Kyzylorda-news.kz. Қызылорда облысы бойынша ҚАЖ департаментіне қарасты ЗК-169/5 мекемесінің қызметкерлері қан тапсырды.
Бұл полиция қызметкерлері үшін дәстүрлі шара. Олар жылына 2 мәрте облыстық қан орталығына келуді дағдыға айналдырған. Донор болу арқылы қанға зәру науқастарға көмек беруді ұйғарған.
Отызға жуық түзеу мекемесі қызметкерлері өз еріктерімен қан тапсырмас бұрын, қан беріп, донор болуға жарамды немесе жарамсыз екендерін тексертті. Қан қысымы өлшеніп, түрлі ауру белгілерінің бар-жоғы зертханалық жолмен анықталды. Содан кейін ғана донор болу мүмкіндігі беріледі. Олардың әрқайсысы 450 граммнан қан тапсырды.
«Өзімді жақсы сезінемін, көңіл-күй де жақсы. Донор болу ол сауапты істердің бірі. Көпшілігімізге белгілі бүгінде ауруханаларда өмірі бір тамшы қанға тәуелді қаншама науқастар бар. Жол-көлік апаттарының салдарынан жоғалтылған қанды қайта қалпына келтіру де оңай емес. Осындай сәттерде біздің де бірауыздан ерікті түрде қан бергеніміз бір жағынан азаматтық борышымыз болса, бір тараптан мұқтаж жандарға деген көмегіміз», -деді ЗК-169/5 мекемесі бастығының орынбасары әділет майоры Ж.Ауешов.
Түзеу мекемесі қызметкерлері қан қорын толтырып, науқастарға көмек қолын созу үшін әрқашан дайын екендіктерін жеткізді.
