<a href="https://kyzylorda-news.kz/">Kyzylorda-news.kz.</a> Абай Құнанбайұлының 175 жылдығына орай 11-сынып оқушылары арасында Мұхтар Әуезовтің «Абай жолы» романының желісі бойынша сахналық қойылымдар байқауы өтті.
Кураторлар мен қазақ тілі пәні мұғалімдері ұйымдастырған шара Абай шығармашылығын оқушылар арасында насихаттау мақсатында өтті.
11 “С” сыныбы бала Абайдың оқудан келген сәті мен ата-анасымен қауышу, отбасында тәрбиелік мәні зор көріністі, 11 “В” сыныбы бозбала Абайдың әкесі Құнанбайдың тапсырмасымен жер мәселесін шешуге араласу сәтіндегі ақылдылығы мен шешендігін, ал 11 “А” сыныбы болыс Абайдың ел ісіне араласқан сәттегі әділдігі мен ақындығын сахналады.
Көркем шығарманың мазмұны мен танысқан оқушылар Абай бейнесін сомдауда зор ықылас пен актерлік шеберліктерін таныта білді.
<blockquote>
 – «Абай жолы» шығармасын толық оқымасам да, Абайдың жүріп өткен жолының қандай ауыр болғанын түсіндім. Бұл байқау романды оқуға деген қызығушылымды оятты. Ал сахнада образ сомдаудың жауапкершілігі өте жоғары екеніне көзім жетті, – деп, өз ойымен бөлісті Абай рөлін сомдаған 11 “В” сынып оқушысы Дархан Бақытжан.
</blockquote>
Айта кету керек, Ұлы Абайдың 175 жылдығына орай Қызылордадағы Зияткерлік мектепте көптеген тәрбиелік-танымдық шаралар ұйымдастырылып келеді. Жас ақындар мүшайрасы, мәнерлеп оқу байқауы, ақын шығармаларының желісі бойынша жас суретшілер сайысы өтіп, ең үздік жұмыстар марапатталды.
<img src="https://kyzylorda-news.kz/wp-content/uploads/2019/11/20nisabai2.jpg" alt="" />
<img src="https://kyzylorda-news.kz/wp-content/uploads/2019/11/20nisabai3.jpg" alt="" />
<img src="https://kyzylorda-news.kz/wp-content/uploads/2019/11/20nisabai4.jpg" alt="" />

Қызылордадағы зияткерлік мектепте «Абай жолы» романы сахналады

<a href="https://kyzylorda-news.kz/">Kyzylorda-news.kz.</a> ІІМ Төтенше жағдайлар комитеті Darmen мобильдік қосымшасынан анығын білуге болады, деп хабарлайды <a href="https://aikyn.kz/policy/7-24/12499-anyq-qanyq-qansha-gradus-ayazda-oqushylargha-sabaq/">Aikyn.kz</a>.
Қосымшада сабақтардың тоқтатылғаны жөніндегі хабарламалардан бөлек, дауылды гидрометеорологиялық құбылыстар, сейсмикалық қатерлер, қысқы кезеңде автомобиль жолдарының жабылуы, республиканың барлық аумағындағы&nbsp;профилактикалық және басқа да іс-шаралар туралы ақпарат жедел түрде халыққа таратылады.
<img src="https://kyzylorda-news.kz/wp-content/uploads/2019/11/20sabak2.jpg" alt="" />

Қанша градус аязда мектепте сабақ тоқтатылады?

<a href="https://kyzylorda-news.kz/">Kyzylorda-news.kz.</a> Қытай Халық Республикасының Қазақстандағы төтенше және өкілетті елшісі Чжан Сяо Қытайда білім алған қазақстандық студенттер мен елімізде қазақ тілін меңгеріп жатқан қытайлық тәлімгерлерді қабылдады, деп хабарлайды <a href="https://baq.kz/news/othernews/qazaq-tilin-uyrenetin-qytaylyq-studentter/">BAQ.KZ</a> .&nbsp;
Биылдан бастап Қытай жастары қазақ тілін меңгере бастады. Елші Чжан Сяо қытайлық жастардың арасында қазақ тілін үйренуге қызығушылығы артқан студенттер көп екенін атап өтті.
<blockquote>
 «Биылғы кездесуде Қазақстанның жоғары оқу орындарында қазақ тілі мен мәдениетін меңгеріп жатқан қытайлық студенттер бар. Олар қазақ тілін үйреніп жатқанына ұзақ уақыт болмаса да, жақсы меңгергенін бүгін әңгімелесу барысында біле аласыздар. Айта кетейін, бұл – біздің алғашқы тәжірибеміз (қытайлық студенттердің қазақ тілін үйренуі – авт.). Болашақта қазақ тілін үйренетін қытайлық студенттердің қатары көбейеді. Бұл фактінің – маңызы зор. Біріншіден, екі ел арасындағы мәдени және білім алмасудың тереңдегенін, мемлекетаралық қатынастарымыздың жоғары деңгейге көтерілгенін білдіреді. Екіншіден, қытайлықтардың Қазақстанға және қазақ мәдениетін үйренуге, екіжақты дәстүрлі достықты ғасырдан ғасырға жеткізуге құлшынысы артқанының дәлелі», – деді дипломат.
</blockquote>
Елші Чжан Сяо биыл қыркүйекте Елбасы Нұрсұлтан Назарбаев Қытайға сапар жасады. Сол кезде тұңғыш президентімізді ҚХР төрағасы Си Цзиньпин “Достық” орденімен марапаттағанын айрықша атап өтті.
<blockquote>
 «Бұл шара екі ел қатынасының тарихында айрық рөл ойнады. Сондай-ақ, Қазақстан президенті Қасым-Жомарт Тоқаевтың қыркүйекте жасаған сапарында екі ел басшылары мемлекеттеріміз арасындағы қатынасты мәңгі көпжақты стратегиялық әріптестік статусына көтеруге келісті. Тоқаевтың алғашқы мемлекеттік сапары елдеріміз арасындағы қарым-қатынастың маңызды оқиғасы деуге болады. Міне, бүгін осы жылдың қорытындысында екі тарихи сапарды айрықша айтқым келеді», – деді елші.
</blockquote>
Студенттерге арналған жиынға елордадағы Л.Н. Гумилев атындағы Еуразия ұлттық университетінің ректоры Ерлан Сыдықов Сиань қаласында қазақ тілін үйреніп жатқан қытайлықтарды тәжірибе алмасуға шақырды.
<blockquote>
 «Қазақстан мен Қытай достық қатынасының тарихы тереңде жатыр. Қазақстан тәуелсіздік алғаннан кейін бұл қарым-қатынас Елбасы Нұрсұлтан Назарбаев пен ҚХР төрағасы Си Цзиньпиннің жақын достық қатынасы арқасында қарқынды дамыды… Біздің университетіміздегі Конфуций институтында қазақстандық студенттер қытай тілін, мәдениетін үйреніп жатқанына ұзақ уақыт болды. Бұл институттың оқытушылары менің “Шәкәрім” еңбегімді қытай тіліне аударып берді. Алғысымды білдіргім келеді. Сонымен қатар, Қытайдың Сиань шет тілдер мемлекеттік институтында университетіміздің өкілдері бар. Сол институтта қытайлықтар қазақ тілін үйреніп жүр. Оларды тәжірибе алмасуға, қазақ тілін жаттықтыруға елімізге шақырамын», – деді ректор.
</blockquote>

Қазақ тілін үйренетін қытайлық студенттер көбейді

<a href="https://kyzylorda-news.kz/">Kyzylorda-news.kz.</a> Байқоңыр қаласындағы білім мекемелері құрамында сынабы бар қауіпті қалдықтарды мектеп ғимаратында заңсыз сақтаған. Осылайша 8049 оқушы мен 1307 қызметкердің денсаулығына қауіп төндірген. Бұл туралы Қызылорда облыстық прокуратурасының баспасөз хатшысы Ғабит Ұзақбай мәлімдеді.
Байқоңыр қаласы прокуратурасы өз қадағалау аумағындағы білім ұйымдарының қауіпті қалдықтарды жою заңдылығының жай-күйіне талдау жүргізген болатын. Талдау барысында бірқатар білім мекемелерінде құрамында сынабы бар 2530 дана люминесцентті шамның біршама уақыттан бері жойылмай, заңсыз сақталғаны анықталды. Олардың пайдалану мерзімі өткен, барлығы жойылуға тиіс.
<blockquote>
 «Сынап пен оның қоспаларында адам ағзасында жиналуға және ағзасына зиян келтіруге қабілетті аса қауіпті уыты жоғары заттар бар. Созылмалы уланудың өрбуінде сынаптың кез келген нысандарынан құралған әртүрлі бұйымдардан, оның ішінде құрамында сынабы бар шамдардан бөлініп шығатын сынап буы аса қауіпті. ҚР Экологиялық кодексінің 293-бабы 2-1 бөлігіне сәйкес, құрамында сынабы бар қалдықтар бөлек жиналып, мамандандырылған кәсіпорындарға кәдеге жаратуға, қайта өңдеуге тапсырылуға тиіс», – деп мәлім етті Қызылорда облыстық прокуратурасының баспасөз хатшысы Ғабит Ұзақбай.
</blockquote>
Білім беру ұйымдары аталған заң талаптарын басшылыққа алмай, қауіпті қалдықтарды мектеп ғимаратында заңсыз сақтаған. Соның салдарынан 8 049 оқушы мен 1307 қызметкердің конституциямен кепілдік берілген құқықтары бұзылған.
Прокурорлық ықпал ету актісі енгізіліп, нәтижесінде білім бөлімі мен арнайы мекеме арасында келісімшарт жасалды.
Бүгінде қауіпті қалдықтар жойылған.

Байқоңыр мектептерінде заңсыз сақталған қауіпті қалдықтар 8049 оқушыға зауал төндірген

<a href="https://kyzylorda-news.kz/">Kyzylorda-news.kz.</a> Қызылорда облыстық білім басқармасының ұйымдастыруымен «Білім беру орындарында стратегиялық жоспар құрудың ерекшелігі мен әдістемесі» тақырыбында семинар-тренинг өтті.
Тренингке білім бөлімдерінің басшылары, әдістемелік кабинет меңгерушілері, әдіскерлер, мектеп директорлары мен балабақша меңгерушілері шақырылды. Барлығы 80-ге жуық педагогикалық құрам қатысты.
Басқосуда білім басқармасының басшысы Майра Мелдебекова білім саласындағы әрбір мектепті басқарудың стратегиялық жоспарларын қалай жасау керек, креативті идеяларды іске асыруда неге мән беру керектігін айтып, тәжірибесімен бөлісті.
Сондай-ақ, мектеп директорлары мен балабақша меңгерушілері білім беру ұйымын басқарудағы негізгі әдістемелерге байланысты сауалдарын қойып, өзара пікір алмасты. Ұсыныстары мен идеялары тыңдалды.
Айта кету керек, директорлар мен балабақша меңгерушілеріне арнап стратегиялық басқаруды үйрету тәжірибесі аймақта алғаш рет ұйымдастырылып отыр.
<img src="https://kyzylorda-news.kz/wp-content/uploads/2019/11/15baspedagog2.jpg" alt="" />

Қызылорда облысының бас педагогы директорларға сабақ өтті

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінің ғылыми-техникалық кітапханасында ұйымдастыруымен үш оқу ғимаратында “Қазақ тіліндегі 100 жаңа оқулық” “Smart reading” шарасы өтті.
Шараның мақсаты пайдаланушыларға дүние жүзіндегі таңдаулы озық үлгілердің негізінде білім алып, ғылымды жетілдіруге мүмкіндік беретін оқулықтарды насихаттау.
ҚР «Ұлттық аударма бюросы» қоғамдық қорының үйлестіруімен қазақ тіліне аударылған оқулықтар философия, әлеуметтану, дінтану, лингвистика, мәдениеттану, дүниежүзі тарихы, әдебиет теориясы, халықаралық құқық және бизнес, қазіргі заманғы педагогика, өнер тарихы, интернет психологиясы, стратегиялық менеджмент, маркетинг негіздері, ұйымдық мінез-құлық, медиа және бизнес-коммуникация, адам ресурстарын басқару, дипломатия, ориентализм және семиосфера сынды бағыттарды қамтиды.
Осы оқу жылының басында кітапхана қорына «100 жаңа оқулық» жобасы кітаптарының 31 атауы қосылып, қазіргі уақытта барлығы 49 туынды бірнеше мыңдаған данамен оқырмандар қажетіне пайдаланылуда. Университеттің оқытушы-профессорлары А.Абасилов, Ә.Тәжекеев, Е.Әбенов, Г.Оралова, А.Оразова, А.Әбдразакова, Д.Омаров, М.Өмірзақова, Э.Тойлыбекова, Л.Қаржаубаева, К.Өтегенова, А.Шілманова, Ж. Смагулова, А.Жанбатыр, М.Мақсат, Ж.Асанова, Г.Досполова, Ә.Шерниязова, П.Нағашыбаева өздерінің ғылыми зерттеу салаларының бағыттарына сәйкес оқулықтарға шолу жасап, өз пікірлерін білдірді.
«Жаңа гуманитарлық білім. Қазақ тіліндегі 100 жаңа оқулық» жобасы – үлкен мақсатқа жол салған тың соқпақ, тарихи жаңалық. Оқулықтар сапалы білімнің қолжетімділігі, білім алушы жастардың жаһандық ғылымның жетістіктерімен танысу мүмкіндігіне ие болуына, ғылыми ой-таным аясының кеңеюіне, жастардың заманауи білімнің толқынына ілесуіне жол ашып, білікті, бәсекеге қабілетті кадрлар толқынын қалыптастырудағы маңызды факторға айналатынына сенімділіктерін білдірді. Оқулықтардың тиімділігі – студенттерге кез келген ғылым мәселелері жөнінде жүйелі білім алуға, оқытушылар мен студенттерге маңызды зерттеулерден хабардар болуға көмектеседі. Кітаптар тілі қарапайым, әрі қызықты, оқуға жеңіл. Тарихи жаңалыққа айналған 100 жаңа оқулықтың болашақ жастарымызды тәрбиелеуде пайдасы зор. Кез келген оқырман кітапханаға келіп, өзін қызықтырған оқулықтарды алуына және Қазақстанның ашық университеті openu.kz сайтынан «Ұлттық аударма бюросында» шыққан барлық кітаптың электронды нұсқасын ашып оқуларына болады.
<img src="https://kyzylorda-news.kz/wp-content/uploads/2019/11/14univerkitap2.jpg" alt="" />

Қорқыт университетінің кітапханасы жаңа оқулықтармен толықты

<a href="https://kyzylorda-news.kz/">Kyzylorda-news.kz.</a> <a href="https://kyzylorda-news.kz/"></a>«Nur Otan» партиясының құқықтық кеңес мүшелері педагог мәртебесін заңнамалық тұрғыдан қамтамасыз ету мәселелерін талқылады. Кеңейтілген отырысқа жетекші партияның басшылары, ұстаздар қауымы мен уәкілетті мемлекеттік органдар өкілдері қатысты, деп хабарлайды <a href="https://www.inform.kz/kz/mugalimderdi-koldau-ushin-5-trln-tengeden-astam-karzhy-bolinbek_a3585278">ҚазАқпарат</a>.
«Nur Otan» партиясы төрағасының бірінші орынбасары Бауыржан Байбек тәуелсіздік жылдары Тұңғыш Президент Нұрсұлтан Назарбаевтың басшылығымен елімізде 2000-ға жуық жаңа мектеп және 900 балабақша ашылғанын атап өтті.
Апатты жағдайдағы мектептер саны соңғы 5 жылда 4 есеге азайды. Мұғалімдердің жалақысы 1997 жылдан бері 17 есеге өскен. Елбасының тапсырмасымен әрбір қазақстандық отбасыға қатысы бар «Педагог мәртебесі жайлы» заң жобасы әзірленді.
<blockquote>
 «Қазір білім саласында жарты миллионнан астам қазақстандық жұмыс істейді. Олардың 81% әйелдер. Тамыз конференциясында ел Президенті Қасым-Жомарт Тоқаев ұлтымыздың бәсекеге қабілеттілігін арттыру үшін мұғалім мәртебесі биік деңгейге көтерілу керек деп атап өтті. Жыл сайын дипломды мамандардың саны артқанымен, педагогтарға деген сұраныс азаймай отыр. Педагог мамандардың 35% басқа салаға кетіп қалады. Білікті мұғалімдерді мектептерге, әсіресе, ауылдық жерлерге тарту механизмі мардымды жұмыс істемей тұр. Бұл шешуге тиісті мәселелердің бір бөлігі ғана», – деді Бауыржан Байбек.
</blockquote>
Оның айтуынша, заң жобасын әзірлеу үшін ғалымдар, мұғалімдер, заңгерлер, депутаттар және білім саласы кәсіподақтарының өкілдерінен құралған жұмыс тобы жасақталған. Жыл бойы елімізде көптеген кездесулер өткізілді, 8600-ден аса ұсыныс түсті.
<blockquote>
 «Партия мүшелерінің 30% – педагогтар, сондықтан «Nur Otan» заң жобасының әзірлену барысын ерекше бақылауда ұстап отыр. Педагог құқығын кеңейту және оның әлеуметтік мәртебесін жақсарту мәселесі бар. Әңгіме, бәрінен бұрын, мұғалімдерді материалдық тұрғыдан және басқа да ынталандыру жағдайларын туғызу, қажетсіз тексерулерден арылтып, шығармашыл және нәтижелі жұмыс істеуге жағдай жасау туралы болып отыр. Қазіргі уақытта әзірленіп жатқан заң жобасы бойынша таяу 5 жылда жалақыны өсіру, ұстаздық шеберлік пен сынып жетекшілігі үшін үстемақы қосу, еңбек демалысы мен басқа да ынталандыруларды қамтитын 5,2 триллион теңге бөлінеді деп мөлшерленуде. Бұның барлығы Елбасы мен Президент саясатының сабақтастығының нәтижесі», – деп атап өтті Бауыржан Байбек.
</blockquote>
Партия төрағасының бірінші орынбасары Мәжілістегі «Nur Otan»» партиясы фракциясы депутаттарының және жұмыс тобының заң жобасын талқылау қорытындысы бойынша қосымша ұсыныстар енгізілгенін жеткізді. Сондай-ақ, оқу жүктемесін 16 сағатқа төмендету, жер телімдерін бөлу және «Қазақстанның еңбек сіңірген ұстазы» дәрежесіне ие болғандарға бір жолғы 2000 АЕК көлеміндегі төлем төлеу және Президенттік олимпиадалар, республикалық және халықаралық жарыстардың жүлдегерлерін дайындағандары үшін 3 айлық жалақы беру жайлы ұсыныс айтылды.
Өз кезегінде білім министрі Асхат Аймағамбетов жаңа заң жобасында педагог құқығын қорғау турасындағы 10 жаңа ұстаным қарастырылғанын хабарлады. Мұғалімдердің сапалық құрамын арттыру үшін магистр дәрежесі барларға 10 АЕК көлемінде үстеме, балабақшаларда ең алдымен орын бөлу және басқа да әлеуметтік көмектер қарастырылмақ.
Ашық пікірталасқа қатысушылардың барлығы жаңа заң жобасы бойынша өздерін қызықтыратын сауалдарды қоя алатынын айта кетуіміз керек. Отырыс барысында Шымкенттегі №1 мектеп-гимназиясының биология пәнінің оқытушысы Алина Соловьёва өз ойын жеткізді.
<blockquote>
 «Мен қарапайым мектеп оқытушысымын. Мен ата-аналардың бізден нені күтетінін білемін. Кез келген ата-ана оның баласына түсіністікпен қарап, жақсы көргенімізді қалайды. Қоғам мұғалімдердің есеп берумен айналыспай, балаларға дұрыс мән бергенін жақсы көреді. Мұғалімдерді олимпиадада орын алған оқушылары үшін марапаттау жайына келсек, «Дарын«, НЗМ сияқты дарынды балалар оқитын мектептердің бар екенін ескере кеткен жөн. Ал менің жай мектептің өзінде 143 жеңімпазым бар. Мақтанайын деп тұрған жоқпын, бірақ осыларды дәрежелерге бөлу керек сияқты. Кімнің оқушысы жүйелі түрде жеңімпаз болып жүрсе, соларды марапаттау керек», – деді ол.
</blockquote>
Бауыржан Байбек мұғалімнің ұсынысын қолдады. Оның айтуы бойынша, осы тектес мектептердің арасында саралауды енгізу қажет.
<blockquote>
 «Ауылды жерлерде немесе жағдайы төмен аудандардан осындай жеңімпаз балалар аз шықпайды. Бұл ерекше бағалауға тұрарлық. Бұл ұстаздардың зор еңбегі. Жақында ғана астана әкімімен бірге екі жыл бұрын ғана жекеменшік басқаруға берілген №54 мектеп-лицейге бардық. Олар директордың кабинетін мұғалімдер отыратын бөлме етіп жасапты. Директор болса өз кабинетін бірінші қабаттағы кіреберіске жақын етіп шыныдан жасатыпты. Біз Алтай Көлгінов екеуіміз барлық мемлекеттік мектеп директорларын осындай бастамаға шақыратын болып келістік. Егер кім де кім осы идеяны қолдайтын болса, демек өзгеруге дайын деген сөз. Кей мектеп директорларының ештеңе өзгерткісі келмей қашқақтайтындары да құпия емес. Әсіресе, астанада, артында тірегі бар директорлар. Егер әр директор әріптестерімен жұмыс істей білсе, мұғалімдерін қорғаса, көмектессе, солар ұтады. Мұғалім мәртебесі – бұл біздің еліміздің болашағының мәселесі, біздің бәсекеге қабілеттілігіміз», – деп атап өтті Бауыржан Байбек.
</blockquote>
<img src="https://kyzylorda-news.kz/wp-content/uploads/2019/11/14trln2.jpg" alt="" />

Мұғалімдерді қолдау үшін 5 трлн теңгеден астам қаржы бөлінбек

<a href="https://kyzylorda-news.kz/">Kyzylorda-news.kz.</a> Елордада «ҚАЗТЕСТ жүйесінің жаңа форматы: даму перспективалары» тақырыбында тест&nbsp;&nbsp;тапсырмаларын әзірлеушілер мен сарапшыларға арналған біліктілікті арттыру курсы өтті.
Курстың мақсаты – ҚАЗТЕСТ жүйесінің бүгінгі жай-күйі, жетістіктері мен алдағы бағыттары, тілдік білімді бағалаудағы озық тәжірибелермен танысу, қолдану, сонымен бірге, халықаралық тілдік білімді бағалау жүйелерінің мазмұнымен танысу арқылы қазақ тілін оқыту бойынша әдіскерлерге, оқытушыларға, ҚАЗТЕСТ сарапшыларына әдістемелік көмек көрсету.
Шара барысында тілдік білімді бағалаудағы тест тапсырмаларының ерекшеліктері талқыланып, ҚАЗТЕСТ жүйесінің жаңа форматы ұсынылды. Тест тапсырмаларын әзірлеушілерге ҚАЗТЕСТ-тің жаңа форматы негізінде әзірленген практикалық тапсырмалар таныстырылып, сарапшылар тарапынан бағасын алды. Тағы бір атап өтерлігі, курс тыңдаушылары «Қырғызтест» өкілдері тарапынан әзірленген тілдік білімді бағалауға арналған тест тапсырмаларымен танысып, өзара пікір алмасты.&nbsp;&nbsp;
Іс-шараға Білім және ғылым вице-министрі Ш.Каринова, ҚР Президенті Әкімшілігі Ішкі саясат бөлімінің, Мәдениет және спорт министрлігінің, Ұлттық қауіпсіздік комитетінің өкілдері мен Мемлекеттік тілді дамыту қорының басшысы А.Шәуеев және Қырғыз Республикасы Үкіметінің жанындағы «Қырғызтест» мемлекеттік мекемесінің директоры, Батма Топоева-Ставинская қатысты. Сондай-ақ, еліміздің жетекші жоғары оқу орындарының тілші-ғалымдары, өңірлердегі тілді оқыту орталықтарының басшылары, әдіскерлері, ҚАЗТЕСТ сарапшылары мен әзірлеушілері келді.
Айта кетейік, 2006 жылдан бері елімізде Білім және ғылым министрлігі Ұлттық тестілеу орталығының базасында тілдік білімді бағалаудың халықаралық жүйелері талаптарына сәйкес қазақ тілін меңгеру деңгейін бағалау жүйесі – ҚАЗТЕСТ тестілеуі өткізіліп келеді.

«ҚАЗТЕСТ» жүйесі жаңа форматқа көшеді

Kyzylorda-news.kz. Қызылорда облысындағы бірегей жоғары оқу орындарының бірі «Болашақ» университеті келешекте қалай өзгереді? Соңғы кездерде осы университтің кампусы деген сөз жиі айтылып жүр. Ол не қылған кампус? Жалпы, университеттің болашағы қандай? Бұл сұрақтарға жауаптар журналист Дүйсенбек Аяшұлының мемлекет және қоғам қайраткері, Қазақстан ҰҒА академигі,&nbsp;экономика ғылымының докторы, «Болашақ» университетінің ғылыми&nbsp;жетекшісі Бақберген Досманбетовпен болған сұхбатында айтылған.
– Соңғы кездерде «Болашақ» университетінің кампусы деген сөз жиі айтылып жүр. «Кампус» сөзі көпшілікке таныс емес-ті, сізге осы кампусты салу ойы қалай келді? Әрине, бұл жаңа оқу ғимаратының ірге көтеріп, есік ашуы қыруар қаржыны, алапат қажырды қажет еткенін біз де шамалаймыз. &nbsp;Бесеу бірігіп, алтау жиылып атқара алмайтын осынша ауыр міндетті қалай іске асырдыңыз?
– Мен көп жыл Қорқыт ата атындағы университетте қызмет еттім, оның ректоры болдым. Кейін менің тікелей жетекшілігіммен бүгінде жұмыс жасағанына ширек ғасырға жуықтаған «Болашақ» университеті ашылды. Бүкіл өмірім білім-ғылым саласымен бітеқайнасып келеді. Осыған орай әлемнің көп елдерінде болып, олардағы білім беру ісімен жақынырақ таныстым. Шет елдегі білім беру де, білім алушыға жасалған жағдай да біздегі қалыптасқан жүйеден әлде­қайда дамып кеткен. Мәселен, ол елдерде жатақхана түнгі сағат 11-ден кейін тарс жабылмайды. Қайда жүрсің деп ешкім дікеңдемейді, сабаққа неге келмедің деп ұрыспайды.
Білім сатулы, дұрыс па, бұрыс па? Бірақ, бұл – нарық заңы. Қазір мемлекеттік оқу орындарындағы студенттердің әрі кетсе 20 проценті ғана тегін білім алады, қалғаны ақылы негізде оқиды. Сонда мұғалім – сатушы, шәкірт – сатып алушы. Ал, сатып алушыға қисынсыз талап қоюға болмайды. Мысалға дүкенді алыңыз. Ақшасы бар кісі өзіне ұнаған затты сатып алуы керек. Ал оған дүкеншінің: «Сен неге дұрыс киім киіп келмейсің, сен неге амандаспайсың?..» деген сияқты дүрсе қоя беруі қалай болады? Әрине, алушы шығып кетіп, керегін басқа дүкеннен алады. Оқу орны да осыған ұқсас. Мұғалімнің: «Кеше неге сабаққа келмедің, неге кешігіп келдің, тапсырманы неге орындамадың?» – деп тәртіпке шақыруы ескі әдістеме.Шәкірт сабаққа еркін қатысуы керек. Ол сатып алушы, егер сіздің біліміңіз ұнамаса, онда ол білімді кітапханадан іздейді. Сіздің тапсырмаңызды орындамаса, онда ол сабаққа қатысты түсінікті басқа амалдар арқылы алуға құқылы. Өкінішке орай, шәкірттердің көбі сол ескі әдістемеге тәуелді. Оқу кестесімен, тапсырмамен, яғни, тар шеңбермен шектеледі. Содан барып сынақ кезінде сүріндірмей өткізе гөр деп оқытушыға тәуелді болады. Бұл дүкеннен ақшасына зат сатып алып, сол затты сөреден тауып бергені үшін үстіне тағы да ақша қосып берген тұтынушыға ұқсайды. Сонда шәкірт ескі әдістемеге неге тәуелді болып жүр? Өйткені онда өзіндік ізденіс жоқ. Ізденіс болу үшін еркіндік керек. Оған дағдыланбаған. Өзіндік ізденіс қай кезде де бағалы.
Мен қазақ балаларының да сол елдер­дегідей еркін, ерекше жағдайда білім алуын қаладым. 2017 жылдың ақпанында Сырдарияға салынған жаңа көпірдің үстіне шығып тұрып, «мына жерден кампус саламын» деген ой келді. Үлкен қалаларда әдемі, көрнекті ғимараттар өзеннің екі бетінде тұрады. Туған қаламызда да сондай сәні асқан биік ғимараттар бой көтеруі тиіс.
Жаңа кампустың дарияның батыс бетіне түсетінін көзіме елестеттім. Ол кемі 14-15 қабатты болады, дарияның жиегіне баспалдақтар орнатылып, кешкілік студенттер «тамаша жексенбі күн көл басында, тұнықтан балық аулап бала отырса» дегендей, су жағалап қызыққа батады. Жатақханалары өз үйіндей, қай кезде барса да есігі ашық. Киноға кірем десе, театры тұр, әткеншек тепсе, жұп-жұп боп анау баққа барады. Бұл менің қиялым ғана емес еді. Кампус дегеніміз – осындай жағдайдың бәрін қамтитын қалашық. Сол оқу қалашығын салу Сырдарияның сол жағалауына жаңа қаланың іргетасын қалаумен байланысты іске асты.
Әр жылы университет қорына ақша қалдырып отыратын дағдымыз бар-ды. Осы ақшаға қол салдық, бірақ ол қап түбіндегі тарыдай-ақ болып қалды. Сосын «Даму» бағдарламасы арқылы «АТФ» банктен 7% жеңілдікпен несие рәсімдедік. Бұл ақшаның жартысы «Даму» арқылы төленеді, жартысын өзіміз жабамыз. Үкіметтің осы бағдарламасы біздің басты тірегіміз болды.
Сонымен құрылысты қолға алдық. Негізі менің мамандығым – «құрылыс және қала шаруашылығы экономикасы мен оны басқару». Сондықтан өз тарапымнан не құрылыс бастасам да, күндіз-түні соның басында өзім жүремін. Университет ғимаратының құрылысын да тікелей өзім бақы­ладым, күнде таңертең келем, кеш батырып қайтам. Әуелде жобалаушылар оқу ғимаратының бейнесін 120 градус қалыппен салу қажет деп тапқан. Бұл &nbsp;парағы қаусырылып ашылып жатқан кітаптың сипатын береді, яғни, ғимараттың екі қанаты қабысып тұрады. Мен оны 150 градусқа кеңейтіп салуды тапсырдым. Әрине, оған бұрындағыдан көп қаражат кетеді, бірақ әсемдене түседі. Қазір қала жұртшылығы жаңа университеттің осы қас бетін күнде көріп жүр. Алдағы уақытта бас ғимараттың екі жағына екі колледж орналасады.
Ең бастысы, жаңа оқу орны алыстан көргенде де, ішіне енгенде де ерекше бет-әлпетімен қызықтыратын болады. Мысалы, студенттер дәрісханаларда бұрынғыдай бір-біріне арқасын беріп отырмайды, бетпе-бет отырады. Демек, олар ашық пікір алысуға, бір-бірін бақылауға дағдыланады.
Қаржы, қажыр дедің ғой. Жаңа да айттым, «Даму» арқылы ісіміз алға басты. Өзім салып жатқан соң барлық затты алуға өзім араластым. Мәселен, бағасы 150 мың доллар тұратын лифтіні 48 мың долларға таптым. Оқу ғимаратында осындай 3 лифт бар. Қызылордада бұрын болмаған аспалы шамдарды Испаниядан алдырттық. Басқа құрылыс заттарын да 3 есе арзан бағаға іздеп, тауып жеткізіп беріп отырдым. Құрылыспен айналысатын кейбір азаматтар келіп: «Аға, мына жердің жұмысын бізге беріңіз, біз сізге қаражаттың 10 процентін берейік» – дейді. «Не айтып тұрсың, өз ақшамды өзіме бермексің бе?» – деймін мен. Өкінішке орай, бұл қоғамда бар дерт. Егер осы оқу ғимараты мемлекет ақшасына салынса, сол құқықты иеленген пысықайлар 7-8 миллиард теңге ақша жұмсалды деген болар еді. Ал, біз бұл жұмыстарды 2,5 млрд қаражатпен бітіріп отырмыз, әлі бітпеген жұмыс қанша…
– Шынында кампус дәрежесіне жету үшін әлі қанша жұмыс жасалуы керек?
– Жақында 400 орындық жатақ­хана құрылысы басталды. Ақысын сұра­ғанындай алып отырған соң құры­лысшылар да тез әрі сапалы жұмыс істейді. Екі айда сыртқы жұмысын бітіреміз деп отыр. Мұнан соң тағы бір 400 орындық жатақхана салынады. Келесі жылы оқытушыларға арналған 60 пәтерлі тұрғын үй мен 60 орынды балабақша бой көтереді. 1100 орындық конгресс орталығы салынады, бұл – бұрынғыша айтсақ, студенттер сарайы. Мұнан кейін стадион салуды бастаймыз.
&nbsp;Оқу қалашығының аймағында – шаштараз, сән салоны, ұялы телефон операторлары, ХҚК филиалы сияқты барлық қажеттіліктер орналасады. 2,5 гектар аумақтық дендропарк ашылады. Қалашықта фонтандар, гүлзарлар, демалыс-сауда орындары сап түзейді. Орталықтан бері шыққан студенттер, басқа да келушілер көпірден түскен соң бас ғимаратқа дейін екі жағы көмкерілген бақ ішімен жүретін болады, осы аяқжол қазір салынып бітіп тұр.
Міне, кампус дегеніміз – осы.
– &nbsp;Жалпы, университеттің әлеуеті, заманауи артық­шылық­тары туралы тағы бір еске түсіріп өтіңізші. Қандай жаңалықтарды ерекше айтар едіңіз?
– Білім мен ғылым саласы дамуының басты бағыты – оның сапасы мен қолжетімділігі. Осы тұрғыда ширек ғасырға жуық тарихы бар Қызылорда «Болашақ» университеті жоғары білім алудың қолжетімділігі мен сапасын арт­тырып, студент жастардың жатақ­ханадағы жағдайын жақсарту, бәсе­кеге қабілетті ортаны қалып­тастыру бағытында жүйелі жұмыс­тар атқарып келеді.
Биылғы 2019-2020 оқу жылында университет студенттері Оксфорд бизнес колледжінің бағдарламасы бойынша арнайы портал арқылы білім алу мүмкіндіктеріне ие болып отыр, курс соныңда олар Оксфорд бизнес колледжінің арнайы халықаралық сертификатын алатын болады. Сонымен қатар, 600 тыңдаушы сол портал арқылы білім алып жатса, солардың ішінен ең жақсы жетістікке жеткен 20 тыңдаушы Оксфорд колледжіне (шақырушы жақ есебінен) барып, оффлайн режимде білім алуға қол жеткізеді.
Университет жанындағы «Бола­шақ» колледжі мен «Болашақ» меди­ци­налық колледждері «жоға­ры колледж» статустарын алды.
Педагогикалық бағыт бойынша мамандар даярлау сапасын арттыру, Назарбаев университеті мен зияткерлік мектептері тәжіри­белерін трансформациялау мақса­тында НЗМ-мен, ҚР жас педагог-ғалымдар ассоциациясымен тығыз жұмыс жасап және қыздар ұлттық педагогикалық университетімен бір­лескен кафедра филиалдары (қа­зақ тілі мен әдебиеті кафедрасымен) ашылуда.
– Жаңа университет биыл қанша студент қабылдап отыр? Білім берудің ақылы негізде жүретіні түсінікті. Қандай жеңілдіктер бар?
– Биылғы оқу жылында университетке ақылы негізден бөлек 50 мемлекеттік грант және 19 облыс әкімі грантының иегерлері, ақылы негізде 458 білім алушы қабылданып отыр. Сонымен қатар, «Болашақ» жоғары колледжіне 175 білім алушы грант негізінде қабылданса, 120 оқушы ақылы негізде оқуға түсті. Ал, жоғары медициналық колледжіне 75 білім алушы тегін білім алуға мүмкіндік алса, 310 оқушы ақылы негізде қабылданды. Университет &nbsp;ата-анасы жоқ күндізгі оқу бөлімінің студенттеріне; «Болашақ» универ­ситетінің колледж­дерін бітіріп, оқуын университетте жалғасты­рушыларға 20% жеңілдік бекіткен; Оқу ақысының 50%-і көлеміндегі жеңілдікпен 10 грант тағайындады.
Сонымен бірге университет &nbsp;студенттеріне арнап құрыл­тай­шылық грант, ректор гранты бөлінбек. Мұның бәрі − сапалы білім алуға ұмтыл-ған талантты жастарды сапалы кадр болуға үндейтін қадамдар.
– «Болашақтың» қала орталы­ғындағы оқу орны жаңа ғимаратқа түгел көшіріле ме, әлде студенттер ол жақта да оқи бере ме?
– Биылғы жаңа оқу жылын жаңа ғимаратта бастай алмадық. Бірақ, сту­денттер 1-ші қыркүйекті сол жаға­лаудағы «Болашақта» қарсы алайық деген соң білім күніндегі салтанатты жиынды осы жерде өткіздік. Ал, биылғы бітірушілер болса, «бізге жаңа ғимаратта оқу бұйырмады, дипломды сол жерден табыстаңызшы» деп өтініш айтқан еді.
«Кедей болсаң көшіп көр» де­мекші, ескі ғимараттан керек-жара­ғымызды жеткізудің өзі біраз уақы­тымызды алды. Әрине, ол жақта енді ешкім қалмайды, осы қазан айында толық көшіп келмекпіз. Сосын ескі ғимаратты сатып, ол ақшаға жоспарда тұрған құрылыстарды сала бастаймыз.
– Көш оң болғай! Сізді, «Бола­шақтың» барша ­ мен студенттерін сол жағалаудағы сәні мен салтанаты жарасқан кампустың бой көтеруімен құттықтаймыз!
Ол Қызылорданың көркін ға­на арттырып қоймай, жаңа ұр­пақтың білім ұстаханасына айналатын ақ орда болсын!
<a href="https://syrboyi.kz/suhbat/32777-bar-balany-bolashayn-bolmysyna-kshrgen.html">syrboyi.kz</a>

Қызылордадағы «Болашақ» университетінің болашағы қандай?

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a> Назарбаев Зияткерлік мектептерінің жас робототехниктер командасы Венгрияның Дьорынан табысты оралды. Белгілі жаттықтырушы Николай Авдюниннің жетекшілігіндегі олар WRO чемпионатының (World Robot Olympiad – Робототехникадан Бүкіләлемдік олимпиада) үздік үштігіне еніп, елге қола медаль алып келді.
NIS құрама командасы «Ақылды білім» секциясында математика мен бейнелеу өнері пәнінен сабақ беретін, әліпбиді үйренуге көмектесетін, көру және есту қабілеті нашар балалармен жұмыс істейтін бастауыш сынып мұғалімі «Ziggurat» роботын таныстырды.
<blockquote>
 «Жобаның идеясы Талдықорған Зияткерлік мектебінен Даниил Филимоновке тиесілі, онымен бірге Алматыдағы физика-математикалық бағыттағы Зияткерлік мектеп оқушысы Любовь Дудченко және Талдықорғандағы NEXTROBOT орталығынан Элина Пак жұмыс істеді. Ал оларға робототехникадан Алматы облысы құрама командасының жаттықтырушысы Николай Авдюнин жетекшілік етті. Финалда біздің балалар әлемнің 73 елінен 400-ден астам командамен кездесті», – дейді бүгінгі күннің қаһармандарын атаған «Назарбаев Зияткерлік мектептері» ДББҰ ақпараттық технологиялар орталығы директорының орынбасары Азамат Биданов.
</blockquote>
Николай Авдюнин – еліміздегі робототехника саласындағы ең танымал жаттықтырушылардың бірі, Талдықорғандағы НЗМ-де ашылған сәттен бастап жұмыс істейді. Венгриядағы жетістік – бұл Николайдың оқушыларының WRO –дағы үшінші жеңісі. Бұған дейін Сочиден қола және Нью-Делиден алтын медаль алып келген болатын.
<blockquote>
 «Қазір әлем Төртінші өнеркәсіптік революция дәуіріне, терең және жылдам өзгерістер кезеңіне қадам басты: технологиялық, экономикалық және әлеуметтік. Жыл сайын біз оқушыларымыздың әлеуетін дамыту үшін жобалар жасаймыз, осылайша ақпараттық өндірісті жетілдіруге тырысамыз, ақпараттық өндіріс негізінде ел экономикасы жаңа деңгейге көтеріле алады», – деп атап өтті Николай Авдюнин.
</blockquote>
Венгрияның Дьор қаласында өткен WRO – 2019 «Ақылды қалалар» тақырыбына арналды. «Назарбаев Зияткерлік мектептері» дербес білім беру ұйымы – 2014 жылдан бастап Бүкіләлемдік робототехника олимпиадасының ұлттық үйлестірушісі.
NIS-тің тағы үш – Көкшетау, Орал, елордадағы физика-математикалық бағыттағы Зияткерлік мектептер командасы Бүкіләлемдік олимпиаданың үздік ондығына кірді.
<img src="http://kyzylorda-news.kz/wp-content/uploads/2019/11/13nis2.jpg" alt="" />
<img src="http://kyzylorda-news.kz/wp-content/uploads/2019/11/13nis3.jpg" alt="" />

Қызылордадағы зияткерлік мектебінің оқушылары Венгрияда жеңіске жетті

<a href="https://kyzylorda-news.kz/">Kyzylorda-news.kz.</a> Мемлекет басшысы білім және ғылым министрі Асхат Аймағамбетовті қабылдап, ведомствоның қазіргі жұмыстары мен алдағы жоспарлары туралы ақпаратпен танысты, деп хабарлайды Ақорданың баспасөз қызметі.
Қасым-Жомарт Тоқаев білім бағдарламалары мен оқыту деңгейі заман талабына сай келмейтін жоғары оқу орындарының лицензияларын өздігінен қайтарып алу мәселесінде министрлікті қолдады және аталған мәселе бойынша заңнамалық деңгейде тиісті нормативтік-құқықтық база әзірлеуді тапсырды.
Сонымен қатар Президент министрлікке 12 жылдық оқу мерзіміне қажетті инфрақұрылымды, бағдарламалар мен жалпы білім жүйесін дайындауға басымдық бере отырып, жүйелі түрде, асықпай көшу керектігі жөнінде тапсырма берді.
Республикалық бюджеттің орындалуын бақылау жөніндегі есеп комитетінің төрағасы Наталья Годунова Қасым-Жомарт Тоқаевқа Қазақстан халқына арналған Жолдауындағы берілген тапсырмалардың орындалу барысын баяндады.
Президент квазимемлекеттік сектор жұмысының тиімділігі жайындағы талдау нәтижелерімен танысты. Наталья Годунова бірқатар өңірдегі, атап айтқанда, Шығыс Қазақстан, Қостанай облыстары мен Алматы қаласына, сондай-ақ, жекелеген мемлекеттік органдарға жүргізілген аудит барысы жөнінде мәлімет берді. Кездесу қорытындысы бойынша Мемлекет басшысы бірқатар нақты тапсырма берді.

Қасым-Жомарт Тоқаев 12 жылдық білім беру жүйесіне асықпай көшу керектігін айтты

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Жастар орталығы» ғимаратында алғашқы буккроссинг-аймағы ашылды.
Салтанатты шараға Қызылорда облысының жастар саясаты мәселелері басқармасының басшысы Қуаныш Жанұзақов,&nbsp; Қазақстан телерадио академиясының «Алтын жұлдыз» белгісінің иегері, Қазақстан Жазушылар одағы Қызылорда облыстық филиалының директоры Қаршыға Есімсейітова және Жастар ресурстық орталығының директоры Бауыржан Мастеков қатысты.
Буккроссинг – кітаптармен алмасу үрдісі. Оны жүзеге асыру үшін бұрын оқыған кітапты ашық буккроссинг-аймағына апарып, оның орнына басқа, оқымаған&nbsp; кітаптарды алуға болады.
Буккроссинг-аймағына тиесілі тағы 2 шкаф «КазПочта» АҚ Қызылорда облыстық филиалы және «Ақмешіт» институтына қойылды.
Шара барысында бірнеше кітаптың авторы, Халықаралық Жазушылар одағының мүшесі, ақын қаламгер, тележурналист ҚаршығаЕсімсейітова жастармен кездесу өткізді.
Айта кетейік, бүгінде руспубликаның барлық аймағында «Social Development Center»&nbsp; Қоғамдық қорының қолдауымен буккроссинг-аймақтары ашылып келеді. Бұл аймақ ҚР Ақпарат және қоғамдық даму министрлігінің қолдауымен «Азаматтық бастамаларды қолдау» коммерциялық емес АҚ-ның гранттық қаржыландыруы аясында жүзеге асуда.
<img src="http://kyzylorda-news.kz/wp-content/uploads/2019/11/8book2.jpg" alt="" />
<img src="http://kyzylorda-news.kz/wp-content/uploads/2019/11/8book3.jpg" alt="" />
<img src="http://kyzylorda-news.kz/wp-content/uploads/2019/11/8book4.jpg" alt="" />
<img src="http://kyzylorda-news.kz/wp-content/uploads/2019/11/8book5.jpg" alt="" />
<img src="http://kyzylorda-news.kz/wp-content/uploads/2019/11/8book6.jpg" alt="" />

Қазақстан және Қызылорда облысының жаңалықтары: Білім