Kyzylorda-news.kz Қорқыт ата атындағы Қызылорда университетінде жаңа 50 орындық асхана мен өңір жастарына арналған BIC (business incubation center) коворкингінің салтанатты ашылуы өтті.
Жаңа нысанның тұсаукесер рәсіміне Басқарма төрағасы-Ректор Бейбіткүл Каримова, университеттің ардагерлер кеңесінің төрағасы Бақыт Қалиев пен университеттің ардагері, техника ғылымдарының докторы, профессор Серікбай Қошқаров және университет ұжымы қатысты.
Жаңа асхана бір уақытта 50 адамды қабылдауға арналған. Білім алушылар мен оқу орны қызметкерлерінің денсаулығы және жайлылығы үшін заманауи талаптарға сай жабдықталған. Асханада ыдыс жуатын, тоңазытқыш орналасқан, қызметкерлерге арналған арнайы бөлмелер мен қосымша аймақтар жоғары санитарлық талаптарға сәйкес орналасқан. Жаңа асханада тек дәмді әрі пайдалы тағамдармен ғана емес, жайлы әрі тыныш атмосферада сабақ оқуға да мүмкіндік бар.
BIC коворкингі 500 шаршы метр аумақты қамтиды. Орталық технологиялық кәсіпкерлік, IT, инновациялар және жасанды интеллект бағытында білім мен дағдыларды дамытуға зор мүмкіндік ұсынады. Онда 35 аса қуатты компьютер, LED панель, интерактивті панель, 500 Мб/сек жылдамдықтағы жоғары сапалы интернет сынды жоғары технологиялық құралдармен жабдықталған. Коворкинг орталығында конференц-зал, ашық жұмыс кеңістігі (open space), GameDev center, Digital creativity, Hardware және CyberSport, ас бөлмесі орналасқан.
“Соңғы замануи үлгідегі коворкинг өңір жастарының кәсіби және шығармашылық әлеуетін арттыруға бағытталған. Қызығушылық танытқан кез келген жас тегін білім беру курстарына, шеберлік сыныптарына қатысып, тәжірибелі мамандардан кеңес ала алады. Сонымен қатар, инкубациялық бағдарламалар мен стартап жобаларды дамытуға мүмкіндік алады”,-деді «KyzylordaHub» бизнес инкубаторының жетекшісі Жанарыс Түбекбаев.
Коворкингтің басты мақсаты – жастарды технологиялық кәсіпкерлікке баулу, заманауи құралдарды тиімді пайдалануға үйрету және олардың идеяларын жүзеге асыруға көмектесу.
Айта кетейік, асхана мен коворкинг орталық бас оқу ғимаратының жанынан салынған жаңа нысанда орналасқан. Қазіргі таңда университетте заманауи инфрақұрылымды дамытуға арналған жобалар қарқынды жүзеге асырылуда. Бұл өз кезегінде оқу орнының сапасын арттыруға, білім алушылар мен қызметкерлерге ыңғайлы жағдай жасауға арналған.
