Kyzylorda-news.kz. Көктемнің алғашқы күні Елордадан бастау алған Роза Бағланованың 100 жылдық мерейтойы Сыр өңірінде жалғасын тапты.
Нартай Бекежанов атындағы Қызылорда облыстық қазақ академиялық музыкалық драма театрында Қазақстанның Халық әртісі, Халық қаһарманы Роза Бағланованың 100 жылдық мерейтойына арналған «ҚАЗАҚТЫҢ ҚАҺАРМАН ҚЫЗЫ» атты мерекелік концерт өтті.
Бұл мерекелік концерт облыс әкімі Нұрлыбек Нәлібаевтың концертті өткізуге келген еліміздің танымал өнер жұлдыздарымен кездесуімен басталды.
Аймақ басшысы Халық қаһарманы, қазақтың бұлбұлы атанған Роза Бағланованың ізін жалғап, әндерін насихаттауда өнер иелерінің айрықша орны бар екенін жеткізіп, ілтипатын көрсетті.
<blockquote>
 «Айтулы концертке қазақтың ән өнерін асқақтатып, ұлт мәдениетін көтеруге еңбек сіңіріп жүрген Өздеріңіздің қатысып, өнер көрсетулеріңіз Сыр жұртшылығы үшін үлкен мақтаныш деп білемін. Бүгін Сыр елінде ән мен өнер мерекесі ғана емес, ұлт руханиятының жаңғырған күні десе болады. Өнер көшіндегі Сіздер тұрғанда ән падишасы, қазақтың қаһарман қызы Роза Бағланованың есімі ұрпақтан-ұрпаққа жалғаса беретіні сөзсіз» – деді Нұрлыбек Нәлібаев.
</blockquote>
Концертте Қазақстанның халық әртісі Нұрғали Нүсіпжанов, Сұлушаш Нұрмағанбетова, Алтынбек Қоразбаев, Гүлнәр Сиқымбаева, Жеңіс Сейдуллаұлы, Жеңіс Ысқақова, Игорь Благодарный, Айгуль Иманбаева, Асхат Үрпеков, Шаба, Нұрлан Албан, Бауыржан Исаев, Зарина Жакенова сынды әртістер мен Құрманғазы атындағы Қазақ ұлттық оркестрі өнер көрсетті. Өнер майталмандары Нұрғали Нүсіпжанов, Алтынбек Қоразбаев пен Сұлушаш Нұрмағанбетова Роза Бағланованың өнер әлеміндегі қолтаңбасын сөз етіп, Сыр жұртының өнер иелеріне деген құрметі үшін алғысын жеткізді.
Мұнан соң, өңір басшысы ұлт өнерінің майталмандарына Сыр халқы атынан сый-сияпат жасап, құрметін көрсетті.
Айта кетейік, қазақ өнерінің біртуар әншісіне арналған бұл керемет ән кеші Мәдениет және спорт министрлігінің ұйымдастыруымен өтті.
Сыр өңірі – халық деген әр талантын төбесіне көтере алатын, ұлтым деген ұл-қыздарын ұлықтай алатын өрісті өңір. Сыр топырағынан түлеп ұшқан өнер иесі, ән падишасы Роза Тәжібайқызының әндерін сағынған көрермендер өнер жұлдыздары мен концертті ұйымдастырушыларға деген құрмет қошеметін аямады. Ән кеші өте жоғары деңгейде өтті.
<img src="https://kyzylorda-news.kz/wp-content/uploads/2022/04/img-20220424-wa0010.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0013.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0004.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0009.jpg" alt="" />
<img src="https://kyzylorda-news.kz/wp-content/uploads/2022/04/img-20220424-wa0008.jpg" alt="" />

Қызылордада Роза Бағланованың 100 жылдығына арналған концерт өтті

<a href="https://kyzylorda-news.kz/">Kyzylorda-news.kz.</a> Грауденцте соғыс қызып жатқанда «Генерал Рахымовтың дивизиясына концерт қоюға әртiстер келе жатыр» деген хабар тарайды. Туған жерден жырақта от пен оқтың ортасында жүрген жауынгерлердiң қуанышында шек жоқ еді. Бұл кезде совет әскерлерi Польша жерiн жаудан азат етiп жатқан. Жергiлiктi халық жауынгерлердi қуана қарсы алады.
16 күннiң iшiнде 215 шақырымға созылған Польшаның 124 елдiмекенi гитлершiл басқыншылардан тазартылды. Әрбiр адым жер үшiн жантүршiктiрерлiк шайқас болып, совет әскері 1945 жылдың 25 ақпанында Грауденц қаласын қоршауға алады. Оған 37-шi гвардиялық атқыштар дивизиясы мен 2-шi күштi армия бiрiге отырып қол жеткiзген едi.
37-шi гвардиялық атқыштар дивизиясының командирi даңқты қолбасшы, генерал-майор Сабыр Рахымов болатын. Ол концерт қоюға әншi жерлестерiнiң келгенiне қатты қуанады. Елден келген өнер иелерiнiң iшiнде бұлбұл көмей әншi Роза Бағланова да бар еді.
Роза апамыз осы оқиғаны өмір бойы ұмытқан емес, әңгіменің орайы келгенде үнемі мақтанышпен айтып, марқайып отыратын.
<blockquote>
 «Араларыңда менiң қарындасым бар екен ғой, қазақтың қызы – Роза Бағланова деген қайсың?» – деп ол кiсi бiздiң арамызға өзi iздеп келдi. Сұңғақ бойлы, шашы қап-қара, қырықтардан асқан кiсi екен. Әңгiме арасында ол өзiнiң туыстары жайында сөз қозғады, кiшкентайдан жетiм қалғанын айтты. Кiм бағып, кiм адам еткенiн, тегiнiң неге Рахымов болғанын, бәрiн-бәрiн айтып бердi», – дедi бірде Қазақстанның Халық қаһарманы, Қазақстан Халық әртiсi, әншi Роза Бағланова әңгiме арасында.
</blockquote>
Майдан даласында жүрген жауын­гер­лердi рухтандырып, көңiлдерiн көтеруге келген өнерпаздарға генерал Рахымов жерлесi Тоғанбайды таныстырады. Қазақстанның мақтанышы, Кеңестер Ода­ғының Батыры, Днепр шайқасының қаһар­маны Тоғанбай Қауынбаевтың май­дан даласында аты аңызға айналып тұрған кез едi. «Отан үшiн» атты май­дан­дық газетте жауынгер-ақын Сағынғали Сейiтовтiң «Тоғанбай» деген өлеңi жарияланған болатын. Елден келген әншiлер шаршағанына қарамай, күнiне үш реттен концерт бердi. Тiптi жау жағының мазалап, оқта-текте оқ жаудырып қоятынына да қараған жоқ.
Біз – жауынгер халықтың ұрпағымыз. Бұл жәй ғана айтыла салған сөз емес, тарихтың ұзақсонар көшінде талай рет айғақталған нәрсе. Өжеттік пен батылдық біздің қанымызда бар. Қай ғасырды, қайсыбір елеулі оқиғаны алсаңыз да, бар ғұмырын аттың жалы, түйенің қомында өткізген ата-бабаларымыздың ерлік пен батырлық дастаны менмұндалап тұрады. Өзге жұртқа қарағанда, бір ерекшелігі – біздің халқымыздың ұлдарымен бірге, қыздары да барлық уақытта өжеттік пен ерліктің символына айнала білген.
Осы «Ұлы Отан соғысы» деген атпен тарихта қалған төрт жылдық қырғында Шығыстың шынарлары Әлия мен Мән­шүк, Хиуаз бастаған қыздарымыз қаһарман халықтың қаны сақталғанын барша әлемге тағы бір әйгілеп берді.
Жаратылысы бөлек, табиғаты батыр­лық пен батылдықтың тұнығынан тарал­ған өр қыздарымыз өз алдына, жаны нәзік, ішкі әлемін сезім иірімдерінің тербетілген әлсіз ғана майдақоңыр талшықтары билеткен өнер иелері де күн туғанда қасқайып, қыр басындағы қан майданның ара­сында жүрді. Сондай оқиғаның бірі атақты әншіміз Роза Бағла­нова­ның басынан өткенін бүгінде ел де жақсы білсе керек.
Жан алысып, жан беріскен ұлы шай­қас қара жердің қара топырағын қанға бояп, қыраттың басы қызарып, ойпаттың іші ойран боп жатқанда, зұлымдықтың найзасына айқара төсін қаймықпай тосып, бұғауға түскен бейқам елдерді фашизмнің құрсауынан босату үшін өлімге бас тіккен кеңестік жауынгерлерге күш беру мақсатында ел-елден өнер адамдары барып, концерт қойып жүрген кездер болатын. Оған да екінің бірінің жүрегі дауалай бермейді, бұған да батырлық пен батылдық қажет.
Алғашында, енді келіп көлік­тен түсерде, генерал «Менің қарын­дасым екенсің ғой!» – деп көтеріп алғанда, өзінің туған қарындасына жолыққандай қатты қуанады. Сонда екі иығына екі кісі мінгендей, ұзын бой­лы, қарулы кісінің қолындағы кіп-кішкентай әнші қыздың балаша мәз болғанын қайтерсіз. Қазақ қайда жүрсе де бауырмалдығын ұмытпаған халық қой, Еуропаның төсіндегі қан майдан даласында кездесіп, бірін-бірі ағалы-қарындас тұтқан екеуіне өзге жұрт қызыға қараған еді. 
Әншiлердi генерал Сабыр Рахымов­тың дивизиясына арнайы апарып концерт ұйымдастыратын жөнi бар едi. Ержүрек қолбасшының сарбаздары мұндай құрметке лайық болатын. Мұ­ның алдында Солтүстiк Кавказды бас­қын­шылардан азат етудегi генерал Рахымовтың ерлiгi мен әскери шеберлiгi Сталиннiң өзiн таң қалдырған.
Сұрапыл соғыс жүрiп жатқанда да қолы­нан iс келетiн бiлiктi басшыны таң­дап-талғап отырған. Әскери iстер­дегi генералдың шеберлiгi маршал Рокоссовскийдi де мойындатты. Ол 1-Белару­сь майданының жаңа қолбас­шысы Жуковтан генерал Рахымовты майдандағы жағдайдың тым ауырлығына байланысты 2-Беларусь майданына жiберуiн өтiнген. Рахымовтың 37-гвардиялық атқыштар дивизиясына келу себебi осы болатын.
Оңтүстiк Қазақстан облысындағы Қазығұрт тауының баурайында туып-өскен Сабыр Рахымов өзбек елiн­де тәрбие алған. Сөйтiп төскей­де малы, төсекте басы қо­сыл­ған екi елдiң төл бала­сына айналды. Оның кезiнде «өзбектен шық­қан тұңғыш генерал» атан­ғаны да сондықтан едi. Алайда, ол өзiнiң сүйген жары, майдандас серiгi Құралай Натуллаеваға «Менiң арманым – қазақ болып өлу» деп талай айтыпты.
<blockquote>
 «Мен – Сабырмен соғыста бiрге болған адаммын. Сабырдың қайтадан қалай қазақ болғаны ұзақ әңгiме. Бұл мәселемен айналысып, ары-берi шап­қыла­­ғаныма елу жыл болды. Бармаған жерiм жоқ, ақырында жоғары әскери училищенiң мұрағат бөлiмiнен «Сабыр Омарұлы» деген құжатын алып барып жағдайды түзедiм. Соның өзiнде 1996 жылы халықаралық сотқа берiп барып, соның арқасында ғана оның қазақ болғандығын дәлелдей алдым», – дегені бар бізбен әңгімесінде генералдың сүйген жары, соғыс ардагерi Құралай Натуллаева.
</blockquote>
Генерал Рахымов елiнен келген әр­тiстерге үлкен сый-құрмет көрсетiп, арнайы дастархан жасап, маңайындағы жоғары шендi офицерлердi түгел жинап, келген қонақтармен ашық-жарқын әңгiме құрады. Елге деген сағыныш сезi­мi жеңiп, бiр сәт Роза қарындасымен қазақша сөйлеседі. 
Соғыс уағында ең қажет нәрсе – қауiп­сiздiк пен сақтық шаралары. Сабыр Рахымов жауынгерлердi қанаттандырып, соңында өздерiн күткен ел бар екенiн тағы бiр естерiне салып, дем беруге кел­ген қонақтарының жай-күйiне қатты алаңдаған. Алайда майдан даласында талай мәрте қан көрiп құтырынған қанқұйлы фашистер қонақжайлылық таныта қоймапты.
– Бiздi концерт қоюға жауынгерлер орналасқан үйлерге, госпитальдерге алып барады. Кейде «Бұл жер өте қауiптi» деп басқа жерге қарай тасиды. Сөйтiп жүрiп, концерт ұйымдастырып жүрдiк. Бiрде, аз ғана уақытқа дамыл тауып, демалып жатқан кезiмiз едi, «Сақтаныңдар! Жау ұшағы!» деп айғайлаған дауыстар шық­ты да, бәрiмiз сыртқа қарай жүгiрдiк. Артынша, сол жатқан үйiмiздiң төбесiн бомба жапырып тастады. Бақытымыз бар екен, дер уағында шығып үлгердiк.
Қан майданның тап ортасына барса да қанатын өрт шалмаған қазақтың бұлбұл қызы, қаһарман қызы, әншi Роза Бағланованың майдан даласы жайын­да айтар әңгiмелерi аз емес еді. Гене­рал Сабыр Рахымов туралы да көп де­рек бiледi екен. Кезiнде 15 одақтас респу­блика халқының Отаны бiреу ғана болатын. Ондағы барлық жұрт бiр елдiң ғана азаматы едi. Генерал Сабыр Рахымов ресми түрде қазақ болуды туған ел алдындағы борышым деп санаған. Кеңестер Одағының Батыры атағы қаза тапқан соң берiлген генералдың аманаты елу жылдан кейiн орындалған. Бұл жерде генералдың сүйiктi жары Құралай Натуллаеваның ерекше еңбегi мен асқан табандылығын айтпай кетуге болмас. Ол жайында Роза апамыз да айта жүретін. Кезінде өзінің Ташкентте оқығанын, адам баласының басында неше түрлі жағдайлар болатынын айтқанда, генералдың басынан өткен оқиғаларды да түсінетінбіз.
Бауырмал қазақтың қайда жүрсе де қазақтығын танытып отыратын әдеті бар. Әнші мен батырдың майдан даласында ағалы-қарындастай болып табысқан осы оқиғасын бұрын да талай рет айтып, талай рет жазғанбыз. Роза Бағланованың 100 жылдық мерейтойы аталып өтіп жатқан тұста мұны тағы бір еске салғанымыз артық болмас дейміз. Жастардың біле жүргені дұрыс.
Әнуарбек ӘУЕЛБЕК, 
ақын, Қазақстанның Мәдениет қайраткері

Қанатын өрт шалмаған, қайран бұлбұл!

<a href="https://kyzylorda-news.kz/">Kyzylorda-news.kz.</a> Сыр елінде облыстық филармонияның 50 жылдығы және халықаралық би күніне орай ІІ республикалық «Ақкербез» би байқауы өтеді. Бұл сайысқа еліміздің 7 өңірінен 9 кәсіби би ұжымы қатысады. Бұл туралы Өңірлік коммуникациялар қызметінде өткен брифингте облыстық филармонияның директоры Талғат Мақашов хабарлады.
<blockquote>
 «Республикалық «Ақкербез» фестивалі қазақ би өнерін ұлықтауға және қайта жаңғыртуға бағытталған. Конкурс-фестивалі аймақ басшысының қолдауымен өңірімізде екінші мәрте ұйымдастырылып отыр. Мың бұралған би сайысында көрші мемлекет Өзбекстаннан арнайы келген кәсіби маман қазылар алқасында баға беретін болады. Осы орайда жерлестерімізді ауқымды шараның куәсі болуға шақырамын», – деді облыстық филармонияның директоры Талғат Мақашов.
</blockquote>
«Ақкербез» республикалық би конкурсына қатысушылардың жасына шектеу болмайды. Сондай-ақ І кезеңде қазақ биінен қойылым қойылса, ІІ кезеңде әр ұжым қалаған би түрлерін көрсетеді.
<blockquote>
 «Жалпы республикалық байқауда еліміздегі ең мықты би ұжымдары қатысады. Осындай конкурстар қазақ би өнерін насихаттауда үлкен маңызға ие екені белгілі. Ұлттық би жанашырларына үлкен алғыс білдіре отырып, жалғасын табады деп сенемін», – деді қазақ ұлттық хореография академиясының аға оқытушысы Анвара Садықова.
 «Қазақстан мемлекетіне, Қызылорда облысына арнайы шақырту алғаныма қуаныштымын. Қазақ ұлтының әрбір өнері өте ерекше әрі әсерлі. Екі ел арасын байланыстыратын ортақ құндылықтарымыз өте көп. Сіздердің қонақжайлықтарыңызға алғысым шексіз. «Ақкербез» республикалық би байқауына қатысушыларға сәттілік тілеймін», – деді Өзбекстан мемлекеттік хореграфия академиясының аға оқытушысы Шырын Жалилова.
</blockquote>

Қызылордада ІІ республикалық «Ақкербез» би байқауы өтеді

<a href="https://kyzylorda-news.kz/">Kyzylorda-news.kz.</a>&nbsp;Бүгін Сырдария ауданының әкімі Мұрат Ергешбаев мәдениет саласының ардагері Жантемір Айсиннің 70 жылдық мерейтойына және Сырдария аудандық тарихи-өлкетану музейінің меңгерушісі Марат Омаровты зейнет демалысына шығарып салуға арналған мерейтойлық іс-шараға қатысты.
Аудан әкімі мәдениет саласының ардагері Жантемір Айсинның 70 жылдық және аудандықтарихи-өлкетану музейінің меңгерушісі Марат Омаровты құрметті зейнет демалысына шығу мерейтойларымен шын жүректен құттықтады.
Аудан басшысы Мұрат Нәлхожаұлы бүгінде ұзақ жылғы еңбегінің жемісін көріп отырған Жантемір Айсин мен ауыл шаруашылығында, мемлекеттік қызметте және мәдениет салаларында жемісті еңбек еткен Марат Омаровтың өмір жолдарына, атқарған қызметтері, ауданымыздың дамуына қосқан сүбелі үлестеріне айрықша тоқталды.
Бүгінгі құрмет иелеріне сый-сияпат табыстап, қазақы дәстүрмен шапан жауып, марапаттарымен тағы да құттықтап, дендеріне саулық, отбастарына амандық тіледі.
Салтанатты шарада аудандық мәслихат хатшысы Ержан Әжікенов, облыстық тарихи-өлкетану музейінің директоры Сапар Көзейбаев, ауданның «Құрметті азаматы» Алма Бахтиярова мерей той иелерін құттықтап, ізгі лебіздерін білдірді.
Шара соңында құрмет иелері Жантемір Айсин мен Марат Омаров сөз кезегін алып, өз ризашылықтарын білдіріп, ауданның дамуына, көркейе беруіне шынайы тілектестіктерін жеткізді.
<img src="https://kyzylorda-news.kz/wp-content/uploads/2022/04/278880781_1107392926490265_4311282306078883976_n.jpg" alt="" />

Сырдария ауданында мәдениет майталмандарына құрмет көрсетілді

<a href="https://kyzylorda-news.kz/">Kyzylorda-news.kz.</a> Халқының мақтанышына айналған ән падишасы, КСРО және Қазақстанның халық әртісі, Халық қаһарманы Роза Бағланованың туғанына биыл ғасыр толды.
Мемлекет басшысы Қасым-Жомарт Тоқаев әншінің құрметіне мерекелік іс-шаралар өткізуге үлкен маңыз беріп, жалпыреспубликалық деңгейде Сыр сандуғашын еске алу іс-шаралары өтуде. 
Бүгін облыс әкімі Нұрлыбек Нәлібаев Роза Бағланованың 100 жылдығына орай «Ақмаңдайлым» атты республикалық әншілер конкурсының ашылу рәсіміне қатысты. Іс-шараға әншінің ұлы Тәжен мен келіні Марал, жергілікті ардагерлер, өнер қайраткелері қатысты.
Аймақ басшысы өнерсүйер қауымды Сыр елінің біртуар перзентінің мерейтойымен құттықтап, конкурсқа қатысушыларға сәттілік тіледі.
<blockquote>
 «Бүгін Сыр елінде ән мен өнер мерекесі ғана емес, ұлт руханиятының асқақтаған күні десе болады. Қазақтың қаһарман қызы Роза Бағланованың есімі ұрпақтан ұрпаққа жалғаса берсін. Бүгінгі байқауға қатысып отырған жастар арасынан Роза апасына ұқсаған таланттар шығады деп сенемін!», – деді облыс әкімі.
</blockquote>
Сөз соңында Нұрлыбек Нәлібаев ән падишасының ұлы Тәжен мен келіні Маралға қазақы дәстүрге сай сый-сияпат жасады.
Айта кетейік, конкурсқа қазақтың ән өнерін асқақтатып, ұлт мәдениетін көтеруге еңбек сіңіріп жүрген – Рамазан Тайманов, Күлән Қалымбетова, Жеңіс Сейдуллаұлы, Бахтияр Тайлақбаев, Сембек Жұмағалиев секілді еліміздің кәсіби өнер тарландары қазылық етуде.
Өнер байқауында еліміздің түкпір-түкпірінен келген жас әншілер бақ сынауда.
<img src="https://kyzylorda-news.kz/wp-content/uploads/2022/04/278572720_285767060411212_6426505297102284860_n.jpg" alt="" />
<img src="https://kyzylorda-news.kz/wp-content/uploads/2022/04/278295201_285767067077878_8832389208497293510_n.jpg" alt="" />
<img src="https://kyzylorda-news.kz/wp-content/uploads/2022/04/278566375_285767160411202_6193947375216966176_n.jpg" alt="" />
<img src="https://kyzylorda-news.kz/wp-content/uploads/2022/04/278738683_285767173744534_8492124268761103057_n.jpg" alt="" />
<img src="https://kyzylorda-news.kz/wp-content/uploads/2022/04/278649416_285767337077851_8795797870398231245_n.jpg" alt="" />

Қызылордада Роза Бағланованың құрметіне «Ақмаңдайлым» байқауы басталды

<a href="https://kyzylorda-news.kz/">Kyzylorda-news.kz.</a> Бүгін Қазақстан және КСРО халық артисі, Халық қаһарманы Роза Бағланованың 100 жылдығы аясында туған жері Сыр елінде әншінің ескерткіші ашылды.
Облыс орталығының қақ төрінен орын алған ескерткіштің ашылу салтанатында Қызылорда облысының әкімі Нұрлыбек Машбекұлы құттықтау сөз сөйлеп, Роза Тәжібайқызының ұлы Тәжен мен келіні Марал өз лебіздерін білдірді.
Ескерткіштің ашылу рәсімі Роза Бағланованың 100 жылдығына арналған «Ақмаңдайлым» республикалық әншілер конкурсына ұласып жатыр.
<img src="https://kyzylorda-news.kz/wp-content/uploads/2022/04/zhenis.jpg" alt="" />

Қызылордада Роза Бағланованың ескерткіші ашылды

<a href="https://kyzylorda-news.kz/">Kyzylorda-news.kz.</a>&nbsp;23 сәуірде сағат 19.00-де Қызылорда қаласында Нартай Бекежанов атындағы Қызылорда облыстық қазақ академиялық музыкалық драма театрында Қазақстанның Халық әртісі, Халық қаһарманы Роза Бағланованың 100 жылдық мерейтойына арналған «Қазақтың қаһарман қызы» атты мерекелік концерт өтеді.
Концерттік бағдарламада Қазақстанның халық әртісі Нұрғали Нүсіпжанов, Сұлушаш Нұрмағанбетова, Алтынбек Қоразбаев, Гүлнәр Сиқымбаева, Жеңіс Сейдуллаұлы, Жеңіс Ысқақова, Игорь Благодарный, Айгуль Иманбаева, Асхат Үрпеков, Шаба, Нұрлан Албан, Бауыржан Исаев, Зарина Жакенова сынды әртістер мен Құрманғазы атындағы Қазақ ұлттық оркестрі өнер көрсетеді.
Сыр елі –жыр елі талайды таңдай қаққызған тума таланттардан кенде емес. Ән мен сұлулық бәйгесінің тәжін қоса киген алаштың ай маңдайлы аруы, Ұлыбританияда өтетін жыл сайынғы «Әлемнің әйгілі әйелдері» атағын алған қазақ ханымы Роза Бағланованың 100 жылдық мерейтойы ресми түрде басталып, республика көлеміндегі іс-шараларға ұласып, енді міне, туып өскен жері Сыр елінде ғасырлық тойы тойланғалы жатыр.
Айта кетейік, қазақ өнерінің біртуар әншісіне арналған бұл керемет ән кеші Мәдениет және спорт министрлігінің ұйымдастыруымен өтеді.

Қызылордада Роза Бағланованың құрметіне концерт өтеді

<a href="https://kyzylorda-news.kz/">Kyzylorda-news.kz.</a> Алматыда КСРО Халық әртісі Роза Бағланованың ескерткіші ашылды, деп хабарлайды&nbsp;<a href="https://sputnik.kz/">Sputnik Қазақстан</a>.
Ескерткіш көрнекті опера және эстрада әншісінің 100 жылдығын мерекелеу аясында Төле би көшесі мен Қалдаяқов көшесінің қиылысында Жамбыл атындағы Қазақ мемлекеттік филармониясы ғимаратының алдында орнатылды.
<img src="https://sputnik.kz/img/07e6/04/0f/24230242_0:0:1280:960_1920x0_80_0_0_c31aad33d0c5b5f5b15ce135ae7d5aec.jpg.webp" alt="Ескерткіштің ашылу салтанатына қала әкімі Ерболат Досаев қатысты - Sputnik Қазақстан, 1920, 15.04.2022" title="Ескерткіштің ашылу салтанатына қала әкімі Ерболат Досаев қатысты" />
Ескерткіштің ашылу салтанатында алғашқы сөзді Алматы әкімі Ерболат Досаев сөйледі.
<blockquote>
 “Қазақтың кәсіби ән өнері дегенде, біздің есімізге ең алдымен түсетін санаулы ғана есім бар. Олар аттары аңызға айналған – Күләш Байсейітова, Ермек Серкебаев және бүгінгі ескерткіші ашылғалы отырған Роза Бағланова. Бұл ескерткіш жеке адамға ғана емес, ұлтымыздың ән өнеріне, тұтастай қазақ мәдениетіне қойылып отырған ескерткіш! Қасіретті қаңтар оқиғасынан кейін бой көтеріп отырған бұл ескерткіш жақсылықтың жаршысындай болып, айналасына жылуын шаша берсін!”, — деді Досаев.
</blockquote>
<img src="https://sputnik.kz/img/07e6/04/0f/24230280_0:0:1280:960_1920x0_80_0_0_2aa65054d867ff51738b257db2e16b99.jpg.webp" alt="Алматыда Роза Бағланованың ескерткіші ашылды - Sputnik Қазақстан, 1920, 15.04.2022" title="Алматыда Роза Бағланованың ескерткіші ашылды " />
Қонақтардың арасында Алтынбек Қоразбаев, Ақұштап Бақтыгереева, Нұрлан Оразалин, Әлібек Дінішев және өзге де қонақтар, қала тұрғындары бар.
Айта кетері, еңселі ескерткіштің авторлары – Ешкенов Ғазиз, Жамхан Айдар және Ақжолтай Ұлағат.
<h3 id="">Күміс көмей әншінің өмір жолы</h3>
Халық Қаһарманы, “Тарлан” сыйлығының иегері, шетелдіктердің өзі қазақтың қызғалдақ гүліне теңеген Роза Бағланова 1922 жылдың 1 қаңтарында Қызылорда облысы Қазалы қаласында дүниеге келген.Мектеп бітірген соң 1939 жылы Роза Қызылорда педагогика институтына түседі, бірақ кенеттен әкесі қайтыс болып, туыстарды жағалап, тұрмыстық жағдайға байланысты сол жылы Ташкент тоқыма институтына ауысады. Әншінің бойжеткен шағы ашаршылық пен аласапыран жылдарға дөп келеді. Ташкентте жүргенде ол ерекше дауысымен бірден көзге түседі.
“Үйдің тіршілігін жасай жүріп, ән салатын әдетім бар еді. Әлі есімде, есіктің алдын сыпырып жүріп әндеткен қыздың дауысын естіп, өзбек филармониясының директоры “Ән айтқан кім?” деп іздеп келді. Менің әншілік өмір жолымды, бағымды ашқан сол Кари Якупов әка еді. Содан Кари әканың көмегімен Ташкент филармониясындағы мемлекеттік әйелдер ән-би ансамблінде әнші болдым. Одан соң 1941 жылы Москва консерваториясына жолдама алғанымда соғыс басталып кетті”, – дейді Роза Бағланова бір сұхбатында.
Роза Бағланова Ұлы Отан соғысы жылдары майданды аралап, өнер көрсетіп, 1945 жылы 9 мамырда Берлиндегі жеңіс концертіне қатысқан. Бірақ ол барлық концертте Өзбекстан атынан шығып жүреді. Бір күні Өзбекстандағы керемет әнші қазақ қызы туралы Жұбан Молдағалиев естиді. Роза Бағланованың Отанына оралуына тікелей себепші болған да осы кісі. Қазақ ақынының қолдауымен 1949 жылы Роза Бағланова елге оралады.
Роза Бағланова 1947-1949 жылдары Абай атындағы Қазақ опера және балет театрының әншісі, 1949-1960 жылдары Жамбыл атындағы республикалық филармониясының солисі болды. 1960 жылдан бастап “Қазақконцерттің” әнші-солисі, жетекші сахна шебері болып қызмет етті.
КСРО және Қазақстанның халық әртісі, Халық Қаһарманы Роза Тәжібайқызы Бағланова 90 жасқа қараған шағында 2011 жылы 8 ақпанда дүние салды.2022 жылы Роза Бағланованың туғанына 100 жыл толды. Бұл дата ЮНЕСКО-ның даталар күнтізбесіне енгізілген.
Мәдениет және спорт вице-министрлігінің, әншінің мерейтойына арналған жоспар 41 тармақтан тұрады. Қазақстан өңірлерінде 400-ге жуық іс-шара өткізу жоспарланған, оның ішінде республикалық деңгейде 25 іс-шара өткізіледі. Ал халықаралық деңгейде 5 іс-шара өткізу көзделген.

Алматыда Роза Бағланованың ескерткіші ашылды

<a href="https://kyzylorda-news.kz/">Kyzylorda-news.kz.</a>&nbsp; Жалағаш ауданында отбасылық құндылықтарды насихаттау, гендерлік саясатты жүзеге асыру мақсатында Қызылорда облыстық әйелдер кеңесінің ұйымдастыруымен тағылымды шара өтті. Жалағаш ауданынан түлеп ұшып, бүгінде өңірде жауапты қызмет атқарып жүрген және өз саласы бойынша ұзақ жылдар абыроймен қызмет атқарып, зейнет демалысына шыққан қыз-келіншектер еліне төркіндеп келіп, туған жеріне тағзым етті.
Іс-шара барысында құрметті қонақтар алдымен аудандық тарихи-өлкетану музейіне барып, туып-өскен жерінің тарихына қанықты. Одан соң Ш.Ермағанбетова атындағы №246 мектепте аудан тұрғындарымен кездесті.
Кездесуге аудан әкімінің орынбасары Жасұлан Еспенбет қатысты. Алдымен сөз алған Қызылорда облыстық әйелдер кеңесінің төрайымы Райкүл Байназарова іс шараның негізгі мақсатына тоқталды. Сондай-ақ еңбек ардагерлері Гүлсара Қуандықова және Қазына Өзденбаевалар өздерінің еңбек жолдары жайында әңгімелеп, қызықты шақтарын еске алды.
Өткен ғасырдың жетпісінші жылдары елдің аузынан түспеген “Тракторшы Гүлсара” әнін бүгінгі жастар білмегенімен, сол заманның өкілдері жақсы біледі. Гүлсара, Қазына апаларымыз ауыр жүк көліктерін тізгіндеп, еңбек майданының бел ортасында жүрді. Бірі трактормен, бірі “ЗИЛ” жүк көлігімен күні-түні жол жүріп Қызылқұм, Қарақұмдағы малшыларға қажетін жеткізіп берді, одан бөлек, егіс даласындағы еңбекшілерге ер азаматтармен бірдей қызмет еткені бүгінгі жастарға үлгі, өнеге десе болады. Сонымен бірге шара барысында Қорқыт Ата атындағы Қызылорда университетінің профессоры, педагогика ғылымдарының кандидаты Рабиға Игенбаева аудан жастарын ғылыми зерттеулерге және ізденістерге баулу бағытында өзінің ұзақ жылғы тәжірибесімен бөліссе, “Атамекен” кәсіпкерлер палатасы жанынан құрылған кәсіпкер әйелдер ассоциациясының төрайымы Жанна Аманова белсенді кәсіпкер әйелдердің қоғамның жаңа бағытта дамуына қосып келе жатқан үлесі зор екенін мақтанышпен жеткізді.
Сонымен бірге Қазақстан Жазушылар одағының және Қазақстан Журналистер одағының мүшесі, “Сыр бойы” газетінің тілшісі Ғазиза Әбілдаева жастарды шығармашылыққа баулу жайына тоқталды. Ал, М.Мәметова атындағы Қызылорда педагогикалық жоғары колледжі директоры Жақсыгүл Тоғанова мен аудандық білім бөлімінің басшысы Талғат Садықов колледжде даярланатын болашақ педагог кадрлардың кәсіби даярлығы мазмұнын жетілдіру мақсатында меморандумға қол қойды.
Аталған іс шараны Жасұлан Ерданұлы қорытындылап, халқымыздың жөн-жоралғысымен сый-сияпат жасап, құрмет көрсетті. Қонақтар Қ.Қазантаев атындағы аудандық мәдениет үйі жанындағы халық театры сахналаған “Жеңгетай” спектаклін тамашалады.
<img src="https://kyzylorda-news.kz/wp-content/uploads/2022/04/278509187_1431604417291632_3566154977842401984_n.jpg" alt="" />
<img src="https://kyzylorda-news.kz/wp-content/uploads/2022/04/278537830_1431604460624961_6989988653762867761_n.jpg" alt="" />
<img src="https://kyzylorda-news.kz/wp-content/uploads/2022/04/278585178_1431604323958308_7530494856945925801_n.jpg" alt="" />
<img src="https://kyzylorda-news.kz/wp-content/uploads/2022/04/278597064_1431604370624970_4297283854453606832_n.jpg" alt="" />
<img src="https://kyzylorda-news.kz/wp-content/uploads/2022/04/278589277_1431604260624981_7945938401843706765_n.jpg" alt="" />

Бабалар жолы жаңғырды

<a href="https://kyzylorda-news.kz/">Kyzylorda-news.kz.</a>&nbsp; Минскіде қазақтың танымал әртісі Роза Бағланованың құрметіне ғылыми оқулар өтті, деп хабарлады Қазақстанның сыртқы&nbsp;істер министрлігінен.
<blockquote>
 «Беларусь мемлекеттік музыка академиясында алғаш рет қазақ музыка өнері өкілінің өмірі мен шығармашылығының таныстырылымы өтті. Әлемге әйгілі әнші, КСРО, ҚазКСР, ӨзКСР-дың халық әртісі және «Халық қаһарманы» Роза Бағланованың 100 жылдық мерейтойы Қазақстанда ғана емес, одан тыс жерлерде де алғаш рет өткізілу құқығы кездейсоқ емес», – делінген жұма күні таратылған хабарда.
</blockquote>
Таныстырылымды Қазақстанның Беларусьтегі Елшілігі Л.С.Мухаринскаяны еске алуға арналған ХХХІ-ші халықаралық ғылыми оқулар аясында өткізді. Іс-шараға ондаған музыкатанушылар, өнертанушылар және түрлі мемлекеттердің азаматтары, соның ішінде 1941 жылғы майданнан бастап өткен ғасырдың соңына дейін сахналарында Р.Бағланова өнер көрсеткен елдердің азаматтары қатысты.
<blockquote>
 «Р.Бағланованың ғасырлық мерейтойы ЮНЕСКО-ның 2022-2023 жылдарға арналған атаулы күндер күнтізбесіне енгізілген. Ұлы Отан соғысты майдандағы концерттік топтар құрамында өтіп, кейін барлық құрлықтардағы көптеген елдердің сахналарында өнер көрсетіп, ол әртүрлі ұлттар мен конфессиялардың өкілдеріне достық, бейбітшілік және махаббат идеяларын жеткізе білді. Шын мәнінде, ол әлемдік мәдени кеңістікте қазақтың ұлттық мәдениеті мен музыкалық өнерінің жолсерігі рөлін атқара отырып, әлемнің елшісі болды», – деп атап өтті Қазақстанның сыртқы саяси ведомствосынан.
</blockquote>
Дипломаттар атап өткендей, халықаралық ғылыми оқулар қатысушылары Р.Бағланованың шығармашылығын талқылау барысында оны маңызды тұлға ретінде атай отырып, «бұл әйгілі әншінің адам жүрегіне қалай терең әсер етіп, адам жанының нәзік пернесін қозғай алғанына» таңданды.
<blockquote>
 «Қазақ пен белорус халқы әртүрлі, тіпті мәдениетіміз де әртүрлі, дейтұрғанмен, ортақ нәрселеріміз де бар екені мені қатты таң қалдырды. Роза Бағланова – біздің ортақтығымыздың дәлелі. Ол әлемнің ондаған тілдерінде ән айтып, әр түрлі халықтарға олардың ана тілдерінде сөйлеуі тек қазақ тілін ғана емес, әлемдік мәдениетті насихаттайтын әлемдік тұлға болғанын білдіреді», – деп Беларусь мемлекеттік музыка академиясының ректоры Елена Куракина өз әсерімен бөлісті.
</blockquote>
Р.Бағланованың бейнесін толық ашу үшін іс-шара қатысушыларына әншінің сұхбатына негізделген «Өткеннің нұры» деректі фильмі көрсетілді, оның естеліктерінен үзінділер келтірілді. Солардың бірінде халық әртісі былай деп жазады: «Сахна мен үшін әрқашан қуанышқа толы болды. Мен сахнаға бауырымды және жақын адамымды құшақтап, сүйгендей боламын. Мен оны соңғы деміме дейін жақсы көруге және одан атақ, мансап немесе пайда іздемеуге уәде бердім». Р.Бағланова бұл ұстанымды ешқашан өзгертпеді.
Р.Бағланованың шығармашылығы талқыланатынын білген беларус сүйермендер соғыстан кейінгі жылдары жазылған әншінің ең танымал әндері болып табылған «Самара-городок» пен Латиф Хамидидің «Қазақ вальсі» әндерінен құралған раритетті шағын диск алып келді. Олар әншінің музыка мен адамдарға деген сүйіспеншілікке толы ұлы талантын мойындау ретінде бұл диск көп жылдар бойы отбасылық мұра ретінде сақталып келгенін айтты.
Таныстырылым соңында Беларусь Үлкен театрының солисі Клавдия Потемкина «Қазақ вальсін» орындады.

Минскіде алғаш рет Роза Бағланованың құрметіне ғылыми оқулар өтті

<a href="https://kyzylorda-news.kz/">Kyzylorda-news.kz.</a>&nbsp;&nbsp; Жеңіс Сейдуллаұлы «Ж.Елебеков атындағы республикалық эстрада-цирк колледжі» РМҚК директоры қызметіне тағайындалды.
Жеңіс Сейдуллаұлы 1962 жылы 14 мамырда Қызылорда облысында дүниеге келген.
1982 жылы Шымкент музыка училищесін бітірген, Т. Жүргенов атындағы Қазақ ұлттық өнер академиясының түлегі. Әр жылдары «Арқас» ансамблінің аспапшы-артисі, «Гүлдер» мемлекеттік ансамблінің бас дирижері, Сүйінбай атындағы Алматы облыстық филармониясының солисі болып жұмыс істеген.
«Гүлдер» ансамблінің директоры, Алматы қаласы «Қазақ әуендері» АҚ өңірлік директоры, Т.Жүргенов атындағы Қазақ ұлттық өнер академиясының шығармашылық жұмыс және сыртқы байланыстар жөніндегі проректоры, Ж.Елебеков атындағы республикалық эстрада-цирк колледжінің директоры қызметтерін атқарған. 2016-2018 жылдары- Жамбыл атындағы қазақ мемлекеттік филармониясының директоры, 2018 жылдан бастап қазіргі уақытқа дейін «Қазақконцерт» ұйымын басқарған.

Жеңіс Сейдуллаұлы жаңа қызметке тағайындалды

<a href="https://kyzylorda-news.kz/">Kyzylorda-news.kz.</a> Қызылорда қаласмында «Балалар жылы» және «Халықаралық балалар кітабы» күніне орай «Ертегімен есейемін» дәстүрлі қалалық байқауы өтті.
Жас оқырмандарды кішкентайынан халық ауыз әдебиетімен сусындатып, балалардың тілін, қиялын, сөздік қорын, ой – өрісін дамытуға, адалдыққа, адамгершілікке, парасаттылыққа, елжандылыққа тәрбиелеу мақсатында ұйымдастырылған байқауға қала аумағынан 7 мектептің бастауыш сынып оқушылары қатысты.
<blockquote>
 «Халқымыз «көп жасаған білмейді, көп оқыған біледі» деп ежелден кітаптың адам өміріне әсерін осы бір қарапайым сөзбен-ақ айтып кеткен. Өйткені кітап – тәрбиенің қуатты құралы. Жақсы кітаптар оқу дегеніміз – өткен замандардың ең жақсы адамдарымен әңгімелесу», – дейді қалалық мәдениет және тілдерді дамыту бөлімінің басшысы Н.Әбілдаев.
</blockquote>
Айта кетейік, байқауға «Петро Қазақстан Құмкөл Ресорсиз» АҚ, «Халық» банкі АҚ, «Әбіл ата» сантехника дүкені демеушілік жасаса, қалалық орталықтандырылған кітапханалар жүйесінің директоры Г.Рахметова, «Халық» банк қызметкері Д.Алдоңғарова, «Қоғам ТВ» телеарнасының шеф редакторы Б.Құлтанова төрелік етті.
Әр мектептен келген өнерпаз оқушылар байқаудың бірінші кезеңінде дат жазушысы Г.Х.Андерсеннің ертегілерінен қойылым көрсетсе, екінші кезеңде қазақ халық ертегілерін сахналап, көрермен ықыласына бөленді.
Нәтижесінде №136 Т.Жүргенов атындағы орта мектеп оқушылары Бас жүлдені жеңіп алса, І орынға №23 Ж.Қизатов атындағы мектеп-лицей лайық деп танылды. 2 орынды №217 Б.Шалғынбаев атындағы орта мектеп пен №5 И.Панфилов атындағы мектеп-лицей оқушылары өзара бөліссе, №120 Ж.Жабаев атындағы, № 171 Ғ.Мұратбаев атындағы және №143 орта мектептер 3 орынды қанағат тұтты. Жеңімпаздар мен жүлдегерлерге дипломдар мен бағалы сыйлықтар табыс етілді.
Балалардың тыңғылықты дайындығы мен жеңіске деген құштарлығын көре отырып, жыл сайын дәстүрге айналған «Ертегімен есейем» қалалық байқауының мақсаты айқын, берері мол деп ойлаймыз.
Себебі бүгінгі ұрпақ білімді болса ел ертеңі жарқын болмақ.
<img src="https://kyzylorda-news.kz/wp-content/uploads/2022/04/277556777_161870879541948_2566108034149658868_n.jpg" alt="" />
<img src="https://kyzylorda-news.kz/wp-content/uploads/2022/04/277666584_161870819541954_4351150963376173580_n.jpg" alt="" />
<img src="https://kyzylorda-news.kz/wp-content/uploads/2022/04/277741856_161870806208622_2348701349087610115_n.jpg" alt="" />
<img src="https://kyzylorda-news.kz/wp-content/uploads/2022/04/277731113_161870886208614_8039671652001511376_n.jpg" alt="" />

Қазақстан және Қызылорда облысының жаңалықтары: Мәдениет