<a href="https://kyzylorda-news.kz/">Kyzylorda-news.kz</a>.&nbsp; Қызылорда гарнизонының әскери бөлімдерінде жазғы оқу кезеңінің жауынгерлік әзірлік жоспарына сәйкес барлық санаттағы әскери қызметшілермен мамандық бойынша даярлық сабақтары өтуде.
Аталған дайындық сабақтары биылғы маусым айының соңына дейін жалғасады. Әскери бөлімдерде оқу топтары құрылып, тәжірибесі жоғары аға-нұсқаушылар жұмылдырылды. Дәрістердің жоғары дәрежеде өтуі үшін оқу орындары қажетті оқу-материалдық базамен қамтамасыз етілді.
Дайындық сабақтарының басты мақсаты – әскери қызметшілердің өз мамандықтары бойынша білім деңгейлерін, функционалдық міндеттерін арттыру және штаттық қару-жарақтан атуға, штаттық байланыс құралдарымен жұмыс істеуге машықтандыру.
<blockquote>
 «Қарулы Күштерімізде өз жұмысын толық білетін, тәжірибелі әскери мамандарымыз жетерлік. Мамандық бойынша сабақтар жоспарға сай, әрі сапалы өткізілуде. Осы аралықта әскери қызметшілерге қару-жарақ пен әскери техниканың материалдық бөлігін жоғары дәрежеде игеру, оқу-жаттығулар кезінде оларды пайдалану тапсырмалары қойылды», – деді әскери бөлім командирінің жауынгерлік дайындық жөніндегі орынбасары подполковник Нұрлан Шегебаев.
</blockquote>
Атап айтсақ, дайындық кезінде оқу-жаттығу алаңдарында өткізілетін тәжірибелік сабақтарға ерекше көңіл бөлінеді. Дайындық сабақтарының соңғы бөлігінде мамандық бойынша алған білімдерін анықтау мақсатында жеке құраммен оқу пәндері бойынша бақылау сабақтары мен сынақтар өткізілетін болады.

Нұрлан Шегебаев: Тәжірибелі әскери мамандарымыз жетерлік

<a href="https://kyzylorda-news.kz/">Kyzylorda-news.kz</a>.&nbsp;Анкарада түбі бір түркі елдері тәуелсізідігінің 30 жылдығына арналған концерт өтті.
Түркі тектес елдері тәуелсізідінің 30 жылдығы Анкарада тойланды. Халықаралық ТҮРКСОЙ ұйымының ұйытқы болуымен Түркия Президенті симфониялық оркестрі залында концерт ұйымдастырылды.
Мәдени шараға ТҮРКСОЙ ұйымының бас хатшысы Дүйсен Қасейінов, Түркияның мәдениет және туризм министрлігінің өкілдері, дипломатиялық миссияның басшылары қатысты.
Алғашқы болып Сүйінбай атындағы Алматы облыстық филармониясының жеке дауыстағы әншісі Бейбіт Мұсаев қазақтың домбырасын күмбірлетті. Кейін ұлттық аспаптармен бауырлас елдердің танымал әндері орындалды.
Қазақстан, Әзербайжан, Қырғызстан, Түркменстан және Өзбекстанның танымал дирижерлері онлайн форматта концерт беріп, көпшіліктің қошеметіне бөленді.

Тәуелсіздікке 30 жыл: Түркі елдерінің мерекелік концерті өтті

<a href="https://kyzylorda-news.kz/">Kyzylorda-news.kz</a>. ЮНИСЕФ «Еріктілер» бағдарламасы аясында Қорқыт Ата атындағы Қызылорда&nbsp; университетімен жұмыс істемек.&nbsp;
ЮНИСЕФ-тің Қазақстандағы өкілі Артур ван Дизен&nbsp; Қорқыт Ата атындағы Қызылорда университетінің ректоры Бейбіткүл Каримовамен кездесті. Басқосуда Артур ван Дизенге 85 жылдық тарихы бар университеттің тыныс-тіршілігі, алға қойған мақсат-міндеттері туралы таныстырылды.&nbsp;
<blockquote>
 ЮНИСЕФ ұйымы 75 жылдан бері әлемнің түкпір-түкпірінде жұмыс істейді. Ұйымның 190 елінде өкілдігі бар. 6 млрд доллар қаржысы бар ұйым Қазақстандағы балалардың өмірін жақсарту мақсатында әр өңірді аралап, зерттеу жүргізуде. Артур Ван Дизен әлеуметтік саясат саласында, қолданбалы әлеуметтік зерттеулерде, мониторинг пен бағалауда және бағдарламаларды басқаруда 25 жылдан астам тәжірибесі бар. Іскерлік кездесу көптеген жобаның жүзеге асуына себепші болды. Алдағы уақытта ЮНИСЕФ ұйымымен бірлесе отырып&nbsp;бірнеше жобаны жүзеге асыруды жоспарлап отырмыз, – дейді университет ректоры Бейбіткүл Сәрсемханқызы.
</blockquote>
ЮНИСЕФ үшін инновация, жас адамдардың дағдыларын дамыту мен гендерлік теңдікті ілгерілету аса маңызды. Осы орайда UniSat наноспутниктерін әзірлеу бойынша қыздарға арналған білім беру бағдарламасына университеттің&nbsp;ғылым, технология, математика, инженерия&nbsp;бағыттарында білім алатын студенттерді қатыстыру жоспарлануда. Сонымен қатар&nbsp;өңірдегі экологиялық мәселелерді шешу бағытында да бірқатар жоба&nbsp;талқыланды.
<blockquote>
 Біз экология, қоршаған орта және оның балаға әсері туралы әңгімелестік. БҰҰ-ның «Еріктілер» атты бағдарламасы жүйелі жұмыс істеп, өз нәтижесін беруде. ЮНИСЕФ Қазақстанда 9 000-нан аса волонтермен жұмыс істейді. 2020 жылы Қазақстандағы балалар мен қауымдастықтарды қолдау үшін волонтерлар ретінде жастарды тарту бойынша өзінің алғашқы бағдарламасын бастады. Алдағы уақытта Қорқыт Ата атындағы Қызылорда университетінің студенттерін бағдарламаға қосуға ұсыныс айттым. Университет мұражайын аралап, қосымша мәлімет алдым. Қызылорданың Астана болғанын, Арал теңізінің ғасырлар бойы өзгеріске ұшырай отырып, сақталу бағытындағы тарихи деректермен таныстым. Білім-ғылым саласы өзіме жақын болғандықтан университет тарихымен танысу мен үшін маңызды болды, – дейді ЮНИСЕФ-тің Қазақстандағы өкілі Артур ван Дизен.
</blockquote>
<a href="https://baq.kz/news/othernews/kyzylorda-universiteti-men-yunisef-birlesip-zhobalar-iske-asyrmak/">Baq.kz</a>

Қызылорда университеті мен ЮНИСЕФ бірлесіп жобалар іске асырмақ

<a href="https://kyzylorda-news.kz/">Kyzylorda-news.kz</a>. Қызылорда облысы аумағында тасқын және қашыртқы суларды жинайтын жобаны іске асыру жоспарлануда. Бұл су ресурстарын ұтымды пайдалануға және вегетациялық кезеңде тапшылықтың болмауына мүмкіндік береді. Бұл туралы Өңірлік коммуникациялар қызметінің ақпараттық алаңында өткен брифингте облыстық табиғи ресурстар мен табиғат пайдалануды реттеу басқармасы басшысының орынбасары Бауыржан Оспанов баяндады.
<blockquote>
 «Облыста 207 көл бар. Көлдердің толымдылығы 52 пайызды құраса, ал 17 көлдің суы тартылған. Су тапшылығын алдын алу үшін облыстық бюджеттен елді мекендерге 43 дана насос қондырғыларын сатып алу және 18 каналға тазалау жұмыстары жүргізілуде. Сонымен бірге, шаруашылық құрылымдары тарапынан 47 насос қондырғы алынды. Қосымша 41 дана насос алынатын болады. Каналдар арқылы су алу режимдерінің кестеге сай орындалуына мониторинг жүргізетін жұмысшы тобы құрылды», – деді Бауыржан Әліпбайұлы.
 «Қазіргі уақытта жоғарыдан түсетін су көлемі болжанған кестеден кем түсуде. Осыған орай, болжамдық жұмыс кестесі қайта жасалды. Шардара мен Көксарайды қоса есептегенде төменге секундына 500 текше метр су жіберілуде», – деді Арал-Сырдария бассейндік инспекциясы РММ бөлім басшысы Сейітқасын Әбуов.
 «Бүгінде егіске Қызылорда сол жаға магистралді каналы, Айтек, Қазалы сол жаға және оң жаға магистралді каналдарынан су жіберуге кесте әзірленді. Мұнан өзге, қашыртқы суын қайта пайдалану әдісіне сәйкес шаруашылық құрылымдары өз есебінен насос қондырғыларын орнатып, қашыртқыдан ішкі каналдарға су тасталуда», – деді «ҚАЗСУШАР» РМК Қызылорда облыстық филиалының су шаруашылығы нысандарын пайдалану бөлімінің басшысы Айдос Асанбаев.
</blockquote>

Бауыржан Оспанов: Насос қондырғылары көбейтілуде

<a href="https://kyzylorda-news.kz/">Kyzylorda-news.kz</a>.&nbsp; Аймақта жыл басынан бері судағы қауіпсіздік ережелерін сақтамау салдарынан 20 оқиға тіркеліп, 23 адам қайтыс болды. Оның 15-і бала. Бұл туралы Өңірлік коммуникациялар қызметінің ақпараттық алаңында өткен брифингте облыстық ТЖД бастығының орынбасары Саид Молдақараев мәлімдеді.
<blockquote>
 «Облыстың су айдындарында, әсіресе, Сырдария өзенінде жылда азаматтардың әртүрлі себептермен қайғылы жағдайларға ұшырауы өзекті мәселе болып отыр. Өткен жылмен салыстырғанда балалардың суға кетуі 53 пайызға көбейді. Сондай-ақ, балық аулайтын орындарда 467 рейд ұйымдастырылды. 4933 адамға судағы қауіпсіздікті түсіндіріп, үнпарақтар таратылды», – деді Саид Шазындаұлы.
</blockquote>
Брифингте төтеншеліктер қалада 2 жағажайға суға түсуге болатынын айтты. Олар шаһар орталығындағы «Сыр-Самалы» және Белкөл кентіндегі «Абай» жағажайы.
<blockquote>
 «Суға шомылуға болмайтын аймақтарға 188 ескерту тақтайшасы орнатылды. Қазіргі таңда қала аумағындағы «Эдельвейс» саяжайы тұсында коммуналдық саяжайдың құрылысы жүруде. Қала тұрғындары мен ата-аналарға мүмкіндігінше осындай жабдықталған жағажайларда суға шомылуға кеңес береміз», – деді облыстық жұмылдыру дайындығы басқармасы басшысының орынбасары Бағдат Алиев.
</blockquote>
<img src="https://kyzylorda-news.kz/wp-content/uploads/2021/06/206196715_1316369948758514_1756493423582741814_n.jpg" alt="" />

Қызылордада жыл басынан бері 23 адам суға кетті

<a href="https://kyzylorda-news.kz/">Kyzylorda-news.kz</a>. Қызылорда облысында міндетті әлеуметтік медициналық сақтандыру аясында қызмет көрсететін жеке медициналық ұйымдар саны артып келеді. Медициналық сақтандыру қорының Қызылорда облысы бойынша филиалының баспасөз туры барысында журналистер «Арад-Ри» және «Ақсәуле-Мед» клиникаларының жұмысымен танысты.
Бірінші аялдаған нысан — «Арад-Ри» клиникасы. Пациенттер мұнда күндізгі стационарда ем қабылдап, консультивті-диагностикалық, оның ішінде УЗИ қызметін пайдалана алады. Клиника дәрігері Ақмарал Нұғманованың айтуынша, егер күндізгі стационарда сақтандырылмаған пациент ем алса, он күндік курс үшін қалтасынан 140 мың теңге шамасында қаржы шығаруына тура келеді. Сақтандырылған болса, бұл шығын медициналық сақтандыру есебінен жабылады. Әңгіме клиника ұсынатын басқа да медициналық қызмет түрлеріне қатысты. Биыл қор филиалы есебінен күндізгі стационарға 19 миллион теңгеге жуық қаржы бөлінді. 5 айда 82 адам ем-дом қабылдады. Пациенттер шағымы көбіне қан айналымы мен омыртқа жүйесінің ауруларына байланысты.
Келесі нысан – «Ақсәуле-Мед» клиникасы. Мұнда сақтандырылған азаматтар күндізгі, тәулік бойғы стационарларда емделе, сондай-ақ медициналық оңалтудан өте алады. Клиникада озық медициналық жабдықтар орнатылған. Ол инсульт алған, ЛЦП диагнозы қойылған немесе жарақат алғаннан кейін қимыл-қозғалысында ақау пайда болған азаматтар үшін үлкен көмекші. Кинезиолог, ЛФК-нұсқаушы Жанат Бекмұрзаеваның сөзінше, мұнда сонымен қатар «Экзарта» сияқты теңдессіз аппараттар мен артроматта бар. Олардың ықпалымен оңалту қимыл-қозғалысы бұзылған жандарға жақсы әсер етті. Қор филиалы есебінен күндізгі стационар қызметі үшін 15 млн, тәуліктік стационар клиникасы үшін 43 млн теңгеден астам қаржы бөлінді. Күндізгі және тәуліктік стационарлардағы медициналық оңалту қызметін қор 2 8834,2 мың теңгеге қаржыландырды. Жыл басынан бері барлығы 203 адам емделді.
Баспасөз турының қорытындысында «Әлеуметтік медициналық сақтандыру қоры» КЕАҚ Қызылорда облысы бойынша филиалының бөлім басшысы Абылайхан Рахымов азаматтар өз денсаулығына жауапты болуы және медициналық сақтандыру үшін тұрақты түрде жарна аударып тұруы керектігін жеткізді. Айта кетейік, Қызылорда облысында 141 мыңнан астам адам сақтандырылмаған. Оның 41 мыңдайы – жұмыс істейтіндер, алайда жұмыс берушілер әлдебір себеппен міндетті әлеуметтік сақтандыру жарнасын төлемейді.
Еске салайық, 2021 жылы қор филиалы аймақтағы 60 медициналық ұйыммен келісімшарт жасасты. Оның 30-ы – мемлекеттік, 30-ы – жеке. ТМККК пакеті шеңберінде 51,2 млрд теңгеге келісім жасалды. Оның 5,3 млрд теңге – 30 жеке медициналық ұйымға тиесілі. МӘМС пакеті аясындағы жалпы келісім сомасы – 26,3 млрд. теңге. Оның 2,9 млрд. жеке клиникалар үлесінде.
<img src="https://kyzylorda-news.kz/wp-content/uploads/2021/06/20210622_115519-scaled.jpg" alt="" />
<img src="https://kyzylorda-news.kz/wp-content/uploads/2021/06/20210622_115627-scaled.jpg" alt="" />
<img src="https://kyzylorda-news.kz/wp-content/uploads/2021/06/20210622_121658-scaled.jpg" alt="" />

МӘМС есебінен жеке емханаларда қызмет көрсетуге бола ма?

<a href="https://kyzylorda-news.kz/">Kyzylorda-news.kz</a>.&nbsp;Короновирусқа қарсы екпе алмай, құжаттарын рәсімдеуге болады.
Елде осындай делдалдар көбейді. Бүгінге дейін 30 қылмыстық іс қозғалған. Оның ішінде екпе паспортын дайындау не жалған тест нәтижелерін жасау сияқты деректер бар. Әсіресе, биыл осындай жағдайлар жиілеген. Мәселен, жыл басынан бері 24 дерек тіркелді. Ал өткен жылы осындай 6 қылымыстық іс қозғалды. Бұған қоса, короновирусқа қатысты жалған хабарламаларға қатысты 103 сортқа дейінгі тергеу жүріп жатыр. Алдағы уақытта да тәртіп сақшылары бұл мәселені жіті назарда ұстамақ. Осы мақсатта арнайы мониторингтік топ құрылды.
<a href="https://24.kz/kz/zha-aly-tar/o-am/item/482251-zhal-an-ekpe-pasportyn-zhasa-andardy-andaj-zhaza-k-tip-t-r">24.kz</a>

Жалған екпе паспортын жасағандарды қандай жаза күтіп тұр?

<a href="https://kyzylorda-news.kz/">Kyzylorda-news.kz</a>. Осы жылдың соңына дейін 755 ауыл әкімі сайланады. Бұл туралы ҚР Орталық сайлау комиссиясы төрағасының орынбасары Константин Петров айтты, деп хабарлайды ҚазАқпарат.
<blockquote>
 «Өздеріңізде білетіндей, Президент Қасым-Жомарт Тоқаев «Жаңа жағдайдағы Қазақстан: іс-қимыл кезеңі» атты ел халқына Жолдауында ауыл әкімдерін тікелей сайлауға көшу туралы тапсыра берген болатын. Осы жылдың 24 мамырында ауылдық деңгейдегі әкімдерді тікелей сайлау мәселелері жөніндегі заңға қол қойылды. Бұл бастама жергілікті өзін өзібасқару институттарын жаппай енгізу тәжірибесі арқылы мемлекеттік басқаруды орталықсыздандыруға қатысты негізгі саяси реформалар топтамасын біртіндеп жүзеге асыруға бағытталған», – деді ол ОСК отырысы барысында.
</blockquote>
Константин Петровтың дерегінше, елімізде 2 346 ауыл әкімі бар. Олар жаңа норма енгізілгеннен кейін өкілеттік мерзімдері аяқталған соң тікелей дауыс беру арқылы сайланатын болады.
<blockquote>
 «Осы жылдың соңына дейін аталған санатқа кіретін шамамен 775 әкімді сайлау жоспарланып отыр. Осылайша, азаматтардың тікелей сайлау арқылы мемлекеттік басқаруға қатысуын кеңейту принципі біртіндеп жүзеге асырылады. Тікелей сайлау арқылы ауылдық аумақтарды басқарудың тиімді тетіктерін қалыптастыру процесіне шамамен азаматтардың 40 пайызы тартылады», – деді төраға орынбасары.
</blockquote>

Биыл қанша ауыл әкімі сайланады?

<a href="https://kyzylorda-news.kz/">Kyzylorda-news.kz</a>. Арал ауданының әкімі Серік Сермағамбетов Арал қаласындағы бірқатар әлеуметтік мекемелердің және кәсіпкерлік нысандардың жұмысымен танысты.
Ең алдымен №19 Арал ауданының олимпиадалық резервтің мамандандырылған балалар-жасөспірімдер мектебіне барған аудан басшысы мектеп директорымен тілдесіп, мектеп ғимараты мен спорт зал, стадионды толықтай аралап өтті. Саланың жұмыс барысымен толыққанды танысқан аудан басшысы спорт мектебіндегі ағымдағы жөндеу жұмыстарына да куә болды.
Бүгінде спорттың 14 түрінен машықтануға мүмкіндік жасап отырған мектепте 1196 бала спортпен шұғылданады. Атап өткен жөн, осы кезге дейін үш бірдей әлем чемпиондарын түлеткен мектептің бұқаралық спортты дамытудағы маңызы зор.
Аудан басшысы бас сұққан келесі нысан – «ARZAN MARKET» сауда орталығы болды. Аудан орталығындағы ең ірі сауда орталығын аралап өткен аудан басшысы бірінші кезекте күнделікті тұтынатын азық-түлік өнімдерінің бағасын талдап, жауапты сала басшыларына баға тұрақтылығын сақтау бағытында жұмыстарды үйлестіруді тапсырды.
Одан әрі апатты жағдайдағы № 1 қалалық кітапханаға арнайы ат басын бұрып, нысанның қазіргі жағдайымен танысты. Өткен ғасырдың 1937 жылы салынған ғимарат 2014 жылғы сараптама қорытындысына сәйкес апатты жағдайда деп танылған. 2500-ге жуық оқырманы бар кітапханада 43 000 кітіп қоры бар.
Сапар барысында кітапхана жанында орналасқан құрастырмалы – жиналмалы модульді бассейн кешені мен балықшылар мұражайы да назардан тыс қалмады. Жалпы сыйымдылығы 30 адамды құрайтын бассейн кешенінің жұмысымен танысқан аудан әкімі бүгінгі мемлекеттік қызметшілер күні аясында өтіп жатқан спорттық сайысқа куә болды.
Мұнан соң облыстық бюджет есебінен реэкспозициялық жұмыстар жүргізіліп жатқан балықшылар мұражайымен танысып, құрылыс жұмыстарының жай-күйіне қанықты. 2012 жылы пайдалануға берілген мұражайда қазіргі таңда 2000-нан аса құнды жәдігерлер жинақталған. Мұражай залдарында балық шаруашылығына еңбек сіңірген қайраткерлер мен атақты балықшылардың портреттері, фотосуреттері, «Лев Берг» кемесінде балықшылардың киімдері мен теңіз кемесінің техникалық құрал-жабдықтары орналасқан.
Аудан әкімі Серік Сағитжанұлы қаладағы ең ірі «ARAL HOTEL» қонақ үйінің және өткен жылы пайдалануға берілген аудандық оқушылар үйінің де жұмыс барысымен танысып өтті. «Бизнестің жол картасы – 2020» бағдарламасы аясында қайта жаңғырған қонақ үй қызметі алдағы уақытта бассейн және сауна қызметтерін іске қосуды жоспарлап жатқандығын жеткізді.
Одан әрі 250 орынды жаңа оқушылар үйін аралап көрген аудан басшысы үйірме жұмыстарымен жекелей танысып, оқушылардың қолынан шыққан туындыларды тамашалады.
Аудан әкімі сапар соңында аудандық тарихи-өлкетану музейі мен Арал аудандық мәдениет орталығында болып, мекемелердің жұмысын бағамдап өтті. 1954 жылы қыш кірпіштен салынған тарихи-өлкетану музейінің қазіргі жағдайы сын көтермейді. Қазіргі таңда 10 000-нан аса экспонат сақтаулы музейді жаңадан салу бағытындағы жұмыстар қолға алынған. Ал, аудандық мәдениет орталығының жағдайына келер болсақ аталған нысанға да күрделі жөндеу жұмыстарын жүргізу қажеттілігі туындап отыр.
Осылайша спорт, мәдениет, білім және кәсіпкерлік саласының жұмыстарын саралап өткен аудан басшысы әр сала бойынша атқарылуы қажет деген мәселелерге мән беріп, бұл бағыттағы жұмыстарды жүйелі жалғастыру жөнінде сала басшыларына тапсырма жүктеді.
<img src="https://kyzylorda-news.kz/wp-content/uploads/2021/06/203204855_3009499466045086_4530031655756172043_n.jpg" alt="" />
<img src="https://kyzylorda-news.kz/wp-content/uploads/2021/06/203291658_3009500076045025_4232356665404204702_n.jpg" alt="" />
<img src="https://kyzylorda-news.kz/wp-content/uploads/2021/06/204288934_3009499412711758_5879385116112124549_n.jpg" alt="" />
<img src="https://kyzylorda-news.kz/wp-content/uploads/2021/06/203567771_3009500099378356_8373101456172743801_n.jpg" alt="" />

Аралдағы тарихи-өлкетану музейінің жағдайы сын көтермейді

<a href="https://kyzylorda-news.kz/">Kyzylorda-news.kz</a>. Қызылорда қаласындағы ЗК-169/5 мекемесінде келеңсіз жағдай орын алды. Жазасын өтеушілердің таныстары мекеме аумағына тыйым салынған заттарды кіргізуге әрекеттенген. Заңсыздықтың алдын алуға тырысқан жедел бөлімнің қызметкерлері арнайы жоспар құрып, тұрғындарды қолға түсірді.
Жедел бөлімінің қызметкерлері әділет майоры С.Сақтапберген мен әділет аға лейтенанты А.Көптілеу мекеме аумағын торуылдап жүрген келушілерді мекеме аумағында заңсыз әрекеттерін іске асыру барысында құрықтады.
<blockquote>
 «Жедел түрде 102 нөміріне хабарланып, мекемеге Қызылорда қалалық Полиция басқармасының жедел-тергеу тобы шақыртылды. Ұсталған азаматтан 3 дана нығыздалып оралған өзіне тән иісі бар шөп тектес заты және «iPhone 5» маркалы&nbsp;ұялы телефоны тәркіленді. Тәркіленген зат бойынша сот сараптама жұмыстары тағайындалды», – дейді әділет майоры С.Сақтапберген.
</blockquote>
Айта кетейік, аталған дерек бойынша Қазақстан Республикасы ҚК-нің 297-бабының 1-бөлігімен сотқа дейінгі тергеп-тексеру жұмыстары жүргізілуде.

Қызылордада түзету мекемесіне есірткі жібермек болған тұрғын ұсталды

<a href="https://kyzylorda-news.kz/">Kyzylorda-news.kz</a>. Ресей президенті Владимир Путин Қызылорда облысының әкімін құрмет грамотасымен марапаттады.
<blockquote>
 “Ғарыш кеңістігін зерттеу және пайдалану, достықты нығайту саласындағы халықаралық ынтымақтастықты дамытуға зор үлес қосқаны үшін Қазақстан Республикасы Қызылорда облысының әкімі Әбдіхалықова Гүлшара Наушақызы Ресей Федерациясы президентінің Құрмет грамотасымен марапатталды”, – делінген Байқоңыр қаласы әкімшілігінің хабарламасында.
</blockquote>
Владимир Путиннің атынан дәл осындай награда Қызылорда облысы әкімінің орынбасары, Қазақстан президентінің Байқоңыр кешеніндегі арнайы өкілі Серік Сүлейменовке де табысталды.
Байқоңырдағы Ресей әкімшілігі Әбдіхалықованың марапатталуына байланысты құттықтау жариялады.
<blockquote>
 “Байқоңыр қаласының тұрғындары Сіздің қамқорлығыңызды үнемі сезінеді, Байқоңырдың өміріне жеке араласуыңыздың арқасында көптеген жоба сәтті жүзеге асырылып жатыр, ал қала тұрғындары бұл жоғары награданы Қазақстандағы ғарыш саласының өсуіне, бірлескен Ресей – Қазақстан жобаларының жүзеге асырылуына және Байқоңыр қаласын дамытуға жұмсаған үлкен күш-жігеріңіздің бағасы деп қабылдайды”, – делінген хабарламада.
</blockquote>
Сондай-ақ Байқоңырда Серік Сүлейменовті Путиннің грамотасымен құттықтады.
<blockquote>
 “Байқоңыр қаласының тұрғындары, Төретам және Ақай елді мекендері Сізді қарапайым адамдардың өмірі мен проблемаларына үңілетін зерделі адам ретінде біледі, – делінген құттықтауда, – Сіз “Байқоңыр” кешені Ресей мен Қазақстан арасындағы өзара тиімді ғылыми-техникалық ынтымақтастықтың табысты үлгісі болып, ал Байқоңыр қаласы Ресей және Қазақстан халықтары арасындағы достықтың символына айналуы үшін көп тер төктіңіз. Байқоңырлықтар қалаға және Байқоңыр кешеніне үнемі назар аударып, &nbsp;ғарыш айлағы проблемаларын шешуге қатысып жүргеніңіз үшін ризашылық білдіреді”. &nbsp;
</blockquote>
<a href="https://sputnik.kz/regions/20210624/17428635/Putin-Qyzylorda-oblysy-marapat.html">Sputnik Қазақстан</a>

Владимир Путин Қызылорда облысының әкімін құрмет грамотасымен марапаттады

<a href="https://kyzylorda-news.kz/">Kyzylorda-news.kz</a>. Нұр-Cұлтан қаласында “ЖАҢАРУ” Сыбайлас жемқорлыққа қарсы жалпыұлттық қозғалыс” республикалық қоғамдық бірлестігі мен ҚР Ақпарат және қоғамдық даму министрлігінің “Азаматтық бастамаларды қолдау орталығы” КЕАҚ қолдауымен онлайн форматта қоғамдық тыңдау өткізілді.
“ҮЕҰ-ы, сарапшылар қауымдастығының сыбайлас жемқорлыққа қарсы мәдениетті қалыптастыруға қатысуын кеңейту” тақырыбында өткен жиынға “ЖАҢАРУ” РҚБ төраға орынбасары, жоба жетекшісі Дәулеткерей Рахметуллин модераторлық етті.
Онлайн режимдегі қоғамдық тыңдауға Қызылорда облысы әкімінің орынбасары Серік Ахмет, Қызылорда облыстық мәслихатының хатшысы Наурызбай Байқадамов, ҚР Сыбайлас жемқорлыққа қарсы іс-қимыл Агенттігінің Қызылорда облысы бойынша департамент басшысының бірінші орынбасары Ғалия Әлімқұлова, ҚР Мемлекеттік қызмет істері агенттігінің Қызылорда облысы бойынша департаментінің басшысының орынбасары Берікбол Байхожаев, Қызылорда облыстық «NurOtan» партиясы жанындағы сыбайлас жемқорлыққа қарсы Қоғамдық кеңес төрағасы Махсұт Нәлібаев, «ЖАҢАРУ» Сыбайлас жемқорлыққа қарсы жалпыұлттық қозғалысы» РҚБ Қызылорда облыстық филиалының директоры Қажденбек Баймаханов қатысты. Сонымен бірге Қорқыт Ата атындағы Қызылорда мемлекеттік университетінің ректоры Бейбіткүл Каримова, Қызылорда облысы кәсіпкерлер палатасының директоры Ғалымбек Жақсылықов, «Aqmeshit-Adaldyq alany» жобасының жетекшісі Жандос Тұсмағанбетов және мемлекеттік органдардың басшылары, мәслихат депутаттары, ҮЕҰ-ң өкілдері, “NurOtan”, ҚХП, «Ақ Жол» «Ауыл» партияларының өкілдері ортақ тақырып аясында ой бөлісті.
Қоғамдық тыңдау өткізудің мақсаты – сыбайлас жемқорлыққа қарсы қозғалысқа азаматтық сектор өкілдерін тарту арқылы мемлекеттік қызмет көрсету саласында сыбайлас жемқорлық көріністеріне «мүлдем төзбеушілікті» қалыптастыру. Сондай-ақ, халықтың құқықтық сауаттылығын, нормативтік-құқықтық актілердің сапасын арттыру, сыбайлас жемқорлыққа қарсы дүниетанымды қалыптастыру.
Жиында облыс әкімінің орынбасары Серік Ахмет сөз алып, сыбайлас жемқорлықпен күресу мемлекет саясатының басты басымдықтарының бірі екенін атап өтіп, ашықтық қағидатын енгізу бағытында өңірде атқарылған жұмыстардың негізгілеріне тоқталды.
<blockquote>
 «Мемлекет басшысы бұл құбылыспен күресудің өзектілігі мен маңыздылығын нақты айқындап, алдымызға жаңа бағыттарды белгіледі. Облыс әкімінің төрағалығымен ведомствоаралық сипатта құрылған сыбайлас жемқорлыққа қарсы іс-қимыл мәселелері жөніндегі комиссия тұрақты негізде жұмыс жасайды. Қазіргі уақытта «Ақмешіт – адалдық алаңы» жоба аясында бүгінде 144 ауылдық округте «Адалдық алаңы» жобалық кеңсесінің жұмысшы топтары құрылды. Кеңсе алаңында тиісті лауазымды тұлғалардың қатысуымен 15 қоғамдық қабылдау ұйымдастырылды. 
 Облыста мемлекеттік қызметшілердің халыққа ашықтығы мен қолжетімділігін қамтамасыз ету үшін барлық аудан, қала орталықтарында «Сервистік ашық әкімдік» орталықтары ашылып, жұмыс жасауда. Мемлекеттік қызметшілердің халыққа ашықтығы мен қолжетімділігін күшейту үшін «Open space» жобасы да жолға қойылды. Облыс бойынша 304 мемлекеттік мекеменің бірінші басшылары бірінші қабатқа ауыстырылып, 60 мекеме осы форматқа сәйкестендірілді»,-деді Серік Ахмет.
</blockquote>
Аймақта мемлекеттік көрсетілетін қызметтерді автоматтандыру бойынша 173 мемлекеттік қызметтің 141 қызмет түрі автоматтандырылды. Жемқорлық көріністерін алдын алуға бағытталған шаралардың нәтижесінде облыс бойынша сыбайлас жемқорлық сипатында жасалған құқық бұзушылықтар саны 46 пайызға төмендеген.
Бүгінде мемлекеттік органның ашықтығы бойынша «Ашық диалог» порталында облыс әкімінің блогы жүргізіледі. Платформа арқылы түскен 125 сауалға белгіленген тәртіппен тиісті жауаптар берілді.
Қоғамдық тыңдауда облыстық мәслихат хатшысы Наурызбай Байқадамов сыбайлас жемқорлыққа қарсы мәдениетті қалыптастыруда ой-сананы жетілдіру, құқықтық сананы ілгерілету мәселелеріне тоқталды. Ал,өзге спикерлер сыбайлас жемқорлықты алдын алуда азаматтық қоғам өкілдерін және «Adaldyq alany» жобалық кеңселерін жұмылдыра отырып, пікірталас және оқыту алаңдарын, қоғамдық тыңдауларды ұйымдастырудың маңыздылығын атап өтті.
Қоғамдық тыңдау соңында “ЖАҢАРУ” РҚБ төраға орынбасары, жоба жетекшісі Дәулеткерей Рахметуллин Қызылорда өңірінде бірлескен жұмыстардың жүйелі түрде іске асып келе жатқанын тілге тиек етіп, бұл жұмыстар азаматтық қоғамдағы ашық диалогты байланыс деңгейін жақсартуға оң септігін тигізетінін жеткізді.

Қазақстан және Қызылорда облысының жаңалықтары: Қоғам