<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің делегациясы Түркияның Анталья қаласында іс-сапарда жүр.</h4>Сапардың мақсаты екі ел арасындағы ынтымақтастықты арттыру, Түркия елінің Мәдениет және спорт министрлігі мен Қорқыт ата атындағы Қызылорда университеті арасындағы "Мәдени мұра" халықаралық жобасын жандандыру.Делегация ресми кездесулерде университеттің Басқарма Төрағасы-Ректор Бейбіткүл Каримованың сәлемдемесін жеткізіп, алдағы жұмыстарды талқылады.Сапар барысында бір апта бойы Түрік елінің мәдениетімен салт-дәстүрімен танысып, ЖОО тыныс-тіршілігін көріп, тәжірибе алмасады.&nbsp;Туркия елінің “Мәдениет және спорт” министрлігі мен Қорқыт Ата атындағы Қызылорда университетінің бірлескен «Мәдени мұра» халықаралық жобасы аясында Анталья губернаторының орынбасары (Antalya Vali Yardımcısı Yalçın Segin) Ялчин Сэгин мырзамен кездесуде болдық. Кездесу барысында Yalçın Segin мырза бұл жобаны қолдайтынын білдіріп, екі ел арасындағы достықтың нығая беретіндігін айтты.Сондай-ақ жуырда Ресей Федерациясы Мәскеу мен Алтай Республикасы Барнаул, Горно-Алтай қалаларында «Новое поколение» және «Россотрудничество» ұйымдарының ұйымдастыруымен «Азия елдерінің жаңа жас көшбасшылары» атты жастарға арналған ғылыми форум өтті. Форумға 13 елден 155 үміткер, оның ішінде тәуелсіз мемлекеттер достастығы елдерінен жаңа көшбасшы жастар қатысты.Аталмыш форумға арнайы шақырылып, іріктеуден өткен Қорқыт Ата атындағы Қызылорда университеті музей меңгерушісі, экономика және басқару білім беру бағдарламасының оқытушысы Ырза Бекзат Шәкімұратқызы мен “Археология және этнография” ғылыми орталығы ғылыми қызметкері, “Тарих және археология” білім беру бағдарламасының аға оқытушысы Құрманиязов Ыслам Серікұлы қатысты.&nbsp;Жастар форумының ашылуы Мәскеу қаласында Ресей мемлекеттік кітапханасында болды. Ашылуда әр елден келген делегаттар өз елдерінің жіберген мекемелерін таныстырды. Сонымен бірге Мәскеу қаласында бірнеше іс шараларға қатысып, әрі қарай Ресей Федерациясының Алтай аймағы, Барнауыл қаласы, Алтай мемлекеттік университетіне аттанды.&nbsp;Форум жұмыстары әртүрлі ғылым саласы соның ішінде тарих, археология, музеология, география, туризм, халықаралық қатынастар бағыты бойынша болды. Алтай мемлекеттік университетінің «Түркі әлемінің Үлкен Алтайы бірлігі мен тұтастығының тарихы және қазіргі заман» атты кешенді жоба аясында университетттің ғалымдарымен кездесу өтті. Кездесуде Алтай әлемінің тарихы және көршілес Қазақстан тарихы туралы дөңгелек үстелдер ұйымдастырылды. Университет жанындағы «Үлкен Алтай» ғылыми оқу орталығы жұмысының нәтижелері тарих, этнография, археология саласындағы жетістіктер жайлы жетекші ғалымдардың көшбасшылық дәрістері тыңдалды. Форум аясында Алтай Республикасы аумағындағы музейлер және Манжерок тауына туристік турлар ұйымдастырылды. Турға қатысушы делагаттар аймақтағы әр түрлі ұлттардың диаспорасымен кездесті. Одан әрі Алтай аймағында қазақ диаспорасының мерекелік концерттері, салт дәстүрлеріне қатысты дөңгелек үстел өтті. Форум нәтижесінде шет елден келген жас ғалымдармен ғылыми байланыс орнатылып, болашақ жоспарлары талқыланды. Бір аптаға созылған шара соңында форум қатысушыларына арнайы сыйлықтар мен сертификат табыс етілді.Сондай-ақ Қорқыт ата атындағы Қызылорда университетіне ресми сапармен АҚШ-тың Бас консулы Мишель Еркин ханым келген болатын.Делегация Студенттер сарайында сирек кездесетін ғылыми кітапхана қорымен танысып, музейді көрді.Қонақтар университеттің халықаралық деңгейдегі жетістіктері мен мүмкіндіктерімен танысты.&nbsp;АҚШ пен Қазақстан университеттерінің, АҚШ-тың Қазақстандағы Елшілігінің және американдық кеңестің әріптестік бағдарламасының қолдауымен біздің университет АҚШ-тың Мичиган мемлекеттік университетімен бірлесіп ұйымдастырған "Қазақстандағы өңірлік университеттер үшін экология және қоршаған орта туралы ғылымдар бойынша негізгі оқу бағдарламаларын ілгерілету" атты жоба іске асырылды. Бұл жобаға Джордж Вашингтон университеті, Оңтүстік Дакота университеті, Нью-Йорктегі Пейс Университеті және Мейн университеті қатысты.&nbsp;Сонымен қатар екінші жыл Фулбрайт бағдарламасының стипендиаттары ағылшын тілін оқыту үшін үкіметаралық келісімдер негізінде АҚШ-тың Қазақстандағы елшілігімен Қорқыт ата университетіне келеді деп күтілуде.&nbsp;Тағы атап өтетін маңызды жайт, Қорқыт Ата атындағы Қызылорда университеті&nbsp; QS WUR жоғары оқу орындарының әлемдік рейтингінде.&nbsp;2024 жылғы 5 маусымда Quacquarelli Symonds World University Rankings (QS WUR) – 2025 ғаламдық рейтингісінің нәтижелері 21-ші рет жарияланды. Рейтингте Қорқыт Ата атындағы Қызылорда университеті 1400+ орында.Сарапшылар QS World University Rankings рейтингін жасау кезінде әлем университеттерін келесі критерийлер бойынша бағалайды: • Академиялық бедел- 30%• Дәйексөздердің орташа саны– 20%• Жұмыс берушілер арасындағы бедел– 15%• Түлектерді жұмысқа орналастыру– 5%• Оқытушылар құрамының студенттер санына арақатынасы– 10%• Шетелдік студенттердің үлесі– 5%• Шетелдік оқытушылардың үлесі– 5%• Халықаралық зерттеу желісі – 5%• Тұрақтылық – 5%Университеттер әр критерий бойынша бағаланады, содан кейін осы бағалардан университеттің рейтингтегі орнын анықтайтын жалпы балл шығарылады. Биыл әлемнің 106 елінен 5663 жоғары оқу орны қатысты, рейтингке қатысушылар саны өткен жылмен салыстырғанда 2 есеге жуық өсті (2963). Рейтингке 1503 ЖОО кірді, оның ішінде 21-і &nbsp;қазақстандық ЖОО.Сондай-ақ жуырда Президент Қасым-Жомарт Тоқаев Алматы қаласына жұмыс сапары барысында Ұлттық ғылым академиясының «Ғылым ордасында» ғылыми қауымдастықпен кездесті.Кездесуге Қорқыт ата атындағы Қызылорда университетінің Басқарма Төрағасы-Ректор, филология ғылымдарының кандидаты Бейбіткүл Каримова, «Биология, география және химия» білім беру бағдарламасының аға оқытушысы, ауыл шаруашылығы ғылымдарының кандидаты, Жылыжай меңгерушісі Самалбек Қосанов, «Инжинирингтік технологиялар» білім беру бағдарламаларының зерттеуші-профессоры Нұрбол Аппазов, «Физика-химиялық талдау әдістері» инженерлік бейіндегі зертханасының жетекшісі, PhD, қауымдастырылған профессор Нұрғали Ақылбеков, «Электр энергетикасы, техносфералық қауіпсіздік және экология» білім беру бағдарламаларының аға оқытушысы, PhD Сиханова Нұргүл Сағындыққызы қатысты.Жиында Президент өз сөзінде шикізатқа арқа сүйеп отырған ел алысқа бармайтынына назар аударып, бізге ғалымдар, инженерлер, өнертапқыштар қажет екенін айтты.&nbsp;Қорлан САРЫ Фото: Қорқыт ата атындағы ҚУ

Қорқыт Ата атындағы Қызылорда университеті халықаралық ынтымақтастық артуда

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Жуырда Қармақшы ауданындағы Шәмшат Төлепова атындағы мәдениет үйінде аудан әкімі Жандос Еркінбектің төрағалығымен аудандағы білім саласының өзекті мәселелері талқыға түскен "Адал ұрпақ. Саналы жасөспірім. Кемел келешек" тақырыбында кеңейтілген жиын өтті.&nbsp;</h4><h4 style="margin-left:0px;text-align:justify;">Оған аудандық мәслихаттың төрағасы Әділ Қошалақов, аудан әкімінің орынбасарлары, аудан прокуроры, аудандық полиция бөлімі бастығының міндетін атқарушы, аудандық мәслихат депутаттары, дербес бөлім басшылары, кенттер мен ауылдық округі әкімдері, үкіметтік емес ұйымдар, ата-ана, көше комитеттерінің төрағалары мен білім беру ұйымдарының басшылары, педагогтер қатысты.&nbsp;</h4><h4 style="margin-left:0px;text-align:justify;">&nbsp; Аудан әкімі қай кезде де ұрпақ тәрбиесі өзінің өзектілігін жоймайтынына тоқтала келе, іс-шараға қатысушыларды тәрбие мен білім сапасын арттыруға, балалар мен жасөспірімдердің болашағы үшін қауіпсіз қоғам қалыптасыруға және оған белсенді атсалысуға шақырды.&nbsp;</h4><blockquote><h4 style="margin-left:0px;text-align:justify;">– Бүгінгі қоғамның алдында тұрған басты міндеттің бірі – балалар мен жасөспірімдер арасындағы құқық бұзушылықтың алдын алу, кәмелетке толмағандар арасындағы қылмыстың өсуіне жол бермеу. Бұл күн тәртібінен түспейтін мәселелердің біріне айналып отыр. &nbsp; Мемлекет басшысы Қасым-Жомарт Тоқаев Түркістанда өткен Ұлттық құрылтайда «Ұрпақ тәрбиесіне ықпал ететін шараларға баса мән беруіміз керек. Бұл салада кемшіліктер көп екені жасырын емес. Мектептегі тәрбие жұмысы ақсап тұр. Соңғы кезде оқушылардың бір-біріне қысым, зорлық-зомбылық, әлімжеттік көрсетуі жиі болып кетті. Кейде балалардың қатыгездігі жан түршіктіреді» деген болатын. Өкініштісі, бұндай жағдайлар соңғы уақыттарда біздің өңірімізде де орын алып отырғанын аймақ басшысы жақында ғана өткен білім саласының өзекті мәселелеріне арналған кеңейтілген мәжілісте атап өтті. Қазір жас ұрпақты азамат ретінде қалыптастыруда ата-ана мен мектептің өзара байланысы шешуші рөл атқарады. Осыған орай, бүгінгі күн тәртібіндегі негізгі мәселе де – балалар арасында құқық бұзушылық пен қылмыстың алдын алуға бағытталған жұмыстар болып отыр. Қай заманда, қай қоғамда болсын бала тәрбиесі отбасындағы негізгі құндылық болып саналған. Біз соңғы уақытта бала тәрбиесіне негізгі жауапты – ата-ана екенін ұмытып кеттік. Дегенмен, баланы ортаға бейімдеу, тәлім-тәрбие беруде мектептің рөлі үлкен, – деді Жандос Еркінбекұлы.&nbsp;</h4></blockquote><h4 style="margin-left:0px;text-align:justify;">Аудан басшысы бұл бағыттағы жұмыстардың кемшін тұстарына тоқталып, оны жандандыруды тапсырды.&nbsp; Мәжілісте аудандық білім бөлімінің басшысы Гүлзира Абдазиева &nbsp;"Кәмелет жасына толмағандар арасындағы құқық бұзушылықтың алдын алуға бағытталған профилактикалық жұмыстар жөнінде", аудандық прокуратураның прокуроры Нұржігіт Шаймахан "Білім беру ұйымдарындағы құқық бұзушылықтың профилактикасы туралы" және аудандық полиция бөлімінің жергілікті полиция қызметі бөлімшесінің бастығы Қуандық Ермаханов "Балалар мен жасөспірімдер арасындағы қылмыс пен құқық бұзушылықтың алдын алу бағытындағы шаралар туралы" баяндады. Кеңейтілген мәжілісте балалардың өмір қауіпсіздігі кеңінен талқыланды.&nbsp;</h4><h4 style="margin-left:0px;text-align:justify;">2024 оқу жылында 1-10 сынып аралығында 14399 оқушы 100 пайыз жазғы демалысы мен еңбекпен қамту жұмыстарына қамтылады деп жоспарлануда. 465 оқушы Жаңақорған ауданындағы "Облыстық олимпиадалар және қосымша білім беру орталығы" жалпыға міндетті оқу қорынан мектеп жанындағы лагерьге қамтылады деп күтілуде. 2257 оқушы еңбекпен, оның ішінде 1461-і көркейту-көгаландыру бригадаларында (9 сынып оқушылары), 796-сы еңбек бригадаларында (10 сынып оқушылары) қамтылып, оқушылар мектептің жөндеу, көркейту-көгалдандыру жұмыстарына қамту жобаланған. Мектеп жанынан құрылған тынығу лагеріне 1114 оқушы тамақпен, 4677 оқушы тамақсыз лагерьмен қамтылмақ. Мектеп жанынан киіз үй тігіліп, 14 мектепте этноауыл ұйымдастырылатын болса, спорттық лагерьге 2544 оқушы қамтылмақ. 838 оқушы дебат үйірмесіне қамтылады деп жоспарланған.</h4><h4 style="margin-left:0px;text-align:justify;">Аудан басшысы осы кезден бастап оқыс жағдайлардың алдын алу, оны болдырмау, балалардың өмір қауіпсіздігін қамтасыз етуде тиісті іс-шараларды қабылдауды қатаң тапсырды.&nbsp;</h4><h4 style="margin-left:0px;text-align:justify;">Сондай-ақ жиында түнгі кезекшіліктерді күшейту, БАҚ пен әлеуметтік желілерде бүгінгі күні өзекті болып отырған құқық бұзушылық, буллинг, лудоманияның зардабы, суицид және тағы басқа да тақырыптыарды ақпараттандыру, кәмелет жасына толмағандар арасында профилактикалық жұмыстарды тұрақты жүргізу бойынша нақты тапсырмалар берілді.&nbsp;</h4><h4 style="margin-left:0px;text-align:justify;">"Балаң өзіңе тартса – жұбан, қоғамға тартса – қуан" дегендей, бала тәрбиесімен қоса, оның білімді болғаны да өте маңызды. Қазіргідей заманауи уақытта бәсекеге қабілетті болу алдымен білім деңгейімен өлшенеді. Бұл ретте ауданымыздың білім саласында ауқымды міндеттер күтіп тұр. "Балапанды күзде санайды" демекші, оқушылардың білім сапасын сарапқа салатын Ұлттық бірыңғай тестілеу сынағы – басты көрсеткіштің бірі. Биылғы оқу жылында аудан мектептерінен 686 бітіруші түлеп ұшқалы тұрса, олардың 649-ы, яғни 94,6 пайызы ҰБТ-ға қатысады деп күтілуде. Олардың арасында 54 түлек "Алтын белгіге", 67 түлек "Үздік аттестатқа" үміткер.&nbsp;</h4><h4 style="margin-left:0px;text-align:justify;">Жандос Еркінбекұлы аудан орталығында оқушы балалардың топқа бөліну жағдайлары әлі де бар екенін, оған бей-жай қарауға болмайтынын, топтық төбелестер мен жасөспірімдердің құқық бұзушылық жасауларының алдын алуға, сондай-ақ алда өтетін ұлттық бірыңғай тестілеу сынағына дайындықты пысықтап, мектептердің көрсеткіштеріне жан-жақты талдау &nbsp;жасауды жүктеді.&nbsp;</h4><blockquote><h4 style="margin-left:0px;text-align:justify;">– Мемлекет басшысының, Үкіметтің қолдауымен білім саласында ауқымды жобалар жүзеге асуда. Жосалы кентіндегі №284 мектеп-интернатына спорт зал ғимаратының құрылысы жүргізілуде. Балалардың заманауи мектепте білім алуына жағдай жасау мақсатында "Жайлы мектеп" ұлттық жобасы бойынша Жосалы кенті мен ІІІ Интернационал ауылында жаңа мектеп ғимаратының құрылысы жоспарлануда. "Білімді қолдау Ұлттық қоры" арқылы Тұрмағамбет ауылында 250 орынға арналған мектеп құрылысы келесі жылы жаңадан салынатын құрылыстар тізіміне енгізілген. Мемлекет басшысы Қасым-Жомарт Кемелұлы "Әділетті Қазақстан – Адал азамат" атты Ұлттық құрылтайдың екінші отырысында жас ұрпақтың тәрбиесіне ерекше тоқталды. Өскелең ұрпақ пен жастарға – зиялы қауымның, ақсақал-абыздарымыздың сөзі өтімді. Бала тәрбиесіне тек ата-ана, мұғалім ғана емес, қоғам болып атсалысуымыз керек. Биылдан бастап аудандағы елді мекенінде мәдениет үйі жанынан жастарды отаншылдық және мемлекетшілдікке, патриоттыққа тәрбиелейтін түрлі бағыттағы үйірмелерді қамтитын "Адал адам" орталықтары құрылып, жұмыс жасауда. Мұның барлығы дерлік балаларымыздың заман ағымынан қалмай, жақсы білім алуына жасалынып жатқан жарқын қадамдар. Дегенмен, мемлекет тарапынан жасалған қомақты қолдауларға қарамастан жасөспірімдер арасындағы қылмыс пен құқық бұзушылық, өзге де келеңсіз жағдайлар орын алуда. Бұл ретте аудандық білім бөліміне мектептерде ұлттық тәрбиеге жете мән беруді және "Аналар академиясы", "Әкелер кеңесі" мен ата-аналар комитетінің жұмысын жандандыруды тапсырамын, – деді аудан басшысы.&nbsp;</h4></blockquote><h4 style="margin-left:0px;text-align:justify;">Мәжілісте аудан прокуроры Мейрамбек Маханбетжанов, аудандық полиция бөлімі бастығының міндетін атқарушы Қазбек Әліп, аудандық ардагерлер кеңесінің төрағасы Асқар Мереков, аудандық қоғамдық кеңестің төрағасы Әбдірахман Құлдүйсенов, ІІІ Интернационал ауылы ардагерлер кеңесінің төрағасы Мұхтар Сайлауов, Қуаңдария ауылдық ардагерлер кеңесінің төрағасы Ешмағамбет Дүйсебаевтар сөз сөйлеп, бала болашағына немқұрайлы қарамауға, саналы тәрбие мен сапалы біліммен қамтуда қоғам болып атсалысуға үндеді. &nbsp;</h4><h4 style="margin-left:0px;text-align:justify;">Кеңейтілген мәжіліс соңында аудан әкімі Жандос Еркінбек жауапты бөлімдер мен мекемелерге, кенттер мен ауылдық округтің әкімдеріне балалар мен жасөспірімдердің тәрбиесі мен біліміне, өмір қауіпсіздігіне, келешегіне &nbsp;жауапкершілікпен қарап, үйлесімді жұмыс жүргізуді ескертті.&nbsp; &nbsp;</h4>

Ұрпақ тәрбиесі басты назарда

Жаңақорғанда білім сапасы артып келеді

<a href="https://kyzylorda-news.kz/">Kyzylorda-news.kz</a> Білім ордасының қабырғасында нәзікжанды студент қыздарға ақыл-кеңес айтып, дұрыс бағыт-бағдар мақсатында «Ақжүніс» қыздар ұйымы жұмыс жасайды. Қыздар ұйымының төрайымы, жас та болса, көпбалалы ана атанған, «Күміс алқа» иегері Салтанат Тәжібекованың &nbsp;бастамасымен &nbsp;әрбір атаулы мерекелерде «Ақжүніс» қыздар ұйымы қазақи, рухани тағылымды &nbsp;тәрбие &nbsp;жұмыстарымен ерекшеленеді. &nbsp;Сондай әсерлі шараның бірі – Қазалы аграрлы-техникалық колледжінде болып өтті.Қос мереке қарсаңында «Ақжүніс» қыздар ұйымының жетекшісі, арнайы пән оқытушысы Салтанат Ғабиденқызының ұйымдастыруымен «Ана – мәңгі асыл бейне ардақты» атты «Алтын алқа» және «Күміс алқа» иегері атанған көпбалалы аналармен кездесу кеші өткізілді. Көпбалалы аналар «Алтын алқа» иегері Рима Піржанова, «Алтын алқа» иегері Бақытгүл Кеулімжаева, «Күміс алқа» иегері Ольга Тайгараева сынды аяулы аналарымыз салтанатты шарамыздың құрметті меймандары болды.Кездесу кешін директордың тәрбие ісі жөніндегі орынбасары Гүлазат Жаңылова ашып, көпбалалы аналарға өзінің ыстық лебізін, алғысын жеткізді.«Көп балалы отбасы – береке-бірліктің үйлескен жері. Адамзат тарихында есімі елге танылған тұлғалардың көпшілігі көпбалалы отбасында дүниеге келген» деп, өзінің сөзін жалғаған «Ақжүніс» қыздар ұйымының жетекшісі Салтанат Тәжібекова көпбалалы аналарымызға отбасындағы тәрбие, қыз бен ұл тәрбиесі туралы өзінің сұрақтарын қойды. Аналарымыз қойылған сұрақтарға жан-жақты жауап беріп, өздерінің өмірлік тәжірибелерімен де бөлісті. Отбасы құндылығы туралы келелі ойларын ортаға салды.Рухани басқосуда белсенді білім алушылар да, ардақты аналарға &nbsp;балаң көңілмен көкейлеріндегі сауалдарын жолдады. Колледждің бір топ өнерлі студенттері аналарға арналған әсерлі әндерін шырқаса, мың бұралған биші қыздарымыз әсем биімен мерекелік көңіл-күй сыйлады.Кеш соңында аналарымызға құрмет ретінде сыйлықтар табысталды.

Қазалыда: Көпбалалы  аналармен  кездесу өткізілді

<a href="https://kyzylorda-news.kz/">Kyzylorda-news.kz</a> «Адамның бір қызығы – бала деген» деп хакім Абай айтқандай, бала – өмірдің жалғасы һәм ата-ананың көз қуанышы. Тектілігі тегінен тараған қазақ ұлты баланың тәлім-тәрбиесін, қауіпсіздігін салт-дәстүрімен ұштастыра отырып, ықылым заманнан ерекше көңіл бөлген. Себебі, ұлттың болашағы, бақыты мен бағы, ертеңге деген сенімінің кепілі де – бала екенін әубастан ұққан. Сан-мың жылдар өтсе де, нық ұстанымынан тайқымаған халқымыз бала бақытының бостан болашағына байыппен бағдар жасап, баса мән беріп келеді. Жуырда еліміздің түкпір-түкпірінде балаларды қорғау күні аталып өтті. Бүлдіршіндерге бақыт сыйлаған мереке Қазалы ауданында да ерекше тойланды.1 маусым – Халықаралық балаларды қорғау күніне орай Қазалы ауданындағы Оқушылар үйінің ауласында өткен ауданның басты шарасына жиналған жұрттың қарасы қалың болды. Шарада Әйтеке би кентінің өнерлі де, озық балалары өнер көрсетіп, қолдан жасаған түрлі бұйымдардан көрме ұйымдастырылды.Кеш қонағы болған Қазалы ауданы әкімінің орынбасары Дәурен Тлеумбетов пен аудандық мәслихат төрағасы Ғазиз Әліш бастаған бірқатар азамат балалардың шығармашылығына оң бағасын беріп, болашақта елдің үмітін ақтайтын азамат болып өсулеріне тілектестігін жеткізді.Мұнан соң Дәурен Оңғарбайұлы сахна төрінен орын алып, 1 маусым – Халықаралық балаларды қорғау күнімен құттықтады.<blockquote>– Бүгінде баршамыздың алдымызда тұрған зор міндет – ұрпаққа заманауи білім беріп, салауатты өмір салтын ұстануға жағдай жасау. Сол себепті де, біздер барынша балабақшада, мектепте, мектептен тыс уақытта балалардың тиісті күтім мен қамқорлық көруіне жұмыс жасап келеміз. Бұл бағытта елімізде жеткіншектердің білім алуына, шығармашылығын шыңдауына барлық жағдай жасалған. Біздің көңіліміздің гүлі, көзіміздің нұры, болашағымыз – Сіздерсіздер! Сондықтан да, сапалы білім алып, еліміздің дәулетті, жеріміздің сәулетті болуы үшін белсенділік танытып, еліміздің одан әрі гүлденуіне өз үлестеріңізді қосуларыңыз керек, – деген аудан әкімінің орынбасары жас өскіндерге деген қамқорлық алдағы уақытта да, жалғасын таба беретіндігін жеткізді.</blockquote>Салтанатты шарада өнерпаздар бүлдіршіндер әуелете ән шырқап, мың бұрала би биледі. Бұдан бөлек, оқушылар үйінің алаңында аудан кәсіпкерлері бүлдіршіндерге көтеріңкі көңіл-күй сыйлап, тегін балмұздақ таратты.Әлем – балалармен мейірімдіАталмыш мереке қарсаңында ерекше балалар да ескерусіз қалмады. Қазалы ауданына сыйлы, әрі белді кәсіпкерлерінің бірі – Сәкен Құлпыбайұлы аудандағы балғындарға арнап, «Әлем – балалармен мейірімді» атты қайырымдылық шара өткізді.Игі шараға арнайы барған Қазалы ауданы әкімінің орынбасары Дәурен Оңғарбайұлы бүлдіршіндерді мерекемен құттықтап, мерекелік шараға ұйытқы болған кәсіпкерге аудан әкімі Мейрамбек Шермағанбеттің «Алғыс хатын» табыстап, шынайы ризашылығын жеткізді.Өз кезегінде бар баланы бақытқа бөлеген шарада ата-аналарда жылы лебізін жеткізіп, Сәкен Құлпыбайұлына және С.Бабанаев бастаған әлеуметтік қызметкерлерге ризашылықтарын білдірді.<blockquote>– Бүгін ерекше күн болды. Балаларымыз қуанып қалды. Керемет көңіл-күй сыйлаған кәсіпкерге алғысымыз шексіз. Несібесі молайып, кәсібі өркендей берсін деген тілек білдіреміз. Барлық бала дәл осылай бақытты болуға лайықты. Барша балғынды, ата-ананы балалар мерекесімен шын жүректен құттықтаймын», – дейді олар.</blockquote>Мерекелік кеште балалар ән айтып, би билеп, көңіл көтерді. Сондай-ақ, тегін таратылған балмұздақтан дәм татып, үйлестірілген ойыншықтарды алып, ерекше әсерге бөленді.Айта кетейік, мерекелік дастарханға Әйтеке би кенті, Қазалы қаласы және барлық ауылдық округтерден мүмкіндігі шектеулі балалар, үйде арнаулы әлеуметтік қызмет көрсету бөлімшесінен қызмет алушы 112 бала қатысты.Балақайларға көңіл бөліндіБүлдіршіндерге бақыт сыйлаған шаралардың бірі Р.Бағланова атындағы аудандық мәдениет орталығында, «Бар жақсылық балаларға» тақырыпта өтті. Мерекелік шараны аудандық мәдениет және тілдерді дамыту бөлімінің басшысы Болат Әбенұлы құттықтау сөз сөйлеп, ашып берді.Р.Бағланова атындағы аудандық мәдениет орталығы жанындағы «Ақжелең» би, «Ән», «Жыраулар», «Домбыра» үйірмелерінің өнерпаздары өнер көрсетіп, ата-аналарға, балаларға көтеріңкі көңіл күй сыйлады.Шара мәдениет орталығының ғимараты алдында «Асфальтқа сурет салу» бойынша балалар өз қиялдарындағы суреттерін асфальтқа салса, «Балақай» қуыршақ үйірмесі балаларға арналған ертеңгілік ұсынды. Бұдан бөлек, «Кино TIME» бағыты бойынша бүлдіршіндерге Led экраннан қазақ ертегілерінің топтамасы көрсетілді.Кеш соңында өнер көрсеткен өнерпаздарға кәсіпорын басшысының Алғыс хаты мен сыйлықтар табысталды.Р.Бағланова атындағы аудандық мәдениет орталығы жанындағы «Шабыт» еріктілер тобының ұйымдастыруымен аз қамтылған отбасы балаларына мерекелік көңіл күй сыйлау мақсатында «Агро өркен» жауапкершілігі шектеулі серіктестігі басшысы Мерей Бердібайұлы және жеке кәсіпкер Мақпал Назарқанқызының демеушілігімен сыйлықтар табыстады. Балаларға тегін тәттілер, сусындар таратылды.Жас суретшілер байқауыОсы уақытта Әйтеке би кенті орталығында «Бақытты отбасы» партиялық жобасы аясында аудандық «Amanat» партиясы филиалы мен «Жастар рухы» ЖҚ аудандық филиалының ұйымдастыруымен «Бақытты балалық шақ» атты жас суретшілер байқауы өтіп жатты.Мереке қарсаңында өткен байқаудың мақсаты – балалардың шығармашылық қырларын ашып, танымдық қызығушылықтарға ынталандыру және туындыларын көпшілікке жария ету арқылы жас суретшілердің белсенділігін арттыру болды.Сурет салуға қабілеті бар мектеп оқушылар бақ сынаған сайыста жас суретшілерге Жанқожа батырдың 250 жылдық мерейтойына байланысты тақырып берілді. Суретшілер шығармашылық қабілеттерін пайдалана отырып, бірі батырдың портретін салса, енді бірі кесенесін салды.Нәтижесінде бірінші орынды№25 мектептің 10 сынып оқушысы, қылқалам шебері Нұрдина Қуантаева жеңіп алды. Екінші орынға №249 лицейдің 8 сынып оқушысы, Дильназ Жанназар жайғасса, үшінші орынды №17 мектептің 6 сынып оқушысы Ақтоты Кеңесбай місе тұтты.Жеңімпаздар жүлделі дипломмен және арнайы сыйлықтармен марапатталды. Сондай-ақ бірқатар қатысушыларға түрлі тақырыптағы номинациялар бойынша дипломдар мен сыйлықтар табысталды.

Бүлдіршіндер – ұлттың болашағы 

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Басқарма мүшесі-Академиялық мәселелер бойынша проректор Дана Абдрашева «Жоғары оқу орындарында шешім қабылдауды жетілдіру үшін институционалдық зерттеу деректерін қолдану» атты II форум аясында «Аймақтық университеттердегі институционалдық зерттеулер: мифтер мен ақиқат» тақырыбында баяндама жасады. Форумға Академиялық мәселелер жөніндегі департамент директоры Баянәлі Досжановта қатысты. &nbsp;Форумда білім сапасын арттыруға бағытталған институционалдық зерттеулердің сәтті кейстерін және білімгерлердің оқуға қабылданған сәттен бастап оқуын аяқтағанға дейінгі нәтижелерін бақылаудың негізгі принциптері талқыланды. Сондай-ақ тиімді деректер есебі және жиналған деректер негізінде шешім қабылдау стратегиялары айтылды.Айта кетейік, Алматы облысында «Жоғары оқу орындарында шешім қабылдауды жетілдіру үшін &nbsp;институционалдық зерттеу деректерін қолдану» атты II форум өтті. Форумды Сүлеймен Демирель университетінің базасында &nbsp; Назарбаев университетінің, КИМЭП университеті бірлесіп ұйымдастырған.&nbsp;Форумда білім сапасын арттыруға бағытталған институционалдық зерттеулердің кейстері, мәліметтерді талдау және шешім қабылдау стратегиялары талқыланды.&nbsp;&nbsp;Ә.Жанәбіл Фото: Қорқыт ата атындағы Қызылорда университетінің медиа орталығы

Институционалдық зерттеулер бойынша форум өтті

<h4 style="margin-left:0px;text-align:justify;"><a href="https://kyzylorda-news.kz/">Kyzylorda-news.kz</a> Қармақшы ауданының орталығындағы А.Жанпейісов атындағы №105 мектеп-лицейде 5 жылдан бері оқушыларға физика-математика пәнінен дәріс беретін жас та білімді жұп бар. &nbsp;Олар – Сәулет Игембаев пен Ақнұр Үсенова.</h4>1992 жылы Жосалы кентінде ұстаздар отбасында дүниеге келген Сәулет Игембаев жасынан есепке жүйрік. Ұстаздары мықты математик шығады деп сенім артқан жігіт мектеп бітіргеннен соң Алматыдағы Абай атындағы Қазақ Ұлттық педагогикалық университеттің грантын жеңіп алған. Жоғары білімнен кейін магистратураға түсіп, 2016 жылы өзімен қатар құрдас, физика факультетінде білім алған, магистратураны да бірге тәмамдаған тараздық Ақнұр есімді арумен көңіл жарастырып, Жосалыға келін етіп ала келіпті. Білімді жасты өзі оқыған мектеп ұжымы қуана қарсы алып, математика пәнінің мұғалімі, келіншегі Ақнұрды физика пәнінен дәріс беретін ұстаз ретінде бірден жұмысқа қабылдайды. Қос білім магистрі ерекше қарқынмен, жастық жігермен жұмысқа кірісіп, бар-жоғы 5 жылдың ішінде педагог-сарапшы атанды. Ауылға келген жастарды баспанамен қамтамасыз ететін тиімді бағдарлама бар. Бір үйдің тұңғышы Сәулет «Дипломмен ауылға» бағдарламасымен баспаналы болып, отбасынан еншісін алып шыққан.<blockquote>– Сәулет пен Ақнұр падагогика ғылымының магистрі. Өте білімді. Үнемі ізденіс үстіндегі жастар. Сәулетте ер жігіттерге тән батылдық, бірсөзділік, намыс басым. Ал Ақнұр биязы мінезді. Екеуін жарастырып қосқан дер едім. Бір салада, бір мектепте жұмыс істеген соң бір-бірін қолдап жүреді. Екеуінің де болашағынан күтер үмітіміз көп. Жыл сайын жетістіктеріне жетістік қосып келеді. Осындай еңбегімен де, отбасымен де үлгі болар жас мамандарымыз көп болсын, – деген тілегін жеткізді мектеп директоры Гүлзира Еркебаева жас отбасы жайлы сұрағанымызда.</blockquote>Жас жанұяны Әмина, Әли есімді бүлдіршіндер шат күлкісімен қуанышқа бөленуде.«Барлық адам бақытты өмір сүргісі келеді. Бірақ бақыт деген ақша, дүние-мүлік, атақ деп ойласақ қателесеміз. Бақыттың кілті – теңім деп тапқан қосағыңмен түсінісіп, сыйласып, жарасымды өмір кешуде» дейді Сәулет Қонысбекұлы.Мемлекет басшысы жыл сайын халыққа жолдаған Жолдауында мұғалімдерді қолдауды, олардың еңбекақысын көтеруді назардан тыс қалдырмайды. Білімі және еңбегіне сай жоғары жалақы алу жас отбасылардың аяқтан тұрып кетуіне жәрдем болары анық

Қармақшылық қол ұстасқан қос ұстаз

<a href="https://kyzylorda-news.kz/">Kyzylorda-news.kz</a> &nbsp;Кеше «Қамбаш» олимпиадалар және қосымша білім беру орталығындағы балаларға арналған жазғы тынығу лагерінің салтанатты түрде ашылуы өтті.Балғындардың дәстүрлі қуаныш мерекесіне аудан әкімі Аманжол Оңғарбаев қатысып: «Баршаңызды 1 маусым – Халықаралық балаларды қорғау күніменжәне кезекті оқу жылын ойдағыдай аяқтауларыңызбен құттықтаймын! «Бала күлкісі – ересектердің көңіл жұбанышы», балаларымыздың жазғы демалысын тиімді ұйымдастыру – біз үшін маңызды міндеттердің бірі. Осы орайда балаларға арналған «Қамбаш» жазғы демалыс лагері дәстүрге сай өз жұмысын бастап, бүлдіршіндерімізге есігін айқара ашып отыр. Жазғы демалыстарыңыздың әрбір күнінің естен кетпестей қызықты сәттерге толы болуына тілектеспін! Тынығу лагерінде жаңа достар тауып, ауызбіршілік пен ынтымақтың ұйытқысы бола біліңіздер», - деп жылы лебізін жеткізді.Сонымен бірге, Қызылорда облыстық білім және ғылым қызметкерлері кәсіподағы комитетінің төрайымы Гүлнар Есқалиева қатысып, балалардың қызықты демалыс өткізуіне тілектестік білдірді.Мерекелік шара барысында аудан әкімі орталық қызметін көріп, жас қолөнершілердің дайындаған туындыларын тамашалады. Сондай-ақ, тынығу лагеріндегі балаларды жан-жақты дамыту бағытындағы атқарылып жатқан бастамалармен танысты.Салтанатты кеште орталық тәрбиеленушілері өз өнерлерін ортаға салып, мыңбұрылған бишілер мен жезтаңдай әншілер көрермендер көзайымына айналды.Шарада аудан басшысы, құрметті қонақтар мен лагердің алғашқы легіне келген тынығушылар кешкілік алау отын тұтандырып, естеліктерімен бөлісті. Мерекенің соңы әсерлі от шашумен аяқталды.Атап өтейік, «Қамбаш» жазғы тынығу лагері биылғы жылы 7 ауысым бойынша 1000-нан астам баланы жазғы демалыспен қамтиды. Ал бүгінгі тынығу лагерінің алғашқы ауысымына 130 бала қабылданды.<img src="https://knadmin.beoblood.kz/uploads/447631535_3810368512624840_3518063689205079465_n_c2114f908f.jpg" alt="447631535_3810368512624840_3518063689205079465_n.jpg">

«Қамбаш» жазғы тынығу лагері өз жұмысын бастады

<a href="https://kyzylorda-news.kz/">Kyzylorda-news.kz</a>&nbsp; Мемлекет басшысы Қ.Тоқаевтың тапсырмасына сәйкес «Оқуға құштар мектеп» жобасы, «Балалар кітапханасы» бағдарламасы аясында «Халықаралық кітап сыйлау күніне» орай Қызылорда қаласындағы Абай атындағы дарынды балаларға арналған мамандандырылған сыныптары бар мектеп базасында кездесу өтті. &nbsp;Жиынға республикадағы белгілі балалар басылымының редакторлары, атап айтқанда, «Айгөлек» журналының бас редакторы Қымбат Әбілдәқызы, «Мөлдір бұлақ» журналының бас редакторы Дәулетбек Байтұрсынұлы, «Ақ желкен» журналының бас редакторы Есей Жеңісұлы, «Алан кіds» журналының бас редакторы Әсел Тыныбаева, «Сыр медиа» ЖШС бас директоры Марат Аралбаев және тағы басқа балаларға арналған басылымдардың редакторлары және мектеп директорлары, кітапханашылар, мұғалімдер қатысты.Шараны ұйымдастырудағы мақсат – қазақстандық балалар журналдары мен газеттері арқылы балалар арасында кітап оқу мен мәдениетті насихаттау, оқу белсенділігін арттыру және оқушылардың оқу құзыреттілігін дамыту. Шығармашылық кездесуде балаларға арналған газет-журнал редакторлары, мектеп басшылары, мұғалімдер, ата-аналар өз ойларын ортаға салады, жаңа тың ойларымен ашық пікір алмасты.&nbsp;Бүгінгі баланы кітап емес, телефон тәрбиелеп жатқаны бүгінгі күннің өзекті мәселесі. Смартфонда сағаттап уақыт өткізген баланың нендей ақпарат алып жатқаны да беймәлім. Кездесуде жас буынның кітап, газет-журнал оқу мәдениетін қалыптастыру, балаларды оқуға қызықтыру жайы кеңінен талқыланды. Жасыратыны жоқ, медиа нарығында бәсекеге қабілетті, сапалы, мазмұнды балаларға арналған кітап та, журнал да аз емес. Алайда оқитын бала азайып бара жатқаны дабыл қағатын мәселе. Бала күнінен газет-журнал оқып, редакцияға хат жазып үйренбеген бала ертеңгі күні кітап оқымайтыны белгілі. Жас буынның ана тілінде сауатты жазып, өз ойын анық жеткізуі бүгінде ойланарлықтай мәселеге айналып бара жатқанын алға тартқан «Айгөлек» журналының бас редакторы Қымбат Әбілдақызы қоғам болып ұлт болашағын тәрбиелеуге үлес қосу керек екенін айтты. «Ақ желкен» журналының бас редакторы Есей Жеңісұлы қазіргі жастардың сауатты жазу деңгейі төмен екенін қынжыла айтқаны көпке ой салды. &nbsp;Басқосуда сөз алған «Сыр медиа» ЖШС бас директоры Марат Аралбаев мекеме арқылы балалар басылымына жазылуға мүмкіндік жасалғанын жеткізді. Бүгінгі баланы кітап пен журнал тәрбиелесін десек, ата-ана бұл мәселеге ерекше мән беру қажет. Аға буын үлгі болып, балалардың кітап, газет-журнал оқуына ықпал ете білсек, ұлт тәрбиелеуде ұтарымыз аз болмасы анық. Бүгінгі басқосудың түйіні осы болды.Мұндай шараларды ұйымдастыру мектеп кітапханаларына балаларға арналған газет-журналдарды жаздырып алу арқылы келешек ұрпаққа көркем шығармаларды оқыту арқылы тәрбиелеуге мүмкіндік бермек.&nbsp; Шара барысында кездесуге келген шығармашылық ұжым кітапхана қорына авторлық кітаптарын тарту етті.

Қызылордада балаларды газет-журнал арқылы тәрбиелеу мәселесі қаралды

Қармақшыда 14399 оқушы жазғы демалыспен қамтылмақ

<a href="https://kyzylorda-news.kz/">Kyzylorda-news.kz</a> Оңтүстік Кореяның Йосу қаласында өтіп жатқан «Korea Glocal Education Fair – 2024» көрмесінде Зияткерлік мектептердің BeyimTech жүйесі көпшілік назарына ұсынылып, қатысушылардың қызығушылығын тудырды.Жәрмеңке сарапшылар мен білім беру көшбасшыларын, университеттер, колледждер, мектептер мен тіл орталықтарынан бөлек, әртүрлі білім беру мекемелерінің өкілдері мен студенттерді, ата-аналарды да қамтыды.Айтулы шарада «Назарбаев Зияткерлік мектептері» ДББҰ BeyimTech еншілес ұйымының директоры Нұрсұлтан Дүйсебаев Beyim жүйесіндегі Beyim.ai және Beyim Synaq цифрлық жобаларына жеке-жеке тоқталып, көрме қатысушыларына сандық технология көмегінің игіліктері жайында баяндады.Beyim.ai – бұл «Назарбаев Зияткерлік мектептері» ДББҰ стратегиялық серіктесі – Arizona State University-мен бірлесе әзірленген бірегей әдістеме бойынша құрылған желі. Оның ерекшелігі – Instagram әлеуметтік желісі сияқты ақпаратты ленталық түрде ұсынуында. Микрооқыту әдісі қолданылған бұл жобада авторлық құралдар, оқытудың жеке траекториясы, оқу аналитикасы және тағы да басқа мүмкіндіктер қарастырылған.Beyim Synaq – оқушыларға ыңғайлы уақытта және кез-келген жерде тестілеуден өтуге арналған баламасы жоқ жоба. Қолданбада ақысыз және ақылы тест нұсқалары бар.<blockquote>– Биылдан бастап NIS-ке тестілеу сынағын онлайн тапсыруға болады. Бұл мүмкіндікті 5530 үміткер пайдаланып үлгерді. Жаңа өнім бірқатар артықшылықтарымен ерекшеленеді. Жолға уақыт пен ақша жұмсаудың қажеті жоқ, басқа қалада, ауылда тұрып-ақ тестілеуден өтуге болады. Нәтижелерді күтудің де қажеті жоқ, олар тестілеу аяқталған бойдан бірден шығады. Бұл, ең алдымен, ауылдық және шалғай аудандардың оқушылары үшін ыңғайлы. Қазақстан ауданы бойынша Оңтүстік Кореядан 27 есе үлкен. Сондықтан мұндай жоба бізге қажет болды. Жаңа технологиялар қашықтықты қысқартуда, — деді BeyimTech директоры Нұрсұлтан Дүйсебаев.</blockquote>Өз кезегінде, Білім басқармасының мектепке дейінгі және бастауыш білім беру бөлімінің директоры Чхунчхунбукдо Чхэ Сук Хи көрмеге қатысқан Қазақстан өкілдері мен BeyimTech жобасының жұмысына сәттілік тіледі.

Кореяда Зияткерлік мектептердің баламасы жоқ цифрлық жобалары таныстырылды

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласындағы «Нұрбесік» балабақшасы мемлекет инклюзивті білім берудің мақсатын іске асыра отырып, білім берудің барлық деңгейінде даму мүмкіндіктері ерекше білім беру қажеттілігі бар балалардың білім алуына, дамуындағы ауытқуды түзетуіне және әлеуметтік бейімделуіне арнайы жағдайлар жасауды қамтамасыз етеді. Балабақшасының негізгі ұстанымы осындай.<blockquote>– Біздің негізгі мақсат – ерекше білім беру қажеттілігі бар балаларды қалыпты дамыған балалармен бірге әлеуметтендіру және балаларға қоғамның оң көзқарасын қалыптастыру. Қазіргі уақытта ортамызда болып жатқан әлеуметтік мәселелер, отбасылық, экологиялық, экономикалық дағдарыстар жүйке жүйелері бұзылған, психикалық аурулары бар әртүрлі жастағы балалардың көбеюіне әкеліп соқтыруда. Сондықтан мектепке дейінгі мекемелерде, оңалту орталықтарында ондай балаларға әлеуметтік, педагогикалық және психологиялық көмек жасау, қолдау көрсету көп &nbsp;ізденісті, қажырлы еңбекті қажет етеді. Осындай тұлғалардың бойында психологиялық, сөйлеу тілі және қимыл-қозғалыс дамуларының қарқынының баяулығы байқалады. Олардың көпшілігінде өзіне-өзі қызмет көрсету дағдылары қалыптаспаған. Бұл балаларды қажетті тәртіп нормалары жаттығулары қайта-қайта орындау туралы &nbsp;түсінік өте баяу жүреді. Сондықтан педагог мүмкіндігі шектеулі балалардың, психологиясын терең, жетік меңгеруі керек. Баланың нені ұнатып, нені қаламайтындығын, қарым-қатынас жасау қабілеттерін толық білуі тиіс. Олардың зейіні тұрақсыз,қабылдау мүмкіндіктері де әртүрлі. Дегенмен ерекше балалардың қабілетіне ат үсті қарау, олардан түк шықпайды деу үлкен қателік. Бұл балалар, жан-жақты көмек көрсете отырып жұмыс жасау тиімді, – дейді балабақша меңгерушісі Лиза Тулекова.</blockquote>Айта кетейік, «Нұрбесік» бөбекжай балабақшасы 2007 жылдан бастап жұмыс істейді. 2019 жылғы 9 желтоқсанда Қызылорда облысының мүмкіндігі шектеулі балалар үшін инклюзивті ортаны қалыптастыру бойынша 2020-2022 жылдарға арналған өңірлік жол картасы даярланған. Осы негізде аталған тәлім ошағында «Аутизм балаларды қолдау» кабинеті ашылып, бүгінгі күні ерекше білімді қажет ететін 9 бала тәрбиеленуде.<blockquote>– Қазіргі таңдамектепке дейінгі білім беру ұйымдарына ерекше білім беруді қажет ететін балаларды қамту саны күн сайын артып келеді. Балабақшаға балаларды қабылдау педагогикалық медициналық консультацияның тұжырымдамасы арқылы іске асырылады. Балабақшада педагог-ассистент, дефектолог мамандар жұмыс істейді. Ерекше білім беруді қажет ететін балаларды жалпы білім беру процесіне қосу аясында олардың психологиялық-педагогикалық қолдау көрсету арқылы сапалы білім алу құқықтары жүзеге асырылып келеді, – дейді меңгеруші.</blockquote>Тәрбиелеу – білім беру процесінде жеке дамыту және түзете дамыту бағдарламаларын және оқыту әдістерін, психологиялық-педагогикалық қолдаумен қатар, әр баланың қызығушылықтарын, ерекшеліктері мен қажеттіліктерін ескере отырып, жалпы адами және ұлттық құндылықтар негізінде оларды толыққанды дамыту мен әлеуетін ашу арқылы жан-жақты дамыған жеке тұлға тәрбиеленіп келеді. Әр балаға жеке көңіл бөліп, сырқатына, қабылдау деңгейіне қарай түрлі әдіс-тәсілдер қолданылып, ұйымдастырылған іс-әрекет барысында түрлі ойындар жүргізіп отырады. Балаларды еңбекке баули отырып, танымдық әрекеттерін жетілдіру мақсатында түрлі әдістер пайдаланылады. Ерекше балаға оқу қызметін өткізу педагогке арттырылған жауапкершілік қиын және күрделі. Педагогтің білім қорыбаламен қарым-қатынасы,баланың өзіндік ерекшелігін аңғарымпаздығы адамгершілік және мәдени деңгейі балаға әсер етпейді. Баланы жалықтырмай сабақ өткізу үшін үнемі ізденіс үстінде болып, білімін толықтырып,сауатты түрде қолданылып, заман талабына ілесіп отыруы керек. Балабақшада балалардың рухани өсіп жетілуіне оның жанының жайлы болуына педагогикалық-психологиялық жағдай жасалған.<blockquote>– Ұжымда педагог-ассистент, дефектолог, медбике және тәрбиешілермен мамандар тығыз байланыста отырып, тәрбиеленушілердің мінез-құлқын, психологиясын зерттеп отырады. Олардың емін-еркін сөйлеп,ойын толық жеткізе білуіне,жасқаншақтықтан құтылуына бар мүмкіндіктерін ашып, әр қайсысының қызығушылығын арттырып, түрлі іс-шаралар,тренинг сабақтар, сюжеттік-рөлдік ойындар, сұрақ-жауап, әңгімелесу әлеуметтік тұрмысқа беймдеу,өзіне-өзі қызмет ету ойын әрекетін дұрыс пайдаланып, қызықтырып, жұмыс істеуде, – дейді бала жанының бағбанына айналған жан.</blockquote>Жалпы балабақшаның жұмыс ерекшелігі ерекше білімді қажет ететін балалар үшін инкюлзивті ортаны қалыптастыру бойынша педагогтардың, тәрбиелеу мен оқытуда заманауи әдістерін қолдануы, оларға әдістемелік қолдау көрсету – басты назарда.А.Әлім

Қазақстан және Қызылорда облысының жаңалықтары: Білім