірбике күтімі – 162%-ға, яғни 2,6 есеге, онкогематология – 144%-ға, яғни 2,4 есеге&nbsp; қаражаттарының артқандары анық байқалып тұр.
2020 жыл бюджетінің 40&nbsp;879&nbsp;408,4 мың теңгесін немесе 71,4 %-ын ТМККК көлемі құраса, 16&nbsp;246&nbsp;443,4 мың теңгесін немесе 28,4% – ын МӘМС қаржысы құрайды.
Барлық азаматтар медициналық сақтандыру жүйесінде өз жарналарын төлеу арқылы, оның ішінде медициналық ұйымдардағы төлем терминалдары арқылы медициналық көмек ала алады. Бастапқы медициналық-санитариялық көмек көрсету бойынша барлық 21 медициналық ұйымда (56 МҰ-дан) төлем терминалдары орнатылды.
Халықпен байланысты қамтасыз ету мақсатында Қордың 1406 нөмірі бойынша Бірыңғай байланыс орталығы жұмыс істейді. Ал 2020 жылдың 1 қаңтарынан бастап ол 24/7/365 тәртібіне ауыстырылды.
Қазіргі таңда облыс бойынша 1406 арқылы 29 арыз-шағым&nbsp; түсіп уақытында жұмыстар атқарылып, жауаптар берілді.&nbsp;&nbsp;&nbsp;&nbsp;
Одан бөлек, филиалда азаматтарды қабылдау кабинеті ашылды. Сондай-ақ, медициналық қызмет сапасына мониторинг және сараптама жүргізу бойынша Филиалдың сарапшылары тұрақты негізде жұмыс істейді.
МӘМС жүйесіне қатысу мәртебесін электрондық үкімет порталынан (<a href="https://egov.kz/?fbclid=IwAR0Zr8vwiLvYiGbB7OBdOd8Hnj_LJvKlDvywyOMRcBHI8ktMPmlHpFJ8URo">https://egov.kz/</a>), ҚР Денсаулық сақтау министрлігінің (<a href="https://l.facebook.com/l.php?u=http%3A%2F%2Fdsm.gov.kz%2F%3Ffbclid%3DIwAR1x5ZlHsiLmflJZO9UYJX9l_O7C77eYmpbLZE336DIXPvYGsVO_suI3SVA&h=AT1k9UE5fRD6LN2NrCxHd0WzcKS6cXhN_AFARMUy4OIDwPs2EnY7UG2uBWNa6we722E8slg-X--ieI1UW8zBco7y32N6SF5w8mrbpdrBAN4cUlUnurFMB8HKotiLENvhwrLLrFYvRdvvK-xJcnNoExrzWN8Pm13uzA">http://dsm.gov.kz/</a>) және Қордың сайтынан (<a href="https://fms.kz/?fbclid=IwAR28Xlwl3E4ElmSuwF4XmlBpAQgUIiQIcOLTqcN85qIw-i3YeH-qEaV_0Zc">https://fms.kz/</a>), Telegram-бот (<a href="https://t.me/SaqtandyryBot?fbclid=IwAR356Y-TgRZTsvYUJ07VfbfdvJTN2sT6Ykj55xmfSvV_MrP3xXJaQqIT0jU">https://t.me/SaqtandyryBot</a>) және WhatsApp-тағы чат-бот (+7 700 103 1406) арқылы анықтауға болады.
Оған қоса мобильді қосымша MVOTER (Play Market-те қолжетімді) арқылы халықтың медициналық мекемелердің қызметтеріне қанағаттану деңгейін бағалау жұмыстары жолға қойылған.
Азаматтарды қабылдау кабинеті ашылды. Сондай-ақ тұрақты негізде Қор филиалының мамандары медициналық қызметтің сапасына мониторинг жүргізеді.
Ағымдағы жылдың 1 сәуіріне дейін елдің барлық тұрғындары шартты түрде сақтандырылған болып саналады және олар ТМККК және МӘМС пакеттері аясында медициналық қызметтерді тегін ала алады.
Осы кезеңде азаматтар өздерінің сақтандыру мәртебесін анықтап, міндетті медициналық сақтандыру жүйесіне тіркелуі керек. Жеңілдік кезеңі аяқталғаннан кейін, сақтандырылмаған пациенттер медициналық көмек алуды жалғастыра береді,&nbsp; ол тек медициналық көмектің кепілдендірілген көлемі аясында ғана, қалған қызметтерге ақылы болады. Сондықтан 31 наурызға дейін МӘМС жүйесінде сақтанушының мәртебесін алу маңызды.
<img src="https://kyzylorda-news.kz/wp-content/uploads/2020/02/25mamsshtab2.jpg" alt="" />
<img src="https://kyzylorda-news.kz/wp-content/uploads/2020/02/25mamsshtab3.jpg" alt="" />

Қазақстан және Қызылорда облысының жаңалықтары: Денсаулық

Коронавирус: елімізде қандай бұқаралық шаралар өткізілмейді?

Медициналық бетперделерді қымбатқа сатып жатқан алыпсатарларға қандай жаза қолданылады?

Ақ халатына аппақ көңілі жарасқан

Коронавирусқа ең аз шалдығатын адамдар кімдер?

Коронавирус инфекциясы қандай заттарда ұзақ сақталып тұрады?

Қазақстандық жасөспірімдердің үштен бірі ғана жеміс-жидек жейді

2025 жылға дейін дәрігерлердің жалақысы жыл сайын көтеріледі – Біртанов

Қазақстанда тегін дәрі-дәрмекті қайдан алуға болады?

Ғалымдар: Қолға арналған антисептиктер коронавирусты жұқтыру қаупін жоғарылатады

Министр ел азаматтарына Оңтүстік Кореяға бармауға кеңес берді

Әскерге жарамсыздар арасында психикалық ауытқушылыққа ұшырағандар көп

Қызылорда: “Сақтандырылған” мәртебесі әрбір тұрғында болуы тиіс

Қазақстан және Қызылорда облысының жаңалықтары: Денсаулық

Коронавирус: елімізде қандай бұқаралық шаралар өткізілмейді?

Медициналық бетперделерді қымбатқа сатып жатқан алыпсатарларға қандай жаза қолданылады?

Ақ халатына аппақ көңілі жарасқан

Коронавирусқа ең аз шалдығатын адамдар кімдер?

Коронавирус инфекциясы қандай заттарда ұзақ сақталып тұрады?

Қазақстандық жасөспірімдердің үштен бірі ғана жеміс-жидек жейді

2025 жылға дейін дәрігерлердің жалақысы жыл сайын көтеріледі – Біртанов

Қазақстанда тегін дәрі-дәрмекті қайдан алуға болады?

Ғалымдар: Қолға арналған антисептиктер коронавирусты жұқтыру қаупін жоғарылатады

Министр ел азаматтарына Оңтүстік Кореяға бармауға кеңес берді

Әскерге жарамсыздар арасында психикалық ауытқушылыққа ұшырағандар көп

Қызылорда: &#8220;Сақтандырылған&#8221; мәртебесі әрбір тұрғында болуы тиіс

Қызылорда: “Сақтандырылған” мәртебесі әрбір тұрғында болуы тиіс