Kyzylorda-news.kz Атырау облысы Құрманғазы ауданындағы білім ордасының директоры мектеп автобусын заңсыз пайдаланғаны үшін жұмыстан босатылды. Бұл туралы Stan.kz ақпарат агенттігі хабарлайды.
16 ақпанда әлеуметтік желіде көпшіліктің наразылығын тудырған видео пайда болды. Кадрлардан Бөкейхан ауылындағы Фариза Оңғарсынова атындағы орта мектеп мұғалімдерінің мектеп автобусын басқа мақсатта пайдаланғанын көруге болады.
Белгілі болғандай, ұстаздар жол ақысын төлеп, марқұмның үйіне бармақ болған. Дегенмен, тек мектеп оқушыларын тасымалдауға арналған көлікті пайдалану фактісі жұртшылықты ашуландырды.
Аудандық білім басқармасының мәліметінше, мектеп директоры қызметінен босатылды.
“10 ақпан күні аудандағы барлық мектептерге жұмыстан тыс уақытта мектеп автобустарын пайдаланбауды талап етіп хат жолдадық. Осыған қарамастан Фариза Оңғарсынова атындағы мектеп заңсыз әрекетке жол берген. Қызметтік тексеріс нәтижесінде мектеп директоры Шынар Исатаева қызметінен босатылды. Қазіргі уақытта ол өзіне бөлінген сағат көлемінде физика пәнінен сабақ беріп жүр”, – деді аудандық білім бөлімінің басшысы Еділ Баяров.
Фото: pixabay