<a href="https://kyzylorda-news.kz/">Kyzylorda-news.kz</a>. Бүгін облыс әкімі Нұрлыбек Нәлібаев Б.Момынбаев атындағы №278 мектеп-лицейінде өткен «Соңғы қоңырау» салтанатты іс-шарасына қатысып, үлкен өмірге қадам басқалы тұрған түлектерге ақжолтай тілегін арнап, ұстаздарды мерекемен құттықтады.
<blockquote>
 «Құрметті түлектер, сіздермен үлкен өмірге аттанар сәттеріңізде жүздескеніме қуаныштымын. Бұл күн түлектер үшін ерекше толқынысқа толы мерейлі сәт! Мектеп бітірушілердің көңілінде қуанышпен қатар қимас сезім де бар. 
 Дана халқымызда «Қатарыңның алды бол» деген баталы сөз бар. Үлкен азаматтық өмірге қадам басқан сәтте баршаңызға осы сөзді ерекше арнағым келеді. 
 Бар білімдеріңізді Тәуелсіз Қазақстанның, туған жерлеріңіз Сыр өңірінің өсіп-өркендеуіне жұмсап, үлкен жетістікке жете беріңіздер. 
 Қанаттарыңыз талмай, бейбіт еліміздің көгінде шарықтап, ата-аналарыңыздың үмітін ақтаңыздар», – деді облыс әкімі.
</blockquote>
Салтанатты жиында мемлекет және қоғам қайраткері Бақберген Досманбетов білім ұясынан қанат қаққан жастарға ақ жол тілесе, ата-аналар атынан сөз сөйлеген Мереке Елеуова риясыз алғысын білдірді. Сондай-ақ, FLEX бағдарламасының грант иегері Бітімбай Тұмар құрдастарына ізгі тілектерін арнады.
«Соңғы қоңырау» соғу рәсімінен кейін аймақ басшысы мектептегі «Кәсіпкерлік мектебі» пилоттық жобасы аясында ашылған оқу-өндірістік комбинатының жұмысымен танысты. Мұнда «тігінші», «аспазшы», «жүргізуші» біліктілігіне кәсіптік даярлау мақсатында жүргізілетін қолданбалы курстардың білім беру бағдарламаларын іске асырады. Бұл үшін білім ордасы мен Қызылорда қызмет көрсету және сервис колледжі арасында ынтымақтастық меморандумы бар. 
Облыс әкімі оқушылармен тілдесіп, мектеп ішінде маңызды жобалар жасауға талпынысы ерекше жастарға әрдайым қолдау болатынын жеткізді. 
Айта кетейік, биыл 7505 түлек мектеп бітіреді. Оның ішінде 430-ы «Алтын белгіге» үміткер, 720 оқушы «Үздік аттестатқа» үміткер.
<img src="https://kyzylorda-news.kz/wp-content/uploads/2022/05/283915284_308991951422056_3378719155396177761_n.jpg" alt="" />
<img src="https://kyzylorda-news.kz/wp-content/uploads/2022/05/283966845_308991841422067_498524066649896372_n.jpg" alt="" />
<img src="https://kyzylorda-news.kz/wp-content/uploads/2022/05/283980791_308991888088729_411608400782501206_n.jpg" alt="" />
<img src="https://kyzylorda-news.kz/wp-content/uploads/2022/05/284074981_308991791422072_3197664717280999484_n.jpg" alt="" />
<img src="https://kyzylorda-news.kz/wp-content/uploads/2022/05/284093865_308992024755382_1712334989011403671_n.jpg" alt="" />

Аймақ басшысы түлектердің соңғы қоңырау салтанатына қатысты

<h4 id="kyzylordanewskzhttpskyzylordanewskznbsp"><a href="https://kyzylorda-news.kz/">Kyzylorda-news.kz</a>. Бүгін еліміздің мектептерінде тағы бір оқу жылы аяқталып, соңғы қоңырау соғылды.&nbsp;</h4>
Қызылорда облысында биыл 295 білім беру ұйымында 176 771 шәкірт оқу жылын аяқтады. Мектеп бітіріп жатқан 7 505 түлектің&nbsp;430-ы «Алтын белгіге», 720-ы «Үздік аттестатқа» үміткер. Оларды күтіп тұрған алғашқы асу – ҰБТ. Биыл аймақтан 6 404 оқушы ұлттық тестке қатысады. Ал, 9 сыныпты 14 682 оқушы бітіріп жатыр.&nbsp;
<img src="https://baq.kz/userfiles/images/d19f3379-7eac-4152-bf8a-5e03916f32ab.jpg" alt="" />
Қызылорда қаласындағы «Зерде» интеллектуалды мектебінде алғашқы рет соңғы қоңырау рәсімі өтті. Мұнда 500-ге жуық оқушы білім алып жатыр.&nbsp;Салтанатты жиында оқу жылының қорытындысы бойынша білім, спорт, өнер биігінен көрінген шәкірттер марапатталды.
<img src="https://baq.kz/userfiles/images/3743a7a3-bbce-46d8-bd97-8df36811204e.jpg" alt="" />
<blockquote>
 Азаматтар елге жасаған қызметінің қайтарамын күтпеу керек. Себебі біздің бұл қызметіміз болашаққа салынған, өскелең ұрпақтың білім ауына бағытталған инвестиция. Сондықтан мен тәуекелге бел буып 7 мектеп, 4 балабақша салдым. Біздің балабақшада тәрбиеленген бүлдіршіндерімізге «Зерде» интеллектуалды мектебінде есік ашық. Бұл мектепті бітірген оқушыларымызға колледжге түсуіне мүмкіндік бар. Міне біз осы арқылы үздіксіз білім сапасын дамытамыз. Осылай білім алып, саналы, тәрбиелі ұрпақты қатарға қосуға үлесімізді қосып жатырмыз. Міне бүгін алғаш рет соңғы қоңырау рәсімін өткізіп жатқан «Зерде» интеллектуалды мектебінде&nbsp;2021-2022 оқу жылын 500-ге жуық оқушы сапалы білім алды.&nbsp;Оқу жылының қорытындысы бойынша оқушылардың 35%&nbsp;үздік, 40%&nbsp; екпінділер қатарынан көрінді. Түрлі білім олимпиадалары мен спорт жарыстары, өнер байқауларының жеңімпаздары мен жүлдегерлері атанды. Осы орайда мен мектептің педагогикалық ұжымына алғысымды білдіремін, – деді&nbsp;«Зерде» интеллектуалды мектебінің құрылтайшысы Сейтқали Алшынбаев.
</blockquote>
<img src="https://baq.kz/userfiles/images/4303366e-cfac-420d-b3b9-2fa2b5061d1e.jpg" alt="" />
500 орындық білім ошағы осыдан 2 жыл бұрын ашылған-ды.&nbsp;Мектептің материалдық-техникалық базасы білім берудің жаңа технологиялық құралдарымен жабдықталған. Оқушыларға екі ауысымда қызмет етеді. Оқушының сапалы білім алуына, демалуына, 4 мезгіл тамақтануына мүмкіндік қарастырылған. Математика және ағылшын тілдері тереңдетіліп оқытылады. Хореография, Алтын домбыра, дзю-до, бокс, футбол, интеллектум, теннис, ІТ класс, тоғызқұмалақ, вокал, Арт дизайн клубтары жұмыс істейді.&nbsp;
<img src="https://baq.kz/userfiles/images/28e67b5e-b0f3-4347-aa36-270256bdcd35.jpg" alt="" />
<img src="https://baq.kz/userfiles/images/ea6bc5cc-54c7-43d9-8838-ef76b94972d8.jpg" alt="" />
<blockquote>
 Балам 1-сыныпты бітіріп жатыр. Оқу үздігі, спорттық жарыстардың жеңімпазы. Бір жылда үлкен нәтиже көрсетті. Сабақ уақыты азаннан кешке дейін. 3 мезгіл тамақтанып, қосымша үйірмелерге қатысады. Математика, ағылшын пәндерінен тереңдетіліп оқытылады. Мектеп талап пен тәртіпті қатар қойып, баланың жан-жақты дамып, интеллектуалды қалыптасуына үлкен еңбек сіңіріп жатыр, – дейді ата-ана Ғазиза Жетпісбайқызы.&nbsp;
</blockquote>
<img src="https://baq.kz/userfiles/images/622c1626-4581-442c-b7a7-243799d84eb3.jpg" alt="" />
<a href="https://baq.kz/qyzylorda-oblysynda-7-505-tulek-mektep-bitirdi_279121/">BAQ.KZ</a>

Қызылорда облысында 7 505 түлек мектеп бітірді

<a href="https://kyzylorda-news.kz/">Kyzylorda-news.kz</a>. ҚР Бас мемлекеттік санитариялық дәрігерінің №25 қаулысына сәйкес вирусқа қарсы ревакцинацияланған адамдарға 6 ай аралықпен кезекті рет ревакциналау жүргізіледі.
Коронавирус инфекциясына қарсы қайта ревакцинацлауға коронавирус жұқтыру қаупі жоғары азаматтар қамтылады. Бұл жөнінде Өңірлік коммуникациялар қызметінде өткен брифингте облыстық санитарлық-эпидемиологиялық бақылау департаменті басшысының орынбасары Әлия Әбдіқайымова хабарлады.
<blockquote>
 «Бүгіннен бастап 6 ай аралықта вакцина салдырқан азаматтарға қайта екпе салдыру жұмыстары жүргізіледі. Коронавирус инфекциясына қарсы қайта ревакцинациялауға медицина қызметкерлері, күш құрылымдары, педагогтар, 50 жастан асқан азаматтар қамтылатын болады. Бүгінде 219 355 облыс тұрғыны ревакцинациядан өтті. Аймақтағы барлық емханаларда екпе түрлері жеткілікті», – деді Әлия Әбдіқайымова.
</blockquote>
Айта кетейік, қазіргі таңда өңірде эпидемиологиялық жағдай тұрақты. Мамыр айының 7-нен бастап коронавирус індетіне шалдыққандар тіркелген жоқ.

Қызылорда: Тұрғындарға қайта ревакцинациялау жүргізіледі

<a href="https://kyzylorda-news.kz/">Kyzylorda-news.kz</a>. Облыс әкімінің орынбасары Балжан Шаменова Өңірлік коммуникациялар қызметінің ақпарат алаңында БАҚ өкілдерімен баспасөз конференциясын өткізді. Жиында әлеуметтік салалар бойынша атқарылған жұмыстарды баяндап, әлі де шешілмеген мәселелердін бар екендігін айтты. Сондай-ақ, Балжан Мөрәліқызы облыс әкімінің орынбасары қызметінен өз еркімен кететінін хабарлады.
<blockquote>
 «2021 жылдың наурыз айынан бастап облыс әкімінің орынбасары қызметіне тағайындалып, аймақтың әлеуметтік-экономикалық дамуына қызмет еттім. Әлеуметтік салаға жауапты болғандықтан ең әуелі денсаулық сақтау саласында пандемиямен бетпе-бет келдік. Менің алдымда – адамдардың өмірін сақтау үшін вакцинаның маңыздылығын түсіндіру және шұғыл түрде екпе жұмыстарын ұйымдастыру міндеті тұрды.Күн сайынғы динамиканы бақылау және вирусқа шалдыққан азаматтарды емдейтін төсек-орын табу өте өзекті болды. Шұғыл шараларды қабылдаудың нәтижесінде Қызылорда қаласында 200 төсек орынға арналған модульдық жұқпалы аурулар ауруханасы жұмысын бастады. Халықтың шынайы қажеттілігін ескеріп, орын тапшылығы мәселесін шешу үшін облыстық психикалық денсаулық орталығының ғимаратын «Орталық емхана» ретінде қайта бейімдедік. Сонымен қатар 3 қалалық емханасының Астана мөлтек ауданында филиалы ашылды. Негізгі мамандығым қаржыгер болғандықтан, бюджетті жоспарлау және тиімді жұмсалуына ерекше мән бердім. Әсіресе, ауруханаларға қажетті құрал-жабдық сатып алуға көңіл бөлдік. Жасыратыны жоқ, аймақта дәрігерлердің тапшылығы бар. Кадр тапшылығын азайту мақсатында ауруханалардың бас дәрігерлеріне өз бюджетінің есебінен пәтер жалдау төлемдерін қамтамасыз етіп, аймақта сұранысқа ие арнайы дәрігер мамандарды шақырдық. Бұл – өте өзекті қадам болды. Қызылорда облысындағы елді мекендерде дәрігерлік амбулаториялар мен медициналық-санитариялық көмек ұйымдарының желісін мемлекеттік нормативтерге сәйкес жаңартуды қолға алдық. Әкім орынбасары ретінде негізгі жұмысымның бірі – еңбек дауларын шешу еді. Кәсіподақпен бірге тиімді шешім қабылдау нәтижесінде мұнайшылардың еңбек дауларын реттеу мақсатында жұмысшылардың жалақысын өсіру туралы келіссөздерді сәтті жүргіздік. Еңбек нарығына қатысты жастардың жұмыспен қамтылуына ерекше мән беріп, жұмыс берушілердің сұранысына сәйкес оқуды бітірген азаматтардың 97 пайызы жұмыспен қамтылды. 2021 жыл білім саласы үшін де тәуекелдерге қарсы тұруға жол ашқан жыл болды. Мектепке дейінгі және орта білім деңгейінде жан басына шаққандағы қаржыландыру жүйесіне ауысты. Әсіресе, жеке балабақшыларды қаржыландыру мәселесі өте өзекті болды. Бірақ біз ол қиындықтарға қарамастан жан басына қаржыландыру тәртібін сәтті жүзеге асырдық. Сондай-ақ, “Педагог мәртебесі туралы” заң аясында ұстаздарға қолдау шараларын кешенді түрде жүргіздік. Айлық жалақысының артуына, жас ұстаздардың көптеп келуіне мүмкіндік берген жыл болды. Ұстаздарды қаржылай негізінде қолдау және үздік білім беру мекемелеріне сыйақы қаржысын көбейттік. Бұрын үздік мектеп 17 миилион теңге алса, өткен жылы екі есеге ұлғайтып, 34 миллион теңгенің сертификатын ұсындық.
 Өздеріңіз білесіздер, Нұрлыбек Машбекұлы Нәлібаев облыс әкімі қызметіне тағайындалған уақыттан бастап, маған экономика, қаржы саласына жетекшілік етуді қосымша жүктеді. Дегенмен, сәуір айынан бастап туған ағамның баласы Асылбек Шәменов қала әкімі ретінде қызметке келгенін жақсы білесіздер. Асылбек Шәменовтың Жалағаш ауданы әкімі болған кезеңде маған тікелей бағыныстылығы жоқ болғандықтан, бұл жерде заңға қайшы әрекеттер орын алған жоқ. Бірақ, сәуір айынан бастап, қаржы саласына жетекшілік ететіндіктен және жиенімнің қала әкімі қызметіне келуі себепті мен облыс әкімінің орынбасары қызметінен кету туралы шешім қабылдадым. Дегенмен, мен қай кезде де Сыр елінің дамуына бар күш-жігерімді салуға дайынмын. Әрбір мемлекеттік қызметші туған жеріне жанашырлықпен қарайды және аймақтың дамуына барын салып қызмет етеді», – деді Балжан Шаменова.
</blockquote>

Балжан Шаменова: Қай кезде де сыр елінің дамуына бар күш-жігерімді салуға дайынмын

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев актив отырысында орынбасары Балжан Шаменованы ҚР Еңбек және халықты әлеуметтік қорғау министрлігіндегі жауапты қызметке ауысуына байланысты құрметпен шығарып салды.
Басқосуда аймақ басшысы қарымды қаржыгер Балжан Шаменованың аймақ үшін жасаған игілікті істерін атап өтіп, өңірдің дамуына қосқан еңбегі үшін «Құрмет» грамотасын табыстады.
<img src="https://syrboyi.kz/wp-content/uploads/2022/05/284058247_308839961437255_6900063640724769959_n-1024x632.jpg" alt="" />
<blockquote>
 «Балжан Мөрәліқызы 2021 жылдың наурыз айынан бастап осы кезге дейін облыс әкімінің орынбасары қызметін абыроймен атқарып келді. Тағайындалған уақыттан бері оның бастамасымен бірқатар келелі мәселелер өз шешімін тапты.
 Әсіресе, әлемді жаулаған пандемия кезінде білім, денсаулық сақтау, еңбек қатынастары салаларының көрсеткіштерін тиісті деңгейде ұстап қалуда табандылық танытып, аянбай еңбек етті.
 Айрықша атап өту қажет, Балжан Мөрәліқызы ковидпен күресте, оның алдын-алуда вакцинация жұмыстарының жоғары деңгейде жүргізілуіне белсене қатысып, кеселді жеңуде табандылық танытты. Әрбір теңгенің тиімді және бюджеттің орнықты жұмсалуында Балжан Мөрәліқызының дара қолтаңбасы бар.
 Балжан Мөрәліқызы тек өңірдің емес, республика деңгейіндегі экономика саласының білікті майталманы ретінде бюджет қаржысының мақсатты бағытталып, тиімді жұмсалуына атсалысты», – деді Н.Нәлібаев.
</blockquote>
Жиында облыстық мәслихат депутаты Наурызбай Байқадамов пен қаржыгерлер атынан сөз алған Қызылорда облысы бойынша Мемлекеттік кірістер департаментінің басшысы Ғалымжан Орынов Балжан Мөрәліқызының қаржы саласындағы қолтаңбасын айрықша атап өтіп, оның іскерлік қабілеті мен ұтымды менеджер екенін тілге тиек етті.
Басқосу соңында Балжан Шаменова әрдайым жастарға қолдау көрсетіп, орын беру қажет екенін және әділетті түрде шешім қабылдағанын жеткізді.

Аймақ басшысы Балжан Шаменованы жаңа қызметке шығарып салды

Kyzylorda-news.kz. Алдағы референдумның жай-жапсарын түсіндіру, насихаттау мақсатымен таныстыру мақсатында «AMANAT» партиясы облыстық филиалының Атқарушы хатшысы, облыстық штаб төрағасы Ләйлә Төрешова партияның қалалық филиалына қарасты бастауыш партия ұйымдары өкілдерімен арнайы семинар өткізді.
Семинарда сөз алған Атқарушы хатшы бастауыш партия ұйымдарының рөліне тоқталып, саяси науқанда белсінді болуға шақырды.
<blockquote>
 «Бүгінде партияның Қызылорда қалалық филиалына қарасты 37 бастауыш ұйымдарға топтасқан 248 топ бар. Ал облыста 241 бастауыш партия ұйымдары жұмыс істейді. Олардың құрамында 1000 астам партиялық топ бар. Бүгін барлық бастауыш ұйымдар өкілдерімен референдум маңыздылығына қатысты семинарлар өтуде. Біз барлық сала өкілдерімен кездесіп жүрміз. Оның ішінде шалғайдағы елді мекендерді де қамтуға тырысып жатырмыз. Осы кездесулерде көз жеткізгеніміз – халықтың алдағы референдумға деген көзқарасы жақсы, қызығушылығы жоғары. Айтылған ұсыныстар мен пікірлер де мазмұнды. Сондықтан Президенттің әрбір бастамасына қолдау білдіруші партия мүшесі ретінде 5 маусым күні өтетін саяси науқанда бірлігімізді көрсетуміз керек»,- деді Ләйлә Төрешова.
</blockquote>
Өз кезегінде семинар жұмысына қатысушылар референдумның тарихи және саяси маңызына назар аударып, оны қолдайтындарын жеткізді.

Референдум әділетті Қазақстан құру жөніндегі саяси реформаларды жүзеге асырудың алғышарты

Kyzylorda-news.kz. Құрылыс нысандарының жобаларын қарау жөніндегі кеңестің кезекті отырысына Қармақшы ауданы өз жобаларын ұсынды. Облыс әкімінің орынбасары Мархабат Жайымбетовтың төрағалығымен өткен кеңесте аудан әкімі Әділбек Ерсұлтанов 68 жобаны талқылауға салды. Қаралған мәселелердің маңыздылығы ескерілді. Ірі жобалар республикалық бюджеттен және «Ауыл – ел бесігі» бағдарламасы бойынша қаржыландыруға жіберілетін болды.
Ал, 5 ауылдық округке әкімдік ғимараттарын салу үшін сұралған қаржыға облыстық экономика және қаржы басқармасының басшысы Нұрғали Қордабай мүлдем тыйым салынғанын жеткізді. Сондай-ақ, ауылдық клуб салуға облыстық бюджеттен қаражат қаралмайтынын айтты. 
Сонымен қатар, Кеңес мүшелері жобаланатын объектілердің қуаттылығын, бөлінетін жер учаскелерін, техникалық шарттарды айқындау, жобаларды оңтайландыру және түзету жөнінде өз шешімдерін ортаға салды. 
Жалпы, құрылыс нысандарының жобаларын қарау жөніндегі кеңесте әлеуметтік сала, жылу-энергетика кешенін, газдандыру, сумен жабдықтау объектілерін, автомобиль жолдарын салу, қайта жаңарту және жөндеу жұмыстары талқынады. 
Айта кету керек, облыс бойынша 205 дайын жоба бар. Оларды іске асыруға 124 млрд теңге қажет.

Қармақшы ауданының бірқатар жобалары кеңесте қолдау тапты

Kyzylorda-news.kz. облыс әкімі Нұрлыбек Нәлібаев «ТҮРКСОЙ» ұйымының Бас хатшысы Сұлтан Раевпен кездесті. Жиынға мәдениет саласының қызметкерлері мен «ТҮРКСОЙ» ұйымының өкілдері қатысты. 
Облыс әкімі «ТҮРКСОЙ» халықаралық ұйымының маңызды қызметін айрықша атап өтіп, екіжақты ынтымақтастықтың маңызды екенін тілге тиек етті.
Түбі бір түркі халықтарының мәдениетін дамытуда, түркі әлемінің мәдени құндылықтарын тану, сақтау, зерттеуде, ортақ мәдени кеңістік қалыптастыруда «ТҮРКСОЙ» халықаралық ұйымының қомақты қызметін айрықша атағым келеді. «Қорқыт ата» энциклопедиясын дайындауға да түрткі болған осы ұйым. 
Өзіңізге белгілі, «Сыр елі – жыр елі» атанған қасиетті өлкеміз талай дарындардың тұғыры болған, талай дауылпаз сүлейлер шыққан өңір. 
Алдағы уақытта «ТҮРКСОЙ» ұйымымен халықаралық деңгейдегі ұлттық тағылымы мол, жаңа танымдық шаралар – тәжірибе алмасу, мамандарды тағылымдамадан өткізу, ғылыми-зерттеу, шығармашылық жобаларды бірлесіп атқару бағытында серіктестік қарым-қатынастардың нығаятынына сенімдімін, – деді Н.Нәлібаев. 
«ТҮРКСОЙ» ұйымының Бас хатшысы Сыр елі салт-дәстүрге бай қасиетті жер, түркі елінің рухани шаңырағы екенін айтып, алдағы жоспарларымен бөлісті.
Қызылорда өлкесіне келгендегі басты мақсатымыз түбі бір түркі халықтары арасында мәдени қарым-қатынасты нығайту. Осы бағытта «Қорқыт және Ұлы дала сазы» фестивалін жандандырып, Сыр елінен шыққан жырауларды түркі әлеміне таныту үшін жыраулар фестивалін өткізу жоспарда бар. Қасиетті Қызылорда аймағының бай тарихы мен мәдениетін күллі түркі әлемге таныту қажет деп есептейміз. Өзіңіз бастаған делегацияны Туркия елінің Бурса қаласында өткізілетін ІV дүниежүзілік көшпенділер ойынына шақырамыз. Бірлескен шығармашылық жобаларды ұйымдастырып, тәжірибе алмасуға дайынбыз, – деді Сұлтан Раев. 
Басқосуда аймақ басшысы Нұрлыбек Нәлібаев пен Бас хатшысы Сұлтан Раев Қызылорда облысының әкімдігі және «ТҮРКСОЙ» халықаралық түркі мәдениеті ұйымы арасындағы өзара ынтымақтастық туралы меморандумға қол қойды. 
Айта кету керек, Сырдың жыршы-жыраулары әр жылдары Жапония, Америка, Франция, Голландия, Италия, Қытай, Монғолия, Түркия елдерінде өткен фольклорлық фестивальдер мен симпозиумдарға қатысып келеді. 
2018 жылы Маврикий Республикасында өткен ЮНЕСКО-ның 13-сессиясында Қорқыт ата рухани мұралары Біріккен Ұлттар Ұйымы жанындағы ЮНЕСКО-ның ғаламдық материалдық емес мұралар тізіміне енгізіліп, өңіріміз үшін де, еліміз үшін де ең маңызды оқиға болды.

Нұрлыбек Нәлібаев «ТҮРКСОЙ» ұйымының Бас хатшысымен кездесті

Kyzylorda-news.kz. ҚР Премьер-Министрі Әлихан Смайыловтың төрағалығымен өткен Үкімет отырысында су ресурстарын тиімді пайдалану мәселелері қаралды. ҚР Экология, геология және табиғи ресурстар министрі Серікқали Брекешев, Ауыл шаруашылығы министрі Ербол Қарашөкеев баяндама жасады.
Министрлік дерегінше, барлық су тоғанынан елді тұрақты суаруға шамамен 11,6 текше километр су жұмсалады. Оның 11,3 текше километрі немесе 97%-ы 4 оңтүстік облысқа тиесілі. Бұл 1,28 млн гектар суармалы алаңы бар, яғни ел бойынша барлық суармалы алаңның 80%-ын құрайтын Алматы, Жамбыл, Түркістан және Қызылорда облыстары.
Жиында Қызылорда облысының әкімі Нұрлыбек Нәлібаев негізгі жұмыстарды тізбелеп, аймақтағы су ресурстарын үнемдеу бағытында биыл Үкімет резервінен бөлінген 3,6 млрд.теңгеге ұзындығы 1034 шақырым болатын 162 канал тазартылғанын жеткізді. Сондай-ақ, 156 дана насос қондырғысын сатып алу, 52 ұңғыманы бұрғылау, 322 гидротехникалық құрылысты жөндеу жұмыстары жүргізіліп жатқанын мәлімдеді.
<blockquote>
 «Су үнемдеу технологиясын қолдану арқылы (тамшылатып және жаңбырлатып) 565 гектар жерге ауыл шаруашылығы дақылдары егілуде. Оның ішінде 253 гектар көкөніс, 80 гектарға бақша, 28 гектарға картоп, 115 гектарға жаңа жоңышқа, 87 гектарға сүрлем жүгері, 2 гектарға қант қызылшасы дақылдары. Алдағы уақытта 10 мың гектарға жаңбырлатып суару әдісімен жоңышқа және 3 мың гектарға тамшылатып суару арқыты томат егу жобаларын жүзеге асыратын боламыз», – деді облыс әкімі.
</blockquote>
<img src="https://kyzylorda-news.kz/wp-content/uploads/2022/05/fb_img_1653399875848.jpg" alt="" />
Үкімет басшысы Әлихан Смайылов вегетациялық кезеңнің жақсы өтуі алдағы маусымдағы егістің өнімді болуына ғана емес, түптеп келгенде еліміздің азық-түлік қауіпсіздігіне тікелей байланысты екенін атап өтіп, сала басшыларына бірқатар тапсырма берді.

Облыс әкімі Үкімет отырысында суды үнемдеу шараларын жүзеге асыру барысын баяндады

<a href="https://kyzylorda-news.kz/">Kyzylorda-news.kz.</a> «Қуатты өңірлер – ел дамуының драйвері» ұлттық жобасы аясында 23-27 мамыр аралығында облыста «солтүстік өңірлердегі бос жұмыс орындары» атты жәрмеңке ұйымдастырылуда. Мұнда солтүстік облыстардан 3600-ға жуық бос жұмыс орны ұсынылды.
Бұл туралы Өңірлік коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева хабарлады.
<blockquote>
 «Соңғы 5 жылда «Еңбек» мемлекеттік бағдарламасы арқылы теріскейге 735 отбасы қоныс аударды. Ал биыл 33 жанұя солтүстікке қоныс аудару квотасына енгізілді. Бос жұмыс орындарының тізімінде мұғалім, дәрігер, дәнекерлеуші және ауыл шаруашылығы саласына қатысты мамандықтар ұсынылды. Теріскейге беттеген азаматтарға мемлекет тарапынан бірнеше көмектер көрсетіледі. Атап айтқанда, отбасы және отбасы мүшелеріне 70 АЕК яғни, 222 600 теңге мөлшерінде қаржы беріледі. Тұрғын үйді жалдау және коммуналдық қызметтер үшін берілетін қаржы көлемі бекітілген. Яғни, қалалық жерге қоныс аударғаны үшін бір адамға – 63 600 теңге, отбасы мүшелерінің саны екеуден асса – 79 500 теңге, ал бес адамнан көп болса – 95 400 теңге мөлшерінде төленеді», – деді Жанар Дәулетбаева.
</blockquote>

Солтүстік облыстардан 3600 бос жұмыс орны ұсынылды

<a href="https://kyzylorda-news.kz/">Kyzylorda-news.kz.</a> «Атамекен» ҰКП басқармасының мүшелері барлық өңірдегі кәсіпкерлермен кездесіп, референдумға қатысты түсіндірме жүргізді.
Қызылорда облысы кәсіпкерлер палатасы Өңірлік кеңесінің мүшесі Наталья Мишукова жалпы референдумды қолдайтынын, қатысу азаматтық міндеті екенін айта келе, қоғамдағы өзекті мәселеге қатысты пікір білдірді.
<blockquote>
 «Қазір қоғамда тіл мәселесі жиі көтеріліп жүр. Ол түсінікті де. Оның кәсіпкерлікке зардабы туралы айтатын болсам, бізде заң бірінші орыс тілінде жазылып, қазақ тіліне аударылады. Сот, өзге де проблема болған кезде орыс тіліндегі нұсқасы қолданылады. Сол себептен құжаттардың бірінші қазақ тілінде жазылуын сұраймыз. Екіншіден, қазақша сөйлеуді өзімізден бастайық», – деді Қызылорда облысы кәсіпкерлер палатасы Өңірлік кеңесінің мүшесі Наталья Мишукова.
</blockquote>
Сондай-ақ, Наталья Мишукова еліміздегі Конституция азаматтардың құқығын қорғау жағынан барлығын жан-жақты қамтыған, әлемдегі құнды құжаттардың бірі деп санайды. Тек оның іс жүзінде орындалғанын қалайды.
Өңірлік кеңес мүшесі Болат Нұрхожаеве лдің басты құжатында кәсіпкерлікке қатысты оң өзгерістер болғанын қалайтынын айтып, алдағы уақытта Конституцияға енгізілген өзгерістерге орай қабылданатын заңдарда осы жағын «Атамекеннің» заңгерлері ескеруін сұрады.
Айта кетейік, онлайн өткен шараға Қызылорда облысынан Кәсіпкерлер палатасының директоры Пірмұхаммед Сыздықов пен Өңірлік кеңес мүшелері қатысты.
<img src="https://kyzylorda-news.kz/wp-content/uploads/2022/05/img_6147-scaled.jpg" alt="" />

Наталья Мишукова: Конституциямызда адам құқығын қорғау жан-жақты қарастырылған

Kyzylorda-news.kz. Қала әкімінің 2022 жылғы 23 мамырдағы өкімімен Қызылорда қаласы әкімінің орынбасары лауазымына Нұрмағанбетов Руслан Аймұрзаұлы тағайындалды.
Руслан Аймұрзаұлы 1983 жылы Қызылорда қаласында дүниеге келген. Жоғары білімді. 
2006 жылы Қаныш Сәтбаев атындағы Қазақ Ұлттық техникалық университетін «Технологиялық кешендердің электр жетегі және автоматтандырылуы» мамандығы, 2009 жылы «Болашақ» университетін «Экономика» мамандығы бойынша бітірген. 
Еңбек жолын 2006 жылы «Энергомонтаж автоматика» ЖШС-де инженер-бағдарламашы ретінде бастаған.
2007-2014 ж.ж Қызылорда облыстық қаржы департаментінде, облыстық энергетика және коммуналдық шаруашылық басқармасында, облыстық энергетикалық қадағалау және бақылау басқармасында жауапты қызметтерді атқарған.
2014-2015 ж.ж Қызылорда облыстық энергетика және тұрғын 
үй-коммуналдық шаруашылық басқармасы басшысының орынбасары;
2015-2017 ж.ж «Қызылорда электр тарату тораптары компаниясы» АҚ директорының орынбасары;
2017-2020 ж.ж «Қызылорда жылу электр орталығы» мекемесінің директоры;
2020-2021 ж.ж Қызылорда облыстық энергетика және тұрғын 
үй-коммуналдық шаруашылық басқармасының басшысы;
2021 жылдан бастап осы кезге дейін ҚР Энергетика министрлігі «Жаңартылатын энергия көздері департаменті» мекемесінде басқарма басшысы қызметін атқарып келді.
Руслан Аймұрзаұлы қаланың құрылыс, сәулет және қалақұрылысы, тұрғын үй коммуналдық шаруашылығы, қоғамдық көлік, мемлекеттік сатып алу және тұрғын үй инспекциясы саласына жетекшілік ететін болады.
<img src="https://kyzylorda-news.kz/wp-content/uploads/2022/05/fb_img_1653371826823.jpg" alt="" />

Қазақстан және Қызылорда облысының жаңалықтары: Басты жаңалықтар old