Қазалыда ауыл тұрғындары үшін көшпелі сауда ұйымдастырылуда – Kyzylorda News
Басты бет

Қазалыда ауыл тұрғындары үшін көшпелі сауда ұйымдастырылуда

20.04.2020, 18:00

775 0

Kyzylorda-news.kz. Қазалы ауданында жұқпалы індеттің таралмауы үшін қауіпсіздік шаралары күшейтілгені барлығымызға белгілі. Осыған орай ауданда қоғамдық көліктермен қатар жеке автомобильдердің де жүруіне тыйым салынды.

Аудан мен ауылдарға кіреберіс жерлерге тосқауыл бекеттері қойылды.

Блок-бекеттер тұрғындардың жүріп-тұруы үшін қолайсыздық тудырғанымен, күнделікті қажеттіліктері үшін тосқауыл болмауы керек. Осыны ескерген Қазалы ауданы әкімдігі көшпелі сауда орындарын ұйымдастырып, тұрғындарға базар бағасымен азық-түлік сатуды қолға алды.

Бүгін көшпелі сауда аудан орталығынан шалғайда жатқан Кәукей ауылына бағыт алды. Аудан кәсіпкерлері ауыл тұрғындарына бірінші кезекте қажетті картоп, жуа, сәбіз, макарон, ұн, өсімдік майы, қант, күрішпен қатар, жеміс-жидектерді де ала барған.

Қазалы ауданы әкімінің баспасөз қызметі дәл осындай көшпелі сауданы басқа ауылдарда да ұйымдастыру көзделіп отырғанын айтты.