<a href="https://kyzylorda-news.kz/">Kyzylorda-news.kz.</a> ҚР Білім және ғылым министрі Асхат Аймағамбетов педагогтардың кезекші сыныптардағы жұмысы үшін қосымша жалақы алатынын мәлімдеді.
<blockquote>
 “Бүгінгі жағдайда кезекші сыныпта оқыту барысында сыныпты 15 баладан екі шағын топқа бөлуге міндетті. Соған орай педагогқа жүктеме де артады. Дегенмен, педагог қосымша жұмысы үшін қосымша ақы да алады. Яғни, егер қазіргі уақытта онда 28 сағат болса, педагог барлық 28 сағат үшін жалақы алады. Бұл біздің әріптестеріміз үшін өте маңызды”, – дейді Аймағамбетов. 
</blockquote>
Министр 1 қыркүйектен бастап оқушылар қашықтан қалай оқитынын айтты. Сондай-ақ ол қашықтан оқыту бойынша екі негізгі бағытты атап өтті. Арнайы интернет-платформалар арқылы оқыту. Платформалардың ыңғайына байланысты мектептер, қалалық, аудандық мектептер білім бөлімдері шешім қабылдады. “Ел Арна” және “Балапан” телеарналары арқылы берілетін телесабақтар, қазір 9 сағатқа дейін эфир беріліп отыр. Оның айтуынша, сабақ ұзақтығы – 40 минут. Балалар бір кабинетте оқытылады. Сыныптарда дезинфекциялық шаралар жүргізілетінболады.

Асхат Аймағамбетов кімдердің қосымша жалақы алатынын айтты

<a href="https://kyzylorda-news.kz/">Kyzylorda-news.kz.</a> Биыл Қызылорда облысы әкімінің қолдауымен әлеуметтік жағынан аз қамтылған және тұрмысы төмен отбасылардың балалары үшін 150 білім гранты бөлінді, нәтижесінде 148 талапкер грант иегері атанды. Бұл туралы Өңірлік коммуникациялар қызметінің ақпарат алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Абдукаримов мәлімдеді.
<blockquote>
 “Облыс әкімінің грантына 183 үміткердің өтініші қабылданды. Қабылданған өтініштер аудандар мен Қызылорда қаласы әкімдіктері жанына құрылған арнайы комиссиялардың отырыстарында қаралып, нәтижесінде барлығы 148 грант иегерлері анықталды. Атап айтқанда, 76-ы көп балалы, 43-і тұрмысы төмен, 13-і асыраушысынан айырылған отбасына, 7-і ата-анасының біреуі мүгедек, 3-і «Атамекен» балалар үйінің тәрбиеленушісі, 3-і мүгедек балаға, ал қалған 3-еуі ата-анасының қамқорлығынсыз қалған балаға берілді. Сондай-ақ, 2 үміткер мемлекеттік грантты иеленуіне байланысты бас тартты”, – деді Мейрамбек Жақсылықұлы.
</blockquote>
<img src="https://kyzylorda-news.kz/wp-content/uploads/2020/08/fb_img_1598578680046.jpg" alt="" />

Қызылордада 148 талапкер әкім грантын иеленді

<a href="https://kyzylorda-news.kz/date/2020/08/27/">Kyzylorda-news.kz.</a> Бүгін Қызылорда қаласында дәстүрлі тамыз кеңесі өтті. «Білім және ғылым: жаңа оқу жылының ерекшеліктері» тақырыбында өткен келелі жиынға барлық білім беру ұйымдарының басшылары онлайн форматта қатысты.
Қала әкімі Нұрлыбек Нәлібаев ұстаздар қауымын алдағы білім күнімен құттықтап, саланың жетістіктері мен міндеттеріне тоқталды.
<img src="https://kyzylorda-news.kz/wp-content/uploads/2020/08/01-4-scaled.jpg" alt="" />
<blockquote>
 «Қазіргі таңда, мемлекет тарапынан білім саласына үлкен қамқорлық көрсетіліп келеді. Оның ішінде Қызылорда қаласында да көптеген оңды істер атқарылып жатыр» деген шаһар басшысы «салынған инвестиция көлемі қанша есеге артса, білім сапасын да сол деңгейге көтеру қажет. Биылғы жылы Қызылорда қаласында«Жұмыспен қамту жол картасы» бағдарламасы аясында &nbsp;&nbsp;№23, 43, 112, 173 мектептерінде және Белкөл кентіндегі «Балапан» балабақшасына күрделі жөндеу жұмыстары жүргізілді. Бұл мақсатқа қаралған қаржы 783 млн. теңгені құрады. Сонымен бірге, “Ауыл-Ел бесігі» бағдарламасына сай №143 орта мектептің күрделі жөндеу жұмыстарына 153 млн. 862 мың теңге қаржы бөлініп, тиісті жұмыстар атқарылды. Бұдан бөлек, Халықаралық жобалар арқылы қайтарымсыз грант негізінде № 1, 4, 176 мектептерде жөндеу жұмыстары жүргізілді», – дейді шаһар басшысы.
</blockquote>
Қызылорда қаласы бойынша апаттық және үш ауысымды мектептер мәселесі түбегейлі шешілген.
Орын тапшылығын болдырмау мақсатында Саяхат шағын ауданында 600, Е.Демесінов көшесінің бойынан 500 орындық екі мектептің құрылысы инвесторлар есебінен жүргізілуде. Мұнан бөлек, Жаппасбай батыр көшесінің бойындағы 600 орындық мектеп жаңа оқу жылында пайдалануға беріледі деп күтілуде. Бұған қосымша 3 мектептің жобалау-сметалық құжаттары әзірленіп жатыр.
<img src="https://kyzylorda-news.kz/wp-content/uploads/2020/08/04-1-scaled.jpg" alt="" />
Қала бюджетінің 45-50 пайызы білім саласына бағытталып, 2019 жылы –&nbsp; 25 млрд-тан аса қаржы қаралса, биылғы жылы бұл қаражат 35 млрд. теңгеден асты. Бұл мемлекет тарапынан білім саласын дамытуға көрсетілген қолдаудың белгісі.
Маңызды басқосуда қалалық білім бөлімінің басшысы Динара Баймұрзаеваның «Жаңа оқу жылындағы алға қойылған міндеттер мен қашықтан оқытудың ерекшеліктері туралы» хабарламасы тыңдалып, білім саласының даму қарқыны мен бұл саланы одан әрі жетілдіруге қатысты ұсыныстар айтылды.
Жаңа оқу жылында қаладағы 50 мектепте қашықтан оқыту&nbsp; форматында 67 527 оқушы, ауылдық 4 мектепте (№128 Қараөзек, 175 Айнакөл, 145 Бірқазан, 215 Талдыарал) барлық санитарлық талаптарды сақтай отырып 434 оқушыны дәстүрлі түрде оқыту жоспарлануда. &nbsp;&nbsp;&nbsp;&nbsp; Сонымен қатар, 1-4 сыныптарда 30958 бала білім алатын болса, олардың 8520-ы ата-аналардың өтініші негізінде кезекшісыныпта оқытылады деп жоспарлануда.
<img src="https://kyzylorda-news.kz/wp-content/uploads/2020/08/03-scaled.jpg" alt="" />
Сонымен бірге қала әкімі сала басшыларына алдағы оқу жылында нақты атқарылуы тиіс бірқатар тапсырмалар жүктеді. Басымдық дәстүрлі және кезекші сыныптары бар мектептер мен балабақшалардағы санитарлық нормаларды сақтап, интернет желісіне қолжетімділігі жоқ мұғалімдер мен оқушылар арасындағы күнделікті байланысты ұйымдастыруға берілді. Сондай-ақ, қашықтан оқыту кезінде бала тәрбиесі назардан тыс қалдырмауды міндеттеді. Ал жан басына қаржыландыруға өткен мектеп басшыларына мемлекет қаржысын мақсатты жұмсап, білім ұясының материалдық-техникалық базасын жақсартуды тапсырды. Конференция барысында сөз алған ардагер-ұстаз Алтын Ізбасова заман талабына сай жас ұрпаққа сапалы білім, саналы тәрбие беру бағытындағы атқарылып жатқан жұмыстар мен салаға көрсетіліп жатқан қолдауларды атап өтті.
Жиын соңында жыл көлемінде еселі еңбегімен ерекшеленген мәртебелі мамандық иелері марапат биігінен көрініп, ҚР Білім және ғылым министрінің алғыс хатын алды. Ұстаздар мерейін асырған тағы бір тарту, шаһар басшысы қаланың рухани-әлеуметтік дамуы жолында елеулі еңбек атқарып, білім беру жүйесін дамытуға және білім сапасын арттыруға айрықша үлес қосқан бірқатар ұстаздарға қаржылай сыйақы мен бағалы сыйлықтар табыстап, алғыс хаттармен марапаттады.
<img src="https://kyzylorda-news.kz/wp-content/uploads/2020/08/02-5-scaled.jpg" alt="" />

Қызылорда қаласында апатты жағдайдағы мектептер мәселесі толығымен шешілген

<a href="https://kyzylorda-news.kz/date/2020/08/27/">Kyzylorda-news.kz.</a> Коронавирус пандемиясына байланысты Қазақстанда 2020-2021 оқу жылы қашықтан оқыту форматында басталады. Жазғы демалыстың аяқталуына санаулы күндер қалды.
Жаңа оқу жылында республиканың 7391 мектебінде 3,3 миллионнан астам бала білім алады. 396 мыңнан аса бүлдіршін бірінші сыныпқа барады.
1 қыркүйек – Білім күні. Карантинге байланысты мектептерде оқу жылының басталуына арналған шаралар онлайн өтеді. Балалар мектепке бармайды, шараға байланыс құралдары арқылы қатысады.
<h3 id="">Кімдер мектепке барып оқиды?</h3>
Шалғай ауылдарда оқушы саны аз шағын мектептерде сабақ дәстүрлі форматта өтеді. Балалар мектепке барып оқиды. Қазақстанда шағын жинақты мектептерде білім алатындар саны оқушылардың жалпы санының 4%-ін ғана (127 мың бала) құрайды. Барлығы мұндай 1934 білім ошағы бар.
Бұдан бөлек, ата-аналардың өтінішімен 1-4 сынып оқушылары үшін кезекші сыныптар ашылады.
Кезекші сыныпта созылмалы ауруы жоқ балалар ғана білім алады. Бір сыныпта оқушылар саны 15 баладан аспауы тиіс. Әр сабақ 40 минутқа созылады.
<h3 id="-1">Оқушылар қандай талаптарды сақтауы тиіс?</h3>
Мектепке барып оқитын балалар міндетті түрде маска тағады. Ал медициналық қолғап кию міндетті емес.
Жеке қорғаныш құралдарын әр ата-ана өз ақшасына сатып алады. Өйткені ел қазынасында оқушыларды бетпердемен тегін қамтамасыз етуге қаржы қарастырылмаған. Бұл туралы 24 тамызда онлайн баспасөз мәслихатында денсаулық сақтау министрлігінің ресми өкілі Бағдат Қожахметов айтқан еді. Бірақ, ол бұл ұсынысты ведомство басшылығына жеткізуге уәде берді.
Мектепке кіреберісте мұғалімдер мен оқушылардың дене қызуы күн сайын өлшенеді. Әрбір екінші сабақтан кейін сыныптарда және әр үзіліс сайын дәліздерде ылғалды тазарту жұмыстары жүргізіледі. Үзіліс әр сыныпқа әртүрлі уақытта беріледі. Мектептерде аяқ киімді зарарсыздандыруға арналған кілемшелер төселіп, санитайзерлер орнатылады.
Мектеп асханасы мен буфет уақытша жабылады.
Ата-аналар мектепке кіргізілмейді: олар баланы мектепке дейін әкеліп, сабақ аяқталған соң алып кетеді.
Егер оқушылар мен мұғалімдер арасында коронавируспен ауыратын науқастар анықталса, мектептер қайтадан карантинге жабылуы мүмкін.
<h3 id="-2">Мектеп формасына қатысты өзгеріс</h3>
Білім және ғылым министрінің бұйрығына мектеп формасына қатысты уақытша өзгеріс енгізілді. Бұл төтенше жағдай және карантиндік шектеулермен байланысты. Оған сәйкес, ата-ана жаңа оқу жылында баласын мектепке қалай киіндіріп жіберетінін өзі шешеді.
Ал, жалпы, мектеп формасына қойылатын талаптар жойылмайды.
<blockquote>
 “Оқушы білім беру мекемелерінде бекітілген мектеп формасын кимей, таза классикалық киіммен келе алады. Бірақ мектеп формасы қала береді, оны ешкім алып тастап отырған жоқ”, – деді білім министрі Асхат Аймағамбетов.
</blockquote>
Министрдің айтуынша, карантин аяқталғаннан кейін оқушыларды ешкім мектеп формасын киіп келуге міндеттемейді.
“Мысалы, биыл бірінші тоқсаннан кейін дәстүрлі форматқа көшетін болсақ, ата-аналарды мектеп формасын сатып алуға ешкім міндеттемейді”, – деп сендірді ол.
<h3 id="-3">Оқушыларды бағалау</h3>
Карантин жағдайында 1-11 (12) сыныптарда оқу жетістіктерін бағалау жүйесі де уақытша өзгерді.
Жаңа оқу жылында тоқсан сайын бөлім үшін 1 жиынтық жұмыс және тоқсан үшін 1 жиынтық жұмыс жүргізіледі. Тоқсандық баға күнделікті бағалау, БЖБ және ТЖБ көрсеткіштері негізінде қойылады.
Сонымен бірге, қашықтан оқыту кезінде оқушыларға үй тапсырмасы берілмейді.
<blockquote>
 “Мұғалім оқу тапсырмаларын жариялайды. Яғни, биыл әдеттегі үй тапсырмасы болмайды. Kundelik.kz платформасында бір оқу тапсырмасы орналастырылады”, – деп түсіндірді білім министрлігінің мектепке дейінгі және орта білім комитетінің төрағасы Майра Мелдебекова.
</blockquote>
“Балапан” және “Ел-Арна” телеарналарында дүйсенбі мен жұма аралығында телесабақтар көрсетіледі. Әрбір мектеп қашықтан оқытуды ұйымдастыруға негіз болатын интернет платформаны өзі таңдайды.
<h3 id="-4">Демалыс кестесі</h3>
Білім министрлігі оқушылардың демалысы пандемияға байланысты өзгермейтінін мәлімдеді.&nbsp;
1-11 (12) сыныптар:
<ul>
<li>күзгі каникул – 10 күн (5-14 қараша);</li>
<li>қысқы – 11 күн (31 желтоқсан-10 қаңтар);</li>
<li>көктемгі демалыс – 12 күн (20-31 наурыз);</li>
</ul>
1-сыныптарда: қосымша демалыс – 7 күн (8-14 ақпан).
<a href="https://sputniknews.kz/">Sputnik Қазақстан</a>

Жаңа оқу жылы: Қазақстандық оқушылар мен ата-аналар нені білуі тиіс?

<a href="https://kyzylorda-news.kz/date/2020/08/27/">Kyzylorda-news.kz.</a> Бүгін Арал ауданының әкімі Мұхтар Оразбаевтың қатысуымен «Білім және ғылым: жаңа оқу жылының ерекшелегі» тақырыбында аудандық тамыз кеңесі өтті.
Барлық санитарлық нормаларға сәйкес өткізілген білім беру қызметкерлерінің аудандық тамыз конференциясына аудан әкімдері мен барлық білім беру ұйымдарының басшылары, мектеп мұғалімдері онлайн форматта қатысып, білімдегі алдағы мәселелер мен қол жеткізген табыстар туралы талқылады.
<img src="https://kyzylorda-news.kz/wp-content/uploads/2020/08/118519921_2750810301914005_4786966942247717044_o.jpg" alt="" />
Тамыз кеңесінің күн тәртібіне сәйкес аудан әкімі М.Оразбаев ауданның алдағы оқу жылына байланысты жүргізіп жатқан дайындық мәселелері жөнінде баяндама жасады. Сонымен қатар аудандағы білім беру саласында атқарылған жұмыстарды жан-жақты талдап, білім беру саласындағы мемлекеттік қолдау шараларын, саладағы негізгі басым бағыттарды атап өтіп, алдағы жаңа оқу жылында ұстаздар қауымына сәттілік тіледі.
Ауданда жалпы орта білім беретін 49 мектеп, 53 мектепке дейінгі білім беру ұйымы бар. Орта білім беретін мектептерге 17447 оқушы, балабақшаларға 1-5 жас аралығындағы 3672 бала қамтылады деп күтілуде. Ағымдағы жылдың 1 қыркүйегінен бастап аудандағы 22 мектеп дәстүрлі және 27 мектеп аралас оқыту форматында, 20 мемлекеттік балабақша санитарлық талаптарды сақтай отырып жұмыстарын бастайды.
Биылғы жылы білім саласына 12 млрд астам қаржы бөлінген. Бұл өткен жылдармен салыстырғанда 32 пайызға өсіп отыр. Соның ішінде биыл Сексеуіл кентінде 300 орындық мектеп құрылысы, Жақсықылыш кентіндегі № 19 орта мектепке 100 орындық қосымша құрылыстары жүргізілуде. Қазіргі таңда Сексеуіл кентіндегі мектеп ғимаратының 1, 2 және 3-блоктарының құрылыстары, сонымен бірге, аудандағы оқушылар үйінің құрылысы қарқынды жүруде. Аталған нысандар 2020 жылдың желтоқсан айында қолданысқа беріледі деп жоспарлануда.
<img src="https://kyzylorda-news.kz/wp-content/uploads/2020/08/118558550_2750810125247356_3701523994108129555_o.jpg" alt="" />
Педагогикалық кеңесте аудандық білім бөлімінің басшысы Санира Жанназарова жаңа оқу жылының басты ерекшеліктеріне тоқталып, оқу жүйесінде іске асатын басты жобаларды атап өтті.
Мәселен, биылғы оқу жылында шалғайдағы елді мекендердегі шағын жинақталған мектептер оқуды дәстүрлі штаттық режимде бастайды. Сондай-ақ бастауыш сынып оқушылары үшін, ата-аналардың өтініші негізінде, қатаң санитарлық талаптарды сақтай отырып, кезекші сыныптар ашылады. Осыған орай, ата-аналар таңдауына сәйкес кезекші сыныптарға өтініштерді қабылдаудың электронды форматы жүргізілуде. Дәстүрлі және кезекші сыныптарда бала саны 15-тен артық болмайды, сабақ ұзақтығы 40 минутты құрап, оқу бірнеше ауысыммен өтеді. Атап өту керек, қашықтан оқыту форматына сәйкес ауданнның барлық пән мұғалімдері қашықтан оқыту технологиялары бойынша «Мен қашықтан оқытуды үйренемін…» атты біліктілікті арттыру курстарына 100% қамтылған.
Жиын соңында бірқатар аудан ұстаздары ҚР Білім және ғылым министрлігінің құрмет грамотасымен, аталған министрліктің және аудан әкімінің алғыс хатымен марапатталды.

Арал ауданында білім саласына биыл 12 млрд  қаржы бөлінген

<a href="https://kyzylorda-news.kz/date/2020/08/27/">Kyzylorda-news.kz.</a> Қазақстанның бас мемлекеттік санитар дәрігері Айжан Есмағамбетова кезекші топтарда коронавирус анықталған жағдайда қандай шаралар қолға алынатынын айтты, деп хабарлайды&nbsp;<a href="https://sputniknews.kz/">Sputnik Қазақстан</a>.
Есмағамбетова егер сыныпта бір оқушыдан коронавирус инфекциясы анықталса, мамандар эпидемиологиялық тексеріс жүргізетінін атап өтті.
<blockquote>
 “Сол сыныптың оқушылары, сабақ беретін мұғалімдер және бір инкубациялық кезеңде тығыз қарым-қатынаста болғандар оқшауланады. Содан кейін зертханалық тексерістен өтеді”, – деді ол орталық коммуникациялар қызметінде өткен онлайн брифингте.
</blockquote>
Мемлекеттік санитар дәрігердің айтуынша, вирус бірнеше сыныптан шықса, мектеп толығымен жабылуы мүмкін.&nbsp;
<blockquote>
 “Егер ауру бірнеше сыныпта немесе әртүрі сыныптарға сабақ берген мұғалімдерден анықталса, ауруды одан ары таралуын болдырмау мақсатында мектеп толығымен жабылуы мүмкін”, – деп атап өтті Есмағамбетова.
</blockquote>
Білім және ғылым министрлігінің мәліметінше, биыл оқушылардың 80 проценті, 2,6 миллион оқушы қашықтан оқиды. 15 проценті (530 мың бала) кезекші сыныптарға барса, 5 проценті (202 мың бала) ауыл мектептерінде білім алады.

Кезекші топтарда коронавирус анықталса, мектеп жабылуы мүмкін

<a href="https://kyzylorda-news.kz/">Kyzylorda-news.kz.</a> Қазақстан Республикасының Конституциясы күні және Білім күні мерекесі қарсаңында қашықтан оқытуда шығармашылықпен айналысып жүрген аудан ұстаздары марапатталды.
«Жаңа оқу жылына — жаңа бастама» тақырыбындағы шарада Білім және ғылым қызметкерлері кәсіподағы облыстық комитетінің төрайымы Гүлнар Есқалиева аудан ұстаздарын мерекемен құттықтады.
«Білім – ырыстың тізгіні» дегендей, ұстаздар әрқашан балаларды оқытуда белсенді. Елімізде індет таралғанда мұғалімдер шәкірттеріне қашықтан білім беріп, оқу жылын абыроймен аяқтады. Жаңа оқу жылында да осы жүйе сақталып, білім қызметкерлеріне зор жауапкершілік артылмақ. Осы орайда, ұстаздардың құқықтары «Педагог мәртебесі» Заңында толықтай қарастырылғанын атап өткен жөн. Мұғалімдерге әркез қолдау көрсетіледі”, – деді комитет төрайымы.
Өз кезегінде аудандық білім бөлімінің басшысы Қалихан Омаров алдағы жаңа оқу жылына дайындық барысын айтты.
<blockquote>
 “Еліміздегі карантиндік шектеулерге байланысты мектептерде кезекші сыныптар ұйымдастырылып оқытылады. Ал жоғары сынып оқушылары қашықтан білім алады. Негізінен оқушы саны аз және интернет желісінің жиілігі төмен елді мекендердегі білім ошақтарында дәстүрлі түрде сабақ өткізіледі. Ауданда жаңа оқу жылында 2 мектепте дәстүрлі сабақ басталады. Атап айтқанда, Іңкәрдария ауылындағы №191 орта мектеп пен Жетікөл ауылындағы №174 орта мектепте санитарлық талаптар сақтала отырып, сабақ процесі жүреді”, – деді бөлім басшысы.
</blockquote>
Іс-шарада «Цифрлы Қазақстан» бағдарламасы шеңберінде ауданның білім қызметкерлеріне 24 ноутбук сыйға берілді. Сонымен бірге білім және ғылым қызметкерлері кәсіподағы облыстық комитетінің төрайымы Гүлнар Есқалиева, аудандық білім бөлімінің басшысы Қалихан Омаров, аудандық кәсіподақ комитетінің төрағасы Алмас Есназар білім саласын өркендету жолында елеулі еңбегімен танылған бірқатар ұстаздарды «Құрмет громатасымен» марапаттады.
Кездесуде білім саласы қызметкерлерінің Жастар кеңесі жұмысы жоғары бағаланды.
<img src="https://kyzylorda-news.kz/wp-content/uploads/2020/08/fb_img_1598500127832.jpg" alt="" />
<img src="https://kyzylorda-news.kz/wp-content/uploads/2020/08/fb_img_1598500130113.jpg" alt="" />

Сырдария ауданының ұстаздары марапатталды

<a href="https://kyzylorda-news.kz/">Kyzylorda-news.kz.</a> Биыл Қызылорда қаласында «Жұмыспен қамтудың 2020-2021 жылдарға арналған жол картасы» бағдарлама аясында қалалық білім бөліміне қарасты №43,112,173 мектептері мен «Жұлдыз» балабақшасы қайта жаңғырту жұмыстарынан өтті.
Сонымен қатар №23 мектеп пен Белкөл кентіндегі «Балапан» балабақшасына күрделі жөндеу жұмыстары жүргізілуде. Бұдан бөлек, “Ауыл-Ел бесігі” бағдарламасы арқылы Ақсуат ауылдық округіндегі №143 орта мектепте күрделі жөндеу жұмыстары жүргізілуде. Ал, «Бәйтерек» шағын ауданынан 600 орындық мектеп, «Саяхат», «Сырдария» мөлтек аудандарда жеке инвестор қаржысымен 800 орындық 2 жеке мектеп құрылысы салынуда.
Бағдарлама аясында Ақсуат ауылдық округіндегі және Белкөл кентіндегі бірқатар білім беру нысандарында жүріп жатқан жұмыстардың барысымен БАҚ өкілдері танысты.
Айта кету керек, аталған жоба аясында 523 жұмыс орны ашылған. Жөндеу жұмыстары аясында мектеп шатыры, фасады, терезелері, ішкі/сыртқы қабырғалары мен едендері және есіктері, кәріз жүйелері жаңалануда. 
Жалпы, жаңа оқу жылында қаладағы 50 мектеп қашықтан оқыту форматында, ауылдық 4 мектеп барлық санитарлық талаптарды сақтай отыра дәстүрлі оқыту жоспарлануда. 
Сонымен қатар, бастауыш сынып оқушыларының ата-аналарының өтініші негізінде қатаң санитарлық шараларды сақтай отырып, кезекші сыныптар ашылса, «Жұмыспен қамтудың жол картасы» аясында жөндеу жүріп жатқан 2 білім нысаны кезекші сыныптарды 2-тоқсаннан бастап қабылдамақ.
<ul>
<li><img src="https://kyzylorda-news.kz/wp-content/uploads/2020/08/fb_img_1598499958131.jpg" alt="" /></li>
<li><img src="https://kyzylorda-news.kz/wp-content/uploads/2020/08/fb_img_1598499960890.jpg" alt="" /></li>
<li><img src="https://kyzylorda-news.kz/wp-content/uploads/2020/08/fb_img_1598499965700.jpg" alt="" /></li>
<li><img src="https://kyzylorda-news.kz/wp-content/uploads/2020/08/fb_img_1598499969452.jpg" alt="" /></li>
<li><img src="https://kyzylorda-news.kz/wp-content/uploads/2020/08/fb_img_1598499971236.jpg" alt="" /></li>
<li><img src="https://kyzylorda-news.kz/wp-content/uploads/2020/08/fb_img_1598499973024.jpg" alt="" /></li>
</ul>

Қызылорда:  Мемлекеттік бағдарламалар аясында білім нысандары жөндеуден өтуде

<a href="https://kyzylorda-news.kz/date/2020/08/26/">Kyzylorda-news.kz.</a> Бүгін облыс әкімі Гүлшара Әбдіқалықованың қатысуымен «Білім және ғылым: жаңа оқу жылының ерекшелегі» тақырыбында облыстық тамыз кеңесі өткізілді. Педагогикалық жиынға Қазақстан Республикасы Парламент Сенатының депутаты, әлеуметтік-мәдени даму және ғылым комитетінің төрағасы Мұрат Бақтиярұлы қатысты.
Тамыз конференциясына аудан әкімдері мен барлық білім беру ұйымдарының басшылары, мектеп мұғалімдері онлайн форматта қатысып, білімдегі алдағы мәселелер мен қол жеткізген табыстар туралы талқылады.
<img src="https://kyzylorda-news.kz/wp-content/uploads/2020/08/3df2b36545739715968e385be599cce9_original.936945-scaled.jpg" alt="" />
Облыс әкімі Гүлшара Әбдіқалықова білім беру саласындағы мемлекеттік қолдау шараларын, саладағы негізгі басым бағыттарды атап өтіп, алдағы жаңа оқу жылында педагогтарға сәттілік тіледі. 
Биыл мектептердің заманауи талаптарға сәйкестендіруге мүмкіндік алған ерекше жыл болды. Бірнеше жылдан бері жөндеуді қажет еткен білім беру нысандары жаңарып, жөндеу жұмыстары қарқын алды. Осы жылы 55 білім беру нысанына жөндеу жұмыстары жүргізілуде. 
Облыста Қызылорда қаласынан және Жалағаш ауданынан 2 мектеп пайдаланылуға беріледі. Сонымен қатар, 4 мектептің құрылысы жүргізілуде. Оның ішінде Қызылорда қаласынан 600 орындық, Арал ауданы, Сексеуіл кентіндегі 300 орындық мектептер жыл соңында аяқталады.
<img src="https://kyzylorda-news.kz/wp-content/uploads/2020/08/a7c48c65411c6ba7a8bda489c0abb5c6_original.1417448-scaled.jpg" alt="" />
Жаңа мектептер салуда мемлекеттік жеке-меншік әріптестік аясында салынып жатқан жеке мектептердің үлесі де артып келеді. Биыл Қызылорда қаласында 500 және 300 орындық 2 жеке мектептің құрылысы жүргізілуде.
Педагогикалық кеңесте облыстық білім басқармасының басшысы Ақзира Қасымова жаңа оқу жылының басты ерекшеліктеріне тоқталып, оқу жүйесінде іске асатын басты жобаларды атап өтті. 
Биылғы оқу жылының басты ерекшелігі – мектептердің жан басына қаржыландыру тетігіне өтуі. 1-ші қыркүйектен бастап,58 қалалық мектептержан басына шаққандағы қаржыландыруға көшеді. 
Қаржыландырудың жаңа талабы мектеп арасында өзара бәсекелестік орнатып, материалдық базаны нығайтуға жұмсалатын қаржыны, бала санына сәйкес біркелкі бөлінуіне ықпал жасайтын болады. 
Биылдан бастап Назарбаев зияткерлік мектебімен бірге «Ауыл мектебі» пилоттық жобасы іске асуда. Қазір біз Жаңақорған, Сырдария аудандары мен Қызылорда қаласындағы 3 мектепте жүргізіп отырмыз. Осы мектептердің тәжірибесі алдағы оқу жылында барлық мектептерге енгізілетін болады.
<img src="https://kyzylorda-news.kz/wp-content/uploads/2020/08/f85572ce5e7c7753848347874b0846ac_original.1348935-1-scaled.jpg" alt="" />
Биылғы оқу жылынан бастап барлық білім беру ұйымдарына «Құңдылықтарға негізделген білім беру» жобасы да енгізіледі. Ал, балаларға патриоттық тәрбие беруде жаңа оқу жылында 53 инновациялық мектепке факультативтік негізде домбыра сағаттары бөлінетін болады.
Жаңа оқу жылында облыстағы 220 мектеп «BilimLand», «Дарын-онлайн» интернет платформалары арқылы қашықтан білім алса, шалғай орналасқан елді-мекендегі 73 мектеп дәстүрлі түрде оқиды. 
Сонымен бірге, ата-ана өтінішімен 1-4 сыныптағы 41 547 оқушы 2974 топта дәстүрлі түрде білім алады.
Конференцияда онлайн арқылы мектеп директорлары мен ауыл мұғалімдері және ата-аналар тікелей байланысқа шығып, білім саласындағы жетістіктерді сөз етті. 
Жиын соңында облыс әкімі Гүлшара Әбдіқалықова «Үздік орта білім ұйымы» конкурсының жеңімпазы Қазалы ауданындағы №249 мектеп-лицейіне 17 млн.теңге грант сертификатын табыстады.
<img src="https://kyzylorda-news.kz/wp-content/uploads/2020/08/40b1cc6fba36bbdc32c7ff05933adcce_original.469437.jpg" alt="" />

Қызылорда облысының әкімі тамыз кеңесіне қатысып, білім мәселелерін талқылады

<a href="https://kyzylorda-news.kz/">Kyzylorda-news.kz.</a> Оқушылар арасында COVID-19 жұқтырғандар саны артқан жағдайда оқу орындары карантинге жабылады. Бұл туралы Қазақстанның денсаулық сақтау вице-министрі Ажар Ғиният мәлімдеді.
Жаңа оқу жылының басынан бастап Қазақстанда оқушылар мен студенттер қашықтан оқитын болады. Алайда бастауыш сыныптар мен шалғай ауылдардағы оқушылар мектепке бара алады.&nbsp; 
Егер оқушылар мен мұғалімдер арасында коронавируспен ауыратын науқастар анықталса, мектептер қайтадан карантинге жабылуы мүмкін.
<blockquote>
 “Мектептерде барлық санитарлық талаптар сақталады, балалардың жағдайы қадағаланады. Егер баланың дене қызуы болып немесе ауырып тұратын болса, ЖРВИ белгілері байқалса, онда мұндай балалар мектепте келуден босатылады. Біз ауру көрсеткішін және науқастардың медициналық ұйымдарға жүгінуін қадағалап отырмыз. Сырқаттанушылық өсуі кезінде бұл оқу ұйымдары карантинге жабылады”, – деді денсаулық сақтау вице-министрі.
</blockquote>
Ажар Ғиният мектептерді карантинге жабу туралы шешімді санитар дәрігерлердің қабылдайтынын айтты.
Бұған дейін денсаулық сақтау министрлігі коронавирус инфекциясынан 9 963 адамның емделіп жатқанын, оның ішінде 49 бала бар екенін айтты. Жағдайлардың 80%-інде балаларда коронавирус жеңіл өтеді. Алайда мультижүйелік қабыну синдромы немесе Кавасакиге ұқсас синдром түрінде кездесетін асқынулар да бар. Қазір республикада 16 балаға осындай диагноз қойылды.&nbsp;
Бастауыш сынып оқушылары үшін мектептерде кезекші сыныптар ашылады. Ол жерде оқушылар саны 15 адамнан аспайды. Сабақ “бір сынып – бір мұғалім” қағидаты бойынша жүргізіледі. Оқушылар медициналық маска тағып, арақашықтықты сақтайды.
<a href="https://sputniknews.kz/society/20200825/14796458/ministrlik-mektep-karantin.html">Sputniknews</a>

Министрлік мектептер қандай жағдайда карантинге жабылатынын айтты

<a href="https://kyzylorda-news.kz/">Kyzylorda-news.kz.</a> Қызылорда облысы әкімдігінің алдына жиналған көп балалы аналар балаларының қашықтықтан білім алуына дайындық жоқ екенін айтуда. Олар биліктен қаржылай қолдау сұрап отыр. Тіпті оқуға қажетті техникаларды, уақытша емес, “басыбайлы беріңдер” деп талап қойды.
Әдетте әкімдік қоршауынан әрі асырмайтын шенділер, жиналғандарды автобусқа отырғызып алып кетті. Полицияға емес, жақын маңдағы мектепке апарып, жиын өткізді. «Тұрмыстың тауқыметінен титықтадық» деген аналар биліктен қаржылай қолдау сұрап отыр.
<blockquote>
 “Әр балаға отыз мыңнан берілсін. Оқу құралдарына. Бізге киім-кешегі керек емес. АСП-ның продуктысын беріп жатыр. Адам жейтін нәрсе емес. Тек сүтін ғана ішіп жатқан шығармын”,- дейді көп балалы ана Жадыра Салыбаева.
</blockquote>
Аналарды алаңдатқан жайт жалғыз бұл емес. Жаңа оқу жылы басталуына санаулы күн қалса да, қашықтықтан оқуға қажетті техникалар қолымызға тимеді, – дейді олар.
<blockquote>
 Компьютер, планшетті қайтарымды қылып беріп жатыр. Соны бізге қайтарымсыз қылып берсін. Қыркүйектің 10-на дейін белгілі болады деді. Оған дейін балаларым сабаққа бармайды.
</blockquote>
Базыналы халықты облыс әкімінің орынбасары өзі тыңдады. Ол барлығы заң шеңберінде шешілетіндігін айтып, талаптарының орынсыз екендігін ашық айтты.
<blockquote>
 “9400-дің үстінде мектептің компьютерлері таратылып беріледі. Оған жұмыс жүріп жатыр қазір. Сонымен бірге республикалық бюджеттен 22 мың 800-дің үстінде электронды құрылғылар алынатын болады. Соны қайтарымсыз беріңдер дейді. Ол мемлекеттің мүлкі біз оны таратып бере алмаймыз. Өйткені біз мемлекеттің заң алдында жауап беретін боламыз.Облыстық білім бөлімінің мәліметінше, жетім және ата-ана қамқорынсыз қалған балалардың тоқсан пайызы қажетті техникамен қамтылған. Одан өзге демеушілер есебінен де жүздеген бала құрылғыға қол жеткізіпті. Ал дау тудырған жағдайы төмен отбасының балаларына берілетін заманауи құралдар бір айдың көлемінде иелеріне табысталады деп сендірді”, – Қызылорда облысы әкімінің орынбасары Наурызбай Байқадамов.
</blockquote>
<a href="https://m.astanatv.kz/kz/news/56267/">Astanatv.kz</a>

Наурызбай Байқадамов: Мемлекеттің мүлкін таратып бере алмаймыз

<a href="https://kyzylorda-news.kz/">Kyzylorda-news.kz.</a> Білім және ғылым министрлігі қашықтан оқыту кезінде үй тапсырмасынан бас тарту туралы шешім қабылдады. 
Бұл аса маңызды шешім туралы тамыз айында тікелей эфирде өткен жиналыс кезінде айтылмады. Министрліктің Мектепке дейінгі және орта білім комитетінің төрайымы Майра Мелдебекова бұл жайлы арнаға берген сұхбатында мәлімдеді. 
<blockquote>
 “Мұғалім оқу тапсырмаларын жариялайды. Яғни, биыл үй тапсырмасы болмайды. Егер мектеп Kundelik.kz-ті қолданса, онда осы платформасындағы бір оқу тапсырмасы болады”, – деп түсіндірді Мелдебекова.
</blockquote>
<a href="https://kaz.nur.kz/1870995-bilim-ministrligi-kasyktan-oku-kezinde-j-tapsyrmasy-berilmejdi.html">Kaz.nur.kz</a>

Қазақстан және Қызылорда облысының жаңалықтары: Білім