<a href="https://kyzylorda-news.kz/">Kyzylorda-news.kz.</a> Қызылордада баласын белгісіз адамға тастап кеткен әйел сот шешімімен ата-ана құқығынан айырылды.Қаңтардың бел ортасында өткен сот отырысы екі аптаға кейінге қалдырылып, іске қатысты шешім бүгін, яғни 28 қаңтар күні оқылды.<blockquote>«Жауапкер Цой Людмила Григорьевнаны&nbsp; кәмелетке толмаған 8 наурыз 2011 жылы туылған Цой Владикке қатысты ата-аналық құқығынан айырлсын. Кәмелетке толмаған Владик Цойды талап қоюшы Қызылорда қалалық білім бөлімінің қамқоршылық және қорғаншылық жөніндегі функцияларды жүзеге асыратын органның қамқорлығына берілсін», – деді судья Қ.Бержанов.</blockquote>Сот шешімінде айтылғандай, жауапкер Людмила Цой барлық табысы мен өзге де кірісінің төрттен бір бөлігі мөлшерінде Владик Цойды күтіп-бағу үшін ол кәмелетке толғанша ай сайын алимент төлеуі тиіс. Алимент сот шешімімен 2019 жылдың 18 қарашасынан бастап өндірілуі және өкілетті банкте баланың атына ашылған есепшотқа аудырылуы қажет.<blockquote>«Жауапкер Цой Людмила Григорьевнадан мемлекет пайдасына 1263 теңге және 5055 теңге мемлекеттік баж өндірілсін. Шешімге наразы жақтары шешім түпкілікті нысанда шығарылған күннен бастап, ал сот талқылауына қатыспаған тұлғалар өздеріне шешімнің көшірмелері жіберілген күннен бастап бір ай ішінде Қызылорда олысының кәмелетке толмағандардың істері жөніндегі мамандандырылған ауданаралық соты арқылы Қызылорда облыстық сотының азаматтық істер жөніндегі апелляциялық сот алқасына аппеляциялық шағым немесе прокурор өтінішхат келтірулеріне құқылы», – деді судья. &nbsp;&nbsp;&nbsp;</blockquote>Сот отырысы кезінде қалалық білім бөлімі жанындағы қорғаншылық және қамқоршылық жөніндегі функцияларды жүзеге асыратын органның маманы Людмила Цойдың 5 баласы бар екендігін растап, оның үлкен ұлы кәмелет жасқа толғанын, екінші қызы 10 сыныпта оқитындығын және Қармақшы ауданында өз әкесінің қолында тәрбиеленіп жатқандығы туралы айтып өтті.Айта кетейік, қаңтар айының 15-күні Қызылорда облысы, Қармақшы ауданы, ІІІ Интернационал ауылының тумасы Людмила Цойға қатысты сот отырысы болып өтті. Ол 2011 жылғы некесіз туған баласы Владик Цойды заң жүзінде әкесі деп танылмаған «Сабалақ» саяжайының тұрғыны Константин Кимге тастап кеткен. Людмила Цой өз ұлын Константинге 2015 жылдың желтоқсан айында қалдырған. Сол уақыттан бері бірде-бір рет баласының жағдайын білуге келмеген, оның өміріне алаңдамаған. Константин Ким 2019 жылдың 9 мамырында дүниеден озып, бала қараусыз қалған еді. Сол уақытта саяжайдағы көршілері тәртіп сақшыларына хабар беріп, баланың қараусыз&nbsp; қалғанын ескерткен болатын.Қызылорда қалалық жергілікті полиция бөлімінің қызметкері Жасұлан Асылбеков өткен жылдың 14 мамырында баланы іздеп барып, оны арық ішінде ойнап отырған жерінен тапқандығын айтты. Тәртіп сақшысы өз міндетіне сәйкес баланы қалалық білім бөліміне апарып, онда баланың ешкімі жоқтығы жөнінде қаулы алып, қалалық кәмелетке толмағандарды бейімдеу орталығына орналастырған болатын. Сол уақыттан бері баланың денсаулығы толық зерттеліп, оның осы уақытқа дейін мектеп табалдырығын аттамағандығы белгілі болды.Оған қоса, баланың дамуында тежеліс бар екендігі, оның анық сөйлей алмайтындығы белгілі болып, балаға «Психикалық даму бөгелісі» диагнозы қойылған. Қазіргі таңда Владик Цой Нағи Ілиясов атындағы №9 мектеп-гимназияның 1 сыныбында оқиды.<a href="https://kyzylorda-news.kz/kogam/balasyn-aerkimning-qolyna-tastap-oezi-ongtuestik-korejagha-ketken-qyzylordalyq-aejel-analyq-quqyghynan-ajyrylady-ma-40602/">Еске сала кетейік</a>, бұған дейін бұл іске қатысты алғашқы сот отырысы мен баланың жағдайы туралы жариялаған болатынбыз.Динара МАХАНОВАФото: Нурболат Нуржаубай&nbsp;

Баласын белгісіз адамға тастап кеткен қызылордалық әйел ата-ана құқынан айырылды

<a href="https://kyzylorda-news.kz/">Kyzylorda-news.kz.</a> Қызылорда облысының кәсіпкерлік және туризм басқармасы басшысының орынбасары сыбайлас жемқорлық жасады деп күдікпен айыпталуда, деп хабарлайды <a href="https://t.me/antikornews/722">Сыбайлас жемқорлыққа қарсы қызмет</a>.
Қызылорда облысы бойынша Сыбайлас жемқорлыққа қарсы қызметі Қызылорда облысының кәсіпкерлік және туризм басқармасы басшысының орынбасарына қатысты сыбайлас жемқорлық жасады деген күдікпен сотқа дейінгі тергеуді бастады.
<blockquote>
 «Ол жалпы қамқорлығы мен орындалған жұмыс актісіне кедергісіз қол қойғаны үшін жеке кәсіпкерден карталық шоты арқылы едәуір мөлшерде пара алды деген күдікке ілінді» делінген хабарламада.
</blockquote>
Сотқа дейінгі тергеу жалғасуда. Күдіктіге қатысты түпкілікті шешімді сот шығарады.

Қызылордада лауазымды шенеунік кәсіпкерден пара алды деп айыпталуда

<a href="https://kyzylorda-news.kz/">Kyzylorda-news.kz.</a>&nbsp;Қытай аумағында таралып жатқан коронавирустың жаңа түрін жұқтырған пациенттердің арасында Қазақстан азаматтары жоқ. Мәселені ушықтырмауды сұраймыз, деп хабарлады Қазақстанның Сыртқы істер министрлігі.&nbsp;&nbsp;
Ведомствоның мәліметінше, қазіргі уақытта Қазақстан азаматтары Қытайдың ондаған қаласында тұрып жатыр.
<blockquote>
 «Олардың көбісі түрлі себеппен консулдық есепке тұрмайды. Сыртқы істер министрлігі Қазақстанның Бейжіңдегі елшілігі арқылы Қытай аумағындағы Қазақстан азаматтарының нақты санын анықтап жатыр», – деп жазылған хабарламада.
</blockquote>
Сондай-ақ, Қазақстан ғана емес, әлемнің басқа да елдері өз азаматтарын эвакуациялау мүмкіндіктерін қарастыруда. Ухань қаласында карантин жариялануына байланысты қоғамдық көлік, сондай-ақ халықаралық автобус, теміржол және әуе қатынастары тоқтатылған.
<blockquote>
 «Болған жағдай айналасында мәселені ушықтырмауды сұраймыз. Ел үкіметі вирусты Қазақстан аумағына кіргізбеу бойынша барлық қажетті шараны қабылдап жатыр», – деп атап өтті Сыртқы істер министрлігінің баспасөз қызметі. 
Қазақстанның Қытайдағы елшілігінің ақпаратына сәйкес, 2020 жылдың 27 қаңтарындағы жағдай бойынша, ҚХР аумағында таралып жатқан коронавирустың жаңа түрін жұқтырған пациенттердің арасында Қазақстан азаматтары жоқ.
</blockquote>

Сыртқы істер министрлігі коронавирусқа қатысты мәлімдеме жасады

<a href="https://kyzylorda-news.kz/">Kyzylorda-news.kz.</a> Еуразиялық банкі бөлімшелерінде «Астана Банкі» АҚ салымшыларына өтем төлеу мерзімі 2020 жылдың 27 шілдесіне дейін ұзартылды. Қазақстанның депозиттерге кепілдік беру қоры (ҚДКБҚ) мен Еуразиялық банк ттиісті келісімге қол қойды.
Еуразиялық банкі бөлімшелерінде «Астана Банкі» АҚ салымшыларының өтініштері қабылданып, қарастырылады және төлем жүргізіледі. Салымшының таңдауы бойынша ақша қолма-қол төленуі немесе банктік шотқа аударылуы мүмкін.
Еуразиялық банкі «Астана Банкі» АҚ салымшыларына өтемді 2019 жылғы 26 қаңтардан бастап ҚДКБҚ атынан және қаражаты есебінен төлейді. Салымшылар алдындағы міндеттемелердің 75%–ы төлем басталғаннан бастап алғашқы үш күнде, 95%-ы – бірінші айда өтелді. Бүгінгі таңда «Астана Банкі» АҚ салымшыларына 37 миллиард теңге төленді, ал&nbsp;агент банкке жүгінбеген салымшылардың алдындағы міндеттемелердің қалдығы бастапқы міндеттемелер сомасынан тек 1%-ды құрайды.
Төлем алуға өтініш берген салымшылардың саны көп емес: «Астана Банкі» АҚ 268 мың салымшыларының тек 59 мың салымшысы агент банкке жүгінген, ал бүкіл аймақтар бойынша жүгінулердің пайызы 28%-дан аспайды. Негізгі себеп – аз қалдықты шоттардың көп саны: талап етілмеген депозиттердің шамамен 95%-ы – бес мың теңгеден кем сомаға, оның ішінде 80%–ы – бір мың теңге шегінде. Салымшылар, әдетте, шағын депозит бойынша өтем алуға асықпайды.
Алайда, ірі депозиттер да қалуда: агент банкке әлі өтініш білдірмеген екі салымшы ең жоғары өтем сомасына – 10 миллион теңге, 30 салымшы – миллион теңгеден астам, 346 адам – 100 мың теңгеден астам, 5 мың адам – 10 мың теңгеден астам депозиттері бар.
Осы жағдайда ҚДКБҚ және Еуразиялық банкі басшылығы «Астана Банкі» АҚ салымшыларына олар тұратын және жұмыс істейтін орындарда төлем алу мүмкіндігін одан ары да қамтамасыз ету қажет деп санады. Еуразиялық банк Қазақстанның 33 қаласында ұсынылған және 17 филиалы мен 114 бөлімшесі бар, ал кейбір бөлімшелері демалыс күндері де жұмыс істейді.

«Астана Банкінде» ақшаңыз қалмады ма?

<a href="https://kyzylorda-news.kz/">Kyzylorda-news.kz.</a> Мемлекеттік қолдау шаралары мен салық жеңілдіктері оңтайландырылады, деп хабарлайды <a href="http://lenta.inform.kz/kz/prezident-zhariyalagan-moratoriy-ayasynda-kanday-kyskartular-zhuredi_a3608313">ҚазАқпарат</a>.
Бұл туралы ҚР Премьер-Министрінің бірінші орынбасары – Қаржы министрі Әлихан Смайылов мәлімдеді.
<blockquote>
 «…Тиімділік тұрғысынан мемлекеттік қолдау шаралары оңтайландырылады. Мемлекеттік органдар арасында қайталау болмауы керек. Әрбір субъект бойынша талдау жүргізіп, барлық мемлекеттік қолдау шараларын алушылар бойынша Қаржы министрлігі базасында бірыңғай ақпараттық жүйе құруды ұсынамыз», – деді министр Үкімет отырысында.
</blockquote>
Оның айтуынша, салық жеңілдіктері мен префренециялары бойынша бүгінде құны 4,5 трлн теңгенің 277 жеңілдігі бар.
<blockquote>
 «Жұмыс тобы құны 237 млрд теңгенің 13 жеңілдігін қысқарту алдын ала ұсынылды. Сарапшылардың кеңінен тарта отырып, барлық жеңілдіктерге қосымша талдау жүргіземіз. Министрлер мен әкімдер тиімсіз жеңілдіктерді қысқарту жөнінде өз ұсыныстарын Ұлттық экономика министрлігіне 1 ай мерзімінде ұсынуы қажет. Мемлекеттік бюджет шығыстарын және квазимемлекеттік сектор шығыстарын оңтайландыру бойынша қосымша жұмыстар жүргізіледі», – деді Ә.Смайылов.
</blockquote>
Сондай-ақ, кейінге қалдыруға болатын шығыстарды анықтау қажет.
<blockquote>
 «Бұл үшін барлық минстрліктер, әкімдіктер, ұлттық холдингтер мен компаниялар Мемлекет басшысының мораторий жүргізу жөніндегі тапсырмасын және Есеп комитетінің ұсынымдарын ескере отырып, өздерінің ағымдағы жылға арналған барлық шығыстарына мұқият талдау жүрігізіп, оларды оңтайландыру жөнінде ұсыныстарын Қаржы министрлігіне енгізуі тиіс. Бірінші кезекте, Президент атап өткендей, бұл – имидждік шығыстар, конференциялар, семинарлар, зерттеулер, көлік, жиһаз және басқа да шығыстар», – дейді министр.
</blockquote>
Министрліктер мен әкімдіктерге еңбекақы төлеудің жаңа жүйесі мен корпоративтік басқарудың тәсілдерін енгізу өздерінің шығыстары мен бизнес процестерін оңтайландыру есебінен жүргізілуі керек.
<blockquote>
 «Құрылысқа арналған шығыстарды оңтайландыру мақсатында Ұлттық экономика министрлігі Индустрия және инфрақұрылымдық даму миинстрлігімен бірлесіп, жобалардың бірыңғай банкін құру және Үлгілік жобаларды міндетті пайдалану бойынша бизнес-ахуалды жақсарту мақсатында дайындалған түзетулердің 8-пакеті шеңберінде заңнамаға өзгерістер енгізуді жеделдету қажет», – деді Әлихан Смайылов.
</blockquote>
Еске сала кетсек, ҚР Үкіметінің кеңейтілген отырысында Президент Қасым-Жомарт Тоқаев қымбат көлік сатып алу және форумдар өткізу шығыстарына&nbsp;мораторий&nbsp;жариялаған еді.

Президент жариялаған мораторий аясында қандай қысқартулар жүреді?

<a href="https://kyzylorda-news.kz/">Kyzylorda-news.kz.</a> Ғылыми кеңестің шешімімен Қорқыт Ата атындағы Қызылорда мемлекеттік университетінің ректоры, филология ғылымдарының кандидаты Бейбіткүл Кәрімова&nbsp;облыстық мәслихаттың хатшысы, техника ғылымдарының докторы, профессор Қылышбай Бисеновке «Құрметті ректор» атағын табыстады.
Қылышбай Алдабергенұлының білім биігіндегі еңбегі ерен. Қызылорда облыстық мәслихатына бес мәрте сайланған депутат. Ы.Жақаев атындағы Қызылорда политехникалық институтының ректоры. Қазақстан Республикасы Парламенті Мәжілісінің депутаты. Қорқыт Ата атындағы Қызылорда мемлекеттік университетінің ректорлығына дейін көтерілді. Танымды тұлға университетті басқарған жылдары білім ордасының халықаралық деңгейдегі қарым-қатынасы күшейіп, бәсекеге қабілетті мамандар даярлау ісінде нәтижелі жұмыстар атқарылды. Ғылым мен білімге ұмтылған жастарды қолдау арқылы Сыр елі жас ғалымдарының жаңа буыны қалыптасты. Университеттің материалдық-техникалық базасы нығайып, жастарға арналған жаңа әлеуметтік нысандар бой көтерді. Білім берудің нәтижесін анықтайтын әлемдік және республикалық рейтингтерде университет жоғары орындардан көрінді.
<img src="https://kyzylorda-news.kz/wp-content/uploads/2020/01/28bisenov2.jpg" alt="" />

Қылышбай Бисеновке «Құрметті ректор» атағы берілді

<a href="https://kyzylorda-news.kz/">Kyzylorda-news.kz.</a> Қазақстан Республикасының Ұлттық Банкі 28 қаңтарда 2020 жылғы үлгідегі 200 теңгелік монеталарды айналымға шығарады, деп хабарлайды <a href="https://www.inform.kz/kz/ulttyk-bank-200-tengelik-monetany-aynalymga-shygardy_a3608318">ҚазАқпарат</a>.
<blockquote>
 «Монеталардың дизайны Қазақстан Республикасы Президентінің 2018 жылғы 12 желтоқсандағы № 804 Жарлығымен бекітілген Ұлттық валюта – Қазақстан теңгесі банкноттары мен монеталары дизайнының тұжырымдамасына сәйкес орындалды. Биколорлы айналыстағы монеталар дизайнының стилистикасында шығыс және батыс мәдениеттерінің көркемдік элементтерінің үйлесімі көрініс береді»,- деп хабарлайды Ұлттық банк.
</blockquote>
Биколорлы айналыстағы монеталардың сипаты: Монеталардың сыртқы сақинасы нейзильберден жасалған, ішкі дискі никельді жезден дайындалған. Қыры тегіс және бедерлі секторлармен кезектесіп отыратын 16 ойықпен бедерленген.
Монеталардың сырт жағында орталық бөлігінде ҚР Мемлекеттік Елтаңбасы, айналдыра эмитент елді білдіретін «QAZAQSTAN RESPÝBLIKASY» деген жазба бейнеленген. Монетаның төменгі жағында соғылған жылын білдіретін «2020» деген жазу бар.
Монеталардың бет жағында (аверсінде) орталық бөлігінде номиналын білдіретін және номинал цифрының кескінін қайталайтын көлденең сызықтар бедері аясында орындалған «200» деген жазу бар. Монетаның жоғарғы және төменгі бөліктерінде – тік сызықтар түрінде орындалған ою-өрнек кескіндері. Монетаның төменгі бөлігінде – тарамдалған сызықтар аясында орындалған, ұлттық валютаның мәтіндік атауын білдіретін «TEŃGE» деген жазу. Монетаның сол жақ бөлігінде QAZAQSTAN ULTTYQ BANKI эмитент банкті білдіретін «QUB» аббревиатурасы бар. Монетаның оң жақ бөлігінде – Қазақстан теңге сарайының тауар белгісі (логотип) көрсетілген.
Техникалық сипаттамалары:
Металл құрамы: нейзильбер/нибрасс
Массасы: 7,5 грамм
Диаметрі: сыртқы сақинасы – 26 мм, ішкі дискі – 18,3 мм
Қалыңдығы – 1,90 мм
Қыры: 16 ойықтар.
Айта кету керек, номиналы 200 (екі жүз) теңгелік банкноттар заңды төлем құралы болып қалады және айналыстан табиғи тозу бойынша алынады.

Ұлттық банк 200 теңгелік монетаны айналымға шығарды

<a href="https://kyzylorda-news.kz/">Kyzylorda-news.kz.</a> Қызылорда облысында полиция қызметкерлері ауа-райының қолайсыз болуы салдарынан жолда қалып қойған 2602 жолаушыға көмектесті. Бұл туралы полиция департаментінің баспасөз қызметі хабарлады. &nbsp;&nbsp;
Бұрқасынға байланысты «Самара – Шымкент» тасжолының Қызылорда облысы Қармақшы ауданынан Ақтөбе облысының шекарасына дейінгі аралықта жолаушылар қатынасында қиындық туындады. Бұл аралықта барлық көлік құралының қозғалысына шектеу қойылды.
Полиция департаментінің қызметкерлері оқыс оқиғалардың алдын алу үшін тәулік бойы патрульдеу және бақылау жұмыстарын жүргізіп, күшейтілген кезекшілікке қызметін атқарды.
Нәтижесінде полицейлер 1356 көліктегі 2602 жолаушыға қол ұшын созды.
Полиция қызметкерлері оларды жақын маңдағы кешендерге жеткізіп, ыстық тамақпен қамтамасыз етті. Әртүрлі техникалық ақауға байланысты тұрып қалған автокөліктердің жүргізушілері мен жолаушыларына алғашқы көмек көрсетілді.

Қызылордада 1400-ге жуық көліктің жүргізушілері мен жолаушыларына көмек көрсетілді  (ВИДЕО)

<a href="https://kyzylorda-news.kz/">Kyzylorda-news.kz.</a> Биыл Қазақстанда халық санағы маусым және қазан айларында өтеді. Бұған мемлекеттік бюджеттен 8,2 млрд теңге жұмсалады.
Биыл елімізде өтетін жалпыұлттық санаққа Қазақстанның барлық азаматы қатысады. Сондай-ақ, шарадан өзге мемлекетте уақытша немесе тұрақты тұратын отандастарымыз да, керісінше, Қазақстанда уақытша немесе тұрақты түрде тұратын шетел азаматтары да шет қалмайды.
Бұл – Қазақстан тәуелсіздік алғалы бергі үшінші санақ. Оның бұрынғылардан ерекшелігі қандай және оған бөлінген қазына қаражаты қалай жұмсалады? Санаққа қатысушылар қанша және қандай сұрақтарға жауап береді? Бұл сұрақтардың жауабын <a href="https://informburo.kz/kaz/haly-sanayna-4-ay-aldy-azastandytar-anday-sratara-dayyn-boluy-kerek.html">іnformburo.kz</a> порталы әзірледі.
Халық санағы екі кезеңде өтеді
Үкіметтің 2010 жылғы 11 қазандағы Ұлттық санақтарды өткізудің ережелері мен мерзімдері туралы&nbsp;қаулысына&nbsp;орай, республика азаматтарын санау әрбір он жыл сайын жүргізілуі тиіс. Соған сәйкес, 2009 жылдан кейін былтыр өтуі тиіс есеп бір жылға шегерілген болатын.
Халық санағының кезеңдері:
<ol>
<li>1-30 маусым аралығы.&nbsp;Бұл мерзімде интервьюерлер әрбір елді мекендегі тұрғын және тұрғын емес үй-жайлардың мекенжайын, онда тұратын адамдардың нақты санын анықтайды. Сонымен қатар, әрбір ғимаратты жергілікті картаға енгізеді.</li>
<li>1-30 қазан аралығы.&nbsp;Санақтың алғашқы 15 күнінде интернет арқылы сауал жүргізілетін болса, онымен қатар интервьюерлер планшеттік компьютерді қолдану арқылы жаппай сауалнама жүргізеді.</li>
</ol>
Биылғы санақтың басты ерекшелігі қандай?
Бұл жолғы санақтың бұрынғыларынан басты ерекшелігі – қағазсыз, яғни, электронды форматта өткізіледі. Бұл үшін арнайы планшеттер сатып алынады. Яғни, қазақстандықтар науқан басталғаннан кейін, интернет арқылы ЖСН нөмірімен жеке деректерін санақ жүргізілетін сайтқа тіркейді. Әрмен қарай онлайн түрде қойылған сауалдарға жауап береді. Жеке деректер бірден планшеттерге енгізіліп, ақпарат онлайн түрде sanaq.gov.kz сайтына жіберіледі.
Мұндай тәсіл елден жырақта жүрген отандастарымыздың да санаққа қатысуына мүмкіндік береді. Интернет жүйесі арқылы мәлімет берген респондеттерге интервьюерлер сауалнама жүргізбейді. Статистика комитетінің өкілдері “интервьюер эффектінің” болмауы азаматтардың сұрақтарға қысылмай жауап беріп, мәліметтердің толық алынуына әсер ететінін айтады .
Ауыл халқы жалпыұлттық санаққа іліге ме?
Сауалнама түгелдей ақпараттық технологиялардың көмегімен жүзеге асады деп жоспарланғандықтан, ғаламторға қосылмаған ауылдардың тұрғындарының санаққа қатысуы алаңдатары анық. Дегенмен, шалғай елді мекендердегі тұрғындардың саны мен әл-ауқатын санақшылар дәстүрлі түрде үй-үйді аралап есептейді. Тек адамдардан алынған жауаптар бұрынғыша қағазға жазылмайды, санақ жүргізушінің қолындағы планшеттік компьютерге толтырылады.
Санақ қалай жүргізіледі?
Респонденттер өзі және отбасы мүшелері үшін онлайн режимде Sanaq.gov.kz сайтында санақ парақтарын толтыра алады. Бұл жүйе тәулік бойы қолжетімді болғандықтан, азаматтардың сауалдарға қалаған уақытында жауа беруіне болады. Сондай-ақ, сауалнаманы толтыруды уақытша тоқтатуға және ыңғайлы уақытта жалғастыруға мүмкіндік бар.
Ал мамандандырылған сайт респондентке санақ парақтарын толтыру барысында қажетті нұсқаулықтар мен әзір жауаптар ұсынады. Сондай-ақ, виртуалды көмекші сауалнаманы толтырып, санақтан өтуге жәрдем береді.
Айта кетейік, Sanaq.gov.kz сайты жақын күндері тест режимінде іске қосылады.
Санақ кезінде қандай сұрақтар қойылады?
Санақ кезінде азаматтардан барлық санат бойынша жауап алынады. Санақ парақтарында жалпы саны 65 сұрақ қамтылған. Онда отандастарымыздың жеке басына қатысты сауалдар мен ғимараттардың жай-күйі де жазылмақ. Респонденттер:
<ol>
<li>тұрғылықты жері;</li>
<li>білімі;</li>
<li>тілді меңгеруі;</li>
<li>сауаттылығы;</li>
<li>діні;</li>
<li>некелік жағдайы;</li>
<li>туу көрсеткіші;</li>
<li>жұмыспен қамтылуы;</li>
<li>еңбек өтілі;</li>
<li>денсаулық жағдайы;</li>
<li>мүгедектігі;</li>
<li>күнкөрістің негізгі қаражат көзі;</li>
<li>тұрмыс-тіршілігіндегі шектеулері туралы сұрақтарға жауап береді.</li>
</ol>
Бұл жолы мемлекет тек өз азаматтары туралы ғана емес, сондай-ақ, елімізде тұрақты тұрып жатқан, жұмыс істеп табыс табатын шетелдіктер жайлы да мәліметтерді жинайды. Сондықтан, 2009 жылғы санаққа қарағанда, сауалнама қағаздарында қосымша жаңа сұрақтар пайда болады.
Ең қызығы, биыл қазақстандықтардың тұрып жатқан үйі туралы мәлімет те тізімге алынады. Сауалдар тізімінде баспананың қай жылы салынғаны, көлемі, бөлме саны, абаттандырылуы және қабырғаларының қандай материалдан жасалғаны да сұралады. Санақ кезінде қойылатын сауалдармен алдын ала&nbsp;<a href="http://adilet.zan.kz/kaz/docs/V1800016692">мына жерден</a>&nbsp;танысуға болады.
Санақ жүргізуге 30 мың адам жұмылдырылады. Олар кімдер?
Халық санағын өткізу үшін 18 жастан асқан, ынталы, жауапты, мінезі ашық интервьюерлер іріктеледі. Олардың жұмыс өтілі мен кәсіби біліміне қатысты еш шектеу қойылмайды. Бастысы – планшеттік компьютерде жұмыс істей алатын, Қазақстан азаматы болуы тиіс. Олармен өтемелі қызмет көрсету шарты жасалатын болады. Шарт жасалғаннан кейін барлық жұмысқа тартылған санақ персоналы арнайы оқытудан өтеді. Статистика комитетінің мәліметінше, 2020 жылғы санақ барысында осындай 30 мыңға жуық адам уақытша жұмыс істейді.
Санақ жүргізушілерге қанша ақы төленеді?
Халық санағын өткізу кезінде санақ персоналымен көрсетілген қызметтерді толық көлемде орындағанда 1-кезең интервьюеріне –&nbsp;75 743 теңге,&nbsp;2-кезең интервьюеріне –&nbsp;94 697 теңге&nbsp;төленеді. Ал нұсқаушы-бақылаушыларға –&nbsp;113 614 теңге&nbsp;сомасында төлем көзделген. Еңбекақы өтеулі қызмет көрсету туралы шарт аясында төленбек.
Биылғы санаққа бөлінген қаржы қалай жұмсалады?
Ауқымды шараға&nbsp;8 млрд 211 млн теңге&nbsp;жұмсалады деп көзделіп отыр. Бұл қаржы келесі мақсаттарға жұмсалмақ:
<ul>
<li>3 756 млн теңге – санақ жүргізушілер қызметтеріне төлем;</li>
<li>1 086 млн теңге – 27 412 планшетті сатып алу;</li>
<li>933 млн теңге – “е-Статистика” интеграцияланған ақпараттық жүйені дамыту;</li>
<li>845 млн теңге – 653 жұмыс станциясын, жиһаздар, кеңсе тауарларын сатып алу, көлік пен орын-жай жалдау, байланыс қызметтері және өзгелер;</li>
<li>634 млн теңге – деректерді өңдеу, дайындау, жинақтарды тираждау және тарату;</li>
<li>475 млн теңге – 139 автокөлік құралдарын сатып алу;</li>
<li>356 млн теңге – іссапар шығыстары;</li>
<li>126 млн теңге – нұсқаулықтарды тираждау бойынша көрсетілетін қызметтерді сатып алу, картографиялық материалдарды дайындау.</li>
</ul>
Санаққа бөлінген 8 млрд теңге талан-таражға түспей ме?
Қазақстанда жалпыұлттық санақ бұған дейін екі рет,&nbsp;1999 және 2009 жылдары&nbsp;өткен еді. Соңғы науқанға қазынадан&nbsp;1,1 млрд теңге&nbsp;бөлініп, соның 700 млн теңгесі ұрланғаны ел есінде. Бұл қылмысқа сол кездегі Статистика комитетінің басшысы Анар Мешімбаева кінәлі деп танылып, ол 2014 жылы 7 жылға&nbsp;сотталған болатын. Даулы оқиғаны ұмытпаған белсенді қазақстандықтар “биылғы санаққа бөлінген қыруар қаржы мақсатты жұмсала ма?” деп алаңдаушылық&nbsp;білдіруде.
Осыған орай, Informburo.kz Статистика комитетіне “Санақ кезінде қаржы жымқыру дерегі қайталанбас үшін қандай шаралар қолға алынады және қаржының жұмсалуы бойынша халыққа есеп беріле ме?” деген сауал жолдады. Статистика комитеті басшылығы биыл мұндай қылмыстың қайталанбайтынына сенімді. Олардың жауабынша, барлық көрсетілетін жұмыстар мен сатып алынатын тауарлар мемлекеттік сатып алу порталы арқылы ашық түрде жүзеге асады. Әрі қаржының мақсатты жұмсалуын Қаржы министрлігі бақылауға алады. Ал, ауқымды шара аяқталғасын 8 млрд теңгенің қалай игерілгені туралы ақпарат Статистика комитетінің сайтында “Азаматтық бюджет” бөлімінде жарияланады.
Қазақстан халқының саны қанша?
2009 жылғы өткізілген санақ нәтижелері бойынша халық саны&nbsp;16 009 597 адамды&nbsp;құрады. 2019 жылғы 1 желтоқсандағы мәлімет бойынша халық саны&nbsp;18 611 095 адамға&nbsp;жеткен. Оның ішінде қалалықтар – 10875,7 мың (58,4%), ауылдықтар – 7735,4 мың адамды (41,6%) құрады. Этникалық құрамы бойынша халықтың 68,5%-ы қазақ, 18,9%-ы орыс, 1,4%-ы украин және қалған 11,2%-ы басқа ұлт өкілдері.
Санақ не үшін жүргізіледі? Оның нәтижесімен қайдан танысуға болады?
Мамандар санақ жүргізу арқылы тек халық санын ғана емес, отандастарымыздың тұрмыс-тіршілігіндегі кем-кетігін анықтауға болатынын айтады. Сондықтан, мұндай шараны өткізудің әлеуметтік-экономикалық маңызы зор.
<blockquote>
 “Біз қандай да бір зерттеу жасағанда Қазақстанның барлық азаматтарына сауалнама жүргізе алмаймыз. Тек ірі қала тұрғындарын ғана қамтимыз. Ал шалғайдағы ауыл халқының жағдайы сұралмайды. Сондықтан мұндай шара ретімен өткізіліп тұрғаны дұрыс. Санақ қорытындысы ғылыми қызметкерлерге, әлеуметтанушыларға, демографтарға және экономистерге зерттеу жасауға көмектеседі. Мемлекеттік органдар осы есептің негізінде қай өңірдің өмір сүру деңгейі төмен, қай облыста қай саланы дамыту керек деген сауалдарға жауап іздеп, дұрыс шешім қабылдауы керек”, – деді Тұңғыш президент қоры жанындағы Әлемдік экономика және саясат институтының сарапшысы Камила Ковязина.
</blockquote>
<img src="https://kyzylorda-news.kz/wp-content/uploads/2020/01/28sanak2.jpg" alt="" />

Халық санағына 4 ай қалды. Қазақстандықтар қандай сұрақтарға дайын болуы керек?

<a href="https://kyzylorda-news.kz/">Kyzylorda-news.kz.</a> «Қазгидромет» РМК 28 қаңтарға арналған ауа райы болжамын ұсынады.
Қазақстанның басым бөлігі циклон жырасының әсерінде болғандықтан құбылмалы ауа райы сақталады. Республика бойынша кей жерлерде көбінесе қар түрінде жауын-шашын жауады. Кей жерлерде тұман, көктайғақ, бұрқасын, желдің күшеюі күтіледі, оңтүстікте желдің екпіні 30 м/с және одан аса күтіледі.
Жамбыл облысының кей жерлерінде тұман, көктайғақ, жаяу бұрқасын күтіледі, желдің күші 15-20, екпіні 23-28 м/с күшейеді, оңтүстік-батыста 30 м/с және одан жоғары күтіледі.
Шығыс Қазақстан, Қарағанды, Алматы, Ақтөбе облыстарының кей жерлерінде тұман, бұрқасын күтіледі, желдің күші кей жерлерде 15-20, екпіні 23-28 м/с күшейеді.
Түркістан, Кызылорда, Атырау облыстарының кей жерлерінде тұман, көктайғақ күтіледі, жел 15-20 м/с күшейеді, Түркістан облысында кей жерлерде жаяу бұрқасын күтіледі.
Ақмола, Қостанай, Солтүстік-Қазақстан, Павлодар облыстарының кей жерлерінде бұрқасын күтіледі, жел 15-20 м/с күшейеді, Қостанай, Солтүтік Қазақстан облыстарының кей жерлерінде тұман түседі.
Батыс Қазақстан, Маңғыстау облыстарының кей жерлерінде тұман болады.

Сейсенбі күні ауа райы қандай болады

Мәліметтерді қорғау күні
Жеке мәліметтерді қорғау туралы конвенцияға сәйкес 28 қаңтар Мәліметтерді қорғау күні болып белгіленді. Бұл күнді өткізу мақсаты азаматтардың өздері туралы қандай мәліметтер не үшін жиналып жатқанынан хабардар ету болды. Бұл күн 2007 жылы белгіленді және алғаш рет аталып өтті.
1955 жылы&nbsp;Қазақ КСР халық әртісі Асқар Тоқпанов Құрманғазы атындағы Алматы мемлекеттік консерваториясы жанынан театр факультетін ашты, 1977 жылы оның базасында Алматы театр-көркемсурет институты ашылды.
1989 жылы&nbsp;Алматы мемлекеттік театр-көркемөнер институтына Қазақстанның тұңғыш халық ағарту комиссары, мәдениет пен өнерді дамытуға сүбелі үлес қосқан Темірбек Қараұлы Жүргеновтің есімі берілді. 1993 жылы Т. Жүргенов атындағы Алматы мемлекеттік театр-көркемөнер институты Т. Жүргенов атындағы Қазақ мемлекеттік театр және кино институты болып өзгертілді. Қазақстан Республикасы Үкіметінің 2000 жылғы 14 ақпандағы №236 қаулысына сәйкес, бұрынғы Қазақ мемлекеттік театр және кино институты мен Қазақ мемлекеттік көркемөнер академиясы негізінде Т.Қ. Жүргенов атындағы Қазақ мемлекеттік өнер академиясы құрылды.
1992 жылы&nbsp;Қазақстан Республикасы мен Корея Республикасы арасында дипломатиялық қарым-қатынас орнату туралы хаттамаға қол қойылды.
1993 жылы&nbsp;ҚР Жоғарғы Кеңесі тәуелсіз Қазақстан Республикасының тұңғыш Конституциясын қабылдады.
1994 жылы&nbsp;Шығыс Қазақстан облысының Абай ауданында ұлы Абайдың шәкірті, ақын Көкбай Жанатайұлы атындағы қор ашылды.
1994 жылы&nbsp;«Қазақстан-Заман» бірлескен қазақ-түрік газетінің базасында қазақ тіліндегі халықаралық тәуелсіз апталық – «Түркістан» газетінің бірінші нөмірі жарық көрді. Бірінші бас редакторы – Қазақстанның халық жазушысы Қалтай Мұхамеджанов.
2011 жылы&nbsp;Қазақстан Президенті Нұрсұлтан Назарбаев ҚР Парламенті палаталарының бірлескен отырысында «Болашақты бірге жасайық!» Жолдауын таныстырды.

28 қаңтар: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 28 қаңтарға арналған жұлдыз-жорамалы.
Тоқты
Өте маңызды іспен айналысасыз. Ең алдымен өз мақсатыңызға жетуді көздейсіз. Сондықтан өзге істерге назар аудармайсыз, уақыт жоғалтпайсыз. Жақындарыңыз сіздің ойыңызды қолдайтын болады.
Торпақ
Іскерлік байланыстарды нығайтуға, серіктес болуға қолайлы күн. Өзіңіздің тың идеяларыңызбен өзгелерді тез қызықтырасыз. Сонымен қатар ойыңызды қолдайтын, көмек көрсететін жандарды көпшілік ішінен қателеспей таңдайсыз.
Егіздер
Жоспарңызды жүзеге асыруға қолайлы күн. Бірақ барлығы оңайлықпен келмейді. Ол үшін біраз тер төгуге тура келеді. Бірақ қиын шаруаны қолға алғаныңызға еш өкінбейсіз. Өйткені барлығы қызықты өтеді, нәтижесі ойдағыдай болады. &nbsp;
Шаян
Бүгінгі күн сіз ойлағандай болмайды. Өзіңізге де, өзгелерге де пайдаңызды тигізесіз. Бірақ соңында барлығы көңіліңізді қалдыратын болады. Жан-жағыңызға көз салып, өзгелердің қателігінен сіз сабақ алатын боласыз.
Арыстан
Жұлдыздар сіздің жақта. Сондықтан ешкімге өкпе арта алмайсыз. Ешкімге ренжуге де хақыңыз жоқ. Өзіңіздің не қалайтыныңызды жақсы білесіз. Сондықтан қай тұста қателік жібергеніңізді де ішіңіз біледі.
Бикеш
Басқалар күйгелектікке салынып жатады. Ал сіз болсаңыз сабырлылық сақтап, өз күшіңізге сенетін боласыз. Өзгелердің жолы болмаған істі қолға алып, оны соңына дейін жеткізетін боласыз.
Таразы
Тәуекелшіл болыңыз. Біршама жетістікке жетуге мүмкіндік туып тұр. Бүгін жұлдыздар өз қорқынышын жеңе алған және жауапкершілікті өз мойнына арта алатын жандарды қолдайтын болады.
Сарышаян
Жұмыс жасауға қолайлы күн. Көптен бері жиналып қалған жұмыстарды аяқтауға мүмкіндік туып тұр. Жұмыс көп болғанымен оларды орындау барысында күніңіз қызықты өтетін болады. Жаңашылдыққа тез үйренесіз.&nbsp;
Мерген
Мазасыз күн болмақ. Бір уақытта бірнеше тапсырманы орындауға тура келеді. Олардың біршамасы ойламаған жерден пайда болуы мүмкін. Жаныңыздағы адамдар кейде сіздің көңіл-күйіңізді әдейі түсіреді.
Тауешкі
Айналыңыздағы адамдарды талантыңызбен таңқалдыратын боласыз. Бұрын сіздің біліміңізге күмән келтіргендер де «қол соғып», өздерінің іс-әрекеті үшін ұялатын болады. Жұмыс көп, бірақ сіз шаршамайсыз.
Суқұйғыш
Бос әңгіме көп. Бірақ олардың барлығы сізге ұнайтын болады. Әңгімелескен адамдарыңыз сізге жылулық сыйлайды. Бұрын қарым-қатынастарыңыз дұрыс болмаған жандармен тіл табысасыз.
Балықтар
Ісіңізді алға қарай жылжытуға көмек көрсететін жаңа серіктес табуға және жұмысыңызды жандандыруға қолайлы күн. Сіз кімге арқа сүйеуге болатынын, кімнен бойды алыс ұстау қажет екенін жақсы білесіз.
Аударған Динара МАХАНОВА

Қазақстан және Қызылорда облысының жаңалықтары: Қоғам