**<a href="https://kyzylorda-news.kz/">Kyzylorda-news.kz.</a> Ұлттық бірыңғай тестілеудің алғашқы күнінде 160 талапкер ереже бұзды, деп хабарлайды <a href="https://www.inform.kz/kz/ubt-nyn-algashky-kuni-160-adam-okuga-tusu-mumkindiginen-ayyryldy_a3664359">ҚазАқпарат.</a> 
**
ҚР Білім және ғылым министрлігінің мәліметінше, биыл ҰБТ тапсыруда бақылау күшейтілді. Әр аудитория видеокамералармен жабдықталған. 
<blockquote>
 «Қатысушылар металл іздегіштен өтпес бұрын ережелерді ұстану туралы міндеттемелермен танысып, тыйым салынған заттардың жоқтығы туралы құжатқа қол қояды. Тыйым салынған заттарды қолдануға жасалған кез келген әрекет тест нәтижелерін жарамсыз етеді, қатысушы аудиториядан шығарылады және осы жылы ҰБТ-ны қайта тапсыра алмайды. Алғашқы күні тыйым салынған заттарды алып өтуге тырысқан 73 және тест тапсыру барысында ҰБТ ережелерін бұзған 87 талапкер, яғни 160 адам тест тапсыру мүмкіндігінен айырылды. Олардың басым көпшілігі Түркістан облысы мен Шымкент қаласында тіркелген», – деп хабарлады ҚР БҒМ баспасөз қызметінен. 
</blockquote>
25 тамызға дейін әр аудиториядан алынған бейнежазбаны мамандар зерделейді. Егер бейнематериалдарды талдау кезінде ережелерді бұзу фактілері анықталса, талапкердің тест нәтижелері жойылады. Егер қатысушыға грант тағайындалған болса, ол қайтарылады. 
Айта кетейік, биыл 21 маусым мен 5 шілде аралығында еліміздің барлық өңірінде Ұлттық бірыңғай тестілеу өтеді. 
ҰБТ-ның бірінші күні 6 512 адам тестілеуден өтуді жоспарлаған. Бірақ 144 талапкер ҰБТ өткізу пунктеріне келмеді. 
Тестілеуге кіргізу барысында 2 талапкерде жоғары температура анықталды, олар ҰБТ-ны басқа күні, сауыққан соң тапсыра алады. Сәйкесінше бүгін 6 206 адам ҰБТ нәтижелерін алады. Қатысушыларға электронды сертификат беріледі.

ҰБТ-ның алғашқы күні: 160 адам оқуға түсу мүмкіндігінен айырылды

**<a href="https://kyzylorda-news.kz/">Kyzylorda-news.kz</a>. Биыл ҰБТ-ның алғашқы күні 21 маусым, жексенбі күнге түсіп отыр. 
**
Бірінші күні тек 6,5 мың талапкер емтихан тапсырады. ҰБТ-ның алғашқы күні 161 пунктің 51-і ғана істейді, оның 44-і ауылдық жерлерде орналасқан. Орташа есеппен бір ҰБТ тапсыру пунктіне 120 адамнан келеді. 
21 маусым мен 5 шілде аралығында тестілеу тапсырылатын ағындардың жалпы саны 15-ті құрайды, деп мәлімдеді ҚР БҒМ баспасөз қызметі. 
ҰБТ өткізілетін әрбір пункте медициналық-санитарлық сипаттағы күшейтілген шаралар қабылданады: дезинфекциялық тоннельден өту, арнайы дезинфекцияланған кілемшеде аяқ киімдерді зарарсыздандыру, дене қызуын өлшеу, қолды зарарсыздандыру сұйықтығымен өңдеу, медициналық маскалар беру. 
Тестілеуге кіргізу және отырғызу кезінде тестіленушілер арасындағы арақашықтықтың кемінде 2 метр болуы қамтамасыз етіледі, сондай-ақ әрбір аудитория бактерицидтік құралдармен және ауа рециркуляторларымен кезең-кезеңмен желдетіліп, өңделетін болады. 
Санитарлық талаптар қатаң сақталады, сондықтан аудиторияны тек 50%-ға дейін толтыруға болады. Сәйкесінше, жобалық қуаттылық ҰБТ-ны 6 күннің ішінде өткізуге мүмкіндік бергенімен, түлектерді аз-аздан жинау үшін тестілеу 15 күннің ішінде жүргізіледі. 
Естеріңізге сала кетейік, биыл тестіленушілер үшін бұрын-соңды болмаған жағдай жасалды. Мәселен, алғаш рет калькулятор пайдалануға рұқсат етіліп, талапкерлер үшін тегін байқау сынақтары қолжетімді болды. Сонымен қатар тестілеуді өткізу уақыты 4 сағатқа дейін ұзартылып, түлектер мемлекеттік емтиханнан босатылды.
<a href="https://24.kz/kz/zha-aly-tar/bilim-zh-ne-ylym/item/403733-ltty-biry-aj-testileu-21-mausym-k-ni-bastalady">24.kz</a>

Ұлттық бірыңғай тестілеу 21 маусым күні басталады

<a href="http://kyzylorda-news.kz/">Kyzylorda-news.kz.</a> Шиелі ауданының әкімі Қамарбек Мүбараков Ақмая ауылдық округіндегі №49 орта мектебі ғимаратын аралап, жүргізіліп жатқан күрделі жөндеу жұмыстарын бақылады. Бақылау барысында аудандық білім бөлімінің басшысы міндетін атқарушы Ы.Мәдиев, аудандық құрылыс, сәулет және қала құрылысы бөлімінің басшысы міндетін атқарушы Ж.Данабеков,&nbsp; сондай-ақ мердігер мекеме «Сапақ» өндірістік кооперативінің» басшысы С.Садықов және ауыл тұрғындары бой көрсетті.
Мектептің күрделі жұмыстарының жобасы бойынша шатыр, есік және терезе ауыстыру, ішінара жылу жүйесін және электр жүйесі мен кәріз жүйесін жаңалау, септик, су құбырларын жүргізу, спорт зал еденін ауыстыру, ленолиум ауыстыру, мектептің сыртқы қоршауын жаңадан салу сияқты құрылыс-монтаж жұмыстарын жүргізу жоспарланған.
Тұрғындармен сұхбаттасу барысында, 2020 жылғы 16 маусым күні «Азаттық» радиосының ресми парақшасында «37 жылдан бері жөндеу көрмеген мектеп» тақырыбында жарияланған бейнематериалда «жаңа мектеп салып беру» туралы ұсыныс&nbsp; білдірген кей ауыл тұрғындарына дәл қазіргі уақытта жаңа мектеп салудың тиімсіз екендігі туралы сала мамандары тарапынан түсіндіру жұмыстары жүргізілді.&nbsp;
Сондай-ақ, түсіндіру жұмыстары кезінде мектеп ғимаратынан 800 метр қашықтықтықта Шиелі ауданының бас магистральды каналы өтетіндіктен және Ақмая ауылының маңайында күріш дақылының мол егілуіне байланысты жер асты суларының жиналу горизонты жоғары деңгейде болғандықтан, мектеп ғимаратының жертөлесіне ыза сулардың жиналатындығы туралы мәселе талқыланды.
Нәтижесінде, аудан басшысы жергілікті бюджеттен қосымша қаржы бөлінетіндігі туралы, елді мекен ішінен, яғни мектеп ғимараты маңайынан дренажды су скважиналарын қазу туралы шешім шығарды. Ауыл тұрғындарына жер су (ыза су) горизонтын төмендету бойынша тиісті жұмыстар жүргізілетіндігі хабарланды.
Барлық айтылған ұсыныстар бойынша ортақ шешім айқындалды және ауыл&nbsp; тұрғындары алғыс білдіріп, бейбіт келісіммен тарқасты.
<img src="https://kyzylorda-news.kz/wp-content/uploads/2020/06/sh-1.jpg" alt="" />
<img src="https://kyzylorda-news.kz/wp-content/uploads/2020/06/shsh-2.jpg" alt="" />
<img src="https://kyzylorda-news.kz/wp-content/uploads/2020/06/shshshsh-1.jpg" alt="" />
<img src="https://kyzylorda-news.kz/wp-content/uploads/2020/06/shshshshsh-1.jpg" alt="" />
<img src="https://kyzylorda-news.kz/wp-content/uploads/2020/06/shshshshshsh-1.jpg" alt="" />

Шиелідегі орта мектептің мәселесі шешілді

<a href="http://kyzylorda-news.kz/">Kyzylorda-news.kz.</a> Елімізді талантты жастарды қолдауға арналған «Елбасы&nbsp; медалі» жобасы басталды. Аталмыш жобаға 14-29 жас аралығындағы жастар қатыса алады. Бұл туралы Өңірлік коммуникациялар қызметінің ақпараттық алаңында өткен баспасөз конференциясында облыстық білім басқармасының басшысы Ақзира Қасымова мәлімдеді.
<blockquote>
 «Елбасы медалі» жобасының басты мақсаты – еліміздің барлық аймақтарынан дарынды ұл-қыздарды іздеу, олардың бойында жауапкершілік, қайсарлық, мақсатқа жету сынды қасиеттерге тәрбиелеу. Сондай-ақ, қатысушыға өзін-өзі дамыту үшін 7 бағыт ұсынылған. Олар: спорт және дене шынықтыру, дарын мен дағды, еріктілік, туристік саяхаттар, кітап оқу, ұлттық мұра және еңбек тәжірибесі. Яғни, әр деңгейде қатысушының жасы бойынша талап орнатылған. Сонымен қатар, қатысам деушілер онлайн платформада тіркеледі, қалаған деңгейін таңдап, табыстың жеті жебесіне сай келетін 7 бағыт бойынша тапсырмаларды орындайды», – деді Ақзира Бақтыбайқызы.
</blockquote>
Бағдарлама үш деңгейден тұрады. Олар қола, күміс және алтын. Қола деңгейі 14 жастан, күміс деңгейі 15 жастан, алтын деңгейі 16 жастан. Бағдарламаға қатысуға ниет білдірушілер me.fpp.kz сайтында 20 маусымға дейін өтінім беру керек.

«Елбасы медалі» жобасы  басталды

<a href="http://kyzylorda-news.kz/">Kyzylorda-news.kz.</a> Журналист, тележүргізуші бала тәрбиесіне қатысты 20 кеңес айтты. Данияр Есен баланы мейірімге бөлеп, бетін қақпай тәрбиелеуге үндейді.&nbsp;
1. Әке, ана атану – бақыт. Мұндай бақытқа барлық адам кенеліп жатқан жоқ. Демек, сіз бақыттысыз!
2. Қызыңызға күніне кем дегенде бір рет «Қандай әдемісің!» деген жылы сөз айтып тұрыңыз.
3. Балаңыздың тәрбиесіне мектеп те, Интернет те, әлеуметтік желі де, қоғам да жауапты емес. Ертеңгі күні сұрау сізден болады. Сондықтан, сіз жауаптысыз!
4. Интернет ол – мусор. Мықты фильтріңіз болмаса, сол қоқыстың бәрі ішіңізге кетеді. Сүзгіңізді дұрыстаңыз!
5. Комплекстің барлығы бала кезден басталады. Балаңыздың бетінен қақпаңыз!
6. Бала тәрбиесіне тек әйел ғана жауапты емес. Ұрығын шашқан еркек те бала тәрбиесіне жауапты!
7. Өмірінде бір кітаптың бетін ашып көрмеген ата-ана баласына қалай тәрбие береді екен деп уайымдайсың.
8. Балаға 24 сағат уақыт бөлудің қажеті жоқ. Күніне 30 минут жетеді. Бірақ, сол 30 минутыңызды тек балаңызға арнаңыз.
9. Балаңызды ешқашанда жұрттың баласымен салыстырмаңыз.
10. Балаңыздың кез-келген ұсақ-түйек жетістіктеріне қуанып, мақтап отырыңыз. Бұл – балаға берілетін мотивация.
11. Балаңыздың көзінше өсек айтпаңыз, біреуді жамандамаңыз. Бала ұяда не көрсе ұшқанда соны іледі.
12. Балаңыз тыңдамаса, хат жазыңыз. Жазбаша нұсқаны кез-келген адам жақын қабылдайды.
13. Балаңызға өздігінен шешім қабылдауды үйретіңіз.
14. Бала 7 жасқа дейін тек ойнау керек. Баланы 5 жастан мектепке берудің қажеті жоқ.
15. Балаға жасына сай өлең, тақпақ, ән жаттатқызыңыз. Ауыр, негатив шығармалардан аулақ болыңыз.
16. Балаңызбен үнемі сөйлесіңіз. Үлкендерше әңгіме айтыңыз.
17. Бала – сіздің көрерменіңіз. Қандай кинода кімнің рөлінде ойнайсыз, бала соны тамашалайды.
18. Егер сізде 5 бала болса, махаббатыңызды әрқайсысына 20 пайыздан бөліп беріңіз. Біреуге 19 %, біреуіне 21 % кетіп қалмасын.
19. Балаларыңызға ешқашанда тырыстырып, тар киім кигізбеңіз.
20. Ата-ана махаббатына бөленіп өскен бала – өскенде жан-жағына, айналасына махаббат сыйлай алады.

Данияр Есен: Баланы 5 жастан мектепке берудің қажеті жоқ

<a href="https://kyzylorda-news.kz/">Kyzylorda-news.kz.</a> Мыңдаған қазақстандық мектеп түлегі үлкен өмірге қадам басып жатыр және олар үшін алғашқы трамплин – мамандық таңдау, ҰБТ тапсыру және жоғары оқу орнына түсу. ҚР БҒМ Жоғары және жоғары оқу орнынан кейінгі білім департаментінің директоры Әділет Тойбаев таңдауды қалай жасау керек екенін, неден бастап, не нәрсеге дайын болу керегін айтты, деп хабарлайды <a href="https://www.inform.kz/kz/ubt-2020-talapkerge-arnalgan-nuskaulyk_a3661309">ҚазАқпарат</a>.
Ең алдымен, Ә. Тойбаев болашақ мамандықты таңдауға үлкен жауапкершілікпен қарауды, еңбек нарығында кәсіптің сұранысқа ие болуын ескере отырып, келешегін бағалауды ұсынды. Департамент директоры бұл процеске ата-аналары мен жақындарын да қатыстыруға, тіпті сынып жетекшісімен кеңесуге шақырды. Бала өзінің мүмкіндіктерін, мамандыққа бейімін, әлеуетін түсінуі қаншалықты маңызды екенін атап өтті.
<blockquote>
 «Әрине, өз бейіміңізді ескере отырып, болашағыңызды қалай елестететініңізді, алдағы жоспарларыңызды одан әрі қалай іске асыратыныңызды да есепке алған жөн. Егер сіз жаратылыстану ғылымдарына көбірек бейім болсаңыз, тиісті бағытты таңдауды ұсынамыз, гуманитарлық салада да осылай. Келесі қадам – мамандық сәйкес келетін бейінді пәндерді анықтау. Бейіндік пәндері бар білім бағдарламалары топтарының тізбесін Ұлттық тестілеу орталығының сайтынан табуға болады», – деп бөлісті Әділет Тойбаев.
</blockquote>
Оқуға түсуші Ұлттық бірыңғай тестілеу тапсырады. ҰБТ нәтижелерін ескере отырып, одан әрі білім беру грантын тағайындау бойынша конкурсқа құжаттар тапсыру кезеңі жүргізіледі. Бұл рәсім 13-20 шілде аралығында Электрондық үкімет порталы арқылы жүзеге асырылады.
<blockquote>
 «Егер талапкер кәмелетке толмаған болса және ЭЦҚ-сы болмаса, оны заңды өкілдің қатысуымен жасауға болады. Егер түсушінің ЭЦҚ-сы бар болса, ол құжаттарды өзі бере алады, бірақ бұны ата-анасының қатысуымен жасауды ұсынамын. Электрондық үкімет сайтында білім беру бағдарламаларының нақты топтарын, ЖОО-ны таңдауға және конкурсқа қатысуға өтініш жіберуге болады. Өтінішке білімі туралы құжатты, ҰБТ сертификатын, 086-У нысанындағы медициналық анықтаманы, жеке басын куәландыратын құжаттың көшірмесін қоса тіркеу қажет. Оқуға түсуші конкурс қорытындысы бойынша гранттың тағайындалған немесе тағайындалмағаны туралы жауапты порталда алады. Егер жауап оң болса, сіз грант туралы электрондық куәлік аласыз», – деді Жоғары және жоғары оқу орнынан кейінгі білім департаментінің директоры.
</blockquote>
Одан кейін порталдан грант жеңіп алған ЖОО-ға тіркелуге өтініш бересіз, осы жерде жатақханадан орын алуға да өтініш тапсырасыз.
<blockquote>
 «Мұнымен қабылдау рәсімі аяқталмайтынын айта кету керек. Талапкер белгіленген мерзімде ЖОО-ға келіп, білім беру қызметін көрсету туралы шарт жасасуы тиіс. Егер мұны жасамаса, онда тіркеу жүзеге асырылмайды және заңды күшіне енбейді», – деп түсіндірді Әділет Тойбаев.
</blockquote>

ҰБТ-2020: Талапкерге арналған нұсқаулық

<a href="https://kyzylorda-news.kz/">Kyzylorda-news.kz.</a> «Дарын» республикалық ғылыми-практикалық орталығының қашықтан өткізген республикалық пәндік олимпиадаларда Қызылорда қаласындағы NIS командасы үздік академиялық білімдерімен ерекшеленіп, мектеп қоржынын 46 жүлдемен толықтырды. Оның ішінде 7 дарынды жас жеңімпаз атанса, 12 оқушы екінші дәрежелі дипломды иеленді. Тағы 27 зияткер жеңіс тұғырының үшінші орынынан көрінді.
Аталмыш олимпиадалар мамыр&nbsp;айында 9-11-сыныптар арасында жалпы білім беретін пәндер бойынша өткізілген-ді. Дегенмен, Қызылорда қаласындағы Назарбаев Зияткерлік мектебінің 7-8-сынып оқушылары да өз қалаулары бойынша олимпиадаға қатысып, жоғары сыныптармен бірге бақтарын сынап көрді.
<blockquote>
 «Сабақтан бос уақытта қосымша ресурстарды пайдалану арқылы білім аламын. Онлайн байқауларға қатысып, білімімді шыңдап отырамын. «Дарын» орталығының ұсынған олимпиадаларында биология және ағылшын тілі пәндері бойынша жүлделі үшінші орындарды иелендім», – дейді 8-сынып оқушысы Абунасыр Амир.
</blockquote>

Қызылордалық зияткерлер республикалық білім додаларында 46 жүлделі орын иеленді

<a href="https://kyzylorda-news.kz/">Kyzylorda-news.kz.</a> Ұлттық қоғамдық сенім кеңесінің үшінші отырысында Қазақстан Президенті Қасым-Жомарт Тоқаев: «Жаңа ахуал білім және ғылым жүйесін түбегейлі реформалауды талап етіп отыр. Енді бұл саланың маңызы арта түсетіні анық. Тіпті экономиканың өзі соған тәуелді болмақ. Біз білім мен ғылым саласының болашақтағы рөлін айқын түсінуіміз керек. Бүкіл мемлекеттік саясатты соған сәйкес жүзеге асырамыз. Білімге алты есе, ғылымға жеті есе қаржы бөлінеді» деп мәлімдеді.
Мемлекет басшысы білім саласының сапасын жақсарту үшін оқу орындарына қойылатын талаптың күшейтілетініне және жалпы ғылымға бөлінетін қаржыны жоспарлы түрде көбейте отырып, 2025 жылға қарай оны ішкі жалпы өнімнің 1 пайызына дейін жеткізілетіндігіне тоқталды. 2019 жылдың қорытындысы бойынша Дүниежүзілік банктің мәліметіне сәйкес Қазақстанның жалпы ішкі өнімінің көлемі 168 млрд АҚШ долларын құрады.
Қорқыт ата атындағы ҚМУ 2025 жылға дейінгі білім және ғылымды дамытудың жаңа мемлекеттік бағдарламасы&nbsp;аясында инновациялық талаптарды қанағаттандыру бағытында білікті кадрлар даярлаушы еліміздің беделді оқу орындарының бірі.
Университет ғалымдары да бүгінгі таңда технологияларды коммерцияландыру бойынша жобаларды жүзеге асырып отыр. «Физика-химиялық талдау әдістері» инженерлік бейіндегі зертханада химия ғылымдарының кандидаты, профессор Н.Аппазов басқарған ғалымдар қаржыландыру сомасы 780,0 млн теңге көлеміндегі «Инновациялық технология бойынша мұнай құрамды қалдықтарды өңдеу» атты жобаны «Ғылым қорының» гранты негізінде орындауда.
Сонымен бірге Президент Қ.Тоқаев: «Экономиканың барлық салалары жаңа білімге, технологияларға және инновацияларға негізделуі тиіс, бұл жаңа экономикаға көшудің тұтас сценарийін талап етеді», деген болатын.
Қорқыт ата университетінің ғалымдары бұл бағытта да белсенді. Оған дәлел ҚР Білім және ғылым министрлігі Ғылым комитетінің «Өнімді инновацияларды ынталандыру» жобасы шеңберінде жарияланған Қазақстан Республикасының университеттерінде технологияларды коммерцияландыру офистерін іріктеу конкурсы бойынша 2019 жылы ең жоғары ұпаймен жеңімпаз атанып, университеттің коммерцияландыру офисі 105,5 млн теңге ұтып алды.
ҚР Білім және ғылым министрі А.Аймағамбетов халық алдында есеп беру кездесуінде сөйлеген сөзінде: «Ғылымды дамытудың 2021-2023 жылдарға арналған басым бағыттары бекітіліп, шағын гранттар, жедел гранттар, коллаборацияға гранттар енгізілді. Гранттық қаржыландыру аясында 2021-2023 жылдарға жас ғалымдарға арналған конкурс және 2021-2022 жылдарға арналған конкурс жарияланады» дед атап өтті.
Осы орайда ғылым саласындағы оң ілгерілеуге университеттің профессор-оқытушылар құрамы өз үлестерін қосып келеді. Білім алушылар мен жас ғалымдарды қатыстыра отырып, университеттің ғылыми-зерттеу институттары мен ғылыми орталықтарының жетекші ғылыми қызметкерлері, сондай-ақ профессор-оқытушылар түрлі дейгейдегі конкурстар мен шығармашылық байқауларға қатысуда.
Білім ордасының ғылыми әлеуетін арттыру үшін Scopus және Web of Science деректер базасына енетін жоғарғы рейтингті журналдарда, алдағы жыл ішінде әр ғалымға кемінде 3 жарияланым болуы талаптары қойылып отыр. Осыған орай карантин уақытында университет ғалымдары халықаралық Elsevier, Springer баспаларының ұйымдастырған вебинарларына белсенді қатысты. Университет әріптестігінің географиялық шеңберін кеңейту мақсатында жоғары рейтингті журналдарда жарияланған мақалалары үшін авторларға сыйақы беру жүйесі бұрынғыдан да жетілдірілді. Ғылыми мақалалар әзірлеу және ғылыми жобаларды қаржыландыру конкурстарына өтінімдер дайындауға шетелдік коллабораторларды іздеп табу үшін SciVal электронды ресурсын пайдалануды кеңейту жұмыстары қолға алынды.
Жалпы мақсат – Елбасы алдыға қойған QS WUR рейтингісіндегі ең үздік 500 университет қатарына Қазақстанның 10 университетін қосу. Алдағы үш жыл ішінде Қорқыт ата ҚМУ сол ондықтан ойып тұрып орын алуға қадамдар жасамақ.
Саябек ЗИЯДИН,
экономика ғылымдарының докторы, профессор,
Қорқыт ата атындағы Қызылорда мемлекеттік университетінің
ғылыми жұмыстар және халықаралық байланыстар жөніндегі проректоры

Қорқыт ата атындағы ҚМУ: Басты мақсат – әлемнің үздік университеттері қатарына ену

<a href="https://sputniknews.kz/society/20200603/14147677/bala-oqu-talap.html">Kyzylorda-news.kz.</a> Білім және ғылым министрлігінің мектепке дейінгі және орта білім комитетінің төрағасы Майра Мелдебекова бірінші сыныпқа қабылданатын баланың жазып, оқу қабілетіне байланысты қойылатын талапқа қатысты пікір білдірді, деп хабарлайды&nbsp;<a href="https://sputniknews.kz/">Sputnik Қазақстан.</a>
<blockquote>
 «Бірінші сыныпқа қабылданатын балалар жазып-сызып, оқып, есептей алуы тиіс деген талап жоқ. Білім туралы заңға сәйкес еліміздегі барлық балалар тегін білім алумен қамтамасыз етілуі тиіс», – деді Майра Мелдебекова.
</blockquote>
Айта кетейік, осы күндері барлық мектептерде бірінші сыныпқа құжаттарды қабылдау жүргізілуде. 1 маусымнан басталған шара 1 тамызға дейін жалғасады. Ал өтінімдерді дәстүрлі қағаз түрінде немесе&nbsp;<a href="https://egov.kz/cms/kk">egov.kz</a>&nbsp;электрондық үкімет порталы арқылы беруге болады.
Сондай-ақ комтитет төрағасының айтуынша, тамыз айында еліміздің барлық аумағында жазғы мектеп ашу жоспарланған. Ол жерде балалар төтенше жағдайға байланысты төртінші тоқсанда өтпей қалған тақырыптарды меңгеріп, қайталайтын болады.

1-сыныпқа баратын балаға қандай талап қойылады?

<a href="https://kyzylorda-news.kz/">Kyzylorda-news.kz.</a> Қызылорда облысында Ұлттық бірыңғай тестілеуге қатысу үшін өтініштер 10&nbsp;мамырға дейін&nbsp; онлайн қабылданған.
Облыс бойынша тестілеу пункттерінің мәліметіне сәйкес, 6101 мектеп бітірушінің 5173 ұлттық бірыңғай тестілеуге қатысуға өтініш білдірген, ол 85 пайызды құрап отыр. Былтырғы жылы 5755 мектеп бітірушінің 4143 қатысып, 72 пайызды құраған. Ағымдағы жылы ұлттық бірыңғай тестілеуге қатысу 13 пайызға артып отыр.
Ұлттық бірыңғай тестілеу 20 маусым мен 5 шілде аралығында өтеді деп жоспарлануда. Әр аудиторияда оқушы саны 75 адамнан аспайды. Арақашықтық 2-3 метр сақталады. Ұлттық бірыңғай тестілеу жылдағыдай дәстүрлі қағаз түрінде, 5 пәннен (3 міндетті+2 бейіндік) өткізіледі. Барлық тест тапсырмаларының саны –120. Жалпы балл – 140. Педагогикалық мамандықтарға шекті деңгей – 70 балды құрайды.
Қысқартылған оқу мерзімдері бойынша оқуға түсушілер үшін – 2 пән, 60 сұрақ, жалпы балы – 70.
Талапкерде өзімен бірге қол жүгі, бөгде және тыйым салынған заттар болса тестілеуге жіберілмейді. Тыйым салынған заттарды алып кіруге ниеттенген және тестілеу барысында қолданған оқушылар Ұлттық бірыңғай тестілеуден бір жылға шеттетіледі және тест нәтижесі жойылады. Бір жыл көлемінде ақылы Ұлттық бірыңғай тестілеуге қатыса алмайды.
Тест тапсыру аудиториялары түгелдей бейнебақылаумен қамтылған және кез-келген өңірден аудиторияны бақылауға болады.
Апелляция тестілеуден соң сол күні онлайн беріледі. Апелляцияны жергілікті және республикалық апелляциялық комиссия қарайды.
Кез-келген Ұлттық бірыңғай тестілеу тапсырушы түлек анонимді түрде, кез-келген қате деп санаған сұрағын апелляцияға бере алады. Тест тапсырмалары оқулықтан алынады.
Министрдің бұйрығымен 2020-2021 жылдарға арналған мамандықтар бөлінісінде мемлекеттік білім беру тапсырысы бекітілді. Құжатқа сәйкес, биыл жоғары білімі бар кадрларды даярлауға 53&nbsp;864 грант бөлініп отыр.
Биылдан бастап мамандықтың грант конкурсы орыс тобы, қазақ тобы деп бөлінбей біртұтас өтеді. Жылдағыдай қазақ топтар мен орыс топтарының айырмашылығы болмайды. Сонымен қатар, Ұлттық бірыңғай тестілеу қорытындысымен сертификат электронды түрде беріледі, ол Ұлттық тест орталығының сайтында орналастырылады.
Ұлттық бірыңғай тестілеуге байланысты өзгерістер болған жағдайда қосымша ақпараттандырылады.

Қызылорда облысы бойынша ҰБТ-ға қатысуға 5173 түлек өтініш білдірген

<a href="https://kyzylorda-news.kz/">Kyzylorda-news.kz.</a> Университет түлегі, ауыр атлетикадан Қазақстанның еңбек сіңірген спорт шебері, зілтемірден әлемнің төрт дүркін чемпионы Илья Ильин Қорқыт Ата атындағы Қызылорда мемлекеттік университетінің ректоры Бейбіткүл Кәрімованың қабылдауында болды.
Кездесу барысында университет ректоры зілтеміршіні жаңа қызметімен құттықтап, алдағы жұмыстарына сәттілік тіледі. Сонымен қатар кездесуде университеттің спорт саласындағы жетістіктерін арттыру мақсатындағы жұмыстар мен Илья Ильин мектебін қалыптастыру мәселесі талқыланды.&nbsp;
Сондай-ақ алдағы жаңа оқу жылынан бастап Қорқыт Ата атындағы Қызылорда мемлекеттік университетінің&nbsp; білім алушылары зілтемірден әлемнің төрт дүркін чемпионы Илья Ильиннің дәрістерін тыңдайтын болады.
<img src="https://kyzylorda-news.kz/wp-content/uploads/2020/06/ilja-3-1-scaled.jpg" alt="" />

Илья Ильин университетте дәріс береді

<a href="https://kyzylorda-news.kz/">Kyzylorda-news.kz.</a> Ауыр атлетикадан әлемнің 4 дүркін чемпионы Илья Ильин «Қорқыт Ата атындағы&nbsp; Алтын медальмен» марапатталды.
Бүгін Қорқыт Ата атындағы Қызылорда мемлекеттік университетінің ректоры Бейбіткүл Каримованың қатысуымен «Мемлекеттік рәміздер –&nbsp; мақтаныштарымыз!» атты&nbsp; мерекелік шара өтті. Шарада университет ректоры қатысушыларды айтулы мерекемен құттықтап, еліміздің көк туын әлемдік аренада желбіретіп, көкке көтеріп жүрген бірқатар спортшыларды марапаттады.
Шараның басты қонағы университет түлегі, ауыр атлетикадан Қазақстанның еңбек сіңірген спорт шебері, зілтемірден әлемнің төрт дүркін чемпионы Илья Ильин «Қорқыт Ата атындағы&nbsp; Алтын медальмен» марапатталды.
Сонымен қатар ФКС-18-1 оқу тобының студенті, шахматтан 3 дүркін әлем чемпионы, 7 дүркін Азия чемпионы Әсел Серікбай, ФКС-18-5 оқу тобының студенті, каратэ-до киокушинкай-каннан әлем және Азия чемпионы Айбек Шаукилов,&nbsp; ФКС-18-5 оқу тобының студенті, парадзюдодан әлем чемпионы – Олжас Оразалыұлы, ФКС-18-3 оқу тобының студенті, таеквондодан Қазақстан Республикасының бірнеше дүркін чемпионы, Х-жазғы Универсиаданың жеңімпазы Жандос Орынбек, ФКС-17-3 оқу тобының студенті, дзюдодан Азия чемпионы, Х-жазғы Универсиаданың қола жүлдегері – Нұрлыхан Шархан Қорқыт Ата атындағы Қызылорда мемлекеттік университеті ректорының алғыс хатымен және естелік сыйлықтармен марапатталды.
Шара барысында ҚР Мемлекеттік рәміздер күніне арнап марапат иелері университет ректорымен бірге еліміздің Гимнін орындады. Марапат иесі Илья Ильин және «Нұр Отан» партиясы «Тұран» филиалы төрағасының бірінші орынбасары Есенжол Назаров шараға қатысушыларды мерекемен құттықтап, ыстық лебіздерін жеткізді.
<img src="https://kyzylorda-news.kz/wp-content/uploads/2020/06/ilja-1.jpg" alt="" />
<img src="https://kyzylorda-news.kz/wp-content/uploads/2020/06/ilja-2.jpg" alt="" />
<img src="https://kyzylorda-news.kz/wp-content/uploads/2020/06/ilja-5-1-scaled.jpg" alt="" />
<img src="https://kyzylorda-news.kz/wp-content/uploads/2020/06/ilja-6-1-scaled.jpg" alt="" />
<img src="https://kyzylorda-news.kz/wp-content/uploads/2020/06/6.jpg" alt="" />

Қазақстан және Қызылорда облысының жаңалықтары: Білім