<a href="https://kyzylorda-news.kz/">Kyzylorda-news.kz</a>. Наурыз мерекесі қарсаңында Қазақстан Республикасы Президентінің Жарлығымен елдің әлеуметтік-экономикалық және мәдени дамуына қосқан елеулі үлесі, белсенді қоғамдық қызметі, азаматтарды қорғауда және құтқаруда көрсеткен жеке жанқиярлығы, қоғамдық тәртіпті қамтамасыз етуге көрсеткен көмегі үшін еліміздің бір топ азаматы&nbsp;мемлекеттік наградалармен марапатталды. Олардың қатарында өндіріс, денсаулық сақтау салаларының қызметкерлері, бизнес өкілдері, мәдениет және ғылым қайраткерлері, спортшылар, волонтерлер бар. Бұл туралы Ақорданың ресми сайты хабарлады.
«Қазақстанның Еңбек Ері» атағы Қазақстан Республикасының әлеуметтік-гуманитарлық дамуындағы аса үздік жетістіктері үшін жазушы Илья Жақановқа, еліміздің денсаулық сақтау саласын дамытудағы аса үздік жетістіктері үшін Қазақ тағамтану академиясының президенті Төрегелді Шармановқа берілді.
«Отан» орденімен ақын Нұржан Светқали; І дәрежелі «Барыс» орденімен Л.Гумилев атындағы Еуразия ұлттық университетінің профессоры Жандарбек Мәлібекұлы, ақын Нұрлан Оразалин; ІІІ дәрежелі «Барыс» орденімен Алматы облысы Ардагерлер кеңесінің төрағасы Ермек Келемсейіт, Алматы қаласы Қазақстан халқы Ассамблеясы Қоғамдық келісім кеңесінің төрағасы Ахметжан Шардинов, Күрес федерациясының президенті Дәулет Тұрлыханов, әл-Фараби атындағы Қазақ ұлттық университетінің ректоры Жансейіт Түймебаев, Л.Гумилев атындағы Еуразия ұлттық университетінің проректоры Дихан Қамзабекұлы, Алматы облысы әкімінің бірінші орынбасары Ләззат Тұрлашов және басқалар наградталды.
«Парасат» орденімен мәдениет, ғылым және білім қайраткерлері, бұқаралық ақпарат құралдарының өкілдері марапатталды. Олардың қатарында Ұлттық ғылым академиясының мүшесі Кәрімбек Кұрманәлиев, М.Қозыбаев атындағы Солтүстік Қазақстан университетінің аға оқытушысы Павел Афанасьев, Парламент Мәжілісінің депутаттары Берік Әбдіғалиұлы, Еділ Жаңбыршин бар.
Спортты дамыту дирекциясы пауэрлифтинг командасының жетекшісі Сергей Цырульников ІІ дәрежелі «Достық» орденімен марапатталды.
«Құрмет» орденімен саясаттанушы Данияр Әшімбаев, Қолданбалы этносаяси зерттеулер институтының директоры Талғат Қалиев, Адам құқықтары үшін хартияның атқарушы директоры Жеміс Тұрмағамбетова, Тараз қалалық көпбейінді ауруханасының бөлім меңгерушісі Ернар Еділбаев, белсенді Орынбасар Сейітов, «Мир Евразии» қорының президенті Эдуард Полетаев, Шымкент қаласы Ауған соғысы ардагерлері одағының төрағасы Ғалымжан Майханов, қоғам қайраткері Дәурен Тәліпов, жыршы Арғын Бисенов, Қ.Оспанов атындағы №1 балалар-жасөспірімдер спорт мектебінің басшысы Нұржан Ермағамбетов, Алматы қалалық №7 клиникалық ауруханасының бөлім меңгерушісі Есенай Еспенбетов наградталды. &nbsp;«Құрмет» орденіне жалпы 94 адам ие болды.
«Ерен еңбегі үшін» медалімен «Адырна» қорының президенті Арман Әубәкір, Павлодар облысы аумақтық кәсіподақтар бірлестігінің баспасөз хатшысы Константин Музалевский, Қазақ ұлттық өнер университетінің аға оқытушысы Ұларбек Нұрғалым марапатталды. Осы медальмен барлығы 25 адам наградталды. «Шапағат» медаліне 68 волонтер, меценат және басқа да азаматтар ие болды. Олардың қатарында журналист Александра Мыскина, «Үміт-Надежда» мүгедектер ұйымының төрағасы Дүйсенғали Оспанов, «Океан» ПИК жұмыскері Арлан Мүтішев, «Paybox.money» ЖШС департамент директоры Мария Чечина, Р.Байсейітов атындағы Семей қаржы-экономикалық колледжінің студенті Мерейбек Мағабилов, «Богатырь-Көмір» ЖШС жол машиналарын реттеуші Евгений Шарифуллин, волонтер Айгерім Досқалиева бар.

Еліміздің бірқатар азаматы мемлекеттік наградалармен марапатталды

<a href="https://kyzylorda-news.kz/">Kyzylorda-news.kz</a>. 18 наурыз күні Қазақстанның басым бөлігінде жауын-шашынды болады, деп хабарлайды Қазгидромет.
Оңтүстіктің таулы аудандарында жаңбыр, қар жауады. Республиканың тек солтүстігінде ашық күн райы қалыптасады. Ел бойынша желдің күшеюі, тұман, көктайғақ, жаяу бұрқасын болжанады. Оңтүстікте сондай-ақ найзағай күтіледі.
Қызылорда облысының&nbsp;солтүстігінде – тұман, орталығында 15-20 м/с жылдамдықта жел болады. Түнде облыстың оңтүстігінде көктайғақ күтіледі.

18 наурызға арналған ауа райы болжамы

Kyzylorda-news.kz. Кеше Президент Қасым-Жомарт Тоқаев «Жаңа Қазақстан: Жаңару мен жаңғыру жолы» атты Жолдауында негізгі басым бағыттарды нақтылап берді. Саяси жүйені модернизациялауға бағытталған Мемлекет басшысының тапсырмаларын іске асыру аясында бүгін облыс әкімі Гүлшара Әбдіқалықованың төрағалығымен актив жиыны өтті.
Аймақ басшысы алдағы уақытта жүзеге асырылатын саяси реформалардың жаңа бағдарламасының маңызды екенін айтып, ерекшеліктеріне тоқталды. Облыс экономикасының дамуына оң әсерін тигізетін саяси құжатта айтылған міндеттерді жүзеге асыру үшін бірлескен жұмыстардың қажет екенін алға тартты.
<blockquote>
 Мемлекет басшысы Парламенттің рөлін көтеру, партиялық жүйені дамыту мүмкіндіктерін кеңейту, сайлау процесін бойынша нақты тапсырмаларды міндеттеді. Біздің аймақта биыл 22 ауылдық округ әкімінің сайлау науқаны ұйымдастырылады. Оның ішінде 27 наурызда 3 ауылдық округ әкімі сайланады. 
 Президент алдағы уақытта елімізде жаңадан 3 облыстың құрылатынын айтты. Жолымыз түйісетін Жезқазған қаласы енді Ұлытау облысының орталығы болса, Сыр өңіріне де экономикалық жағынан оңтайлы болады деп санаймын. Осы ретте келесі айда басталатын «Қызылорда-Жезқазған» тас жолының құрылысы жаңа мүмкіндіктерге жол ашады деп санаймын. 
 Біздің алдымызда өңіріміздің дамуы үшін дағдарысқа қарсы кезек күттірмейтін шараларды шешудің тиімді тетіктерін қарастырып, жүзеге асыру міндеті тұр. Оның ішінде азық-түлік қауіпсіздігін қамтамасыз ету мен көктемгі егін егу жұмыстарын жүйелі жүргізуіміз қажет, – деді Гүлшара Әбдіқалықова.
</blockquote>
<img src="https://kyzylorda-news.kz/wp-content/uploads/2022/03/img-20220317-wa0068.jpg" alt="" />
Облыс әкімі жиын барысында орынбасары Бахыт Жахановқа азық-түлік тауарлары бағасының шарықтауына, оның ішінде қант бағасының спекулятивті өсуіне байланысты барлық делдалдық схема аясында тексеру жүргізуді жүктеді. Сондай-ақ, көктемгі дала жұмыстары мен егін егуге қатысатын ауыл шаруашылығы техникаларының дайындығын, қажетті тұқыммен, минералды тыңайтқыштармен, жанар-жағармаймен қамтамасыз ету, су алу науқанына дейін су тартатын насос қондырғыларын алу жұмыстарын пысықтауды тапсырды.
Тағы бір міндет – БАҚ әлеуетін көтеру. Өңір басшысы осы салаға жетекшілік ететін орынбасары Қайрат Нұртайға журналистер арқылы өңір тарапынан салалық министрлікке БАҚ туралы Заңға өзгеріс енгізуге ұсыныс жолдауды тапсырды. Сондай-ақ, облыстағы азаматтық қоғамды дамыту үшін жүйелі және кешенді жұмыс жоспарын әзірлеп, мемлекеттік этносаясатты жетілдіру мақсатында қоғамдық құрлымдардың қызметін өзектендіруді жүктеді. 
Жиында облыстық мәслихат хатшысы Наурызбай Байқадамов жергілікті мәслихаттардың рөлін күшейту, қоғам ішінде саяси мәдениеттің қалыптасуына негіз болатын сарапшылық көзқарастағы азаматтармен бірлескен шараларды іске асырудың өзекті екеніне тоқталды.
<img src="https://kyzylorda-news.kz/wp-content/uploads/2022/03/img-20220317-wa0071.jpg" alt="" />
Ал, облыстық мәслихат депутаты, «Сыр медиа» ЖШС Бас директоры Аманжол Оңғарбаев БАҚ-тың бәсекеге қабілеттілігін арттыруда журналист мәртебесін көтеру, медиаөнімдердің сапалық құрамына талдау жасау жұмыстарын жетілдіру бағытында ұсынысын ортаға салды. 
Сондай-ақ, «Dalatex» ЖШС директоры, меценат Дінмұхамед Абизов мемлекет пен бизнес, мемлекет пен халық арасында конструктивті диалог орнатудың оңтайлы әдістеріне көңіл бөлудің қажеттілігін қаперге салды. Ал, неміс этномәдени бірлестігінің белсендісі Светлана Крюгер өңір дамуына тың серпін беретін бастамаларды бірлікпен атқаруға әрбір азаматтың белсенділігі керек екендігін тілге тиек етті. Қорқыт Ата атындағы Қызылорда университетінің проректоры Жандос Базартай жастар үшін нақты іске негізделген жобаларды елмен етене араласуға сеп болатын алаңдарда талқылаудың маңызы зор екенін жеткізді.
<img src="https://kyzylorda-news.kz/wp-content/uploads/2022/03/img-20220317-wa0105.jpg" alt="" />
Актив отырысының соңында Гүлшара Әбдіқалықова Жолдауда жүктеген міндеттерді сарапшылық ортада талқылап, сындарлы диалог орнатуға шақырды. Сондай-ақ, Президент тапсырмаларын сапалы әрі нәтижелі жүзеге асыруда әрбір азаматтың жауапкершілігі Жаңа Қазақстанның жаңғыруға жол ашатынын еске салды.
<img src="https://kyzylorda-news.kz/wp-content/uploads/2022/03/img-20220317-wa0069.jpg" alt="" />

Облыс активі: Азаматтық жауапкершілік жаңғыру жолына жетелейді

<a href="https://kyzylorda-news.kz/">Kyzylorda-news.kz</a>. Алдағы наурыз мерекесінде облыстағы коммуналдық қызметтер үздіксіз жұмыс істейтін болады. Бүгін Өңірлік коммуникациялар қызметінде өткен брифингте коммуналдық қызметтің жауапты өкілдері демалыс күндердегі жұмыс жоспарларымен бөлісті.
<blockquote>
 «Облыс тұрғындарын алдағы мереке күндері үздіксіз және авариясыз табиғи газбен қамтамасыз ету үшін тәуліктік кезекшілік ұйымдастырылды. Барлық кәсіпорындар штаттық режимде жұмыс істейді. Электр энергиясы мен ауыз су үздіксіз берілуі облыстық штабтың тұрақты бақылауында. Сонымен қатар қала тұрғындарын ауыз сумен Қызылжарма және жер асты су кені арқылы қамтылады», – деді облыстық энергетика және тұрғын үй коммуналдық шаруашылық басқармасы басшысының міндетін атқарушы Берік Сәрменбаев.
 «Алдағы мереке күндеріне орай біздің мекемеде арнайы кесте бекітілді. Қала бойынша электр энергиясы – 50 МГв берілсе, жылу энергиясы 60-65 градус шамасында болады. Сондай-ақ, қала бойынша сегіз бөлімше 24 сағат бойы тоқтаусыз қызмет етеді», – деді «Қызылорда жылу электр орталығы» директоры Наурыз Сатханов.
 «Облыс тұрғындарын кедергісіз табиғи газбен жабдықтау мақсатында «Мереке күндерге қауіпсіздік шаралары» тәуліктік кезекшілік бекітілді. Егер үйіңізде газға байланысты мәселе туындаса 104 апаттық-диспетчерлік қызметі кез келген уақытта көмектесуге әзір», – деді «ҚазТрансГаз Аймақ» АҚ КӨФ апатты-диспетчерлік қызметінің басшысы Базарбек Ерімбетов.
 «Наурыз айының 19-25 аралығында жұмысшылар тобының кестесі бекітілді. Қала және аудандарда апаттық жедел шығу бригадасы құрылған», – деді «Қызылорда электр тарату тораптары» АҚ басқарма төрағасының өндіріс жөніндегі орынбасары Дінмұханбет Әбдіреев.
</blockquote>

Қызылордада мереке күндері коммуналдық қызметтер үздіксіз жұмыс істейді

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова әнші, халықаралық байқаулардың лауреаты Жұмабек Қаңтарбаевтың «Сыр еліне тағзым» атты ән кеші аясында Сыр еліне келген белгілі опера әншісі, Қазақстанның еңбек сіңірген әртісі, Шымкент опера және балет театрының директоры Майра Мұхамедқызымен кездесті.
Басқосу барысында өңірлер арасындағы мәдени байланысты арттыру және өнер саласында шығармашылық туындыларды насихаттау бағытында бірлескен жобалар туралы пікірлесті.
Өнер қайраткері бірлесіп жұмыс жасауға қызығушылық білдіріп, ізгілік пен парасаттылықтың үлгісі атанған Домалақ ана образын ашатын жаңа опера туындысын Сыр елінде қою туралы ұсыныс жасады.
Аймақ басшысы Майра Мұхамедқызының шығармашылығын аса жоғары бағалайтынын атап өтті және Қазақстанның алғашқы мәдени астанасы Қызылорда қаласында сахналық өнерді одан сайын дамытуға арналған игі бастамаларды әрқашан қолдайтынын жеткізді.
Айта кетейік, Жұмабек Қаңтарбаевтың «Сыр еліне тағзым» атты ән кеші ертең, яғни 18 наурыз күні сағат 19.00-де Н.Бекежанов атындағы қазақ академиялық драма театрында өткізіледі.
<img src="https://kyzylorda-news.kz/wp-content/uploads/2022/03/akim2.jpeg" alt="" />

Гүлшара Әбдіқалықова опера әншісі Майра Мұхамедқызымен кездесті

<a href="https://kyzylorda-news.kz/">Kyzylorda-news.kz</a>.&nbsp;Мемлекет басшысы Қасым-Жомарт Тоқаев Ақорда резиденциясында облыстардың және Нұр-Сұлтан, Алматы, Шымкент қалаларының әкімдерімен кеңес өткізді.
Жиын барысында өңірлердің әлеуметтік-экономикалық дамуына қатысты өзекті мәселелер талқыланды. 
Президент Үкімет пен әкімдерге әлеуметтік-экономикалық мәселелерді жедел шешу және халықтың әл-ауқатын арттыру жөнінде шаралар кешенін қабылдауды тапсырды.
Қасым-Жомарт Тоқаев Жаңа Қазақстанды құру стратегиясы аясында саяси реформалардың кезекті топтамасын іске асыру бойынша бірқатар міндет жүктеді.
Атап айтқанда, әкімдер азаматтармен жұмыс істеу тәртібін қайта қарауы керек, сондай-ақ аудан және ауыл тұрғындарымен жиі кездесіп, оларды мазалаған мәселелерді шешуі, қоғам сенімін арттыруы қажет. Үкімет пен әкімдіктерге жұмыссыздық деңгейін төмендету, кәсіпкерлікті дамыту, жаңа жұмыс орындарын ашу жөнінде жүйелі шаралар қабылдауға тапсырма берілді.
Кеңес қорытындысы бойынша Мемлекет басшысы облыстардың және республикалық маңызы бар қалалардың әкімдеріне бүгінгі Қазақстан халқына арналған Жолдауда жүктелген міндеттерді сапалы жүзеге асыру жөнінде тапсырма берді.
<img src="https://kyzylorda-news.kz/wp-content/uploads/2022/03/prezident1.jpg" alt="" />

Мемлекет басшысы әкімдерге қандай міндет жүктеді?

<a href="https://kyzylorda-news.kz/">Kyzylorda-news.kz</a>.&nbsp;17 наурыз күні Қазақстанның басым бөлігінде жауын-шашын болады, деп хабарлайды Қазгидромет.
Оңтүстікте жаңбыр жауады. Мұндағы таулы аудандарда қатты жауын-шашын күтіледі.
Республиканың тек солтүстігінде ашық күн райы болжанады. Елдің барлық аумағында екпінді жел, тұман, көктайғақ, жаяу бұрқасын, оңтүстікте найзағай күтіледі.
Қызылорда облысының&nbsp;солтүстігінде, орталығында көктайғақ болады, жел 15-20 м/с күшейеді.

17 наурызға арналған ауа райы болжамы

<a href="https://kyzylorda-news.kz/">Kyzylorda-news.kz</a>. Президент Қ.Тоқаевтың наурыз айында халыққа Жолдауы болатыны жайындағы хабарды естігелі осы күнді асыға күткеніміз рас.&nbsp; Міне, бүгін бұған да куә болдық және демімізді ішке тарта отырып, бастан аяқ тыңдадық. Тыңдадық та, риза болдық. Әрине, осы шара болады дегеннен бері әлемжеліде талай сарапшылардың да, қарапайым халықтың да алуан түрлі пікірлерімен таныс болғанбыз. Бүгінгі Жолдаудағы ұсыныстар осы пікірлердің ең өзіктілерін қамтыған, әсіресе Президенттің өзі атаған «Жаңа Қазақстанды» құру жолындағы ең қажетті деген бірсыпыра мәселелерді шешуге бағытталған, халықтың қолдауына лайық Бағдарлама болды десек артық айтқандық емес.
Соның ішінде, Президенттен бастап ең жоғары лауазымды мемлекеттік басшылардың партияға мүше болудан тыс болуы жөніндегі, елдегі сайлау жүйесін өзгерту, сайлауға партияға мүше емес азаматтардың да қатыса алуы туралы ұсыныстардың мәні зор деп ойлаймыз. Біздің ойымызша, бұл халықтың осы кезге дейінгі сайлауға деген өкпе-назын біршама тарқатуға септігін тигізері сөзсіз.
Сондай-ақ, сот жүйесін өзгерте отырып, бұл бағыттағы бұрынғы ата-бабаларымыздан қалған мұралардың жақсы жақтарын пайдалану жөніндегі пікіріне, соттардың, тергеу огандарының, полицияның халыққа барынша жақын болуы туралы айтылғандарға қосылмасқа болмайды.
Қазақстанды жаңарту жолындағы ең маңызды жұмыс БАҚ-қа байланысты екені, сондықтан тілшілердің ешкімге тәуелді болмай жұмыс жасауы қажеттігі, бұлардан да басқа бүгіннен бастап алда орындалуға тиісті көптеген мәселелер аталып, ұсыныстар мен тапсырмалар берілді.
Әсіресе, халықты көптен мазалап келе жатырған маңызды мәселе – бұрынғы жойылып кеткен Семей облысын «Абай облысы» деп, Жезқазған облысын «Ұлытау облысы» деп қайта құру және Алматы облысын екіге бөліп, бірін «Жетісу облысы», орталығы –&nbsp; Талдықорған қаласы, екіншісін «Алматы облысы», орталығы – Қапшағай қаласы ету жөніндегі ұсыныс. Тіпті, Президент Қапшағай қаласының атын «Д.А.Қонаев» деп атауға халық қосылса, өзінің де қолдайтынын білдіруі өте орынды болды.Бұған бүкіл еліміз болып қолдау білдіруміз қажет деп ойлаймын.
Әрине, бұл Бағдарламалық ұсыныстардың бір күнде, бір мезетте орындала қалуы мүмкін емес. Алдымен, Қ.Кемелұлының өзі ескерткеніндей, Заңдарға тиісті өзгерістер мен толықтырулар енгізілуге тиіс. Оның үстіне, осындай белгілі бір көлемді мерзімді қамтитын іс-шараларға Қазақстан халқы жұдырықтай жұмылып, бір кісідей атсалыспаса, ішкі, сыртқы ойы бұзық жандардың жетегінде кетпей, әркім өзіне лайықты жұмыспен айналысып, нақты нәтижелерге жетуге тырыспаса, Президенттің бұл ұсыныстарының да, «Қазақстанды жаңаша құрудың» да мүмкін емес екені өзінен өзі түсінікті.
Құрметті ағайын, Сіздерді Президентіміз Қ.К.Тоқаевтың бізге арнаған Жолдауында айтылған ұсыныстар мен тапсырмаларын қабыл алып, оны орындау жолында бірлесе жұмыс жасауға шақырамын.Еліміз аман, жұртымыз тыныш болып, жақсылықтарға жете берейік!
Жеңіс Сәдуақасұлы,
Филология ғылымының докторы,
Қорқыт ата&nbsp;атындағы Қызылорда университетінің құрметті профессоры.

Жеңіс Сәдуақасұлы: Қолдауға лайық Жолдау

<a href="https://kyzylorda-news.kz/">Kyzylorda-news.kz</a>. Бүгін мемлекет басшысы Қасым-Жомарт Кемелұлы Тоқаев өз халқына Жолдау жасады. Тәуелсіз Қазақстанның азаматы ретінде біз отбасымызбен бұл саяси жаңалықты үлкен ықыласпен тыңдап шықтық. Артынша талқылап та үлгірдік. Елімізде орын алғалы тұрған үлкен өзгерістер көңілімізден шықты.
Президентіміздің айтуы бойынша біз ескі құндылықтарымызды сақтай отырып, жаңа бастамаларға бет бұрамыз. Мақсатымыз ұлттық болмысымызды, қазақтың қазақ болып қалыптасуы жолында еңбегі ерең тұлғаларымызды құрметтей отырып, ата-бабамыз аңсаған, армандаған тәуелсіз, бейбіт ел болу.
Жолдауда қозғалған көп мәселенің ішінде халыққа ең жақын болғаны Қазақстанда облыс орталықтарын көбейтіп, әлеуетін көтеру, оларға қазақылықтың иісі аңқып тұратын атау беру мәселесі деп ойлаймын. Себебі, бұл бүгінгі күнге дейін халық аузында жүрген, көптің қалауы еді.
Сонымен бірге мемлекет басшысы қаңтар оқиғасынан кейін ел тұтастығы мен тұрақтылығының басты приоритет екендігі айқындалғанын және осы жайт қайталанбауы үшін барын салатынын, әрқашан да елмен бірге екендігін айтып, көңілімізге жылулық ұялатты. Біз де бұл жолда аянып қалмай, еліміздің өсіп-өркендеуі жолында бар күш-жігерімізді қосамыз дегім келеді.
Мөлдір Жаңбырбай,
каратэ-додан Әлем чемпионы

Мөлдір Жаңбырбай: Дамудың даңғыл жолындамыз

<a href="https://kyzylorda-news.kz/">Kyzylorda-news.kz</a>.&nbsp; Президент Қасым-Жомарт Тоқаев Парламент палаталарының бірлескен отырысында Қазақстан халқына «Жаңа Қазақстан: Жаңару мен жаңғыру жолы» атты Жолдауын жасады, деп хабарлады Ақорда.
Президент жуық арада жүзеге асырылатын ауқымды саяси реформалар мен бірқатар әлеуметтік-экономикалық шараларды жариялады.
<img src="https://www.akorda.kz/public/assets/media/uploadMedia/1647418432_DSC_2634__2.jpg" alt="" />
Мемлекет басшысы қайғылы қаңтар оқиғасына баға берді. Оның пікірінше, осы ауқымды әрі жан-жақты жоспарланған операцияның мақсаты жоғары басшылықты биліктен тайдырып, халық пен әлемдік қоғамдастық алдындағы оның беделін түсіру болды.
Қасым-Жомарт Тоқаев Күштік құрылымдар мен олардың сыбайластарының өзара ымыраласуына қатысты іс бойынша тергеу құпия жағдайда қарқынды жүргізіліп жатқанын айтты. Бұған кінәлілер лауазымдары мен қоғамдағы орындарына қарамастан, лайықты жазасын алады.
<img src="https://www.akorda.kz/public/assets/media/uploadMedia/1647418432_DSC_2613_2.jpg" alt="" />
Саяси реформаларды жүзеге асыру аясында Қасым-Жомарт Тоқаев Президенттің өкілеттігін&nbsp; қайта қараудың маңызды екеніне тоқталды. Бұл ретте суперпрезиденттік жүйеден мықты Парламенті бар президенттік республикаға көшу мәселесіне назар аударды. Атап айтқанда, Мемлекет басшысының өз өкілеттігі кезінде партияға мүше болуын тоқтату міндетін заңнамалық тұрғыдан ресімдеуді, әкімдер мен олардың орынбасарларының партия филиалдарындағы қызметіне тыйым салуды ұсынды.
Сонымен қатар Қасым-Жомарт Тоқаев Президенттің жақын туыстарына қатысты норманы конституциялық тұрғыдан бекіту қажеттігін айтты. Олардың мемлекеттік саяси қызметші және квазимемлекеттік секторда басшы лауазымдарын иеленуіне заңнамалық тұрғыдан тыйым салынады.
<img src="https://www.akorda.kz/public/assets/media/uploadMedia/1647418432_KZ3_3241.jpg" alt="" />
Бұдан бөлек саяси реформаларда биліктің заң шығарушы саласына&nbsp; да қатысты мәселе қамтылады. Сенатты жасақтау тәртібі мен оның бірқатар қызметі қайта қаралады. Мемлекет басшысы Парламенттің жоғарғы палатасындағы президенттік квотаны 15-тен 10 депутатқа дейін қысқартуды ұсынды. Сондай-ақ Мәжілістегі Қазақстан халқы Ассамблеясының квотасы алынып, Сенатқа беріледі. Осы ретте олардың саны 9-дан 5 депутатқа қысқарады.
Саяси реформалар бағдарламасында сайлау жүйесін жетілдіру, сайлау үдерісін жаңғырту, партия жүйесін дамыту мүмкіндіктерін кеңейту мәселелері қарастырылған. Мәжілістің депутаттық корпусы аралас негізде құрылады. Яғни, парламентарийлердің 70 пайызы пропорционалды, 30 пайызы мажоритарлы тәртіппен сайланады. Партияларды тіркеу рәсімі айтарлықтай жеңілдетіледі. Оларды тіркеу шегін төрт есе, яғни 20 мыңнан 5 мыңға дейін төмендету ұсынылды.
<img src="https://www.akorda.kz/public/assets/media/uploadMedia/1647418432_KZ1_7905_2.jpg" alt="" />
Мемлекет басшысы құқық қорғау институттарын күшейтуге, бұқаралық ақпарат құралдарының бәсекеге қабілеттілігін арттыруға және азаматтық қоғам институттарының рөлін нығайтуға баса мән берді. Қасым-Жомарт Тоқаев Негізгі Заңның ережелерін мүлтіксіз орындауды қамтамасыз ету мақсатында Конституциялық сот құруды тапсырды. Сондай-ақ табысты қызмет атқарған Ұлттық қоғамдық сенім кеңесінің орнына Ұлттық Құрылтай құруды ұсынды.
Ауқымды саяси реформалар еліміздің әкімшілік-аумақтық құрылымын жетілдіруге де қатысты болмақ. Президент Абай және Ұлытау облыстарын құруды ұсынды. Бұл облыстардың орталықтары Семей және Жезқазған қалалары болады. Мемлекет басшысы Алматы облысын екіге бөлу жөніндегі шешімін айтты. Алматы облысының орталығы Қапшағай және Жетісу облысының орталығы Талдықорған қаласы болмақ. Егер жұртшылық Қапшағай қаласына Қонаевтың есімін беру туралы ұсыныс айтса, Президент бұл пікірді қолдайтынын жеткізді.
<img src="https://www.akorda.kz/public/assets/media/uploadMedia/1647418432_KZ3_3245.jpg" alt="" />
Президент Жолдауда әлеуметтік-экономикалық мәселелерді шешуге мән бере отырып, дағдарысқа қарсы жедел жүзеге асырылатын шараларға арнайы тоқталды. Соның ішінде ұлттық валютаның тұрақтылығын қамтамасыз етуге, мемлекеттің үлесі бар компаниялардың валюталық табысының экспорттық сатылымын ұлғайтуға, мемлекеттік аппараттың қызметіндегі бюрократияны жоюға да баса мән берілді.
Жалпы, Мемлекет басшысының Жолдауында айқындалған бастамалар еліміздің саяси жүйесін және әкімшілік-аумақтық құрылымын барынша өзгертуге бағытталған. Қасым-Жомарт Тоқаевтың айтуынша, аталған бастамаларды іске асыру үшін Конституцияға 30-дан астам өзгертулер енгізіледі.
<blockquote>
 – Қызметіме түрлі адамдардың беретін бағасынан гөрі, мемлекетімізді қорғап қалу – мен үшін аса маңызды міндет. Осы жолда жауапкершіліктің бәрін мойныма алуға дайынмын! – деп түйіндеді Мемлекет басшысы.
</blockquote>
<img src="https://www.akorda.kz/public/assets/media/uploadMedia/1647418432_KZ4_1789.jpg" alt="" />
<img src="https://www.akorda.kz/public/assets/media/uploadMedia/1647418432_KZ3_3095_2.jpg" alt="" />
<img src="https://www.akorda.kz/public/assets/media/uploadMedia/1647418432_KZ3_3402.jpg" alt="" />
<img src="https://www.akorda.kz/public/assets/media/uploadMedia/1647418432_KZ4_1967.jpg" alt="" />
<img src="https://www.akorda.kz/public/assets/media/uploadMedia/1647418432_KZ4_1806.jpg" alt="" />
<img src="https://www.akorda.kz/public/assets/media/uploadMedia/1647418432_DSC_2766_2.jpg" alt="" />

Қасым-Жомарт Тоқаев Қазақстан халқына Жолдауын жариялады

<a href="https://kyzylorda-news.kz/">Kyzylorda-news.kz</a>. Бірыңғай зейнетақы төлемдерін бұрынғы шарттарын пайдалану үшін 28-29 наурызға дейін enpf-otbasy.kz платформасына өтініш жіберу қажет. БЖЗҚ 31 наурызына дейін келіп түскен өтініштер бойынша 2021 жылға есептелген төменгі жеткіліктілік шегіне сәйкес біржолғы зейнетақы төлемдерін жүргізеді.
Бұл туралы Өңірлік коммуникациялар қызметінде өткен брифингте БЖЗҚ Қызылорда облысы филиалы директорының орынбасары Алмас Сәрсенбаев хабарлады.
<blockquote>
 «Жинақталған зейнетақының бір бөлігін пайдалану үшін Үкіметпен белгіленген әдістемеге сәйкес ең төменгі шегінен асу керек. 15 айдың қорытындысымен республика бойынша 1 млн 457 мыңнан астам өтінім келіп түсті. Оның 925 мыңға жуығы әртүрлі мақсатпен зейнетақы қорындағы қаржысының бір бөлігін пайдаланды. Ал облыста 29 600 өтінім түссе, 22 мыңнан аса өтініш қанағаттандырылды. Зейнетақы жинақтарының бір бөлігін пайдалану үшін азаматтар өз қорларындағы жинақтарын тексеріп, БЖЗҚ-дағы жеке зейнетақы шотында алуға болатын соманың бар екеніне көз жеткізулері тиіс», – деді Алмас Сәрсенбаев.
</blockquote>
Отбасы банкіндегі жинақ шотында жеткілікті шегінен асатын 35 жасқа дейінгі азаматтардың үлесі 30,4 пайызды құрады. Қордағы жинақталған қаржыны баспана алуға, емделуге, тұрғын үйді жөндеу жұмыстарына пайдаланушылар қатары көп.
<blockquote>
 «Отбасы банкіндегі бірыңғай зейнетақы төлем қосылған депозит көмегімен үш жыл ішінде бір банктік қарыз шарты бойынша баспана алу үшін тұрғын үй, аралық немесе алдын ала заем алуға болады. Сонымен қатар Отбасы банкіндегі несиені қайта қаржыландыруға, жеке тұрғын үй құрылысын жүргізуге мүмкіндік бар. Биылғы жылдың 5 наурызынан бастап отбасы банкіндегі депозитті жаппай БЗТ зейнетақы қорына қайта қайтару мүмкіндігі туды. Бұрын бұл салымды тоқтату шартымен ғана жүзеге асырылатын еді», – деді “Отбасы банкі” Қызылорда облысы филиалының директоры Әділжан Сәулебаев.
</blockquote>
<img src="https://kyzylorda-news.kz/wp-content/uploads/2022/03/276057965_1492056027856571_6531688842105428033_n.jpg" alt="" />

1 сәуірден бастап зейнетақы жинақтарының жеткілікті шегі артады

<a href="https://kyzylorda-news.kz/">Kyzylorda-news.kz</a>. Қызылорда өңірінде азық-түлік өнімдеріне деген тапшылық жоқ. Бүгінде аймақтағы тұрақтандыру қорында 253,3 млн.теңгені құрайтын 1259 тонна өнім бар. Сонымен қатар 4328,1 тонна ұн, 272 тонна қарақұмық жармасы, 500 тонна күнбағыс майы, 5,7 тонна сүт жеткізілуде. Бұл туралы облыс әкімдігінің баспасөз қызметі хабарлады.
«Айналым схемасы» бойынша 22 келісім-шарт негізінде кәсіпкерлік субъектілеріне 1 163 млн.теңге заем берілді. Осы заем алған кәсіпкерлер 19 түрлі әлеуметтік маңызы бар азық-түлік өнімі мен тұрақтандыру қорындағы өнімдерді Қызылорда қаласында орналасқан 36 әлеуметтік дүкенде және қосымша 14 ірі супермаркеттегі әлеуметтік бұрыштарда нарықтан төмен бағада сатылуда.
Мұнан бөлек өңірді әлеуметтік нанмен қамтамасыз ету мақсатында «Азық-түлік келісімшарт корпорациясы» ҰК» АҚ, ҚР Ауыл шаруашылығы министрлігі және Қызылорда облысының әкімдігі арасында арзандатылған бидай алуға меморандумға қол қойылып, бүгінгі күнге астық сақтау қоймаларынан ұн өндіруші кәсіпорынына ақпан айынан 1949,6 тонна астық тасымалдануда. Алғашқы 5 вагон босатылып жеткізілу үстінде.
Қант қорына қатысты да алаңдаушылық жоқ. Өңірде 334,2 тонна шамасында қант қоры бар. Оның ішінде, сауда үйлерінде 106,6 тонна болса, тұрақтандыру қорында 100 тонна қант қоры тіркелген. Тұрақтандыру қорындағы қант өнімі 36 әлеуметтік дүкенде және ірі сауда орындарының әлеуметтік бұрыштарында 263 теңгеден сатылуда. Мұнан бөлек, тұрақтандыру қорының сауда әріптестерімен 125 тонна қантпен қамтамасыз ету жөнінде келісім-шарттар бойынша міндеттемелері бар.
Сондай-ақ, қосымша 136 тонна қант өнімін сатып алу бойынша жұмыстар жүргізілуде. Жыл соңына дейін «Азық-түлік келісім шарт корпорациясы» ҰК» АҚ арқылы 3 314,8 тонна қант көлемін жеткізу көзделіп отыр.
Өткен жылдың желтоқсан айынан бастап, аптасына бір рет «Байқоңыр» ӘКК» АҚ ұйымдастыруымен Қызылорда қаласы мен барлық аудандар бойынша тұрақтандыру қорының және оның қарыз алып отырған әріптестері арқылы 455,5 тонна әлеуметтік маңызы бар азық-түлік өнімдері «Көлік үстінен» төмен бағамен сатылып келді.

Қазақстан және Қызылорда облысының жаңалықтары: Басты жаңалықтар old