<a href="https://kyzylorda-news.kz/">Kyzylorda-news.kz.</a>&nbsp; Қызылорда облысында коронавирустық инфекцияны жұқтырғандар саны 66 адамға жетті, деп хабарлайды <a href="https://www.coronavirus2020.kz/kz/kazakstandagy-koronavirus-boyynsha-7-sauir-23-40-tagy-epidemiologiyalyk-zhagday_a3635102">www.coronavirus2020.kz</a>
7 сәуір 23:40-тағы мәлімет бойынша, қаіпті індетті жұқтырған тағы 12 адам Қызылорда облысында тiркелдi. 
⠀ 
Осы сағатта Нұр-Сұлтан қаласы бойынша 222 адам, Алматы қаласында – 119 адам, Қарағанды облысында – 55 адам, Ақмола облысында – 42 адам, Атырау облысы – 32 адам, Жамбыл облысында – 45 адам, Шымкент қаласында – 20 адам, Шығыс Қазақстан облысында – 6 адам, Алматы облысында – 10 адам, Ақтөбе облысында – 11 адам, Солтүстік Қазақстан облысында – 25 адам, Павлодар облысында – 1 адам, Маңғыстау облысында – 5 адам, Қызылорда облысында – 66 адам, Батыс Қазақстан облысында – 2 адам, Түркістан облысында – 33 адам, Қостанай облысында – 3 адам, жалпы 697 науқас тіркелді.

Қызылорда облысында қауіпті індетті жұқтырғандар саны 66 болды

<a href="https://kyzylorda-news.kz/">Kyzylorda-news.kz.</a> WhatsApp мессенджері коронавирус туралы жалған ақпараттардың таралуын алдын алу мақсатында қайта жіберілетін хабарламаларға шектеу қояды, деп хабарлайды&nbsp;<a href="https://ria.ru/20200407/1569689630.html">РИА Новости</a>.
Бұл туралы компанияның мәлімдемесінде айтылады.
Енді біреуден келген хабарламаны басқа чатқа бір рет қана жіберуге болады.
<blockquote>
 «Былтыр біз бірнеше рет жіберілетін хабарламалардың концепциясын көрсеткен болатынбыз. Енді біз ол хабарламаларға шектеу қойып жатырмыз. Біреуден келген хабарламаны басқа чатқа бір-ақ рет жолдауға болады», – дейді WhatsApp өкілдері.
</blockquote>

Коронавирус: WhatsApp қайта жіберілетін хабарламаларға шектеу қойды

<a href="https://kyzylorda-news.kz/">Kyzylorda-news.kz.</a> Қызылорда облысында індеттің белең алуына орай, жаңа қаулы қабылданды. Соған сәйкес, тұрғындар мына өзгерістерден хабардар болуы керек:
– Кешкі 21.00 ден таңғы 06.00 ге дейін қалада жүруге тыйым салынды;
– Азық-түлік дүкендері, сауда үйлері 10.00 ден 18.00-ге дейін жұмыс жасайды;
– «Ақмешіт – Мерей», «Шанхай», «Аспалы көпір», «Тасбөгет» кенттерінің тұрғындары патрульдік полицияның қадағалауымен ғана қала аумағына кіре алады. Осы аудандарда әр үйден бір адам қажеттілікпен ғана шыға алады;
– Дәріханалардың жұмысына шектеу жоқ;
– 55 жастан асқан тұрғындар мен жасөспірімдерге көшеде жүруге тыйым салынады;
– Қоғамдық көліктер таңғы 06:00-ден 20.00-ге дейін күшейтілген дезинфекциялық жұмыстар арқылы жүре алады;
– Тұрғындар көшеде енді бетпердесіз жүре алмайды;
– Облыстың бас санитары қабылдаған жаңа қаулы 7 сәуірден 21-ші сәуірге дейін ұзартылды.

Карантин: Қызылордада кешкі 21:00-ден кейін жүруге мүлдем тыйым салынды

<a href="https://kyzylorda-news.kz/">Kyzylorda-news.kz.</a> Қызылорда облысында коронавирус індетінің таралуына байланысты сақтық шаралары күшейтілген түрде жүргізілуде.
Қауіпсіздікті сақтау үшін Ақтөбе облысы мен Қызылорда облысының шекаралас аймағында «Самара-Шымкент» автожолының 1279 шақырымында орналасқан медициналық бақылау бекетінде жолаушыларды тексеру жұмыстары жалғасуда.
Бүгін аталған бақылау бекетінде Қызылорда облыстық полиция департаменті басшысының орынбасары Байжан Исембекұлы болып, жұмыс барысымен танысты. Эпидемиологиялық ахуалға байланысты қолға алынған тексеріс жұмыстарының маңыздылығына тоқталып, жауапты сала мамандарына сақтық шараларын күшейтуді тапсырды.
Денсаулық сақтау мекемесінің және полиция қызметкерлері өңірімізге басқа аймақтардан келетін жолаушылардың жағдайын жіті қадағалауда. Алдымен азаматтардың дене қызуы арнайы&nbsp; аппаратпен өлшеніп, қажет болған жағдайда өзге де медициналық қызмет түрлері көрсетіледі. Одан соң жолаушылардың бағыты және жақын арада өзге аймақтарда болғандығы анықталып, байланыс телефондары мен жеке құжат нөмерлері жинақталуда.
Қазіргі уақытта бақылау бекетінде күніне 600-ге жуық жолаушылар тексерістен өткізіледі. Жолаушылар арасында жүк көліктерімен қатынап жатқан Өзбекстан, Қырғызстан елінің азаматтары да бар.
Айта кетейік, Арал қаласына кіре беріс жолдарына қойылған 4 тосқауыл бекетінде де автокөліктермен жолаушыларды тексеру жұмыстары жүргізілуде.
<img src="https://kyzylorda-news.kz/wp-content/uploads/2020/04/toskawyl-beketteri-kwshejtildi-kaz-2.jpeg" alt="" />
<img src="https://kyzylorda-news.kz/wp-content/uploads/2020/04/toskawyl-beketteri-kwshejtildi-kaz-3.jpeg" alt="" />

Қызылордадағы тосқауыл бекеттерінде күшейтілген тексеріс жұмыстары жүргізілуде

<a href="https://kyzylorda-news.kz/">Kyzylorda-news.kz.</a> Шиелі ауданына қарасты Төңкеріс ауылдық округінде коронавирус инфекциясының таралуына орай төтенше жағдайларға қарсы жедел штаб отырысы өткізіліп, оның шешімімен Төңкеріс ауылдық округі карантинге жабылды.
Осыған орай, ауылдық округтің кіреберісіне санитарлық блок-бекет қойылып, ауыл тұрғындары мен көлік құралдарының жүріп-тұруы толығымен шектелді.
Ауыл тұрғындарына қажетті азық-түлік қоры мен күнделікті тұтынатын тауарлардың жеткілікті болуы үшін аудан орталығынан ауылға олардың бағасын өсірмей әкеліп ұсыну ұйымдастырылуда.
Ауыл тұрғындарына коронавирус инфекциясынан сақтану жолдарына байланысты үнпарақтар таратылып,&nbsp; әрбір үйге түсіндіру жұмыстары жүргізілуде.
Бүгінде Төңкеріс ауылында Қызылорда қалалық және Тараз қалалық химиялық батальонның әскери қызметкерлері арқылы 73 630 шаршы метр жер залалсыздандырылды.
<img src="https://kyzylorda-news.kz/wp-content/uploads/2020/04/tonkeris-kaz-1-2.jpeg" alt="" />
<img src="https://kyzylorda-news.kz/wp-content/uploads/2020/04/tonkeris-kaz-1-3.jpeg" alt="" />

Шиелі ауданындағы Төңкеріс ауылы карантинге жабылды

<a href="https://kyzylorda-news.kz/">Kyzylorda-news.kz.</a> Коронавирустар – бұл қабатты вирустар тұқымдасына жататын, липидті, май мембранасы бар вирус. Оның тәжге ұқсас ақуыз «мүйізшелері» болады. Зерттеу кезінде олардың қабаттары басқа қабаты жоқ вирустарға қарағанда жылуға сезімтал болатындығы анықталған.
Суық кезде бұл қабық резеңкеге ұқсас күйге түседі. Мәселен табада тамақ пісіргеннен кейін май қалай қатып қалса, вирус та дәл солай қатып қалады. Демек, салқын ауа райы вирусты ағзадан тыс жерде қатырып, ұзақ сақтай алады.
Осыған байланысты қабатты вирустардың көпшілігі айқын маусымдық сипатқа ие. Зерттеу көрсеткендей, SARS-Cov-2 21-23 градус температурада және 40% салыстырмалы ылғалдылықта қатты заттардың бетінде&nbsp;(мысалы, пластика немесе болат)&nbsp;72 сағатқа дейін дейін өмір сүре алады.
Covid-19 вирусының басқа температурада және ылғалдылықта қалай әрекет ететіні әлі күнге дейін белгісіз. Алайда өзге коронавирустардың зерттеулері олардың 4 градус температурада 28 күннен астам өмір сүретінін көрсетеді.
Covid-19 белгілеріне өте ұқсас, 2003 жылы SARS қоздырғышын тудырған коронавирус та құрғақ және суық жағдайларда өзін жақсы сезінді. Температура мен ылғалдылық неғұрлым жоғары болса, бұл вирустың өмір сүру мүмкіндігі қысқа болады.
<blockquote>
 «Ағзадан тыс орналасқан вирустың тұрақтылығына климаттық жағдай әсер етеді. Мысалы, вирусты жұқтырған адам түшкіріп немесе жөтелгеннен кейін ол ауаға және жер бетіне тарайды. Вирус организмнен тыс жерде қаншалықты көп сақталса, оның адамдарға жұқтыру және эпидемияны туғызу қаупі соғұрлым жоғары. Сovid-19 инфекциясының әлемдегі ең ірі ошақтары суық, құрғақ ауа райында тіркелді», – деп түсіндіреді, қоршаған ортаның биологиялық әртүрлілікке әсерін зерттеуші, Мадридтегі Ұлттық табиғи ғылымдар мұражайының қызметкері Мигель Ароухо.
</blockquote>
<a href="https://informburo.kz/kaz/zhazy-ystyta-koronavirus-zhoyyla-ma-virusolog-mamandardy-zertteu.html">informburo.kz</a>

Жазғы ыстықта коронавирус жойыла ма?

<a href="https://kyzylorda-news.kz/">Kyzylorda-news.kz.</a> Халықаралық ғалымдар тобы өткізген эксприментте медициналық масканың коронавиурс инфекциясының таралуын тежейтіні дәлелденді, деп хабарлайды <a href="https://baq.kz/news/othernews/koronavirus-maska-tiimdiligi-rastady/">baq.kz</a>.
Ғалымдар Gesundheit II арнайы аппараттың көмегімен дамның тыныс алуы кезіндегі ауа сынамасына талау&nbsp;жасаған. Нәтижесінде маска түрлі вирустарға тосқауыл бола алатыны&nbsp; анықталған.
Гонконг университетінің мамандары жүргізген экспериментке 246 ерікті қатысқан. Масканың арқасында 111 науқас тыныс алған ауада вирус айтарлықтай төмендеген.&nbsp;&nbsp;
6 сәуірден бастап Германия канцлері Ангела Меркель коронавирус індетінің таралуына байланысты ел тұрғындарына&nbsp; маска киюді міндеттеді.

Ғалымдар қауіпті індетке масканың тиімділігін растады

<a href="https://kyzylorda-news.kz/">Kyzylorda-news.kz.</a> Алматы маңында коронавирустық инфекцияны жұқтырғандарға арналған әскери-далалық госпиталь ашылды. Бұл туралы ҚР Қорғаныс министрлігінің баспасөз қызметі хабарлады.
Желідегі мәліметтерге қарағанда оны тұрғызуға бар-жоғы 72 сағат қажет болыпты.
Госпиталь 100 төсек-орынға арналған. Онда қабылдау және диагностикалық бөлімшелер, дәріхана, операциялық блок пен жан сақтау бөлімшесі бар.
Сондай-ақ рентгендік тексеру, өкпені жасанды желдету құралдарымен жабдықталған.&nbsp;
Қауіпті індетті жұқтырғандарға арналған нысанда жылыту және ауа баптау жүйелері, тазалық тораптары мен жуыну бөлмелері де қарастырылған.
Ал госпиталь жанында 300 орындық екі ғимарат та дайын тұр. Оған қоса 500 орындық шатырлы лагерь ашылған. Олар карантин кезеңінде пайдаланылады.

Елімізде коронавирусқа арналған әскери госпиталь 72 сағатта тұрғызылды (видео)

<a href="https://kyzylorda-news.kz/">Kyzylorda-news.kz.</a> Төтенше жағдай кезінде жеке тұлғалардың банктік шоттарына қойылған шектеулер, яғни, бұғатаулар алынады. Бұл туралы ҚР Қаржы министрлігі Мемлекеттік кірістер комитеті мәлімдеді.
Мемлекет басшысының тапсырмасын орындау шеңберінде Мемлекеттік әлеуметтік сақтандыру қорынан төтенше жағдайға байланысты табысынан айырылған адамдарға 42500 теңге сомасында ай сайынғы әлеуметтік көмек аудару басталды.
<blockquote>
 «Осыған орай, аумақтық Мемлекеттік кірістер департаменттері тәуекел дәрежесі жоғары салық төлеушілерді қоспағанда, дара кәсіпкер ретінде тіркеуде тұрған жеке тұлғаларға және жеке практикамен айналысатын тұлғаларға қатысты шығарылған банк шоттары бойынша шығыс операцияларын тоқтата тұру туралы өкімдер мен инкассалық өкімдерді қолдап кері қайтаруда. Сондай-ақ, комитет тарапынан Әділет министрлігіне және Жеке сот орындаушылардың республикалық палатасына бұрын шығарылған сот бұйрықтары мен шешімдерін, сондай-ақ жіберілген салық бұйрықтары бойынша азаматтардың кез келген шоттарына салынған тыйым салудың әрекеттерін уақытша тоқтата тұруды және жеке тұлғаның берешегін өндіріп алу туралы орындаудағы салық бұйрықтары бойынша тыйым салуды тоқтата тұруды сұрап, хат жолдады», – делінген ақпаратта.
</blockquote>
Еске сала кетейік, бұған дейін 42500 теңге жәрдемақы алуға өтініш беру үшін Қызылорда облысының тұрғындарына арналып <a href="https://kyzylorda-news.kz/kogam/42500-tengge-qyzylorda-oblysynda-zheke-telegram-bot-iske-qosyldy-54464/">жеке Telegram-бот іске қосылғанын</a> хабарлаған болатынбыз.

Төтенше жағдай: Қазақстандықтардың банктегі бұғатталған шоттары ашылады

<a href="https://kyzylorda-news.kz/">Kyzylorda-news.kz</a>. Қауіпті індеттің таралуы үдей түскен Шиелі ауданына 25 әскери қызметкер жіберілді. Бүгіннен бастап ауру ошақтары, көшелер және жаяу жүргіншілер жолы залалсыздандырылады.
Қызылорда қаласында да кесте бойынша жұмыс жалғасады. 75 әскери қызметкер бүгін келесі мекенжайлар бойынша дезинфекциялық жұмыс жүргізеді. Бұдан бөлек, әр ауданға қоғамдық орындарды залалсыздандыру жөнінде тапсырма берілген.
Қызылорда қаласындағы күшейтілген дезинфекция жұмыстары мына бағыттарда жасалады:
1. Назарбаев даңғылы
Астана даңғылынан бастап
С. Бейбарыс көшесіне дейін
2. Астана даңғылы
Назарбаев даңғылынан бастап
Шоқай көшесіне дейін
3. Шоқай көшесі
С. Бейбарыс көшесінен бастап
Қорқыт Ата көшесіне дейін
4. Мұратбаев көшесі
Демесінов көшесінен бастап
Яссауи көшесіне дейін

Бүгін Қызылорда облысындағы дезинфекциялық жұмыстар күшейтілген режимге көшеді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны <a href="https://kyzylorda-news.kz/kogam/koronavirws-qyzylorda-qawipti-indetke-54-adam-shaldyqty-54530/">54 адамға жеткені</a> белгілі. Бүгін соңғы тәулікте жаңадан анықталған 17 жағдайдың мән-жайын облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
<blockquote>
 «Қазіргі таңда Қызылорда облысында коронавирустық инфекцияны жұқтырған 54 жағдай тіркелді. Соңғы тәулікте жаңадан 17 жағдай анықталды. Оның 13 – Шиелі ауданының ауданының тұрғындары. Олар – алдында анықталған науқаспен жақын қарым-қатынаста болғандар. Осы оқиғаға байланысты Шиелі ауданындағы бір ауыл түгел карантинге жабылды. Ал, 3 жағдай – Қызылорда қаласында, 1 науқас – Сырдария ауданында анықталып отыр. Қызылорда қаласында анықталған бір науқас Ақтау қаласынан вахтадан келуіне байланысты стационарлық карантинге жатқызылған болатын. Ал, Сырдария ауданындағы жағдай Нұр-Сұлтан қаласынан келген адамнан анықталды. Ол ЖРВИ симптомдары бар болуына байланысты провизорлық стационарға бақылауға алынған еді. Қаладағы қалған 2 науқас – осы инфекцияны алдында жұқтырғандармен байланыста болғандар”, – деді Жақсылық Абдусаметов.
</blockquote>
Оның айтуынша, облысымыздағы жұқпалы аурулар ауруханасында – 54 адам, правизорлық стационарда – 35, карантинде – 309 адам ем қабылдап жатыр. Барлығының жағдайы қанағаттанарлық.
Ал, Covid-19 індетін жұқтырған өңірдегі 54 науқаспен байланыста болғандардың жалпы саны – 844.&nbsp;Жақын қарым-қатынаста болғандар саны – 326, потенциалды байланыста болғандар – 518 адамды құрап отыр. Бүгінгі таңда барлығы бақылауға алынып, оқшауланған.
Басқарма басшысы атап өткендей, Қызылорда облысына қауіптілік деңгейі 1 (А) елдерінен 4 адам келген. Барлығы үй жағдайында бақылауға алынып, карантинге жатқызылған.
Сондай-ақ, өңірге қауіптілік деңгейі 1 (Б) елдерінен 120 адам келген. Оның үшеуі – стационарға оқшауланса, 117 – үй карантиніне алынған.
Жалпы, өңірде коронавирустық инфекцияны жұқтырған науқастар санының күрт көбеюіне – облыс тұрғындарының карантин тәртібін сақтамауы себеп болып отырғанын кеше&nbsp;<a href="https://kyzylorda-news.kz/kogam/koronavirws-qyzylorda-oblysynda-infekcija-zhuqtyrghan-21-nawqas-bir-otbasynyng-adamdary-54190/">жазған болатынбыз</a>. Олар жасалған ескертулерге қарамастан әлі күнге дейін жиындарға баруды, отбасылық басқосуларды тоқтатпай, керісінше, үдете түскен. Оқшаулану тәртібіне мүлдем құлақ аспаған. Нәтижесінде, өңірде ең алғашқы коронавирустық инфекция анықталған адамнан сол отбасының 21 мүшесіне қауіпті індет жұғып үлгерген. 5 сәуірдегі жағдай бойынша Шиелі ауданындағы 6 науқас – бір үйдің адамы екендігі анықталып отыр. Кешегі жағдай да – Шиелідегі сол оқиғаның жалғасы болып шықты.
<blockquote>
 «Облысымызда коронавирустық инфекцияны жұқтырғандардың саны күн сайын өсуі – тұрғындардың карантин талаптарын сақтамуынан болып отыр. Медицина қызметкерлері 24 сағат бойы осы аурудың алдын алуға тырысқанымен, оған облыс тұрғындары түсінісітік танытпай отыр. Мәселен, кеше кешке анықталған Шиелі ауданындағы науқастардың барлығы – отбасылық кешке қатысқан. Қауіпті індетті сол кеште жұқтырған”, – деді басқарма басшысы.
</blockquote>
Басқарма басшысы кешегі брифингте мәлімдегендей, облыстағы үй карантинінде отырған тұрғындардың өзі оқшаулау тәртібі мен талаптарын мүлдем сақтамай отырған көрінеді.
<blockquote>
 “Еліміздің Бас мемлекеттік санитар дәрігері бекіткен қаулыда үй жағдайында карантинге алынғандарға қойылатын талаптар толық көрсетілген. Қарапайым тілмен айтқанда. олар үйлерінен шықпауы, ешкіммен араласпаулары керек. Қаулыда көрсетілгендей, олар үй жағдайындағы карантин талаптары жазылған қолхатпен танысып, оған қол қояды. Бірақ, оны елеп жатқан тұрғындар жоқ”, – Жақсылық Әбілқасымұлы.
</blockquote>
Облыстық Денсаулық сақтау басқармасының басшысы Жақсылық Абдусаметов әр брифинг сайын облыс тұрғындарын карантин талаптары мен ережелерін, тәртібін сақтауға шақырып, дабыл қағады.
<blockquote>
 “Сонда ғана бұл қауіпті індетті жеңеміз, тұрғындар аман қалады”, – дейді ол.
</blockquote>
Ал, оны тыңдап, ескеріп жатқан қызылордалықтар жоқ…

Коронавирус: Шиелідегі 13 науқас індетті отбасылық кештен жұқтырған

<a href="https://kyzylorda-news.kz/">Kyzylorda-news.kz.</a> Қызылорда облысында бүгін коронавирустық инфекцияға шалдығудың 4 жағдайы анықталды. Олардың үшеуі – Қызылорда қаласынан, біреуі – Сырдария ауданынан екендігі белгілі болды. Бұл туралы Мемлекеттік комиссияның шұғыл штабы хабарлады.
<blockquote>
 “Ауру жұқтырғандардың 3 жағдайы қалада тіркелді, олар науқас адаммен қарым-қатынаста болуына байланысты карантиндік стационарға жатқызылған. Ал 1 жағдай Сырдария ауданында тіркелді, ол Нұр-Сұлтан қаласынан келгендігі және ЖРВИ симптомдары бар болуына байланысты провизорлық стационарға бақылауға алынған. Аталған азаматтардың барлығынан ҚР Бас мемлекеттік санитариялық дәрігердің қаулысына сәйкес зертханалық сынамалар алынып, диагноз нақтыланды. Қазіргі таңда науқастардың жағдайлары қанағаттанарлық. Бекітілген хаттамаға сәйкес тиісті ем жүргізілуде. Қазіргі таңда науқастармен қарым-қатынаста болған адамдар анықталып, барлығы медициналық бақылауға алынуда”, – делінген аталған хабарламада.
</blockquote>
Сондай-ақ, ауру ошақтарында эпидзерттеу жұмыстары, дезинфекциялық жұмыстар жүргізілуде.
Айта кетейік, бүгін Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/kogam/koronavirws-qyzylorda-qawipti-indetke-54-adam-shaldyqty-54530/">54 адамға жеткенін</a>&nbsp;хабарлаған болатынбыз.
Оның ішінде, Қызылорда қаласында – 9, Жаңақорған ауданында – 16 жағдай, Қармақшыда – 4, Шиеліде – 24, Сырдария ауданында – 1 жағдай тіркеліп отыр.

Қазақстан және Қызылорда облысының жаңалықтары: COVID-19