<a href="https://kyzylorda-news.kz/date/2020/10/28/">Kyzylorda-news.kz.</a> Қызылорда облысы күріш егуші өңір ретінде белгілі. Алайда, су тапшылығына байланысты жыл сайынғы проблемалар суды қажет ететін дақылдардың егісін азайту қажеттілігін туындатады.
Сондықтан, ғылыммен бірге ылғал тұтынатын дақылдардың, атап айтқанда, күріштің егіс алқаптарын қысқарту және дәстүрлі күріш өсіруден алшақтай отырып, ауыл шаруашылығы тауарын өндірушілерге тұрақты табыс алуға мүмкіндік беретін ылғалды аз сіңіретін дақылдар – соя, жүгері және басқа да дақылдарға ауыстыру жұмыстары жүргізілуде.
Жаңа заманауи суғару жүйелерін – тамшылатып және жаңбырлатып суғару жүйелерін, аквагельдерді пайдалануға ерекше көңіл бөлінеді. 
Облыстың Жаңақорған ауданында аквагельдерді пайдалану бойынша жақсы жұмыс тәжірибесі бар. Күздік бидай себілген 80 га жерден орта есеппен гектарынан 18 центнерден өнім алынды. Енді бұл тәжірибені облыстың өзге өңірлеріне тарату жоспарлануда.

Қызылорда облысында ауыл шаруашылығы өндірісін әртараптандыру жұмыстары жүргізілуде

*<a href="https://kyzylorda-news.kz/date/2020/10/27/">Kyzylorda-news.kz.</a> Пандемия кезінде тұрақты табысынан айырылған 10 мыңға жуық облыс тұрғыны «Жұмыспен қамту жол картасы» бағдарламасы аясында жұмыспен қамтылды. Бұл туралы Өңірлік коммуникациялар қызметінің ақпарат алаңында өткен брифингте облыс әкімінің орынбасары Наурызбай Байқадамов мәлімдеді.*
<blockquote>
 Әрине, бұл халықтың тұрмыс тіршілігін түзеуге арналған жоба. Төтенше жағдай кезінде табысынан айырылған 500 мың адамға 42500 теңге жәрдемақы төленді. 70 мыңға жуық жекелеген санаттағы азаматтарға азық-түлік және тұрмыстық жиынтығымен қамтамасыз ету үшін 5567 теңгеден әлеуметтік төлем төленді. Аймақтық «Birgemiz Qyzylorda» қоры арқылы 24 мыңнан аса отбасына 50 мың теңгеден бір реттік көмек берілді. 12 мыңнан аса отбасына 1 млрд. теңгеге қайырымдылық көмек көрсетілді. Осы кезеңдерде әлеуметтік қорғау жүйесінің қызметкерлері үздіксіз 24 сағат жұмыс жасап, тұрғындардың сұрақтарына жауап берді, – деді облыс әкімінің орынбасары.
</blockquote>
Жалпы, жыл басынан 17 466 жаңа жұмыс орны ашылды. Оның 12 679-ы тұрақты. «Еңбек» бағдарламасына 27 мыңнан астам азамат тартылды.
<img src="https://kyzylorda-news.kz/wp-content/uploads/2020/10/fb_img_1603788284479.jpg" alt="" />

Қызылорда:   Тұрақты табысынан айырылған 10 мың адам жұмыспен қамтылды

<a href="https://kyzylorda-news.kz/date/2020/10/26/">Kyzylorda-news.kz</a>. Қызылордада шыны зауытының іске қосылуымен шыны кластерін құру жоспарлануда. Қазір зауыт айналасында 8 ілеспе өндіріс құру мүмкіндігі пысықталуда. Жобалардың жалпы құны – шамамен 27 млрд. теңге, 336 жұмыс орны құрылады.
Бүгінгі күні инвесторлармен шыны талшық, айна, шыны ыдыс және ыдыс өндірісін құру бойынша жалпы құны 16 млрд. теңге болатын 3 жобаны іске асыру бойынша жұмыс басталды.
Химиялық кластерді кальцийленген сода өндіретін зауыттың айналасында құру жоспарлануда. Ас содасын, жуу құралдарын, еріткіштерді, химикаттарды және басқа да өнімдерді шығару жөніндегі өндірістерді құру жобалануда.

Қызылордада шыны және химиялық кластерлер құрылуда

<a href="https://kyzylorda-news.kz/date/2020/10/23/">Kyzylorda-news.kz.</a> Пандемияның аймақтардың қазіргі әлеуметтік-экономикалық жағдайына әсері экономиканың барлық саласында бірқатар проблемаларды ашты.
Бұл Қызылорда облысында экономиканың барлық саласы мен әлеуметтік салаға ауқымды талдау жүргізуді, азық-түлік, азық-түлік емес тауарлар мен көрсетілетін қызметтердің негізгі түрлерін өндіру және тұтыну теңгеріміне ауқымды талдауды жедел жүргізуге себеп болды.
Талдау қорытындысымен агломерациялық тәсіл негізінде қызмет түрлері бойынша саралау арқылы 2023 жылға дейінгі экономикалық даму жоспары әзірленді, оның шеңберінде бизнеске 4600-ден астам тұрақты жұмыс орындарын құруға мүмкіндік беретін жалпы сомасы 270 млрд.теңгеден асатын 265 жобаны іске асыру ұсынылды. Оның ішінде ағымдағы жылы 26 млрд.теңгеге 110-ы іске асырыла бастады, 2 мыңға жуық жұмыс орны құрылады, олардың 63-і іске асты.
Жоспарды әзірлеу идеясы өңірдің ресурстық әлеуетін тиімді пайдалану, сондай-ақ, мемлекеттік бағдарламалар мен мемлекеттік емес қаржы институттарының бағдарламаларын кешенді пайдалану арқылы өңірдің азық-түлікпен және бірінші қажеттіліктегі тауарлармен өзін-өзі қамтамасыз етуді қамту, сондай-ақ, жаңа жұмыс орындарын құру болып табылады.

Қызылорда облысында өңірдің 2023 жылға дейінгі экономикалық даму жоспары жүзеге асырылуда

Қызылорда облысының әкімі Гүлшара Әбдіқалықованың «Эксклюзив» бағдарламасына сұхбаты

<a href="https://kyzylorda-news.kz/date/2020/10/23/">Kyzylorda-news.kz.</a> Жұмыс істеп тұрған мұнай кен орындарының сарқылуына байланысты Қызылорда облысында мұнай өндіру 2012 жылдан бастап 2,5 есе дерлік қысқарды.
Бірақ, аймақ өңірлік экономиканы әртараптандыруға бет алды. Индустрияландыру бағдарламасының үшінші бесжылдығы аясында облыста 554 млрд.теңге қаражатқа 6 мыңнан астам жұмыс орны құрылатын 26 жоба іске асуда. Олардың ішінде шыны, кальцийленген сода, пластик шыны және сорғы-компрессорлық құбырлар шығару, түйе сүтінен құрғақ ұнтақ өндіру, ет комбинаты, құс фабрикасы бойынша өндірістер құруға бағытталған экспортқа бағдарланған индустриялық жобалар бар. “Арал тұз” АҚ-да ас тұзын өндіру бойынша 3 испан цехын құру, “Шалқия” қорғасын-мырыш кен орнында КБК салу, кварц құмдарын байыту бойынша жобалар іске асырылуда.
Тек осы жобалар аясында ағымдағы жылы өңір экономикасына 25 млрд.теңгеден астам инвестиция салу жоспарланып отыр. 
Бұдан басқа, құрылыс индустриясы саласында, ауыл шаруашылығы өнімдерін терең өңдеу бойынша, сондай-ақ, шыны және химиялық кластерлер саласында кәсіпорындар құру бойынша құны 62 млрд.теңгеден асатын 27 жаңа инвестициялық жобаны іске асыру басталады.
Осы жылдың басынан бастап Қызылорда облысының өңдеу өнеркәсібінде өнім өндіру көлемі 3,4%-ға өсті.

Қызылорда облысында мұнай өндіру төмендеуде, алайда өңдеу өнеркәсібі белсенді дамуда

<a href="https://kyzylorda-news.kz/">Kyzylorda-news.kz.</a> Қызылордада 26-шы қазаннан бастап кинотеатрлар ашылады деген бейресми ақпарат тарады.
Өңірлік коммуникациялар алаңында өткен брифингте облыстың Бас мемлекеттік санитариялық дәрігері Әлия Әбдіқайымова бұны жоққа шығарды.
<blockquote>
 “Өңірдегі кинотеатрларды 26 қазаннан бастап ашу әлі жоспарда жоқ. Керісінше, коронавирус инфекциясын таратпас үшін шектеу шараларын жалғастырамыз. Барлығы эпид ахуалдың тұрақты болуына байланысты. Жағдайға байланысты Қаулы қабылдап отырамыз”, – деді облыстың Бас мемлекеттік санитариялық дәрігері.
</blockquote>

Қызылорда: Кинотеатр қашан ашылатыны белгісіз

<a href="https://kyzylorda-news.kz/date/2020/10/20/">Kyzylorda-news.kz</a>. Қызылорда облыстық төтенше жағдайлардың алдын алу және оларды жою жөніндегі комиссияның кезекті отырысы өтті.
Бүгін облыс әкімі Гүлшара Әбдіқалықованың төрағалығымен облыстық төтенше жағдайлардың алдын алу және оларды жою жөніндегі комиссияның кезекті отырысы өтті. Комиссия отырысына облыстық департамент және басқарма басшылары, сондай-ақ, селекторлық байланыс арқылы аудан әкімдері қатысты. Күн тәртібінде 3 мәселе қаралды. Атап айтқанда, 2020-2021 жылдардағы ықтимал су тасқынының алдын алу шаралары, облыс аумағындағы эпизоотиялық ахуал мен облыстағы қазіргі эпидемиологиялық жағдай және алдағы атқарылатын шаралар туралы айтылды.
Бірінші мәселе бойынша облыстық жұмылдыру дайындығы басқармасының басшысы Медет Усаин баяндады.Қызылорда облысы Сырдария өзенінің төменгі ағысында орналасуы себепті қыс-көктем айларындағы мұз қату және сең жүру кезеңдерінде елді мекендерімізге су басу қауіпін төндіреді. Осыған сәйкес, жыл сайын су тасқынының алдын алу шаралары жүргізіліп келеді.
Жалпы алдағы 2020-2021 жылдардағы ықтимал су тасқынына дайындық шаралары бойынша өзен бойы қорғаныс бөгеттерінің тұсы қауіпті 56 су басу аймақтарына бөлініп, оған 122 жауапты мекемелер бекітілген. Олардағы арнайы техника саны 432 бірлікті және 1 491 адам күшін құрайды.
Қазіргі таңда облыс бойынша су тасқынына қарсы жұмыстарға пайдаланылатын материалдық-техникалық қорлар бойынша барлығы 76,7 тонна жанар-жағар май қоры және 99 540 дана қап бар. Сондай-ақ, 27 750 бау қамыс, 5 600 дана пашын және 6 552 қарабура мен т.б. қажетті материалдар қорлары жасақталған. Ағымдағы жылы су тасқынының алдын алу мақсатында 643,5 млн. теңге қаржы қаралды. Оның ішінде қорғаныс бөгеттерін нығайту, мұз жару жұмыстары мен қап сатып алу, тікұшақ қызметін пайдалану қарастырылған.
2020 жылға жалпы ұзындығы 70,5 шақырымды құрайтын өзен бойындағы қорғаныс бөгеттерінің 11 қауіпті учаскелерінде жөндеу, арнаны қазу жұмыстары жүргізіледі деп жоспарланған.
<blockquote>
 «Екі ай шамасында өзен арнасында мұз қату процессі басталады. Облыстық жұмылдыру дайындығы басқармасына осы мақсатта бөлінген қаржының мерзімінде игерілуін және жұмыстың сапалы атқарылуын қатаң бақылауға алуды тапсырамын. Қармақшы ауданы Абыла елді мекені тұсындағы Тойымбет каналына 2 көзді және Жаңақорған ауданындағы Өзгент көліне 1 көзді су тоспаларын салу жұмыстарын шұғыл түрде жүргізу қажет. Қазалы ауданының Тасарық, Қызылқұм елді мекенін су басудан қорғау мақсатында Қуаңдария каналына 3 көзді су тоспасын салу жұмыстарының жоба сметалық құжаттарын әзірлеу және құрылысын салу жұмыстарына қаржы бөлуге бюджеттік өтінім жолдансын», – деді облыс әкімі.
</blockquote>
Сонымен қатар, тиісті сала басшыларына су басу аймақтарына жақын аумақтарға қажетті жұмыстарды ұйымдастыруды және Шардара су қоймасынан күз-көктем айларында Сырдария өзенінің төменгі ағысына түсірілетін су көлемінің бекітілген кестеге сәйкес босатылуына үнемі бақылау жасауды жүктеді.Облыс аумағындағы эпизоотиялық ахуал туралы облыстық ветеринария басқармасының басшысы Ерсұлтан Апетов сөз сөйледі.
<img src="https://kyzylorda-news.kz/wp-content/uploads/2020/10/122027838_2831898640246520_7875735224991032007_o.jpg" alt="" />
Үстіміздегі жылы облыс көлемінде ауыл шаруашылығы жануарлары арасында ауру ошақтарын болдырмау, алдын алу, эпизоотиялық тұрақтылықты сақтау мақсатында аса қауіпті 14 түрлі жұқпалы ауруларға республикалық бюджет есебінен қаралған 5542,4 мың доза ветеринариялық препарат жеткізілді. Жыл басынан 57,6 мың бас МІҚ, 258,4 мың бас уақ мал, 27,5 мың бас жылқы, 8,3 мың бас түйе, 1,7 мың бас шошқа, 48 бас тақтұяқтылар бірдейлендіріліп, дерекқор жүйесіне енгізілген.Облыс бойынша жоғары патогенді құс тұмауы ауруын алдын алу мақсатында ауруға қарсы 96,8 мың доза ветеринариялық препараттар жеткізіліп, үй құстарына алдын ала вакцина егу жұмыстары жүргізілді.
Аймақ басшысы жоғары патогенді құс тұмауы ауруының алдын алу, болдырмау мақсатында тұрғылықты халық арасында тиісті түсіндірме жұмыстарын тұрақты түрде жүргізу қажет екенін ескертіп, облыс көлемінде аса қауіпті жұқпалы ауруларды болдырмау мақсатында ветеринариялық іс-шаралардың уақытылы жүргізілуіне бақылауды күшейтуді жүктеді.
Күн тәртібіндегі үшінші мәселе туралы облыстық денсаулық сақтау басқармасының басшысы Сабит Пазилов пен облыстық Бас мемлекеттік санитариялық дәрігері Әлия Абдикаимова баяндама жасады.
<img src="https://kyzylorda-news.kz/wp-content/uploads/2020/10/122023098_2831898543579863_2870068748945123093_o.jpg" alt="" />
Бүгінгі күнге, коронавирус инфекциясы бойынша аймағымыздағы эпидемиологиялық жағдай тұрақталды. Облыста 210 инфекциялық төсек орын бар. 18 науқас стационарлық режимде, 1 науқас жансақтау бөлімінде ем алуда. Эпид маусым басталғалы іс-шараларға тартылған барлық 13 380 қызметкерге 2 573,9 млн теңге төленді.
Медициналық құралдармен жабдықталу 10 айдың қорытындысымен 88,5% құрады. Инфекциялық стационарлардың реанимация бөлімінің құралдармен жабдықталу көрсеткіші 75%-дан 85,06%-ға дейін жоғарылады.
Қазіргі таңда облысымызда 244 ИВЛ аппараттары жұмыс жасауда. Одан бөлек, өңіріміздегі медициналық ұйымдарға гуманитарлық көмек арқылы 658 оттегі концентраторлары жеткізілді. Сонымен қатар, облыста 518 оттегімен қамтамасыз етілген төсек орындар дайын.
Облыста 24 мониторингтік топ жұмыс істейді. Барлық аудандар мен облыс орталықтарында тұрақты түрде мониторинг жүргізілуде. Рейдтік тексерумен қамтылған объектілер саны – 2942. Кезең-кезеңмен іске қосылған объектілерге жүргізілген мониторинг барысында 631 заң бұзушылық анықталып, айыппұлдар салынды.
Бүгінгі күні 4 зертхана жұмыс жасап жатыр, қажеттілікке байланысты қосымша 4 зертхана іске қосылуға дайын.
<blockquote>
 «Маусым-шілде айларындағы жағдай қайталанбас үшін тиісті жұмыстарды уақытылы жүргізу қажет. Отбасылық іс-шаралар жасап жатқан тұрғындарға, кафе, мейрамхана иелеріне қаншама ескерту берілсе де, айыппұл салынса да жұмыстарын тоқтатпай отыр. Тіпті мемлекеттік мекемелердегі сақтық шаралары қызметкерлер арасында толық сақталмайды. Талап ортақ, карантин шараларының тиімді іске асуына бәріміз жауаптымыз», – деді облыс әкімі.
</blockquote>
Мұнымен қоса, жоспарланған төсек орындардың дайындығын және науқастарды оттегімен қамтамасыз ету бойынша тиісті жұмыстарды жүргізу, бастапқы медициналық-санитарлық және стационарлық көмек нысандарының қажетті ресурстармен толығымен жабдықталуын қамтамасыз ету керектігін атап өтті.ПТР лабораторияларының жұмыстарын күшейтіп, 21 қазаннан бастап тәулігіне өткізілетін талдаулардың санын 1000 дейін жеткізу қажет екенін ескертіп, инфекциялық стационарларға бейнебақылау жүйелерін орнатуды және медицина ұйымдарының КВИ-ға қарсы дәрілік препараттарды қажеттілік болжамын нақтылап, жеткіліксіз болған жағдайда «СК-Фармация» ЖШС-не уақытылы тапсырыс беруді жүктеді.
Жиын соңында облыс әкімі Гүлшара Әбдіқалықова тұрғындарды санитариялық талаптарды қатаң сақтауға шақырды.

Гүлшара Әбдіхалықова: Жұмыстың сапалы атқарылуын қатаң бақылауға алуды тапсырамын

<a href="https://kyzylorda-news.kz/date/2020/10/20/">Kyzylorda-news.kz</a>. Мемлекет басшысы ҚР Парламенті Мәжілісі және мәслихат депутаттары сайлауын тағайындау туралы үндеу жариялады.
Құрметті отандастар!
Бүгін мен Парламент Мәжілісі депутаттарының сайлауын тағайындау туралы Жарлыққа қол қойдым. Орталық сайлау комиссиясының қаулысымен барлық деңгейдегі мәслихат депутаттарының сайлауы тағайындалады.
Алдағы сайлау&nbsp;конституциялық мерзімге сәйкес, 2021 жылдың 10 қаңтарында&nbsp;өтеді. Барлық саяси партиялардың бұл сайлау науқанына қатысуға дайындалуына, сайлау алдындағы платформасын әзірлеуіне, партиялық инфрақұрылымдарды жетілдіруіне уақыты жеткілікті болды.
Орталық сайлау комиссиясы мен Бас прокуратура сайлаудың&nbsp;заңдылығын, ашықтығын және әділдігін&nbsp;сақтау үшін тұрақты бақылау жүргізіп отырады.
Жаңа сайлау науқанына дейін&nbsp;саяси жаңғыру, көппартиялықты дамыту және еліміздің қоғамдық-саяси&nbsp; өміріне азаматтардың қатысу аясын кеңейту&nbsp;жөнінде шаралар қабылданды.
Бірінші.&nbsp;«Қазақстан Республикасының Парламенті және оның депутаттарының мәртебесі туралы» конституциялық &nbsp;заңға және «Қазақстан Республикасы Парламентінің комитеттері мен комиссиялары туралы» заңға түзетулер енгізу арқылы&nbsp;парламенттік оппозиция институтын құру&nbsp;мәселесін қарастыратын және оның қызметін регламенттейтін өзгерістер мен толықтырулар жасалды.
Енді Парламент Мәжілісі тұрақты комитеттерінің&nbsp;бір төрағасы мен екі хатшысы&nbsp;парламенттік оппозиция депутаттары арасынан&nbsp;сайланады.
Сонымен қатар, парламенттік оппозиция бір сессия кезінде кемінде бір рет&nbsp;парламенттік тыңдау өткізу жөнінде бастама көтеру&nbsp;құқығын иеленеді. Сондай-ақ бір сессия кезінде кемінде екі рет үкімет сағатының күн тәртібін айқындайтын болады.
Бұдан бөлек, саяси партиялар фракцияларының жетекшілеріне Парламент палаталарының бірлескен отырыстарында, Парламент Мәжілісінің пленарлық отырыстарында, тұрақты комитеттердің, жұмыс топтарының отырыстарында, парламенттік тыңдауларда және басқа іс-шараларда&nbsp;сөз сөйлеуге кепілді құқық&nbsp;беріледі.
Екінші.&nbsp;«Қазақстан Республикасындағы сайлау туралы» конституциялық заңда және «Саяси партиялар туралы» заңда қарастырылған ережелер бойынша&nbsp;парламенттік тәжірибемізде алғаш рет партиялық тізімге әйелдер мен жастар үшін&nbsp;30 пайыздық квота&nbsp;енгізілді. Бұл норма Парламентке және жергілікті өкілді органдарға әйелдер мен жастарды тартудың тиімді жолы ретінде олардың еліміздегі қоғамдық-саяси үдерістерге белсенді қатысуына септігін тигізеді.
Үшінші.&nbsp;Алдағы&nbsp;мәслихаттар&nbsp;сайлауы алғаш рет&nbsp;партиялық тізім&nbsp;бойынша өтеді.&nbsp;Пропорционалды модель әлемдік демократиялық тәжірибеге толық сай келеді, саяси жүйені нығайтуға, демократияны дамытуға ықпал етеді, саяси партиялардың жұмысын жандандырады.
Бұл жаңа бастамалар партияларға еліміздің саяси жүйесіндегі ұстанымын нығайту үшін қосымша мүмкіндіктер береді.
***
Коронавирус пандемиясы салдарынан туындаған күрделі экономикалық дағдарыс көптеген елді қамтыды, сондай-ақ, бүкіл әлемдік экономикаға кері әсер етті.
Қазіргі күрделі кезеңде Қазақстанның алдында дағдарысқа қарсы тиімді шаралар қабылдау, орнықты экономикалық дамуды және азаматтарымыздың әлеуметтік игілігін қамтамасыз ету, халықтың әл-ауқатын арттыру міндеті тұр.
Осы басымдықтар жөнінде менің Қазақстан халқына арнаған Жолдауымда айтылды.
Парламенттің және жергілікті өкілді органдардың жаңартылған құрамы еліміздегі әлеуметтік-экономикалық реформаларды сапалы әрі заңнамалық тұрғыдан қамтамасыз етуге баса мән береді.
Алдағы сайлау еліміздің саяси жүйесін жаңартуды қамтамасыз ететін саяси институттарды дәйекті түрде демократияландыруға және жаңғыртуға Қазақстанның аса ықыласты екенін тағы да бір дәлелдейтін болады.
Біздің ортақ миссиямыз – Қазақстанды өркендету, азаматтарымыздың игілігі үшін қызмет ету. Қазақстан халқы аса маңызды тарихи сындарлы сәттерде бір жеңнен қол, бір жағадан бас шығара білді. Халқымыз осы жолы да елімізді жан-жақты жаңғырту бағытындағы жаңа тарихи миссиясын лайықты атқарады деп сенемін. Тәуелсіздіктің 30 жылдығы қарсаңында еліміз кемелдене түсіп, дамудың жаңа кезеңіне шығатынымыз анық.
Мемлекетіміздің барлық азаматтарын белсенді азаматтық ұстанымын танытуға, Парламент Мәжілісінің және мәслихаттардың алдағы сайлауына ұйымшылдықпен қатысуға шақырамын.

Қасым-Жомарт Тоқаев үндеу жариялады

<a href="https://kyzylorda-news.kz/date/2020/10/19/">Kyzylorda-news.kz.</a> Жыл басынан бері Қызылорда облысы бойынша медициналық ұйымдарына 54,69 млрд теңге төленді.
Бұл қаржыландыруды Әлеуметтік медициналық сақтандыру қоры мемлекеттік тапсырыс шеңберінде тегін медициналық қызметтер үшін және міндетті әлеуметтік медициналық сақтандыру пакеті шеңберінде жүзеге асырады. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.
Аталған қаражаттың 36,96 млрд теңгесі тегін медициналық көмектің кепілдік көлеміне берілген. Ал 17,73 млрд теңгесі МӘМС аясындағы қызметтерге бөлінген.
2020 жылға Әлеуметтік медициналық сақтандыру қорының филиалымен 55 медициналық қызмет көрсетушілермен келісім – шарт жасалды, оның ішінде – 28 мемлекеттік медициналық ұйым, 27 – жеке меншік.
Барлығы 60,9 млрд теңгеге шарттар жасалды, оның ішінде 44,3 млрд теңге (72,7%) тегін медициналық көмектің кепілдік берілген көлемі шеңберінде, 16,6 млрд теңге (27,3%) МӘМС қаржысы құрайды.

Қызылорда: Медициналық ұйымдарға 54,69 млрд теңгеден астам қаржы төленді

Kyzylorda-news.kz. Бүгін Қызылорда облысының әкімі Гүлшара Әбдіқалықова «Орман шаруашылығы қызметкерлері күні» кәсіби мерекесіне орай аймақтағы бірқатар сала ардагерлері мен қызметкерлерін құттықтады.
Аймақ басшысы облыстың экологиялық жағдайын жақсартуда орман шаруашылығының қызметі ерекше екіндігін атап өтті.
<blockquote>
 “Қазақстанның шөлді аймағында орналасқан біздің өңір үшін орман шаруашылығының өз орны бар. Тыныс-тіршілігіміз үшін маңызы зор саланы нығайтуда сіздер білікті де білімді, іскер де қабілетті маман ретінде өзгелерге үлгі-өнеге болып, облысымыздың әлеуметтік-экономикалық және орман шаруашылығы салаларының дамуына өлшеусіз үлес қосып келесіздер. «Атадан мал қалғанша, тал қалсын» дейді даналарымыз. Олай болса, Сыр елінің табиғатын сауықтыру, орманды сақтау, қорғау мен молықтыруға әрі қарай да аянбай еңбек ете беретіндеріңізге сенім білдіріп, қиындығы мен қызығы қатар жүрген еңбектеріңізге толағай табыс, шаңырақтарыңызға шаттық, құт-береке тілеймін, – деді аймақ басшысы Г.Әбдіқалықова.
</blockquote>
Кездесуде аймақтың экологиялық ахуалын жақсартып, орман алқаптарының артуына үлес қосқан сала ардагерлері Мұхидин Исмаилов, Сақтаған Ешмахановқа “Құрмет” грамотасы, ардагер Қадиша Әлімбетова және сала мамандары Сабит Садықов, Гаухар Жумабаева, Бахытжан Әлімжанов, Айболат Берекешов, Ерболсын Үсенбаев, Ержан Жүнісов, Темірбай Сарымбаев, Жәнібек Сарыбаевқа облыс әкімінің “Алғыс хаты” табысталды.
Шарада сөз алған сала ардагерлері Мұхидин Исмаилов, Сақтаған Ешмаханов және Қадиша Әлімбетова соңғы жылдары орман шаруашылығына мемлекеттен қолдаудың артқанын айтып өтті. Осының арқасында Сыр өңірінде ауқымды жұмыстар атқарылып, сексеуіл алқаптарының өскенін жеткізді. Кәсіби мерекеде орманшыларды құттықтап, құрмет көрсеткен облыс әкіміне ризашылығын білдірді.
Айта кетейік, облыс аумағындағы 24 млн. гектар жердің 6,5 млн. гектарын мемлекеттік орман қоры құрайды.
<img src="https://kyzylorda-news.kz/wp-content/uploads/2020/10/fb_img_1602859996850.jpg" alt="" />
<img src="https://kyzylorda-news.kz/wp-content/uploads/2020/10/fb_img_1602859994272.jpg" alt="" />
<img src="https://kyzylorda-news.kz/wp-content/uploads/2020/10/fb_img_1602859992490.jpg" alt="" />

Қызылорда облысының әкімі орман шаруашылығы қызметкерлерін марапаттады

<a href="https://kyzylorda-news.kz/">Kyzylorda-news.kz</a>. Қазақстан президенті Қасым-Жомарт Тоқаев Семейде абайтанушы ғалымдармен кездесті. Мемлекет басшысы республикада Абай мектептерін ашуды ұсынды, деп хабарлайды&nbsp;<a href="https://www.akorda.kz/kz">Ақорда.</a>
Кездесу барысында президент гуманитарлық саланы дамыту қажеттігін, оның ішінде қазақ тілі мен әдебиетін оқытуға және сапалы оқулық дайындауға баса мән беруі керектігіне тоқталды.
Тоқаев ана тілі мен төл әдебиетттің қадір-қасиетін балаларға мектеп жасынан бастап сіңіру керек деп санайды. Бұл бағытта бірыңғай ұстаным қажет.
<blockquote>
 “Осыған орай Алматыдағы Абай атындағы мектеп-интернаттың мүмкіндіктерін толық пайдаланған жөн. Қазақ тілі мен әдебиетін тереңдете оқытатын бұл мектептің оқу үдерісі басқа мектептерге үлгі болады деп ойлаймын. Оны заманауи талапқа сай жан-жақты жетілдіріп, “Абай мектебі” деп аталатын ең үздік білім ордасына айналдыру қажет. Жалпы біз келешекте Абай мектептерін ашу туралы ойлануымыз керек”, – деді Тоқаев.
</blockquote>
Мемлекет басшысы биылғы мерейтой кезінде елге ой салатын, тағылымы мол нақты шаралар атқарылғанын, бұл үрдіс Абай жылынан кейін де жалғаса беретінін атап өтті.
Сондай-ақ, ұлы Абайдың тұлғасын шетел жұртшылығына кең ауқымда таныту жобасы бойынша ақынның шығармалары ағылшын, испан, араб, түрік, қытай, неміс, итальян, француз және жапон тілдеріне аударылды. Президент аудармалардың көркемдік сапасы өте жоғары деп санайтынын жеткізді.
<blockquote>
 “Абай шығармаларын әлемде кең тараған тілдерге аударып, басу – бірегей халықаралық жоба. Бұл жаһанға қазақ мәдениетінің жаңа қырын танытып, әлемдегі барша оқырмандарға Абай шығармашылығымен, терең философиясымен және теңдессіз лирикасымен танысуға мүмкіндік береді”, – деді президент.
</blockquote>
Кездесу барысында Тоқаев зиялы қауым өкілдерінің қоғамдағы рөлі мен орнына тоқталып, олардың қашанда ұлттық құндылықтарды бәрінен биік қоятынын, әрдайым мәртебелі миссия атқарып келе жатқанын баса айтты.
Кездесуде Мекемтас Мырзахметұлы, Тұрсын Жұртбай, Ғарифолла Есім, Борис Щербаков, Арап Еспенбетов секілді ғалымдар мен абайтанушылар сөз сөйледі.
Кездесу соңында Тоқаев абайтануға айтулы еңбек сіңірген, отандық ғылымның дамуына өлшеусіз үлес қосқан бірқатар азаматты мемлекеттік наградалармен марапаттады.

Қазақстан және Қызылорда облысының жаңалықтары: Басты жаңалықтар old