<a href="https://kyzylorda-news.kz/">Kyzylorda-news.kz</a>. Ертең Қорқыт ата атындағы Қызылорда университетінде ҚР Тәуелсіздігінің 30 жылдығы аясында халықаралық форум өтеді.
Ғылыми шараға 500-ге жуық оқытушы-профессор, шетелдік және отандық ғалым қатысады деп күтілуде. Пандемияға байланысты форумды офлайн және онлайн форматта өткізу жоспарлануда. Бұл туралы Өңірлік коммуникациялар қызметінің ақпараттық алаңында өткен брифингте Қорқыт ата атындағы Қызылорда университетінің проректоры Абайбек Жүнісов мәлімдеді.
<blockquote>
 «Өздеріңізге белгілі, Президентіміз Қасым-Жомарт Кемелұлы үкімет отырысында Тәуелсіздіктің 30 жылдығын атап өтудегі ерекшеліктерді атап өткен болатын. Мемлекет басшысы ел тарихындағы елеулі мереке кезінде құр даңғаза мен ысырапшылдыққа жол беруге болмайтынын, әрбір шараны елге пайдасы тиетін нақты істерге ұластыру қажет екенін баса айтты. Осыған орай, форумда қатысушылар «Қазіргі сын-қатерлер, дәстүрлер мен инновациялар: «Әлеумет. Тұлға. Құндылықтар» атты тақырыбында құнды ойларын айтып, пікір алмасады. Яғни Тәуелсіздік жылдарындағы жетістіктер, елдің экономикалық дамуы, рухани жаңғыру мен жастар мәселелері қозғалады. Айта кетейік, ғылыми шара барлық карантин талаптарына сай жүргізіледі», – деді Абайбек Талғатұлы.
</blockquote>
<img src="https://kyzylorda-news.kz/wp-content/uploads/2021/06/img-20210630-wa0030.jpg" alt="" />

Тәуелсіздіктің 30 жылдығы: Қызылордада халықаралық форум өтеді

*<a href="https://kyzylorda-news.kz/">Kyzylorda-news.kz</a>.&nbsp;Бүгін облыс әкімі Гүлшара Әбдіқалықова Н.Бекежанов атындағы музыкалық драма театрында Бұқаралық ақпарат қызметкерлерінің кәсіби мерекесіне арналған салтанатты шараға қатысып, БАҚ қызметкерлеріне құрмет көрсетті.*
Аймақ басшысы ұлттық рухты қалыптастыруда, қоғамдағы әлеуметтік маңызы бар бастамалардың өміршеңдігіне елеулі үлес қосып жүрген журналистердің еңбегін айрықша атап өтіп, Тәуелсіздіктің 30 жылдығы ішінде елдің дамуына БАҚ өкілдерінің ерекше ықпал еткенін тілге тиек етіп, төл мерекеде тілшілерге ақжарма тілегін арнады.
<blockquote>
 “Бүгінгідей ақпарат тасқыны алапат дәуірде таңдаған мамандығына адал болып, ұстанымын өзгертпеген, қалам қасиетін ардақ тұтқан журналист қауымына жақсы тілектерімізді айту үшін жиналып отырмыз. Өздеріңіздей туған жердің тарихын қадір тұтып, бүгінгісіне марқайып, ертеңіне алаңдайтын қауыммен жүздесуді сағынып қалғанымыз да рас. Ұлт болып ұйысуға, мемлекет болып ілгерілеуге бағытталған елдік шаруаларға, Елбасы бастамалары мен Мемлекет басшысының тапсырмаларын жүзеге асыруға қосқан өлшеусіз үлестеріңіз үшін өздеріңізге риясыз алғысымызды айтамыз.Төтенше жағдай кезінде дәрігерлер, күштік құрылым қызметкерлері сапында сіздер де жүріп, ең қиын сәттерде шынайы ақпарат тараттыңыздар. Ресми органдар мен бұқара халықтың арасында алтын көпірге айналып, ағайынның ауызбірлігі, қалтқысыз сенім, қиналғанда бір-біріне қол созған қайырымды жандар туралы көрсетілім, мақала жаздыңыздар. Сол үшін де сіздерге Сыр жұртшылығы атынан зор ризашылығымызды білдіреміз”, – деді Гүлшара Әбдіқалықова.
</blockquote>
Кәсіби мерекеде ақпарат саласының дамуына қызмет етіп, өңірдің өркенді істері мен айшықты сәттерін бұқараға насихаттап жүрген бірқатар БАҚ өкілдері марапат төрінен көрінді.
Облыс әкімі Гүлшара Әбдіқалықова ең алдымен ҚР Президенті Қасым-Жомарт Тоқаевтың «Алғыс» хатын республикалық «Хабар 24» телеарнасының меншікті тілшісі Қамбар Бекеновке, «Қазақстан» Ұлттық телеарнасының меншікті тілшісі Әділбек Жақановқа, «Халық» газетінің бас редакторы Нұржан Нұрмағанбетовке табыстады. Ал, «Еңбек ардагері» медалімен «Шарайна-Сейхун» аймақтық ақпараттық-танымдық басылымының директор-редакторы Нұрмахан Елтай, ҚР Мәдениет қайраткері, Қазақстан жазушылар және Журналистер одақтарының мүшесі Тілеген Бекарыстанов марапатталды.Төл мерекеде «Қазақстан» РТРК» АҚ облыстық филиалының бас редакторы Айнұр Тұңғышбаева, «Сыр бойы» газетінің бас редакторының орынбасары Гүлжазира Жалғасова, республикалық «Atameken Business News» телеарнасының меншікті тілшісі Шарипа Сақтапова, «Кызылординские вести» газетінің бас редакторы Қазбек Ботаев, республикалық «Хабар 24» телеарнасының меншікті тілшісі Қамбар Бекенов «Ақпарат саласының үздігі» төсбелгісін иеленді. Ал, Қазақстан Журналистер Одағының «Қазақстанның Құрметті журналисі» атағы ардагер журналист Айткүл Шалғынбаеваға табысталды.
Салтанатты шарада 4 журналист ҚР Ақпарат және қоғамдық даму министрінің «Құрмет грамотасымен», 6 журналист облыс әкімінің «Құрмет грамотасымен», 20 журналист арнайы номинациямен, 11 журналист облыс әкімінің «Алғыс» хатымен марапатталды.
Жыл сайын жас журналистер арасында өтетін С.Бермағанбетов атындағы байқау жеңімпаздарына да марапат бұйырды. «Қоғам ТВ» телеарнасының редакторы Назгүл Қажытаева «Үздік сюжет», «Ақмешіт апталығы» газетінің тілшісі Ерсін Шамшадин «Үздік мақала», «Halyqline.kz» сайтының редакторы Рыскелді Жахман «Үздік жарияланым» номинациясына лайық деп танылды. Сондай-ақ, «Тіршілік тынысы» газетінің тілшісі Балтабай Ордабеков ҚР Тәуелсіздігінің 30 жылдығына орай облыстық шығарма жазу байқауының жеңімпазы атанды.
Мерекелік шара арнайы концерттік бағдарламаға ұласты. Журналистердің құрметіне Сыр елінің белгілі жыршылары жыр арнап, Қазақстанның Еңбек сіңірген әртісі Күлән Қалымбетова «Сыр елім» әнін тарту етті. Сондай-ақ, «Томирис» би ансамблі, «Ақмешіт» фальклорлық ансамблі өнер көрсетіп, Жастар театрының әртістері Асқар Тоқмағамбетовтің «Қызылорда» поэмасын сахналады.
<img src="https://kyzylorda-news.kz/wp-content/uploads/2021/06/fb_img_1624888176186.jpg" alt="" />

Гүлшара Әбдіқалықова БАҚ өкілдерін мерейлі мерекемен құттықтады

<a href="https://kyzylorda-news.kz/">Kyzylorda-news.kz</a>. Қызылорда облысының әкімі Гүлшара Әбдіқалықова БАҚ өкілдерін кәсіби мерекемен құттықтады.
Қадірлі журналистер, бұқаралық ақпарат құралдарының қызметкерлері!
Сіздерді кәсіби мерекелеріңіз – бұқаралық ақпарат құралдары қызметкерлерінің күнімен құттықтаймын! ХХІ ғасырды ақпараттық кеңістіктің дәуірлеу кезеңі деуге болады.
Өңіріміздің әлеуметтік-экономикалық дамуы, күнделікті болып жатқан жаңалықтар мен оқиғалар, өзгерістер, рухани, мәдени көзқарастар, сыни пікірлер ақпарат құралдары арқылы елге жетіп жатыр. Яғни, қандай да бір ақпарат құралының сөзі қоғамдық пікір қалыптастырудың темірқазығы іспетті. Елбасымыз Нұрсұлтан Әбішұлы Назарбаевтың сөзімен айтқанда, «бұқаралық ақпарат құралы қоғамды алға жетелеудің басты дәнекері».
Сіздердің қаламдарыңыздан, әзірлеген сюжеттеріңізден туған дүниелер – біздің өңірдің ғана емес, тәуелсіздігіне 30 жыл болған Қазақстанның тыныс-тіршілігінің бүгінгі айнасы, ұрпақтан-ұрпаққа мирас болар ертеңгі тарихи шежіресі. Мемлекет басшысы Қасым-Жомарт Кемелұлы Тоқаевтың 28 маусымды бұқаралық ақпарат құралдары қызметкерлерінің күні ретінде арнайы бекітуі – сіздердің еңбектеріңізге берілген құрмет деуге болады.
Әлемді жаулаған COVID-19 коронавирус індетіне байланысты жарияланған төтенше жағдай кезінде медициналық және әскери қызметкерлермен бір сапта болып, халыққа қажетті ақпаратты дер уақытында тарата білдіңіздер. Сол үшін де сіздерге Сыр жұртшылығы атынан зор ризашылығымды білдіремін!
Шұғыл қимыл, жедел ақпарат, тұшымды хабар жасау арқылы мемлекеттік билік пен халықтың арасында алтын көпір болған сіздерді төл мерекелеріңізбен құттықтай отырып, шығармашылық табыс, мықты денсаулық, шаңырақтарыңызға құт-береке, шадыман шаттық тілеймін!
Тәуелсіз Қазақстанымыз жасай берсін!

Гүлшара Әбдіқалықова БАҚ өкілдерін құттықтады

<a href="https://kyzylorda-news.kz/">Kyzylorda-news.kz</a>.&nbsp;Қызылордада «Тұғыры биік Тәуелсіздік» атты республикалық ақындар айтысы өтті.
Аламан дода Тәуелсіздіктің 30 жылдығына орай ұйымдастырылды. Н.Бекежанов атындағы қазақ академиялық музыкалық драма театрында өткен бәйгесіне республиканың түкпір-түкпірінен 12 ақын қатысты.
Айтыс қорытындысы бойынша ІІІ орынды Аспанбек Шұғатаев, Әсем Ережеқызы, Айбек Қалиев алса, ІІ орынға Бекарыс Шойбеков, І орынға Мұхтар Ниязов лайық деп танылды. Ал бас жүлде Нұрзат Қаруға бұйырды.

Қызылордада өткен республикалық ақындар айтысының қорытындысы шықты

<a href="https://kyzylorda-news.kz/">Kyzylorda-news.kz</a>. Сыр еліне сапары аясында ҚР Президентінің көмекшісі мұнай-сервистік саладағы басшылар мен бизнес өкілдерімен кездесті.
ҚР Президентінің көмекшісі Қанат Бозымбаев Сыр еліне сапары аясында бірқатар маңызды жиындар өткізді. Ең әуелі өңірдегі мұнай-сервистік саладағы компания өкілдерімен кездесіп, өзекті мәселелерді талқылады. Аймақ басшысы Гүлшара Әбдіқалықова соңғы жылдары кен орындарының сарқылуына байланысты мұнай өндірудің көлемі төмендеп бара жатқанын алға тартып, бұл кездесу ортақ мәселелерді айқындап алуға мүмкіндік беретінін жеткізді.
Жиында облыс әкімінің орынбасары Нұрлан Тілешев мұнай-газ саласындағы қазіргі жағдайды баяндап, экономикадағы негізгі көрсеткіштерді тізбеледі. Сондай-ақ, отырыста мұнай және сервистік компаниялардың басшылары «ПетроҚазақстан Құмкөл Ресурстар» АҚ вице-президенті Болат Көшербаев, «Жанрос Дриллинг» ЖШС бас директоры Алексей Мылтықбаев ортақ мәселе аясындағы ұстанымдарын білдірді.
Отырыста компания басшыларының мәселелерін тыңдаған ҚР Президентінің көмекшісі мұнай қорындағы ахуал мәселесі Үкімет деңгейінде бірнеше рет қаралғанын атап өтті. Бұл ретте қуаттылығы 6 миллион тоннаны құрайтын “Кеңқияқ-Атырау” мұнай құбырының құрылыс жұмыстары аяқталса, жоба Қызылорда облысындағы мұнай өндіруші компаниялар үшін мұнай жеткізу жүктемесін азайтуға оң септігін тигізеді.
Жиынды қорытындылаған облыс әкімі Гүлшара Әбдіқалықова мұнай-газ саласындағы негізгі мәселелерді шешу үшін кешенді жұмыстардың қолға алынғанын және мұнай-газ секторында қызмет ететін сала өкілдерін ортақ мүддеге топтасып, бірлесе күш біріктіруге шақырды.
Мұнан кейін Қанат Бозымбаев өңірдегі бизнес өкілдерімен кездесті. Отырысқа кәсіпкерлер, қала, аудан әкімдері, кәсіпкерлік саласында мемлекеттік саясатты іске асыруға тікелей атсалысатын мемлекеттік мекемелер мен қаржы институттары жиналды. Президент көмекшісі кәсіпкерлерге мемлекет тарапынан ұдайы қолдау барын тілге тиек етіп, әрбір өңірлерде “Атамекен” Ұлттық кәсіпкерлер палатасымен бірлескен микроқаржы ұйымдарының тиімділігі туралы сөз қозғады.
Сондай-ақ, жиында пандемия кезінде кәсіпкерлік саласында туындаған қиыншылықтар талқыланып, алдағы уақытта даму бағытында атқарылатын жұмыстар сараланды.
<img src="https://kyzylorda-news.kz/wp-content/uploads/2021/06/207275072_3477062115730166_300770796393910231_n.jpg" alt="" />
<img src="https://kyzylorda-news.kz/wp-content/uploads/2021/06/206255188_3477061949063516_2345708555884057389_n.jpg" alt="" />

ҚР Президентінің көмекшісі қызылордалық мұнай-сервистік саладағы басшылар мен бизнес өкілдерімен кездесті

<a href="https://kyzylorda-news.kz/">Kyzylorda-news.kz</a>. Сыр елінде «Тұғыры биік Тәуелсіздік» атты республикалық ақындар айтысы өтеді.
Аламан дода Тәуелсіздіктің 30 жылдығы аясында ұйымдастырылып отыр. 25 маусым күні сағат 10.00-де Н.Бекежанов атындағы қазақ академиялық музыкалық драма театрында болады. Жыр бәйгесіне еліміздің түкпір-түкпірінен жиналған 12 ақын қатысады.
Атап айтқанда, Шойбеков Бекарыс (Түркістан қаласы), Қалиев Айбек (Арқалық қаласы), Ережеқызы Әсем (Нұр-Сұлтан қаласы), Шұғатаев Аспанбек (Павлодар қаласы), Ширмединұлы Бауыржан (Орал қаласы), Қуанған Серік (Өскемен қаласы), Тілеутай Айшолпан (Семей қаласы), Рахметов Айдос (Қызылорда қаласы), Ниязов Мұхтар (Қызылорда қаласы), Мансұров Нұрмат (Сырдария ауданы), Қару Нұрзат (Қазалы ауданы) Бақытәліұлы Жамбыл (Қызылорда қаласы).
<blockquote>
 «Айтысты ақын, М.Мақатаев атындағы сыйлықтың екі мәрте иегері, «Құрмет», «Парасат» орденінің иегері, Қазақстанның еңбек сіңірген қайраткері, ұлт өнерінің жанашыры Жүрсін Ерман жүргізеді. Қазылар алқасының құрамы да жасақталды. Бәйгеге қатысушы барлық ақындарға сәттілік тілеймін», – деді облыстық мәдениет, архивтер және құжаттама басқармасының басшысы Мира Әбуова.
</blockquote>
Айтысқа қатысатын 12 ақын Тәуелсіздік жылдарындағы жетістері мен елдік мәселелерді көтеруі шарт. Өнер додасы екі айналымнан тұрады.
<blockquote>
 «Биыл еліміздің әр өңірінде Тәуелсіздіктің 30 жылдығы аясында ақындар айтысы ұйымдастырылуда. Соның бірі Сыр елінде өткелі отыр. Ертеңгі айтыста ақындар Тәуілсіздікті жырлайтын болады. Одан кейін 30 маусымда Нұр-Сұлтан қаласында «Тәуелсіздік тұмарым» атты аламан бәйге болады. Сондай-ақ, биылғы жылдың ең үлкен жобасы – «Асыл домбыра» атты аламан дода ұйымдастырылады. Бес айтыстан тұрады, 48 ақын қатысуда», – деді ақын, айтыс өнерінің ұйымдастырушысы Жүрсін Ерманов.
</blockquote>
<img src="https://kyzylorda-news.kz/wp-content/uploads/2021/06/203937916_1316507308744778_221881279080781734_n.jpg" alt="" />

Қызылордада республикалық ақындар айтысы өтеді

<a href="https://kyzylorda-news.kz/">Kyzylorda-news.kz</a>. Қызылорда облысы аумағында тасқын және қашыртқы суларды жинайтын жобаны іске асыру жоспарлануда. Бұл су ресурстарын ұтымды пайдалануға және вегетациялық кезеңде тапшылықтың болмауына мүмкіндік береді. Бұл туралы Өңірлік коммуникациялар қызметінің ақпараттық алаңында өткен брифингте облыстық табиғи ресурстар мен табиғат пайдалануды реттеу басқармасы басшысының орынбасары Бауыржан Оспанов баяндады.
<blockquote>
 «Облыста 207 көл бар. Көлдердің толымдылығы 52 пайызды құраса, ал 17 көлдің суы тартылған. Су тапшылығын алдын алу үшін облыстық бюджеттен елді мекендерге 43 дана насос қондырғыларын сатып алу және 18 каналға тазалау жұмыстары жүргізілуде. Сонымен бірге, шаруашылық құрылымдары тарапынан 47 насос қондырғы алынды. Қосымша 41 дана насос алынатын болады. Каналдар арқылы су алу режимдерінің кестеге сай орындалуына мониторинг жүргізетін жұмысшы тобы құрылды», – деді Бауыржан Әліпбайұлы.
 «Қазіргі уақытта жоғарыдан түсетін су көлемі болжанған кестеден кем түсуде. Осыған орай, болжамдық жұмыс кестесі қайта жасалды. Шардара мен Көксарайды қоса есептегенде төменге секундына 500 текше метр су жіберілуде», – деді Арал-Сырдария бассейндік инспекциясы РММ бөлім басшысы Сейітқасын Әбуов.
 «Бүгінде егіске Қызылорда сол жаға магистралді каналы, Айтек, Қазалы сол жаға және оң жаға магистралді каналдарынан су жіберуге кесте әзірленді. Мұнан өзге, қашыртқы суын қайта пайдалану әдісіне сәйкес шаруашылық құрылымдары өз есебінен насос қондырғыларын орнатып, қашыртқыдан ішкі каналдарға су тасталуда», – деді «ҚАЗСУШАР» РМК Қызылорда облыстық филиалының су шаруашылығы нысандарын пайдалану бөлімінің басшысы Айдос Асанбаев.
</blockquote>

Бауыржан Оспанов: Насос қондырғылары көбейтілуде

<a href="https://kyzylorda-news.kz/">Kyzylorda-news.kz</a>. Ресей президенті Владимир Путин Қызылорда облысының әкімін құрмет грамотасымен марапаттады.
<blockquote>
 “Ғарыш кеңістігін зерттеу және пайдалану, достықты нығайту саласындағы халықаралық ынтымақтастықты дамытуға зор үлес қосқаны үшін Қазақстан Республикасы Қызылорда облысының әкімі Әбдіхалықова Гүлшара Наушақызы Ресей Федерациясы президентінің Құрмет грамотасымен марапатталды”, – делінген Байқоңыр қаласы әкімшілігінің хабарламасында.
</blockquote>
Владимир Путиннің атынан дәл осындай награда Қызылорда облысы әкімінің орынбасары, Қазақстан президентінің Байқоңыр кешеніндегі арнайы өкілі Серік Сүлейменовке де табысталды.
Байқоңырдағы Ресей әкімшілігі Әбдіхалықованың марапатталуына байланысты құттықтау жариялады.
<blockquote>
 “Байқоңыр қаласының тұрғындары Сіздің қамқорлығыңызды үнемі сезінеді, Байқоңырдың өміріне жеке араласуыңыздың арқасында көптеген жоба сәтті жүзеге асырылып жатыр, ал қала тұрғындары бұл жоғары награданы Қазақстандағы ғарыш саласының өсуіне, бірлескен Ресей – Қазақстан жобаларының жүзеге асырылуына және Байқоңыр қаласын дамытуға жұмсаған үлкен күш-жігеріңіздің бағасы деп қабылдайды”, – делінген хабарламада.
</blockquote>
Сондай-ақ Байқоңырда Серік Сүлейменовті Путиннің грамотасымен құттықтады.
<blockquote>
 “Байқоңыр қаласының тұрғындары, Төретам және Ақай елді мекендері Сізді қарапайым адамдардың өмірі мен проблемаларына үңілетін зерделі адам ретінде біледі, – делінген құттықтауда, – Сіз “Байқоңыр” кешені Ресей мен Қазақстан арасындағы өзара тиімді ғылыми-техникалық ынтымақтастықтың табысты үлгісі болып, ал Байқоңыр қаласы Ресей және Қазақстан халықтары арасындағы достықтың символына айналуы үшін көп тер төктіңіз. Байқоңырлықтар қалаға және Байқоңыр кешеніне үнемі назар аударып, &nbsp;ғарыш айлағы проблемаларын шешуге қатысып жүргеніңіз үшін ризашылық білдіреді”. &nbsp;
</blockquote>
<a href="https://sputnik.kz/regions/20210624/17428635/Putin-Qyzylorda-oblysy-marapat.html">Sputnik Қазақстан</a>

Владимир Путин Қызылорда облысының әкімін құрмет грамотасымен марапаттады

<a href="https://kyzylorda-news.kz/">Kyzylorda-news.kz</a>. Биыл шілде айында Жосалы және Жалағаш кентіндегі газдандыру жұмыстары толығымен аяқталып, халық игілігіне беріледі. Сондай-ақ, жыл соңына дейін Қазалы қаласы мен Шиелі ауданындағы Бекежанов және Қодаманов ауылдары табиғи газға қосылады. Бұл туралы Өңірлік коммуникациялар қызметінің ақпарат алаңында өткен брифингте облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жоламанов баяндады.
<blockquote>
 «Биыл шаһарға қарасты Наурыз және Ж.Махамбетов елді мекендерін газдандыру жұмыстарын бастауға тиісті қаржы бөлінді. Жобаны толығымен аяқтау мақсатында 2022 жылға Энергетика министрлігіне бюджеттік өтінім жолданды. Қазіргі таңда, газбен жабдықтауға 8 жобаның сметалық құжаттамасы әзірленуде. Яғни 2025 жылға дейін тиісті жұмыстар жасалып, газбен жабдықтау үлесін 75 пайызға жеткізу жоспарлануда», – деді Ерлан Ералыұлы.
</blockquote>

Шілдеде Жосалы мен Жалағаш кенті табиғи газға қосылады

Kyzylorda-news.kz. Бүгін облыс әкімінің орынбасары Серік Ахмет ел ішіндегі өзекті мәселелерді талқылау үшін БАҚ өкілдерімен кездесу өткізді. Жиынға жергілікті БАҚ басшылары, республикалық БАҚ-тың меншікті тілшілері, тәуелсіз журналистер, облыстық басқарма басшылары қатысты. Кездесудің күн тәртібінде өңіріміздің күретамыры, негізі тіршілік көзі Сырдария өзенінің су тапшылығы мен егін шаруашылығындағы су, ауылшаруашылық саласындағы субсидия мәселелері болды.
Жиынды Серік Ахмет су мәселесіне қатысты бірқатар мәселелер мен атқарылып жатқан шараларға тоқталды.
<blockquote>
 “Өздеріңіз білетіндей, Алаштың анасы саналатын өңіріміздің күретамыры, негізі тіршілік көзі Сырдария өзенінде су тапшылығы сезілуде. Бұл Арал аймағындағы мал өлімі, күріштікке судың жетіспеуі, қысқа мал-азығына қажетті жем-шөп әзірлеу мен ауыл шаруашылығын субсидияландыруда кездесіп жатқан күрделі мәселелерге тікелей әкеліп тіреуде. Жылдан-жылға судың азаю қаупін сезінгендіктен әртараптандыруға басымдық бердік”, – деді Серік Ахмет.
</blockquote>
Облыстық ауыл шаруашылығы басқармасының басшысы Талғат Дүйсебаев өңірдің егін шаруашылығындағы су мәселесі бойынша атқарылып жатқан шаралар туралы және ауылшаруашылық саласын субсидияландыруда кездесетін түйткілді мәселелер туралы баяндаса, облыстық табиғи ресурстар және табиғат пайдалануды реттеу басқармасының басшысы Бауыржан Шәменов пен ҚР экология, геология және табиғи ресурстар министрлігінің су ресурстары комитетінің су ресурстарын пайдалануды реттеу және қорғау жөніндегі Арал-Сырдария бассейндік инспекциясының басшысы Сейілбек Нұрымбетов Сырдария өзеніндегі су тапшылығының алдын алу бойынша жұмыстар туралы хабарлады.
Жыл сайын көрсетілетін мемлекеттік қолдаулардың нәтижесінде ауыл шаруашылығы дақылдарының егіс көлемдері ұлғайып келеді.
Атап айтқанда, ағымдағы жылы облыс бойынша 188,2 мың гектарға ауыл шаруашылығы дақылдарын орналастыру жоспарланса, оның ішінде күріш егісінің көлемі өткен жылмен салыстырғанда 5,1 мың гектарға қысқартылып, 84,4 мың гектарға егу межеленді. Облыс бойынша 187,6 мың га ауыл шаруашылық дақылдары орналастырылып, өткен жылмен салыстырғанда 3,4 мың гектарға артық егілді.
Жалпыға мәлім, биылғы жылғы өңірдегі су тапшылығы мәселесі салдарынан күріш егісінің межеленген 84,4 мың гектар көлемі 1,5 мың гектарға дейін қысқартылып, 82,9 мың гектарға орналастырылды. Бұл көрсеткіш өткен жылдан 6,6 мың гектарға азайған.
Жыл сайын саланы дамыту және ауыл шаруашылығы тауарөндірушілерін қолдау үшін мемлекет тарапынан10 млрд.теңгеден астам қаражат бөлініп отыр.
Биылғы жылға 11,4 млрд.теңге қарастырылды. Бөлінген қаражат егіншілік саласы өнімнің шығымдылығы мен сапасын, экспорттық әлеуетін арттыратын болады.
Сондай-ақ, мал шаруашылығы бағытына биылғы жылы 2,6 млрд.теңге қаражат бөлініп отыр.
Осы бағытта жүргізілген мемлекеттік қолдаудың нәтижесінде, өткен жылдың өзінде селекциялық және асыл тұқымды жұмыспен қамтылған МІҚ саны 12,4%, қойлар 6%, сатып алынған асыл тұқымды МІҚ 14,5 %, асыл тұқымды жылқы саны 1,1% ұлғайды.
Осы орайда, ауыл шаруашылығы дақылдарын орналастыру барысында қысқартылған күріш егісінің орнына рентабельдігі және экспорттық әлеуеті жоғары дақылдардың көлемін арттыра отырып, егіс алқаптарын әртараптандыру жұмыстары қолға алынды. Нақты айтқанда, көкөніс, бақша, майлы және мал азықтық дақылдарын өткен жылмен салыстырғанда 11,1 мың гектарға артық орналастырылды. 
Сырдарияның 93% суы Қырғызстан, Тәжікістан және Өзбекстан аймақтарында қалыптасады. Сырдария өзені – «Тоқтағұл» су қоймасында жиналған су көлеміне тікелей тәуелді. Мәселен, аталған қоймада жылына 15 млрд. текше метр су жиналу керек болса, қазір бар болғаны 7-8 млрд.текше метрді құрап тұр.
Су тапшылығын алдын алу үшін облыстық бюджеттен елді мекендерге 43 дана насос қондырғыларын сатып алу және 92 шақырым болатын 18 каналға тазалау жұмыстары жүргізілуде. Сонымен бірге, шаруашылық құрылымдары 47 насос қондырғыларын дайындады. Айта кету керек, қосымша 41 дана насос алынатын болады.
Өткен жылы басталған Қызылорда және Әйтек су тораптарын қайта жаңғырту жұмыстары бүгінгі күні жалғасуда. Облыста суармалы жерлерді қалпына келтіру және айналымға қосу бойынша 161 млрд.теңгеге 3 жоба әзірленген.
Басқосуда БАҚ өкілдері ойларын ортаға салып, келелі ұсыныстарын жеткізді. Атап айтсақ, Сырдария өзеніндегі судың тартылуы, дария арнасын тазартуы, Арал ауданындағы малдардың қырылуы, шаруаларға субсидия беру, азық-түлік, жанар-жағармай бағаларын тұрақтандыру мәселелерін қозғады. Өзекті сұрақтарға салалық басқарма басшылары жауап берді. 
Облыс әкімінің орынбасары шараны қорытындылай келе, ақпарат кеңістігінің аясын кеңейтіп ауқымды шараларды бірге атқаруға дайын екенін білдірді. Сонымен қатар тұрғындарға вакцина алудың маңыздылығын насихаттап, алдағы ауыл әкімдерінің сайлауы мен халық санағы науқанына ақпараттық қолдау көрсетуге шақырды.
<img src="https://kyzylorda-news.kz/wp-content/uploads/2021/06/fb_img_1624376398969.jpg" alt="" />
<hr />

Облыс әкімінің орынбасары Серік Ахмет БАҚ өкілдерімен кездесті

<a href="https://kyzylorda-news.kz/">Kyzylorda-news.kz</a>. Соңғы тәулікте Қызылорда облысында коронавирус инфекциясының 30 жағдайы анықталды. Басым көпшілігі қарым-қатынас арқылы жұққан. Оның ішінде 11-і 14 жасқа дейінгі балалар. Бұл туралы Өңірлік коммуникациялар қызметінің ақпараттық алаңында өткен брифингте облыстық санитариялық-эпидемиологиялық бақылау департаментінің бөлім басшысы Әлия Идрисова баяндады.
<blockquote>
 «Өңірде эпидахуал тұрақты деп бағаланғанымен, Нұр-Сұлтан қаласында «үнділік» штамның болу ықтималдылығы анықталды. «Дельта» коронавирус штамы аса контагиозды және анықталған штамдарға қарағанда жұқпалылығы 60 пайызға жоғары. Қазіргі айналымдағы штамдар 1 адамнан орта есеппен 3-4 адамға таралатын болса, бұл штамм 5-6 адамға бірден жұғады және 7 күнге созылатын қысқа инкубациялық кезеңмен сипатталады. Сонымен қатар, індетті жұқтырғандар буындар мен іштің қатты ауырсынуын сезінеді. Жүрек айнып, лоқсиды, ауру салдарынан адам саңырау болып қалуы әбден мүмкін және аяқтардың микротромбозына әкеледі. Індеттің таралуының алдын алу мақсатында барлық профилактикалық шараларды қатаң орындау қажет: маска тағу, әлеуметік арақашықтықты сақтау, қол гигиенасы, үй-жайларды желдету, адам көп жиналатын жерлерге бармау, шетелдік сапарларды кейінге шегеруге кеңес береміз», – деді Әлия Нұрмағамбетқызы.
</blockquote>
Мамыр айынан бастап коронавирус инфекциясы бойынша көрсеткіштің төмендеу тенденциясы байқалды. Әйткенмен соңғы 3-4 күнде орта есеппен 15-25 дерек анықталуда. Облыста тіркелген ошақтарда залалсыздандыру жұмыстары жүргізіліп, індетке қарсы, профилактикалық шаралар ұйымдастырылуда.

Қызылордада эпидахуал тұрақты

<a href="https://kyzylorda-news.kz/">Kyzylorda-news.kz</a>. Биыл Қызылорда облысында 23 маусым – Мемлекеттік қызметшілер күні кәсіби мерекесі қарсаңында алғаш рет «Мемлекеттік қызметтің дамуына қосқан үлесі үшін» төсбелгісінің ережесі мен үлгісі бекітіліп, мерекемен құттықтау шарасында табыс етіледі. Бұл туралы Өңірлік коммуникациялар қызметінің баспасөз алаңында өткен брифингте ҚР Мемлекеттік қызмет істері агенттігінің Қызылорда облысы бойынша департаментінің басқарма басшысы Жасұлан Шынтасов айтты.
<blockquote>
 «Аталған төсбелгімен марапаттау «Қызмет» мемлекеттік, банк мекемелері және қоғамдық қызмет көрсету қызметкерлері салалық кәсіподағының облыстық филиалы мен Мемлекеттік қызмет істері агенттігінің облыстық департаментінің бастамасымен қолға алынған. Төсбелгі қызметтік міндеттерін үлгілі және мінсіз орындағаны, мемлекеттік қызметтегі жоғары көрсеткіштері үшін Қызылорда облысының мемлекеттік қызметшілерін материалдық емес көтермелеу және ынталандыру мақсатында тағайындалып отыр. Төсбелгі мемлекеттік қызметте 10 жыл еңбек өтілі бар және салалық кәсіподақ мүшелігінде кемінде 3 жыл болған, еліміздің даму жолына ерекше еңбек сіңірген мемлекеттік қызметшілеріне беріледі», – дейді Жасұлан Шынтасов.
</blockquote>
Сонымен қатар ҚР Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын іске асыру мақсатында Қызылорда облысында жыл басынан бері «Басшылар байланыста» жобасы жүзеге асырылуда.
<blockquote>
 «Мемлекеттік қызметші күніне орай «Aray City Mall» сауда ойын-сауық орталығында «Басшылар байланыста» жобасының кезекті шарасы өтті. Шара барысында әлеуметтік қамсыздандыру, тұрғын үй, коммуналдық, жер, сәулет, құрылыс, кәсіпкерлік, білім, денсаулық, кірістер, көлік құралдарын тіркеу және көші-қон мәселелері бойынша мекеме басшылары азаматтарды қабылдап, 100-ге жуық тұрғынға мемлекеттік орган басшыларымен консультациялық көмек көрсетілді», – дейді басқарма басшысы.
</blockquote>
Сондай-ақ карантин талаптарына байланысты департамент пен облыстық мәдениет, архивтер және құжаттама басқармасы бірлесіп мемлекеттік қызметкерлерге тарихи орындарға онлайн саяхаттар ұйымдастырып келеді. Мәселен, бүгінгі күнге дейін орталық өлкетану музейі, қала музейі, Оқшы ата кесенесі және Қорқыт ата мемориалдық кешендеріне онлайн саяхаттар жасалды.

Қазақстан және Қызылорда облысының жаңалықтары: Басты жаңалықтар old