<a href="https://kyzylorda-news.kz/">Kyzylorda-news.kz.</a> Жағдай күрделеніп кетпесе төтенше жағдай режимі он бірінші мамырда аяқталады. Бұл туралы ҚР Президенті Қасым-Жомарт Тоқаев Парламент Сенатының отырысында сөйлеген сөзінде айтты.
<blockquote>
 «Біз дер кезінде қолға алынған шаралардың арқасында коронавирус індетінің жаппай таралуына тосқауыл қойдық. Мұны Дүниежүзілік денсаулық сақтау ұйымы, халықаралық сарапшылар жоғары бағалады. Пандемия ел экономикасына кері әсерін тигізіп отыр. Осыған қарай, Үкімет азаматтарға, шағын және орта бизнес өкілдеріне қолдау көрсетуде. Бюджеттен қомақты қаражат бөлінді. Табысынан айырылған адамдар қаржылай көмек алып жатыр. Мұның бәрі халықтың тұрмыс жағдайын төмендетпеу үшін жасалуда. Қабылданған шаралар өз нәтижесін бере бастағанын көріп отырмыз. Жағдай күрделеніп кетпесе, төтенше жағдай режимі он бірінші мамырда аяқталады. Бірақ карантин режиміне байланысты іс-шаралар жалғаса береді. Бұл ел тұрғындарының қауіпсіздігі үшін аса қажет»,-деді Мемлекет басшысы.
</blockquote>

Тоқаев: Төтенше жағдай аяқталғанымен, карантин режиміне байланысты іс-шаралар жалғаса береді

Президент Қасым-Жомарт Тоқаев: Еліміз бұл қиындықтан шыңдалып шығады

<a href="https://kyzylorda-news.kz/">Kyzylorda-news.kz.</a> Карантиннен кейін қозғалыссыз қалған адамға үйден жұмысқа барғанға дейінгі жолға үйрену керек болады. Спорт психологы, Дене тәрбиесі және спорт орталығының жетекші ғылыми қызметкері Ольға Тиунова карантиннен кейін дене формасын қалай қалпына келтіруді айтып берді, деп хабарлайды&nbsp;<a href="https://ria.ru/20200504/1570938149.html">РИА Новости</a>.
<blockquote>
 «Біз физикалық қалыпты екі айдың ішінде реттейміз. Бұл – барлығы білетін ғылыми факт. Бірақ оны екі есе тез жоғалтамыз. Физикалық тұрғыдан айтсақ, барлығымыз отырып қалдық. Қазір күнделікті режимге қарапайым жаттығулар қосатын кезең. Бірақ мұны қағазға түсіріп отырған дұрыс. Себебі жаттығу жасағаннан кейін бақылау керек. Саналы түрде орындаған жөн», – деді Ольга Тиунова.
</blockquote>
Бұл әдіс артық салмақпен күресте де жарайды екен. Кесте құрып, тастайтын салмақтың мөлшерін жазу керек. Сосын күнде салмақты өлшеп, жазып алу керек. Психологтың айтуынша, бұл мақсатыңызға жақындап келе жатқаныңызды түсінуге көмектеседі.
Сондай-ақ, Тиунова карантин режиміне дейін спорт залдарына барғандарға жаттығуларын бұрынғы режимінен екі есе төмен ырғақпен орындауға кеңес берді.&nbsp; Еске салайық, Қазақстанда төтенше жағдай режимі <a href="https://kyzylorda-news.kz/kogam/elimizde-toetenshe-zhaghdaj-merzimi-11-mamyrgha-dejin-uzartylady-58852/">11 мамырға дейін ұзартылды</a>.

Сарапшы карантиннен кейін не істемеу керегін айтты

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында коронавирустық инфекцияны жұқтырған науқастар саны 214 адамға жетті. Соңғы тәулікте жаңадан жағдай анықталған жоқ. Бүгін облыстық Денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте облыстағы ахуалды баяндады.
<blockquote>
 «Қазіргі таңда Қызылорда облысында коронавирустық инфекцияны жұқтырған 214 жағдай тіркелді. Соңғы тәулікте жаңадан жағдай анықталған жоқ», – деді Жақсылық Абдусаметов.
</blockquote>
Оның айтуынша, COVID-19 індетін жұқтырған өңірдегі 214 науқаспен байланыста болғандардың жалпы саны – 3242.&nbsp;Оның ішінде, жақын қарым-қатынаста болғандар саны – 1746, потенциалды байланыста болғандар – 1496 адамды құрап отыр. Бүгінгі таңда барлығы бақылауға алынып, оқшауланған. Барлығының жағдайы қанағаттанарлық.
Сондай-ақ, бүгінгі таңда облысымыздағы жұқпалы аурулар ауруханасында – 76, правизорлық стационарда – 24, карантиндік стационарда – 402 адам бақылауда.
Брифингте Жақсылық Әбілқасымұлы мәлімдегендей, өткен тәулікте облысымызда коронавирустық инфекцияға байланысты 70 тест сынамасы жасалыпты.
<blockquote>
 «Соңғы тәулікте 70 тест сынамасы жасалды. Оның 60 – теріс мәнді болып шықты. Ал, 10 – әлі тексерілу үстінде. Бүгінде облысымызда 5392 тест сынамасының қоры қалды. Мереке күндері осы ПТР аппараттары техникалық қызмет көрсетуге қойылған болатын. Бүгіннен бастап қайтадан күнделікті жоспар бойынша іске қосылатын болады», – деді ол.
</blockquote>
Сондай-ақ, басқарма басшысы облысымызда бүгіннен бастап карантин талаптарын жеңілдетудің келесі кезеңі басталғанын мәлімдеді.
<blockquote>
 «Облысымызда бүгіннен бастап карантин талаптарын жеңілдетудің екінші кезеңі басталды. Бұл дегеніміз – тұрғындар арасындағы қарым-қатынас көбейеді деген сөз. Сондықтан, карантин талаптарын сақтап, қоғамдық орындар мен жұмыста, отбасында жұғуға жол бермеуге баса назар аударған жөн», – деді Ж. Әбілқасымұлы.
</blockquote>
Айта кетейік, кеше Қызылорда облысында коронавирустық инфекцияға шалдыққан науқастардың саны&nbsp;<a href="https://kyzylorda-news.kz/densawlyq/qyzylorda-oblysynda-qawipti-indet-zhuqtyrghandar-sany-214-boldy-60031/">214 адамға жеткенін</a>&nbsp;хабарлаған болатынбыз.

Қызылорда облысында індет жұқтырғандармен жақын қарым-қатынаста болған 1746 тұрғын бар

<a href="https://kyzylorda-news.kz/">Kyzylorda-news.kz.</a> 4 мамырдан бастап далада спортпен шұғылданып, жаттығу жасауға рұқсат етіледі.
4 мамырдан бастап барлық өңірлерде жұмысқа кірісетін кәсіпкерлік субъектілерінің қызмет түрлерінің <a href="https://kyzylorda-news.kz/kogam/qyzylordada-zhumys-zhasawgha-ruqsat-etilgen-kaesipkerlik-swbektileri-anyqtaldy-59427/">тізімі бекітілді</a>: аумағы 500 ш. м. дейін болатын азық-түліктік емес дүкендер сағат 17:00-ге дейін (барлық түрлері); фотосалондар, гүл сататын дүңгіршектер; шаштараздар (жазылу бойынша); медицина орталықтары (жазылу бойынша); стоматологиялық клиникалар (жазылу бойынша); жылжымайтын мүлікпен операцияларды жүзеге асыратын компаниялар, жарнама агенттіктері, адвокаттар, нотариустар; шағын қаржы ұйымдары, сақтандыру компаниялары, ломбардтар, айырбастау пункттері; ақпараттық-коммуникациялық технологиялар компаниялары.
Сондай-ақ, 4 мамырдан бастап далада спортпен шұғылданып, жаттығу жасауға рұқсат етіледі.
Сонымен қатар, бүгіннен бастап Нұр-Сұлтан мен Алматыдан Қызылордаға, Петропавлға, Өскеменге және Семейге әуе қатынастарын қайта жанданады.
4 мамырдан өңірлерде қатынайтын ұшақтардың ұшу кестесі <a href="https://kyzylorda-news.kz/kogam/4-mamyrdan-bastap-oengirlerde-qatynajtyn-ushaqtardyng-ushw-kestesi-zharijalandy-59523/">мына жерде&nbsp;жарияланған.</a>
Еске сала кетейік, бұл шешімдер ҚР Премьер-Министрі Асқар Маминнің төрағалығымен ҚР Президенті жанындағы Төтенше жағдай режимін қамтамасыз ету жөніндегі мемлекеттік комиссияның кезекті отырысында қабылданған&nbsp;болатын.

Қазақстандықтарға бүгіннен бастап далада спортпен шұғылдануға рұқсат етіледі

<a href="https://kyzylorda-news.kz/">Kyzylorda-news.kz</a>. “Air Astana” әуекомпаниясы билеттердің бағасын 10 мамырдан кейін көтере алады. Бұған дейін тарифтер бұрынғыдай қалады, деп хабарлайды&nbsp;<a href="https://24.kz/kz/zha-aly-tar/ekonomika-zhnalyktary/item/392784-elimizde-ue-biletteri-ymbattama">Хабар 24</a>.&nbsp;
Компанияның мәлімдеуінше, Қазақстанда авиатасымалдаушыларға қойылып отырған талаптар жоғары және ұшақтардың жартылай бос болуынан біраз шығын әкеледі.
<blockquote>
 “Егер жолаушыларды “біреуден кейін” отырғызу туралы талап жойылмаса, біз 10 мамырдан кейін авиабилеттердің бағасын көтеруге мәжбүр боламыз”, – деді “Air Astana” АҚ Корпоративтік коммуникациялар жөніндегі менеджері Тілек Әбдрахимов.
</blockquote>
Дегенмен, осыдан алдын индустрия және инфрақұрылым министрлігінің өкілдері авиабилеттердің бағасы бұрынғы бағада қалатынын айтып еді.
<blockquote>
 “Әуе кемесінің бортында әлеуметтік қашықтық, жолаушыларды бір жолаушы креслосы арқылы отырғызу қажет. Осыған байланысты әуе кемелері 50-60% – ға толтырылатын болады. Бірақ авиакомпанияда тарифтер көтерілмейді”, – дейді &nbsp;ҚР МИИР азаматтық авиация комитетінің орынбасары Салтанат Томпиева.
</blockquote>

«Air Astana» әуекомпаниясы билеттердің бағасын көтеруге мәжбүр екенін мәлімдеді

<a href="https://kyzylorda-news.kz/">Kyzylorda-news.kz</a>. Осыдан ширек ғасыр бұрын түзде жосыған киіктердің саны 1 млн 400 мыңнан асатын. Алайда, кейіндері Қазақстанда ақбөкендер жойылуға шақ қалып, «Қызыл кітапқа» кіре жаздады. Тәуелсіздік жылдарында олар бірнеше рет қырылды. Қоғамдық пікір бұған «Байқоңырдан» ұлы далаға улы гептил шашып ұшатын «Протон» ауыр зымыран тасығыштарын айыптады.
Кейін қоғамның қысымы, әрі Ресейдің еліміздегі ғарыш айлағынан теріс айнала бастауы арқасында бұл зиянды зымырандардың сапары азайды. Енді коронавирустық пандемияға байланысты елде төтенше жағдай және адамдардың қозғалысына қатаң шектеу енгізілуі киелі жануарлардың бағын ашыпты. Ауылдағы шаруа қожалықтары мен егіншілер далада киіктердің қаптап кеткеніне назар аудартып, ауыл шаруашылығы және экология министрліктеріне шағым жолдап жатыр.
<blockquote>
 «Қазіргі кезде шаруа қожалықтарында, далада шөп шабылмай жатыр. Осы орайда, шабындықтар мен мал жайылатын жайылымдардың аумағында киіктер саны тым көбейіп кетті. Адамдардың жоғын пайдаланып, киіктер шөбімізді жеп, шабындықтарымызды емін-еркін отауда. Оған қоса, жаңа төлдеген малдарымыздың төлдері де киік жүгіріп өткенде соларға ілесе шауып, жоғалып кетіп жатыр. Жабайы аңдардың қорғалуына, мемлекеттің аз жануарларды сақтауды қамтамасыз ететініне және киіктерді атуға заң жүзінде тыйым салынуына байланысты, киіктерді қатты үркіте де алмаймыз. Оларға қарсы пәрменді шара қолдана алмаймыз», – деп қамығады Батыс Қазақстан облысындағы Жәнібек ауданының ауыл шаруашылығы өндірушісі Нұрболат Темірболатов.
</blockquote>
Батысқазақстандық шаруа қожалықтары атынан Экология, геология және табиғи ресурстар министрі Мағзұм Мырзағалиевке жүгінген ол мемлекет қорғауындағы жануарлардың тайраңдауына мемлекеттің өзі тосқауыл қоюы керегін айтады.
<blockquote>
 «Бұл мәселе шешілуі үшін киіктерді басқа жаққа айдату керек немесе мәселенің басқа оң шешімін табуларыңыз үшін сізден көмек сұраймыз. Әйтпесе, киіктер өте көп, шамамен 300 мыңдай», – дейді Нұрболат Темірболатов.
</blockquote>
Осындай жағдай өзге өңірлерде де болып жатқан көрінеді. Белгілі кәсіпкер, қоғам белсендісі Асылхан Орынбасаров киіктердің басты қауіп-қатерлерінен уақытша болса да құтылғанын білдірді.
<blockquote>
 «Әсіресе, Қызылорда және Ақтөбе облыстарында бірнеше жыл бойы браконьерлік мәселесі шектен шығып кеткені жасырын емес. Соның ішінде ақбөкенге шығатындар көбейді. Екі мүйіздің бағасы 200 доллардай тұратындықтан, мұндай оңай табыс табу көзі дағдарыс кезінде 90-жылдардағы сияқты Қазақстанға қайтадан үлкен проблема әкелді. Мысалға, 2016 жылы Қызылорда қаласында «Алтын балық» базарында қуырдаққа деп, киік етінің келісін 1000 теңгеден қысылмай сатқаны кездесті. Бұған жол беріп отырғандар – охотинспекцияның кейбір алақол мамандары. Олар заңсыз киік аулаушылар қылмысына көз жұма қарады. Кейбірі, тіпті, браконьерлермен бірге заңсыз аң аулаумен айналысты.&nbsp;Киік – мамонттар дәуірінен келе жатқан жануар, оны келер ұрпаққа сақтап қалуымыз керек», – дейді ол.
</blockquote>
Қазақстанда киіктерді заңсыз ату фактілері тек төтенше жағдай қарсаңында тіркелді. Одан кейін мұндай дерек айтылмады.
Бұрындары киік – аулауға жататын аң саналатын. Алайда, олар жойылуға шақ қалғасын аулауға уақытша тыйым салынды. Дегенмен, саны миллионнан асса, аулауға қайтадан рұқсат етілуі мүмкін.
Бұған дейінгі тыйым мерзімі 2020 жылғы желтоқсанда аяқталуға тиіс болатын. Дегенмен, биылғы 10 ақпанда АШМ Орман шаруашылығы және жануарлар әлемі комитеті киік аулауға тыйым мерзімін 2023 жылға дейін ұзартты.

Карантин: Браконьерлерден құтылған киіктер күрт көбейіп, шаруалардың жайылымын жайпауда

<a href="https://kyzylorda-news.kz/">Kyzylorda-news.kz</a>. Екі айдың ішінде мұнай өндіруді тәулігіне 9,7 миллион баррельге қысқартуды қарастыратын ОПЕК+ келісімі аясында Қазақстан өндіруді тәулігіне 390 мың баррельге азайтуға міндеттеме алды, деп хабарлайды ҚР Энергетика министрлігінің баспасөз қызметі.
Әлемде және Қазақстанда мұнайға сұраныстың төмендеуі аясында мұнай қорларының едәуір профицитінің болуына байланысты биылғы жылдың екінші тоқсанында мұнай сақтау орындарының толып кету және қазақстандық кен орындарының авариялық тоқтау қаупі туындайды.
Осыған байланысты министрлік мамыр-маусым айларында мұнай өндіруді шектеу қажет болатын жер қойнауының жекелеген учаскелерінің тізбесімен бірге «Көмірсутектерді барлау және өндіру жөніндегі операцияларды және өндіру жөніндегі операцияларды жүргізу үшін жер қойнауы учаскелерін пайдалануға уақытша шектеулер енгізу туралы» Үкімет қаулысының жобасын әзірледі.
<blockquote>
 «Өндірісті шектеу орташа, ірі және алып кен орындары санатына жататын кен орындарына қолданылады. Аталған жер қойнауы тізбесіне экономикалық факторларға байланысты өндірудің табиғи төмендеуі күтілетін шағын және ұсақ кен орындары кірмеген. Бұл қаулы барлық Қазақстан Республикасының ішкі нарығының мұнай өнімдерінің қажетті көлеміне деген қажеттілігін қамтамасыз етуді ескере отырып, барлық өндіруші компанияларға кемсітушіліксіз көзқарасты, сондай-ақ ірі жобалар мен өндірудің табиғи төмендеуі кезеңінде тұрған байырғы кен орындары үшін мұнай өндіруді азайту жөніндегі міндеттемелерді әділ бөлуді көздейді» делінген хабарламада.
</blockquote>

Қазақстан мұнай өндіруді қысқартады

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекциядан жазылған науқастардың саны 137 адамға жетті.
3 мамыр 13:30-дағы&nbsp;мәлімет бойынша Қызылорда облысында тағы 10 науқас қауіпті індеттен жазылып шыққан. Індеттен айыққандардың қатарына соңғы қосылған науқастар – Қызылорда қаласы мен Жаңақорған ауданының тұрғындары.
Осылайша коронавирустық инфекциядан жазылғандар саны өңірде 137 адамға жетіп отыр.
Аталған науқастардан 2 реттен сынама тест алынып, бәрі теріс мәнді нәтиже көрсеткен.
Олар алдағы 14 күнде дәрігерлердің бақылауында болады.

Қызылорда облысында 137 науқас қауіпті індеттен жазылып шықты

<a href="https://kyzylorda-news.kz/">Kyzylorda-news.kz</a>. АҚШ-тағы Миннесота университетінің ғалымдары осылай дейді. Айтуларынша, жер бетіндегі халықтың үштен екісі осы вирусты жұқтырып, одан айығып кетпегенше, індетті бақылауға алу мүмкін емес, деп хабарлайды <a href="https://24.kz/kz/zha-aly-tar/lemde/item/392953-alymdar-koronavirus-pandemiyasy-2-zhyl-a-sozyluy-m-mkin">«Хабар 24»</a>.
Ал ауру белгісі байқалмайтын науқастар кесірінен «КОВИД-19-ды» тізгінде ұстау одан сайын қиындай түспек.
Жалпы, мамандардың сөзінше, коронавирустың таралуы әлі де қайталануы ықтимал.
Сондықтан мұндай жағдайға тас-түйін дайын болу керек дейді олар.
Айта кетейік, Джонс Хопкинс университеті ұсынған мәліметке сай, бүгінде әлемде 3 миллионнан астам науқас тіркелді.
Басым бөлігі АҚШ, Испания және Италия елдерінде анықталған.

Ғалымдар: Коронавирус пандемиясы 2 жылға созылуы мүмкін

<a href="https://kyzylorda-news.kz/">Kyzylorda-news.kz</a>. 2020 жылғы 1 мамырдан бастап Нұр-Сұлтан мен Алматы қалалары арасында әуе қатынасы қайта жанданды.
6 мамырдан бастап Қызылорда-Нұр-Сұлтан бағыты бойынша ұшуларды «Қазақ Эйр» әуе компаниясы жиілігі аптасына 3 рет орындайтын болады (дүйсенбі, сәрсенбі және сенбі күндері).
Ұшу кестесін «Қазақ Эйр» әуе компаниясының ресми сайтынан көруге болады. Билеттер онлайн түрде сатылымға шығарылды.
Ал, Қызылорда-Алматы бағыты бойынша ұшу кестесі мен орындайтын әуе компаниясы құзырлы министрлік тарапынан нақтылануда. Ол жайлы ақпарат қосымша хабарланатын болады.
Барлық ұшу рейстері Қазақстан Республикасының көліктегі бас мемлекеттік санитарлық дәрігерінің 2020 жылғы 30 сәуірдегі №3 қаулысы талаптарының қатаң сақталуымен орындалатын болады.
Жолаушыларға сапарға шығу барысында бірқатар ережелерді қатаң сақтау міндеттеледі:
1. Теріс нәтижесі бар COVID-19 тест (ПТР-тестін) тапсырғандығы туралы анықтаманың болуы (анықтама берілген күннен бастап 7 күнтізбелік күн ішінде жарамды). 
COVID-19 тестіні (ПТР-тестін) қолында әуе билеті болған жағдайда ғана Ұлттық сараптама орталығында ақылы түрде тапсыруға болады.
Сараптама орталығы Қызылорда қаласы, Бектұрғанов көшесі 10 А мекен жайда орналасқан. Байланыс тел: 70 10 63. Тест құны – 11 500 теңге, нәтижелердің дайын болу мерзімі – 12 сағат. Тестілеуге қатысты қосымша ақпаратты Орталықтың байланыс нөмерлері арқылы алуға болады.
2. Тіркеуден өту үшін әуежайға ұшудан кемінде 2 сағат бұрын келу.
Әуежайға келгеннен кейін барлық жолаушылар термометрия процедурасынан өтеді. Әуежай ғимаратына тек ұшатын жолаушылар ғана жіберіледі. Сондай-ақ, жолаушыларды тіркеу, ұшаққа отырғызу / түсіру кезінде қауіпсіз әлеуметтік ара-қашықтықтың сақталуы қажет (1 метр).
3. Ұшу барысында жеке қорғаныс құралдарын (маска, қолғап) пайдалану.
4. Қол жүгі мен багаждың аз көлемде болуы. Олардың көлемі мен салмағы әуе компаниямен белгіленеді.
5. Ұшу барысында борт-серіктермен ұсынылған сауалнаманы (анкета) толтыру.
Сонымен қатар, әуежайға қатынайтын арнайы автобус бағыты ұйымдастырылған.

Қызылорда – Нұр-Сұлтан бағыты бойынша әуе рейстері ашылады

<a href="https://kyzylorda-news.kz/">Kyzylorda-news.kz</a>. Қызылорда облысында коронавирустық инфекция жұқтырған тағы 4 науқас тіркелді.
3 мамыр 10:20-дағы&nbsp;мәлімет бойынша қауіпті індетке шалдыққан 4 науқастың барлығы – Қызылорда қаласынан.
Айта кетейік, осымен облыс бойынша коронавирустық инфекция жұқтырған науқастардың жалпы саны 214 адамға жетті.

Қазақстан және Қызылорда облысының жаңалықтары: COVID-19