<a href="https://kyzylorda-news.kz/">Kyzylorda-news.kz</a>.&nbsp;ҚР Ауыл шаруашылығы министрінің міндетін атқарушы Ербол Қарашөкеевтің Сыр еліне сапары бірнеше ауданда жалғасты.
Министрлік делегациясы Жалағаш, Сырдария, Шиелі және Жаңақорған аудандарын аралап, бірқатар шаруа қожалықтарында болды. Алдымен ол Жалағаш ауданындағы «Байтабын» шаруашылығының шөп жинау дайындығымен танысса, одан кейін Сырдария ауданындағы жоңышқа егетін «Мағжан және К» серіктестігінің жұмысын бағамдады.
Аралау барысында облыстық ауыл шаруашылығы басқармасының басшысы Талғат Дүйсебаев өңірде шаруаларды қолдау бағытындағы бірлескен жұмыстарды атап өтті.
Бүгінде “Байтабын” шаруа қожалығында 1416 гектар күріш, 74 гектар мақсары, 170 гектар жаңа жоңышқа орналастырып, 572 гектар ескі жоңышқа дақылы күтімге алынса, «Мағжан және К» 161 гектар бидай, 84 гектар арпа, 306 гектар жаңа жоңышқа егіліп, 1478 гектар ескі жоңышқаны күтімге алды. Мұнда негізгі дақыл күрішті 2500 гектарға екті. Мұнан кейін Ербол Қарашөкеев Арал ауданына көмек ретінде шөп жөнелтіп жатқан Шиелі ауданындағы «Бидайкөл» шаруа қожалығының басшысымен кездесіп, құрғақшылықтан зардап шеккен ауданға көмек көрсеткендері үшін алғысын білдірді.
<blockquote>
 «Өздеріңіз білесіздер, Арал ауданының шаруалары биыл құрғақшылықтан қатты зардап шекті. Қазір мәселе ретімен шешіліп келеді. Облыстың бес ауданынан және Ақтөбе облысының Ырғыз ауданынан мал азығы жеткізілетін болды. Ол үшін келісім жасалды. Бүгінгі таңда Қызылорда облысы әкімдігінің резервінен 250 млн теңге бөлінді, оның 49,5 млн теңгесі шөп таситын көлік шығынын көтеруге жұмсалады. Жалпы, бұл жағдай министрліктің тұрақты бақылауында болады», – деді Ербол Қарашөкеев.
</blockquote>
Айта кету керек, «Бидайкөл» қожалығы биыл 900 гектар жерге күріш, 200 гектарға күздік бидай екті. Сондай-ақ, 70 гектарға соя дақылын егіп, 477 гектарға ескі жоңышқа орналастырған.
Жалпы ауданда мал суаратын құдықтар салу және су бөгеттерін қалпына келтіру жұмыстары да қолға алынған. Бүгінгі күні облыста 347 мың тонна мал азығы дайындалды. Өңірде жұмысты үйлестіретін облыстық және аудандық штаб құрылды. Мал азығын дайындау және қамтамасыз ету жөнінде облыстық жоспар бекітілді. Соған сәйкес, арнайы шөп дайындау бригадалары, еріктілер, «Жасыл Ел» студенттік отрядынан жастар да көмекке келіп жатыр. Мыңға жуық адамның қатысуымен 114 бригада құрылып, 170 ауыл шаруашылығы техникасы тартылды.
Тағы бір маңызды мәселе – мал азығына сұраныс артқан сайын оның бағасының да күрт көтерілуі. Бағаның өсуіне тасымал шығыны да әсер етті. Енді «Қазақстан темір жолы» ұлттық компаниясы басқа өңірлерден жем-шөп тасымалдауға арнайы жеңілдік беретін болды.
Ербол Қарашөкеев Қызылорда облысына жасаған сапарының соңында Жаңақорған ауданындағы алма бағын баптап отырған «Жан-Арай» серіктестігіне, құс шаруашылығымен айналысатын «Абдулла» шаруа қожалығының құс фабрикасы құрылысының барысымен және мал шаруашылығымен айналысатындарға жем-шөп дайындайтын «Нұрбол И» шаруашылығының жұмысымен танысты.
Алма бағында 35 112 түп жеміс көшеттері сатып алынып, 35 гектарға жеміс көшеттері егілді. Ал, «Абдулла» құс фабрикасы жылына 3,5 мың тонна құс етін өндіреді. Фабрика облыс халқының тұтынатын құс етінің 33 пайызын қамтамасыз етеді. Бүгінгі таңда 4 ғимараттың каркасы тұрғызылып, қызмет көрсететін техникалар алынған. Сонымен бірге «Нұрбол И» шаруашылығы биылдың өзінде 50 гектар күріш, 139 гектар ескі жоңышқа дақылдары күтімге алған. Оның бірінші орымынан барлығы 200 тонна өнім жиналып, қазіргі таңда екінші орымға дайындық жұмыстары жүргізілуде.
<img src="https://kyzylorda-news.kz/wp-content/uploads/2021/07/227819227_3573069426129434_1724856766552346094_n.jpg" alt="" />
<img src="https://kyzylorda-news.kz/wp-content/uploads/2021/07/226895266_3573068779462832_8266315732390904692_n-1.jpg" alt="" />
<img src="https://kyzylorda-news.kz/wp-content/uploads/2021/07/227461848_3573069302796113_8016983546430219785_n.jpg" alt="" />
<img src="https://kyzylorda-news.kz/wp-content/uploads/2021/07/227838271_3573069966129380_3695909758541020958_n.jpg" alt="" />

Ербол Қарашөкеевтің Сыр еліне сапары бірнеше ауданда жалғасты

<a href="https://kyzylorda-news.kz/">Kyzylorda-news.kz</a>. Елімізде 1 шілдеден бастап әкімшілік алқа мен мамандандырылған әкімшілік соттар өз жұмысын бастады. Жаңа сот жүйесінде әкімшілік іс жүргізу тәртібімен жария-құқықтық қатынастардан туындаған даулар қаралады. Осы уақытқа дейін сот өндірісіне 54 әкімшілік іс келіп түскен. Бұл туралы Өңірлік коммуникациялар қызметінің ақпарат алаңында Қызылорда облыстық сотының әкімшілік істер жөніндегі сот алқасының төрағасы Жанат Оспанова мәлімдеді.
<blockquote>
 «Әкімшілік істер бойынша талаптарын азаматтар аудандық соттарға да беруге құқылы. Бірақ талап кәсіпкерлікпен байланысты болмауы керек. Сондай-ақ, құқық субъектілері арасындағы бір тараптың екінші тарапқа қатысты өктемдік өкілеттіктерін жүргізуіне байланысты билік-бағыну қатынастары да қаралады. Оның жауапкері мемлекеттік орган, басқа да әкімшілік орган немесе лауазымды тұлға болуы мүмкін. Сонымен қатар, сот орындаушылардың әрекеттеріне де келтірілген даулар осы әкімшілік іс жүргізу тәртібімен орындалады. Осы жылдың шілде айында облыс көлемінде 54 талап қою түскен болса, оның 7-і әкімшілік сотта қарауға жатпайды деп танылды», – деді Ж.Оспанова.
</blockquote>
Егер, жауапкер соттың шешімін, татуласу рәсімдерін жүргізу нәтижесінде жасалған келсімдерді орындамаса, оған 50 АЕК мөлшерінде айыппұл салынып, ақшалай өндіріп алу шарасы қолданады. Жауапкер әрі қарай да талаптарды орындамауды жалғасырса шаралар қатаңдатылатын болады.
Қызылорда облысының мамандандырылған ауданаралық әкімшілік сотының төрағасы Гүлжан Мырзатаеваның айтуынша әкімшілік істер бойынша талап арыздарды азаматтар аудандық соттарға да беруге құқылы. Әкімшілік сот ісін жүргізуді мамандандырылған аудандық соттармен қатар оларға теңестірілген әкімшілік соттар да жүзеге асыра алады.
Әкімшілік соттың тағы бір артықшылығы, істерді уақытылы қарауға басымдық беріліп, азаматтардан түскен арыздың дұрыстығы жедел тексеріледі және тиісті жауапкерді анықтауға да соттың ықпалы тиеді. Бұл өзкезегінде арыздардың кері қайтарылмауына мүмкіндік береді.

Қызылордада жаңадан ашылған мамандандырылған сотқа бір айда 54 арыз келіп түсті

<a href="https://kyzylorda-news.kz/">Kyzylorda-news.kz</a>. Биыл аймағымызда темір жол көлігі арқылы 589,7 мың жолаушы тасымалданған. Бұл туралы Өңірлік коммуникациялар қызметінің ақпарат алаңында Қызылорда облысының жолаушылар көлігі және автомобиль жолдары басқармасы басшысының міндетін атқарушы Қайрат Әбсұлтанов баяндады.
Аймақ орталығынан 5 бағытқа жолаушылар пойызы ұйымдастырылса, облыс аумағынан жүретін пойыз саны 19 жұпты құрайды. Бүгінде 9 жұп пойызы коронавирус пандемиясына байланысты өз жұмыстарын уақытша тоқтатқан. Оның 7-і халықаралық, 1-облысаралық, 1-қаламаңы бағытына қатынайтындар. Облысаралық тұрақты маршруттардың уақытша тоқтатылуы жолаушылар ағымының төменгі көрсеткіш көрсетуіне әсер етуде. Дегенмен жыл басынан бері өңіріміздегі 8 темір жол вокзалы арқылы қалған бағыттағы көлік құралдары 600 мыңға жуық жолаушыға қызмет көрсетіп, діттеген жеріне жеткізген.Сондай-ақ, өңірімізде 212 елді мекенді аудан және облыс орталығымен байланыстыратын 205 қоғамдық көлік бар. Олар аймақтағы 3 автовокзал және 8 автобекет арқылы қызметтерін жүзеге асыруда.
Айта кету керек, 1 тамыз – еліміздің транзиттік әлеуетін арттыруға септігі мол, экономикамыздың негізгі локомативі саналатын көлік саласы қызметкерлерінің кәсіби мерекесі.

Қызылордада жыл басынан бері 589,7 мың жолаушы тасымалданды

<a href="https://kyzylorda-news.kz/">Kyzylorda-news.kz</a>.&nbsp;Бүгін Сырдария ауданы әкімінің міндетін атқарушы Димаш Байдушевтің төрағалығымен аудан әкімдігінің кезекті отырысы болып, күн тәртібінде 2 мәселе қаралды.
Аудан әкімдігінің кезекті отырысы басталмас бұрын аудан әкімінің міндетін атқарушы кадрлық тағайындауды таныстырды. Конкурс нәтижесінде Сырдария аудандық білім бөлімінің басшысы қызметіне Жәнібеков Берік Съездұлының лауазымды қызметке тағайындалуымен құттықтап, жұмысына сәттілік тіледі.
Күн тәртібіндегі алғашқы мәселе 2021 жылдың І жартыжылдығындағы әлеуметтік-экономикалық даму көрсеткіштері туралы болды. Бұл бойынша аудандық экономика және бюджеттік жоспарлау бөлімінің басшысы Ғ.Акбаров хабарлама жасады.
Бөлім басшысы ауданда атқарылған жұмыстар бойынша әлеуметтік-экономикалық даму қорытындыларында инвестиция және құрылыс жұмыстарының индикаторынан басқа барлық макроэкономикалық көрсеткіштерінде өсу тенденциясы байқалатынын жеткізді. Өз кезегінде биыл ауыл шаруашылығының жалпы өнім көлемі 2020 жылдың тиісті кезеңімен салыстырғанда 2,0 пайызға өскенін айтты.
Келесі мәселе аудан бюджетінің 2021 жылғы 6 айдың қорытындысымен атқарылуы туралы аудандық қаржы бөлімінің басшысы А.Есмағамбетова баяндап, жергілікті өзін-өзі басқару бюджеттерінің атқарылуы барысын назарға ұсынды. Сонан соң «Жұмыспен қамту Жол картасының 2020-2021 жылдарға арналған бағдарламасы» аясында облыстық бюджеттің ішкі көздерінің қаражатынан берілетін кредиттер есебінен биылғы жылға 2 нысанға қаржы бөлінгенін айтты.
Жоғарыда аталған мәселелер кеңінен талқыланды. Барлық мәселелер бойынша алдағы уақытта кемшіліктер жібермеуді айтып, атқарылатын бірқатар жұмыстарға байланысты нақты тапсырмалар жүктеді.
Отырыстың қорытындысында аудан әкімінің міндетін атқарушы апта сайын аудандағы әлеуметтік нысандардағы жылудың жайына мониторинг жасап, хаттамалық тапсырмаларға сәйкес бірінші кезекте мектептердің жылу беру маусымына дайындығын үнемі бақылауда ұстауды аудандық білім бөлімінің басшысына тапсырды.

Димаш Байдушев: Мектептердің жылу беру маусымына дайындығын қадағалау қажет

<a href="https://kyzylorda-news.kz/">Kyzylorda-news.kz</a>.&nbsp;Бүгін – халықаралық Достық күні. Тату тірлік пен берекелі бірлікті көздеген егемен еліміз 130-дан астам тағдырлас этнос өкілдерін бір шаңыраққа сидырып, бір тудың астына біріктіре алды.
Отандастырымыздың жарқын пейілі мен ақ көңілінің арқасында ұлттың бірлігі, тұтастығы қалыптасты. Өңірлік коммуникациялық қызметінің ақпарат алаңында облыстық шешен-ингуш этномәдени бірлестігі жетекшісінің орынбасары, Аналар кеңесінің мүшесі Лайла Пашаева бүгінгі мерекенің маңыздылығына тоқталып, мемлекеттік этносаясаттың жүзеге асуын сөз етті.
<blockquote>
 «Достық қасиетті ұғым. Біздегі халықтың ынтымағы мен бірлігі мен үшін ерекше қымбат. Сыр өңіріндегі татулықты ту еткен Достық үйіміз біз үшін киелі шаңырақ. Осы шаңырақтың астында түрлі ұлт пен ұлыс ұйысып, бүгінде ұлтаралық татулықтың үлгісін паш етіп отыр. Осы орайда еске оралатыны, 1944 жылдың 23 ақпанында қыстың суық күнінде шешен халқының жер аударылуы басталды. Менің ата-анам солардың қатарында болды. 1941 жылы әкемнің әкесі әскерге алынды, онда ол хабар-ошарсыз кетті. Ал анасы сегіз баласы бар, бәрімен бірге пулемет астына, машиналарға, содан кейін мал тасымалдайтын және туған жерлерінен шалғайға айдалды. Қазақ тілін де, орыс тілін де білмеу біздің халқымызға қиын болды, шешендер баяу жергілікті халықтың өміріне еніп кетті. Қонақжай қазақ халқы шешендерге көмек қолын созды. Сол үшін мен барша қазақ халқының алдында басымды иемін. Шешенстанда «егер сіз қазақты кездестірсеңіз, онда сіз бауырыңызды жолықтырдыңыз» дейді. Мен бүкіл әлемде бейбітшілік болғанын қалаймын, біздің ата-бабаларымыз азап шеккендей бірде-бір халық зардап шекпесін деген тілек білдіремін», – деді Лайла Пашаева.
</blockquote>

Лайла Пашаева: Қонақжай қазақ халқы шешендерге көмек қолын созды

<a href="https://kyzylorda-news.kz/">Kyzylorda-news.kz</a>. Байқоңырдың жедел штабы 2021 жылдың басынан бері Байқоңыр қаласындағы COVID-19 ауруы бойынша санитарлық-эпидемиологиялық жағдайдың деректерін ұсынды, деп хабарлайды ҚазАқпарат.
Талдауға сәйкес, 2021 жылдың 1 қаңтарынан 25 шілдесіне дейін Байқоңыр қаласының аумағында жаңа коронавирус инфекциясын жұқтырған 527 адам анықталды. 61 % – бұл 2021 жылдың қаңтарынан маусымына дейінгі кезеңдегі науқастар, ал 39 % – тек бір айда, 2021 жылдың шілдесінде тіркелген.
Жақында аурулардың күрт өсуі тіркелді. Егер 2021 жылдың 21 шілдесінде барлығы 1633 инфекция оқиғасы тіркелген болса, бүгінгі таңда 29 шілдеде бұл көрсеткіш 1716-ға дейін өсті, яғни бір апта ішінде 83 адам ауырып, 6 адам қайтыс болды.
Қазіргі уақытта инфекциялық стационарда 36 науқас емделуде. Ағымдағы жылдың шілде айында Байқоңыр қаласының аумағында COVID-19 ауруының күрт өсуінің ықтимал себептерінің қатарында жедел штаб әкелу сипатын, жыл сайынғы ақылы демалыстарды пайдаланудың маусымдылығын, сондай-ақ азаматтардың карантин талаптарын формальды сақтауын атайды.
Қалалық жедел штаб хатшылығы осы күрделі эпидемиологиялық жағдайда байқоңырларды қолданыстағы қатаң шектеу шараларын сақтауға шақырды.
Естеріңізге сала кетейік, Байқоңыр қаласының аумағында карантин 16 тамызға дейін ұзартылған болатын.

Байқоңырда COVID-19 күрт көбейді

<a href="https://kyzylorda-news.kz/">Kyzylorda-news.kz</a>. Аймақтағы эпидахуалды тұрақтандыру мен аурудың алдын-алуға аймақ ардагерлері де үн қоспақ. Бұл туралы Өңірлік коммуникациялар қызметінің ақпарат алаңында өткен брифингте Облыстық ардагерлер кеңесінің төрағасы Серік Дүйсенбаев мәлімдеді.
Індетпен күресте алдымен ауызбіршілік керек деген Серік Әбішұлы бірінші кезекте аймақтағы індеттің таралу көрсеткіштерін сөз етті.
<blockquote>
 «Әлемнің ортақ мәселесіне айналып, жер жүзіне тараған індет күн санап өршуде. Өткен тәулікте ел аумағында 7 мыңнан аса адам дертке душар болса, біздің аймағымызда 220 адам індет жұқтырды. Сондықтан сақтық шараларын күшейтіп, екпе алуымыз керек», – деген ардагерлер кеңесінің төрағасы вакцинаның тиімділігіне де тоқталды.
</blockquote>
Сонымен қатар өңір тұрғындарына көпшілік орындарға бармауға кеңес беріп, той-жиын, отбасылық мерекелерді мейлінші азайтуды ұсынды.
<blockquote>
 «Індетке шалдыққандар туралы соңғы мәліметтер ардагерлердің алаңдауының негізсіз емес екендігін көрсетсе керек. Дәрігерлер қауымы қолдан келген ем-домның бәрін жасауда. Бірақ емделу, індетті жұқтырмау тек мамандарға ғана емес, өзімізге де байланысты екенін ұмытпауымыз қажет», – деді Серік Дүйсенбаев.
</blockquote>

Қызылордалық ардагерлер облыста эпидахуалдың ушыққанына алаңдаулы

<a href="https://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаев Қалмұханбет Қасымовты қызметінен босатты, деп хабарлайды Ақорданың баспасөз қызметі.
<blockquote>
 «Мемлекет басшысының жарлығымен Қалмұханбет Нұрмұханбетұлы Қасымов Қазақстан Республикасы мемлекеттік күзет қызметінің бастығы лауазымынан босатылды», – делінген хабарламада.
</blockquote>
Президенттің баспасөз хатшысы Берік Уәлидің хабарлауынша, Қалмұханбет Қасымов отставкаға және мемлекеттік қызметтен кету туралы өзі өтініш берген.
<blockquote>
 «Қасым-Жомарт Тоқаев Қалмұханбет Қасымовқа құқық қорғау органдарындағы ұзақ жылғы қызметі мен мемлекеттік күзет қызметінің бастығы ретінде сіңірген еңбегі үшін алғыс білдірді. Мемлекеттік күзет қызметі бастығының міндетін уақытша атқару Ермек Сағымбаевқа жүктелді», – деп&nbsp;<a href="https://www.facebook.com/people/%D0%91%D0%B5%D1%80%D1%96%D0%BA-%D0%A3%D3%99%D0%BB%D0%B8/100003403233694/">жазды</a>&nbsp;Уәли.
</blockquote>
Айта кетейік, Қалмұханбет Қасымов бұл қызметке 2020 жылдың қаңтарында тағайындалған болатын.

Президент Қалмұханбет Қасымовты қызметінен босатты

<a href="https://kyzylorda-news.kz/">Kyzylorda-news.kz</a>. Мемлекет басшысы Жолдауында шағын және орта кәсіпкерлікті дамыту еліміздің әлеуметтік – экономикалық және саяси өмірінде маңызды рөл атқаратынын атап өтті.
Индустрияландыру бағдарламасының екінші бесжылдығы аясында құрылысы басталған «Қармақшы құс» жауапкершілігі шектеулі серіктестігіне жылына 1500 тонна құс етін өндіретін құс фабрикасының құрылыс аяқталуға жақын. Жобаның жалпы құны 1,9 млрд теңгені құрайды.
Қармақшы ауданының әкімі Қайрат Ырзақұлұлы Ақтөбе ауылдық округіндегі жұмыс сапары барысында құрылыс жұмыстарын аяқтауды тапсырып, тездетіп өнімді шығару және сату бағытында жауапты сала мамандарына тапсырмалар жүктеді. Құс фабрикасы іске қосылған жағдайда 70-ке дейін жұмыс орындары ашылып, жергілікті жұмыссыз азаматтарды тарту көзделуде.
Қазіргі таңда құрылыс жұмыстарының жалпы көлемі 1,2 млрд теңгені құрады. Аталған қаржыға құс фабрикасының әкімшілік және бақылау-өткізу пунктінің, 6 құс цехтарының және инкубациялық цехтың құрылыс жұмыстары, құс сою цехының металл конструкциялық жабынын монтаждау жұмыстары жүргізіліп, құс фабрикасының аумағы қоршалды.
Сонымен қатар, ағымдағы жылы құс фабрикасын іске қосу мақсатында «Бизнестің жол картасы – 2025» бағдарламасы аясында электр және сумен жабдықтау желілері, кәріз су желілері жүргізу үшін 400 млн жуық қаржы қаралып тиісті жұмыстар атқарылды.
<img src="https://kyzylorda-news.kz/wp-content/uploads/2021/07/228960648_1854674408036790_9032864769865047427_n.jpg" alt="" />
<img src="https://kyzylorda-news.kz/wp-content/uploads/2021/07/228177227_1854674434703454_712195530198590593_n.jpg" alt="" />

«Қармақшы құс» зауытының құрылыс жұмыстары аяқталуға жақын

<a href="https://kyzylorda-news.kz/">Kyzylorda-news.kz</a>. Биылғы өңіріміздегі қуаңшылық жағдайына орай белгілі қоғам қайраткері, меценат, жерлесіміз Болат Өтемұратов қорынан арнайы Арал ауданы үшін 213 млн теңге қаржы бөлінген болатын.
Бүгін осы қордың қаржысы есебінен ауданымызға жеткізілген 3565 қап бидай жемі 506 отбасыға толықтай таратылып берілді. Нақтырақ айтсақ, Қамыстыбас елді мекеніндегі 196 отбасыға 980 қап, Аманөткел ауылындағы 40 отбасыға 400 қап, Бөген ауылындағы 90 отбасыға 485 қап және Сексеуіл кентіндегі 180 отбасыға 1700 қап бидай жемі үлестірілді.
Елге жасалып жатқан үлкен көмекке, зор жанашырлықпен жасалған жомарттыққа аудан жұрты тегіс риясыз алғыстарын айтып, ақ баталарын берді.

Болат Өтемұратов қоры есебінен 506 отбасына бидай жемі жеткізілді

<a href="https://kyzylorda-news.kz/">Kyzylorda-news.kz</a>. Токиодағы Олимпиада ойындарының 30 шілдедегі сайыстарында қазақстандықтар спорттың 2 түрі бойынша бақ сынайды.&nbsp;
Бүгінгі сайыста Қазақстан атынан Лондон Олимпиадасының чемпионы, Бейжің Олимпиадасының күміс жүлдегері, Рио Олимпиадасының қола жүлдегері Ольга Рыпакова бастаған жеңіл атлеттер жарысқа шығады.
Сонымен, қазақстандық спортшылардың жарыс кестесі мынадай:
09:15 – 100 метрге жүгіру. Әйелдер. Іріктеу кезеңі Ольга Сафронова
16:05 – Үш аттап секіру. Әйелдер. Іріктеу кезеңі Мария Овчинникова, Ирина Эктова, Ольга Рыпакова.

Токио-2020: Бүгін Ольга Рыпакова жарысқа түседі

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 5060 адам коронавирус инфекциясынан жазылып шықты, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 2003,
Алматы қаласы – 825,
Шымкент қаласы – 241,
Ақмола облысы – 175,
Ақтөбе облысы – 110,
Алматы облысы – 106,
Атырау облысы – 224,
Шығыс Қазақстан облысы – 65,
Жамбыл облысы – 50,
Батыс Қазақстан облысы – 206,
Қарағанды облысы – 218,
Қостанай облысы – 198,
Қызылорда облысы – 72,
Маңғыстау облысы – 199,
Павлодар облысы – 90,
Солтүстік Қазақстан облысы – 147,
Түркістан облысы – 131.

Қазақстан және Қызылорда облысының жаңалықтары: Қоғам