<a href="https://kyzylorda-news.kz/">Kyzylorda-news.kz</a>&nbsp; Құқықтық сауатты арттыру құр білім болып қалмайды. Бұл бағытта ҚАЖ департаментіне қарасты №68 мекемесі шаруашылық бөліміне қалдырылған жазасын өтеушілерді қолдау шараларын ұйымдастыруды үзген емес. «Жігер» Қызылорда облыстық мүгедектерінің қоғамдық қорымен бірлесе отырып, келелі кездесу өткізгені сөзімізге тұздық.Яғни, жазасын өтеуші азаматтарға заңға енгізілген өзгерістер бойынша түсіндірме жұмысы жүргізіліп, өзекті сұрақтарға жауап та берілді. Пайдалы кеңестің соңы мерекелік көңіл-күйге ұласқаны тағы бар. Ұлыстың ұлы күнінде ұлттық ойындардан сайыс өткізгені ұтымды шешім.Сайыс барысында әрқайсысы қабілеті мен шеберлігін көрсете білді. Ал, нәтижесі бойынша жеңімпаздар марапатталып, қор атынан арнайы сыйлықтар тарту етілді. Игілікке иек артқан мұндай бастамалар тұралап қалмауға негіз.

Сауат һәм сайыс: Мерекедегі мәнді іс-шара

<a href="https://kyzylorda-news.kz/">Kyzylorda-news.kz</a>&nbsp; Көшпенді өмір салтын ұстанған қазақ халқы үшін спорт күш сынасу ғана емес, рухани мұраның ажырамас бөлігі. ҚАЖ департаментіне қарасты №68 мекемесі Наурызнама күндерін атап өтуде кейін тартпады. Мәселен, ұлттық спорт күнінде шаруашылық бөліміне қалдырылған жазасын өтеушілерге облыстық спорт басқармасымен бірлесе отырып спорттық сайыс өткізілді.Сайыс барысында арқан тартыс, ләңгі тебу, турникке тартылу және гір көтеру сияқты спорт түрі қамтылып, қатысушылар өздерінің ептілігі мен күш-қайратын көрсете білді. Әрбір ойын тартысты өтіп, топтар арасындағы өзара қолдау да байқалды.Ұйымдастырылған іс-шараның басты мақсаты – жазасын өтеушілердің бос уақытын тиімді өткізу, ұлттық құндылықтарды насихаттау және салауатты өмір салтын қалыптастыру. Әрі олардың рухани және физикалық дамуына ықпал етері айтпасақ та түсінікті.

Наурызнама: күш пен жігер сыналған сәт

23 наурызда Тазару күнінде Мемлекет Басшысының «Таза Қазақстан» экологиялық бастамасы аясында бүкіл ел бойынша ауқымды экологиялық акциялар басталды.Қазақстандағы экологиялық күн тәртібі мемлекеттік саясаттың да, қоғамдық күнделікті өмірдің де бір бөлігіне айнала отырып, өзектілігін арттыруда. «Таза Қазақстан» бүкіл ел бойынша мыңдаған азаматтарды біріктіреді.«Жаңару күні», «Таза ел біздің қолымызда», «Таза Қазақстан – жаңарған болашақ», «Табиғатқа тағзым» сияқты экоакциялары өтті, «Мөлдір бұлақ», «Таза Жайық» акциялары өткізілді, «Өзіңнен баста», «Ақ ниет толқыны», «Тазару күні» т.рлі іс-шаралар өткізілді. Аумақты тазарту бойынша өткізілген акция қорытындысы бойынша 2,7 тонна қоқыс жиналды, 87 мың адам қатысты.Қазақстандықтардың ауқымды экологиялық акцияларға қатысуы табиғатқа қамқорлық жасау мемлекеттің, бизнестің және барлық азаматтардың ортақ міндеті екенін көрсетеді. Бұл жеке тазалау немесе экологиялық іс-шаралар туралы ғана емес, сонымен қатар тазалық, ресурстарға ұқыпты қарау және қоршаған ортаға жауапкершілік өмір сүру нормасына айналады.Бұл қағидаттар Конституция деңгейінде көрініс тапты және бекітілді, яғни олар ел үшін ерекше маңызға ие. Енді таза, қауіпсіз және абаттандырылған орта — бұл жай ғана тілек емес, барлығы үшін маңызды нұсқаулық.Өскелең ұрпақтың бойында экологиялық сананы қалыптастыруда «Таза Қазақстан» – Мемлекет басшысының бастамасымен бір реттік іс-шаралар шеңберінен шығып, экологиялық мәдениетті және азаматтардың қоршаған ортаның жай-күйі үшін жеке жауапкершілігін қалыптастыруға бағытталған ауқымды қозғалысқа айналған экологиялық акция үлкен рөл атқарды.Наурыз-рухани тазару мен жаңару уақыты. Наурызнамды мерекелеу аясында бүгін Тазару күні – жаңару символы және қоршаған әлемге саналы көзқарас атап өтілетіні қуантады.

Қазақстанда Тазару күні өтті

«AMANAT» партиясының «Кітап–AMANAT» партиялық жобасы аясында «Еңбектегі ерлігі үшін» медалінің иегері, «Сырдария ауданының Құрметті азаматы» Нұрпейіс Сағиұлының авторлық кітабының тұсаукесер рәсімі мен таныстырылымы ұйымдастырылды.Тағылымы мол іс-шараға «AMANAT» партиясы Сырдария аудандық филиалының Атқарушы хатшысы, аудандық мәслихат депутаты Ақтөре Ибрагимұлы, аудандық ардагерлер кеңесінің төрағасы, «Сырдария ауданының Құрметті азаматы» Мұса Келдібаев бастаған зиялы қауым өкілдері мен ел ағалары, аудандық мәдениет және тілдерді дамыту бөлімінің басшысы Анар Қалдыбаева, аудандық «Тіршілік тынысы» газеті бас редакторының орынбасары, Қазақстан Журналистер одағының мүшесі Балтабай Ордабеков аудандық кітапхана қызметкерлері қатысты.Кітап авторы, «Еңбектегі ерлігі үшін» медалінің иегері, «Сырдария ауданының Құрметті азаматы» Нұрпейіс Сағиұлы жиналғандарға кітап шығару идеясы, оны жүзеге асыру жолындағы ізденістер, Назар бабаның тарихы, атқарған қызметтері туралы кеңінен айтып өтті.– Аллаға мың да бір шүкір, қазір жасым тоқсанға таяп қалды. Ұл­қыз өсіріп, ұр­пақ өрбітіп, немере-­шөбе­релерімнің қызығына кене­ліп, ағайын­-туыстың орта­сында құрметке ие болып отырмын. Өмір – адамға бір­ақ рет берілетін үлкен сый, баға жетпес құндылық. «Осы өмірді қалай өткіздім?» деген сұраққа үңіліп, әрі Назар бабам туралы жазайын деп қолыма қалам алдым. Өмірім, ата­-бабамыздың ата­қонысы болған қасиетті Бидайкөл, ба­лалық шағым, жастық кезеңім, азамат болып қалыптасқаным, еңбекке ара­ласқаным, алғашқы жетістіктерім мен бағындырған белестерім көз алдымнан киноның лентасындай сырғып өтті. Жақсы да болған, қиындықпен де бетпе­ бет келген кездер баршылық, әрине. Түрлі оқиғаларға, бақытты сәттерге толы шақтар да көп екен. Сондықтан тоқ­сан жылға жуық өмірімнің бір өрнегі, тағдырымның тағылымы, ғұмырымның ғибраты болсын деп осы кітапта бәрін кеңінен баяндап жазуды жөн көрдім. Кітапта негізінен Назар бабамыз бен ұрпақтары туралы жазылған және ауданның тарихы да қамтылған. Кітап көпшілік қауымға арналады, – деді Нұрпейіс Сағиұлы.Өз кезегінде аудандық ардагерлер кеңесінің төрағасы, «Сырдария ауданының Құрметті азаматы» Мұса Келдібаев, аудандық мәдениет және тілдерді дамыту бөлімінің басшысы Анар Қалдыбаева сөз сөйлеп, тарихи-танымдық мәні зор, тағылымы мол туындыны жоғары бағалап, аудандық кітапхана арқылы кітапты оқырман қауымға насихаттау жұмыстары жүргізілетінін жеткізді. Сонымен қатар ел ағалары Ғалым Уәлиев пен Уәлихан Ахметов пікір білдіріп, бабалар аманаты өскелең ұрпаққа үлгі-өнеге екенін айтты.Кітаптың тұсаукесер рәсімі мен таныстырылымы өткізілгеннен кейін өткеннің бүгінге, бүгіннің болашаққа аманат сөзін арқалаған туынды кітапхана ұжымына, оқырман қауымға ұсынылды. Ел ағалары ақ батасын беріп, тектілік, адал еңбек, бірлік, ынтымақ секілді ұлттық құндылықтарымыз жөнінде орнықты ойлар мен пайымды пікірлер ортаға салынды.

Кітап–AMANAT: жаңа кітаптың тұсаукесері және таныстырылымы ұйымдастырылды

Облыс әкімі Нұрлыбек Нәлібаев, зиялы қауым өкілдері, мемлекеттік мекемелер қызметкерлері және экобелсенділердің &nbsp;қатысуымен «Таза Қазақстан» бағдарламасы аясында «Мөлдір бұлақ» атты ауқымды экологиялық акция өтті. &nbsp;Бұлақтар мен жағалау аумақтары тазартылып, оған 16 000-нан астам адам қатысты, 425 тоннадан астам тұрмыстық қалдық шығарылды. Сонымен қатар, 140-тан астам арнайы техника жұмылдырылып, жұмыстың сапалы әрі жедел орындалуына мүмкіндік жасалды. Өңірдің барлық ауданында Сырдария өзенінің жағалауы, Арал ауданындағы "Ақеспеде", Жаңақорған ауданындағы «Қайнарбұлақта» табиғи су көздері тазартылып, &nbsp;маңы абаттандырылды.Жалпы бұлақтар су ресурстары тапшы аймақтар үшін баламалы су көзі ретінде ерекше маңызға ие. Осындай игі бастамалар табиғатты қорғаудағы ортақ жауапкершілікті арттырып, экологиялық мәдениетті қалыптастыруға сүбелі үлес қосады.Айта кету керек, аймақта «Таза Қазақстан» республикалық экологиялық бағдарламасы аясында санитарлық тазалық, абаттандыру, тұрғындардың өмір сүруіне қолайлы жағдай жасау бағытында кешенді жұмыс атқарылуда. Бюджет қаражатынан бөлек, кәсіпкерлердің демеушілігі есебінен &nbsp;демалыс орындары, балалар ойын және спорт алаңдары, қоғамдық кеңістіктер кезең-кезеңімен қайта жаңғыртылып, тұрғын үйлер мен әлеуметтік нысандар заманауи талаптарға сай жөндеуден өткізілуде.Соңғы жылдары бюджет және демеушілік қаражаты есебінен Қызылорда қаласындағы орталық алаң, қалалық мәдени-демалыс паркі және Қорқыт ата сквері қайта жаңғыртылып, тұрғындар игілігіне берілді. Сонымен қатар, жуырда &nbsp;Президент саябағы қайта салынып ашылды.Ауылда қолайлы өмір сүру ортасын қалыптастыру және тұрғындарды тазалық мәдениетіне ынталандыру мақсатында жыл сайын «Үлгілі елді мекен» конкурсы ұйымдастырылып келеді. Аталған жобаға соңғы үш жылда 2 млрд 64 млн теңге бөлініп, үздік деп танылған елді мекендерге 67 арнайы техника табысталды.Тұрмыстық қатты қалдықтарды тиімді басқару, &nbsp;сұрыптау, өңдеу және кәдеге жаратуда «Жасыл даму» АҚ қаржыландыруымен 9 жоба қолға алынған. Жаңақорған ауданында қатты тұрмыстық қалдықтарды сұрыптау кешені толық қаржыландырылып, қажетті құрал-жабдықтары жеткізілді. Қазір нысанды іске қосу жұмыстары жүргізілуде. Қалған 8 жобаны «Өнеркәсіпті дамыту қоры» &nbsp;сараптамадан өткізіп, қаржыландыру үшін тиісті келісім-шарттар жасалуда.Бұдан бөлек, облыстық бюджет есебінен 475 млн теңгеге Сырдария ауданында сұрыптау кешені бар қатты тұрмыстық қалдықтар полигоны салынып, іске қосылды.<img src="https://knadmin.beoblood.kz/uploads/Ekologicheskaya_akcziya_M_ldir_b_la_v_Kyzylorde0_300721fef4.jpg" alt="Экологическая акция «Мөлдір бұлақ» – в Кызылорде0.jpg">

Қызылордада ауқымды экологиялық акция ұйымдастырылды 

Наурыз мерекесінде Парламент Сенаты мен Мәжілісінің депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаев жақында ашылған Президент саябағына барды. Қала тұрғындары мен қонақтарының &nbsp;демалысын, бос уақытын тиімді өткізуі үшін қайта салынған саябақ алыстан көз тартады.&nbsp; Мұнда заманауи субұрқақтар, амфитеатр, спорт, ойын, би, шахмат, баскетбол, футбол алаңдары, биіктігі 50 метрлік айналмалы шолу дөңгелегі, велосипед және жүгіру жолақтары, санитарлық пункттер орнатылған. Жалпы 31 гектарға 2 мыңнан астам ағаш, 50 мыңнан астам сәндік бұта және 17 түрлі көпжылдық гүл егілді.Сонымен қатар бұл аумақта бірқатар ірі жоба қолға алынған. Атап айтқанда, 300 орындық заманауи балалар лагері, &nbsp;Ботаникалық білім беру орталығы, тоғыз қабатты 15 тұрғын үй, 200 төсектік жаңа перинаталдық орталық салынуда. Алдағы уақытта жаңа драма театр мен заманауи Президенттік кітапхананың құрылысы басталмақ.<img src="https://knadmin.beoblood.kz/uploads/FB_IMG_1774326026116_ab6d491f1e.jpg" alt="FB_IMG_1774326026116.jpg">

Парламент депутаттары Президент саябағына барды 

Қымбатты отандастар!Бүгін «Тазару күніне» орай еліміздің әр түкпірінде «Таза Қазақстан» жалпыұлттық жобасының жаңа кезеңіне жол ашатын ауқымды экологиялық акция басталды.Бұл – Наурызнама онкүндігінде айрықша орын алатын күн. Қоғамымыздың жаңғыруы күллі табиғаттың жаңаруымен тұспа-тұс келіп отыр. Уақыт пен іргелі өзгерістердің осылай үндесуі баршамызға Отанымыздың игілігі жолында аянбай еңбек етуге айрықша күш-жігер беретіні сөзсіз.Республика аумағында «Мөлдір бұлақ» бастамасын жаппай жүзеге асыру қолға алынды. Бұл жоба аясында бұлақтардың көзін ашып, тал егу, жағалаулар мен су айдындарын, аулалар мен саябақтарды тазалау жұмыстары жалғаса береді.Наурыз мейрамы кезінде қабылданған Жаңа Халық Конституциясында азаматтарымыздың табиғатқа қамқорлықпен қарауы ұлттық дүниетанымымыздың басты қағидатының бірі ретінде айқындалған.Жаңа Халық Конституциясы ел бірлігінің арқауы, рухани және құқықтық бағдарымыз әрі Тәуелсіздігіміздің мызғымас тұғыры болатыны күмәнсіз.Ата заңымыз қоғамда дүниетанымымыз бен бітім-болмысымыздың өзегі саналатын ынтымақ, жауапты әрі жасампаз отаншылдық, сондай-ақ «Таза Қазақстан» құндылықтарын қалыптастырады.«Таза Қазақстан» идеологиялық тұжырымдамасының түпкі мәні көшелерді, аулаларды және айналамызды таза ұстаудан ғана емес, Қазақстан азаматтарының әл-ауқатын арттыруға бастайтын ниет пен пейілдің тазалығынан көрініс табады.Отандастарымызды Тазару күнімен құттықтаймын!Қазір табиғат игіліктерін ұқыпты пайдалану және саналы тұтыну жолын таңдаған азаматтарымыздың саны артып келеді. Бұл – жарқын болашағымызға кепіл болатын игі үрдіс.Мен бүкіл халқымызды тазалық пен тәртіп эстафетасына белсене қатысуға шақырамын.Бәріміз күш біріктірсек, елімізді биік белестерге жетелеп, Әділетті, Таза, Өркендеген Қазақстанды құра аламыз.Баршаңызға амандық және бақ-береке тілеймін!Фото: t.me/aqorda_resmi

Мемлекет басшысы Қасым-Жомарт Тоқаевтың үндеуі

Фото: Қызылорда қаласы Бүгін Қызылорда қаласында Наурызнама онкүндігі аясында «Тазару күніне» орай «Елін сүйген – ерлік жасайды» атты экологиялық акция кең көлемде ұйымдастырылып, мазмұнды әрі тағылымды сипатта өтті. Туған жерге деген сүйіспеншілік пен азаматтық жауапкершілікті ұштастырған бұл игі бастама өзінің мән-маңызымен ерекшеленді. Шара барысында облыс орталығындағы Тағзым алаңында ағаш отырғызу рәсімі ұйымдастырылды. Ұрыс даласының ардагерлері, азаматтық қоғам, зиялы қауым өкілдері, жастар мен еріктілер бірлесе отырып, туған өлкенің көркеюіне өз үлестерін қосты. Көшет отырғызу – табиғатқа жанашырлықтың, келешек ұрпаққа жасыл мұра қалдырудың жарқын үлгісі ретінде көпшілікке өнеге болды. Бұл бастама ел болашағына бейжай қарамайтын азаматтардың ортақ жауапкершілігін айқындай түсті. Іс-шараға облыс әкімінің орынбасары Мейрамбек Шермағанбет арнайы қатысып, жиналған жұртшылықты мерекемен құттықтады. Облыс әкімінің орынбасары өз сөзінде:– «Тазару күні» – тек қоршаған ортаны ретке келтіру емес, бұл – қоғам санасының жаңаруына бастайтын маңызды қадам. Бүгін отырғызылған әрбір көшет – болашаққа деген сенім мен туған жерге деген шынайы сүйіспеншіліктің белгісі. Табиғатты аялау – баршамызға ортақ міндет. Сондықтан тазалықты бір күндік науқан емес, күнделікті өмір салтымызға айналдыруымыз қажет», – деп атап өтті Мейрамбек Зинабдинұлы.Сонымен қатар, акция аясында тұрғындар арасында ұлттық және бұқаралық спорт түрлерінен жарыстар ұйымдастырылып, арқан тарту, асық ату секілді дәстүрлі ойындар ойнатылды. Бұл өз кезегінде салауатты өмір салтын насихаттап қана қоймай, көпшіліктің белсенді қатысуына серпін берді. Мерекелік көңіл-күйді арттыру мақсатында жиналған қауымға ұлттық тағам – наурыз көже таратылып, ізгі тілектер айтылды. Жалпы, «Тазару күніне» орай өткен «Елін сүйген – ерлік жасайды» атты экологиялық акция ел бірлігін нығайтып, қоғамда тазалық мәдениетін қалыптастыруға бағытталған маңызды бастамалардың бірі ретінде айқын көрініс тапты. Осындай мазмұнды шаралар туған жерге жанашырлықты арттырып, келешек ұрпаққа таза әрі жайлы орта қалдыру жолындағы игі істердің жалғаса берерінің дәлелі.

Тазалық пен жасылдыққа негізделген игі бастама

Фото: Белкөл кенті Бүгін Қызылорда қаласында «Таза Қазақстан» экологиялық акциясы аясында қала кіреберісіндегі Белкөл кентінің маңында экологиялық іс-шара ұйымдастырылды. Оған 300-ге жуық орман шаруашылығы және облыстық табиғи ресурстар және табиғат пайдалануды реттеу басқармасы мен қала әкімдігіне қарасты мекеме қызметкерлері қатысып, 5000 түп үйеңкі, қараағаш, терек және катальпа ағаштарының көшеттерін отырғызды.Акцияға облыс әкімінің орынбасары Б. Жаханов, облыс әкімі аппаратының басшысы Ә. Мұхамедияров, қала әкімі Н. Ахатов және басқа да мемлекеттік мекеме басшылары қатысты. Қатысушылар жасыл желекті көбейту, қаланың көркін жақсарту және табиғатты қорғау бағытындағы өздерінің үлесін қосты. Облыстағы орман өсіру мен көгалдандыру жұмыстары үшін орман шаруашылығы мекемелерінде 191,5 гектар (158 га уақытша, 33,5 га тұрақты) жерге тұқымбақтар ұйымдастырылған. Сол тұқымбақтарда стандартқа жеткен 300 мың дана саялы ағаш көшеттері өсірілуде. Сонымен қатар, ағымдағы жылы «Қорқыт ата» әуежайы жолының бойына 20 гектар алаңға 4300 дана алма ағашының көшеттерін отырғызу жоспарланып отыр. Мұндай экологиялық бастамалар Қызылорда қаласында жасыл желекті көбейтіп қана қоймай, тұрғындарға табиғатқа қамқорлық жасауға үлгі болып отыр.

Қызылордада «Таза Қазақстан» акциясы аясында мыңдаған ағаш көшеттері отырғызылды

<a href="https://kyzylorda-news.kz/">Kyzylorda-news.kz</a>&nbsp; Көне тарихқа көз жүгіртсек, тұлпардың тұяғы шаңды көтерген, ұлы даланы дүбірге бөлеген ұлттық спорттың тамыры тереңде екенін білеміз. Демек, мұның Наурызнамаға арнайы күн болып бекітілгені бекер емес. ҚАЖ департаментіне қарасты №68 мекемесінің жеке құраммен жұмыс жөніндегі тобының ұйымдастыруымен спорттық сайыс өтіп, қызметкерлер өзара бақ сынасты.Ұлттық ойынды ұлықтауды мақсат еткен іс-шараның шымылдығы Әнұранмен ашылды. Содан соң мекеме бастығының тәрбие жұмыстары жөніндегі орынбасары әділет майоры Тұрымбетов Мирамбек Ұзақұлы айтулы күннің маңызын атап өтіп, қатысушыларға сәттілік тіледі.Қызметкерлер қол күресу, ләңгі тебу, арқан тартыс және гір көтеру бойынша сынға түсті. Тартысты додада тартынбағаны олардың табандылығын айғақтағандай. Темірдей төзімділік танытқан қызметкерлердің жүзінен қайсарлық пен сенім анық сезілді. Сондықтан, жігер жеңісті жақындата түсті десек қателеспейміз.Сайыс қорытындысында намысты қолдан бермей, үздік нәтиже көрсеткен қызметкерлер марапатталды.Бұл спорттық іс-шара – ұлт мұрасын дәріптеумен қатар, ұжым арасындағы бірлікті нығайтып, салауатты өмір салтын насихаттауға үлкен серпін бергені сөзсіз.

Наурызнама: Мекеме қызметкерлері спорттық сайыста бақ сынасты

<a href="https://kyzylorda-news.kz/">Kyzylorda-news.kz</a> Туған жер – әр адамның өміріндегі ең қастерлі ұғымның бірі. Адам баласы қайда жүрсе де, қандай биікке көтерілсе де, өзінің туған жерін ешқашан ұмытпайды. Себебі туған жер – адамның балалық шағы, алғашқы қадамы, алғашқы қуанышы мен алғашқы арманы басталған қасиетті мекен.Туған жер адамға тек өмір сыйлап қана қоймайды, сонымен бірге оның мінезін, дүниетанымын, болмысын қалыптастырады. Сол жерде естіген бесік жыры, көрген табиғат, араласқан адамдар – бәрі адамның жүрегінде мәңгі сақталады. Сондықтан туған жерді сүю – адамның табиғи сезімі ғана емес, ол – рухани міндет.Қазақ халқы ежелден туған жерді ерекше қастерлеген. «Ел іші – алтын бесік» деген сөз де осының айғағы. Әрбір ауыл, әрбір аймақ өз перзенті үшін ыстық. Туған жерден алыста жүрген адам әрдайым сағыныш сезімін бастан кешіреді. Ол сағыныш адамды өз тамырына қайта оралуға жетелейді.Туған жер тақырыбын терең жырлаған ақындардың бірі – Мағжан Жұмабаев. Оның шығармаларында туған елге, жерге деген махаббат ерекше сезіммен суреттеледі. Мағжан Жұмабаев: «Туған жер – адам жанының тұнығы» деген ойға сай келетін өлеңдерінде ел мен жердің киесін, оның адам өміріндегі орнын биік қояды. Оның өлеңдерінен туған жерге деген шексіз махаббат пен сағыныш сезімі айқын көрінеді.Қазіргі заманда адамдар үлкен қалаларға көшіп, шетелдерге барып білім алып, жұмыс істеп жүр. Бірақ қайда жүрсе де, туған жердің орны бөлек. Өйткені туған жер – адамның рухани тірегі. Ол адамға күш береді, жігер береді, өмірге деген сүйіспеншілігін арттырады.Жастар үшін туған жерді сүю тек сезіммен шектелмеуі керек. Оны дамыту, көркейту, қорғау – әр азаматтың борышы. Білім алып, елге пайдасын тигізу, туған жердің дамуына үлес қосу – нағыз патриоттықтың белгісі. Әрбір жас өз жерін жақсы көрсе, сол елдің болашағы да жарқын болады.Туған жер – адамның жүрегіндегі ең ыстық мекен. Ол адамды тәрбиелейді, өсіреді және өмір бойы бірге жүреді. Туған жерін сүйген адам ғана өз елін де шынайы сүйе алады.Назым Әбілхай,Қорқыт ата атындағы Қызылорда университетінің 4-курс студентіФото: ҚР Ауыл шаруашылығы министрлігі&nbsp;

Туған жер – жүректің мәңгілік мекені

Ұлыстың ұлы күнінде Парламент Сенаты мен Мәжілісінің депутаттары Руслан Рүстемов, Мұрат Әбенов, Мархабат Жайымбетов, Мұрат Ергешбаев жақында ғана пайдалануға берілген сол жағалаудағы тұрғын үйлерге барды. Депутаттар жаңа пәтер алған тұрғындардың қонысына құтты болсын айтты. Жылдар бойы кезекте тұрып, жаңа үйге қол жеткізген қызылордалықтардың &nbsp;қуанышында шек жоқ.&nbsp; Мереке қарсаңында &nbsp;табысталған 10 тұрғын үйді «Интегрострой», «Орион ЛТД», «Техоснастка-ремсервис», «Асар», «Авангард ПГС», «Аман құрылыс» және «Промстройсервис Е» серіктестіктері салған. Баспана кезегінде тұрған 400 отбасы әз Наурызды жаңа қоныста қарсы алуда.&nbsp; Өткен жылы 2 477 пәтерлік тұрғын үй салуға бюджеттен 36 млрд. теңге қаралса, биыл кезекте тұрған азаматтарға 2 400 пәтер табыстау үшін 55 млрд. 600 млн. теңге жоспарланған. Соңғы жылдары қаламызда заманауи жаңа дизайнмен жеті, тоғыз және он екі қабатты тұрғын үйлер бой көтеріп келеді.<img src="https://knadmin.beoblood.kz/uploads/FB_IMG_1774238483644_068b8c0627.jpg" alt="FB_IMG_1774238483644.jpg">

Қазақстан және Қызылорда облысының жаңалықтары: Қоғам