<a href="https://kyzylorda-news.kz/">Kyzylorda-news.kz.</a> Облыста жаңа оқу жылынан бастап «Тәрбие орталығы» жұмысын бастайды. Орталықтың мақсаты – балалардың ой-танымын арттыру, спорттық қабілетін шыңдау. Бұл туралы облыс әкімі Нұрлыбек Нәлібаев «Әділетті Қазақстан: Сапалы білім, адал ұрпақ, табысты ұлт» тақырыбындағы мектепке дейінгі тәрбие мен оқыту саласы педагогтерінің республикалық тамыз конференциясының пленарлық отырысында айтты.Аймақ басшысы жас ұрпақты тәрбиелеу барысында ұлттық құндылықтар мен тұлғатану институтын қалыптастырудың маңызын атап өтті.<blockquote>«Білім берудің үздік тәжірибесін лайықты жалғастыра келе, ұлттық құндылықтар мен тұлғатану институтын қалыптастыруға тиіспіз. Бұл бүгінгі буынның біліміне жауапты ұстаздарды ғана емес, бауыр еті – баласы үшін барын беретін ата-аналарды да алаңдатуы қажет. Жаңа оқу жылынан бастап облыста «Тәрбие орталығы» өз жұмысын бастайды. &nbsp;Орталық қызметі балалардың ой-танымын арттыруға, спорттық қабілетін шыңдауға, жасөспірімдер арасындағы түрлі келеңсіздіктердің алдын алуға бағытталады. Бұл орайда облыстық білім басқармасы полиция департаменті және қала, аудан әкімдіктерімен бірлесіп, жергілікті жерде жасөспірімдердің тәрбиесі, құқық бұзушылығына қатысты нақты талдаулар жүргізіп, кешенді шаралар қабылдауы керек», – деді Нұрлыбек Машбекұлы.</blockquote>Айта кетейік, елімізде болашақ ұрпаққа жол сілтейтін педагог еңбегін лайықты бағалауға бағытталған кешенді іс-шаралар қолға алынған. Президент тапсырмасымен соңғы 4 жылда мұғалімдердің жалақысы 100 пайызға артты. Ал 1 қыркүйектен бастап балабақша тәрбиешілерінің еңбекақысы 30 пайызға ұлғаяды.&nbsp;Биыл өңірде балаларды мектепке тасымалдау мәселесі де шешімін тапты. Жаңа үлгідегі 30 автобус шалғайдан қатынайтын оқушылардың игілігіне қызмет етпек.&nbsp;

Қызылордада «Тәрбие орталығы» жұмысын бастайды

<a href="https://kyzylorda-news.kz/">Kyzylorda-news.kz.</a> Бүгін Н.Бекежанов атындағы қазақ академиялық музыкалық драма театрында «Әділетті Қазақстан: Сапалы білім, адал ұрпақ, табысты ұлт» мектепке дейінгі тәрбие мен оқыту саласы педагогтерінің республикалық тамыз конференциясының жалпы пленарлық отырысы өтті.&nbsp;Алқалы жиынға облыс әкімі Нұрлыбек Нәлібаев, ҚР Парламенті Сенатының депутаты Ақмарал Әлназарова, Мәжіліс депутаты Мархабат Жайымбетов, Оқу-ағарту министрлігі мектепке дейінгі білім беру департаментінің директоры Наталья Жұмаділдаева қатысты.&nbsp;Биылғы тамыз мәслихаты жаңа форматта өтуде. Министрлік ұстанымына сәйкес әр облысқа арнайы тақырыптар белгіленген. Өзге өңірлерден келген 300-ден аса үздік педагог кешеден бері білім беру саласының маңызды мәселелерін талқылады.&nbsp;Облыс әкімі Нұрлыбек Нәлібаев өзгерістерге қадам басқан уақытта жас ұрпаққа сапалы білім беруде, тәрбиелеуде ұстаздардың еңбегі ерекше екенін айтып, бала болашағы үшін атқарылған жұмыстарды баяндады.<blockquote>«Мемлекет басшысы Қасым-Жомарт Кемелұлы Тоқаев «Болашаққа жол сілтейтін мұғалімнің еңбегін лайықты бағалау – өте маңызды міндет» деп атап өтті. Биылғы тамыз кеңесінің «Әділетті Қазақстан: Сапалы білім, адал ұрпақ, табысты ұлт» атауын еншілеуі құндылықтардың бағасы қай кезде де биік екенін тағы бір дәлелдеді. Себебі адамзатты кемел ойға тек білім ғана жетелейді. Ел Президентінің, Үкіметтің қолдауымен соңғы бір жыл ішінде білім саласына бағытталған қаржы көлемі &nbsp;260 млрд.теңгеге жетті. Бұл өткен жылмен салыстырғанда 20%-ға артық. Осының арқасында саладағы ауқымды жобаларды сәтті жүзеге асырудамыз. Өңірдің 3-6 жастағы балалары 100 пайыз мектепке дейінгі тәрбиемен қамтылған. Ал 2-6 жастағылар үлесі 88,9 пайызға жетті. Тұрақты қолдау көрсетілгендіктен балабақшалар заманауи бағыттағы ІТ жобаларды сәтті енгізіп, аймақтың үздік тәжірибесін өзге облыстарға таратуда. Бұл ретте тәрбиешілердің білім деңгейін көтеруге ерекше жағдай жасадық. Жыл көлемінде барлық жеке балабақша тәрбиешілері тегін курстардан өтуде. Біз үшін тәрбиешілердің мемлекеттік немесе жеке балабақшада жұмыс істегені маңызды емес. Олардың біліктілігін арттыруда тең көзқарас ұстанамыз. Өйткені – бала бәрімізге ортақ», – деді аймақ басшысы.</blockquote>Тамыз кеңесінде баяндамашылар өз салалары бойынша тәжірибелерін бөлісіп, бала тәрбиелеуге қатысты ұсыныстарын ортаға салды. Айта кетейік, биыл Қызылорда облысының білім саласында жағымды жаңалықтар жетерлік. Аймақта мемлекет пен жекеменшіктің әріптестігінің ынтымақтастық аясы кеңейіп келеді. Бүгінде облыстағы 613 балабақшаның 453-і немесе 73%-ы &nbsp;жеке сектордың үлесінде.&nbsp; Мемлекет басшысының бастамасымен қолға алынған «Жайлы мектеп» бағдарламасы шеңберінде құны 86,2 млрд.теңге болатын 21 заманауи мектеп салынады. Жаңа білім ордалары 12 &nbsp;мыңнан аса оқушыны қамтиды. Биыл өңірде 10 мектептің іргетасы қаланады.&nbsp; «Білімді қолдау қоры» есебінен Қызылордада қаласында құны 7,9 млрд. теңге болатын физика-математика бағытындағы мектеп-интернат құрылысы басталды. Дарынды балаларға арналған жаңа оқу ордасында республикалық физика-математика мектебінің таңдаулы ұстаздары сабақ береді.Аймақта жеке мектептердің де үлесі артуда. Қазірдің өзінде 24 жеке мектеп жұмыс істесе, биыл 7 мектеп ашылады.Қаланың сол жағалауында «ҚазГерМұнай» компаниясының қаржылай қолдауымен 350 орындық заманауи Оқушылар сарайы салынады. Бұл қосымша білім беру ордасы озық ойлы, өнерге құштар, спортқа бейім дарынды балалардың шамшырағын жағады.&nbsp;Аймақта апатты деп танылған 6 мектептің мәселесі оңтайлы шешілді. 4 білім ошағының құрылысы «Жайлы мектеп» жобасы арқылы салынса, Арал ауданы, Тоқабай ауылындағы мектеп құрылысы жеке инвестор есебінен жүргізілуде. Білім нысаны жыл соңына дейін пайдалануға беріледі. Ал Шиелі ауданындағы тағы бір апатты мектеп мәселесі «Білім беру инфрақұрылымын қолдау қоры» көмегімен шешіледі.Қала мектептеріндегі орын тапшылығы мәселесі қосымша құрылыс салу арқылы реттелуде. Облыс орталығындағы 4 мектептің 1850 балаға арналған қосымша ғимараттары жаңа оқу жылында балаларды қабылдайды.&nbsp;Ауыл балалары үшін салынған 1400 орындық 4 мектеп (Жаңақорған «Майбекет», Шиелі Байсын, Қазалы Әйтеке би кенті, Қызылорда қаласы «Бәйтерек» шағын ауданы) осы жылы ел игілігіне табысталмақ.&nbsp;Білім мазмұнын арттыру мақсатында мектептерді заманауи пәндік кабинеттермен жабдықтауға, бала қауіпсіздігін қамтамасыз ету үшін соңғы үлгідегі бейнекамералар алуға жергілікті бюджеттен 1 млрд. теңгеге жуық қаржы бөлінді.

Қызылордада республикалық тамыз конференциясы өтті

<a href="https://kyzylorda-news.kz/">Kyzylorda-news.kz.</a> Аймақ басшысы Нұрлыбек Нәлібаев жастардың білім алуына түрлі мүмкіндік жасауда. Соның бірі 100-ге жуық талапкердің жоғары оқу орындарында тегін білім алуын қамтамасыз етті. Ең қызығы, бұл грант тек әлеуметтік санатта дүниеге келген оқушыларға қарастырылған. Биыл облыс әкімі гранты бойынша 100 студентке оқу ақысын және жүріп-тұру, тамақтану шығындарын ішінара өтеуге әлеуметтік көмек тағайындауға облыстық бюджеттен 85,2 миллион теңге қаражат бөлінген. Мұндай мүмкіндікке кімдер ие болғанын Өңірлік коммуникациялар қызметінің баспасөз алаңында облыстық жұмыспен қамтуды үйлестіру және әлеуметтік бағдарламалар басқармасының басшысы Ғабит Жаңабаев мәлімдеді.<blockquote>«Үйлестіру кеңесінің отырысында өңірге қажетті 100 мамандық бойынша аудандар мен Қызылорда қаласы әкімдіктерінің және тиісті мемлекеттік органдардың ұсынымдары ескеріліп, облыс әкімінің жоғары оқу орындарына гранттың бөлінісі бекітілді. Үміткерлерден қабылданған өтініштер бойынша 18-21 тамыз аралығында аудан, қала әкімдіктер жанынан құрылған арнайы комиссиялардың отырыстары өткізілді. Арнайы комиссиялардың шешімімен жалпы бөлінген 100 гранттың 97-сі тағайындалды», - деді Ғабит Жұмабекұлы.</blockquote>Атап айтсақ, Қорқыт ата атындағы Қызылорда университетіне 78, С.Ж. Асфендияров атындағы Қазақ Ұлттық медицина университетіне 15, «Нұр-Мүбарак» Египет ислам мәдениеті университетіне 3, Т. Жүргенов атындағы өнер академиясына – 1 грант тағайындалды. Сондай-ақ, Қорқыт ата атындағы Қызылорда университетінің хореография, шет тілі, әлеуметтік жұмыс мамандықтарына бөлінген 3 гранттың 1-уінен өтініш беруші өзі еркімен оқудан бас тартқан. Ал, 2 мамандық бойынша қосымша зерделеу нәтижесінде отбасының табысы белгіленген критерийден асып кетуіне байланысты тағайындаудан бас тартылған.

Қызылорда облысы әкімінің білім гранты иегерлері анықталды

<a href="https://kyzylorda-news.kz/">Kyzylorda-news.kz.</a> Жаңадан салынатын мектептердің барлығында лифті болады. Бұл туралы Оқу-ағарту министрлігі Қаржы және бюджеттік жоспарлау департаментінің директоры Ғалымжан Молдаш айтты.<blockquote>«Денсаулық сақтау министрлігінің мәліметінше, өкінішке орай соңғы жылдары оқушылар арасында сколиоз 2 есеге артты. Оның себебінің бірі - оқушылардың бойы мен жас ерекшеліктерін ескермей мектеп жиһазына отырғызу. Сондықтан мектеп жиһаздары жылжымалы және оқу процесінің нақты мақсаттары мен міндеттеріне бейімделуі тиіс. «Жайлы мектеп» ұлттық жобасы аясында жиһаздарға басты назар аударылды. Сонымен қатар балаларға физикалық жүктемені азайту және ыңғайлы болуы үшін оқу құралдары ауыстырылып, киім сақтауға арналған жеке шкафтар барлық мектепте қарастырылатын болады. Жайлы мектептің әрбір қабатында ауыз су бұрқақтары орнатылады» деді ол Білім саласы қызметкерлерінің республикалық тамыз кеңесінде.</blockquote>Сонымен қатар ол ерекше қажеттілігі бар балаларға жағдай жасау үшін әрбір мектеп пандус және көтергіштермен, лифтілермен, санитарлық тораптармен жабдықталатынын айтады.<blockquote>«Қазіргі уақытта мектептердің бірде-бірінде лифті жоқ. Сондықтан енді салынатын барлық мектеп балаларға жағдай жасау үшін лифтілермен, құрылғылармен міндетті түрде жабдықталады. Ұлттық жобаны іске асыруға 30-дан астам мемлекеттік орган мен ұйымдар жұмылдырылған. Олардың әрқайсысының рөлі мен жауапкершілігі айқындалған. Оқу-ағарту министрлігінің рөлі – ұлттық жобаны сапалы іске асыруда әдіснамалық сүйемелдеу және бақылау. Мектептерді сапалы салу және оларды уақытында пайдалануға беру жауапкершілігі «Samruk-Kazyna Construction» мен өңір әкімдіктеріне жүктелген» деді Ғалымжан Молдаш.</blockquote>

Жайлы мектептердің барлығында лифті болады

<a href="https://kyzylorda-news.kz/">Kyzylorda-news.kz.</a> Білім беру маусымы басталуға жақын. Сол себепті білім ұйымдарында да жылу беру маусымына дайындық басталды. Қыстан қысылмай шығуға жауапты мамандар қам-қарекет жасауда. Бұл туралы Өңірлік коммуникациялар қызметінің баспасөз алаңында облыстық энергетика және тұрғын үй-коммуналдық шаруашылық басқарма басшысының орынбасары Ерлан Жоламанов айтты.<blockquote>«Облыс бойынша алдағы жылу беру маусымына дайындық жұмыстары бекітілген іс-шара жоспарына сәйкес жүргізілуде. Облыста 1067 әлеуметтік нысан бар, оның ішінде 532 білім беру нысаны. Білім беру нысандарының жылу беру маусымына дайындығы 95% пайызды құрайды. Биыл 12 қазандықты жаңғырту жұмыстары жүргізілуде. Оның ішінде, 11 білім беру нысанының қазандығы сыртқа шығарылады», - деді Ерлан Ералыұлы.</blockquote>Жалпы, 532 мемлекеттік білім беру ұйымының 77-сі жылумен қамтамасыз ету бойынша орталықтандырылған, автономды газ – 100, автономды сұйық отын – 199, автономды қатты отын – 124. &nbsp;Биыл жылу маусымын толық қамтуға білім саласына 3,8 миллиард теңге қаржы бөлінген. Оның 1,8 миллиард теңгесі қаңтар-сәуір айларында жұмсалды.&nbsp;<blockquote>«Жылу маусымының екінші кезеңіне 11097 тонна қатты және 7676 тонна сұйық отын қажет. Бүгінгі күні барлық білім беру мекемелерімен қатты және сұйық отынды жеткізу бойынша келісімшарттар жасалған. Қатты отын тамыз айынан бастап бекітілген кесте бойынша жеткізілуде. Ал, сұйық отын білім беру нысандарының резервуарларының көлеміне сәйкес бекітілген кесте бойынша жеткізілетін болады. Одан бөлек, жылу маусымына дайындық жұмыстарын жүргізуге 216,1 миллион теңгеге қосымша қаржы бөлінді», - деді облыстық білім басқармасының бөлім басшысы Бақыт Дүйсенов.</blockquote><img src="https://knadmin.beoblood.kz/uploads/Bezymyannyj_f0102dd9b9.jpg" alt="Безымянный.jpg">

Қызылордада білім ұйымдары жылу беру маусымына дайын

<a href="https://kyzylorda-news.kz/">Kyzylorda-news.kz.</a> Педагог қызметкерлердің дәстүрлі тамыз кеңесі аясында Қызылорда қаласындағы NIS-те өңірлік пәндік секциялар өтті.&nbsp;Шараға аймақтағы мектепке дейінгі және орта білім беру ұйымдарының ұстаздары қатысып, «Пәндік құзыреттілік – мұғалімнің кәсібилігін анықтайтын фактор» тақырыбында біліктіліктерін арттырды. &nbsp;Жаңа оқу жылы қарсаңында ұстаздардың басын қосқан шара әдістемелік өнімдер көрмесінен бастау алды. Қатысушылар әріптес-ұстаздарының жүргізген зерттеу жұмыстарының нәтижелерімен танысып, білім беру үдерісіндегі проблемалардың шешу жолдары туралы ақпарат алды. Қызылорда облысының Арал ауданындағы Ж.Абдрашев атындағы №62 мектеп-лицейінің бастауыш сынып мұғалімі Гүлсара Баймаханованың айтуынша, ақпараттық технологиялардың дамуы оқушылардың &nbsp;жазу дағдысының төмендеуіне сеп болуда. Әсіресе оқушылар қатесіз, біркелкі, &nbsp;үзбей &nbsp;жазуға назар аудармайды. Осы мәселені шешуде Гүлсара Баймаханова әріптестерімен бірге зерттеу жүргізіп, каллиграфиялық жазу техникасын сақтаудың тиімді жолын ұсынды. &nbsp;Пәндік практикумдар мен шеберлік сабақтар фестивалінде қатысушылар Педагогикалық шеберлік орталығының мамандары мен Зияткерлік мектеп ұстаздарының &nbsp;және өңірдегі жетекші мектеп мұғалімдерінің &nbsp;озық тәжірибесімен танысып, сабақта тиімді іс-әрекетті ұйымдастыру бойынша біліктіліктерін арттырды. Сонымен қатар мұғалімдер оқытудың үздік әдіс-тәсілдерін &nbsp;меңгеріп, жаңа оқу жылын ұйымдастыру және т.б. мәселелер бойынша әдістемелік көмек алды.

Тамыз кеңесі: Қызылордада 500-ге жуық педагог әдістемелік көмек алды

<a href="https://kyzylorda-news.kz/">Kyzylorda-news.kz.</a> Қызылорда облысында жаңа оқу жылында 180 мың оқушы білім алады деп жоспарлануда. Бірінші сыныпқа - 17 543 бала қабылданды. Педагогтар саны – 23 086. Бұл туралы Қызылорда облысының Өңірлік коммуникациялар қызметінің ақпараттық алаңында өткен баспасөз конференциясында облыстық білім басқармасы басшысының міндетін атқарушы Бағдат Бердаулетов мәлімдеді.&nbsp;<blockquote>«Бүгінде барлық білім беру ұйымдары қажетті санитарлық-гигиеналық заттармен қамтамасыз етілді. Оқулық және оқу-әдістемелік кешендерге жергілікті бюджеттен 1,2 млрд.тг. бөлініп, &nbsp;412 029 дана оқулық алынды. Бұған қоса, 25 тамызға дейін тасымалдау-тарату жұмыстары толық аяқталады. Мектептер толықтай интернет желісімен қамтамасыз етілді. Осы жылдың қаңтар айынан 1-4 сыныпта оқитын 70 173 және әлеуметтік осал отбасыдан шыққан 5-11 сыныптағы 16 777 оқушы тегін ыстық тамақпен қамтылды. Бұл жұмыстар жаңа оқу жылында да жалғасады», - деді Бағдат Камбозұлы.&nbsp;</blockquote><blockquote>«Департамент қызметкерлері білім ұйымдарының жаңа оқу жылына дайындығын тексеру мақсатында мониторинг жүргізді. Нақтырақ айтқанда, күрделі және ағымдағы жөндеу жұмыстары, турникеттер мен дабыл түймелерінің болуы, спорт залдарының, асхананың және жаңа модификацияланған пән кабинеттерінің болуы қадағаланды. Мониторинг қорытындысы білім басқармасына жолданып, тиісті ұсыныстар берілді», - деді Қызылорда облысы бойынша Білім саласында сапаны қамтамасыз ету департаментінің басшысы Ғалия Даулетова.</blockquote>

Қызылорда: Мектептер жаңа оқу жылына дайын

<a href="https://kyzylorda-news.kz/">Kyzylorda-news.kz.</a> Қызылорда облысында жаңа оқу жылы қарсаңында көмекке мұқтаж 37 087 баланы бір реттік қаржылай көмекпен қамтамасыз ету үшін жергілікті бюджеттен 1,3 млрд. теңге бөлінген. Сондай-ақ «Мектепке жол» акциясы аясында демеушілер тарапынан да көмектер берілуде. Бұл туралы Қызылорда облысының Өңірлік коммуникациялар қызметінің ақпараттық алаңында өткен баспасөз конференциясында облыстық білім басқармасы басшысының міндетін атқарушы Бағдат Бердаулетов баяндады.&nbsp;<blockquote>«Науқан аясында 1754 бала қаржылай, 3 156 балаға оқу құралдары, 485 балаға мектеп формасы, 196 балаға аяқ киім алынды. «Самұрық-Қазына» Қорының бастамасымен 1 сыныпқа баратын 1830 оқушыға рюкзак пен кеңсе заттары табысталды. Мұнан өзге, &nbsp;«Ел-арай» Қорымен 500-ден астам балаға көмек көрсету жоспарлануда.Бүгінде жеке мектептердің аз қамтылған отбасынан шыққан 2000- нан астам баланың мәселесін шешу қарастырылуда», - деді Бағдат Камбозұлы.</blockquote>

Қызылордада 37 мыңнан астам балаға бір реттік қаржылай көмек көрсетілді

<a href="https://kyzylorda-news.kz/">Kyzylorda-news.kz.</a> 1 қыркүйектен бастап бастауыш сыныптағы барлық оқушыға тегін ыстық тамақ беріледі. Бұл туралы Оқу-ағарту министрі Ғани Бейсембаев Мемлекет басшысына жаңа оқу жылына дайындық жұмыстары туралы баяндау кезінде айтты, деп хабарлайды <a href="https://www.inform.kz/kz/zhana-oku-zhyly-karsanynda-kanday-ozgerister-boldy_a4102736">ҚазАқпарат</a>.<blockquote>«Қазір мектеп алдындағы даярлыққа байланысты тиісті жұмыстар іске асырылып жатыр. Бірінші кезекте тәрбиешілердің еңбекақысы 30 пайызға көтеріліп жатыр. 1 қыркүйектен бастап балабақшаға баратын аз қамтылған отбасылардағы 97 мыңнан астам бала тегін тамақпен қамтамасыз етіледі. Балабақшада 30 мың орын ашылып отыр және жылдың аяғына дейін тағы да 51 мың орын ашу жоспарланған. Қазіргі кезде балалардың 89 пайызы (2-ден 6 жасқа дейінгі) қамтылған. Сонымен қатар жылдың соңына дейін кезектілік мәселесі бойынша бірыңғай база іске қосылады», - деді Ғ. Бейсембаев.</blockquote>Оның айтуынша, жергілікті бюджет қаражаты есебінен аз қамтылған отбасылардағы оқушылар 100% мектеп формасымен және кеңсе тауарларымен қамтамасыз етіледі. Биыл жалпыға бірдей білім беру қоры 65 млрд теңгеден астам соманы құрады. Осы орайда 460 мың оқушыға материалдық көмек беру жоспарланған.<blockquote>«1 қыркүйектен бастап 1,4 млн бала (бастауыш сыныптардағы) тегін ыстық тамақпен қамтамасыз етіледі. 1 қыркүйекке дейін барлық білім беру мекемесі жедел басқару орталығына, лицензияланған күзетке, дабыл жүйесіне қосылуы мәселесі толыққанды жүйелі түрде шешіліп отыр. Мектептердің 65 пайызы модернизациядан өтті. Осыған дейін 1 мың пәндік кабинеттер ашу жоспарланса, оның орнына 1700 кабинет ашылады», - деді министр.</blockquote>Оның сөзіне қарағанда, жыл соңына дейін 154 мектеп пайдалануға беріледі. Мұнымен қоса, 260 мектепте күрделі жөндеумен қамтылған. Соның арасында 194-і жаңа оқу жылына дейін тапсырылады.Ведомство басшысы биыл колледж студенттерінің шәкіртақысы 50 пайызға өсіп жатқанын атап өтті.

Жаңа оқу жылы қарсаңында қандай өзгерістер болды

<a href="https://kyzylorda-news.kz/">Kyzylorda-news.kz.</a> 2023 жылғы қаңтар-шілде аралығында 13 589 орынға арналған жалпы білім беретін 24 мектеп, сондай-ақ 1458 орынға есептелеген мектепке дейінгі 19 ұйым пайдалануға берілді.Бұл туралы ҚР Ұлттық статистика бюросы хабарлайды.Бюро мәліметтеріне қарағанда, пайдалануға берілген мектептердің ішінде 12 мектеп пен мектепке дейінгі 14 мекеме ауылды жерлерде орналасқан.Айта кету керек, 6 мектеп мемлекеттік кәсіпорындар мен ұйымдар есебінен, қалған 18-і жекеменшік кәсіпорындар тарапынан пайдалануға берілген.Жоғарыда аталған уақыт аралығында пайдалануға берілген жалпы білім беретін мектептердің көпшілігі Түркістан облысында – 11, Жетісу облысында – 3, Атырау және Жамбыл облыстары мен Алматы және Шымкент қалаларында 2 мектептен. Астана қаласы және Ақтөбе облысында бір-бірден.Салыстырып өтсек, былтырғы алғашқы жеті ай ішінде 3 000 орындық жалпы білім беретін 13 мектеп пен 1600 орындық мектепке дейінгі 13 мекеме пайдалануға берілген.

Биыл елде қанша мектеп пайдалануға берілді

Аралдағы білім беру ұйымдары жаңа оқу жылына дайын 

<a href="https://kyzylorda-news.kz/">Kyzylorda-news.kz.</a> Белгіленген уақытта мектеп құжаттарын тапсырып үлгермеген жағдайда ата-ана не істеу керек? Бұл сауалға Астана қаласы білім басқармасының басшысы Қасымхан Сенғазиев жауап берді.<blockquote>«Құжаттарды қабылдау 1 сәуір мен 1 тамыз аралығында жүрді. Дегенмен біз түсінеміз, әртүрлі себеппен үлгермей қалған ата-аналар бар. Құжаттар тапсыруда кешіккен ата-аналармен мектептер жанынан комиссия жұмыс істеп жатыр. Құжаттарды қағаз түрінде мектепке барып тапсыруға болады», - деді Қасымхан Сенғазиев Астана қаласы коммуникациялар қызметі алаңында өткен баспасөз мәслихатында.</blockquote>Оның айтуынша, құжаттар «электрондық үкімет» <a href="https://www.inform.kz/kz/www.egov.kz">веб-порталы</a> арқылы қабылданды.Еске сала кетейік, бірінші сыныпқа құжаттарды қабылдау <a href="https://www.inform.kz/kz/birinshi-synypka-kuzhattardy-kabyldau-1-tamyzda-ayaktalady_a3960618">1 тамызда</a> аяқталды.Оқу-ағарту министрлігінің мәліметінше, биыл бірінші сыныпқа қабылдау бойынша 400 мыңнан астам өтініш түсті.Биыл мектепке баратын балалардың 70 пайызы қазақ тілінде білім алуды таңдаған. Қалғандары орыс, ұйғыр және тәжік тілдерінде оқиды.

Қазақстан және Қызылорда облысының жаңалықтары: Білім