<a href="https://kyzylorda-news.kz/date/2020/08/12/">Kyzylorda-news.kz.</a> Қызылорда өңірінде «Жұмыспен қамтудың Жол картасы» бағдарламасы іске асып, сан түрлі салаларда күрделі және ағымдағы жөндеу жұмыстары жүруде. Құрылыс барысына жергілікті жердің азаматтары тартылып, өңірде 9 мыңнан аса азамат екі қолға бір күрек тапты. Бағдарлама толық аяқталғаннан кейін аймақта 452 тұрақты жұмыс орны сақталады.
Қазірде облыста 276 инфрақұрылымдық жоба іске асып жатыр. Жобаларды тиімді іске асыру үшін 36,9 млрд. теңге қаржы бөлініп, әлеумет үшін өзекті нысандар қайта жөнделуде. Бағдарлама 4 ірі бағыттағы салаларда қарқын алды. Атап айтқанда, әлеуметтік-мәдени нысандарды жөндеуге 12,3 млрд.теңге қаржы қаралды. Нәтижесінде, білім беру саласында 52 нысан, денсаулық сақтау бағытында 30 нысан, мәдениет саласында 22 нысан, спорт бағытында 21 ғимарат жөндеуден өтеді.
Ал, инженерлік-көліктік инфрақұрылым бағытында жөндеу жұмыстарына 14,5 млрд. теңге бөлініп, 62 жоба іске асады. Елді мекендерді аббаттандыру ісі де жанданады. Бұл бағытта 47 жоба қолға алынған.
Ауқымды бағдарлама негізінде тұрғын үй-коммуналдық нысандар да қайта жөндеуден өтуде. Айталық, 42 жобаның орындалуына 7,5 млрд.теңге қаржы қаралып, жұмыссыз жүрген 1127 еңбекпен қамтылды.
«Жол картасы» бағдарламасы арқылы қаржы алып, жұмыс істейтін мердігерлерге құрылыс обьектілеріне жергілікті жердің жұмыссыз азаматтарын тарту міндеттелген. Яғни әрбір мердігер ең кемінде ең төменгі айлық мөлшерінен екі есе жоғары жалақы беруі тиіс. Бұл карантин кезінде жұмыссыз қалған азаматтардың табысын жоғалтпауына ерекше мүмкіндік беріп отыр.

Қызылорда: Жол картасы аясында 452 тұрақты жұмыс орны сақталады

<a href="https://kyzylorda-news.kz/">Kyzylorda-news.kz.</a> Бүгін елімізде ҚР Парламенті Сенаты депутаттарын сайлау өтеді. Осылайша республиканың 17 өңірінен Сенатқа бір-бір депутаттан сайланады.
Аумақтық сайлау комиссиялары ұсынған мәліметтерге сәйкес, сайлау бюллетендеріне 46 кандидат енгізілді. Атап айтқанда, Шығыс Қазақстан облысынан – 4 кандидаттан, ал 10 өңірден 3 кандидаттан: Ақмола, Атырау, Батыс Қазақстан, Қарағанды, Қостанай, Қызылорда және Павлодар облыстары, Нұр-Сұлтан, Алматы, Шымкент қалалары. Қалған өңірлерден – 2 кандидаттан тіркелді.
Республика бойынша таңдаушылар тізіміне 3 069 мәслихат депутаты енгізілген. Олардың басым бөлігі Алматы облысынан – 317 және Шығыс Қазақстан облысынан – 301, ал едәуір аз бөлігі Нұр-Сұлтан қаласынан – 21, Шымкент қаласынан – 26 және Алматы қаласынан – 32.
Орталық сайлау комиссиясы және аумақтық сайлау учаскелері тарапынан толыққанды жұмыс жүргізілді. Коронавирус індетіне байланысты сенаторларды сайлаушы мәслихат депутаттарының қауіпсіздігін қамтамасыз ету үшін барлық жағдай жасалды.
Бұл жолғы Сенат депутаттарын сайлауға шетелдік байқаушылар көп қатыспайды. Бұған әлемді жайлаған коронавирус індеті себеп болып отырғаны белгілі. Дегенмен, ҚР Орталық сайлау комиссиясының мәліметінше, Түркітілдес мемлекеттердің ынтымақтастық кеңесінен 5&nbsp;байқаушы&nbsp;аккредиттелген.
Мұнан бөлек, ҚР СІМ жанында аккредиттелген шетелдік бұқаралық ақпарат құралдарының&nbsp;143 өкілі&nbsp;сайлау туралы заңнамаға сәйкес сайлауды халықаралық байқаушылармен тең дәрежеде байқай алады.

Бүгін Қазақстанда Сенат депутаттары сайланады

Kyzylorda-news.kz. Қызылорда облысында судағы қауіпсіздік ережелерін сақтамау салдарынан 25 оқиға тіркеліп, 27 адам қайтыс болды. Оның 9-ы бала. Бұл туралы Өңірлік коммуникациялар қызметінің ақпарат алаңында өткен брифингте Қызылорда облысының Төтенше жағдайлар департаменті бастығының орынбасары Саид Молдақараев мәлімдеді.
<blockquote>
 «Өткен аптада 5 қайғылы оқиға тіркеліп, азаматтардың мәйіті табылып, судан шығарылды. Өңірде суға шомылуға болмайтын 64 аймақ белгіленіп, 139 ескерту тақтайшасы орнатылды. Суға түсуге қауіпті аймақтарда азаматтардың рұқсат етілмеген жүзу құралдарын қолдануы және алғашқы көмек көрсету тәсілдерін білмейтіндігі де қайғылы жағдайдың көбеюіне әкелуде. Жаз айларында табиғатқа шығып, демалысты өзен мен көл жағасында өткізетін тұрғындар көп. Алайда сақтық ержелерін сақтамау салдарынан осындай демалыстар бақытсыз жағдайлармен аяқталып жатады»,-деді Саид Шазындаұлы.
</blockquote>
<img src="https://kyzylorda-news.kz/wp-content/uploads/2020/08/fb_img_1597043865755.jpg" alt="" />

Қызылордада 5 адам суға кетті

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының әкімі Гүлшара Әбдіқалықова Абай күні аясында Қызылорда қаласындағы «Мұрагер» мектебіне барып, Абай ескерткішіне арнайы гүл шоқтарын қойды.
Аймақ басшысы айтулы күнде Абай Құнанбайұлының 175 жылдық мерейтойының маңыздылығы мен Абай мұрасын кейінгі ұрпаққа насихаттаудың салмағын саралады.
<blockquote>
 “Бүгін қазақ руханияты үшін айтулы күн. Мемлекет басшысының жарлығымен ұлы Абайдың 175 жылдық мерейтой жылы бекітіліп, республика көлемінде аталып өтілуде. Ұлы Абайды ұлықтау арқылы халқымыздың ұлттық қадір-қасиетін, рухани-адамгершілік құндылықтарын, әдебиетіміз бен мәдениетімізді әлемге тағы бір қырынан таныта аламыз. Абай күнін атап өтудің облыстық іс-шаралар жоспары бекітілді. Жас ұрпақ Абай мұрасын оқу арқылы тәлім мен тәрбие, ізгілік пен адалдықты ту етеді, – деді облыс әкімі.
</blockquote>
Айтулы күнде облыс әкімі білім ошағы ғимаратындағы Абай ескерткішіне гүл шоқтарын қойып, тағзым етіп, «Мұрагер» мектебіне Абай есімі берілетінін атап өтті.
Абай күні аясында аймақта «Абай мұрасының ұлттық әдебиет пен мәдениеттегі маңыздылығы» атты республикалық онлайн конференциясы, «Абай – адамзат тарихындағы ұлы тұлға» тақырыптарында Абай оқулары, халық артисі Ерсайын Төлеубайдың «Абай» спектаклінің онлайн көрсетілімі ұйымдастырылуда. Сондай-ақ, мектеп оқушылары арасында Абайдың қара сөздерін оқудан челлендж, сурет байқауы онлайн форматта аталып өтіледі.
Атап өту қажет, өңірдегі 4 білім беру ошағына, 86 көшеге Абай есімі берілген. Жаңа оқу жылына қарай «Мұрагер» мектебіне Абай есімін беру жұмыстары басталып кетті. Аталған білім ошағында Абай мұралары жинақталатын болады. Сонымен қатар, Қызылорда қаласындағы Назарбаев даңғылының бойында орналасқан аллеяға Абай есімі беріліп, оның қара сөздері тасқа қашалып жазылған. Ал, Абай ауылындағы мектеп ауласына бюсті, «Мұрагер» мектебінің ауласына ескерткіші орнатылған.
<img src="https://kyzylorda-news.kz/wp-content/uploads/2020/08/fb_img_1597037596011-1.jpg" alt="" />

Қызылорда облысының әкімі Абай ескерткішіне гүл шоқтарын қойды

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова сырбойылықтарды Абай күнімен құттықтады.
Қадірлі қызылордалықтар!
Биыл – қазақ халқының ұлы ақыны, ағартушы, ғұлама ойшылы Абай Құнанбаевтың 175 жылдық мерейтойы.
Елбасымыз Нұрсұлтан Әбішұлы Назарбаевтың «Абай сөзі – қазақтың бойтұмары. Абай мұрасы – қазақтың ең қасиетті қазынасы»,- деген өнегелі сөзі бар.
Ұлы Абайды ұлықтау арқылы халқымыздың ұлттық қадір-қасиетін, рухани-адамгершілік құндылықтарын, әдебиетіміз бен мәдениетімізді әлемге тағы бір қырынан кеңінен таныта аламыз. 
Өткен жылы мемлекет басшысы Қасым-Жомарт Тоқаевтың Жарлығымен 2020 жыл Абай Құнанбаевтың 175 жылдық мерейтой жылы болып аталды.
Ел Президенті мерейтой жылына орай Абай шығармаларын оқу эстафетасын кішкентай Ләйлімнен қабылдап, жалғастырды. Бұл челлендж тек Қазақстанды ғана емес, бүкіл әлемді шарлап кетті десе болады. Әлемнің атақты адамдары түрлі тілде оқыған ақын шығармалары Абай кеңістігінің кеңейіп, халықаралық деңгейге шарықтағанын көрсетті. Абайдың мерейтойы ЮНЕСКО көлемінде аталатын болады.
Жақында Қазақстан Республикасы Үкіметінің қаулысымен 10 тамыз – АБАЙ КҮНІ болып жарияланды. Алдағы уақытта бұл күн жыл сайын халықтық мейрам ретінде өткізіледі.
Сонымен бірге, жуырда ақпарат кеңістігіне “Ақыл-ойдың айнасы” деген ұранмен “ABAITV” телеарнасы жол тартқаны белгілі. 
Әдебиет және өнер саласындағы үздік шығармаларға берілетін мемлекеттік сыйлық енді Абай атындағы мемлекеттік сыйлық болып аталды.
Мұның барлығы Абай ақынның ұлылығын дүниежүзіне танытып қана қоймай, кемеңгер ойшыл, ұлы суреткердің уақыт талабын заманынан оза шауып түсінуі, дүниетанымы мен философиялық көзқарастарын тереңінен зерттеп, жаңаша танып-білуімізге жол салары сөзсіз.
Биылғы мерейтойлық жылда көптеген ауқымды ғылыми-танымдық, мәдени-әдеби шаралар жоспарланған еді. Алайда, дүниежүзін дүрліктірген коронавирус шаралардың барлығын онлайн форматта өткізуге мәжбүр етті.
Ауыр індеттер Абай замында да болған. Мұхтар Әуезовтың “Абай жолы” романының “Түн-түнекте” тарауында: “Бұл қалаға жаман науқас келіпті. – Құдай ұрған іш ауруы. – Ар жақ-бер жақтан күнде әлденеше адам өліп жатыр. – Мәлік келгендей. Шыбындай қырылып жатыр. – Аты не дейді? Адам естімеген қу науқас бір. Жұрт қашып жатыр қаладан”,- делінген. Сол кезде халыққа індеттің қаншалықты қауіпті екенін түсіндіру мақсаты тұрды. Әсіресе жаназа рәсімдеріне баса мән беру керек болды. Абай Құнанбайұлы өзі білетін Сармолла есімді молда арқылы “Қаза болған адам үйіне, жаназаға мүмкін қадарынша халық аз жиналсын. Мәйіт шыққан үйге көп адам келіп-кету болмасын. Ол үйде ас ішу, халыққа тағам тараттыру, жетісін, қырқын жасау уақытша тоқталсын! Көп молда, шәкірт, мәзін, қарилер бұдан былай осы махаллада барлық ауырып өлген адамдардың үйлеріне қаптап барып, басқа үйлерге және қаптап жүрулерін тоқтатсын” деген сөзін жеткізді.
Тіпті ол халық арасында бас тазалығын сақтау жөнінде базарларды аралап түсіндірме жұмыстарын жүргізді. Қолды қалай дұрыс шаю керектігіне дейін көрсетті. Алайда оған құлақ аспағандар көп болды. Бірақ Абайды тыңдағандар аман қалды. Осылайша ұлы ойшыл халыққа Cақтану Формуласын көрсетті.
Қымбатты жерлестер!
10 тамыз – Абай күні мерекесі баршаңызға құтты болсын!
Өлді деуге сия ма, ойлаңдаршы, 
Өлмейтұғын артына сөз қалдырған? деген сөзімен өзіне ескерткіш қалап, ұрпағына өшпес өнеге, өлмес білімді асыл мұра етіп қалдырған ұлы Абай әлемі – шексіз әлем.
Абай мұрасы – мәңгілік!

Гүлшара Әбдіқалықова Абай күнімен құттықтады

Kyzylorda-news.kz. Жалағаш ауданына қарасты Ақсу ауылында күріш ақтау және құрама жем өндіру цехының құрылыс жұмыстары басталды.
«Бірлік Агро» шаруа қожалығының төрағасы, кәсіпкер Мұрат Елеусінов кәсібін ұлғайту, өндіріс аясын кеңейту мақсатында өз қаражаты есебінен цех құрылысын қолға алды. Цехтың жалпы құны 30 млн теңгені құрайды. Мемлекеттік қолдау шаралары ретінде ауылдық округ аумағынан цехқа көлемі 3 гектар жер табысталды.
Құрылыс жұмыстары биылғы жылдың қазан айында аяқталады деп күтілуде. Цех іске қосылғаннан кейін тәулігіне 10 тонна күріш салысын ақтайды. Сонымен қатар жоба толығымен жүзеге асқаннан кейін ауыл азаматтары тұрақты жұмыспен қамтамасыз етіледі.
<img src="https://kyzylorda-news.kz/wp-content/uploads/2020/08/fb_img_1596684722244.jpg" alt="" />
<img src="https://kyzylorda-news.kz/wp-content/uploads/2020/08/fb_img_1596684719725.jpg" alt="" />

Жалағашта күріш ақтау цехының құрылысы басталды

<a href="https://kyzylorda-news.kz/">Kyzylorda-news.kz.</a> Қызылорда облысында 30 шілде мен 5 тамыз аралығында «Мал ұрысы» жедел профилактикалық шарасы өтуде.
Шара барысында қалалық полиция басқармасы криминалдық полиция бөлімінің қызметкерлері мал ұрлығына күдікті 50 жастағы қала тұрғынын қолға түсірді. Күдікті азамат жайылымдық өрістен бір бас сиыр ұрлап, мал иесіне 200 мың теңге көлемінде материалдық шығын келтірген.
Қазіргі уақытта күдіктінің басқа да қылмыстарға қатыстылығы тексерілуде. Мал иесіне шығын сомасын толық қайтарды.
Аталған дерек бойынша Қылмыстық кодекстің 188-1-бабының 1-бөлігімен сотқа дейінгі тергеп-тексеру амалдары жүргізілуде.

Қызылордада сиыр ұрлаған тұрғын ұсталды

Kyzylorda-news.kz. Қызылорда облысында карантин талаптарының сақталуын бақылайтын 24 мониторингтік топ құрылған.
5 шілдеден бастап бүгінгі күнге дейін жұмысшы топ 1269 нысанға рейд жүргізді. Нәтижесінде 160 нысанда ӘҚБтК-тің 425/1 бабына сәйкес заңбұзушылықтар анықталып, 6 667 200 теңге көлемінде айыппұл салынған.
Оның басым бөлігі дүкендер мен қоғамдық тамақтану орындарындағы санитариялық талаптардың сақталмауына қатысты анықталған, яғни қызметкерлер маскасыз, қорғаныш қолғаптарынсыз халыққа қызмет көрсеткен. Бұдан бөлек, ораулы күйде сатылуы тиіс азық-түлік, нан-тоқаштардың беті ашық түрде еркін сатылуда, антисептиктері жоқ, шекті уақыттан асырып жұмысын жалғастырған нысандар да бар.
Ал карантин талаптарын елемей, көп адамның бір жерде жиналуына жол беріп, той өткізген 30-ға жуық жеке тұлғаға әкімшілік хаттамалар толтырылды.
Мониторингтік топтың рейдтері көрсеткендей, азық-түлік дүкендері мен кафелердің жұмысына шектеулі уақыт белгіленсе де ережені елемей, шаруасын дөңгелетіп жатқан нысандар бар. Карантин уақытында қызметтеріне тыйым салынған сұлулық салондары, жабық азық-түлік емес дүкендер де тұтынушыларды қабылдаған.
Бас мемлекеттік санитариялық дәрігердің қаулысына сәйкес жұмыс істеп тұрған барлық кәсіпкерлік нысан қызметкерлері толықтай карантин талаптарына бағынуы керек.
Қызылорда облысының тауарлар мен көрсетілетін қызметтердің сапасы мен қауіпсіздігін бақылау департаменті карантиндік және шектеу шараларын қатаң сақтауды, заңбұзушылықтарға жол бермеуді, коронавирус инфекциясының алдын алу бойынша сақтық шараларын орындауды сұрайды.
<img src="https://kyzylorda-news.kz/wp-content/uploads/2020/08/img-20200804-wa0009.jpg" alt="" />

Қызылордада карантин талабын бұзған 160 адамға айыппұл салынған

Kyzylorda-news.kz. Қызылорда облысында мұқтаж жандарға көмек қолын созатын «Зекет» қоры 2 жыл ішінде 25 отбасыға пәтер кілттерін табыстаған.
Белсенді, жанашыр азаматтардың демеушілігімен жүзеге асырып жатқан қайырымдылық қоры құрбан айт кезінде еріктілермен бірге әлеуметтік аз қамтамасыз етілген отбасыларға құрбандық малын жеткізіп, қолдау көрсеткен.
Сыр елінде 2011 жылы ашылған «Зекет» қоры әртүрлі деңгейдегі қайырымдылық бастамаларын іске асырып келеді. Қоғамдық қор «Ел үлесі пәтерге» жобасы аясында тұрмысы төмен отбасыларға пәтер табыстау бағытында алдағы уақытта пәтер кезегінде тұрған жандарға баспана тарту етпек. Сонымен бірге Сыр елінің жанашыр азаматтары мен белсенді жастарының демеушілігімен көпбалалы, әлеуметтік аз қамтамасыз етілген отбасыларға қыс мезгілінде қыстық отын жеткізу, азық-түлік себеттерін үйлестіріп келді.
Айта кетейік, құрбан айт мейрамы кезінде Сыр елінде мұқтаж жандар мен көпбалалы отбасы мүшелеріне 35 тонна 960 келі құрбан еті таратылды.
<img src="https://kyzylorda-news.kz/wp-content/uploads/2020/08/fb_img_1596516767908.jpg" alt="" />

Қызылордада «Зекет» қоры мұқтаж жандарға 25 пәтер табыстаған

<a href="https://kyzylorda-news.kz/">Kyzylorda-news.kz.</a> Бұл туралы бүгін қала әкімдігінің баспасөз орталығында өткен брифингте айтылды.
Қала әкімінің 25 маусым 2020 жылы № 15619 қаулысына сәйкес жолаушылар мен багажды қалалық (ауылдық) қатынастарда автомобильмен тұрақты тасымалдауға сараланған тариф, жолақысын ұялы байланыс операторының көрсетілетін қызметтері арқылы немесе электрондық жол жүру картасы арқылы қолма-қол ақшасыз төлеу кезінде – 90 (тоқсан) теңге болса, қолма-қол ақшамен төлеу кезінде – 120 (жүз жиырма) теңге болып бекітіліп, осы жылдың 1 қыркүйегінен бастап күшіне енеді.
«Қызылорда қаласының тұрғын-үй комммуналдық шаруашылығы, жолаушылар көлігі және автомобиль жолдары және тұрғын-үй инспекциясы бөлімі» басшысының орынбасары Б.Далабаев бастапқыда жаңа жүйе автопарктің үлкен сыйымдылықтағы қоғамдық көліктерін қамтып, кезең кезеңімен барлық орта және кіші сыйымдылықтағы қоғамдық көліктерде толық енгізілетіндігін жеткізді.
Қазіргі таңда қала тұрғындары жаңа жүйенің көлік карталарын автопарктің қалаішілік бағыттарындағы жүргізушілері арқылы сатып алуларына болады. Алдағы уақытта карантин режимінің талаптарын ескере отырып, көлік карталарын қолайлы орындардан сатып алу мүмкіндіктері қарастырылмақ.
Жолаушы электронды жолақысы төлемін өзіне қолайлы 9 түрлі төлем тәсілімен пайдалана алады, әрі «SMSBUS жолаушы» мобильді қосымшасы арқылы өз қажеттілігіне қарай бағыттардың қозғалыс кестесін анықтап, аялдамаға келу уақытын нақты уақыт режимінде бақылай алады.
Айта кету керек, қолма-қол ақшасыз төлемдердің үлесін арттыру арқылы тасымалдаушылардың ашық қызметін көрсетуге және тұрғындардың қоғамдық көлік қызметіне жаңаша көзқарасын қалыптастыруына, әрі қауіпсіздігін қамтамасыз етуіне септігін тигізеді.
Тағы бір артықшылығы, қалаішілік қоғамдық көліктердің электрондық жолақы төлеу құрылғылары істен шыққан жағдайда, көлік карталары арқылы төлемді жүзеге асыратын жолаушылар тегін жол жүру құқығына ие болады.
<img src="https://kyzylorda-news.kz/wp-content/uploads/2020/08/whatsapp-image-2020-08-03-at-18.00.12.jpeg" alt="" />
<img src="https://kyzylorda-news.kz/wp-content/uploads/2020/08/whatsapp-image-2020-08-03-at-18.00.13.jpeg" alt="" />

Қызылорда: қоғамдық көліктерде 1 қыркүйектен бастап электронды билет жүйесі іске қосылады

Kyzylorda-news.kz. Ақпарат және қоғамдық даму министрінің бұйрығымен Шахмардан Асқарұлы Байманов ҚР Ақпарат және қоғамдық даму министрлігі Жастар және отбасы істері комитетінің төрағасы қызметіне тағайындалды.
Шахмардан Байманов 1984 жылы Қызылорда қаласында дүниеге келген.
2005 жылы Қорқыт ата атындағы Қызылорда мемлекеттік университетін, 2012 жылы ҚР Президенті жанындағы Мемлекеттік басқару академиясын тәмамдаған.
Еңбек жолын 2005 жылы Қорқыт ата атындағы Қызылорда мемлекеттік университеті ректорының жастар істері жөніндегі көмекшісі болып бастаған.
2007-2008 жылдары — Қызылорда облысының “Жастар бастамаларын дамыту орталығы” қауымдастығының атқарушы директоры.
2008-2012 жылдары — “Қазақстан жастары конгресі” заңды тұлғалар бірлестігінің атқарушы директорының орынбасары, атқарушы директоры.
2012-2015 жылдары — Ақмола облысының жастар саясаты мәселелері басқармасы басшысының м. а., басшысы, жетекшісі.
2015-2017 жылдары — “Нұр Отан” партиясы жанындағы “Жас Отан” жастар қанатының төрағасы.
2017-2019 жылдары — Қызылорда қаласының әкімі орынбасарының міндетін атқарушы, қала әкімінің орынбасары.
2019 жылдан бастап қазіргі уақытқа дейін ҚР Ақпарат және қоғамдық даму министрлігінің Жастар және отбасы істері комитеті төрағасының орынбасары қызметін атқарды.

Шахмардан Байманов Жастар және отбасы істері комитетінің төрағасы болып тағайындалды

<a href="https://kyzylorda-news.kz/date/2020/07/30/">Kyzylorda-news.kz.</a> Бүгін облыс әкімі Гүлшара Әбдіқалықова Талсуат елді мекеніндегі әлеуметтік саланың арнаулы әлеуметтік қызметтер көрсету орталықтарына барды.
Алдымен өңір басшысы арнаулы әлеуметтік қызметтер көрсету балалар орталығының жөндеу жұмыстарын тексерді. Орталықтың жұмысы туралы директоры Айгүл Шамшатова баяндады. 
3 қабатты орталықтың ғимараты 2012 жылы пайдалануға берілген. Стационар жағдайында 100 төсек орын, жартылай стационар жағдайында 50 төсек орын бар.
<img src="https://kyzylorda-news.kz/wp-content/uploads/2020/07/116678599_2600374690065584_5503529840002910881_n.jpg" alt="" />
Орталықта психоневрологиялық ауытқулары бар 3 жастан 18 жасқа дейінгі мүгедек балаларға стационар және жартылай стационар жағдайында арнаулы әлеуметтік қызметтер көрсетіледі. 
Мекеме заманауи талаптарға сәйкес құрал жабдықтармен жабдықталған емдік кабинеттері, дәрі егу, уқалау бөлмелері, шаштараз, қол моторикасын дамыту, құммен жұмыс жасау, тұрмыстық бейімдеу, сенсорлық еңбекке баулу кабинеттері, тренажер, мәжіліс, спорт залдарымен қамтамасыз етілген. Науқастардың жүріп-тұруына қолжетімді жағдай қарастырылған, бейне бақылау камералары орналастырылған, ата-аналарымен және туыстарымен кездесу үшін арнайы қонақжай бөлмелері бар. Жыл басында стационар жағдайында 70 бала жартылай стационар жағдайында 81 бала қызметтермен қамтылды. Бүгінгі күні карантин шектеулеріне байланысты уақытша үйлеріне қайтарылған.
<img src="https://kyzylorda-news.kz/wp-content/uploads/2020/07/116788850_2600374650065588_4387717840017408669_n.jpg" alt="" />
Одан кейін облыс әкімі №2 Қызылорда арнаулы әлеуметтік қызметтер көрсету орталығына барды. Емдеу мекемесінің директоры Алмат Жұмабаев атқарылып жатқан жұмыстар туралы баяндама жасады. Бұл орталықта стационар жағдайында 380 төсек орын бар. Ғимарат 3 қабатты, қызмет алушылар 8 блокқа орналастырылған. Әр блокта жатын бөлмелер, төсек орын, тынығу залы бақылау посты, асхана, әжетхана, шомылу бөлмелері қарастырылған.
Жыл басында стационар жағдайында 401 адам, жартылай стационар жағдайында 25 адам қызметтермен қамтылды. Бүгінгі күні жүйке ауруымен ауыратын 1-ші, 2-ші топ мүгедектеріне арналған орталықта 372 науқасқа қызмет көрсетілуде.
Сондай-ақ, аймақ басшысы мүгедектерге арналған оңалту орталығында уақытша орналастырылған №1 Қызылорда арнаулы әлеуметтік қызметтер көрсету орталығы мен мүгедектерге арналған оңалту орталығының жұмысын тексерді. №1 Қызылорда арнаулы әлеуметтік қызметтер көрсету орталығының директорының орынбасары Ержан Ақшалов пен мүгедектерге арналған оңалту орталығының директоры Манат Тлеуова мекемелердің жағдайын таныстырды.
<img src="https://kyzylorda-news.kz/wp-content/uploads/2020/07/116860874_2600374500065603_7984983730856682649_n.jpg" alt="" />
№1 Қызылорда арнаулы әлеуметтік қызметтер көрсету орталығында стационар жағдайында 180, жартылай стационар жағдайында 100 төсек орын болса, мүгедектерге арналған оңалту орталығында жартылай стационар жағдайында 150 төсек орын бар. Бұл орталықтарда І және ІІ топтағы мүгедектерге, егде жасына байланысты өзіне қызмет көрсетуге мүмкіндігі жоқ адамдарға арнаулы әлеуметтік қызметтер көрсетіледі.
Емдеу мекемелерінде карантинге байланысты санитарлық-эпидемиялогиялық шаралар күшейтіліп, стационар жағдайында жатқан науқастарға мамандар екі ауысымда тұрмыстық, медициналық қызметтерді бөлмелерінде 24/7 режимінде көрсетуде. 
Аралау барысында облыс әкімі ем алушыларға жақсы жағдай жасалып, қызметкерлердің жалақысын көтеруді қарастыруды тапсырды. Сондай-ақ, дәрі-дірмек қорының жеткілікті болуын ескертті.

Қазақстан және Қызылорда облысының жаңалықтары: Басты жаңалықтар old