Сайлауға 6 саяси партия тіркелді – Kyzylorda News
Басты бет

Бізге жаңалық жіберіңіз: +7(702)702-76-00

Сайлауға 6 саяси партия тіркелді

30.10.2020, 16:20

174 0

Kyzylorda-news.kz. Аймақта ағымдағы жылдың 31 қазанына дейін сайлау округтері, олардың шекаралары, комиссия құрамы мен орналасқан жерлері белгіленетін болады. Бұл туралы Өңірлік коммуникациялар қызметінің ақпарат алаңында өткен брифингте облыстық сайлау комиссиясының төрағасы Ғалым Баймырзаев мәлімдеді.

«Бүгінде 6 саяси партия тіркелді. Сайлау кезінде саяси партиялар өз кандидаттарын партиялық тізіммен ұсынады. Жергілікті атқарушы органдардың лауазымды адамдары тиісті сайлау комиссиясы ұсынған сайлаушылар тізімдерін, олар туралы деректердің анықтығы үшін жауапты болады. Үгіт науқанында кандидаттардың сайлаушылармен онлайн-режимдегі кездесулерімен қатар, тиісті санитарлық-гигиеналық талаптарды сақтай отырып жүзбе-жүз кездесулері де ұйымдастырылады», – деді Ғалым Қонақбайұлы.

«Учаскелік сайлау комиссиялары 26 желтоқсаннан кешіктірмей сайлаушылар тізімдерін танысу үшін сайлаушыларға ұсынады. Дауыс беруге арналған сайлау бюллетеньдері учаскелік сайлау комиссияларына 2021 жылғы 7 қаңтардан ерте емес және 9 қаңтардан кешіктірмей жеткізіледі. Сайлау 10 қаңтарда жергілікті уақытпен сағат 7.00 ден – 20.00 дейін жүреді, – деді облыстық сайлау комиссиясының хатшысы Аягөз Сырлыбаева.

Парламент Мәжілісіне кандидаттарды ұсыну кезеңі 10 қарашада басталып, 30 қараша күні жергілікті уақытпен сағат 18.00-де аяқталады. Ал, мәслихат депутаттығына кандидаттарды ұсыну 10 қарашадан басталып, 4 желтоқсанда жергілікті уақытпен сағат 18.00-де бітеді.

«Партиялық тізімдер бойынша сайланатын Парламент Мәжілісінің депутаттарын сайлау өткізілген күннен бастап жеті күндік мерзімнен кешіктірмей, яғни 2021 жылғы 17 қаңтарда Орталық сайлау комиссиясы анықтайды. Мәслихат депутаттарын сайлау қорытындыларын өткізілген күннен бастап бес күннен кешіктірмей, яғни 2021 жылғы 15 қаңтарда тиісті аумақтық комиссиялары жариялайтын болады», – деді облыстық сайлау комиссиясы төрағасының орынбасары Қожамжар Наурызбаев.

0

Пікір қалдыру