<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 124 адамға жетті. Бүгін соңғы тәулікте жаңадан анықталған 5 жағдайдың мән-жайын облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
<blockquote>
 «Қазіргі таңда Қызылорда облысында коронавирустық инфекцияны жұқтырған 124 жағдай тіркелді. Соңғы тәулікте жаңадан 5 жағдай анықталды. Оның екеуі – Сырдария, екеуі – Шиелі, біреуі – Жаңақорған ауданының тұрғындары. Шиелі және Сырдария аудандарында тіркелген науқастардың барлығы да бұрын анықталған науқастармен қарым-қатынаста болып, карантинге оқшауланған еді. Яғни, карантинге алынған тұрғындардың арасынан анықталып отыр. Ал, Жаңақорған ауданында тіркелген науқас – коронавирустық инфекцияның жаңа ошағы болып табылады. Осы жаңа ошақта анықталған науқаспен қарым-қатынаста болғандар анықталып, нақтылану үстінде. Соңғы тәулікте анықталған 5 науқастың екеуі – ер адам, үшеуі – әйел адам. Жас шамалары 26 мен 61-дің аралығында. Қауіпті індет жұқтрығандардың барлығы жұқпалы аурулар ауруханасына ауыстырылып, тиісті емдерін қабылдауды бастады», – деді Жақсылық Абдусаметов.
</blockquote>
Оның айтуынша, Covid-19 індетін жұқтырған өңірдегі 124 науқаспен байланыста болғандардың жалпы саны – 1504.&nbsp;Оның ішінде, жақын қарым-қатынаста болғандар саны – 843, потенциалды байланыста болғандар – 661 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 122, правизорлық стационарда – 25, карантиндік стационарда – 407 адам бақылауда.
Басқарма басшысы атап өткендей, Қызылорда облысына қауіптілік деңгейі 1 (Б) елдерінен 19 адам келген. Қазіргі таңда оның төртеуі – стационарда, 15 – үй жағдайындағы карантинде бақылауда.
Брифингте Жақсылық Әбілқасымұлы қауіпті індетке шалдыққан науқастарды дер кезінде және алғашқы сатысында анықтауда 14 күндік карантиннің көмегі зор екенін атап өтті.
<blockquote>
 «Бүгінгі таңда бізге аталған індетті жұқтырған науқастарды дер кезінде анықтауда 14 күндік карантин режимінің көмегі зор. Осының арқасында біз науқастарды ерте сатысында анықтауға мүмкіндік алып отырмыз. Қазақстанға өзге өңірлерден келген тұрғындардан алдымен сынама-тест алынады. Нәтижесі теріс болса, тұратын өңірлеріне жіберіледі. Біз облысқа келген тұрғындарды тағы 14 күн карантин режимінде оқшаулап, бақылаймыз», – деді басқарма басшысы.
</blockquote>
Айта кетейік, бүгін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/covid-19-news/qyzylorda-oblysynda-qawipti-indet-zhuqtyrghandar-sany-124-boldy-56501/">124 адамға жеткенін</a>&nbsp;хабарлаған болатынбыз.
Оның ішінде, Қызылорда қаласында – 12, Жаңақорған ауданында – 19, Қармақшыда – 4, Шиеліде – 59, Сырдарияда – 25, Арал – 4, Қазалы ауданында – 1 жағдай тіркеліп отыр.

COVID-19: Жаңақорған ауданында анықталған науқас – қауіпті індеттің жаңа ошағы

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 124 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-15-sauirdin-09-25-uakytyndagy-epidemiologiyalyk-zhagday_a3638202">www.coronavirus2020.kz.</a>
15 сәуір сағат 09:25-тегі мәлімет бойынша елімізде коронавирус індетін жұқтырған тағы 29 адам тiркелген. Атап айтқанда, Атырау облысында – 1 адам, Шымкент қаласынды – 1 адам, Батыс Қазақстан облысында – 6 адам, Маңғыстау облысында – 1 адам, Қызылорда облысында – 3 адам, Қарағанды облысында – 2 адам, Нұр-Сұлтан қаласында – 9 адам, Алматы қаласында – 6 адам. ⠀
<blockquote>
 “Осы сағатта Нұр-Сұлтан қаласы бойынша 291 адам, Алматы қаласында – 364 адам, Қарағанды облысында – 80 адам, Ақмола облысында – 79 адам, Атырау облысында – 70 адам, Жамбыл облысында – 49 адам, Шымкент қаласында – 40 адам, Шығыс Қазақстан облысында – 8 адам, Алматы облысында – 24 адам, Ақтөбе облысында – 12 адам, Солтүстік Қазақстан облысында – 26 адам, Павлодар облысында – 11 адам, Маңғыстау облысында – 11 адам, Қызылорда облысында – 124 адам, Батыс Қазақстан облысында – 18 адам, Түркістан облысында – 49 адам, Қостанай облысында – 5 адам, жалпы 1261 науқас тіркелді“, – делінген аталған хабарламада.
</blockquote>

Қызылорда облысында қауіпті індет жұқтырғандар саны 124 болды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 121 адамға жетті, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-14-sauirdin-23-20-uakytyndagy-epidemiologiyalyk-zhagday_a3638128">www.coronavirus2020.kz.</a>
14 сәуір сағат 23:20-дағы мәлімет бойынша елімізде коронавирус індетін жұқтырған тағы 33 адам тiркелген. Атап айтқанда, Нұр-Сұлтан қаласында – 14 адам, Батыс Қазақстан облысында – 1 адам, Павлодар облысында – 1 адам, Атырау облысында – 6 адам, Алматы қаласында – 8 адам, Қызылорда облысында – 2 адам, Ақтөбе облысында – 1 адам.
<blockquote>
 “Осы сағатта Нұр-Сұлтан қаласы бойынша 282 адам, Алматы қаласында – 358 адам, Қарағанды облысында – 78 адам, Ақмола облысында – 79 адам, Атырау облысында – 69 адам, Жамбыл облысында – 49 адам, Шымкент қаласында – 39 адам, Шығыс Қазақстан облысында – 8 адам, Алматы облысында – 24 адам, Ақтөбе облысында – 12 адам, Солтүстік Қазақстан облысында – 26 адам, Павлодар облысында – 11 адам, Маңғыстау облысында – 10 адам, Қызылорда облысында – 121 адам, Батыс Қазақстан облысында – 12 адам, Түркістан облысында – 52 адам, Қостанай облысында – 5 адам, жалпы 1232 науқас тіркелді“, – делінген аталған хабарламада.
</blockquote>

Қызылорда облысында қауіпті індет жұқтырғандар саны 121-ге жетті

#BizBirgemiz

#ҮйдеБолыңыз!

<a href="https://kyzylorda-news.kz/">Kyzylorda-news.kz.</a> Қазақстанда биыл мектеп оқушылары дәстүрлі түрде 25 мамырда жазғы демалысқа шығады.
ҚР Білім және ғылым министрлігінің баспасөз қызметінің хабарлауынша, 4-8 мамыр аралығында мектеп оқушылары БЖБ (бөлім бойынша жиынтық бағалау), ал 18-22 мамыр аралығында – ТЖБ (тоқсандық жиынтық бағалау) өтеді.
25 мамырдан бастап студенттер жазғы демалысқа шығады.
Естеріңізге сала кетейік, коронавирустық пандемияға байланысты қазақстандық студенттер төртінші тоқсанды&nbsp;қашықтан оқиды.
Соңғы тоқсанда оқушылар&nbsp;БЖБ&nbsp;және ТЖБ жұмыстарын бір тоқтанда&nbsp;бір-бірден тапсырады.
Қорытынды аттестациялық&nbsp;<a href="https://kyzylorda-news.kz/bilim/biyl-tuelekterding-qorytyndy-attestattaw-emtihandary-oetkizilmejdi-55786/">емтихандар&nbsp;өткізілмейді</a>, қорытынды жылдық бағалар аттестатқа қойылады.
Ұлттық бірыңғай тестілеуді өткізу уақыты өзгеріссіз қалады.

Қазақстандық оқушылар жазғы демалысқа қай уақытта шығады?

<a href="https://kyzylorda-news.kz/">Kyzylorda-news.kz.</a> Бұл туралы Кәсіпкерлер палатасы директорының орынбасары Қожахмет Ілиясов мәлімдеді.
Кәсіпкерлер палатасының call-орталығына бизнес өкілдерінен келген «каникул» кезеңіне қатысты сауалдарына түсіндірме жұмыстары жүргізіліп, мәселесі қаржы ұйымдарына жолдануда.
Палата директорының орынбасары Қызылорда облысының кәсіпкерлер палатасы Мемлекет басшысының шағын және орта бизнесті барлық несиелері бойынша негізгі қарыз бен сыйақының төлем мерзімдерін кейінге қалдыру туралы тапсырмасына сәйкес, аймақта екінші деңгейлі банктер және қаржы ұйымдарымен жүйелі жұмыстар жүргізіліп жатқандығын жеткізді.
Атап айтқанда, мемлекеттік «Бизнестің жол картасы – 2025», «Қарапайым заттар экономикасы», «Еңбек» бағдарламалары аясында жеңілдетілген несие алған кәсіпкерлердің жалпы сомасы 5,8 млрд.теңге болатын несие төлемі кейінге қалдырылған.
Мұнан өзге, Кәсіпкерлер палатасының сенімгерлік басқаруындағы «Қызылорда» Өңірлік инвестициялық орталығы да кәсіпкерлерден түскен өтініштер бойынша жедел шара қабылдауда. Жасалған жұмыстың нәтижесінде бүгінгі күнге дейін Өңірлік орталықтан қаржы алған 99 жобаның 35,3 млн.теңгесі кейінге қалдырылды.
Сондай-ақ, төтенше жағдай кезеңінде кәсіпкерлерге екінші деңгейлі банктер де жеңілдіктер жасау арқылы қолдау көрсетуде. Бүгінгі күнге дейін екінші деңгейлі банктер мен қаржы ұйымдарына бизнес өкілдерінен түскен 1254 өтінімнің 818-і мақұлданып, өтініштері қанағаттандырылған.
Соның ішінде, Палатаның қолындағы мәлімет бойынша, «Халық Банктің» Қызылорда және Байқоңыр қалаларындағы филиалдарына келіп түскен 376 өтініштің 371-і немесе 99 пайызы оң шешілген. «ЦентрКредитБанкі» АҚ облыстық филиалына түскен 136 өтініштің 118-і, «ФортеБанк» АҚ облыстық филиалына келген 99 өтінімнің 96-сы мақұлданған.

Қызылордада мемлекеттік бағдарламалар аясында берілген 5,8 млрд.теңге несие төлемі кейінге қалдырылды

<a href="https://kyzylorda-news.kz/">Kyzylorda-news.kz.</a> Күні бүгінге дейін 42 500 теңге жәрдемақы алу жөнінде 200 мыңнан астам қызылордалықтан өтініш түсті. Бұл туралы облыстық жұмыспен қамтуды үйлестіру және әлеуметтік бағдарламалар басқармасының басшысы Талғат Дүйсебаев мәлімдеді.
<blockquote>
 “Оның 97 мыңдайы деректің дұрыс толтырылмауына байланысты кері қайтарылды. Ал 99 мыңға жуық адам әлеуметтік көмекке қол жеткізді. Өңір үшін осы мақсатқа 4 млрд 185 млн теңге көлемінде қаржы бөлінді”, – деді ол.
</blockquote>
Еске салайық, мемлекет қолдауы төтенше жағдай кезінде уақытша жұмыстан қысқарып, <a href="https://kyzylorda-news.kz/kogam/kim-qajda-qashan-42-500-tenggeni-alw-algoritmi-55324/">табысынан айырылғандарға</a> арналған.
Сондай-ақ, осы уақытқа дейін <a href="https://kyzylorda-news.kz/kogam/56355-56355/">90 мыңға жуық қызылордалық</a> 42500 теңге жәрдемақы алғанын хабарлаған болатынбыз.

42500 теңге алуға 200 мыңнан астам қызылордалықтан өтініш түскен

<a href="https://kyzylorda-news.kz/">Kyzylorda-news.kz.</a> Әркім тарауық намазын өз шаңырағында отбасы мүшелерімен оқуы керек. Бұл туралы Бас мүфти Наурызбай қажы Тағанұлы мәлім етті.
<blockquote>
 «Қазақстан мұсылмандары діни басқармасы еліміздегі төтенше жағдайға байланысты қасиетті Рамазан айында індеттің таралуының алдын алу мақсатында, карантин мерзімінде тарауық намазы мешіттерімізде жамағатпен оқылмайтынын мәлімдейді. Әркім тарауық намазын өз шаңырағында отбасы мүшелерімен оқуына кеңес береміз. Біз осылай оқшаулану арқылы жұқпалы індетті жеңеміз», – деді Бас мүфти Орталық коммуникациялар қызметіндегі брифингіде.
</blockquote>
Айта кетейік, биыл елімізде Рамазан айы 24 сәуір күні басталады.

Төтенше жағдай: Тарауық намазы мешіттерде жамағатпен оқылмайды

<a href="https://kyzylorda-news.kz/">Kyzylorda-news.kz.</a> Елімізде төтенше жағдай жарияланғаннан бері балконда ән салатындардың қатары көбейгені бегілі. Бірақ, енді олар жауапқа тартылатын болады. Бұл туралы&nbsp;Нұр-Сұлтан қалалық полиция департаментінің басшысы Ержан Сәденов мәлім етті.&nbsp;
<blockquote>
 «Карантин кезінде үйде отыру қиын екенін түсінеміз. Сонда да сіздерден 23.00-ден кейін тыныштық сақтауды сұраймын. Мұның терезеден және балконнан ән айтуға да қатысы бар. Тыныштық бұзғандар әкімшілік жауапкершілікке тартылатындығын ескертемін. Осы мүмкіншілікті пайдаланып, сіздерден үйде болуларыңызды, заңға бағынуды және ресми ақпараттарға ғана сенуді өтінемін», – деді департамент басшысы.
</blockquote>
Сондай-ақ ол карантин кезінде, әсіресе, балаларды қараусыз қалдырмауды сұрады.
<blockquote>
 «Төтенше жағдай кезінде 2 бала терезеден құлап, өкінішке орай оның бірі мерт болды», – деді Сәденов.
</blockquote>

Карантин: Қазақстанда енді балконда ән салғандар жауапқа тартылатын болды

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіхалықова <a href="https://www.facebook.com/108364210824733/posts/117923129868841/">Facebook</a> парақшасында пандемиямен күреске жұмылған медицина қызметкерлерінің ерен еңбегін атап өтті.
<blockquote>
 “Жаһанды жайлаған пандемия кезеңінде медицина қызметкерлері “COVID-19” вирусымен алдыңғы шепте күресіп жүр. Олар еңбектің ерен үлгісін көрсетіп, халықтың қорғаны һәм қалқанына айналды.
 Сондықтан жоғары мадақ пен ерекше құрметке әбден лайық. Мемлекет басшысы Қасым-Жомарт Кемелұлы Тоқаев медицина қызметкерлерін қаржылай және рухани қолдау керектігін тапсырғаны белгілі.
 Осы ретте, вируспен күреске жұмылдырылғандардың барлығы өздеріне тиесілі үстемақыларын алады. Елеулі еңбектері ескерусіз қалмайды. Қазір олар дұрыс тамақтанып, тыныға да алмай жүр.
 Жақындарымен мүлде жүздеспейді. Сол себепті ақ халаттыларды барынша қолдауымыз керек. Кеше мен халық саулығын қорып жүрген дәрігер, мейіргер, мейірбике және медицина көлігін жүргізушілермен телефон арқылы сөйлестім. Жеке өзімнің және аймақ жұртының атынан алғыс білдірдім. Сындарлы сәтте сырқатқа қасқая қарсы тұрған ақ халаттыларға амандық пен мұқалмас жігер тіледім. Біз әрқашан біргеміз!”, – деп жазды аймақ басшысы.
</blockquote>

Гүлшара Әбдіхалықова: Ақ халаттыларды барынша қолдауымыз керек

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев Қазақстан Республикасында төтенше жағдайдың қолданысын ұзарту туралы Жарлыққа қол қойды
***
Қазақстан Республикасында төтенше жағдайдың қолданысын ұзарту туралы
«Төтенше жағдай туралы» Қазақстан Республикасының Заңы 7-бабының 3-тармағына сәйкес ҚАУЛЫ ЕТЕМІН:
«Қазақстан Республикасында төтенше жағдайды енгізу туралы» Қазақстан Республикасы Президентінің 2020 жылғы 15 наурыздағы № 285 Жарлығымен енгізілген Қазақстан Республикасының барлық аумағындағы төтенше жағдайдың қолданысы 2020 жылғы 1 мамырдағы 07 сағат 00 минутқа дейін ұзартылсын.
Қазақстан Республикасының Үкіметі орталық және жергілікті мемлекеттік органдармен бірлесіп, осы Жарлықтан туындайтын қажетті шараларды қабылдасын.
Осы Жарлық қол қойылған күнінен бастап қолданысқа енгізіледі.
Қазақстан Республикасының
Президенті Қ. Тоқаев
Нұр-Сұлтан, Ақорда, 2020 жылғы 14 сәуір
№ 306

Қазақстан және Қызылорда облысының жаңалықтары: COVID-19