Kyzylorda-news.kz. Қызылорда облысының әкімі Гүлшара Әбдіқалықова бірқатар мәселелер бойынша кеңейтілген жиын өткізді. Отырысқа облыс әкімінің орынбасарлары, барлық басқарма басшылары мен онлайн режимде қала, аудан әкімдері қатысты.
Күн тәртібінде екі мәселе қаралды. Алдымен өңір басшысы аймақтағы жылу беру жұмыстарының барысын саралап, 1 қазан күнгі «Қызылордаэлектржылуорталығы» мекемесінде өткен көшпелі штаб отырысында міндеттеген бірқатар тапсырмалардың орындалуын таразылады.
Өңірдегі жылудың жағдайын баяндаған облыстық энергетика және тұрғын үй коммуналдық шаруашылық басқармасының басшысы Ерлан Жаңабаев бүгінгі күнге облыстағы 816 тұрғын үйлердің 799-на жылу беріліп, 17-не жылу беру жұмыстары жүргізілгенін баяндады. Сондай-ақ, 1064 әлеуметтік нысанның 1048-і жылумен қамтамасыз етілгенін тілге тиек етті.
Көмір бағасын бірқалыпты жағдайда ұстау үшін Әкімдік пен көмірді сатумен айналысатын өңірлік операторлар арасында меморандум жасалды. Нәтижесінде, бүгінгі күні облыс тұрғындарын көмірмен қамтамасыз ету көрсеткіші 88 пайызға жетті. Облыстағы жылу беру жағдайын таразылау мақсатында облыс әкімі аппаратының инспекторлары қала мен барлық аудандарға барып, жылу беру маусымының өту барысын зерделеген. Нәтижесіне қарай облыс әкімі қыс мезгіліне дайындық мәселесіндегі жоспарлы жұмыстардың әлі де көңіл көншітпейтінін назарға салып, жауапты сала басшыларына қатаң түрде ескерту жасады. Мәселен, Қазалы ауданы Тасарық елді-мекеніндегі №238 мектептегі жылу қазандығының жарылуы, Ақсуат ауылдық округіндегі №100 орта мектебінің әлі де жылуға қосылмағандығы, №9 балабақшаның қазандық ғимараты жарылып, бу қазандығына зақым келгендігі анықталған. Сондай-ақ, денсаулық сақтау нысандарының көмірмен қамтылмағанын айтып, сынға алды. Облыс әкімі кемшіліктерді 10 күн ішінде жойып, мәселені шешудің жолдарын қарастыруды тапсырды.
Жиында облыс әкімі селекторлық байланыс арқылы қосылған қала және аудан әкімдерінің берген есептерінің нақты жағдайға сәйкес келмейтінін айтып, тапсырмалардың тиянақты орындалуын талап етті.
<blockquote>
 “Жылу беру маусымына дайындықтарыңыз көңілімнен шықпайды. Мәселен, Арал ауданындағы көмір қоймасы бос тұр. Қазалы ауданы бойынша тұрғындарға қажетті 16 мың тонна көмірдің тек 69 пайызы, Жалағаш ауданы бойынша қажетті 17 мың тонна көмірдің 65 пайызы ғана жеткізілген. Қармақшы ауданында да көмірден тапшылығы сезілуде. Сырдария ауданына қажетті көмірдің 63 пайызы, сұйық отынның 76 пайызы ғана әкелінген. Шиелі және Жаңақорған аударында жылу беру жұмыстары бүгін басталды. Ал, облыс орталығында орналасқан 4 қоймада көмір жоқ. Әлеуметтік желілерде Наурыз, Махамбет, Сабалақ елді мекендерінің тұрғындары көмірдің жоқтығына шағымдануда. Сондықтан қала, аудан әкімдері олқылықтарды тез арада шешіп, жағдайға нақты талдау жасап, нәтижесі бойынша есеп бересіздер”, – деді Гүлшара Әбдіқалықова.
</blockquote>
Жиында жылу беру маусымында тұрғын үйлер мен әлеуметтік нысандарға уақытылы жылу беру ісінде тиісті жұмыстарды өз деңгейінде орындауда енжарлық танытқан басқарма басшысы Ерлан Жаңабаевқа ауызша ескерту жасады.
<blockquote>
 “Қала және аудан әкімдіктері, тиісті сала басшылары, Сіздер әлеуметтік нысандар мен тұрғын үйлердің жылумен, электр энергиясымен, газбен, сумен тұрақты қамтамасыз етілуіне, халыққа сапалы көмірдің қажетті көлемде уақытылы жеткізілуіне жауапты екендеріңізді қайта ескертемін. Облыстық энергетика және тұрғын үй-коммуналдық шаруашылық басқармасының жылу беру маусымына 100 пайыз дайынбыз деген мәлімдемесі іс жүзінде көрінбейді. Бүгіннен бастап барлық әлеуметтік нысандарымен аудан, қаладағы көмір қоймаларын аралап, 10 күн мерзімде жылу беру маусымының өту барысы туралы баяндайсыздар!Қызылорда қаласы мен аудан әкімдері берілген тапсырмалардың мерзімінде орындамауына байланысты жауапты орынбасарларына тәртіптік жауапкершілігін қарасын”, – деді Гүлшара Әбдіқалықова.
</blockquote>
Сондай-ақ, өңір басшысы қала, аудан әкімдері облыстық кәсіпкерлік және туризм басқармасымен бірлесіп, өңірдегі көмір жеткізуші кәсіпкерлермен жұмыс жасап, тұрғындарды толыққанды қажетті көмір қорымен қамтамасыз ету бойынша шұғыл шаралар қабылдауды ескертті. Кеңейтілген отырыста облыс бюджетінің игерілу барысы да қаралды.
Аймақ басшысы алдымен облыстық қаржы басқармасының басшысы Елена Шаврованың есебін тыңдады. 1 қазандағы сандық мәліметке сәйкес, облыс бюджеті түсімдері 102,5 пайызға орындалған. Шығындар жоспары 99,7 пайызға игерілген. Жұмсалмаған қаржы көлемі 852 миллион теңге, оның ішінде 213 миллион теңге үнемделген қаржы болса, түрлі себептермен 639 миллион теңге игерілмеген.
Облыс әкімі Гүлшара Әбдіқалықова салалық басқармалар мен қала және аудан әкімдерінен бөлінген қаржының игерілмеу себебін сұрады. Әсіресе, «Ауыл – Ел бесігі» бағдарламасы бойынша бірнеше ауданда жұмыстар толық жүргізілмегендігін қатаң түрде сынға алып, қаржыны игерудің нақты игеру ісінде жұмысты тез арада реттеуді ескертті.
Жиын соңында өңір басшысы жоспарланған қаржыларды, оның ішінде республикалық бюджет қаражатын 100 пайызға игеруді тапсырды. Сондай-ақ, жұмсалмаған ақшаны қайтару немесе қайта бағыттау бойынша жұмыстарды жауапты министрлікпен бірге үйлестіруді міндеттеп, басқармалар, қала және аудан әкімдеріне жыл аяғында бюджетті игеруде төмен көрсеткіш орын алса, лауазымды тұлғаларға тәртіптік шара көрілетінін қатаң ескертті.
<img src="https://kyzylorda-news.kz/wp-content/uploads/2021/10/fb_img_1634359145186.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634359150165.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634359154205.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634359158914.jpg" alt="" />

Гүлшара Әбдіқалықова: Көмірдің қажетті көлемде уақытылы жеткізілуіне жауапты екендеріңізді қайта ескертемін

Kyzylorda-news.kz. Қызылорда облысының әкімі Гүлшара Әбдіқалықова Орман шаруашылығы қызметкерлерінің кәсіби мерекесі қарсаңында сала қызметкерлерін қабылдап, ортақ тақырып аясында пікірлесті.
Жиынға облыс әкімінің орынбасары Бақыт Жақанов, облыстық табиғи ресурстар және табиғат пайдалануды реттеу басқармасының басшысы Бауыржан Шәменов пен орман шаруашылығы саласының мамандары қатысты.
Аймақ басшысы Қазақстанның шөлді аймағында орналасқан әрі экологиялық аймақ болып саналатын Қызылорда облысы үшін орман шаруашылығының орны бөлек екенін тілге тиек етіп, жойылып бара жатқан Арал теңізінің мәселесі бүкіл әлемге қатер төндіріп тұрғанын атап өтті.
<blockquote>
 “Тұңғыш Президентіміз – Елбасы Нұрсұлтан Әбішұлы Назарбаевтың бастауымен Арал теңізі және Арал маңын экологиялық сауықтыру, аймақтың әлеуметтік-экономикалық дамуын қамтамасыз ету мәселелерін шешуде 5 мемлекет басшысы бірігіп мәлімдеме қабылдағаны естеріңізде болар. Бүгінгі күні облыста 6,5 млн. гектарды құрайтын мемлекеттік орман қорының 3,4 млн.гектары – орманды алқаптар. Оның 89 пайызын негізгі орман құраушы сексеуіл ағаштары алып жатыр. “Атадан мал қалғанша, тал қалсын” деген халқымыздың дана сөзі бар. Осы, Сыр елінің табиғатын сауықтыру, орманды сақтау, егу, қорғауда өздеріңіздің зор үлестеріңіз бар. Сондықтан, Сіздерге Сыр жұртшылығы атынан ризашылығымды білдіремін! Мезгілдің ыстық-суығына қарамай аянбай еңбек етіп жүрген жерлестеріміздің еңбегі қашанда құрметке лайық”, – деді облыс әкімі.
</blockquote>
Жиын барысында бірқатар сала қызметкері Қызылорда облысының Құрмет грамоталары мен облыс әкімінің Алғыс хатымен марапатталды.
Орман шаруашылығы саласының ардагерлері Мұрат Төлеғұлов пен Мырзамұрат Ибраев аймақ басшысына орманшыларға көрсеткен құрметі үшін алғыс білдірді және әріптестерін қаламызды жасыл желекке орап, одан сайын көркеюіне атсалысуға шақырды.
Айта кетейік, Президенттің Арал теңізінің құрғаған ұлтанында сексеуіл екпелерін ұлғайту жөнінде тапсырмасына сәйкес осы жылдың 24 сәуірінде аймақ басшысы Экология, геология және табиғи ресурстар министрімен бірге Арал теңізінің құрғаған ұлтанында болып, орманшыларымыздың атқарған жұмыстарымен танысты. Алдағы бес жыл ішінде 1,1 млн. гектар алаңда фитоорманмелиорациялық жұмыстар жүзеге асырылады.
Биыл 100 мың гектар және 2022-2025 жылдары жыл сайын 250 мың гектар сексеуіл егу жұмыстары жүргізілетін болады. Алдағы 3 жылда орман шаруашылығы мекемелерінің материалды-техникалық базасын нығайтуға облыстық бюджеттен 1,8 млрд. теңге қаржы қарастырылып отыр.
Сонымен бірге, фитоорманмелиорациялық жұмыстар үшін халықаралық ұйымдардың (Дүниежүзілік банк, USAID, Герман ынтымақтастық қоғамы (GIZ) қаржысы тартылатын болады.Келесі жылдан бастап Дүниежүзілік Банктің қайтарымсыз қаржысы есебінен «Қазақстан Ландшафтарын қалпына келтіру жөніндегі» жоба аясында қажетті сексеуіл көшеттерін дайындау үшін тұрақты орман питомнигін құру, орман шаруашылығы мекемесіне қажетті техникалар сатып алу, Арал теңізінің құрғаған ұлтанының 500 мың гектарын картаға түсіру, 100 мың гектарына жобалық іздестіру және Қызылорда қаласы маңында 3 мың гектарға жасыл аймақ құру бойынша жұмыстар басталады.
<img src="https://kyzylorda-news.kz/wp-content/uploads/2021/10/fb_img_1634356598876.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634356601427.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634356612218.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634356617016.jpg" alt="" />
<img src="https://kyzylorda-news.kz/wp-content/uploads/2021/10/fb_img_1634356620572.jpg" alt="" />

Гүлшара Әбдіқалықова: Мезгілдің ыстық-суығына қарамай еңбек етіп жүрген қызметтеріңіз қашанда құрметке лайық

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықова жасөспірімдер арасында әлем чемпионы атанған ауыр атлет Рахат Бекболатпен кездесті.
Жиынға облыс әкімінің орынбасары Серік Ахмет, облыстық ауыр атлетика федерациясының президенті Темірхан Кенжебаев және ауыр атлетикадан ҚР еңбегі сіңген жаттықтырушы Нұржан Смаханов ауыр атлетикадан 4 дүркін әлем чемпионы Илья Ильин қатысты.
17 жасар қызылордалық зілтемірші 11 қазан күні Джиддада (Сауд Арабия) өткен турнирде 102 келіге дейінгі салмақ дәрежесінде жүлделі І орын алды. Ол 355 келі салмақты еңсерді. Бұл Рахат Бекболаттың жасөспірімдер арасындағы әлем чемпионатында иеленген екінші алтыны. Бұған дейін ол Ташкентте өткен әлемдік додада 377 келіні бағындырып, жеңімпаз атанған болатын.
Кездесуде аймақ басшысы әлемдік аренада ел абыройын асқақтатып, олжалы оралған спортшыны жеңісімен құттықтап, игі тілегін арнады.
<blockquote>
 «Кезекті жеңісің құтты болсын! Бұл біздің өңіріміз үшін ғана емес, ел үшін үлкен жетістік. Әрине, жеңіс еңбексіз келмейді. Спортшыларымыздың үздіксіз жалықпай жаттығып, жарысқа жауаптылықпен қарауы мен жаттықтырушылардың дайындық процесін дұрыс ұйымдастыра білуінің арқасында осындай зор жетістіктерге қол жеткізіп отырмыз. Сыр елінің абыройын асқақ еткен Қамшыбек Қоңқабаевтан кейінгі сенің бұл жеңісің – Тәуелсіз Қазақстанның 30 жылдық мерейлі белесіндегі жүлде тайқазанына тарлан рухты сырбойылықтардың атынан салған олжалы сый болды. Сол үшін де жерлестерің өзіңе риза! Сені осындай мерейлі жеңісіңмен құттықтаймын», – деді Гүлшара Әбдіқалықова.
</blockquote>
Облыс әкімімен пікірлесу барысында байрақты бәсеке жеңімпазы Рахат Бекболат жарыс кезіндегі ерекше сәттерімен бөлісті. Қолдау көрсеткен жанкүйерлеріне алғысын білдіріп, ел мәртебесін одан әрі асыруға дайын екендігін жеткізді.
Қабылдау соңында облыс әкімі Рахат Бекболатқа жеңісі үшін Сыр жұртының атынан сый-сияпат ретінде демеушілер есебінен 1 миллион теңгенің сертификатын табыстады.
Айта кетейік, Рахат Бекболат өткен жылы Перудің Лима қаласында онлайн форматта өткен Әлем кубогында жеңімпаз атанып, ел мәртебесін асырды. Кезекті жеңісі кезінде де спортшыны аймақ басшысы қабылдап, құрмет білдірген. Ал Vesti.kz оқырмандарының таңдауымен қызылордалық ауыр атлет «2020 жылдың үздік спортшысы» атанған болатын.
<img src="https://kyzylorda-news.kz/wp-content/uploads/2021/10/245892065_3802005073235867_1450137189251933721_n.jpg" alt="" />
<img src="https://kyzylorda-news.kz/wp-content/uploads/2021/10/245816301_3802004679902573_4982466406778656927_n.jpg" alt="" />
<img src="https://kyzylorda-news.kz/wp-content/uploads/2021/10/246138077_3802004729902568_1874197849724716243_n.jpg" alt="" />

Аймақ басшысы әлем чемпионы Рахат Бекболатты құттықтады

<a href="https://kyzylorda-news.kz/ru/obshestvo/">Kyzylorda-news.kz</a>. Ел Тәуелсіздігінің 30 жылдығы аясында бүгін аймақ басшысы Гүлшара Әбдіқалықова өңірдегі белгілі жыр жампоздарымен кездесіп, ашық форматта әңгімелесіп, пікірлерін тыңдады.
Облыс әкімі кездесу алдында ұлттық өнерді айшықтайтын арнайы көрмені тамашалап, ұлттық аспаптар мен бірнеше жыр-жинақтарымен танысты.
Келелі басқосуда Гүлшара Әбдіқалықова дәстүрлі өнер өкілдерінің Сыр еліндегі рухани-мәдени дамуына қосқан үлестерін жоғары бағалап, ұлттық өнердің жанашырларына құрметін жеткізді.
<blockquote>
 «Елбасымыз Нұрсұлтан Әбішұлы Назарбаев «Өркениетті ұлт ең алдымен тарихымен, мәдениетімен, ұлтын ұлықтаған ұлы тұлғаларымен, әлемдік мәдениеттің алтын қорына қосқан үлкенді-кішілі үлесімен мақтанады. Сөйтіп, тек өзінің төл мәдениеті арқылы ғана басқаға танылады» – деп атап өткендей, халқымыздың ерекше қадірлейтін дарынды тұлғалары қасиетті мұраларды тудырушы, жасаушы және келер күндерге ұластырушы таланттар қатарында жыраулар мен жыршылардың қай заманда да бәсі жоғары, шоқтығы биік. Қорқыт бабадан бастау алған жәдігер өнерді жалғастырушы Сыр сүлейлерінің әрқайсысы бір-бір жеке философиялық мектеп, әрқайсысы дүниетанушы ұлттық тәлімгер екенін ескерсек, бұл қастерлі өлке ұлт руханиятының алтын діңгегі деуге болады. Қасиетті де киелі Сыр бойы – біріне-бірі өмірде жол, өнерде қол берген атақты Сыр сүлейлері шыққан өңір. Дәстүрлі өнердің дарабоз иелері ретінде жанашырлары ретінде бүгінгі өздеріңізбен жүздесіп, руханият саласының өткені, бүгіні, келешегі жөнінде келелі ойлар айтып, емен жарқын пікірлесу үшін жиналдық», – деді облыс әкімі.
</blockquote>
Өңір басшысы еліміз егемендік алған жылдар ішінде ұлттық өнердің осы түріне ерекше көзқарас қалыптасқанын тілге тиек етті. Сондай-ақ, Ел Президенті Қасым-Жомарт Тоқаев «Тәуелсіздік бәрінен қымбат» атты мақаласында «Ұлттық болмысымыздан, төл мәдениетіміз бен салт-дәстүрімізден ажырап қалмау – барлық өркениеттер мидай араласқан аласапыранда жұтылып кетпеудің бірден бір кепілі» екендігін, Тәуелсіздік жылдарында жүзеге асырылған «Мәдени мұра» бағдарламасы арқылы тарихымызды түгендеп, ұлттық дәстүріміз бен мұраларымыздың қайта жаңғырғанын тағы бір еске салды.
Кездесу барысында «Парасат» орденінің иегері, Қазақстанның еңбек сіңірген қайраткері Алмас Алматов облыс әкіміне дәстүрлі өнерге көрсеткен қамқорлығы үшін алғыс білдіріп, осы кезге дейін ұсыныс ретінде айтылған Түркітілдес халықтарының дәстүрлі өнер академиясында ән, күй, жыр, айтыс, би бағыттары бойынша жастарға грант бөлуді ұсынды.
Ал, жыршы, Мәдениет қайраткері төсбелгісінің иегері Берік Саймағамбетов Қызылорда қаласында «Сыр сүлейлері музейін» ашу туралы ұсыныс айтса, дәстүрлі әнші Ақмарал Ноғайбаева облыс әкімінен Нартайдың шығармашылығына экспедициялық зерттеу жұмыстарын жүргізуге ықпал етуін сұрады. Сондай-ақ, жыршы, Қорқыт мұрасын насихаттаушы Марат Сүгірбай дәстүрлі өнер кеңінен насихатталуына, өзге өңірлерде Сыр елінің еріктілерінің өнер көрсетуге қолғабыс етуді ұсынды.
Жыраулық өнерді жалғастырушы азаматтардың пікірлерін саралаған облыс әкімі ұлттық өнерді дамытуға оң серпін беретін әрбір ұсыныстың байыпты түрде қаралатынын қаперге салды.
Кездесуде Гүлшара Әбдіқалықова жыршы, жырау Алмас Алматов пен Жиенбай жыраудың ұрпағы Бидас Рүстембековты мерейтойымен құттықтап, Сыр елі жұртының атынан қазақы дәстүрмен иығына шапан жапты. Сондай-ақ, бірқатар өнер саңлақтарына құрмет төрінен көрінді.
ҚР Мәдениет және спорт министрлігінің «Мәдениет саласының үздігі» төсбелгісімен Шолпан Бимбетова, Серік Жақсығұлов, Айбек Тәңірбергенов марапатталды. Ал, министрліктің Құрмет грамотасын Марат Сүгірбай мен Нұртілек Ахтаев иеленді. Сондай-ақ, бірнеше өнер жанашырлары облыс әкімінің Алғыс хатына ие болды. 
Жүздесу соңында өнер қайраткерлері Марат Сүгірбай және Мұхаметәлі Бекпейісов жыр шашу орындап, ақын Айдос Рахметов арнау арнады.
Айта кетейік, өнер зерттеушілері Мардан Байділдаев, Алма Құнанбаева, Алмас Алматовтың тынымсыз еңбегінің арқасында Сыр бойында мақам-саздық ерекшеліктеріне қарай төрт жыраулық мектеп – Нұртуған, Жиенбай, Нартай, Сәрсенбай жырау мектептері қалыптасып, дәстүрлі өнердің өрісі кеңіп, қанаты қатайды.
Өңірдегі «Жыр мұра» жобасы аясында ашылған жыр-терме, қобыз сынды 50-ден аса үйірмеде 500-ден аса шәкірт тәрбиеленуде. Үйірмелерден шыққан өнерпаздар республикалық, халықаралық деңгейдегі жыр додаларында жүлделі орындарды иеленумен қатар, дәстүрлі өнер мамандықтары бойынша арнаулы, жоғары оқу орындарында білім алуда.
Биылғы жылы да Қорқыт ата атындағы Қызылорда университеті жанындағы «Дәстүрлі өнер» институтына дарынды жастарды оқытуға облыстық бюджеттен 6 грант бөлінді. Сонымен қатар, Сыр өңірінің жыраулық дәстүрін насихаттап жүрген орта және жас буын жыршыларымыз «Qazaqstan» ұлттық арнасының «Күміс көмей», «Хабар» телеарнасының «Алтыбақан» бағдарламаларына қатысып, алтын қорға жазылып алынса, жыршы Күнсұлу Түрікпен халықаралық «Мен қазақпын» мега жобасында дәстүрлі өнер номинациясы бойынша Бас жүлдені иеленді.
Биыл Ел Тәуелсіздігінің 30 жылдығы, Сыр сүлейі Кете Жүсіп Ешниязұлының 150 жылдығына арналып өткен «Жырлансын, Тәуелсіздік жыр бұлағы» атты жыршы-жыраулар байқауы жыраулық дәстүрді бойына сіңірген талантты жыр жауһарларының өсіп келе жатқандығын, рухани сабақтастықтың жалғастығы бар екендігін дәлелдеді.
Келер жылы Сыр шайырлары Базар Жырау Оңдасұлының 180 жылдығы, Тұрмағамбет Ізтілеуұлының 140 жылдығын атап өтіп, дәстүрлі «Қорқыт және Ұлы Дала сазы» халықаралық фольклорлық-музыкалық өнер фестивалін ұйымдастыру жоспарлануда.
<img src="https://kyzylorda-news.kz/wp-content/uploads/2021/10/oblys1.jpg" alt="" />
<img src="https://kyzylorda-news.kz/wp-content/uploads/2021/10/oblys2.jpg" alt="" />
<img src="https://kyzylorda-news.kz/wp-content/uploads/2021/10/oblys3.jpg" alt="" />
<img src="https://kyzylorda-news.kz/wp-content/uploads/2021/10/oblys4.jpg" alt="" />
<img src="https://kyzylorda-news.kz/wp-content/uploads/2021/10/oblys5.jpg" alt="" />
<img src="https://kyzylorda-news.kz/wp-content/uploads/2021/10/oblys6.jpg" alt="" />
<img src="https://kyzylorda-news.kz/wp-content/uploads/2021/10/oblys7.jpg" alt="" />

Гүлшара Әбдіқалықова жыршы-жыраулармен жүздесіп, ұсыныстарына құлақ асты

<a href="https://kyzylorda-news.kz/ru/obshestvo/">Kyzylorda-news.kz</a>. Бұл күндері елімізде бастапқы медициналық-санитарлық көмек (БМСК) ұйымдарына жыл сайынғы тіркелу науқаны өтуде. Бүгінгі таңда емхананы еркін таңдау құқығын Қызылорда облысының 900-ден астам тұрғыны пайдаланды. БАҚ өкілдері Әлеуметтік медициналық сақтандыру қорының облыстық филиалы ұйымдастырған баспасөз туры барысында жеке және мемлекеттік емханалардағы тіркеу науқанының барысымен танысты.
15 қыркүйекте елімізде БМСК ұйымын еркін таңдау науқаны басталды. Емхананы екі ай көлемінде – 15 қарашасына дейін ауыстыруға болады. Бұл мүмкіндікті Қызылорда қаласының тұрғыны Нұршат Ахметова пайдаланды.
<blockquote>
 «Бүгін №6 емханаға тіркелдім. Мұнда тұрмысқа шыққанға дейін қаралдым. Кәсіби мамандар қызметі ұнайды. Міндетті әлеуметтік медициналық сақтандыру (МӘМС) жүйесінде сақтандырылғандықтан тіркеу барысында ешқандай кедергі болған жоқ», – дейді Нұршат.
</blockquote>
Жалпы, бүгінгі күні №6 қалалық емхана 69 246 тұрғынға қызмет көрсетеді. Көпшілігі БМСК көрсететін медициналық ұйымына өтініш беру арқылы тіркелсе, қалған азаматтар онлайн қызметті таңдаған (egov.kz порталы арқылы) немесе ХҚКО-ға өтінішпен жүгінеді. Басты шарт – сіз МӘМС жүйесінде сақтандырылуыңыз керек.
«Interteach» клиникасына тіркелгісі келетіндер аз емес. Науқан басталғалы бері бір ай ішінде 600-ге жуық адам тіркелген. Клиника 2019 жылдан бастап бастапқы медициналық-санитарлық көмек көрсетеді. Сол кезеңнен бері мұнда 1 900 қызылордалыққа қызмет көрсетіледі.
<blockquote>
 «Біздің жұмыс беруші «ПетроҚазақстан Кумколь Ресорсиз» компаниясы ерікті медициналық сақтандыру шеңберінде клиникамен келісім шарт жасасты. Сондай-ақ, мұнда бүкіл отбасымен міндетті әлеуметтік медициналық сақтандыру аясында медициналық қызметтерді аламыз. Бұл өте ыңғайлы. Сонымен қатар, кезек жоқ, барлық қажетті тар буынды мамандар, диагностикалық қызметтер бар және шұғыл медициналық көмек жақсы жолға қойылған», – дейді қала тұрғыны Айдар Оразаев.
</blockquote>
«Interteach» клиникасы бас дәрігері орынбасарының міндетін атқарушы Айгүл Аблаеваның айтуынша, БМСК қызметіне сұраныстың артуына байланысты екінші аймақты ашу жоспарлануда. Ережеге сәйкес, кампания кезінде тіркелген азаматтар 2022 жылдың 1 қаңтарынан бастап медициналық көмек ала бастайды.
Айта кетейік, тіркеу науқаны емхананы ауыстырудың жалғыз мүмкіндігі емес. Бұл рәсімді жылына бір рет еркін таңдау құқығымен жасауға болады. Сондай-ақ егер адам тұрақты немесе уақытша тұратын жерін, жұмыс немесе оқу орнын ауыстырған жағдайда, басқа елді мекенге көшкен болса немесе ол тұрған емхана қайта ұйымдастырылса, жойылса және басқа да жағдайларда емхананы ауыстыруға құқылы.
Егер сізде медициналық қызметтерді алуға байланысты сұрақтар туындаған жағдайда, өтінішті Қордың ресми кері байланыс арналары – 1406 байланыс орталығы, «Qoldau 24/7» мобильді қосымшасы, Қордың www.fms.kz сайты, Telegram-дағы Saqtandyry-bot арқылы хабарласуға болады. Мұнда да сіз сақтандыру мәртебеңізді тексере аласыз.

Қызылордада емхананы еркін таңдау құқығын 900-ден астам тұрғын пайдаланды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда қаласы бойынша 400 жуық қоғамдық көлік тұрғындарға қызмет көрсетеді. Оның ішінде – 25 бағыт қалаішілік болса, 8 бағыт қала маңына қатынайды. Қазіргі таңда қоғамдық көліктердің жол сызбасы тұрғындардың сұранысына сәйкес оңтайландыру үшін тиісті шаралар жасалуда. Бұл туралы Өңірлік коммуникациялар қызметінде өткен брифингте қалалық тұрғын үй-коммуналдық шаруашылығы, автомобиль жолдары, жолаушылар көлігі және тұрғын үй инспекциясы бөлімінің басшысы Бауыржан Оспанов мәлімдеді.
<blockquote>
 «Қаланың бірқатар мөлтек аудандарын қоғамдық көлікпен қамтамасыз ету мақсатында арнайы жол сызбалар әзірленді. Осы ретте жолаушылар тасымалына арналған конкурс өткізілмек. Соңғы кезде қоғамдық көлік мәселесіне байланысты пікірлер көп. Пандемияға байланысты жолаушылар ағыны едәуір азайып, жолаушы тасымалы қызметін көрсететін жеке кәсіпкерлер біршама шығынға ұшырады. Осы мәселе бойынша шығындарды өтеу үшін облыстық бюджеттен субсидиялауға қажетті құжаттар дайындалды. Субсидиялаудағы басты мақсат − жол жүру тарифтерінің өсуіне жол бермеу және жолаушы тасымалы қызметін жақсарту. Айта кетейік, қоғамдық көліктерде электронды төлем жүйесін пайдалану 70 пайызды құрады. Қала тұрғындарының қоғамдық көлікке деген сұранысын қанағаттандыру мақсатында тиісті шаралар жүргізілетін болады», – деді Бауыржан Әліпбайұлы.
</blockquote>

Қызылордада қоғамдық көліктердің жол сызбасы қайта қаралады

<a href="https://kyzylorda-news.kz/ru/obshestvo/">Kyzylorda-news.kz</a>. Аймақта адамдарды алдап, сеніміне кіріп алаяқтықпен айналысатын қылмыскерлер саны азаймай тұр. Жыл басынан бері 553 алаяқтық қылмыс тіркелсе, соның 313 ғаламтор арқылы тұрғындарға залал келтірген. Мұндай қылмысты ашу көптеген қиындықтар тудырады. Бұл туралы Өңірлік коммуникациялар қызметінде өткен брифингте облыстық Полиция департаменті бастығының орынбасары полиция полковнигі Ерлан Ахметов мәлімдеді.
<blockquote>
 «Орын алған қылмыстардың басым бөлігі интернет немесе әлеуметтік желі арқылы жасалған. Азаматтарымыз көбіне өздерінің материалдық жағдайын түзеу мақсатында интернет-дүкендерінен сауда-саттық жасаймын деп алданып қалуда. Онымен қоса, банк немесе басқа да мемлекеттік мекеме атын жамылып, телефон шалып, есеп шоттарыңыздың кодтар мен сілтемелерін алу арқылы алданып жатқан жағдайлар да бар. Соңғы кезде кездесіп жатқан алаяқтықтың бір түрі – ол белгісіз тұлғадан немесе жеке компаниялар атынан смс хабарламалар жолданып, түрлі акциялар туралы, азаматтың ұтысқа ие болғанын хабарлап, алдын ала белгілі бір сомадағы ақшаны аудартып алу деректері де кездесуде. Сондықтан, бейтаныс, толық-білмейтін, жеңіл табыс табуға уәде берген адамдарға сенімділік танытпауды сұраймыз», – деді полиция департаменті бастығының орынбасары Ерлан Сейділдаұлы.
</blockquote>
Дегенмен, айта кеткен жөн облыс бойынша 9 айда тіркелген қылмыстар саны 6 пайызға, ауыр, адам өлтіру, ұрлық, мал ұрлығы, тонау, бұзақылық қылмыстары төмендеді. Қоғамдық орында, көшеде, мас күйінде, бұрын сотты болғандармен, топпен, кәмелетке толмағандармен, отбасы-тұрмыстық саласында жасалған қылмыстар саны да азайды.

Ерлан Ахметов: Жыл басынан бері 553 алаяқтық қылмыс тіркелді

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова өңірдегі депутат әйелдер қауымымен кездесіп, аймақты дамыту бағытындағы келелі ұсыныстарын тыңдап, ашық пікірлесті.
Жиынға әртүрлі салада жемісті еңбек еткен ардагерлер, облыстық салалық басқарма басшылары мен облыстық, аудандық мәслихаттың депутаттары мен іскер әйелдер қауымы шақырылды.
Облыстық мәслихат хатшысы Наурызбай Байқадамов модераторлық еткен жиында әйелдердің қоғамдағы орны және түрлі салаларда қызмет ететін әйелдердің еңбегін мемлекет тарапынан лайықты деңгейде бағалау мәселелері айтылды.
Басқосу барысында өңір басшысы ел Тәуелсіздігінің 30 жылдық белесінде халықпен етене жақын араласатын әртүрлі саладағы нәзік жандылардың табанды еңбегін жоғары бағалап, өңірді өркендету бағытындағы алға қойған мақсат-міндеттерді бірге орындауға шақырды.Биыл – Тәуелсіздігіміздің 30 жылдық мерейлі жылы. Осы жылдар ішіндегі еліміздің толағай табыстары мен Сыр өлкесінің қол жеткен жетістіктерінің барлығында әйелдер қауымының өз қолтаңбасы бар. Тұңғыш Президентіміз – Елбасы Нұрсұлтан Әбішұлы Назарбаевтың «Тәуелсіздік жылдарында мемлекетіміздің өсіп-өркендеуіне әйелдердің қосқан үлесі шексіз» деп ерекше атап көрсетуі де сондықтан. Бүгінде әйелдер қауымы отбасының ұйытқысы болып қана қоймай, қоғамдық-саяси, әлеуметтік-экономикалық және рухани-мәдени салада табысты еңбек етіп келеді.
<blockquote>
 «Әйелдерді экономикаға тарту процесінің кешенді мәселелері менің тұрақты бақылауымда. Осы мақсатта мен аудандарды аралау барысында да, жеке қабылдаулар аясында да олармен кездесулерді тұрақты түрде өткіземін. Бір жылдан астам уақыт ішінде 92 ауылдық округке бардым. Кәсіпкер әйелдермен жеке кездесіп, олардың жұмыстарымен таныстым. Әрбір ұтымды ұсыныс қараусыз қалмайды», – деді Гүлшара Әбдіқалықова.
</blockquote>
Кездесуде сала ардагерлері, облыс және аудандық мәслихат депутаттары өздерінің ұсыныстарын жеткізіп, түрлі тақырыпта пікір алмасты. Қызылорда облысының құрметті азаматы, облыстық мәслихаттың ІІ,ІІІ, ІV шақырылымының депутаты Алмагүл Божанова іскер әйелдердің белсенділігін арттыру, оларды қоғамдық істерге ұдайы түрде тарту қажеттігін айтып, ортақ мәселе көтеруде бірлескен шешімдерді қабылдауға шақырды. Сондай-ақ, әлеуметтік мәселелерді көтеруде депуттатық корпустағы әйелдердің ұсыныстарының маңызды екенін алға тартты. Кездесуде Арал өңіріндегі судың тапшылығы, қуаңшылық мәселесі, Көкарал су қоймайсын жаңғырту, әйелдердің әлеуметтік жобалармен айналысуы сынды өзекті мәселелер қозғалды.
Алқалы жиында Арал аудандық мәслихатының депутаты, аудандық әйелдер кеңесінің төрайымы Ақыл Сәдуақасова, Шиелі аудандық мәслихатының VІ, VІІ шақырылым депутаты Нәйла Палымбет өз кәсібін бастаған нәзік жандылардың бизнесін қолдау және оның аясын кеңейту мәселелерін көтерді. Облыстық мәслихаттың VІІ шақырылым депутаты Сәрсенкүл Биқожа мүмкіндігі шектеулі жандарды қоғамдық ортаға бейімдеу және қимыл-қозғалысын реттеу, әлеуметтік қолдау мәселелерін назарға ұсынды. Ал, облыстық мәслихат депутаты, ҚР Президенті жанындағы әйелдер істері және отбасылық-демографиялық саясат жөніндегі комиссия мүшесі Аида Абибуллаева өңірде отбасы мәселелерін қарайтын арнайы басқарма құру керектігін жеткізді.
Сондай-ақ, облыстық әйелдер кеңесінің төрайымы Райкүл Байназарова әйелдердің кадрлық резервін даярлау және көшбасшы әйелдер клубын құру идеясын ортаға салды. Мұнан бөлек, кәсіпкер қыз-келіншектердің өндірген тауарлары мен бұйымдарын ұсынатын арнайы көрме ретінде өткізуді ұсынды.
Кездесуде әрбір ұсыныс-пікірді саралаған облыс әкімі басқосуда көтерілген мәселелерге нақты жауап берді.
<blockquote>
 «Бүгінгі еркін кездесу алдағы міндеттерді тағы бір саралауға жол ашты деп есептеймін. Әрине, ұсыныстардың әрбірі өзекті. Оның ішінде судың тапшылығы проблемасы Үкімет деңгейінде қаралып, уақытылы шешім қабылдануда. Мәселен, «Көкарал» су қоймасы бойынша биыл жобалық сметалық құжаттары толық аяқталды. Сараптамадан өткізу үшін мемлекет тарапынан қаржы да бөлінетін болды. Нәтижесінде келер жылы Көкаралға реконструкция жасау жұмыстары басталады деген сенімдеміз. Сол себепті бұл бағыттағы жұмыстар менің тікелей бақылауымда болады. Қуаңшылық жағдайында Арал өңірінде төтенше жағдай режимін уақытылы жариялап, қажетті қадамдарды іске асырдық. Көрші облыстардың көмегі де мәселені реттеуді жеделдетті. Үкімет деңгейіндегі қолдау шараларының нәтижесі шаруалардың жағдайына оң әсер етті дей аламыз. Ал, отбасы басқармасы жөніндегі идеяны елордада ұлттық комиссия ісін жүзеге асырып жүргенде пилоттық жоба ретінде Шымкент қаласына енгізген едік. Бұл ретте басқа өңірлердің тәжірибесін қарау керек. Қолдауға болатын ұсыныс ретінде қарай аламын. Сондай-ақ, әйелдер кадрлық резервін құру туралы идея бұрыннан ойымда жүрген еді. Оны өткен аптада өткен халықаралық әйелдер энергетикалық клубының V форумында ұсыныс ретінде жолдадым. Сондықтан айтылған ұсыныстарыңызды ескеріп, саралайтын боламыз», – деді облыс әкімі.
</blockquote>
Жиын соңында Гүлшара Әбдіқалықова өңірдің дамуына сүбелі үлесін қосқан сала ардагерлері мен депутаттарды Алғыс хатпен марапаттап, ілтипатын көрсетті.
Айта кетейік, облыста 823 мыңнан астам тұрғын болса, оның 410 мыңға жуығы әйелдер. Сондай-ақ, медицина қызметкерлерінің 87 пайызы, педагогтардың 73 пайызы, жалпы бюджеттік сала қызметкерлерінің 60, мемлекеттік қызметшілердің 37 пайызы нәзік жандылардың үлесінде.
<img src="https://kyzylorda-news.kz/wp-content/uploads/2021/10/akim3.jpg" alt="" />
<img src="https://kyzylorda-news.kz/wp-content/uploads/2021/10/akim4.jpg" alt="" />
<img src="https://kyzylorda-news.kz/wp-content/uploads/2021/10/akim1.jpg" alt="" />
<img src="https://kyzylorda-news.kz/wp-content/uploads/2021/10/akim2.jpg" alt="" />

Гүлшара Әбдіқалықова: Әйелдерді экономикаға тарту процесінің кешенді мәселелері менің тұрақты бақылауымда

<a href="https://kyzylorda-news.kz/ru/obshestvo/">Kyzylorda-news.kz</a>. Атырау мұнай өңдеу зауыты жоспардан тыс тоқтап қалды. Көрші елдерде дизель отынның бағасы күрт өсті. Осыған байланысты қыркүйек айынан бастап ел бойынша дизель бағасының өсімі және тапшылық жағдайы орын алуда. Бұл туралы Өңірлік коммуникациялар қызметінде өткен баспасөз конфернциясында Қызылорда облыстық кәсіпкерлік және туризм басқармасы басшысының орынбасары Мұрат Тасқараев мәлімдеді.
Көршілес Ресеймен дизель отынының литріне айырмашылық 100 теңгеге, Өзбекстанмен 70-80 теңгеге және Қырғызстанмен 61 теңгеге дейін жетеді. Барлық транзиттік автокөліктер Қазақстаннан кіріп-шығу жолында жанар-жағар май құюда, осылайша шекара маңындағы облыстарда тұтыну көрсеткіші күрт өскен.
Ағымдағы жылдың мамыр-қыркүйек айларында дизель отынына сұраныс өткен жылмен салыстырғанда 480,0 мың тоннаға артқан. Тамыз айында 519,0 мың тонна дизель отыны тұтынылды. Сонымен қатар, ағымдағы жылдың 1 қазанынан Павлодар мұнай-химия зауыты (ПМХЗ) жоспарлы жөндеуге тоқтатылды. Осы орайда, елімізге дизель отынының жеткіліксіз көлемі Ресейден импортталуда.
Мұрат Ибрагимұлының айтуынша, ҚР Энергетика министрінің бұйрықтарымен АИ-92 маркалы бензині мен дизель отының бағаларына мемлекеттік реттеу алынып тасталып, бүгінгі күні олардың бағалары нарықпен реттеледі.
Айта кету керек, бүгінде облыста 145 жанар-жағар май бекеттері жұмыс жасайды. Биылғы жылдың қыркүйек айының басында дизель отынының орташа бағасы 196 теңгені құраса, 13 қазандағы мониторинг мәліметтері бойынша дизель отынының орташа бағасы 210,9 теңгеге, ең жоғары бағасы 235 теңгеге жеткен.
Сондай-ақ, жыл сайын егін науқаны кезінде дизель отынына сұраныс жоғарылайды, яғни тамыз-қыркүйек айларына дейін күніне қажеттілік 170 – 180 тонна болған, қазір 245 тоннаға дейін көтерілді. Бүгінгі таңда ірі автожанармай құю станцияларының желілерінде(«Компас», «Гелиос», «Қазақ Ойл») дизель отыны лимитпен бір машинаға 50-100 литрден босатылуда, «TS», «СиноОйл» АЗС-терінде талонмен, «Батыс Еуропа – Батыс Қытай» трассасының бойында бір машинаға 100-200 литр лимитпен берілуде.

Қызылордада дизель отынының бағасы 235 теңгеге жетті

<a href="https://kyzylorda-news.kz/ru/obshestvo/">Kyzylorda-news.kz</a>. Биылғы жылы бюжеттен 20 млрд. теңге бөлініп, ұзындығы 355 шақырымды құрайтын автомобиль жолдары мен көпір өткелдері жөндеуден өткізілді. Өңірлік коммуникациялар қызметінің ақпарат аланыңда облыстық жолаушылар көлігі және автомобиль жолдары басқармасының басшысы Мұрат Тілеумбетов мемлекеттік бағдарламамен іске асырылып жатқан жобалар туралы баяндады.
<blockquote>
 «Жалпы осы жылы республикалық бюжеттен төрт мемлекеттік бағдарламаны іске асыру үшін 10,8 млрд теңге көлемінде инвестиция тартылды. Мәселен «Нұрлы жол» бағдарламасы аясында ұзындығы – 250 шақырым болатын облыстық және аудандық маңызы бар автомобиль жолдары жөндеуден өткізу жоспарланған болатын. Қазіргі таңда ол жолдардың жақсы және қанағаттанарлық индикаторлық көрсеткішінің үлесі 75 пайызға жеткізу қамтамасыз етілетін болады. Ал «Өңірлерді дамыту» бағдарламасы шеңберінде қаладағы бірнеше көшелерге жөндеу жұмыстары жүргізілуде. Сондай-ақ «Ауыл ел – бесігі» бағдарламасымен бірқатар аудандарға тиісті қаржы есебінен орташа жөндеу жүргізілуде. «Кіші қалаларды дамыту» жобасымен Арал қаласының 10 көшесін қайта жаңғырту кезең-кезеңімен іске асырылып жатыр. Сонымен қатар Жаңақорған және Шиелі аудандарында орналасқан апаттық жағдайдағы көпірлерге жобалау-сметалық құжаттамасы әзірленді», – деді Мұрат Жолкелдіұлы.
</blockquote>
Биылғы жылы автомобиль көлігі арқылы 52,3 млн. жолаушы тасымалданды. Бұл өткен жылмен салыстырғанда 107,2 млн. адам яғни 48,8 пайызды құрап отыр. Коронавирус пандемиясы жолаушылар ағымының төмендеуіне әсер етуде. Жолаушылар мен тасымалдаушыларға қала мен аудан орталықтарындағы 3 автовокзал және 8 автостанса қызмет көрсетуде. Сонымен қатар, халықаралық стандарттарға сай әуежай терминалы қолданысқа берілмек.
<blockquote>
 «Өңірден өтетін магистральдық темір жол желісінің жалпы ұзындығы – 1051,7 шақырымды құрайды. Ал жолаушыларға 8 темір жол вокзалы қызмет көрсетіп келеді. Облыс аумағынан барлығы 19 жұп жолаушы пойызы, оның ішінде облыс орталығынан 5 жұп пойызы ұйымдастырылған. Бүгінгі күні пандемияға байланысты 9 жұп пойызы уақытша тоқтатылып тұр. Әуе көлігі бойынша «Қорқыт Ата» әуежайы арқылы аптасына 23 тұрақты рейс қатынайды. Тоғыз айдың есебінше әуежайдан 103,18 мың жолаушы жөнелтілді. Қазіргі таңда әуежайдың қолданыстағы жолаушылар терминалын кеңейтуге жұмыстар жүргізілуде. Жобалау сметалық құжаттама әзірленіп, мемлекеттік сараптамадан оң қорытынды алынды. Жобаға сәйкес, терминалдың ауданы қазіргіден екі есеге, яғни шамамен 1400 шаршы метрге кеңейеді деп күтілуде. Кеңейтілген әуежай терминалында барлық халықаралық стандарт талаптарына сай жолаушыларға қызмет көрсетуге қажетті жағдайлар қарастырылатын болады», – деді басқарма басшысы Мұрат Тілеумбетов.
</blockquote>

Мұрат Тілеумбетов: 9 жұп пойызы уақытша тоқтатылып тұр

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда-Жезқазған тас жолын жөндеу жұмыстары басталды. Республикалық маңызы бар А-17 «Қызылорда-Павлодар-Успенка-РФ шекарасы» автомобиль жолының «Қызылорда-Жезқазған» тас жолын 12-216 шақырымдар аралығы яғни ұзыңдығы 204 шақырымды қайта жаңарту жұмыстары бойынша жобалық-сметалық құжаттар дайындалды.
Жобалық-сметалық құжаттамалар мемлекеттік сараптаманың оң қорытындысын алды. Қазіргі таңда мердігер мекемені анықтау үшін тендерлік рәсімдеме жүргізілуде. Бұл туралы бүгін Өңірлік коммуникациялар қызметінде өткен баспасөз конференциясында «ҚАЗАВТОЖОЛ» ҰҚ акционерлік қоғамының Қызылорда облыстық филиалының директорының міндетін атқарушы Шанжархан Мырзабай мәлімдеді.
Мердігер мекеме анықталғаннан кейін құрылыс-монтаж жұмыстары осы жылы басталады деп жоспарланып отыр.
<blockquote>
 «Бұл жолдың 25+374 шақырымынан бастап М-32 «Самара-Шымкент» автомобиль жолының 1827+427 шақырымына дейін Қызылорда қаласын айналып өтеді. «Батыс Еуропа-Батыс Қытай» халықаралық транзиттік дәлізіне қосылып, одан әрі көліктер Шымкент және Самараға қарай бағытқа жүре алады. Жобада ені 7 метр болатын III техникалық санаттағы автомобиль жолын ені 9 метр болатын II техникалық санаттағы жолға ауыстыру қаралған. Сонымен қатар, толығымен жарықтандырылған Қызылорда қаласының айналма жолын салу, 2 жол айрығы (транспортная развязка), 2 ауыл шаруашылық техника мен үй жануарларына арналған жол өткелі, су арналарынан өтетін 3 көпір, 2 көп функционалды аралық бақылау (салмақ, габарит, жылдамдық) өлшейтін арка, заманауи жылы 5 дәретхана, 6 демалыс алаңы, 56 су өткізгіш құбыр, 10 мал өткелі, 117 жолдың қиылысы және түйісуі қарастырылған», – деді Ш.Мырзабай.
</blockquote>
Жоба бойынша құрылыс-монтаж жұмыстары 3 жылда аяқталады деп жоспарлануда. Шамамен 2,5 мың адамға арналған жұмыс орны ашылмақ. Оның 70 пайызы яғни 1750 жергілікті тұрғын. Жобаның сметалық құны 106,6 млрд. теңгені құрайды.

«Қызылорда-Жезқазған» тас жолын жөндеу жұмыстары басталды

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова облыс бойынша медициналық және фармацевтикалық бақылау мен облыстық санитариялық-эпидемиологиялық бақылау департаменттерінің басшыларымен кездесіп, атқарылған жұмыстарды саралады.
Алдымен медициналық және фармацевтикалық бақылау департаментінің басшысы Ғалия Байменова 9 айда атқарылған негізгі жұмыстарға тоқталып, өңірдегі ахуалды баяндады.
Жыл басынан бері департаментпен көрсетілетін медициналық қызмет пен фармацевтикалық нысандарға жоспардан тыс 131, жоспар бойынша 28 тексеріс ұйымдастырылған. Нәтижесінде түрлі дәрежедегі 56 әкімшілік құқық бұзушылық анықталып, жалпы көлемі 3,5 миллион теңгеге жуық айыппұл салынды. Департаментке келіп түскен шағымдардың басым бөлігі медициналық қызметке, емханалардың жұмысына байланысты туындаған. 
Мекеме басшысының айтуынша, бүгінде дәрі-дәрмек қорында тапшылық жоқ. «СҚ-Фармация» ЖШС дәрілік қоймасында ковидке қарсы 3,69 миллион теңгенің дәрі қоры сақталған.
Өңір басшысы шалғай елді мекендегі дәріханаларда препараттардың қорын тексеріп, қажеттілікке қарай анализ жүргізу қажеттігін еске салды.
<blockquote>
 «Көрші Ресейде эпидемиологиялық жағдайдың ушығуына байланысты бізге де нақты іс-шаралар жоспарын бекіту қажет. Әсіресе, шалғай ауылдар мен аудандарда дәрі тапшылығының орын алмауын қамтамасыз ету керек. Тұрғындардың шағымдарын ескеріп, департаментке түскен өтініштер бойынша тексеру, бақылау жұмыстарын әлде де күшейтуді тапсырамын», – деді облыс әкімі.
</blockquote>
Айта кетейік, облыс әкімдігінің қолдауымен фармацевтикалық ұйымдарды қажетті дәрілік препараттармен қамтамасыз ету үшін 488 миллион теңге қаражат бөлінді. Қазіргі таңда аймақтағы 17 мекеме бір жылға 1 пайыз мөлшерлемемен несие берілді.
<img src="https://kyzylorda-news.kz/wp-content/uploads/2021/10/ob.jpg" alt="" />

Қазақстан және Қызылорда облысының жаңалықтары: Басты жаңалықтар old