Kyzylorda-news.kz. Лионель Месси “Барселонамен” қоштасу баспасөз мәслихатында көз жасын сүрткен беторамал Mercado Libre сайтында сатылымға шықты, деп хабарлайды Tengrinews.kz.
Лоттың бастапқы құны – 1 миллион аргентиналық песо (10 298 АҚШ доллары). Сатушы орамалда спортшының көз жасы бар дейді. Бұл, сатушының пікірінше, болашақта оны клондауға мүмкіндік береді.
<img src="https://kyzylorda-news.kz/wp-content/uploads/2021/08/46f5836dc74abebfc364a10e45acdf22.png" alt="" />
Бұған дейін “Пари Сен-Жермен” аргентиналық шабуылшы Лионель Месси клубқа ауысқаннан кейін өзінің ресми сайтында оның тегі жазылған футболкаларға сатылым ашты. Бір сағатта 250 мың футболка сатылды.
Лионель Месси “Барселонада” 2000 жылдан бері өнер көрсетті, 2003 жылы негізгі құрамда ойнай бастады. Оның қанжығасында Испания чемпионатында 10 жеңіс, Испания Кубогы мен Суперкубоғында 7-ден, Чемпиондар Лигасында 4, Еуропа Суперкубогында 3 және клубтық Әлем чемпионатында 3 жеңіс бар. Биыл тамызда аргентиналық шабуылшы Лионель Месси ресми түрде Францияның “Пари Сен-Жермен” футбол клубына ауысты.

Месси жасын сүрткен беторамал 10 мың долларға сатылмақ

*<a href="https://kyzylorda-news.kz/">Kyzylorda-news.kz</a>.&nbsp; Бүгін аймақ басшысы Гүлшара Әбдіқалықова генерал Хон Бом Доның сүйегін Корей тарапына табыстау рәсімінен кейін облыстық мекемелер үйінде Корея Республикасы делегациясы өкілдерімен кездесті.*
Кездесуде қос тарап өзара байланысты дамытуға бағытталған маңызды мәселелерді талқыға салды. Облыс әкімі Корея делегациясының сапары екі ел арасындағы достық қарым-қатынастардың айқын көрсеткіші екенін айтып, табысты және жемісті жобалар жүзеге асырылатынына сенім білдірді.
<blockquote>
 “Қасиетті Сыр еліне қош келдіңіздер! Бүгінгі кездесу – Мемлекет басшысы Қасым-Жомарт Кемелұлының 2021 жылғы 17 тамыздағы Корея Республикасына мемлекеттік сапарымен тікелей байланысты. Президенттің мемлекеттік сапары аясында генерал Хон Бом Доның сүйегін табыстау рәсімін өтетін болады. Бұл сапар екі ел арасындағы экономикалық, мәдени-гуманитарлық, туристік байланыстарды одан әрі нығайтуға оң ықпал жасайды деп сенеміз. Сондай-ақ, Қазақстан Республикасы Тәуелсіздігінің 30 жылдығын мерекелеу қарсаңында тарихи сипатқа ие болады”, – деді Гүлшара Әбдіқалықова.
</blockquote>
Қазақстан мен Корея Республикасы 1992 жылдан бастап дипломатиялық қарым-қатынаста. Жүргізілген талдау нәтижелері Корей елінен негізінен автокөліктер, медициналық құрал-жабдықтар, косметикалық тауарлар импортталатынын байқатты.
Президент Қасым-Жомарт Кемелұлы Тоқаевтың мемлекеттік сапары аясында ынтымақтастық бағытында бірқатар бірлескен жобалар жүзеге асырылу жоспарлануда. Оның ішінде Қызылорда облысының әкімдігі тарапынан Сыр елінің бренді саналатын күріш дақылын суды үнемдеп өсіру үшін ақылды технологиялар, тамшылатып суару технологияларын қолдану, білім, денсаулық сақтау салаларындағы өзара іс-қимылды кеңейту, туризм саласын дамыту және инвестициялық жобаларды жүзеге асыру бағытында ұсыныстар айтылды.
Аймақ басшысы Қызылорда облысының әкімдігі инвесторларға мемлекеттік қолдау шараларын көрсетуге дайын екенін жеткізіп, алдағы уақытта екі жақты тиімді байланыс орнатуға мүдделі екенін тілге тиек етті.
Корея Республикасының патриоттар және ардагерлер жөніндегі министрі Хван Ги Чхоль екіжақты ынтымақтастықты орнатуда Корея мемлекеті тарапынан қолдау көрсетілетінін айтып, кездесу үшін алғысын білдірді.
<img src="https://kyzylorda-news.kz/wp-content/uploads/2021/08/fb_img_1628950246979.jpg" alt="" />

Гүлшара Әбдіқалықова Корея Республикасының делегация өкілдерімен кездесті

*<a href="https://kyzylorda-news.kz/">Kyzylorda-news.kz</a>.&nbsp; Бүгін Корея Республикасы ресми делегациясы жұмыс сапарымен Сыр еліне келді.*
Корея Республикасының патриоттар және ардагерлер жөніндегі министрі Хван Ги Чхоль бастаған делегацияны облыс әкімі Гүлшара Әбдіқалықова, облыс әкімінің орынбасары Серік Ахмет, Қызылорда қаласы әкімінің міндетін атқарушысы Бектас Нуридинов және Қызылорда облысының кәріс этномәдени бірлестігінің жетекшісі Елена Ким күтіп алды.
Шетелдік делегация құрамында Корея Республикасының патриоттар және ардагерлер жөніндегі министрі Хван Ги Чхоль, Корея Республикасының Қазақстан Республикасындағы Төтенше және Өкілетті Елшісі Ку Хонг Сок, «Генерал Хон Бом До мемориалы» қорының Төрағасы У Вон Шик, актёр Чо Вон Джун және басқа да сала қызметкерлері бар.
Жұмыс сапардың басты мақсаты өткен ғасырдың басында жапон басқыншыларына қарсы корей партизандық қозғалысының батыры болған, генерал Хон Бом Доның сүйегін туған жеріне алып кету және екі ел арасындағы ынтымақтастықты дамыту бағытында бірлескен жобаларды талқылау.
Күтіп алу салтанатты шарасынан кейін шетелдік қонақтармен мен облыс басшылығы «Хон Бом До» мемориалдық кешеніне жол жүрді. Мемориалдық кешенде генерал Хон Бом Доның сүйегін Корей тарапына табыстау рәсімі өтті. Одан кейін Хон Бом До атындағы қордың төрағасы У Вон-шик генералдың өмірбаянын, өткен жолын елге жеткізді.
Хон Бом До 1868 жылы кедей шаруа отбасында дүниеге келген. Корей патриоты, жапон басқыншыларына қарсы қарулы күрестің бастаушыларының бірі. 1907 жылы Капсана ауданында аңшылардан партизандар отрядын құрды. 1918-1922 жылдары өткен Кеңес Қиыр Шығыстағы Азамат соғысына қатысты. 1919 жылдан бастап Маньчжурияда жапон колонизаторларына қарсы әрекет еткен «Тәуелсіздік армиясының» көрнекті ұйымдастырушысы болды. Азаматтық соғыс аяқталғаннан кейін Хон Бом До Кеңес Одағы аумағында өмір сүріп, 1937 жылы Қызылорда қаласына күштеп жер аударылды. Өмірінің соңғы жылдары Хон Бом До Қызылордадағы корей театрында күзетші болып жұмыс істеді. Генерал Хон Бом До 1943 жылы 25 қазанда Қызылорда қаласында 75 жасында қайтыс болды.
Шарада облыс әкімі Гүлшара Әбдіқалықова ұлт азаттық көтерілісінің батыры, генерал Хон Бом Доның сүйегін туған жеріне қайтару екі ел арасындағы татулықты одан әрі нығайта түсетінін айтты.
<blockquote>
 “Биыл ел Тәуелсіздігіне мерейлі 30 жылдығында Сыр елінде көптеген игі шаралар атқарылуда. Мемлекетаралық деңгейдегі шаралар да көрініс табуда. Осы ретте, біздің республикамыздың тәуелсіздігін алғашқы болып мойындаған елдердің бірі – Корей мемлекетімен достық байланыс нық орнығып, ұлттық мүдде тоғысқан ізгі істер қолға алынғаны белгілі. Ел Президенті Қасым-Жомарт Кемелұлы Тоқаев Корея Президенті Мун Чже Иннің Қызылордада жерленген генерал Хон Бом Доның сүйегін тарихи отанына қайтару туралы сауалына қатысты оң шешім қабылдады. Ел басына күн туғанда қазақ халқы корейлерді құшақ жая қарсы алып, бауырына тартып, қол ұшын берді. Соның арқасында Қазақстанға жер аударылған корейлер аман қалып, бүгінгі күні тәуелсіз елімізді дамытуға зор үлес қосуда. Қазақ халқында «Достықта шекара жоқ» деген жақсы сөз бар. Қазақстан және Корей мемлекеттерінің арасындағы ынтымақ пен достық қарым-қатынастың мықтылығы да осындай ұлы тұлғаларымен байланысты болмақ”, – деді аймақ басшысы.
</blockquote>
Мұнан кейін сөз Корея Республикасының патриоттар мен ардагерлер жөніндегі министрі Хван Ги Чхольге берілді.
Министр генерал Хон Бом Доның ерлігіне тоқталып, қазақ еліне көрсетілген құрмет үшін алғысын жеткізді. Сонымен қатар, «Қазақстан кәрістері Ассоциациясы» қоғамдық бірлестігінің жетекшісі Сергей Огайға, Қызылорда облысының Корей этно-мәдени бірлестігінің төрайымы Елена Кимге Алғыс хат табыстады.
Жергілікті корей халқының рәсімі бойынша еске алу шарасынан кейін Хон Бом Дон қабіріндегі сүйек қалдықтарын Қазақстандық құрмет қарауылының қатысуымен ресми шығарып салу рәсімі өтті.
Ертең Корея делегациясын Хон Бом Дон қабіріндегі сүйек қалдықтарымен туған жеріне ресми шығарып салу салтанатты шарасы өтеді деп жоспарлануда.
<img src="https://kyzylorda-news.kz/wp-content/uploads/2021/08/fb_img_1628949178272.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949160809.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949170955.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949181177.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949273272.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949268338.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949281171.jpg" alt="" />
<img src="https://kyzylorda-news.kz/wp-content/uploads/2021/08/fb_img_1628949288993.jpg" alt="" />

Хон Бом Доның сүйегі корей елінің өкілдеріне табысталды

Kyzylorda-news.kz. Қазіргі таңда ҚР Президенті Қасым-Жомарт Тоқаевтың Корея Республикасына 16-17 тамызда жоспарланған мемлекеттік сапарына дайындық жұмыстары жүргізілуде. Аталған сапар барысында Мемлекет басшысының корей халқының батыры, генерал Хон Бом Доның сүйегін корей тарапына табыстау рәсімі жоспарлануда. Бұл туралы Өңірлік коммуникациялар қызметінде өткен баспасөз конференциясында облыстық ішкі саясат басқармасы басшысының орынбасары Қуаныш Әбілдаев мемлекетаралық маңызға ие шараның дайындық жұмыстарын баяндады.
Хон Бом До 1937 жылы басқа да корейлермен бірге Қиыр Шығыстан Сыр бойына жер аударылған. Өмірінің соңғы жылдарында Хон Бом До Қызылорда қаласында корей театрында вахтер болып жұмыс жасап, 1943 жылы Қызылорда қаласында дүниеден өткен. Корей халқының ұлттық батыры генерал Хон Бом Доның сүйегін тарихи отанына қайтару екі ел арасындағы берік байланыс негізінде жүзеге аспақ. Аталған маңызды шараға Корея Республикасынан арнайы делегация келеді деп күтілуде.
Жоспарға сәйкес 14 тамыз күні обыс әкімі Гүлшара Наушақызы мен корей елі өкілдері Қызылорда қаласында орналасқан Хон Бом До мемориалдық кешенінде еске алу шарасына қатысады.
Одан әрі генералдың сүйегін қазып алу жұмыстары жүргізіледі. 15 тамыз күні «Қорқыт Ата» әуежайында Қазақстан Республикасының құрметті қарауылы және әскери оркестрдің қатысуымен салтанатты түрде генерал Хон Бом Доның сүйегін шығарып салу рәсімі өткізіледі.
<blockquote>
 «Аталған жұмыстардың барлығы Қазақстан Республикасы Сыртқы істер министрлігінің келісімімен барлық халықаралық талаптарға сәйкес ұйымдастырылуда», – деді Қуаныш Әділбайұлы.
</blockquote>
Бұдан бөлек, басқармарма басшысының орынбасары ел Президентінің Корея Республикасына мемлекеттік сапары барысында Қызылорда облысында бой көтеретін бірқатар нысандар бойынша екі ел арасындағы меморандумға отыру жоспарланғандығын жеткізді.

Хон Бом Доның сүйегі тарихи отанына қайтарылады

<a href="https://kyzylorda-news.kz/">Kyzylorda-news.kz</a>. 12 тамыз – Халықаралық жастар күні аясында бүкіл ел бойынша жастарды қолдауға және оларды мемлекеттің қоғамдық өміріне тартуға бағытталған 200-ден астам онлайн-іс-шара өткізу жоспарланған.
Іс-шаралар аясында 800 мыңнан астам жастар қамтылады. Барлық облыстар мен республикалық маңызы бар қалаларда жастардың өзекті мәселелерін талқылап, шешу жолдарын ұсынатын өңір әкімдері жанындағы кеңес отырыстарын, «Қайырымды істер марафоны» жалпыұлттық жобасы аясында қайырымдылық іс-шараларын және волонтерлердің қатысуымен экологиялық акцияларды өткізу жоспарланған.
Халықаралық жастар күні іс-шараларының маңызды бөлігі ЖОО және ТжКБ ұйымдарының түлектерін, NEET санатындағы жастарды және басқада жұмысқа орналастыруға жәрдемдесу мақсатында вакансия жәрмеңкелерін ұйымдастыру болады.

Халықаралық жастар күні: 800 мың қазақстандық шараларға қатысады

<a href="https://kyzylorda-news.kz/">Kyzylorda-news.kz</a>. Токиода өткен жазғы Олимпиада ойындарының туы Париж қаласына табысталды,&nbsp;деп хабарлайды «Хабар 24».
Осылайша келесі XXXIII жазғы Олимпиада ойындары 2024 жылы Франция астанасында өтпек. Олимпиада туын табыстау рәсімі Эйфел мұнарасы маңында ұйымдастырылды. Халықаралық Олимпиада комитетінің басшысы Томас Бах туды Париж қаласының мэрі Анн Идальгоға ұстатты.
Айта кетейік, бұған дейін Францияда жазғы ойындар екі мәрте өткізілген болатын. Әлемдік дәрежедегі спорт сайысы Парижде 1900 және 1920 жылы өткен еді.

Жазғы Олимпиада ойындары 2024 жылы Парижде өтеді

*<a href="https://kyzylorda-news.kz/">Kyzylorda-news.kz</a>. Төрткүл дүниенің дүбірлі додасы – Жапониядағы жазғы Олимпиада бүгін аяқталады.*
Төртжылдықтың басты бәсекесінде Қазақстан 83-орыннан ғана көрінді. Шілденің 23-нен жалғасқан сайыста АҚШ алда келе жатыр. Ол қазір 38 алтын, 39 күміс және 33 қоламен жалпы есепте бірінші орынға шықты. 38 алтын, 31 күміс, 18 қола медалімен Қытай 2-ші орынға тұрақтады. Жарыстың қожайыны Жапония болса, 27 алтын, 12 күміс және 17 қола медальмен үздік үштікті түйіндеп тұр. Ал Қазақстандық құрамасы осы жолы айтарлықтай нәтиже көрсете алмады. Дегенмен, жерлестеріміз 8 қола жүлдені алып берді.
Абыроймен елге оралғандар қатарында дзюдошы Елдос Сметов, зіл теміршілер Игорь Сон мен Зульфия Чиншанло бар. Сондай-ақ былғары қолғап шеберлері Қамшыбек Қоңқабаев пен Сәкен Бибосынов, палуан Нұрислам Санаев және қос каратеші Дархан Исадилов пен Софья Берульцева елге қола жүлдемен оралады.
Токио Олимпиадасының жабылу салтанаты бүгін Нұр-Сұлтан уақытымен сағат 17:00-де өтеді.

Токио-2020: Олимпиада ойындары аяқталды

*<a href="https://kyzylorda-news.kz/">Kyzylorda-news.kz</a>. Бокстан ерлер арасында аса ауыр салмақта Олимпиада ойындарының жеңімпазы мен жүлдегерлеріне медальдар табысталды*.
91 келіден жоғары салмақта Қазақстан құрамасының мүшесі Қамшыбек Қоңқабаев қола жүлдеге ие болды.
Баходир Жалолов (Өзбекстан) Олимпиада чемпионы атанса, АҚШ спортшысы Ричард Торрез екінші орынды қанағат тұтты.
Дәл осы салмақ бойынша екінші қола жүлдені Ұлыбритания боксшысы Фрейзер Кларк иеленді.

Токио-2020: Қамшыбек Қоңқабаевқа қола жүлде табысталды

<a href="https://kyzylorda-news.kz/">Kyzylorda-news.kz</a>. Қазақстандықтар тегін оқи алатын елдер саны артты. Бұл туралы ҚР Білім және ғылым министрлігінің баспасөз қызметі хабарлады.
Енді қазақстандықтарға Словакия, Әзірбайжан және Вьетнам грант бөледі. Осылайша, егер 2019 жылы білім беру саласындағы келісімдер аясында мемлекеттер тізімінде 7 ел болса, қатарға тағы үш ел қосылды.
Мемлекеттердің қатарында Венгрия, Польша, ҚХР, Украина, Беларусь, Қырғызстан және Тәжікстан бар. Өткен екі жылда мыңға жуық қазақстандық осы елдердің жетекші жоғары оқу орындарында тегін білім алды. Биыл қазақстандықтарға 500-ге жуық грант бөлінді. Үкіметаралық гранттар аясында қазақстандықтар бакалавриат, магистратура, докторантура, резидентура бағдарламалары бойынша оқи алады, делінген министрлік таратқан ақпаратта.
<blockquote>
 «Біз «Болашақ» стипендиялық бағдарламасы бойынша ғана емес, үкіметаралық келісімдер шеңберінде де қазақстандықтарды тегін оқыту үшін елдерді көбейтіп жатырмыз. Қазақстанға оралғаннан кейін мамандар алған білімін өздері еңбек ететін саланы дамыту үшін қолданады деп үміттенеміз», – деді білім және ғылым вице-министрі Қуаныш Ерғалиев.
</blockquote>
2019 жылмен салыстырғанда конкурстық іріктеуге қатысуға ниет білдірушілер саны 15%-ке артқан.
Айта кетейік, үміткерлерді депутаттар, сарапшылар, инженерлік-техникалық, медициналық, гуманитарлық және жаратылыстану ғылымдарының ғалым-докторларынан тұратын тәуелсіз комиссия іріктейді.

Қазақстандықтар тегін оқи алатын елдер саны артты

<a href="https://kyzylorda-news.kz/">Kyzylorda-news.kz</a>. Қасым-Жомарт Тоқаев Орталық Азия мемлекеттері тәуелсіздігінің 30 жылдығы қарсаңында өтіп жатқан кездесудің ерекше екенін атап өтті, деп хабарлайды Ақорданың баспасөз қызметі.
<img src="https://kyzylorda-news.kz/wp-content/uploads/2021/08/2_9-scaled.jpg" alt="" />
Осы уақыт аралығында мемлекеттеріміз қалыптасып, әлеуметтік-экономикалық дамуда айтарлықтай табыстарға қол жеткізді және мәдени-рухани мұрамызды жаңғыртты.
<blockquote>
 «Тәуелсіздіктің алғашқы жылынан бастап, біз иық тіресе, бір-біріміздің табыстарымызға қуанып, қиын кезеңдерде өзара қолдау көрсетіп келеміз. Солай болуы – заңдылық. Бізді ғасырлар бойы қалыптасқан тарихымыз, рухани жақындығымыз, ортақ салт-дәстүрлеріміз байланыстырып келеді. Мемлекеттер басшылары&nbsp;Консультативтік кездесуінің форматы аймақтың ынтымақтастығына тың серпін береді. Нұр-Сұлтан мен Ташкентте өткен саммиттердің нәтижесінде байланыстарымыздың тұрақты, дәстүрлі, ең бастысы, өзіндік сипаты қалыптасты. Аймақтағы ынтымақтастықты арттырудың негізі – жоғары деңгейдегі сенімді диалог», – деді Қасым-Жомарт Тоқаев.
</blockquote>
<img src="https://kyzylorda-news.kz/wp-content/uploads/2021/08/3_8-scaled.jpg" alt="" />
Қазақстан Президенті мемлекеттер арасындағы экономикалық байланыстардың нығая түскенін атап өтті. Бірлескен кәсіпорындардың саны артып, өнеркәсіп, энергетика, машина жасау, ауыл шаруашылығы және басқа да салалардағы ірі жобалар іске асырылып келеді.
<blockquote>
 «Қазақстанның Орталық Азия мемлекеттерімен тауар айналымы соңғы бес жылдың ішінде бір жарым есе артып, 4,6 миллиард долларды құрады. Жүйелі диалог және үйлесімді іс-әрекеттер – ортақ мәселелерді шешудің тиімді әрі баламасыз тетігі», – деді Мемлекет басшысы.
</blockquote>
Президенттің айтуынша, әлем елдері күрделі кезеңді бастан өткеріп жатыр. Ауғанстандағы қазіргі жағдай ерекше алаңдатып отыр. Коронавирус індеті жағдайды одан сайын ушықтыруда. Қасым-Жомарт Тоқаев жаңа кезеңде Орталық Азияда тұрақты дамуды қамтамасыз ету үшін аймақ елдері бірлесіп әрекет етуі тиіс деп санайды.
<blockquote>
 «Елдеріміз арасындағы тауар айналымын арттыру, оның құрылымын жақсарту және жеткізілетін тауар түрлерін кеңейту бойынша жұмысты жандандыру қажет. Қазақстан Орталық Азия елдеріне экспорттық тасымалды 1 миллиард АҚШ долларына дейін ұлғайта алады. Мұндай қор аймақтың басқа да елдерінде бар екеніне сенімдімін. Орталық Азияның көлік дәліздеріне интеграцияланған тауар өткізудің бірыңғай желісін құруда күш жұмылдыруды ұсынамыз. Бұл көтерме-бөлу және агрологистикалық орталықтардан тұратын жаңа инфрақұрылым тауарларымызды Еуразия экономикалық одақтың, ТМД және үшінші мемлекеттердің нарығына шығаруға мүмкіндік береді. Маусымаралық кезеңде өз нарығымызды да ауыл шаруашылығы өнімдерімен қамтамасыз етуге жағдай жасайды», – деді Президент.
</blockquote>
Мемлекет басшысы табысты серіктестіктің үлгісі ретінде Қазақстан мен Өзбекстанның ортақ шекарасында құрылған «Орталық Азия» халықаралық сауда-экономикалық ынтымақтастық орталығын атап өтті. Қасым-Жомарт Тоқаев президенттерді аймақтық экономиканың стратегиялық маңызды салаларына инвестиция тарту үшін күш-жігерді біріктіруге шақырды.
Президент ұлттық экономикаларды инновациялық-цифрлық платформаға ауыстыру дамудың баламасыз жолы деп атап өтті. Сондай-ақ, Қазақстанда өнеркәсіпті, энергетика, көлік және әлеуметтік салаларды цифрландыру, «ақылды» қалаларды дамыту жобалары белсенді жүзеге асырылып келе жатқанын айтты.
Қасым-Жомарт Тоқаевтың пікірінше, аймақ мемлекеттері Азия мен Еуропаны байланыстырушы көпір рөлін атқарып отыр. Бұл ретте, Қазақстан Транскаспий халықаралық көлік дәлізінің транзиттік әлеуетін біртіндеп дамытуда. Одан бөлек, «Қытай – Еуропа – Қытай» трансқұрлықтық бағдарының қазақстандық бөлігінің әлеуеті нығайып келеді.
<blockquote>
 «2025 жылға дейін екінші жолдардың құрылысы аяқталып, «Достық – Мойынты» теміржол учаскесі толықтай электрмен жабдықталады. Нәтижесінде аталған бағыттың өткізу мүмкіндігі бес есе ұлғаяды. Жобаға 2 миллиард АҚШ долларынан астам қаржы салынады. «Қазақстан – Түрікменстан – Иран» теміржолы да үлкен мүмкіндіктер береді. Елдеріміз үшін Парсы шығанағы мемлекеттеріне&nbsp;шығудың қысқа жолы осы. Жыл сайын аймақтағы жүк тасымалы артып келе жатқандықтан Трансазиялық теміржол магистралінің оңтүстік дәлізін дамыту қажеттігі туындап отыр. Мысалы, «Дарбаза – Мақтаарал» теміржол желісін іске қосу жүк тасымалы мерзімін 1,5 есе қысқартады. Оңтүстік Азия нарықтарына жол ашатын «Мазари – Шариф – Кабул – Пешавар» теміржолы құрылысы&nbsp;жобасының келешегі бар деп есептейміз. Қазақстан және Түрікменстан айлақтары қуатының әлеуеті зор», – деп атап өтті Мемлекет басшысы.
</blockquote>
Соңғы үш жылдың ішінде Транскаспий бағыты арқылы өтетін контейнерлердің легі 13 есеге артты. Қазақстан Ақтау айлағының базасында әлемнің озық операторларын тарта отырып, «контейнерлік хабты» ашуды жоспарлап отыр (Cosco, Maersk, CMA CGM және т.б.). Еліміз аймақ ішінде көлік коммуникацияларын дамыту мақсатында өзара тиімді ынтымақтастық жасасуға әзір.
<blockquote>
 «Өзбекстанмен арадағы жаңа жобалар белсенді түрде пысықталып жатыр. Ең алдымен, «Түркістан – Шымкент – Ташкент» жоғары жылдамдықтағы теміржол құрылысы туралы айтып отырмыз (жоба құны шамамен 70 миллион АҚШ доллары). Бұдан бұрын «Бейнеу – Ақжігіт» автожолының құрылысы аяқталған болатын. Аталған бағыт арқылы өзбек серіктестерімізге Құрық және Ақтау айлақтарына шығатын қысқа жол ашылды. «Түрікменбашы – Гарабоғаз – Қазақстанның шекарасы» автомагистралінің әлеуеті зор. Осы бағдар Түрікменстанмен арадағы жолаушы және жүк тасымалын арттыруға мүмкіндік береді. Жалпы, Дүниежүзілік банктің бағалауынша, Орталық Азиядағы көлік коммуникацияларын дамыту барлық елдердің ішкі жалпы өнімін 15 пайызға арттыруға жағдай жасайды. Бұл – ауқымды қор. Осы ретте, күш-жігерімізді біріктіре отырып, аймақтың көлік байланысын арттырып, дәліз жағдайын жақсартуымыз қажет», – деді Қазақстан Президенті.
</blockquote>
Мемлекет басшысы су ресурстарымен қамтамасыз ету мен аймақтың био және экожүйесін сақтауды Орталық Азиядағы негізгі мәселенің бірі ретінде атап өтті.
<blockquote>
 «Біз қазірдің өзінде климаттың жаһандық жылынуы салдарын судың азаюы мен құрғақшылық арқылы көріп отырмыз. Бұл, әсіресе, Сырдария бассейнінде ерекше сезіліп отыр. Кейінгі екі жылдағы вегетациялық кезеңде Шардара су қоймасына жиналатын су көлемі 40 пайызға, Кіші Арал теңізіне келетін су мөлшері 60 пайызға азайып кетті. Трансшекаралық өзендер ресурстарын тиімді басқару мен алдыңғы қатардағы технологиялық шешімдерді енгізу үшін бірлескен&nbsp;су саясатын енгізу маңызды. Біздің өзара іс-қимылымыз тараптардың мүддесін ескерген және өзара міндеттерді толықтай орындайтын, тең дәрежеде қолдану принципі негізінде жүзеге асуы тиіс. Су – Орталық Азия елдерінің арасын ашудың басы емес, керісінше, біріктіретін ресурс болуы керек», – деді Қасым-Жомарт Тоқаев. &nbsp;
</blockquote>
Баяндамада коронавирус пандемиясы&nbsp;сынағы кезінде халықтарымыздың бірлігі мен бір-біріне деген көмегі туралы айтылды.
<blockquote>
 «Қазақстан достық пен ынтымақтастық аясында бауырлас мемлекеттер мен халықтарға барынша көмек көрсетті және жәрдемдесе де береді. Ғылыми-зерттеу саласында жинақталған тәжірибемізбен бөлісуге де әзірміз. Түрікменстан Президентінің вирусология және эпидемиология орталығын құру туралы ұсынысын қолдаймыз. Шын мәнінде,&nbsp;осы салада ғылыми ынтымақтастықты күшейту маңызды. Жақында қазақ вакцинасы Қырғызстанға жіберілді. Ресейлік «Спутник-V» вакцинасын өндіру де жолға қойылды», – деді Мемлекет басшысы.
</blockquote>
Қасым-Жомарт Тоқаев терроризм, діни экстремизм, есірткі тасымалы, трансұлттық қылмыс сияқты сынақтардың сақталып отырғанына тоқталды.
<blockquote>
 «Бірлігімізді бекемдеп, бір-бірімізбен болмашы бәсекелестікке жол бермеуіміз қажет. Бұл мәселеде ХХІ ғ. Орталық Азияны дамыту мақсатындағы достық, тату көрші, ынтымақтастық жөніндегі Келісімге тез арада қол қоюдың маңызы артып келеді. Тараптардың жуық арада осынау тарихи келісімге қол қоюға дайын болуын құптаймыз. Халықаралық аса маңызды мәселелерде барынша ортақ ұстаным білдірсек, әлемдік қауымдастыққа келісім тапқан ортақ тәсілімізді көрсетер едік. Халықаралық алаңдардағы бәсекелестік ұлттық мүдделерімізге қайшы келеді», – деп атап өтті Қазақстан Президенті. &nbsp;
</blockquote>
Алдағы уақытта бауырлас халықтарды жақындата түсуде мәдени-гуманитарлық өзара іс-қимылдар маңызды рөл атқарады. Мемлекет басшысы туыстық байланысты сақтап, күшейту және мәдени-гуманитарлық күн тәртібін жаңа мазмұнмен толықтыру жөніндегі пікірін айтты. Сондай-ақ Қазақстан білім саласындағы өзара іс-қимылды кеңейтуді қолдайды.&nbsp;&nbsp;
<blockquote>
 «Көңіл бөлуді қажет ететін тағы бір сала – елдеріміздің жастары арасындағы байланысты дамыту. Тереңде жатқан тарихи қарым-қатынасымызды сақтап қалуда жастарымыз маңызды рөл атқарады. Студенттер алмасуды кеңейтуді, олардың жақсы білім алуға ұмтылысын жан-жақты қолдауды, Орталық Азия азаматтарының Қазақстандағы алдыңғы қатарлы жоғары оқу орындарында білім алуына квота көбейтуді маңызды деп есептейміз», – деді Қасым-Жомарт Тоқаев.
</blockquote>
Барлық ұсыныстар аймақтағы мемлекеттер мен халықтардың мүддесі жолында жан-жақты әрі өзара тиімді ынтымақтастықты тереңдете түсуге деген шынайы ниеттен туындағаны айтылды.
<blockquote>
 «Біздің басты мақсатымыз Орталық Азияны тұрақты, экономикалық жағынан дамыған, өркендеген өңірге айналдыру. Достық, тату көрші әрі өзара сенім негізінде барша қиындықтарды еңсеріп, алға қойған игі мақсатымызға қол жеткізе алатынымызға сенемін», – деп сөзін қорытындылады Мемлекет басшысы.
</blockquote>
Консультативтік кеңесте, сондай-ақ, Түрікменстан Президенті Гурбангулы Бердімұхамедов, Қырғыз Республикасының Президенті Садыр Жапаров, Тәжікстан Президенті Эмомали Рахмон, Өзбекстан Президенті Шавкат Мирзиёев, БҰҰ Бас хатшысының Орталық Азиядағы арнайы өкілі Наталья Герман сөз сөйледі.
Кездесу қорытындысы бойынша Бірлескен мәлімдеме қабылданды.

Қасым-Жомарт Тоқаев Орталық Азия елдері басшыларының Консультативтік кездесуіне қатысты

<a href="https://kyzylorda-news.kz/">Kyzylorda-news.kz</a>. Еркін күрестен Қазақстан құрамасының мүшесі Дәулет Ниязбеков Олимпиада ойындарының ширек финалында жеңілді, деп хабарлайды&nbsp;<a href="https://olympic.kz/kk/article/22181">Olympic.kz</a>.
67 келіге дейінгі салмақ дәрежесінде Токио бозкілеміне шыққан Дәулет Ниязбеков жарыстың екінші айналымында қарсыласына жол берді.
Ол үш дүркін әлем чемпионы және Рио Олимпиадасының қола жүлдегері әзірбайжандық Нажи Алиевпен кездесті.
Кездесу 9:1 есебімен аяқталып, Әзербайжан өкілі жартылай финалға шықты.
Айта кетерлігі, Нажи Алиев финалға шыққан жағдайда жұбаныш белдесуінде күресуге мүмкіндік алады.

Олимпиада: Дәулет Ниязбеков жартылай финалға шыға алмады

<a href="https://kyzylorda-news.kz/">Kyzylorda-news.kz</a>. Еркін күрестен қазақстандық балуан Дәулет Ниязбеков Олимпиада ойындарын сәтті бастады, деп хабарлайды&nbsp;<a href="https://olympic.kz/kk/article/22176">Olympic.kz</a>.
Қазақстандық балуан 1/8 финалында кубалық әлем чемпионатының екі дүркін қола жүлдегері кубалық Алехандро Вальдеспен кездесті. Екеуара кездесу 21:11 есебімен қазақстандық балуанның еншісіне шешілді.
Белдесудің басым бөлігін кубалық балуан 9:2 есебімен жеңіп тұрғанда Дәулет Ниязбеков үздіксіз нәтижелі әдіс жасап белдесу аяқталғанша 21 ұпай еншіледі. Ережеге сәйкес, ұпай айырмашылығы 10 ұпай болғандықтан Дәулет Ниязбековке уақытынан бұрын техникалық жеңіс берілді.

Қазақстан және Қызылорда облысының жаңалықтары: Әлем