Kyzylorda-news.kz Қорқыт ата атындағы Қызылорда университеті мен Мәскеу авиациялық институты арасында әріптестік байланыстарды дамыту бағытында жүйелі жұмыс жүргізіп келеді.
Екі оқу орны арасындағы мәдени байланысты мен білім алушылар арасында достық қарым-қатынасты нығайту мақсатында баскетболдан ұлдар арасында жарыс ұйымдастырылды.
Жарыс барысында екі команда тартысты ойын өрнегін көрсетіп, нәтижесінде Қорқыт ата атындағы Қызылорда университетінің студенттері жеңіске жетті.
Университеттің Ғылыми жұмыстар және халықаралық байланыстар жөніндегі проректоры Майнура Бурибаева оқу орнының соңғы жетістіктері мен жаңалықтарына тоқталды. Кездесуде оқу орындары басшылығы академиялық ұтқырлық, ғылым және әлеуметтік даму бағыттары бойынша, сондай-ақ болашақтағы ынтымақтастық перспективалары жөнінде кеңінен пікір алмасты.
Мәскеу авиациялық институтының өкілдеріне университеттің археологиялық музейі, Ботаникалық бақ және жылыжай шаруашылығы, «Cейхун» спорттық-сауықтыру кешені мен заманауи «Open space» кітапханасы, Жасанды интеллект институтының жұмысы таныстырылды. Бұл сапар алдағы уақытта екі жақты қарым-қатынастардың жаңа деңгейге көтерілуіне мүмкіндік бермек.
