<a href="https://kyzylorda-news.kz/ru/obshestvo/">Kyzylorda-news.kz</a>. Әр аптаның сәрсенбі, жұма және сенбі күндері Облыстық төтенше жағдайлар департаменті және Полиция департаментінің қызметкерлері волонтерлермен бірлесіп жылу беру маусымы кезеңінде өрттің пайда болуын, адамдардың қаза болуын және жарақат алу қауіп-қатерін азайту мақсатында түсіндіру жұмыстарын жүргізуде. Аралау жұмыстары «Өрт қауіпсіздігі айлығы» аясында 15 қазанға дейін жалғасатын болатын.
Бұл туралы Өңірлік коммуникациялар қызметінде өткен баспасөз конференциясында Облыстық төтенше жағдайлар департаменті бастығының орынбасары Бауыржан Ізбасаров мәлімдеді.
<blockquote>
 «Үгіт-насихат жұмыстары барысында 156 тұрғын үйде 216 өрт қауіпсіздігі талаптарын бұзғандығы анықталса, 178 кемшілік сол сәтте қалыпына келтірілді. Басты назар облыстық жұмыспен қамтуды үйлестіру және әлеуметтік бағдарламар басқармасынан алынған тізімге сәйкес тұрмысы төмен, көпбалалы, жалғызбасты ана және мүгедек жандары бар 7 691 отбасы тұратын үйлерге аударылуда. Оларға 3 941 отбасына көмірқышқыл газын анықтайтын датчик сатып алу бойынша жергілікті атқарушы органға ұсыныс хаттар жолданып, қазіргі таңда 4 000 дана көмірқышқыл газын анықтайтын датчик сатып алу процесі жүргізілуде. Сонымен қатар 4 қыркүйекте «Қызылорда қалалық мүгедектер қоғамы» қоғамдық бірлестігі ұсынған тізім бойынша Департамент қызметкерлерімен Наурыз және Махамбет елді мекенінде тұратын тұрмысы төмен мүгедек жандардың 23 тұрғын үйінің мұржаларын тазарту жұмыстары жүргізілді»,- деді Бауыржан Шірімбекұлы.
</blockquote>

Бауыржан Ізбасаров: Қауіпсіздік шаралары қадағалауда

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысының әкімі Гүлшара Әбдіқалықова Еуропа қайта құру және даму банкінің (ЕБРР) Қазақстан бойынша директоры Хусейн Озханмен кездесті.
Жиынға облыс әкімінің орынбасары Серік Сүлейменов, қала әкімі Ғанибек Қазантаев және жауапты салалық басқарма басшылары қатысты. Басқосуда екі тараптың іскерлік байланысын одан әрі дамыту мәселесі сөз болды.
Аймақ басшысы алдымен Хусейн Озханды жаңа лауазымға тағайындалуымен құттықтап, Қызылорда облысының Еуропа қайта құру және даму банкімен бірлескен жобаларды жүзеге асыруда бастамашыл өңірлердің қатарында екенін атап өтті.
<blockquote>
 «Бүгінгі таңда сіздермен бірлескен 4 жобаны жүзеге асырдық. Олар жылу, су, электрмен қамту және автобус паркін құру бойынша жобалар. Облыс орталығын жылумен қамтамасыз ету бойынша 6,3 шақырым жылу желісі жүргізілді. Су жүйесін жаңарту бойынша қалада арнайы техника мен жылжымалы зертхана сатып алынды. Электрмен қамтамасыз ету бойынша Қызылорда және Шиелі ауданында электр желілері мен трансформаторлық қосалқы станция жаңартылды. Электр қуатын тіркеудің автоматтандырылған жүйесіне қосылды. Бұл 3 жоба бойынша жауапты коммуналдық мекемелер Банк алдындағы міндеттемелерін уақытылы орындауда. Ал, Қызылорда қаласында автобус паркін құру жобасы бойынша бірлесе атқаратын жұмыстар бар. Жоба аясында 112 автобус сатып алынды, оның ішінде, 92 көлік Еуропа қайта құру және даму банкі арқылы алынды», – деді облыс әкімі.
</blockquote>
Айта кетейік, облыс әкімдігімен жыл сайын бұл салаға субсидия бөлініп, жол ақысы 90 теңгені құрады. Электронды билет жүйесі енгізілді.
Кездесуде өңір басшысы Банк тарапынан берілген несие көлемін қайта қарап, уақытын созуды ұсынды. Бұдан бөлек екі тараптың келсуімен Қызылорда-Жезқазған тас жолын қайта жөндеу жұмысы қолға алынды. 208 шақырымды құрайтын жол пайдалануға берілсе, жолаушылар мен жүк тасымалы көлемін стратегиялық бағыт бойынша ұлғайтуға септігін тигізеді.
Хусейн Озхан өз кезегінде аталған жұмыстардың уақытылы орындалуына мүдделі екенін және екі жақты серіктестіктің одан әрі дамитынына сенім білдірді.
Жиын соңында облыс әкімі өңірге келген делегатқа алғысын білдіріп, облыстың инфрақұрылымын дамытуда бірлескен жобалар қатарын көбейту керектігін тілге тиек етті.
<img src="https://kyzylorda-news.kz/wp-content/uploads/2021/10/244475390_3769810569788651_130755159839324331_n.jpg" alt="" />

Гүлшара Әбдіқалықова: 92 автобус Еуропа қайта құру және даму банкі арқылы алынды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысының әкімі Гүлшара Әбдіқалықова Н.Бекежанов атындағы Қызылорда облыстық қазақ академиялық музыкалық драма театрында ұстаздар күніне арналған «Ұстаз аты – биік, әрі мәңгілік» атты салтанатты жиынға қатысты.
Шараға білім саласының ардагерлері, директорлар, мектеп мұғалімдері мен жас педагогтар шақырылды. 
Төл мерекеде аймақ басшысы еңбегімен елдің құрметіне бөленген педагогтарды құттықтап, бала жанының тәрбиешісі атанған ұстаздардың жұмысын жоғары бағалайтынын тілге тиек етті.
<blockquote>
 «Қиындықпен бетпе-бет келген осындай сындарлы кезең мұғалімдерге де оңай тиген жоқ. Ұстаздарымыздың жаңа технологиялармен байланысты дағдыларды тез игеріп, тосын жағдайға шұғыл бейімделуіне тура келді. Ата-аналар да өз кезегінде ұстаздар қауымына қолдауларын білдірді. Бүгінгі мерейлі сәтті пайдалана отырып, барлық кедергілермен қиындықтарға қарамастан, жаңа ғасырдың зерделі ұрпағын тәрбиелеу жолында талмай еңбек етіп жүрген Ұстаздар қауымына алғысымды білдіремін. Мұғалімге қолдау көрсету – әрдайым біздің басты назарымызда. Биыл білім беру саласына облыс бюджетінің 45 пайызы, яғни 171 миллиард теңгеден аса қаржы бөлінді. Ел Президенті Қасым-Жомарт Тоқаев биылғы Жолдауында педагогика саласы қызметкерлерінің жалақысын жыл сайын көтеруді тапсырды. Президент тапсырмасын орындау мақсатында 2021 жылы облысқа республикалық бюджеттен 32 миллиард теңге қаржы бөлінді. Алдағы жылдарда бұл өз жалғасын табатын болады. Сәйкесінше ұстаздарға қойылатын талап та күшейеді. Сондықтан, білім сапасының жоғары деңгейде болуы аса маңызды», – деді Гүлшара Әбдіқалықова.
</blockquote>
Өңір басшысы ұстаздарға арналған ыстық лебізінен соң, отандық білім саласына елеулі үлес қосқан тәжірибелі ұстаздарға түрлі деңгейдегі марапаттарды табыстады.
Ұстаздар басқосуында Ы.Алтынсарин төсбелгісімен Қармақшы ауданы, Байқоңыр қаласы, №277 мектеп-лицейінің бастауыш сынып мұғалімі Ақзия Байтөреева, Қызылорда қаласындағы «№176 орта мектебінің директоры, қазақ тілі мен әдебиеті пәнінің мұғалімі Қадіркүл Шаймағанбетова, «ORDA SCHOOL» мектебінің директоры Рауаш Алиева, М. Мәметова атындағы Қызылорда педагогикалық жоғары колледжінің математика пәнінің мұғалімі Ғазиза Суханбердина және «№ 10 дарынды балаларға арналған облыстық «Білім-инновация» лицей-интернатының қазақ тілі мен әдебиеті пәнінің мұғалімі Нағиша Есбосын марапатталды.
Мұнан бөлек, 2 сала қызметкеріне «Білім беру ісінің құрметті қызметкері» төсбелгісі, 2 ардагер ұстазға «Еңбек ардагері» төсбелгісі тасбысталды. Ал 11 педагог «Қызылорда облысының білім беру саласын дамытудағы еңбегі үшін жергілікті ерекшелік белгісімен» марапатталды.
Ерекше айту керек, өткен жылдан бастап конкурстық негізде үздік ұстаздарға 300 айлық есептік көрсеткіш мөлшеріндегі қаржылай сыйақы табысталды. Биыл да 10 ұстаз «Үздік педагог-2021» облыстық байқауының жеңімпазы атанып, 875 мың теңге көлеміндгі қаржылай қолдауға ие болды.
Салтанатты рәсім арнайы концерттік бағдарламамен жалғасып, төл мереке иелері үшін қазақ эстрадасының жарық жұлдыздары Ақбота Керімбекова, Төреғали Төрәлі, Кенжебек Жанәбілов әннен шашу шашып, Сыр еліне деген ыстық ықыластарын білдірді. Сондай-ақ, жергілікті өнерпаздар мерекелік тарту жасады.
Айта кетейік, бүгінгі күні өңірде 22 мыңнан аса мұғалім қызмет етсе, оның 94,2 пайызы жоғары білімді педагог.
<img src="https://kyzylorda-news.kz/wp-content/uploads/2021/10/o-1.jpg" alt="" />
<img src="https://kyzylorda-news.kz/wp-content/uploads/2021/10/d.jpg" alt="" />
<img src="https://kyzylorda-news.kz/wp-content/uploads/2021/10/rp.jpg" alt="" />
<img src="https://kyzylorda-news.kz/wp-content/uploads/2021/10/k.jpg" alt="" />
<img src="https://kyzylorda-news.kz/wp-content/uploads/2021/10/i.jpg" alt="" />

Қызылордада 10 мұғалімге 875 мың теңге сыйақы табысталды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Бүгін облыс әкімі Гүлшара Әбдіқалықова республикалық «Жас Алаш» газетінің меншікті тілшісі, «Қазақстанның құрметті журналисі» төсбелгісінің иегері Миуагүл Байназаровамен кездесті.
Жиынға облыс әкімінің орынбасары Серік Ахмет, ардагер журналист, облыстық қоғамдық кеңес мүшесі Айткүл Шалғынбаева және республикалық «Егемен Қазақстан» газетінің меншікті тілшісі Мұрат Жетпісбаев қатысты. 
Басқосуда аймақ басшысы «Жас Алаш» басылымының ақпараттық кеңістіктегі орны ерекше екенін және басылым арқылы көптеген қарымды қаламгерлердің қолтаңбасы қалғанын тілге тиек етіп, газеттің 100 жылдық мерейтойымен құттықтап, қаламгерге Алғыс хат табыстады.
<blockquote>
 «Биыл – қазақ баспасөзінде өзіндік орны бар «Жас Алаш» газеті ғасырлық мерейтойын атап өтуде. Мемлекет басшысы Қасым-Жомарт Кемелұлы Тоқаев 100 жылдық мерейтой аясында «Жас Алаштың» жүз жылдық жолы – төл тарихымыздың жылнамасы, ұлт руханиятының шежіресі» деп атап өткен болатын. 
 Бұл орайда «Жас Алаш» газетінің Қызылорда облысындағы меншікті тілшісі ретінде Сіз Сыр өңірінің әлеуметтік-экономикалық, мәдени-рухани дамуын басылым арқылы кеңінен насихаттап келесіз. Өзіңізді қаламы қарымды журналист ретінде аймақ халқы жақсы біледі, құрметтейді. Басылымның мерейтойы құтты болсын, шығармашылығыңызға табыс тілеймін»,-деді Гүлшара Әбдіқалықова.
</blockquote>
Жиында ардагер журналист Айткүл Шалғынбаева және «Егемен Қазақстан» газетінің меншікті тілшісі Мұрат Жетпісбаев қарымды қаламгер иесінің еңбек жолынан естеліктер айтып, жылы лебіздерін білдірді.
Өз кезегінде «Қазақстанның құрметті журналисі» төсбелгісінің иегері Миуагүл Байназарова “Жас Алаш” газетінің негізгі ұстанымы туралы ой бөлісіп, ақпарат саласын ілгерілету бағытындағы бірқатар ұсыныстарын жеткізді. 
Еске салайық, Миуагүл Байназарова 2000-2020 жылдар аралығында «Айқын» газетінің Қызылорда облысы бойынша меншікті тілшісі. 2020 жылдан бастап «Жас Алаш» газетінің Қызылорда облысы бойынша меншікті тілшісі қызметінде.
2016 жылдан бастап республикалық «Тіл мерейі» газетінде директор-бас редактор қызметін қоса атқаруда. «Ең үздік тілші» атағының иегері, Қазақстан Журналистер Одағының мүшесі. «Қазақстанның құрметті журналисі» төсбелгісінің иегері.
<img src="https://kyzylorda-news.kz/wp-content/uploads/2021/10/photo1633339205.jpeg" alt="" />

Аймақ басшысы қаламгерлермен кездесті

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Бүгін облыс әкімі Гүлшара Әбдіқалықова мұғалімдер мерекесі аясында Қызылорда қаласының сол жағалау бөлігінде орналасқан «Orda school» жеке мектебінің жұмысымен танысып, педагогтарды Ұстаздар күнімен құттықтады.
Аймақ басшысы көпқабатты тұрғын үйлердің көптеп салынуы мектепке баратын оқушылар санын артуы байланысты жеке мектептер желісін көбейтудің маңыздылығын айтып, білім ордасының перспективасы зор екенін атап өтті. Сонымен бірге ұстаздардың еңбегін ерекше бағалайтындығын жеткізіп, кәсіби мерекесімен құттықтап, 5 ұстазға Алғыс хатты табыс етті.
Ұстаз – ұлт болашағының іргесін қалайтын кемеңгер тұлға. Еліміздің болашағы Сіздердің қолдарыңызда. Демек, Өздеріңізге артылатын сенім де зор. Мемлекет тарапынан педагог мәртебесін көтеруде нақты қадамдар жасалуда. Ел Президентімен «Педагог мәртебесі» туралы заң қабылданып, жыл сайын жалақыны көтеру, әлеуметтік қолдау бойынша игі істер жүзеге асырылуда. Осы мектепте білім алатын оқушылар алдағы уақытта биіктен көрініп, ата-аналары мен ұстаздарының, мектеп ұжымының мақтанышы боларына сенімдемін, – деді облыс әкімі.
Аймақ басшысы білім ошағындағы мектеп сыныптары мен би залы, робототехника кабинеті және үйірмелері жұмысымен танысты. Білім алып жатқан оқушылармен тілдесіп, пікір алмасты. Бастауыш сыныптың оқушылары үш тілде тақпақ айтып, мектеп оркестрі “Балбырауын” күйін орындап берді.
Айта кетейік, қазіргі уақытта облыста жеке мектептер желісі қарқынды дамып келеді. Бүгінде олардың саныы 10-нан асты. Жеке инвестиция есебінен салынған «ORDA SCHOOL» мектебі облыста алғаш болып ашылған жеке білім ордаларының бірі. Нысан 2019 жылы пайдалануға берілді. Заманауи талаптарға сай жабдықталған мектепте 500-ге жуық оқушы білім алуда.
<img src="https://kyzylorda-news.kz/wp-content/uploads/2021/10/244472925_1385007611894747_1789755665910985153_n.jpg" alt="" />
<img src="https://kyzylorda-news.kz/wp-content/uploads/2021/10/244404344_1385007411894767_1539100672899996921_n.jpg" alt="" />
<img src="https://kyzylorda-news.kz/wp-content/uploads/2021/10/244554091_1385007605228081_7985123552308956168_n.jpg" alt="" />

Гүлшара Әбдіқалықова «Orda school» жеке мектебінің жұмысымен танысты

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Қазақстанда өткен тәулікте 1913 адам коронавирус індетінен емделіп шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 275
Алматы қаласы – 439
Шымкент қаласы – 21
Ақмола облысы – 131
Ақтөбе облысы – 68
Алматы облысы – 317
Атырау облысы – 124
Шығыс Қазақстан облысы – 168
Жамбыл облысы – 3
Батыс Қазақстан облысы – 1
Қарағанды облысы – 154
Қостанай облысы – 8
Қызылорда облысы – 86
Маңғыстау облысы – 7
Павлодар облысы – 47
Солтүстік Қазақстан облысы – 30
Түркістан облысы – 34
Қазақстан бойынша жазылғандар саны – 830241.

86 қызылордалық коронавирустан жазылды

Kyzylorda-news.kz. Бүгін Қызылорда қаласында Қазақ радиосының 100 жылдық мерейтойы аясында және 1 қазан «Радио күні» мерекесіне орай Қазақ радиосының құрметіне көше берілді.
Салтанатты шараға облыс әкімінің орынбасары Серік Ахмет, «Қазақ радиолары» ЖШС Бас редакторы – «Қазақ радиосының» директоры Дулат Абибуллаев, «Қазақ радиолары» ЖШС Стратегиялық дамыту қызметінің жетекшісі Мұхамедияр Рашай, облыстық мәслихаттың депутаты, «Қоғам ТВ» телеарнасының құрылтайшысы Шәкизада Әбдікәрімов, облыстық «Qyzylorda» теларнасының директоры Жағыппар Қарабала және Сыр елінің зиялы қауымы қатысты.
Облыс әкімінің орынбасары Қазақ радиосының тарихын тізбектеп, ғасырлық мерейтойға орай құттықтауын жеткізді.
<blockquote>
 “Сіздерді Тәуелсіздіктің 30 жылдығымен тұспа-тұс келген Қазақ радиосының 100 жылдық мерейтойы және Радио қызметкерлері күні мерекесімен құттықтаймын. Өткен ғасырдың басында астана Орынбордан Қызылордаға көшкенде, Қазақ радиосы Қызылорда қаласына қоныс аударып, ұлтымыздың рухани дамуына сүбелі үлес қосты. Ұлт руханиятын көздің қарашығындай сақтап, радио тарихының алтын шежіресін жасаған барша қызметкерлердің еңбегі орасан зор деп білемін. Бүгін облыс орталығында Қазақ радиосына көше беріліп отыр. Бұл – Сыр елінің төл радиоға деген үлкен құрметі”, – деді Серік Ахмет.
</blockquote>
Сонымен қатар Дулат Абибуллаев Сыр елімен Қазақ радиосының тағдыры тарих парақтарында тоғысқанын айтып, Қазақ радиосының құрметіне көше беру үлкен сый екенін жеткізді.
Ал, Шәкизада Әбдікәрімов Тәуелсіздіктің таңы атып, егемендікті еншілеп, еңселі ел атанған Қазақстанның Қазақ радиосы халқымыздың салт-дәстүрі, әдет-ғұрпы, тілі, діні, әдебиеті мен мәдениеті жайында тәулік бойы хабар тарата алатын нағыз ұлтжанды ақпарат көзі екенін айтып, мерейтойға және «Радио күні» мерекесіне орай құттықтау лебізін арнады.
Айта кету керек, салтанатты шарадан кейін атаулы мерекелерге орай елордадан келген қонақтар Қызылорда қаласының тарихы музейіне «Қазақ радиосының шежіресін», «Қазақ радиосының антологиясын» табыстады.
<img src="https://kyzylorda-news.kz/wp-content/uploads/2021/10/fb_img_1633186332912.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633186337912.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633186335291.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633186340256.jpg" alt="" />

Қызылордада «Қазақ радиосы» атына көше берілді

Kyzylorda-news.kz. Бүгін аймақ басшысы Гүлшара Әбдіқалықова “Қазақ Радиолары” ЖШС Бас редакторы «Қазақ радиосы» радиоарнасының директоры Дулат Абибуллаев және «Қазақ радиолары» ЖШС Стратегиялық дамыту қызметінің жетекшісі Мұхамедияр Рашаймен кездесті.
Басқосуда облыс әкімі «Радио күні» кәсіби мерекесінің сала қызметкерлері мен ардагерлер үшін және радиосүйер қауым үшін айтулы мереке екенін атап өтіп, радио саласы мамандарын құттықтады.
<blockquote>
 “Сіздерді Қазақ радиосының 100 жылдық мерейтойымен және Ел Президенті Қасым-Жомарт Кемелұлы Тоқаевтың тапсырмасымен биылдан бастап алғаш рет аталып өтіп жатқан 1 қазан – Радио қызметкерлері күні мерекесімен Сыр жұртшылығы атынан шын жүректен құттықтаймын! Кәсіби мерекенің 1 қазанда атап өтудің символдық мәні бар. Өйткені тура 100 жыл бұрын дәл осы күні ұлттық радиомыз қазақ даласына алғаш рет хабар таратқан болатын”, – деді Гүлшара Әбдіқалықова.
</blockquote>
Облыс әкімі сондай-ақ, Қызылорда қаласы мен Қазақ радиосының тарихы тығыз байланысты екенін айта келе қаладан Қазақ радиосы көшесін ашу жайлы бастаманы қолдағанын жеткізді. Сонымен қатар Әміре Қашаубаев, Жұмат Шанин, Ахмет Жұбанов, Шәкен Айманов, Шәмші Қалдыаяқов, Мұқағали Мақатаев, Ермек Серкебаев секілді биік тұлғалар қызмет еткен ұлттық радио бүгінде заманға сай жаңа белеске иек артқанын айтты.
Айта кету керек, биыл Қызылорда облыстық әкімдігі мен қалалық мәслихаттың бірлескен шешімі негізінде Қызылорда қаласында Қазақ радиосы көшесі ашылды. Дулат Абибуллаев өз кезегінде көрсетілген құрметке алғысын жеткізіп, Қазақ радиосы 1925-1931 жылдар аралығында Қызылорда қаласынан ақпарат таратқанын, бұл кезең радио шежіресінің маңызды бастау белесі болғанын тілге тиек етті.
Ал, Мұхамедияр Рашай Қазақ радиосының тарихына тоқталып, Сыр елінде таспаланған радиохабарлардың қоры қалыптасқанын жеткізді.
Басқосу барысында облыс әкіміне 100 жылдық мерейтойға орай қазақ әдебиетінің алтын қоры жинақталған кітап, радионың алғашқы жылдарында қызмет еткен алыптар шоғырының дауысы, салт-дәстүр, батырлар жыры мен ертегілер енгізілген аудиотаспа және радиотаратқыш құрал сыйға тартылды.
Қазір қазақ радиосы эфирінен Сыр өңірінің тыныс-тіршілігін жеткізетін «Ақмешіт ақпарат» апталық хабары тұрақты шығып келеді. Аймақ басшысы мен радиоарна директоры алдағы уақытта шығармашылық әріптестікті әрі қарай жалғастыру жайын да талқылады.
Еске салайық, өткен жылы облыс әкімі Гүлшара Әбдіқалықова Қазақ радиосына сұхбат беріп, Сыр елінің дамуы мен алдағы жоспарымен бөлісті.
<img src="https://kyzylorda-news.kz/wp-content/uploads/2021/10/fb_img_1633185934740.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633185937998.jpg" alt="" />

Гүлшара Әбдіқалықова радио саласы мамандарын құттықтады

Kyzylorda-news.kz. Қызылорда облысының әкімі Гүлшара Әбдіқалықованың төрағалығымен 2021-2022 жылдардағы жылу беру маусымына дайындық жөніндегі көшпелі облыстық штаб отырысы өтті.
Жиынға облыстық мәслихат хатшысы, облыс әкімінің салалық орынбасары, жауапты басқарма мен департамент басшылары, қала әкімі және аудан әкімдерінің салалық орынбасарлары қатысты.
<blockquote>
 Жылу беру маусымының басталуына небәрі 10 күннен астам уақыт қалды. Бүгін Қызылорда қаласындағы бірқатар нысанның жұмысымен танысып қайттым. Кейбір нысандар дайындықты қажет етеді. Жылу беру маусымына дайындықта кемшіліктер болмауы керек, – деді Гүлшара Әбдіқалықова.
</blockquote>
Жиында аймақтың жылу беру маусымына дайындық барысы туралы облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев хабарлама жасады.
2021 жылы «Қызылордажылуэлектрорталығы» кәсіпорнының №9 қазандығын, №3 турбогенератордың бөлшектерін ауыстыру, турбиналық қызметтің технологиялық құбырларын және Оңтүстік қазандықтағы №7 ВОNО SG қазандығын күрделі жөндеу жұмыстары жүргізілді. Кәсіпорында 10 күндік авариялық қоры 4,6 мың тонна мазут жасақталған. Бүгінгі таңда қаладағы жылу желілері сумен толтырылып, жоғарғы қысыммен сынақтан өткізілді, жылу беруге дайын.
«КазТрансГазАймақ» АҚ-ның Қызылорда өндірістік филиалы алдағы жылу беру маусымына дайындық жүргізу үшін 50 дана ГРП мен 208 дана ШРП-ға ағымдағы жөндеу жұмыстары 100%-ға орындалды.
Сондай-ақ, «Қызылорда Су жүйесі» МКК бойынша 1,5 шақырым ауыз су және кәріз жүйелеріне, ауыз су қысымын көтеру станциясының 4 дана насос жабдықтарына ағымдағы жөндеу жұмыстары 100%-ға орындалған. Әлеуметтік сала нысандарына алдағы жылу беру маусымында 33 мың тонна қатты және 25 мың тонна сұйық отын қажет. Зерделеу барысында әлеуметтік нысандардың жылу беру маусымына қажетті қатты және сұйық отынға келісім шарттары жасалғаны, сонымен бірге отын сақтайтын қойма, резервуарларының көлемінің шектеулі болуына байланысты қажеттіліктің тек 65 пайызы жеткізілгені анықталды. Қалған көлемі келісім шарт талаптарына сәйкес кезең кезеңімен жеткізіледі.
Сонымен бірге, жоспарланған 527 білім, 288 мәдениет, 247 денсаулық сақтау нысандарына және 708 кіші қазандықтарға жөндеу жұмыстары жүргізілді. Бүгінгі таңда әлеуметтік нысандардың дайындық паспорттарының 99 пайызы алынғаны белгілі болды.
Бүгінгі күні тұрғындарға қажетті көмірдің 64 пайызы өңірге жеткізілген. Атқарылған жұмыстар нәтижесінде көмір отынының бағасы өткен жылғымен салыстырғанда тұрақты.
Басқарма басшысының айтуынша, ағымдағы жылдың желтоқсан айында Сырдария өзенінің сол жағалауында жаңадан 14 көпқабатты пайдалануға берілетін тұрғын үйлердің магистралды және кварталішілік жылу құбырларының құрылысы жоспарға сәйкес жалғасуда. Құрылыс жұмыстары ағымдағы жылдың 1 қарашасына дейін толық аяқталады. Аймақ басшысы жылу беру маусымы өз деңгейінде өтіп, тіршілікті қамтамасыз етуші кәсіпорындар штаттық режимде жұмыс жасауларын қажет екенін атап өтті.
Жиында әлеуметтік сала нысандарының дайындығы да пысықталды. Алдымен денсаулық сақтау басқармасы басшысының міндетін атқарушы Жалғас Үсенов атқарылған жұмыстарды тізбектеді.
2021-2022 жылдарға арналған жылу маусымына денсаулық сақтау ұйымдарының отын қорына барлығы тиісті қаржы қаралып, келісім-шарт жасалынды. Бүгінгі күні 32 денсаулық сақтау ұйымдарынан 21-і қысқы маусымға дайындығы жөнінде паспорты алынды. Қалған медициналық ұйымдар қысқы маусымға дайындығы жөнінде паспорт алу үшін тиісті жұмыстар жүргізілуде.
Аймақ басшысы денсаулық сақтау нысандарындағы жылу маусымына дайындық барысы тікелей бақылауында болатынын айтты.
<blockquote>
 Денсаулық сақтау саласына қарасты нысандарда қатты отынмен қамту 54 пайызды құрап отыр. Келісім-шарт жасалғанмен, жеткізілу әлі де төмен. 10 қазанға дейін сала нысандарын көмірмен қамтуды 100 пайызға орындаңыз. Нәтижесін тікелей өзіме баяндайсыз, – деді Гүлшара Әбдіқалықова.
</blockquote>
Білім саласы бойынша облыстық білім басқармасының басшысының міндетін атқарушы Бағдат Бердәулетов баяндады.
Жылу маусымына қажетті қатты және сұйық отынның қажеттілігі барлығы 40871,1 тонна оның ішінде: қатты отынға 25145,6 тонна, сұйық отынға 15725,4 тонна. 2021 жылы отын қорын сатып алуға облыс бюджетінен қажетті қаржы бөлінген. Мемлекеттік сатып алу рәсімдері жүргізіліп, толық жылу маусымына қажетті отын қорына келісім-шарт жасалған. 15 қазанға дейін қалған 1257,1 тонна қатты отын қоры жеткізілмек. Ал, қалған сұйық отын қоры жылу қазандықтарының сыйымдылығына қарай келісім-шарт бойынша жеткізіледі. Білім басқармасына қарасты білім беру нысандарының жылу маусымына дайындық паспорттары толық алынған. Облыс әкімі білім нысандарында да қажетті сұйық отынмен қамтамасыз ету көрсеткішін 10 қазанға дейін 100 пайызға жеткуді жүктеді.
Сонымен қатар штаб отырысында ҚР ҰЭМ Табиғи монополияларды реттеу комитетінің Қызылорда облысы бойынша департаментінің басшысы Гүлмира Өтегенова атқарылған жұмыстарға тоқталды.
2021 жылдың 1 қаңтарынан бастап 2 табиғи монополия субъектісінің тарифінің қолдану мерзімі аяқталуына байланысты департамент тарифтерді төмендетті.
Атап айтқанда, «Қызылордажылуэлектрорталығы» мемлекеттік коммуналдық кәсіпорнына жылумен жабдықтау қызметіне тариф тұрғындар үшін 5,6 пайызға, «Теміржолсу-Қызыл-Орда» жауапкершілігі шектеулі серіктестігіне сумен жабдықтау қызметіне тариф тұрғындар үшін 8,2 пайызға төмендетілді.
Жиын соңында облыс әкімі 2021-2022 жылдардағы жылу беру маусымының тұрақты өтуін, барлық көпқабатты тұрғын үйлердің жылу беру маусымына дайындығын ағымдағы жылдың 5 қазанына дейін қамтамасыз етуін, Наурыз, Махамбет елді мекендерін газдандыру жұмыстарын мерзімінде бастап, жыл соңына дейін бөлінген қаржының игерілуін бақылауға алуды жүктеді. Сондай-ақ, тиісті кәсіпорындармен бірлесіп, коммуналдық төлемдерді жинақтау, мекемелер арасындағы берешек қарыздарды болдырмау мақсатында жұмыстар атқару, күрделі жөндеу жұмыстары біткен 5 білім беру нысанының құжаттандыру жұмыстарын аяқтау және газ жүргізілген аймақтардағы білім беру нысандарының қазандығын газға алмастыру бойынша ұсыныс әзірлеу жүктелді.
Жиында көтерілген тапсырмалардың орындалу барысы облыс әкімінің орынбасары Серік Сүлейменовтің бақылауында болады.
<img src="https://kyzylorda-news.kz/wp-content/uploads/2021/10/fb_img_1633146011665.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633146027431.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633146030440.jpg" alt="" />

Гүлшара Әбдіқалықова: Жылу беру маусымына дайындықта кемшіліктер болмауы керек

Kyzylorda-news.kz. Қызылорда облысының әкімі Гүлшара Әбдіқалықова Қызылорда қаласындағы жылу беру нысандарына барып, дайындық барасын тексерді.
Алдымен аймақ басшысы сол жағалауда орналасқан №17 автономды блокты-модульді қазандықтың жұмысымен танысты. 2020 жылдың қазан айынан бастап кәсіпорын «Қызылорда қаласындағы Сырдария өзенінің сол жағалауына жылу беру» жобасы бойынша қазандықты және сыртқы жылумен жабдықтау жүйесін іске қосып, қызмет көрсетуде. Жылу магистралінің ұзындығы – 4,3 км. Қазіргі таңда Қызылорда қаласы сол жақ жағалауда орталықтандырылған жылу желілеріне 31 тұрғын үй мен 2 әлеуметтік нысан қосылған. Ағымдағы жылы қосымша 16 тұрғын үй жылу жүйесіне қосылады деп күтілуде.
Мұнан кейін аймақ басшысы «Қызылорда Оңтүстік жылу орталығы» және Белкөл кентінің жылу қазандығы жұмысын саралады.
Оңтүстік қазандықтың жалпы жылу қуаты 97 Гкал құрайды. Негізгі отын – газ, резервтік отын-мазут. Қызылорда ЖЭО-ның 2021-2022 жылдары жылыту маусымына негізгі жабдықтарын дайындау мақсатында өз қаражаты есебінен Оңтүстік қазандықтың КЕ-25-14С типті 1,2,3,4 және БОНО типті №5,6 қазандықтарына ағымдағы жөндеуге 46,6 млн. тенге бөлінді. Бүгінгі таңда жылыту маусымына дайындық аяқталып, күзгі-қысқы кезеңдегі жұмысқа әзірлік паспорты алынған. Оңтүстік бу қазандығында жылу энергиясын тұтынушылардың жалпы саны – 763 нысан. Оның ішінде 197 көп қабатты тұрғын үй, 118 жеке сектор объектілері, 14 мектеп, 5 балабақша, 10 медициналық мекеме, 4 мәдени-спорттық, 24 бюджеттік, 391 бизнес нысан бар.
Ал, Белкөл кентіндегі жылу қазандықтың энергиясы – 4,1 Гкал. 2019-2020 жылы «Қызылорда жылу электр орталығы» МКК-ның «Белкөл» қазандығын реконструкциялау жұмысына облыстық бюджеттен 183,9 млн. теңге бөлініп, қайта жаңғырту жұмыстары жүргізілді.
«Белкөл» бу қазандығында жылу энергиясын тұтынушылардың жалпы саны – 763 нысан. Жылыту жүйесіне 4 көп қабатты тұрғын үй, 1 жеке сектор объектісі, 1 мектеп, 1 балабақша, 1 мәдени, 1 әкімшілік нысан қосылған.
Облыс әкімі Гүлшара Әбдіқалықова жылу беру маусымына дайындық барысы жеке бақылауында болатынын айтып, бұл мәселеге аса жауапкершілікпен қарау керек екенін назарға салды. Жылу беру жұмыстарының уақытылы басталуын тапсырды.
Нысандарды аралау барысында аймақ басшысы «KHAS.COM» ЖК-нің көмір қоймасына да барды. Бұл жерде көмірдің бағасы 1 тоннаға 14 400 теңге. Бүгінгі күні 411 вагон (28 770 тонна) жеткізілген. Алдағы уақытта 19 вагон (1 330 тонна) жеткізіледі деп күтілуде.
Аймақ басшысы Гүлшара Әбдіқалықова қала әкімі Ғанибек Қазантаев пен облыстық энергетика және коммуналдық шаруашылығы басқармасының басшысы Ерлан Жаңабаевқа қажетті қатты және сұйық отын жеткізу жұмыстарын бақылауда ұстап, жылу беру маусымын сапалы ұйымдастыруды жүктеді.
<img src="https://kyzylorda-news.kz/wp-content/uploads/2021/10/fb_img_1633145075148.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633145078135.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633145080739.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633145083420.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633145086812.jpg" alt="" />
<img src="https://kyzylorda-news.kz/wp-content/uploads/2021/10/fb_img_1633145090001.jpg" alt="" />

Қызылорда облысының әкімі жылу беру нысандарының жұмысын тексерді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова Халықаралық қарттар күніне орай Ұлы Отан соғысының ардагері Әбдірахман Бәйтіковтың үйіне барып, майдангерді мерейлі мерекесімен құттықтады.
Аймақ басшысы соғыс ардагерінің өнегелі өмірі кейінгі ұрпаққа үлгі екенін тілге тиек етіп, ардагерге құрмет көрсетіп, ыстық ықыласын жеткізді.
<blockquote>
 «Біз өткенімізді өшірмей, елдің бірлігі мен ынтымағы жолында аянбай еңбек еткен ардагерлерімізді әрдайым дәріптеп, жас ұрпаққа үлгі етуіміз керек. Өйткені, біз Елбасы Нұрсұлтан Әбішұлы Назарбаев айтқандай, ақсақалын ардақтаған, салт-дәстүрін салмақтаған жасампаз ұлттың ұрпағымыз. Үлкенге – құрмет, кішіге – ізет көрсете білген бізге тағылымды жол көрсеткен аға ұрпақ, Сіздердің еңбектеріңіз өлшеусіз. Осындай бейбіт өмірді асқан ерлікпен алып бердіңіздер. Қарты бар ел – бақытты ел. Небір сын сағаттарда халқына сүйеу, жұртына демеу болып жүрсіздер. Аман болыңыз. Ұрпағыңыз қуанышына бөлесін. Жүз жылдығыңызды тойлайық. Бүгінгі мерекеңіз құтты болсын», – деді облыс әкімі.
</blockquote>
Ардагер қарт аймақ басшысына өзінің ризашылығын білдіріп, ақ батасын берді.
Әбдірахман Бәйтіков 1942 жылы Ашхабад қаласында командирлер дайындайтын курсқа оқуға түсіп, аяқталмастан майданға аттанған. 1943 жылы Курск доғасында ауыр жарақат алып, ІІ топ мүгедегі болып, 1944 жылы 20 жасында елге оралған. Көрсеткен ерлігі үшін Кеңес Одағының маршалы Г.Жуковтың ІІ дәрежелі медалімен, «Ұлы Жеңістің 40, 55, 60, 70, 75 жылдығы» мерекелік медальдарымен марапатталған. Соғыстан оралған соң Комсомол колхозының қой шаруашылығында есепші және зейнет жасына дейін бригадир болып жұмыс атқарған. Бүгінде 9 баладан 30 немере, 6 шөбере сүйіп отыр.
Айта кетейік, осыдан 31 жыл бұрын, яғни 1990 жылы 14 желтоқсанда БҰҰ Бас ассамблеясы 1 қазанды «Халықаралық қарттар күні» деп жариялаған болатын. Бүгінде облыс көлемінде 76 мыңнан астам зейнеткер тұрады. Оларды жан-жақты әлеуметтік қолдау үшін іс-шаралар жоспары қабылданып, жүзеге асырылуда.
<img src="https://kyzylorda-news.kz/wp-content/uploads/2021/10/243490639_3760501137386261_2283759334903719383_n.jpg" alt="" />

Аймақ басшысы соғыс ардагері Әбдірахман Бәйтіковты мерекемен құттықтады

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін Тәуелсіздіктің 30 жылдығы аясында Қызылорда облысының әкімі, облыстық Қазақстан халқы ассамблеясы төрағасы Гүлшара Әбдіқалықованың төрағалығымен Қазақстан халқы ассамблеясы Аналар кеңесінің көшпелі отырысы өтті.
Жиынға ҚР Премьер-Министрі орынбасарының кеңесшісі, ҚР Мәдениет қайраткері, Қазақстан халқы Ассамблеясы Аналар кеңесінің төрайымы Нәзипа Шанаи бастаған іскер әйелдер және облыстық Аналар кеңесінің мүшелері, этномәдени бірлестік басшылары, көшбасшы әйелдер мен ақ жаулықты әжелер қатысты. Сонымен бірге, онлайн режимде аудандық және Байқоңыр қаласының Аналар кеңестерінің төрайымдары қатысты.Көшпелі отырысқа қатысушыларды Достық үйінде қарсы алған облыстық Аналар кеңесінің төрайымы Рахима Ахметова арнайы ұйымдастырылған фотокөрме арқылы өңірлік кеңес тарапынан атқарылған жұмыстармен таныстырып, сыйлы қонақтарға ізгілік пен тектілік нышаны ретінде ақ орамал тарту етті.
Аймақ басшысы кеңес отырысына қатысушыларға алғыс білдіріп, облыстық Аналар кеңесі ұлттық дәстүрлер мен отбасылық құндылықтарды нығайту және сақтауға өзіндік үлесін қосып келетінін атап өтті.
<blockquote>
 «Мемлекет басшысы Қасым-Жомарт Кемелұлы Тоқаевтың 2021 жылғы 1 қыркүйектегі Жолдауы көптеген міндеттерді жүктеді. Президент еліміздегі демографиялық жағдайға, отбасылық құндылықтарды сақтауға, жастар тәрбиесіне айрықша мән берді. Біздің қоғам дені сау, рухани мықты ұрпақ тәрбиелеуге қабілетті отбасылардың көп болуына мүдделі. Міне, сондықтан да, Қазақстан халқы Ассамблеясы отбасылық құндылықтар мен дәстүрлерді жастар арасында ілгерілетуді мақсат етуде», – деді облыс әкімі.
</blockquote>
Қазақстан халқы Ассамблеясы Аналар кеңесінің төрайымы Нәзипа Шанаи ұйымның жұмыс бағыттары мен алдағы міндеттерді тізбектеді. «Мәдениетті ана – мәдениетті ұлт» қағидасын ұстанатын Аналар кеңесінің негізгі мақсаты – саналы ұрпақ тәрбиелеу екендігін тілге тиек етті және қазіргі таңда мемлекеттік тілдің дәрежесін асқақтату аса маңызды екенін атап өтті. Сондай-ақ, Нәзипа Ыдырысқызы еңбек нарығында қажетті мамандары даярлау, масылдық көзқарастан айырылу секілді мәселелерді көтеріп, аналар қоғамдық билік және халық арасындағы делдал болуы қажет деп назарға салды.
Жазушы, ақын, аудармашы, филология ғылымдарының кандидаты Камал Әлпеисова Сыр өңірі қашан да тектілік пен парасаттылық мекені атағына ие болғанын атап өтіп, «Әкелер одағы» және «Қазақтану» республикалық жобаларының маңыздылығын айтты.Ал, «Қарашаңырақ» республикалық қоғамдық бірлестігінің жетекшісі, «ТәйТәйstar» жауапкершілігі шектеулі серіктестігі балабақшалар желісінің директоры, Қазақстан жеке балабақшалар Ассоциациясының мүшесі Баян Ахатай елімізде жуырда бастау алған қазақ және әлем әдебиетіндегі үздік ертегілерді жинақтап, калың жұртқа таныстыру үшін әзірленетін «Мұнарат» жобасының іске асу барысын баяндады.
Кездесу ашық пікірлесу форматында аяқталды.
<img src="https://kyzylorda-news.kz/wp-content/uploads/2021/10/o.jpg" alt="" />
<img src="https://kyzylorda-news.kz/wp-content/uploads/2021/10/n.jpg" alt="" />
<img src="https://kyzylorda-news.kz/wp-content/uploads/2021/10/r.jpg" alt="" />

Қазақстан және Қызылорда облысының жаңалықтары: Басты жаңалықтар old