Kyzylorda-news.kz. Президенттікке үміткер Салтанат Тұрсынбекова бұған дейін Ақмола және Қарағанды облыстарында болды. Сонымен қатар, басқа өңірлерде де жұмысты жергілікті штабтар қатар жүргізіп жатыр.
Көшелерге плакаттар ілініп, азаматтарға үнпарақтар таратылып, жергілікті халықпен, ұжымдармен кездесулер белсенді түрде өткізілуде.
Мәселен, Атырау облысында жол жиегіне үлкен билбордтар орнатылып қойған, штаб күнделікті жұмыс істеп жатыр. Жамбыл облысында жергілікті штаб басшысы колледжде оқытушылар және студенттермен кездесулер өткізді. Маңғыстау облысында сүт зауытының жұмысшыларымен, Мұнайлы ауданындағы аурухана дәрігерлерімен, құрылыс компаниясының қызметкерлерімен кездесулер жоспарланған.
Басқа өңірлерде де кездесулер ұйымдастыру, үгіт материалдарын тарату жұмыстары жалғасуда.
Еске салайық, 26 қазанда үміткер сайлау науқаны аясында аймақтарды аралай бастады. Ол Қарағанды облысына бірінші болып барып, құқық қорғаушылармен, заңгерлермен, магистранттармен, сарапшылармен, құқық қорғау және сот жүйесін реформалауға, мүмкіндігі шектеулі жандардың құқықтарын қорғауға атсалысқан түрлі үкіметтік емес ұйымдардың өкілдерімен, сотталғандармен кездесті. Халықтың әртүрлі әлеуметтік осал топтарының өкілдерімен дидарласып, олардың мүдделеріне қажет шараларды талқылады. Кейінірек ол тұрмыстық зорлық-зомбылық құрбандарына көмектесетін дағдарыс орталығында әйелдермен сұхбаттасуға барды.
27 қазан күні құқық қорғаушы Ақмола облысына барып, дәрігерлермен дағдарыс орталығында кездесу өткізіп, саладағы өзекті мәселелрді көтерді.
31 қазанда ол Шымкентке барып, тігін фабрикасының және қалалық адвокаттар алқасының қызметкерлерімен кездеседі.
