<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіхалықова&nbsp;<a href="https://m.facebook.com/story.php?story_fbid=121730589488095&id=108364210824733">Facebook</a>&nbsp;парақшасында коронавирустық инфекциямен күні-түні күресіп жатқан аймақ дәрігерлеріне алғыс айтты.
<blockquote>
 “Адамзат баласына қиын сынақ әкелген “COVID-19” вирусымен күн-түн демей күресіп жүрген бейбіт күннің батырлары, медицина қызметкерлерінің хал-жағдайы қалай? Көзге көрінбейтін жаумен арпалыста қандай қиындықтармен кезігіп жүр? Осы жайт көпшілігімізді алаңдатады. Себебі, ақ халаттылар бүгінгі қоғамның ең негізгі қорғанына айналып отыр.
 Бұл жолы мен медицина қызметкерлеріне қолдан келген көмегін көрсетіп, қолдауын аямай келе жатқан кәсіпкерлердің еңбегін ерекше атап өткім келеді. Бүгін ғана вируспен күресте алдыңғы шепте жүрген 20 маман “Достық” қонақүйіне тегін орналастырылды. Тынығып, демалуларына жайлы жағдай жасалды. Бұған қоса, өңірдегі «KAZPETROL GROUP» жауапкершілігі шектеулі серіктестігі жеке қаражаты есебінен 12 млн.теңге бөліп, 120 медицина қызметкеріне 100 мың теңгеден материалдық көмек көрсетті.
 Өздеріңізге белгілі, таяуда мен медицина қызметкерлерімен телефон арқылы сөйлестім. Әңгіме өңірдегі коронавируске қатысты ахуал жайында өрбіді. Халық саулығын қорып жүргендердің сенімділігі қуантты. Қызылорда облыстық жұқпалы аурулар ауруханасының қызметкерлері Жадыра Зинабдинова, Жарқынай Әліби, Шиелі аудандық ауруханасының дәрігері Ақжан Дәрібаева және Қызылорда облыстық фтизиопульмонология орталығының дәрігері Алма Асқаровалар бірауыздан вирусты міндетті түрде жеңіп шығатындарын айтты. Өздеріне тұрақты қолдау көрсетіп келе жатқан кәсіпкерлерге алғыстарын да жеткізді. Қонақүйде тынығып, ыстық тамақпен қамтылып, жайлы жағдай жасалып жатқанына ризашылық білдірді.
 Ендеше, мен де өз атымнан қандай қиындық болса да мойымай, вирусқа қасқая қарсы тұрған дәрігер, мейіргер, мейірбикелерге, күреске жұмылдырылған барлық сала өкілдеріне алғысымды айтамын. Біз қашанда біргеміз!”, – делінген облыс әкімінің аталған жазбасында.
</blockquote>

Гүлшара Әбдіқалықова аймақ дәрігерлеріне алғыс айтты

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев төтенше жағдай жөніндегі мемлекеттік комиссия отырысында төтенше жағдай кезінде табысынан айырылғандарға ең төменгі жалақы мөлшерінде, яғни, 42500 теңге көлемінде ай сайынғы төлем енгізуді тапсырғаны белгілі. Осының арқасында көптеген тұрғындар мемлекет қолдауына ие болғаны айтпаса да түсінікті.
Еліміздегі төтенше жағдай кезінде табысынан айрылып, осындай жәрдемақыға ие болған азаматтардың бірі – қызылордалық Жасқанат Пазылбек.
27 жастағы Жасқанат – Тасбөгет кентінде тұрады. Ол Қызылорда қаласындағы «Заря Востока» атты мейрамханада әкімші болып жұмыс жасайды.
<blockquote>
 «Қызылорда облысында коронавирустық инфекцияның таралуына байланысты карантин режимі жарияланғаны белгілі. Осыған байланысты «облыстағы кафе, мейрамханалардың жұмысы тоқтатылсын» деген арнайы қаулы шықты. Осыған орай, біз бір күнде табысымыздан айрылып шыға келдік. Бірақ, біз жұмыс жасайтын мейрамхана басшысы бізге бұдан қорықпау керектігін жеткізді. Мемлекет тарапынан 42500 теңге көлемінде жәрдемақы берілетінін айтып, құжаттарымызды дайындауды тапсырды», – дейді ол.
</blockquote>
Осылайша, Жасқанат және оның әріптестері ең төменгі жалақы мөлшеріндегі жәрдемақыға құжат тапсырған. Арада 2 күн өткенде оның ұялы телефонына 42500 теңге жәрдемақы түскендігі туралы хабарлама келіпті.
Ал, Жасқанат бұл жәрдемақыға азық-түлік алған.
<blockquote>
 «Біз отбасында 6 адам тұрамыз. Жәрдемақы түскен күні дүкенге бардым да үйге қажетті азық-түлік алдым. Себебі, базарлар мен дүкендердің де жұмыс уақыты шектеліп жатты. Тасбөгеттен қала орталығына шығуға арнайы рұқсаты бар көліктер ғана шығатын болды. Осыны ойладым да анаммен ақылдаса отырып, ең бірінші қажетті азық-түлік алуға шешім қабылдадық. Қазір отбасымызбен азық-түліктен қысылып жатқан жоқпыз. Бастысы, аталған жәрдемақыны дер кезінде алғаныма қуанамын. Мемлекет басшысы мен үкіметке алғысымыз шексіз», – дейді Жасқанат бізбен әңгімесінде.
</blockquote>
Оның айтуынша, Жасқанаттан бөлек мейрамханада жұмыс жасайтын тағы табысынан айрылған 10 әріптесі осы жәрдемақыға қол жеткізіпті.

Жасқанат Пазылбек: «Жәрдемақыны дер кезінде алғаныма қуанамын»

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысында коронавирустық инфекциядан жазылған науқастардың саны 17 адамға жетті.
17 сәуір 15:00-дегі ақпарат бойынша Қызылорда облысында тағы 4 адам қауіпті індеттен жазылып шыққан. Осылайша қауіпті індеттен айыққандар саны өңірде 17 адамға жетіп отыр.
Айта кетейік, Қызылорда қаласында – 6, Жаңақорған ауданында – 10, ал, Шиелі ауданында – 1 адам осы індеттен емделіп, үйлеріне шығарылған.
Олар алдағы 14 күнде дәрігерлердің бақылауында болады.

Қызылорда облысында 17 адам қауіпті індеттен жазылды

<a href="https://kyzylorda-news.kz/">Kyzylorda-news.kz</a>. Францияның Экс-Марсель университетінің ғалымдары коронавирус қандай температурада жойылатынын анықтады, деп хабарлайды&nbsp;<a href="https://stan.kz/">Stan.kz</a>.
Олардың зерттеу қорытындысы&nbsp;bioRxiv порталында жарияланды.&nbsp;
Тәжірибе барысында ғалымдар коронавирус штамын стерильденген және биоматериалы бар құтыларға орналастырыпты. Содан кейін вирус штамдары Цельсий шкаласы бойынша 60 градусқа дейін бір сағат бойы қыздырылыпты.
Зертеу барысында тазартылмаған құттыдағы вирус, тіпті, қыздырылса көбейе алатын қасиетке ие екені аңғарылыпты. Инфекция тудырушыларды толығымен заласыздандыру үшін оны 90 градусқа дейін 15 минут қыздыру қажет.

Коронавирустың қандай температурда жойылатыны анықталды

<a href="https://kyzylorda-news.kz/">Kyzylorda-news.kz</a>. Бүгін Қызылорда облысында тағы 7 науқас коронавирустық инфекциядан жазылып шықты.
Осылайша қауіпті індеттен айыққандар саны өңірде 13 адамға жетіп отыр.

Қызылордада індеттен жазылғандар саны 13 адамға жетті

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 143 адамға жетті. Бүгін соңғы тәулікте жаңадан анықталған 12 жағдайдың мән-жайын облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
<blockquote>
 «Қазіргі таңда Қызылорда облысында коронавирустық инфекцияны жұқтырған 143 жағдай тіркелді. Соңғы тәулікте жаңадан 12 жағдай анықталды. Оның үшеуі – Қызылорда қаласынан болса, тоғызы – Жаңақорған ауданынан. Осы 12 науқастың 11-і – бұрын анықталған науқастармен жақын қарым-қатынаста болғандардың арасынан анықталып отыр. Ал, 1 науқас – Жезқазған қаласынан вахталық әдіспен жұмыс жасап келген. Қауіпті індет жұқтырғандардың барлығы жұқпалы аурулар ауруханасына ауыстырылып, тиісті емдерін қабылдауды бастады», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 143 науқаспен байланыста болғандардың жалпы саны – 2162.&nbsp;Оның ішінде, жақын қарым-қатынаста болғандар саны – 1128, потенциалды байланыста болғандар – 1034 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 137, правизорлық стационарда – 21, карантиндік стационарда – 455 адам бақылауда.
Басқарма басшысы атап өткендей, 1 (Б) елдерінен 17 адам келген. Қазіргі таңда оның төртеуі – стационарда, 13 – үй жағдайындағы карантинде бақылауда.
Брифингте Жақсылық Әбілқасымұлы мәлімдегендей, облысымызда анықталып отырған науқастардың санынан қорқудың еш қажеті жоқ. Себебі, дәрігерлер қауіпті індетке шалдыққандарды анықтаудың белсенді сатысына көшкен.
<blockquote>
 «Облысымызда анықталған науқастардың санынан қорқудың қажеті жоқ. Өйткені, біз өңірде қауіпті індетке шалдыққандарды анықтаудың белсенді сатысына көштік. Себебі, неғұрлым ерте анықталса, соғұрлым емдеу шаралары тез басталады. Өзінің нәтижесін береді. Осы тұрғыда, дене қызуы көтеріліп, ЖРВИ белгілері байқалған болмаса өкпесі қабынған тұрғындарды дер кезінде дәрігерлерге қаралуын сұраймыз», – деді ол.
</blockquote>
Сондай-ақ, басқарма басшысы өңірге сырттан келіп жатқандардың арасында коронавирустық инфекцияны жұқтырғандар саны артып отырғандығын мәлімдеді.
<blockquote>
 “Біздің өңірге сырттан келіп жатқан адамдар туралы қандай да бір дерек білсеңіз, тұрғылықты жері бойынша аймақтық медицина мамандарына хбарласуыңызды сұраймыз. Себебі, бүгінгі таңда сырттан келгендердің арасынан коронавирустық инфекцияны жұқтырғандардың саны артып отыр. Егер қауіпті індет жұқтырған ошақты, ол науқаспен қарым-қатынаста болғандарды дер кезінде анықтасақ, оның әрі қарай таралуына жол бермейміз”, – деді Ж. Әбілқасымұлы.
</blockquote>
Айта кетейік, бүгін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/covid-19-news/qyzylorda-oblysynda-qawipti-indet-zhuqtyrghandar-sany-143-boldy-56931/">143 адамға жеткенін</a>&nbsp;хабарлаған болатынбыз.
Оның ішінде, Қызылорда қаласында – 21, Жаңақорған ауданында – 28, Қармақшыда – 4, Шиеліде – 59, Сырдарияда – 25, Арал – 4, Қазалы ауданында – 2 жағдай тіркеліп отыр.

COVID-19: Соңғы анықталған науқастардың біреуі Жезқазған қаласынан келген

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекцияны жұқтырған науқастар саны 143 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-17-sauir-10-05-tegi-epidemiologiyalyk-zhagday_a3639214">www.coronavirus2020.kz.</a>
17 сәуір сағат 10:05-тегі&nbsp;мәлімет бойынша елімізде коронавирус індетін жұқтырған тағы 68 жағдай тіркелді. Атап айтқанда, Нұр-Сұлтан қаласы – 2, Алматы қаласы – 44, Шымкент қаласы – 1, Түркістан облысы – 2, Қызылорда облысы – 9, Атырау облысы – 1, Батыс Қазақстан облысы – 4, Павлодар облысы – 2, Қарағанды облысы – 3.
Қазақстан бойынша барлығы 1470 жағдай.

Қызылорда облысында қауіпті індет жұқтырғандар саны 143 болды

<a href="https://kyzylorda-news.kz/">Kyzylorda-news.kz.</a> Коронавирус дертімен ауыратын науқастарда өкпенің көлемі кішірейіп, мидың қызметі нашарлайды. Бұл туралы Джордж Мейсон университетінің (АҚШ) жүйелік биология мектебінің профессоры Анча Баранова айтты, деп хабарлайды&nbsp;<a href="https://ria.ru/20200416/1570110074.html">РИА Новости</a>.
<blockquote>
 «Аталған дерттің ауыр түрін бастан өткерген жастар бұдан былай марафонға қатыса алмай, ал қарт адамдар баспалдаққа көтерілген кезде тыныс алудан зардап шегеді. Әрине, осы санаттағылардың бәрі емес», – дейді Баранова.
</blockquote>
Сонымен қатар, профессордың айтуынша, коронавируспен ауыр сырқаттанған науқастарда неврологиялық белгілер пайда болады. Егде жастағы адамдарда сана-сезім шатасуы мен бағыттан ауытқушылық белгілері жиі кездеседі.
<blockquote>
 «Вирустың нейроқабыну жүргізу мүмкіндігі күмән тудырмайды. Оның қанша уақытқа созылатыны және қашан аяқталатыны да қазірше белгісіз. Өйткені, науқастар ауруханадан жазылып шықаннан кейін де, шаршау мен көз алдының тұманданатынын айтуда», – деді Анча Баранова.
</blockquote>
Демек, адам сауығып, қалпына келгеннен кейін де аурудың салдары қанша уақытқа созылатыны әлі белгісіз.

Ғалым коронавирустан айыққан адам қандай қиындыққа тап болатынын айтып берді

<a href="https://kyzylorda-news.kz/">Kyzylorda-news.kz.</a> Қазіргі таңда коронавирустық індетпен күреске жұмылдырылған мамандарымыз уақытпен санаспай жұмыс жасап жүргені белгілі. Сондай мамандардың қатарында Жаңақорған ауданаралық ауруханасының жоғары санатты дәрігер-эпидемиологы Асқан Отарбеков те бар.
Ол 29-шы наурыздан бастап үйіне қайтпаған. Отбасымен тек қолы қалт еткенде телефон арқылы ғана сөйлсетін көрінеді. Бірақ, дәрігер қызметін таңдағанына еш өкінбейтін көрінеді.
<blockquote>
 «Егер маған қайтадан мамандық таңдауға мүмкіндік берілсе, дәрігер мамандығын қайта таңдаған болар едім. Біздің қызметіміз адамның денсаулығына, тағдырына тікелей қатысты болғандықтан, міндетімізді асқан жауапкершілікпен, мінсіз атқаруға тырысамыз», – дейді ол.
</blockquote>
Ол облыс тұрғындары дәрігерлерге қолдау көрсетіп, карантин талаптарына жауапкершілікпен қараса дейді.
<blockquote>
 «Мен 29-шы наурыздан бері, яғни, ауданда алғашқы науқас анықталған күннен бастап үйіме қайтқаным жоқ. Отбасыммен жұмыс арасында ғана телефонмен байланысып, жағдайларын біліп тұрамын. Сәт сайын науқастың жағдайын бақылап, өзіме жүктелген міндеттемелерді атқарудамын. Менің бір ғана өтінішім бар. Қалыптасқан жағдайға байланысты енгізілген карантин шараларына барлық тұрғындар үлкен жауапкершілікпен қараса деймін», – дейді жаңақорғандық дәрігер Асқан Бердіұлы.
</blockquote>

Жаңақорғандық дәрігер: «20 күннен бері ауруханада түнеп жүргеніме өкінген емеспін»

<a href="https://kyzylorda-news.kz/">Kyzylorda-news.kz</a>. ҚР мемлекеттік бас санитариялық дәрігері Айжан Есмағамбетованың қаулысына сәйкес,&nbsp;Қазақстанның барлық аймақтарында карантин&nbsp;шаралары күшейтілді.&nbsp;
Қазақстанның Бас санитариялық дәрігердің қаулысына сәйкес облыстардың әкімдері:&nbsp;
1) халықтың тыныс-тіршілігін қамтамасыз ету ұйымдарының қызметкерлерін, медициналық көрсетілімдер бойынша шығатын және кіретін адамдарды, сондай-ақ карантин енгізілген кезеңде стационарларда және карантиндік және провизорлық стационарларда бақылауда болған адамдардың шығуын қоспағанда, облыс орталықтарының, қалалардың, аудандардың, ауылдық елді мекендердің аумағынан шығуға және оған кіруге тыйым салуды;
2) авариялық-құтқару, жедел медициналық жәрдем қызметтерінің&nbsp; қолжетімділігін және үздіксіз жұмысын қамтамасыз етуді ескере отырып, карантиндік аймаққа кіру/шығу пункттерін айқындауды;
3)&nbsp;қала бойынша және аудандар, ауылдық елді мекендер арасында орамдар мен секторларға бөле отырып, блок-бекеттерді орната отырып, карантиндік аймақта жүріп-тұруды шектеуді;&nbsp;
4)&nbsp;Ішкі істер және Қорғаныс министрліктерінің қызметкерлерін тарта отырып, COVID-19-мен сырқаттанушылық тіркелген ауылдық елді мекендерді қоршауды;&nbsp;
5) әуежайдың, теміржол вокзалының, автовокзалдар мен автостанциялардың қызметін тоқтата тұруды, қалааралық, ауданаралық автобус қатынастарына, сондай-ақ жеке тасымалдауға тыйым салуды;
6) екінші деңгейдегі банктер, «Қазпочта» АҚ бөлімшелерінің, айырбастау пункттерінің қызметін онлайн жұмыс режиміне және «клиенттерге дейін жеткізу» принципі бойынша көшіру арқылы тоқтата тұруды;&nbsp;
7) меншік нысанына қарамастан мектепке дейінгі балалар мекемелерінің, қызмет көрсету саласы объектілерінің қызметін тоқтата тұруды;
8) жәрмеңкелердің, азық-түлік, азық-түлік емес тауарлар базарларының, автомобиль, киім-кешек, мал базарлары мен адамдар көп жиналатын басқа да объектілердің жұмысын тоқтата тұруды;&nbsp;
9) қоғамдық көліктің жұмысын тоқтата тұруды;
10) ауылдық елді мекендер ішінде тұрғындардың жүріп-тұруына тыйым салуды енгізуді;
11) Ішкі істер, Қорғаныс министрліктерінің күштерін тарта отырып, карантиндік аумақты патрульдеуді;&nbsp;
12) тыныс-тіршілікті қамтамасыз ететіндерді қоспағанда, барлық кәсіпорындардың/ұйымдардың қызметін тоқтата тұруды;
13) діни мақсаттағы объектілердің жұмысын тоқтата тұруды;
14) облыс орталықтарының, қалалардың, аудандардың, ауылдық елді мекендердің ішінде жеке көліктің қозғалысын шектеуді;
15) бір отбасы мүшелерін қоспағанда, көшелерде және өзге де қоғамдық орындарда үш адамнан артық топпен жиналуды шектеуді;
16) қажет болатын:&nbsp;
– азық-түлікті, бірінші кезекте қажетті дәрілік заттар мен медициналық бұйымдарды сатып алу;
– жұмысқа шығу жағдайларын қоспағанда, тұрғындардың тұрғын үйден шығуын шектеуді;&nbsp;
17) тұрғылықты жері бойынша отбасылық іс-шараларды өткізуге тыйым салуды;&nbsp;
18) 65 жастан асқан адамдарға және он сегіз жасқа толмаған адамдарға тұрғын үйден алып жүретін адамсыз шығуына тыйым салуды;&nbsp;
19) карантин режимін сақтамайтын адамдарды әкімшілік жауапкершілікке тартуды;&nbsp;
20) карантин кезеңінде халықтың тыныс-тіршілігін қамтамасыз ету объектілерінің тізбесі мен жұмыс режимін айқындауды;&nbsp;
21) қызметтік міндеттерін атқаруына байланысты облыс орталықтарының, қалалардың, аудандардың, ауылдық елді мекендердің аумағында жүріп-тұруға рұқсат етілген адамдардың тізбесін айқындауды;&nbsp;
22) COVID-19-ды жоққа шығармайтын клиникалық белгілері бар пациенттердің шұғыл көрсетілімдері бойынша емдеуге жатқызуға арналған көп бейінді стационарларды айқындауды тапсырды.
Еске салайық, кеше Денсаулық сақтау министрілігінің өкілдері еліміздегі коронавирус ахуалының&nbsp;<a href="https://kyzylorda-news.kz/covid-19-news/qr-dsm-koronavirws-indeti-qazaqstanda-sharyqtaw-shegine-zhetti-56747/">шарықтау шегі басталды</a> деп мәлімдеген&nbsp;болатын.

Қазақстанның барлық аймақтарында карантин шаралары күшейтілді

<a href="https://kyzylorda-news.kz/">Kyzylorda-news.kz.</a> Бүгін Қызылорда облысында тағы 2 науқас коронавирустық инфекциядан жазылып шықты.
Қызылорда облыстық жұқпалы аурулар ауруханасы қызметкерлері COVID-19 вирусымен тіркелген тағы да 2 науқасты емдеп шығарды.
Бұл 2 науқастан тексеру барысында, коронавирус анықталып, емдік хаттамаларға сәйкес ем жүргізілген.
Бүгін, 2020 жылдың 16 сәуірінде 2 науқастан да екі рет қайталама зертханалық талдамалары алынып, теріс мәнді және жалпы жағдайының қанағаттанарлық болуына байланысты, үй жағдайына шығарылды.
Олар алдағы кезеңде 14 күнде аймақтық емхананың бақылауында болады.
Қызылорда облысы бойынша 16 сәуірде COVID-19 вирусымен тіркелгендер саны – <a href="https://kyzylorda-news.kz/kogam/covid-19-qyzylordalyq-turghyndar-indetti-basqoswdan-zhuqtyrghan-56779/">131</a>, жазылып шыққандар саны – 6.

COVID-19: Қызылордада індеттер айыққандар саны 6-ға жетті

<a href="https://kyzylorda-news.kz/">Kyzylorda-news.kz</a>. Жаңақорған ауданаралық ауруханасының инфекционист дәрігері Әсел Сейілова <a href="https://lenta.inform.kz/kz/kyzylordalyk-dariger-uyge-barmaganyma-3-apta-boldy_a3638711">ҚазАқпарат</a> тілшісіне соңғы үш аптада қалай жұмыс істеп жатқаны туралы айтып берді.
Әсел Сейілованың айтуына қарағанда ол соңғы үш апта үйіне бармаған. Тәулік бойы жұмыс орнында қалады.
<blockquote>
 «Менің үйге бармағаныма 3 аптадай уақыт болды. Жұмыста қонып, осында қалудамыз. Бұл барлығымыз үшін қауіпсіз. Мен науқасқа шалдыққандарды емдеп және өзінің жақындарымды қауіпті дерттен қорғағым келеді. Қауіпті індетті жойғанша қызмет орнында боламыз», – деді Әсел Сейілова.
</blockquote>
Сондай-ақ, ол жалақысы қосылған үстемақы туралы да айтты.
<blockquote>
 «Бала күнімнен дәрігер болуды алдыма мақсат еттім. Сол арманыма қол жеткіздім. Он жылдан астам уақыттан бері денсаулық сақтау саласында қызмет атқарып келемін. Президентіміз Қасым-Жомарт Тоқаев еңбегімізді ескеріп, айлығымызға қосымша төлемақы төлеуге шешім қабылдағанын білеміз. Маған наурыз айының жалақысына үстеме төленгені туралы ұялы телефоныма хабарлама келіп түсті. Оның көлемі 248 000 теңгені құрайды», – деді ол.
</blockquote>
<img src="https://kyzylorda-news.kz/wp-content/uploads/2020/04/kyzylordalyk-dariger-ka3-ishine.jpg" alt="" />

Қазақстан және Қызылорда облысының жаңалықтары: COVID-19