<a href="https://kyzylorda-news.kz/">Kyzylorda-news.kz.</a>&nbsp; Аймақтың инвестициялық әлеуетін арттыру үшін жаңа жобалар керек. Бұл ретте аймақ басшысы қала, аудан әкімдеріне инвестициялық жобалар арқылы қаржы тарту мәселесінде жұмысты ширату қажет екенін нақты тапсырған болатын.
Облыс әкімі Нұрлыбек Нәлібаевтың төрағалығымен өткен жиында да осы мәселе қайта қаралды. 
Отырыста облыс әкімінің орынбасары Мархабат Жайымбетов Қызылорда қаласы мен барлық аудан үшін өзекті жобаларға қаржы бөлу және алдағы перспективалық жоспарлар туралы нақты талдау жүргізіп, Қызылорда облысында өзге өңірлермен салыстырғанда жобалар саны мен көлемі аз екенін алға тартты.
<blockquote>
 «Мәселен, инженерлік инфрақұрылымды жүргізуге біздің аймақ жалпы құны 2,8 млрд. теңге жобаларын ұсынса, көрші Маңғыстау облысы 26 млрд.теңгеге ұсынып отыр. Басқа бағыттар бойынша да әзірлеген жобалар саны кем және көрсеткіштер әлдеқайда төмен», – деді Мархабат Жайымбетов.
</blockquote>
Жиында әр аудан және қала әкімдерінің инженерлік коммуналдық инфрақұрылым орнату, ауыз су, кәріз жүйелерін жақсарту, газ кіргізу, тұрғын үй салу, үйлерді қайта жаңғырту, электр желісін тарту, жылуға қосу сынды негізгі жобалары жан-жақты қаралып, кемшіліктері де ашық айтылды. Мысалы, Сырдария, Жалағаш, Шиелі аудандарының әкімдері инвестиция тартудан әлсіздік танытып, санаулы ғана жобаны әзірлеп ұсынды.
Өз кезегінде қала, аудан әкімдері мен басқарма басшылары атқарылған жұмыстар бойынша есеп беріп, жобаларын қорғап шықты.
Өңір басшысы Нұрлыбек Нәлібаев әкімдердің бюджет қаражатын тиімді бағыттау және республикадан қомақты қаржы тарту жұмыстарына сылбыр қарауының салдарынан көрсеткіштер көңіл көншітпей тұрғанын баса айтты.
<blockquote>
 «Әрбір жобаның артында қаржы тұрады. Жобаларды уақытылы атқарсақ, тұтас аудан, қала халқының әл-ауқатын арттыруға мүмкіндік туады. Өкінішке орай, былтырғы жылы жобалар тым аз жасалған. Соның салдарынан аймаққа бірнеше есе төмен қаржы тартылған. Сондықтан бюджет қаражатына қарап қалмай, демеушілер тартып, инвесторлармен жұмысты күшейту қажет», – деді облыс әкімі.
</blockquote>
Жиын барысында әкімдердің жұмысын саралаған аймақ басшысы қосымша инвестициялық жобаларды 10 күн ішінде әзірлеп, дайын жобалар бойынша қорытынды шығару мен сараптама нәтижесін алу жұмыстарын тездету қажет деді. Ал, міндетін орындай алмаған басшылардың алдағы уақытта жауапкершілігі қаралатынын ескертті.
Сондай-ақ, Нұрлыбек Нәлібаев жоба әзірлеу барысында жол салу, ауыз су тарту және табиғи газ өткізу секілді мәселелерге басты көңіл бөліп, құрылыстың бағасын негізсіз асырып, жұмысты аяқтаудан бас тартқан мердігерлердің жауапкершілігін қарау қажет екенін қатаң тапсырды.
<img src="https://kyzylorda-news.kz/wp-content/uploads/2022/06/285602125_314516337536284_1069364972912525705_n.jpg" alt="" />
<img src="https://kyzylorda-news.kz/wp-content/uploads/2022/06/285451481_314516324202952_2305148201412495329_n.jpg" alt="" />
<img src="https://kyzylorda-news.kz/wp-content/uploads/2022/06/285670331_314516404202944_606156019186327749_n.jpg" alt="" />

Н.Нәлібаев:  Инвестиция тартып, жаңа жобалар әкелу керек

<a href="https://kyzylorda-news.kz/">Kyzylorda-news.kz.</a> Қызылордада жеке кәсіпкерді заңсыз тексергені үшін қалалық сәулет және қала құрылысы бөлімінің маманы «сөгіс» алып, кәсіпкерден өндірген салық төлемі қайтарылды.
Осы жылдың ақпанында Қызылорда облысы кәсіпкерлер палатасына жеке кәсіпкер Әбунасыр Алдабергенов құқығын қорғауды сұрап, өтініш білдірді.
Кәсіпкердің айтуынша, өткен жылдың желтоқсанында қалалық сәулет және қала құрылысы бөлімінің мамандары ешқандай ескертусіз, сырттай бақылау жасап, нысанда тұрған ақпараттық тақтаны өлшеп алып кетеді. 7 желтоқсанда «сыртқы жарнама құралы» деп бағалап, кәсіпкерге 14 585 теңге төлемақы төлеуді міндеттейді.
Қала әкімдігіне қарасты жауапты бөлімнің берген ақпараты негізінде қалалық мемлекеттік кірістер басқармасы кәсіпкердің есеп шоттарын бұғаттап, берешек сомасына тікелей өкім қояды. Нәтижесінде үш банктік шотынан берешек сома артығымен ұсталады. Қосымша шоттары бұғатталған кәсіпкер өзге несиелік міндеттемелерін уақытылы төлей алмай, кешіктіреді.
Кәсіпкерлер палатасының заңгерлері өтінішті жан-жақты зерттеп, ҚР Ұлттық экономика министрлігіне мемлекеттік органдардың іс-әрекеттерінің заңдылығына құқықтық баға беруді сұрап, хат жолдаған.
<blockquote>
 Министрліктен: «Қазақстан Республикасы Президентінің Жарлығымен 2020 жылдың 1 қаңтарынан 2023 жылдың 1 қаңтарына дейін шағын кәсіпкерлік субъектілеріне, оның ішінде микрокәсіпкерлік субъектілеріне бару арқылы тексерулер мен профилактикалық бақылау мен қадағалауға мораторий енгізілгенін атап өтеміз. Орталық мемлекеттік және жергілікті атқарушы органдарға шағын және микрокәсіпкерлік субъектілеріне бару арқылы тексерулер мен профилактикалық бақылау мен қадағалау жүргізуге тыйым салынады. Осылайша, бақылау органдарының мемлекеттік бақылау нысандарының өзге де түрлерін жүргізуге, сондай-ақ бақылау нәтижелері бойынша Кодексте және заңда көзделмеген құжаттарды жіберуге құқығы жоқ», – деген жауап келді.
</blockquote>
Бұдан бөлек, Палата мамандары қалалық әкімдікке қарасты бөлімнің тексеруі арнайы есепке алынбағанын да анықтады. Қажетті құжаттар жинақталғаннан кейін Кәсіпкерлер палатасының кәсіпкердің атынан берген шағымы негізінде қалалық прокуратура заң бұзушылықтарға жол берген бөлім қызметкерінің тәртіптік жауаптылығын қарау және кәсіпкерге берілген ескертпе хатты жою жөнінде қала әкімінің атына прокурорлық ықпал ету актісін енгізді.
Нәтижесінде бөлім қызметкері Мақсат Абдинабиге «сөгіс» түрінде тәртіптік жаза беріліп, кәсіпкерге берілген ескертпе хаттың күші жойылды. Сондай-ақ, кәсіпкердің есепшотынан алынған қаржы толық қайтарылып, кәсіпкердің құқығы қорғалды.

Қызылордада кәсіпкерден заңсыз алынған салық қайтарылды

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Нұрлыбек Нәлібаев «Балалар жылы» аясында көпбалалы отбасыларға Жаппасбай батыр көшесінде орналасқан 50 пәтерлік жаңа үйдің кілтін табыстап, қоныс тойымен құттықтады.
<blockquote>
 «Мемлекет басшысы Қасым-Жомарт Кемелұлы Тоқаев халықты тұрғын үймен қамтамасыз ету – мемлекеттің әлеуметтік саясатының басым бағыты екенін атап өткені белгілі. Соған сай өңірімізде тұрғын үй құрылысына басымдық беріліп, баспана мәселесін шешу батыл қадамның біріне айналды. Міне, бүгін Балалар жылы аясында Қызылордада жаңа тұрғын үйді пайдалануға беріп, көпбалалы отбасылардың қуанышына ортақтасып отырмыз. Балаларымыз жаңа үйге шаттана кіріп, ішін бақытқа толтырсын деп тілеймін! Қоныс тойларыңыз құтты болсын», – деді Нұрлыбек Нәлібаев.
</blockquote>
Шарада мемлекет және қоғам қайраткері Бекмырза Еламанов жиналған қауымға батасын берді. 
Сонымен қатар аймақ басшысы көпбалалы отбасы Сейтжаппаровтар әулетіне арнайы барып, жаңа қонысқа бақ-береке тіледі.
Айта кетейік, Сыр өңірінде 30 жыл ішінде 8 млн.шаршы метрге жуық тұрғын үй пайдалануға берілді. Биылдың өзінде «Нұрлы жер» мемлекеттік бағдарламасы аясында ауданы 95 мың шаршы метр, 1294 пәтерді құрайтын 31 тұрғын үйдің құрылысы жүргізілуде.
Жыл аяғына дейін 1244 пәтерді құрайтын 30 тұрғын үйді пайдалануға беру жоспарланып отыр.
<img src="https://kyzylorda-news.kz/wp-content/uploads/2022/06/285621203_313916234262961_2717303178554802590_n.jpg" alt="" />
<img src="https://kyzylorda-news.kz/wp-content/uploads/2022/06/285630033_313916080929643_1631521558056198307_n.jpg" alt="" />
<img src="https://kyzylorda-news.kz/wp-content/uploads/2022/06/285480321_313916174262967_4987011410421232157_n.jpg" alt="" />

Аймақ басшысы көпбалалы отбасыларға жаңа пәтердің кілтін табыстады

<a href="https://kyzylorda-news.kz/">Kyzylorda-news.kz.</a> 2 маусымда Қазақстан территориясының басым бөлігіне Солтүстік антициклоны әсер ете бастайды. Осының салдарынан жауын-шашын тоқтап, ауа температурасы төмендейді.
Қазгидромет мәліметінше, тек Қазақстанның оңтүстігі мен шығысында циклонның әсерінен жаңбыр мен найзағай, бұршақ, дауыл сақталады.
Республика бойынша жел күшейеді, оңтүстік пен оңтүстік-батыста шаңды дауыл, солтүстік аудандарда түнде және таңертең – тұман, батыста, солтүстік-батыста топырақ бетінде үсік жүреді.
Қызылорда облысының солтүстігі, орталығында жел жылдамдығы 15-20 м/с дейін күшейіп, шаңды дауыл соғады.

2 маусымға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Өткен аптада облыс әкімі Нұрлыбек Нәлібаевтың жеке қабылдауында болған қала тұрғыны, 18 жылдан бері «Қызылорда тазалығы» мекемесінде қызмет атқаратын Гүлайым Қарғабаева жұмысшылардың қоғамдық көлікте жеңілдікпен жүру туралы өтінішін жеткізді.
Аймақ басшысы қытымыр қысқа да, аптап ыстыққа шыдас беріп, күні-түні қызмет жасап жүрген тазалықшылардың еңбегі жоғары екенін атап өтіп, қала әкіміне олардың 1 маусымнан бастап қоғамдық көлікте тегін жүруіне жағдай жасауды тапсырды.
Бүгін қала әкімі Асылбек Шәменов “Қызылорда-тазалығы” мекемесіне барып, қызметкерлеріне уәде етілген тегін билеттерді табыстады.

Тазалықшылар қоғамдық көлікте тегін жүреді

<a href="https://kyzylorda-news.kz/">Kyzylorda-news.kz.</a>&nbsp;Бүгін Халықаралық балаларды қорғау күнінде Қызылорда қаласындағы Тәуелсіздік даңғылының жалғасы саналатын, шағын аудандарының арасын қосатын жаңа магистральды жол ашылды.
Мерекелік іс-шарада облыс әкімі Нұрлыбек Нәлібаев қала тұрғындарын жаңа жолдың ашылуымен құттықтап, игі тілегін арнады.
<blockquote>
 «Адам мен адамды бауырластырып, ел мен елді жақындастыратын жайлы жолдың жайы қай кезеңде де халық үшін маңызы аса зор. 
 Бүгінгі күні қаламыз қарқынды дамып, аумағы кеңейіп, халқының саны да артып келеді. Жаңадан шағын аудандар бой көтеріп, зәулім ғимараттар салынуда. Осы ретте, тұрғындар үшін жүріп-тұруға қолайлы жағдай жасау, қажетті инфрақұрылыммен қамтамасыз ету – алдымыздағы басты міндеттердің бірі. Шын мәнінде, жол қатынасы – бұл ең үлкен өмірлік қажеттілік деуге болады. Ендеше, жол құрылысын жүргізген мамандарға алғыс айтамыз, оның игілігін ел көруді нәсіп етсін!», – деді облыс әкімі.
</blockquote>
Жиында еңбек ардагері, «Қызылорда қаласының құрметті азаматы» Жарылқасын Шәріпов сырбойылықтарды қуанышымен құттықтап, ақ батасын берді.
Ұзындығы 4,6 шақырымды құрайтын жаңа жол арқылы жол-көлік инфрақұрылымының сапасы жақсарады.
Жаңа нысанның лентасын салтанатты түрде кесу рәсімінен кейін Мемлекеттік тумен көмкерілген 30 автокөлік патриоттық автошеру өткізді.
Айта кетейік, биыл облыста көлік жолдарын дамытуға 20 млрд.теңге көлемінде қаржы бөлінеді деп күтілуде. Бұл қаржыға ұзындығы 342 шақырымды құрайтын автомобиль жолдары мен көпір өткелдері және көшелер жөндеуден өткізіледі. Нәтижесінде, облыс аумағында жақсы және қанағаттанарлық жағдайдағы жолдар үлесін 82%-ға жетеді.
<img src="https://kyzylorda-news.kz/wp-content/uploads/2022/06/285341554_313814007606517_6882051509046940440_n.jpg" alt="" />
<img src="https://kyzylorda-news.kz/wp-content/uploads/2022/06/285379951_313814087606509_8710640130775684517_n.jpg" alt="" />
<img src="https://kyzylorda-news.kz/wp-content/uploads/2022/06/285691529_313814077606510_1663435263962172097_n.jpg" alt="" />

Сыр өңірінде жаңа магистральды жол ашылды

<a href="https://kyzylorda-news.kz/">Kyzylorda-news.kz.</a> «Аңсаған сәби» бағдарламасының арқасында 1307 отбасында көптен күткен 1560 бала дүниеге келді. Бұл туралы ҚР Денсаулық сақтау министрі Ажар Ғиният айтты, деп хабарлайды ҚазАқпарат.
<blockquote>
 «Президентіміз Қасым-Жомарт Кемелұлы бедеулік салдарынан отбасылық жұптардың 20 пайызыы ажырасып жатқанына, отбасылық-демографиялық жағдайға алаңдаушылық білдіре отырып, «Аңсаған сәби» арнайы бағдарламасын жүзеге асыруды тапсырды. Былтыр осы бағдарлама арқылы 7 000 әйелге қосалқы репродуктивтік технологиялар қолжетімді болды. Нәтижесінде 3 000-нан астам әйел жүктілік бойынша есепке алынды. 1307 отбасында көптен күткен 1560 бала дүниеге келді. Бұл бағдарлама «Дені сау ұлт» ұлттық жобасы шеңберінде 2025 жылға дейін жалғасатын болады», – деді Ажар Ғиният Үкімет отырысында.
</blockquote>

«Аңсаған сәби» бағдарламасы 2025 жылға дейін жалғасады

<a href="https://kyzylorda-news.kz/">Kyzylorda-news.kz.</a> Мемлекет басшысы Қасым-Жомарт Тоқаев Халықаралық балаларды қорғау күніне орай қазақстандықтарға құттықтау жолдады, деп хабарлайды Ақорда.
«Құрметті отандастар!
Баланың күлкісі мен бақытынан артық ештеңе жоқ екенін осы мерекеде бәріміз айқын сезінеміз.
Өскелең ұрпақтың жан-жақты дамуына қолайлы жағдай жасау – мемлекетіміздің басты міндетінің бірі.
Біз заманауи мектептер мен жайлы балабақшалар салып, инновациялық орталықтар, оқушылар сарайларын және спорт кешендерін ашып жатырмыз. Үйірмелер мен секциялар да ұйымдастырылған.
«Балалар жылы» аясында көптеген жаңа жобалар қолға алынды. Әрбір баланың талабын ұштап, дарынын ашуды көздейтін түрлі іс-шаралар жүзеге асырылуда.
Мемлекет жылдан жылға бұл бағыттағы жұмысты күшейте түседі. Өйткені, жас ұрпақтың мықты азамат болып өсуі еліміздің тұрақты дамуына және баянды болашағына жол ашады.
Жас қазақстандықтарды және барша жұртты осы жарқын мерекемен құттықтаймын!
Сіздерге зор денсаулық, бақ-береке тілеймін!», – делінген Президент құттықтауында.

Мемлекет басшысы қазақстандықтарды Халықаралық балаларды қорғау күнімен құттықтады

<a href="https://kyzylorda-news.kz/">Kyzylorda-news.kz.</a> Бұл күнді мереке ретінде атап өту 1925 жылы Женевада балалар мәселелеріне арналған Дүниежүзілік конференцияда қабылданған дейтін дерек бар. Бір ғасырға жуық тарихы бар мерекені тәуелсіз Қазақстан да жыл сайын атап өтеді. Жалпы Қазақстан балалардың құқығын қорғауға қатысты халықаралық құжаттардың барлығын дерлік ратификациялаған.
Биыл қазақстандықтарды Жаңа жылмен құттықтаған ҚР Президенті Қасым-Жомарт Тоқаев 2022 жылды Балалар жылы деп жариялауды ұсынды.
<blockquote>
 «Балалар – мемлекетіміздің жарқын болашағының кепілі. Сондықтан да алдағы жылды Балалар жылы деп жариялау керек деп есептеймін. Әңгіме жалаң ұран мен мерекелік шаралар туралы емес. Бірінші кезекте билік тарапынан балаларды қорғау үшін денсаулық сақтау, білім беру, әлеуметтік қолдау бағытында нақты шаралар қолға алынуы керек. Өскелең ұрпақтың үйлесімді дамуы мен бақытты балалық шағы – біздің жалпыұлттық міндетіміз»,- деген еді Қасым-Жомарт Тоқаев.
</blockquote>
Осыдан кейін ҚР Президентінің 2022 жылғы 19 қаңтардағы №780 Жарлығына сәйкес, 2022 жыл балалар жылы деп жарияланып, ҚР Үкіметінің қаулысымен балалар жылын өткізу жөніндегі іс-шаралар жоспары бекітілді. Іс-шаралар «Білімді бала», «Отбасы – қауіпсіз мекен», «Дені сау бала», «Жетімсіз ел», «Жайлы мекен», «BALA QORǴAÝ», «BALA_TIME.KZ» деп аталатын 7 бөлімнен және 50 тармақтан тұрады.
Алғашқы бөлім – «Білімді бала». Жобаның мақсаты – балалардың сапалы білім алуға және жеке тұлға ретінде дамытуға қатысты құқықтарын жүзеге асырып, оқу-тәрбие процесінде тәрбие компонентін күшейту. Ал екінші «Отбасы – қауіпсіз мекен» бөлімі баланың берекелі отбасында білім алу құқықтарын жүзеге асыру мен отбасындағы адамгершілік және рухани құндылықтарды насихаттауды қамтиды. Үшінші бөлім – «Дені сау бала» жобасы. Оның мақсаты – балалардың, мүгедек балалардың құқықтарын жүзеге асыру, балалар мен мүмкіндігі шектеулі балалардың денсаулығын нығайту және қорғау. Төртінші «Жетімсіз ел» бөлімі жетім балалар мен ата-анасының қамқорлығынсыз қалған балалардың құқықтарын іске асыру бойынша іс-шаралар қолға алынады. Бесінші бөлім «Жайлы мекен» бөлімі балаларға арналған инфрақұрылымды дамытуға бағытталған. Келесі «Бала қорғау» бөлімі балалардың қауіпсіз даму жағдайларында құқығын жүзеге асыруға бағытталып отыр. Мұнда бұқаралық ақпарат құралдарында суицид тақырыбын жариялау мәселесі бойынша ұсынымдар әзірленеді. Сонымен қоса мектептерде 24/7 режимінде «Balaqorgau» дербес QR-коды енгізіледі. Соңғы 7-бөлімінде «BALA_TIME.KZ» жобасы бойынша балалар мәселелері бойынша ақпараттық-түсіндіру жұмыстары жүргізіледі. Оның аясында балалар жылына арналған іс-шараларды ақпараттық қамтамасыз етудің медиа-жоспарын әзірлеу, балаларға арналған арнайы медиа өнімдерді шығару және тарату: телешоулар, сериалдар, деректі фильмдер, GIF-тер, әлеуметтік желілердегі имидждік өнімдер, «Балапан» телеарнасында мультимедиялық және танымдық контентті көрсету және «Дана бала» www.danabala.kz балалар әдебиеті сайтының мазмұнын қазақстандық авторлардың кітаптарымен толықтырылады.
2021 жылдың маусым айындағы деректерге сәйкес, Қазақстанда 6,1 млн бала бар. Оның жартысынан көбі, яғни 3,1 миллионы – ұл бала, ал 3 млн – қыз бала. 3,4 млн бала мектепте оқыса, 914 мың бала мектепке дейінгі тәрбиемен және оқытумен қамтылған.
<a href="https://lenta.inform.kz/kz/bugin-halykaralyk-balalardy-korgau-kuni_a3939280">ҚазАқпарат</a>

Бүгін – Халықаралық балаларды қорғау күні

<a href="https://kyzylorda-news.kz/">Kyzylorda-news.kz.</a> 1 маусымда Қазақстанның басым бөлігіне Сібір циклоны әсер етеді, сондықтан ауа райы тұрақсыз болады. Найзағай жарқылдайды, дауыл тұрып, бұршақ жауады.
Қазгидрометтің мәліметінше, республиканың батысы мен солтүстік-батысында ғана Солтүстік антициклонның әсерінен жауын-шашынсыз ауа райы сақталады. Ел бойынша жел күшейеді.
Күндіз Қызылорда облысының орталығында, оңтүстігінде жел қарқыны 15-20 м/с дейін күшлейіп, шаңды дауыл соғады.

Сәрсенбіге арналған ауа райы болжамы

Kyzylorda-news.kz. «Достық» үйінде 31 мамыр – Саяси қуғын-сүргін құрбандарын еске алу күніне орай «Қазақстандағы саяси-қуғын сүргін: Сыр өңіріндегі нәубет жылдар шежіресі» атты облыстық ғылыми-танымдық конференциясы өтті.
Жиынға саяси қуғын-сүргін құрбандарын ақтау бойынша облыстық комиссия мен жұмысшы топтың мүшелері, зиялы қауым өкілдері, жоғары оқу орындарының ғалымдары, үкіметтік емес ұйым жетекшілері, облыстық Қазақстан халқы ассамблеясының белсенділері, бұқаралық ақпарат құралдарының өкілдері мен жастар қатысты.
Конференция жұмысын ашқан облыстық қоғамдық даму басқармасының басшысы Мира Қазбекова Қазақстан Республикасы Президентінің 1997 жылғы 5 сәуірдегі Жарлығымен қуғын-сүргін құрбандарын мәңгілік есте қалдыру мақсатында 31 мамыр – «Саяси қуғын-сүргін және ашаршылық құрбандарын еске алу күні» ретінде аталып келе жатқанына биыл 25 жыл толғанын атап өтті. Сондай-ақ, ел тарихында зұлмат жылдардың зардабын тартқан халықтар туралы деректермен бөлісіп, ақтаңдақ жылдар туралы ақиқаттың беріге дейін бұрмаланып келгенін, десек те ел тәуелсіздік алғалы Алаш арыстарының ғұмырнамасы мен тарихи оқиға туралы маңызды құжаттардың зерделеніп, ақиқат пен жалғанның ара-жігі уақыт еншісіне қарай анықталып жатқанын айтты.
<blockquote>
 Бұл қасірет Сыр жұртшылығын да айналып өткен жоқ. Қолда бар мәліметтерге қарағанда, тоталитарлық жүйе жүргізген саясаттың салдарынан облыс бойынша 4038 отбасы қуғынға ұшырап, 1153 адам атылған екен. 
 Ал, тоталитарлық жүйенің салдарынан орын алған ашаршылық салдарынан тек Қазақ елі ғана емес, Украина, Беларусь, Молдова және Ресей тұрғындары да зардап шекті. Тек Қазақстанның өзінен 1992 жылы құрылған Парламенттік комиссияның қорытындысы бойынша, 1931-1933 жылдары ашаршылықтан қырылған қазақтардың саны 2 млн 300 мың адам делінді. Этнос өкілдерінің саны 200 мың адамды құраған. Бұл оқиғалар халық жадында мәңгі сақталмақ, – деді басқарма басшысы Мира Қазбекова.
</blockquote>
Конференция барысында қоғам қайраткері, «Темірбек Жүргенов» атындағы қоғамдық қор төрағасы Сәпен Аңсат «Ұлт зиялыларын ұлықтау – елдіктің белгісі», Қорқыт Ата атындағы Қызылорда университетінің «Тарих» кафедрасының меңгерушісі, тарих ғылымдарының кандидаты, доцент Айтжан Жұмабайұлы Оразбақов «ХХ ғасырдың І-ші жартысында Сыр өңіріне депортацияланған халықтар», Қорқыт Ата атындағы Қызылорда университетінің Гуманитарлық-педагогикалық институтының директоры, тарих ғылымдарының кандидаты, доцент Сағат Тамшыбайұлы Тайман «Архив құжаттарындағы түркістандық әскери тұтқындардың тағдыры», Қызылорда облысының мемлекеттік архивінің басшысы, экономика ғылымдарының кандидаты Жанат Амангелдіқызы Абзалиева «Ұжымдастыру науқаны және ашаршылық ақиқаты архив кұжаттарында», Қызылорда қалалық «Ақмешіт апталығы» газетінің бас редакторы Әзиз Жұмаділдәұлы Батырбеков «Саяси репрессия мен ашаршылық тақырыбының қазақ баспасөзіндегі көрінісі» тақырыптарында баяндамаларын оқыды.
Шара соңында конференцияға қатысушылар тарихи датаның мән-маңызы туралы өскелең ұрпаққа жеткізіп отыру азаматтық парызымыз дей келе, жас ұрпаққа ұлттық тарихи жадыны қалыптастыру маңыздылығы туралы өз ой-пікірлерін жеткізді.
<blockquote>
 «Бір конференция аясында халқымыздың басына түскен нәубет-зобалаңды түбегейлі қарастыру мүмкін емес. Бұл бағыттағы кешенді іс-шаралар өзінің қисынды мәресіне жеткенше әлі жалғаса береді. Бұл баршамыздың ортақ мүддеміз», – деп қорытындылады Мира Жомартқызы.
</blockquote>
<img src="https://kyzylorda-news.kz/wp-content/uploads/2022/05/img-20220531-wa0072.jpg" alt="" />
<img src="https://kyzylorda-news.kz/wp-content/uploads/2022/05/img-20220531-wa0073.jpg" alt="" />
<img src="https://kyzylorda-news.kz/wp-content/uploads/2022/05/img-20220531-wa0074.jpg" alt="" />

«Қазақстандағы саяси-қуғын сүргін: Сыр өңіріндегі нәубет жылдар шежіресі» атты облыстық ғылыми-танымдық конференциясы өтті

<a href="https://kyzylorda-news.kz/">Kyzylorda-news.kz.</a> Бүгін Сыр елінде 31 мамыр – Саяси қуғын-сүргін және ашаршылық құрбандарын еске алуға арналған арнайы іс-шара өткізілді.
Сыр жұртшылығы атынан облыс әкімі Нұрлыбек Нәлібаев зиялы қауым өкілдерімен бірге Саяси қуғын-сүргін және ашаршылық құрбандарын еске алып, тағзым етті.
Іс-шарада зиялы қауым өкілдері, қуғын-сүргін құрбандарын ақтау жөніндегі облыстық жұмысшы топ өкілдері және тарихшы-ғалымдар, қала тұрғындары ескерткішке гүл шоқтарын қойды.
Мұнан кейін аймақ басшысы Ақмешіт-Сырдария мешітінде қуғын-сүргін және ашаршылық құрбандарын рухына құран бағыштады.
<img src="https://kyzylorda-news.kz/wp-content/uploads/2022/05/285296242_313199934334591_3469033114659892071_n.jpg" alt="" />
<img src="https://kyzylorda-news.kz/wp-content/uploads/2022/05/285337215_313199991001252_3007683224936321203_n.jpg" alt="" />
<img src="https://kyzylorda-news.kz/wp-content/uploads/2022/05/285370575_313200107667907_7330207815324960738_n.jpg" alt="" />
<img src="https://kyzylorda-news.kz/wp-content/uploads/2022/05/285450653_313200074334577_1873750157978464494_n.jpg" alt="" />
<img src="https://kyzylorda-news.kz/wp-content/uploads/2022/05/meshit.jpg" alt="" />
<img src="https://kyzylorda-news.kz/wp-content/uploads/2022/05/285499417_313200141001237_8909031023301681456_n.jpg" alt="" />

Қазақстан және Қызылорда облысының жаңалықтары: Басты жаңалықтар old

Н.Нәлібаев: Инвестиция тартып, жаңа жобалар әкелу керек