<a href="https://kyzylorda-news.kz/">Kyzylorda-news.kz</a>. Аты аңызға айналған ауыр атлет Илья Ильин зілтемірмен қатар ел мойынына түскен ауыртпалықты да бірге көтерісіп жүр,&nbsp;деп хабарлайды <a href="https://24.kz/kz/zha-aly-tar/o-am/item/390969-biz-birgemiz-sauaby-mol-isten-syr-sportshylary-da-tys-almady">«Хабар 24».</a>
Таусоғар тұлға жерлестері ішіп-жемнен тарықпауы үшін тағам толы себет тарату акциясына белсене қатысып келеді. Ильяның жанында боксшы Қамшыбек Қоңқабаев пен балуан Мақсат Исағабылов бар. Олар тұрмысы төмен отбасыларға азық-түлік жеткізіп, жігер жанитын сөздерін арнады. Жалпы «Biz birgemiz» акциясы аясында әлеуметтік аз қамтылған 7800 отбасыға азық-түлік жеткізілді. Аймақтың кәсіпкер, меценат, депутаттары арнайы құрылған қоғамдық қорға 80 миллион теңгеден астам қаржы салды. «Nur Otan» партиясының үйлестіруімен 6313 отбасыға 50 мың теңгеден үлестірілді. Алдағы уақытта тағы 8 мыңдай отбасыға қаржылай көмек берілмек.
<blockquote>
 «Біз біргеміз» акциясы аясында жерлестеріме жылы сөз айтып, ыстық ықылас білдіріп, қолдан келгенше көмектесіп жүрміз. Мәселе бар, қиын сәт. Бірақ соған тұнжырамай бірге жеңуге ұмтылып, бір-бірімізге сүйеу, тіреу, қолдау болатын шақ туды. Мемлекет тарапынан әлеуметтік көмек көрсетіліп жатыр. Бұл кезеңде бас көтерер, атқамінер тұлғалар өз әулеті, жақын-жуығына қарайласқаны жөн», – дейді ауыр атлетикадан 4 дүркін әлем чемпионы Илья Ильин.
 «Аймақ тұрғындарын сабырға шақырамын. Көбі артта қалды, бұйырса аз уақытта бәрін жеңеміз деген үміттеміз. Ел аман, жұрт тыныш, тәуелсіздік тұғырлы болсын», – дейді бокстан әлем чемпионатының күміс жүлдегері Қамшыбек Қоңқабаев.
</blockquote>

«Bizbirgemiz»: Сауабы мол істен Илья Ильин бастаған Сыр спортшылары да тыс қалмады

<a href="https://kyzylorda-news.kz/">Kyzylorda-news.kz</a>. Бүгін Қызылордаға Ресейден&nbsp; 42 студент келді. Олардың арнайы автобуспен елге жетуін Ресейдегі Қазақстан елшілігі қамтамасыз етті. Облыс жастарын орталық директоры Бауыржан Мастеков, облыстық жастар саясаты мәселелері басқармасы басшысының міндетін атқарушы Нұркен Мықбасовпен&nbsp; бірге тиісті сала өкілдері күтіп алды.
1 «Б» категориясына жататын елден келгендіктен студенттер енді арнайы тест сынамаларын тапсырады. Соның қорытындысы негізінде тұрғылықты жері бойынша 14 күн үй жағдайындағы карантинге қатаң бақылауға алынады немесе қандай да бір күдік болған жағдайда провизорлық стационарға жіберіледі.
Айта кетейік, облыс әкімдігі мен Ресей Федерациясының университеттері арасындағы екіжақты меморандумға сәйкес, бүгінде Мәскеудің және Санкт-Петербургтың маңдайалды оқу орындарында 328 жас білім алуда. Бұған дейін 62 қызылордалық елге оралды.
Бұл ретте басты мәселе –&nbsp; жастардың жауапкерлігі, сақтыққа салғырттық танытпауы болып отыр.
Себебі, осы кезге дейін Шиелідегі бір ғана оқиға талай отбасын вирус құрсауына алып, опық жегізді.
<img src="https://kyzylorda-news.kz/wp-content/uploads/2020/04/stwdentter-keldi-kaz-_-2.jpeg" alt="" />
<img src="https://kyzylorda-news.kz/wp-content/uploads/2020/04/stwdentter-keldi-kaz-_-3.jpeg" alt="" />

Қызылордаға Ресейден келген 42 студент оқшауланды (ФОТО)

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 45 адамға жетті. Індеттен айыққандардың қатарына соңғы қосылған науқастар – Қызылорда қаласы және Шиелі ауданының тұрғындары.
23 сәуір 14:00-дегі ақпарат бойынша Қызылорда облысында тағы 16 адам қауіпті індеттен жазылып шыққан. Осылайша қауіпті індеттен айыққандар саны өңірде 45 адамға жетіп отыр.
Айта кетейік, күні бүгінге дейін Қызылорда қаласында – 9, Жаңақорған ауданында – 16, Шиелі ауданында – 17 және Қармақшы ауданында – 3 адам осы індеттен емделіп, үйлеріне шығарылған.
Олар алдағы 14 күнде дәрігерлердің бақылауында болады.

COVID-19: Қызылорда облысында індеттен жазылғандар саны 45-ке жетті

<a href="https://kyzylorda-news.kz/">Kyzylorda-news.kz.</a> Қызылорда облысында коронавирустық инфекция жұқтырған тағы 6 науқас тіркелді.
22 сәуір 20:30-дағы мәлімет бойынша қауіпті індетке шалдыққан 6 науқастың барлығы да Қызылорда қаласынан.
Осылайша, облыс бойынша коронавирустық инфекция жұқтырған науқастардың жалпы саны 157 адамға жетті.

Қызылорда қаласында тағы 6 науқас тіркелді, өңірде жалпы саны 157 болды

<a href="https://kyzylorda-news.kz/">Kyzylorda-news.kz</a>. Облыс әкімдігінде аймақ басшысы Гүлшара Әбдіқалықованың төрағалығымен мәслихаттың кезектен тыс 44 сессиясы өтті. Отырыс бейне-конференция форматында ұйымдастырылды. Күн тәртібінде 2020-2022 жылдарға арналған облыстық бюджетті нақтылау мәселесі қаралды. Бұл туралы облыс әкімінің баспасөз қызметі хабарлады.
Әлемдік экономикадағы жағдай мен баға тұрақсыздығы және коронавирус инфекциясының таралуына байланысты Президент Қасым-Жомарт Тоқаев ағымдағы жылдың 8 сәуірінде «2020 жылға арналған республикалық бюджетті нақтылау туралы» Жарлыққа қол қойды.
<blockquote>
 «Бүгін біз осы Жарлықтан туындайтын міндеттер мен Мемлекет басшысының тапсырмасын жергілікті жерде жүзеге асыру үшін облыстық мәслихат сессиясының күн тәртібіне 2020-2022 жылдарға арналған облыстық бюджетті 34,8 млрд.теңгеге нақтылап отырмыз. Ақпарат ретінде айта кетейін, бұл қаржының 25,9 млрд.теңгесі республикалық бюджеттен бөлініп отыр. Енді осы қаржының негізгі бағыттарына қысқаша тоқтала кетейін», – деді облыс әкімі.
</blockquote>
Г.Әбдіқалықованың айтуынша, бюджеттен қаралған қаржының 2,6 млрд.теңгесі мемлекеттік атаулы әлеуметтік көмек беруге, 1,5 млрд.теңге – әлеуметтік кепілдендірілген пакетке, оның ішінде төтенше жағдайға байланысты аз қамтылған отбасыларды азық-түлік және тұрмыстық жиынтықпен қамтамасыз етуге бағытталады.
Ал еңбек нарығын дамыту, оның ішінде жалақыны ішінара субсидиялау, жастар практикасына, «NEET» санатындағы жастарға, табысы төмен көпбалалы отбасыларға, еңбекке қабілетті мүмкіндігі шектеулі жандарға, жаңа бизнес идеяларға берілетін гранттарға және қоғамдық жұмыстарға 4,3 млрд теңге қарастырылған.
«2020-2021 жылдарға арналған жұмыспен қамтудың Жол картасы» мемлекеттік бағдарламасына республикалық бюджеттен трансферт ретінде 9,1 млрд.теңге бөлінуде. Қаржы аймақта жаңа жұмыс орындарын ашуға, тұрғын үй-коммуналдық шаруашылығы, инженерлік-көлік инфрақұрылым жобаларын жүзеге асыруға және әлеуметтік-мәдени нысандарды жөндеу мен елді мекендерді абаттандыруға жұмсалады.
Ауыл тұрғындарының өмір сүру сапасын жақсартуға бағытталған «Ауыл – ел бесігі» бағдарламасы бойынша облыста маңызды саналатын 22 жобаға 3 млрд.теңге бөлінеді.
Сонымен қатар, «Бизнестің жол картасы-2025» мемлекеттік бағдарламасы шеңберінде несиенің пайыздық мөлшерлемесін субсидиялау мен шағын және орта бизнес несиелерін кепілдендіруге 1,7 млрд.теңге қаралады.
Бұдан бөлек, аймақ басшысы облыстық бюджет қаражатының жұмсалу барысына тоқталып өтті.
<blockquote>
 «Аймақта жүзеге асырылып жатқан құрылыс, энергетика, мәдениет, спорт, электр және сумен жабдықтау салаларындағы 49 жобаны қоса қаржыландыруға 3 млрд.теңге, Арал, Қазалы, Жалағаш, Шиелі аудандарында тұрғын үй салуға құнды қағаздарды шығару есебінен 895,5 млн.теңге бөлінетін болады. Сонымен қатар, білім, денсаулық, мәдениет және спорт салаларына 516 млн.теңге қаралады. Ал құқық қорғау органдарының материалдық-техникалық базасын нығайтуға 219 млн.теңге жұмсалады», – деді Г.Әбдіқалықова.
</blockquote>
Сессия қорытындысында, аймақ басшысы облыстық мәслихат депутаттарының бюджет жобасын нақтылауға белсенді қатысқандары үшін алғыс білдірді.
<img src="https://kyzylorda-news.kz/wp-content/uploads/2020/04/02-27.jpg" alt="" />
<img src="https://kyzylorda-news.kz/wp-content/uploads/2020/04/03-28.jpg" alt="" />
<img src="https://kyzylorda-news.kz/wp-content/uploads/2020/04/04-18.jpg" alt="" />

Қызылордада мәслихат 2020-2022 жылдарға арналған облыстық бюджетті нақтылады

<a href="https://kyzylorda-news.kz/">Kyzylorda-news.kz.</a> 19 сәуір күні сағат 16:00 шамасында Қызылорда қалалық Полиция басқармасының Жедел басқару орталығының инспекторы полиция лейтенанты Нұрлан Қарлыбаев және ҚР ІІМ-нің №5547 әскери бөліміндегі Ұлттық ұлан&nbsp; сарбаздары&nbsp; қатардағы Кирилл Лосицкий мен Нияз Дәулет қызмет атқару барысында Тәуелсіздік даңғылындағы көпқабатты тұрғын үйдің 2 қабатындағы балконнан қалың түтінді байқайды.
Олар шұғыл қызметке хабарлап, дереу пәтерге кіріп, тұрғындарды балаларымен бірге қауіпсіз жерге шығарады.&nbsp;
Сонан соң, өрт сөндірушілер келгенге дейін өртті сөндіруге кірісті. Полиция қызметкерлері мен сарбаздардың жедел шешім қабылдауының арқасында өрт салдарынан зардап шеккендер жоқ. Мән-жайларды анықтау үшін оқиға орнына жедел-тергеу тобы шақырылды. Қазіргі уақытта оқиғаның мән-жайлары анықталуда.
Үй тұрғындары болса, ойланбастан көмекке келіп, оларды аман алып қалған тәртіп сақшылары мен сарбаздарға алғыстарын жаудырды.
<img src="https://kyzylorda-news.kz/wp-content/uploads/2020/04/200421124458892e.jpg" alt="" />

Қызылордалық полицейлер мен Ұлттық ұлан  сарбаздары  тұрғындарды өрттен құтқарды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 151 адамға жетті. Бүгін соңғы тәулікте жаңадан анықталған 2 жағдайдың мән-жайын облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
<blockquote>
 «Қазіргі таңда Қызылорда облысында коронавирустық инфекцияны жұқтырған 151 жағдай тіркелді. Соңғы тәулікте жаңадан 2 жағдай анықталды. Оның біреуі – Қызылорда қаласынан. Аталған қала тұрғыны дәрі-дәрмекке аллергия беруіне байланысты жедел-жәрдем шақырып, көпбейінді ауруханаға жеткізілген. Сол жерде коронавирустық инфекцияға сынама тест алынып, ол оң нәтиже берді. Ал, екінші науқас – Сырдария ауданының Амангелді ауылынан. Ол ауылдағы дәрігерлік амбулаторияда техникалық қызметкер болып жұмыс жасаған. Ол осы індетке шалдыққан науқаспен тікелей қарым-қатынаста болмаған. Қазіргі таңда облыстағы барлық медицина қызметкерлерін осы қауіпті індетке байланысты тексеруден өткізіп жатырмын. Екінші науқас осы тексеру кезінде анықталды. Бұрын денсаулығына шағымы болмаған», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 151 науқаспен байланыста болғандардың жалпы саны – 2185.&nbsp;Оның ішінде, жақын қарым-қатынаста болғандар саны – 1150, потенциалды байланыста болғандар – 1035 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 126, правизорлық стационарда – 65, карантиндік стационарда – 554 адам бақылауда.
Брифингте Жақсылық Әбілқасымұлы мәлімдегендей, өткен тәулікте облысымызда коронавирустық инфекцияға байланысты 939 тест сынамасы алыныпты.
<blockquote>
 «Соңғы тәулікте 939 тест сынамасы жасалды. Оның 361 – теріс мәнді болып шықты. Екеуінен коронавирустық инфекция анықталды. Ал, 576 – әлі тексерілу үстінде. Бүгінгі таңда облыс бойынша 7900 тест сынамасы қалды», – деді ол.
</blockquote>
Сондай-ақ, басқарма басшысы өңірде медицина мамандары коронавирустық инфекцияны анықтаудың белсенді сатысына көшкендігін мәлімдеді. Сондықтан, ЖРВИ, пневмания белгілері бар науқастардан бөлек, медицина мекемелерінің барлық қызметкерлері тексеруден өтеді.
<blockquote>
 «Біз бүгінде коронавирустық инфекцияны анықтаудың белсенді сатысына көштік. Осыған байланысты тексерілетін мақсатты топтардың тізімі жасалды. Олар – ЖРВИ, пневмония белгілері бар тұрғындар мен медицина мекемелерінің қызметкерлері. Аталған аурур белгілері бар науқастар дәрігерлерге жүгінуі керек. Сондай-ақ, өңірімізге Қазақстанның өзге өңірлерінен келушілер легі азаймай отыр. Ол кісілер де тұрғылықты жері бойынша медицина мамандарына хабарласып, міндетті түрде бақылауды болуы керек», – деді Ж. Әбілқасымұлы.
</blockquote>
Айта кетейік, бүгін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/covid-19-news/qyzylorda-oblysynda-qawipti-indet-zhuqtyrghandar-sany-151-boldy-57682/">151 адамға жеткенін</a>&nbsp;хабарлаған болатынбыз.
Оның ішінде, Қызылорда қаласында – 24, Жаңақорған ауданында – 30, Қармақшыда – 4, Шиеліде – 61, Сырдарияда – 26, Арал – 4, Қазалы ауданында – 2 жағдай тіркеліп отыр.

COVID-19: Дәрі-дәрмекке аллергиясы бар қала тұрғынынан індет анықталды

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысында коронавирустық инфекцияны жұқтырған науқастар саны 151 адамға жетті, деп хабарлайды&nbsp;<a href="https://www.coronavirus2020.kz/kz/kazakstandagy-koronavirus-boyynsha-21-sauirdin-09-35-uakytyndagy-epidemiologiyalyk-zhagday_a3640612">www.coronavirus2020.kz</a>.
21 сәуір сағат 09:35-тегі&nbsp;мәлімет бойынша елімізде коронавирус індетін жұқтырған тағы 97 адам тіркелді,
Оның ішінде Қостанай облысында – 4, Алматы қаласында – 62, Жамбыл облысында – 4, Батыс Қазақстан облысында – 4, Шығыс Қазақстан облысында – 3, Шымкент қаласында – 2, Түркістан облысында – 5, Маңғыстау облысында – 1, Нұр-Сұлтан қаласында – 4, Қызылорда облысында – 2, Қарағанды облысында – 6.
Қазақстан бойынша барлығы 1949 жағдай.

Қызылорда облысында қауіпті індет жұқтырғандар саны 151 болды

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова Сырдарияның сол жағалауындағы әлеуметтік-мәдени және білім беру саласындағы нысандармен танысты. Солардың қатарында, «Болашақ» университетінің жаңа оқу корпусы, Жастар ресурстық орталығы сол жағалауды «Батыс Еуропа-Батыс Қытай» көлік магистралімен байланыстыратын жаңа көпір болды.
2017-2019 жылдар аралығында сол жағалауда мемлекеттік бюджет және жеке инвесторлардың есебінен көпқабатты 48 тұрғын үй, Жастар ресурстық орталығы, Қазақ орталық атқару комитетінің музейі, «Болашақ» университетінің оқу корпусы, 700 орындық жеке мектеп және 320 орындық балабақша бой көтерді.
«Болашақ» университетінің 12 қабатты ғимаратында «Болашақ-Стартап» инновациялық идеяларды іске асыру орталығы, коворкинг орталығы, ғылыми-зерттеу институты, ғарыштық ғылыми-зерттеу жұмыстары зертханасы, агробиотехнологиялардың ғылыми зертханасы, әлеуметтік-экономикалық және саяси зерттеулер орталығы, телестудия, дизайн және хореография студиялары, жастар театры жұмыс істейді.
Жастар ресурстық орталығында IT-park, фитнес зал, кітапхана, коворкинг бөлмесі және антикафе бар. Мұнда студенттер мен оқушылар ақпараттық технологиялардың қыр-сырына үңіліп, білімдерін арттыра алады. 3D студия және роботтандырылған техниканы меңгеруге де мүмкіндік қарастырылған.
Сонымен қатар, облыс әкіміне сол жағалауда салынатын әлеуметтік-мәдени және білім беру нысандар туралы мәлімет берілді. Жобаға сәйкес, 300 орындық көпбейінді аурухана емханасымен, 300 орындық физика-математика мектебі, драма театр, 900 орындық орта мектеп, неке сарайы және бизнес орталық бой көтереді деп күтілуде.
Қазіргі уақытта көпқабатты 5 тұрғын үйдің құрылысы жүріп жатыр. Биыл «Нұрлы жер» мемлекеттік бағдарламасы аясында тағы 12 көпқабатты тұрғын үйдің құрылысы басталады.
Мұнан соң облыс әкімі Шіркейлі каналы арқылы өтетін, сол жағалау мен «Батыс Еуропа-Батыс Қытай» көлік дәлізін байланыстыратын көпір құрылысымен танысты.
Төрт жолақты көпірдің ұзындығы – 102,8, ені – 21 метр. Құрылыс жұмыстары республикалық және жергілікті бюджет есебінен жүргізіліп жатыр. Қазіргі таңда, республикадан қаралған қаражат толық игерілген.&nbsp;
<blockquote>
 «Облыста қаржыландыруды қажет ететін жобалар көп. Ағымдағы жобалар, атап айтқанда, осы көпір құрылысы дер кезінде аяқталуы керек. Біз тұрғындардың, әсіресе аз қамтылған отбасылардың әл-ауқатын ойлауымыз қажет. Сондықтан қаржыны бөлер алдында, бүгінгі жағдайға икемделген жобаға басымдық береміз», – деді облыс әкімі.
</blockquote>
Г. Әбдіқалықова нысандарды аралау соңында сол жағалауды дамыту жобасы жалғасатынын айтты.
<blockquote>
 «Әсіресе тұрғын үй құрылысы сапалы жүргізіліп, мерзімінде аяқталуы тиіс», – деді аймақ басшысы.
</blockquote>
<img src="https://kyzylorda-news.kz/wp-content/uploads/2020/04/sol-zhagalaw-kaz-_-2-1-scaled.jpg" alt="" />
<img src="https://kyzylorda-news.kz/wp-content/uploads/2020/04/03-18.jpg" alt="" />
<img src="https://kyzylorda-news.kz/wp-content/uploads/2020/04/04-11.jpg" alt="" />
<img src="https://kyzylorda-news.kz/wp-content/uploads/2020/04/05-5.jpg" alt="" />
<img src="https://kyzylorda-news.kz/wp-content/uploads/2020/04/06-5.jpg" alt="" />
<img src="https://kyzylorda-news.kz/wp-content/uploads/2020/04/07-5.jpg" alt="" />
<img src="https://kyzylorda-news.kz/wp-content/uploads/2020/04/08-2.jpg" alt="" />
<img src="https://kyzylorda-news.kz/wp-content/uploads/2020/04/02-19.jpg" alt="" />

Гүлшара Әбдіқалықова сол жағалаудағы әлеуметтік нысандардың жұмысымен танысты (ФОТО)

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова «Қызылорда электр тарату тораптары» АҚ компаниясында болды. Кәсіпорынның атқарып отырған қызметі және теңгеріміндегі 9&nbsp;834,74 шақырым электр желісі мен қосалқы 1812 станцияның жай-күйімен танысты.
Аймақ басшысы облыс бойынша 70 проценті ескірген электр желілері мен станцияларды жөндеу мәселесіне баса назар аударды. Биыл жүзеге асырылатын қайта қалпына келтіру жұмыстарына облыстық бюджеттен 166 млн.теңге қаралған. Жоспар бойынша аймақта 52,69 шақырым электр желісі мен қосалқы 14 станция жаңалануы тиіс.
<blockquote>
 «2020-2021 жылғы жылу беру маусымына дейін ағымдағы және күрделі жөндеу жұмыстарын жүргізу жоспарлануда. Қазіргі таңда облыстың электр энергиясын тұтыну көлемі 98 МВт құрап отыр. Оның 62,3 МВт (63,6%) сыртқы энергия көздерінен, 35,7 МВт (36,4%) «Қызылорда жылуэлектрорталығы» МКК мен «СКЗ-U» ЖШС өндіріледі», – деді «Қызылорда электр тарату тораптары» АҚ компаниясының басқарма төрағасы М. Кәрімбаев.
</blockquote>
Г.Әбдіқалықова 1964 жылы пайдалануға берілген «Қызылорда жылу электр орталығы» мекемесінде де болды. Қызылорда қаласын жылу және электр қуатымен қамтамасыз ететін негізгі кәсіпорын жылу беру маусымын аяқтап, келесі жылу беру маусымына дайындықты бастап кетті.
Аймақ басшысына 2019-2020 жылдардағы жылу беру маусымының тұрақты түрде өткені және жаз айларында ағымдағы жөндеу жұмыстарының жүргізілетіні айтылды. Сондай-ақ, кәсіпорынның халықаралық қаржы институттарынан алған несие көлемі жөнінде ақпарат берілді.
<blockquote>
 «Кәсіпорын 2014 жылдың 18 желтоқсанында «Қызылорда қаласының жылумен жабдықтау жүйесін салу және реконструкциялау» жобасын іске асыру мақсатында Еуропалық Қайта Құру және даму банкімен жалпы құны37,3 млн АҚШ долларына тең кредиттік шарт жасасты. Жеңілдік кезеңі 3 жыл деп белгіленді. Несиені қайтару кезеңі басталып кетті. 2027 жылға дейін қарызды толық өтеуіміз керек»,- деді «Қызылорда жылу электр орталығы» МКК-ның директоры Р.Нұрмағанбетов.
</blockquote>
Кәсіпорынның №1 газотурбиналық қондырғысын күрделі жөндеу жоспарланып отыр. Ол үшін облыстық бюджеттен 599 млн.тг бөлініп, мемлекеттік сатып алу жұмыстары жүргізілуде.
Нысандарды аралау қорытындысында, аймақ басшысы жөндеу, қайта қалпына келтіру жұмыстары кестеден кешікпей орындалып, бөлінген қаражат уақтылы әрі үнемді игерілуі қажеттігін тапсырды.
<img src="https://kyzylorda-news.kz/wp-content/uploads/2020/04/bek_9286-1-scaled.jpg" alt="" />
<img src="https://kyzylorda-news.kz/wp-content/uploads/2020/04/bek_9196-scaled.jpg" alt="" />
<img src="https://kyzylorda-news.kz/wp-content/uploads/2020/04/bek_9097-scaled.jpg" alt="" />
<img src="https://kyzylorda-news.kz/wp-content/uploads/2020/04/bek_8990-scaled.jpg" alt="" />
<img src="https://kyzylorda-news.kz/wp-content/uploads/2020/04/bek_9135-scaled.jpg" alt="" />

Гүлшара Әбдіқалықова қаланы жылу және электр қуатымен қамтамасыз ететін кәсіпорындарға барды (ФОТО)

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіхалықова&nbsp;<a href="https://m.facebook.com/story.php?story_fbid=121730589488095&id=108364210824733">Facebook</a>&nbsp;парақшасында коронавирустық инфекциямен күні-түні күресіп жатқан аймақ дәрігерлеріне алғыс айтты.
<blockquote>
 “Адамзат баласына қиын сынақ әкелген “COVID-19” вирусымен күн-түн демей күресіп жүрген бейбіт күннің батырлары, медицина қызметкерлерінің хал-жағдайы қалай? Көзге көрінбейтін жаумен арпалыста қандай қиындықтармен кезігіп жүр? Осы жайт көпшілігімізді алаңдатады. Себебі, ақ халаттылар бүгінгі қоғамның ең негізгі қорғанына айналып отыр.
 Бұл жолы мен медицина қызметкерлеріне қолдан келген көмегін көрсетіп, қолдауын аямай келе жатқан кәсіпкерлердің еңбегін ерекше атап өткім келеді. Бүгін ғана вируспен күресте алдыңғы шепте жүрген 20 маман “Достық” қонақүйіне тегін орналастырылды. Тынығып, демалуларына жайлы жағдай жасалды. Бұған қоса, өңірдегі «KAZPETROL GROUP» жауапкершілігі шектеулі серіктестігі жеке қаражаты есебінен 12 млн.теңге бөліп, 120 медицина қызметкеріне 100 мың теңгеден материалдық көмек көрсетті.
 Өздеріңізге белгілі, таяуда мен медицина қызметкерлерімен телефон арқылы сөйлестім. Әңгіме өңірдегі коронавируске қатысты ахуал жайында өрбіді. Халық саулығын қорып жүргендердің сенімділігі қуантты. Қызылорда облыстық жұқпалы аурулар ауруханасының қызметкерлері Жадыра Зинабдинова, Жарқынай Әліби, Шиелі аудандық ауруханасының дәрігері Ақжан Дәрібаева және Қызылорда облыстық фтизиопульмонология орталығының дәрігері Алма Асқаровалар бірауыздан вирусты міндетті түрде жеңіп шығатындарын айтты. Өздеріне тұрақты қолдау көрсетіп келе жатқан кәсіпкерлерге алғыстарын да жеткізді. Қонақүйде тынығып, ыстық тамақпен қамтылып, жайлы жағдай жасалып жатқанына ризашылық білдірді.
 Ендеше, мен де өз атымнан қандай қиындық болса да мойымай, вирусқа қасқая қарсы тұрған дәрігер, мейіргер, мейірбикелерге, күреске жұмылдырылған барлық сала өкілдеріне алғысымды айтамын. Біз қашанда біргеміз!”, – делінген облыс әкімінің аталған жазбасында.
</blockquote>

Гүлшара Әбдіқалықова аймақ дәрігерлеріне алғыс айтты

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысында коронавирустық инфекциядан жазылған науқастардың саны 17 адамға жетті.
17 сәуір 15:00-дегі ақпарат бойынша Қызылорда облысында тағы 4 адам қауіпті індеттен жазылып шыққан. Осылайша қауіпті індеттен айыққандар саны өңірде 17 адамға жетіп отыр.
Айта кетейік, Қызылорда қаласында – 6, Жаңақорған ауданында – 10, ал, Шиелі ауданында – 1 адам осы індеттен емделіп, үйлеріне шығарылған.
Олар алдағы 14 күнде дәрігерлердің бақылауында болады.

Қазақстан және Қызылорда облысының жаңалықтары: Басты жаңалықтар old