<a href="https://kyzylorda-news.kz/">Kyzylorda-news.kz.</a>&nbsp;Қазақстанда мамырдың соңында жазғы мектептер ашылады, ол жерде қашықтан оқыту кезінде оқу үлгерімі нашарлаған оқушылар олқылықтың орнын толтыра алады, деп мәлімдеді білім және ғылым министрі Асхат Аймағамбетов.
Аппарат жиналысында Аймағамбетов биыл оқу жылы елдегі мектептерде дәстүрлі түрде 25 мамырда аяқталатынын айтты.
<blockquote>
 “26 мамырдан 19 маусымға дейін мектептерде жазғы мектеп ұйымдастырамыз. Жалпы бұл ерікті түрде болады, ол қосымша қаржыландыруды қажет етпейді”, – деді министр.
</blockquote>
Министрліктің мәлімдеуінше, жазғы мектеп оқушыларға білім берудегі олқылықтың орнын толтыруға, сондай-ақ балалардың бос уақытын тиімді өткізуге мүмкіндік береді. Баланы жазғы мектепке қабылдау үшін ата-ана өтініш жазуы керек.
Жазғы мектепке ниет білдірген барлық бала қатыса алады. Ол тегін болады, үлгерімі төмен балаларға басты назар аударылады.
<blockquote>
 “Үлгерімі төмен балаларға көп көңіл бөлуіміз керек. Бізде әдетте талантты, дарынды, үлгерімі жақсы балаларға көп көңіл бөлінеді. Ондай балалармен жұмыс істеу оңай әрі қызық екені түсінікті, алайда бұл жағдайда басты назар үлгерімі төмен балаларға аударылуы тиіс”, – деді Аймағамбетов.
</blockquote>
Жазғы мектепте сабақ беретін мұғалімдерге қосымша ақша бөлу жоспарланбаған. Педагогтар осы жылға бекітілген жүктеме аясында жұмыс істейтін болады. Ұстаздар 19 маусымнан кейін жазғы демалысқа шыға алады.
Сонымен қатар министр жазғы мектептердің жұмысына қатысатын мұғалімдер үшін есеп беруін азайтуды тапсырды.

Оқу үлгерімі нашарлаған оқушылар жазғы мектепте оқи алады

<a href="https://kyzylorda-news.kz/">Kyzylorda-news.kz.</a> 4 мамырда ҚР білім және ғылым министрі Асхат Аймағамбетовтің аппараттық кеңесінде «Халықаралық бағдарламалар орталығы» АҚ президенті Айнұр Кәрібозова магистратура, докторантура, резидентура және тағылымдама бағдарламасы бойынша «Болашақ» халықаралық стипендиясын тағайындауға арналған жыл сайынғы конкурстың басталғаны туралы айтты.
Құжаттар 2021 жылғы 4 мамырдан бастап 28 қазанға дейін eGov.kz мемлекеттік қызметтер порталы арқылы қабылданады. Стипендия үш кезеңде – маусым, тамыз және қараша айларында тағайындалады.
Биыл «Болашақ» бағдарламасы бойынша оқу үшін 1055 стипендия бөлінді. Олардың ішінен 555 стипендия магистратура, резидентура, докторантура және тағылымдама бағдарламасы бойынша, ал 500 стипендия тағылымдамалардың жаңа «Ғалымдар» санаты бойынша бөлінді. Бұл санатты Шетелде кадрлар даярлау жөніндегі республикалық комиссиясы Қазақстан Республикасының Президенті Қасым-Жомарт Тоқаевтың тапсырмасына сәйкес әлемнің жетекші ғылыми орталықтарында жыл сайын 500 ғалымның тағылымдамадан өтуін қамтамасыз ету мақсатында бекітті.
2021 жылы стипендияның ашықтығын арттыруға бағытталған бірқатар жаңашылдық енгізілді.
Осылайша, «Болашақ» бағдарламасы бойынша оқуға ұсынылатын жоғары оқу орындарының тізімі алғаш рет 3 жылға бекітілді. Бұл формат үміткерлерге «Болашақ» стипендиясын тағайындауға арналған конкурстық іріктеуге қатысуды жоспарлау мен дайындалуда қолайлы жағдай жасау мақсатында енгізілді.
2021-2023 жылдарға арналған «Болашақ» бағдарламасы шеңберінде оқу үшін ұсынылатын шетелдік жоғары оқу орындарының тізіміне екі және одан да көп академиялық рейтингтердің (QS World University Rankings, Academic Ranking of World Universities, Times Higher Education) топ-25 позициясына кіретін 27 елден 207 жоғары оқу орны кірді.
Биыл «Болашақ» бағдарламасы бойынша басым мамандықтар тізбесі академиялық оқу үшін 80 мамандықты және тағылымдамадан өту үшін 137 мамандықты көздейді.
Осы жылы басым мамандықтар «Білім беру», «Медицина», «Инновациялар мен жаңа технологиялар», «Индустриалдық инженерия», «Жаратылыстану ғылымдары», «Әлеуметтік ғылымдар» және «Креативті индустрия» сияқты бағыттар бойынша бөлінді.
2021 жылы тізбеге «Инклюзивті білім беру», «Қашықтан білім беру әдістемесі мен әдіснамасы», «Эпидемиология», «Иммунология», «Вирусология», «Урбанистика», «Үлкен деректерді талдау», «Жаңа материалдар технологиясы», «Робот техникасы», «Өнеркәсіптік автоматтанлыру» секілді осындай өзекті мамандықтар енгізілді.
Сонымен қатар биыл басым мамандықтар тізбесінде экономиканың дамуына ықпал ететін инновациялық мамандықтарды біріктіретін «Инновациялар мен жаңа технологиялар», «Креативті индустрия» жаңа бағыттарының пайда болуы маңызды ерекшелік болып тұр.
Бұл тізбе елдегі еңбек нарығы қажеттіліктерінің орта мерзімді болжамын ескере отырып, мемлекеттік органдар мен түрлі ұйымдардың өтінімдері негізінде әзірленді.

«Болашақ» бағдарламасы бойынша құжаттар қабылдау басталды

<a href="https://kyzylorda-news.kz/">Kyzylorda-news.kz</a>. ҚР Білім және ғылым министрі Асхат Аймағамбетов Forbes журналының Қазақстандағы баспагері Арманжан Байтасовқа&nbsp;<a href="https://www.youtube.com/watch?v=76JOun7t5c4&feature=emb_logo">берген сұхбатында</a>&nbsp;мұғалімдердің кірісі қалай өскенін&nbsp;айтты. Оның айтуынша, “жалақы айтарлықтай өсті”, ал кейбір педагогтар 500 мың теңгеден көп алады.
<blockquote>
 “Тек номиналды түрде біз осы бап бойынша кірістерді 50%-ға ұлғайттық, оған қоса түрлі үстемеақылар да бар. Әрбір магистр өз дәрежесі үшін бүгінде 29 мың теңге алады, тәлімгерлік үшін үстемақы бар, дәптерлерді тексергені үшін төлемдер екі есеге ұлғайтылды. Педагогтердің санаты үшін төлемдер ұлғайтылды. Жоғары санатты мұғалімдер үшін қосымша ақы жалақының 50%-на тең. Бізде 500 мыңнан жоғары жалақы алатын мұғалімдер бар”, – деді Аймағамбетов.
</blockquote>
Ол мұғалімдердің табысы жүктемеге байланысты екенін атап өтті: біреу аптасына 18 сағат жұмыс істейді – бұл ең төменгі жалақы, ал басқа мұғалім одан көп жұмыс істейді.
Министр білім саласындағы жалақының өсуі жалғасады деп уәде берді
<blockquote>
 “Келесі жылы жалақыны тағы 25%-ға арттырамыз. Біз педагогтардың табысы орташа республикалық деңгейде болғанын қалаймыз”, – деп атап өтті Асхат Аймағамбетов.
</blockquote>

Асхат Аймағамбетов: Бізде 500 мың теңгеден астам жалақы алатын оқытушылар бар

<a href="https://kyzylorda-news.kz/">Kyzylorda-news.kz</a>.&nbsp;Қазақстандағы мұғалімдердің 99 пайызының еңбекақысы өсіп, көңілі қанағаттанды. Арасында 500 мың теңге алатындар бар. Бұл жайлы ҚР Білім және ғылым министрі Асхат Аймағамбетов айтты.
Министрдің айтуынша, мұғалімнің мәртебесін көтеруге бағытталған іс-шаралар мен жұмыстарды толық іске асырылды деп айту қиын. Өйткені мұндай шаруаны қолға алғанына 2 жыл ғана уақыт болған.
<blockquote>
 «Жоспарды түгелдей орындау үшін әлі біраз уақыт керек. Бірақ екі жылдың өзінде күрделі өзгерістер жасадық. Әсіресе, еңбекақы өсіру мәселесі біршама шешім тапты. Мұғалімдердің атаулы еңбекақысының өзі 50% өсті, тағы қосымша төлемдер қосылды. Магистрлікті бітіріп келген түлектердің еңбекақысына 29 мың теңге қосылады. Сынып жетекшісі, дәптер тексергені үшін берілетін қосымша төлем екі есе өсті. Жоғары категориялы мұғалімдердің еңбекақысы да 50% өсті. Арамызда 500 мың теңге еңбекақы алатындары бар. Бәрі жүктемеге байланысты. Бірі аптасына 18 сағат сабақ берсе, енді бірі – одан сағаты көптер. Еңбекақы әлі де өседі. Келесі жылы тағы 25% көтерілмек», – деді Асхат Аймағамбетов.
</blockquote>
Айта кетерлігі, педагог мамандығында оқитын студенттер 42 мың теңге шәкіртақы алады. Ал басқа студенттердің шәкіртақысы – 26 мың теңге.
<a href="https://qadam.asia/bilim/%d2%9baza%d2%9bstanda-500-my%d2%a3-te%d2%a3ge-e%d2%a3beka%d2%9by-alatyn-m%d2%b1%d2%93alimder-bar-ministr/?fbclid=IwAR3DFo-OjWFB0KASikgwSO5JEZUV_XFDXTmNZeZh_7AfZnEca-auWD1Vr6Q">Qadam.Asia</a>

Асхат Аймағамбетов: Еңбекақы әлі де өседі

<a href="https://kyzylorda-news.kz/">Kyzylorda-news.kz</a>. Аймақта білім беру ұйымдарында жұмыс жасайтын қызметкерлердің құқығы мен заңды мүдделеріне қатысты келіп түсетін өтініштер саны өткен жылғы есепті кезеңмен салыстырғанда 50 пайызға азайған. Бұл туралы Өңірлік коммуникациялар қызметінің ақпараттық алаңында өткен онлайн брифингте облыс бойынша Білім саласында сапаны қамтамасыз ету департаментінің басшысы Ғалия Дәулетова мәлімдеді.
Қаңтар айында педагогикалық әдеп және мұғалімдердің құқығын қорғау мәселелері жөніндегі кеңес құрылған болатын.
<blockquote>
 “Педагогтар тарапынан туындаған мәселерге байланысты білім беру ұйымына зерделеу жұмыстары жүргізіліп, мұғалімдерге түсіндірме беріліп отырылады. Жыл басынан бері әдеп қағидасын бұзған білім беру ұйымының бір басшысына қатаң сөгіс берілді. Сондай-ақ, әлеуметтік желілердегі педагогтардың мәселелерін үнемі назарға алып, департаментке қойылатын сауалдарға жауап берілуде. Осыған орай тиісті мекемелермен өзара іс-қимыл шараларын атқарудамыз”, – деді Ғалия Ноғайқызы.
</blockquote>

Қызылорда: Педагогтардың құқығы қорғалуда

<a href="https://kyzylorda-news.kz/">Kyzylorda-news.kz</a>. Облыста&nbsp; 2021 жылдың 26-27 сәуірі күндері жалпы білім беретін пәндер бойынша республикалық олимпиада&nbsp; «USTUDY» тестілеу орталығы&nbsp; базасында&nbsp; өткізілді.
Республикалық олимпиада барлық санитарлық талаптарды сақтай отырып оффлайн форматта «Бір қатысушы – бір компьютер – бір камера» қағидасы бойынша жүргізілді.
Олимпиадаға &nbsp;Қызылорда облысындағы 24 мектептен жаратылыстану-математикалық, қоғамдық-гуманитарлық бағыттары бойынша&nbsp;&nbsp; 57 оқушы қатысты.
Олимпиаданың өткізілуі барысындағы ашықтықты қамтамасыз ету мақсатында&nbsp; тікелей трансляция respa2021.daryn.kz сайтында жүргізілді.
28 сәуір күні республикалық олимпиадаға қатысушылар өз логин, парольдері арқылы respa2021.daryn.kz сайтынан олимпиада турларының қорытындысын тексере алады.
Жергілікті &nbsp;уақыт бойынша сағат: 12.00-17.00 аралығында webinar.daryn.kz сайты арқылы&nbsp; қатысушылар апеллияцияға өтінішті жазбаша түрде&nbsp; білдіре алады.
Қатысушы электронды поштаға берілген жауапқа қанағаттанбаған жағдайда&nbsp; 29 сәуір ZOOM &nbsp;платформасы арқылы қазылар алқасы мүшелеріне сұрағын қоя алады.
Республикалық&nbsp; олимпиаданың жабылу салтанаты 30 сәуір күні өткізіледі.

Қызылорда: Республикалық олимпиада барысын ашық бақылай аласыз

<a href="https://kyzylorda-news.kz/">Kyzylorda-news.kz.</a> Бүгін Қазақстанның әр өңірінде республикалық пәндік олимпиаданың қорытынды кезеңі басталды. Білім сынағы 25-30 сәуір аралығында өтеді.
26-27 сәуірде олимпиаданың I және II кезеңдері ұйымдастырылады. Ал, апелляция 29 сәуірге жоспарланған. Олимпиаданың жабылу салтанаты 30 сәуірде онлайн режимде өтеді.
Елдегі індеттің өршуіне байланысты республикалық олимпиада «USTUDY» тестілеу орталығы базасында «Бір қатысушы, бір компьютер, бір камера» форматы бойынша жүргізілуде. Қатысушыларды отырғызу кезінде пәндерді мен сыныптарды «араластыру» әдісі қолданылады. Орталықта барлық санитарлық талаптар сақталған.
Білім сынағына 58 оқушы қатысуда. Олимпиада онлайн режимінде көрсетіледі, бейнебақылаудың сілтемелері «Дарын» РҒПО сайтында қолжетімді болады.
Олимпиада барысында ашықтықты қамтамасыз ету үшін барлық өңірлерде «Дарын» республикалық орталығының жауапты қызметкерлері қатысуда.
Сынақ тапсырмалары «Дарын» РҒПО интернет ресурсы арқылы әр кезеңнің басында бір уақытта ұсынылады және сол тапсырмаларға әрбір қатысушыға жеке қол жеткізу коды беріледі. 
Республикалық олимпиадада жеңімпаз атанған оқушылар ел намысын халықаралық олимпиадаларда қорғайтын болады.
Айта кетейік, олимпиаданың облыстық кезеңіне барлығы 292 оқушы қатысты.
<img src="https://kyzylorda-news.kz/wp-content/uploads/2021/04/fb_img_1619415489071.jpg" alt="" />
<img src="https://kyzylorda-news.kz/wp-content/uploads/2021/04/fb_img_1619415495727.jpg" alt="" />

Қызылордада республикалық пәндік олимпиада басталды

*<a href="https://kyzylorda-news.kz/">Kyzylorda-news.kz</a>. Қызылорда өңірінде індеттің күшеюіне орай қашықтан білім алатын оқушылар артуда. Балалар арасында сақтықты күшейту үшін Қызылорда облыстық білім басқармасы 4 оқу тоқсанынан бастап ата-аналардың өтініші негізінде балаларды қашықтан оқытуға рұқсат берді.*
IV оқу тоқсаны басталған алғашқы аптада оқушылардың 90 пайызы дәстүрлі, 10 пайызы қашықтан оқыса, бүгінгі күні онлайн оқитын оқушылар көбейді.
Қызылорда облысындағы 304 мектептегі 169883 оқушы білім алса, соның 73 пайызы яғни 124049 оқушы қашықтан оқыса, 45834 оқушы оқушылардың 23 пайызы яғни дәстүрлі форматта білім алуда.
Айта кетейік, дәстүрі оқитын мектептерде қатаң санитариялық талаптар сақталып, ата-аналардың кіруіне тыйым салынған. Оқушылар үшін арнайы жылжымалы кесте жасалған. Балалардың шоғырлануына жол берілмейді.

Қызылордада  оқушылардың 73%-ті онлайн форматта білім алуда

<a href="https://kyzylorda-news.kz/">Kyzylorda-news.kz</a>. Биыл мектеп бітіруші түлектер үшін ҰБТ жаңа ереже бойынша өтеді. Түлектер тестті екі рет тапсырып, ең жоғарғы деген нәтижені грант иелену үшін конкурсқа жолдай алады. Жаңа ережедегі жаңашылдықтар туралы білім басқармасы басшысының орынбасары Бағдат Бердәулетов Өңірлік коммуникациялар қызметінде өткен онлайн брифингте айтып өтті.
Мектеп бітіруші оқушылар 6 мамыр мен 30 маусым аралығында өзіне ыңғайлы уақытты таңдап, ұлттық тест тапсыратын күнді белгілейді. Бұрынғыдай топтасып тест тапсыруға жол берілмейді. Тиісінше карантиндік шараларға баса назар аударылады. Яғни, 1 күнде 10-20 бала аралығында тест тапсыруы мүмкін. Бастысы арақашықтық сақталуы қажет.
<blockquote>
 «ҰБТ енді екі рет тапсырылады. Және бұл формат ашық әрі әділ өтеді. Бұл балалар үшін өте тиімді. Біріншіден, мектеп бітірушілер тест күнін күтіп, күйзеліске ұшырамайды. Екіншіден, тестті екінші рет тапсыру мүмкіндігі жүйкеге түсетін салмақты азайтады. Жалпы, биыл облыстағы 261 мектептен 7004 оқушы мектепті аяқтайды. Балалардың 90 пайызы ҰБТ-ға қатысады деп жоспарланып отыр. Ал сынақ тестілеу орталықтарында электронды форматта өткізіледі», – деді облыстық білім басқармасы басшысының орынбасары Бағдат Камбозұлы.
</blockquote>
Айта кету керек, ҰБТ-ға қатысушы арнайы талап ережеге сай тексеріліп кіргізіледі.
<blockquote>
 «Тестілеу форматы биыл біршама өзгертілгенін білесіздер. ҰБТ-ға қазір 16 жасқа толмаған оқушы оқу орнының анықтамасымен ғана кіре алады. Тестілеуге кіргенде оқушы танысу актісіне қол қояды. Яғни, тыйым салынған заттар жоқ екендігін көрсету үшін бұл. Барлығы талапқа сай болғанда ғана, талапкер аудиторияға кіре алады. Ал ғимаратқа ұстаздар мен ата-аналар кіруіне тыйым салынды. Бұл енді карантин талаптарына сай жүргізіледі. Біз бұл жағдайды ескеріп, әрбір аудиторияға бейнебақылау орнаттық. Мұнда ата-аналар тестілеудің қалай өтіп жатқанын онлайн бақылай алады», – деді «U-Future» ЖШС Қызылорда облыстық филиалы тестілеу орталығы директорының орынбасары Шахар Қалыбекова.
</blockquote>
<img src="https://kyzylorda-news.kz/wp-content/uploads/2021/04/176055175_1273516126377230_5405430101025198596_n.jpg" alt="" />

Қызылорда: ҰБТ электронды форматта өтеді

<a href="https://kyzylorda-news.kz/">Kyzylorda-news.kz</a>. Қызылорда қаласындағы Назарбаев Зияткерлік мектебінің оқушылары «Жас биолог» республикалық ғылыми-танымдық сайыста «Ең үздік топ» атағын жеңіп алды.
Арайлым Әшірмет, Баймырза Әбдірәсіл, Нұрай Бақытжанқызы, Бекжан Бектұрған және Бегім Қуанышбек бір жыл бойы «Биолог» анықтамалығының ұсынған тапсырмаларын белсенді орындады.
Ал қорытынды топтар сайысында жас өрендер ұсынылған сұрақтардың барлығына нақты әрі дұрыс жауап бере отырып, жоғары академиялық білімдерімен және танымдық қабілеттерімен ерекшеленіп, жеңіске жетті.
<img src="https://kyzylorda-news.kz/wp-content/uploads/2021/04/fb_img_1618832866387.jpg" alt="" />

Қызылордалық NIS оқушылары жеңіске жетті

Kyzylorda-news.kz. Мемлекет басшысының халыққа жолдауында айтылған оқу орындарын тексеру тапсырмасы орындалды. Бұл туралы Президенттің баспасөз хатшысы Берік Уәли өзінің Facebook парақшасында жариялады.
<blockquote>
 «Былтыр мен дипломды оңды-солды үлестірумен айналысатын білім мекемелерін жабуды тапсырған болатынмын. Білім беруді табысты бизнеске айналдырған ықпалды адамдардың қарсылығынан бұл жұмыс баяу жүріп жатыр. Бірақ проблеманы шешу керек», – деген еді Қасым-Жомарт Тоқаев 2020 жылдың 1 қыркүйегіндегі халыққа Жолдауында .
</blockquote>
Берік Уәлидің хабарлауынша, 2020 жылы 38 ЖОО-ға профилактикалық тексеру жүргізілген. 14 ЖОО-да жұмысқа орналастыру көрсеткіштері талап етілетін нормативтен төмен болған. Ал 2021 жылы 42 жоғары оқу орнына алдын ала бақылау жүргізу жоспарланып отыр. Жыл басынан бері 53 мыңға жуық студент білім алатын 7 ЖОО жабылған. ЖОО оқытушылары жұмыспен қамтылып, студенттер басқа жоғары білім беру мекемелеріне ауыстырылған. Сонымен бірге, үш оқу орны бас лицензиясынан айырылған.
Олар:
– 35 мыңға жуық студенті бар Аймақтық әлеуметтік-инновация университеті.
– 5 мыңнан астам студенті бар М. Тынышпаев атындағы Қазақ көлік және коммуникациялар академиясы.
– Қазақ медициналық үздіксіз білім беру университеті (ЖОО аталған шешімге шағымданды, қазіргі уақытта сот процесі жүріп жатыр).

Қазақстандағы оқу орындары тексеріліп жатыр

<a href="https://kyzylorda-news.kz/">Kyzylorda-news.kz</a><a href="https://kyzylorda-news.kz/">.</a>&nbsp; Биыл түлектер ұлттық бірыңғай тестілеуді электронды форматта тапсырады. Білім сынағы тестілеу базасында өткізіледі. Ол үшін Қызылорда облысында 4 тестілеу пункті әзірленген.
Ал, Қызылорда қаласында ұлттық бірыңғай тест «Ustudy» білім беру базасында ұйымдастырылады. Облыс әкімінің орынбасары Балжан Шәменова «Ustudy» тестілеу базасына арнайы барып, орталық жұмысымен танысты.
Білім басқармасының басшысы Ақзира Қасымова өңірде ұлттық тестілеуге дайындық барысын, тестілеу пункттерінің әзірлігін баяндады. Сонымен қатар, биылғы ұлттық бірыңғай тестілеудің форматына қатысты негізгі өзгешеліктерді атап өтті.
Айта кетейік, биыл 7006 түлек 11 сыныпты аяқтайды. Оның 90 пайызы ұлттық тестке қатысады жоспарланып отыр. 
Биылғы жылдың басты ерекшелігі – түлектер ұлттық тестті екі рет тапсыруға мүмкіндік алады.
<img src="https://kyzylorda-news.kz/wp-content/uploads/2021/04/173880405_1269787826750060_4551135717166532111_n.jpg" alt="" />

Қазақстан және Қызылорда облысының жаңалықтары: Білім