<a href="https://kyzylorda-news.kz/">Kyzylorda-news.kz.</a> Мемлекеттік комиссия екі аптаға созылатын қатаң карантин шараларын бекітті. Оған сәйкес, 5 шілдеден бастап өңірлер арасында жолаушылар автобусы қатынамайды .
Эпидемиологиялық ахуалды тұрақтандыру үшін Қазақстанда 5 шілдеден бастап <a href="https://kyzylorda-news.kz/kogam/elimizde-5-shildeden-bastap-karantin-qalaj-ornajtyny-belgili-boldy-69862/">14 күнге шектеу шаралары</a> енгізілді.
Мемлекеттік комиссия шешіміне сәйкес, халықаралық әуе қатынасы сақталады, бірақ елдер тізімі бұдан әрі толықтырылмайды.
Өңірлер арасында ұшақ пен пойыздар қатынай береді, алайда бірқатар шектеу бар.
<blockquote>
 “Өңірлер арасындағы жолаушылар автобусы қатынасы уақытша тоқтатылады. Қоғамдық көліктің жұмыс уақыты шектелді”, – делінген хабарламада.
</blockquote>
Айта кетейік, Қазақстанда қалааралық автобус тасымалы 5 маусымда жанданған болатын. Жолаушылар салонға тек маскамен кіргізіліп, ал ең соңғы аялдамада көлікке дезинфекция жасауға міндеттелді.

Елімізде қалааралық автобустар қайта тоқтайды

<a href="https://kyzylorda-news.kz/">Kyzylorda-news.kz.</a> ҚР Премьер-Министрінің орынбасары Ералы Тоғжанов&nbsp;<a href="https://kyzylorda-news.kz/kogam/elimizde-5-shildeden-bastap-karantin-qalaj-ornajtyny-belgili-boldy-69862/">5 шілдеден бастап</a> енгізілетін&nbsp;шектеу шараларына қосымша шешімдер қабылдануы мүмкін екенін айтты.
<blockquote>
 «Белгіленген 14 күн аралығында аталған шаралардың тиімділігіне мониторинг жүргізіліп, нақты қорытындылар шығарылып отырады. Нәтиже бермеген жағдайда шектеу шаралары бойынша қосымша шешімдер қабылдануы мүмкін. Сонымен қатар, бүгін күн тәртібінде тұрған негізгі мәселе – медициналық мекемелерде коронавируспен ауырғандарды емдеуге арналған жатын орын санын арттыру. Мемлекет басшысының тапсырмасына орай, шілде айының соңына дейін инфекциялық және провизорлық орын саны 50 пайызға арттырылып, 28 мыңнан 42 мыңға дейін жеткізілетін болады», – деді Е. Тоғжанов бүгін Орталық коммуникациялар қызметінде өткен баспасөз мәслихатында.
</blockquote>
Оның сөзіне қарағанда, тамыз айына дейін ПТР-тестілермен қамтылу тәулігіне 30 мыңнан 39 мыңға дейін жеткізіледі.

Тоғжанов: Үкімет 2 апталық карантинге қосымша шаралар енгізуі мүмкін

<a href="https://kyzylorda-news.kz/">Kyzylorda-news.kz.</a> ҚР Премьер-Министрінің орынбасары Ералы Тоғжанов карантинт режимін бұзғандарға айыппұл салынатынын мәлімдеді.
<blockquote>
 «Карантиндік режим мен санитарлық-эпидемиологиялық талаптарды бұзғаны үшін әкімшілік жауапкершілікке жеке тұлғалар 30 АЕК-ке (1 АЕК – 2778 теңге / 30 АЕК – 83 340 теңге), ал кәсіпкерлік субъектілері 230 АЕК-тен (638 940 теңге) жоғары сомаға тартылады. Тиісті нормативтік-құқықтық акті осы аптада қабылданады», – деді Е. Тоғжанов бүгін Орталық коммуникациялар қызметінде.
</blockquote>
Еске сала кетейік, бүгін Мемлекеттік комиссия эпидемиологиялық жағдайды тұрақтандыру жөніндегі&nbsp;<a href="https://kyzylorda-news.kz/kogam/elimizde-5-shildeden-bastap-karantin-qalaj-ornajtyny-belgili-boldy-69862/">шараларды бекіткен</a> болатын.
Оған сәйкес, биылғы 5 шілдеден бастап елімізде 14 күнге бірқатар шектеу шараларын енгізу шешімі қабылданды.

Карантин талаптарын бұзған қазақстандықтар айыппұл төлейтін болды

<a href="https://kyzylorda-news.kz/">Kyzylorda-news.kz.</a> Коронавирус пен пневмонияның таралуы жөніндегі ақпараттардан кейін қазақстандықтар дәріханалардан түрлі препараттарды жаппай сатып алуда. <a href="http://kgd.gov.kz/ru/news/komitet-gosudarstvennyh-dohodov-rasskazal-ob-aptekah-skryvayushchie-dohody-1-68829">Мемлекеттік кірістер комитетінің</a> мәліметінше, қазақстандық дәріханалар жаздың алғашқы 2 аптасында 10 миллиард теңгеден астам табыс тапқан.
Мемлекеттік кірістер комитеті аталған соманың тек онлайн-БКМ деректеріне ғана негізделгенін атап өтті. Ревизорлардың айтуынша, нақты сома бұдан әлдеқайда жоғары: фармацевтикалық бизнеспен айналысатындардың көбісі өз табыстарын жасырады.
Республика бойынша “дәріхана” қызмет түрін көрсете отырып, барлығы 3 527 кәсіпкер, 7 674 онлайн-БКМ тіркеген. Онлайн-БКМ енгізу салық есептілігін күтпестен, айналымдар сомасын ғана емес, өткізілген тауар, жұмыс немесе қызмет үшін есеп айырысу кезінде оны қолданбайтын кәсіпкерлерді де мониторинг жүргізуге мүмкіндік береді.
Мысалы, 868 дәріхана иелерінің онлайн-БКМ қолданбайтыны аңықталды, бұл ретте олар өз қызметін тоқтатқан жоқ. Жалпы, 3 527 дәріхананың ішінен 60% немесе 2137 дәріхана нақты айналымдарын көрсетті.
Осыған орай мемлекеттік кірістер комитеті азаматтарды тауарларды, жұмыстар мен қызметтерді сатып алу кезінде чектерді талап ете отырып, азаматтық белсенділік танытуға шақырады.

Қазақстандықтар екі апта ішінде 10 млрд теңгеге дәрі-дәрмек сатып алған

<a href="https://kyzylorda-news.kz/">Kyzylorda-news.kz.</a> ҚР Премьер-Министрі Асқар Маминнің төрағалығымен өткен Мемлекеттік комиссия отырысында ҚР Президенті Қасым-Жомарт Тоқаевтың тапсырмасына сәйкес Қазақстандағы эпидемиологиялық ахуалды тұрақтандыру шаралары қаралды, деп хабарлайды&nbsp;<a href="https://primeminister.kz/kz/news/memlekettik-komissiya-kr-dagy-epidemiologiyalyk-zhagdaydy-turaktandyru-zhonindegi-sharalardy-bekitti-26644">primeminister.kz</a>.
Елдегі санитарлық-эпидемиологиялық жағдай және коронавирус инфекциясының таралуына жол бермеу мақсатында шектеу шараларын енгізу бойынша ұсынылатын шаралар туралы денсаулық сақтау министрі А. Цой баяндады.
Қазақстанда эпидемиологиялық ахуалдың өршуін және коронавирус инфекциясымен сырқаттанушылықтың өсуін ескере отырып, Мемлекеттік комиссия биылғы 5 шілдеден бастап 14 күнге келесі шектеу шараларын енгізу туралы шешім қабылдады:
Көлік қатынасы бойынша:
1. Елдер тізімін көбейтпей, халықаралық әуе қатынасын сақтау;
2. Өңірлер арасындағы әуе қатынасын, темір жол қатынасын сақтау (шектеулермен);
3. Өңірлер арасындағы жолаушылар автобусы қатынасын уақытша тоқтату;
4. Қоғамдық көліктің жұмысын уақыт бойынша шектеу.
Азаматтардың жүріп-тұруы бойынша:
1. Ойын-сауық, спорт және басқа да бұқаралық іс-шараларды, сондай-ақ отбасылық, еске алу шараларын өткізуге тыйым салу;
2. Ашық ауада жаттығулар жасауға рұқсат ету;
3. Тұрғындардың көшелерде, саябақтарда, скверлерде 3 адамнан артық серуендеуін шектеу;
4. 65 жастан асқан адамдардың сыртқа шығуын шектеу.
Мына нысандардың қызметіне тыйым салу керек:
1. Сұлулық салондары, шаштараз, спорт залдары, фитнес орталықтар, бассейндер, азық-түлік және азық-түліктік емес жабық базарлар, жағажайлар, аквапарктер, мәдениет нысандары, музейлер, көрмелер, форумдар, конференциялар және өзге де ұйымдастырылған бұқаралық іс-шаралар, ойын-сауық орталықтары, мектепке дейінгі балалар мекемелері (кезекші топтардан басқа), діни нысандар және т. б. (СОСО-дағы ойын-сауық орталықтары, ойын-сауық нысандары (караоке, бильярд, компьютер клубтары, боулинг орталықтары), кинотеатрлар, балаларды сауықтыру лагерлері, фудкорттар, банкет залдары).
2. Мемлекеттік органдардың (ұйымдардың), кеңселердің, ұлттық компаниялардың және өзге де ұйымдардың қызметкерлерінің кемінде 80%-ның қашықтан жұмыс істеу режимін сақтау;
3. Алдын ала жазылу бойынша медицина орталықтарының қызметін сақтау;
4. Дәріханалардың, азық-түлік дүкендерінің, ашық базарлардың қызметін сақтау;
Күшейтілген санитарлық-дезинфекциялық режимді сақтай отырып, келесі нысандардың қызметін сақтау: ашық ауада қоғамдық тамақтану нысандары; үздіксіз өндірістік айналымы бар құрылыс, өнеркәсіп кәсіпорындары; ашық ауадағы құрылыс жұмыстары; ауыл шаруашылығы, балық шаруашылығы және мал шаруашылығы жұмыстары; халыққа қызмет көрсету салалары, оның ішінде авто жуу, автомобильдерді және тұрмыстық техниканы жөндеу, ХҚКО-лар, екінші деңгейлі банктер (уақыт бойынша шектеу енгізумен).
Үкімет басшысы еліміздегі эпидемиологиялық ахуалдың алдағы уақытта қалай өзгеретініне байланысты аталған шектеу шаралары 2 аптаға ұзартылуы немесе қатаңдатылуы мүмкін екенін атап өтті.
Жаңа шектеу шараларын талқылауға орталық мемлекеттік және жергілікті атқарушы органдардың басшылары, ҚР Парламенті Мәжілісінің депутаттары, «Атамекен» ҰКП төрағасы А. Мырзахметов, Қазақстан кәсіпкерлерінің құқықтарын қорғау жөніндегі уәкілетті Р. Жүрсінов және т. б. қатысты.
<img src="https://kyzylorda-news.kz/wp-content/uploads/2020/07/200702121344477e.jpg" alt="" />

Елімізде 5 шілдеден бастап карантин қалай орнайтыны белгілі болды

<a href="https://kyzylorda-news.kz/">Kyzylorda-news.kz.</a> Денсаулық сақтау вице-министрі Людмила Бюрабекова халық арасындағы жоғары сұранысқа ие препараттарды дәріханаларға жеткізу тәртібін түсіндірді.
<blockquote>
 “Қазіргі кезде парацетамолды дәріханаларға таратып жатыр. Алматыда бар, Қарағанды облысы мен Нұр-Сұлтан қаласында сатылуда. Алдағы екі-үш күнде басқа аймақтарға да жеткізіледі”, – деді Бюрабекова онлайн брифингте.
</blockquote>
Вице-министрдің айтуынша, температураны басқа да стероидты емес препараттармен түсіруге болады. Мәселен, Ибупрофен бар.
<blockquote>
 “Бірақ парацетамол болсын, Ибупрофен болсын, бәрін тек нұсқаулықпен ғана қабылдау қажет. Себебі бауырға уытты әсері бар. Сондықтан ондай препараттарды күніне үш-төрт рет қана қабылдауға болады”, – деп атап көрсетті Бюрабекова.
</blockquote>
Оның сөзіне қарағанда, бүгінде “Ингавирин” препаратының 70 мың қаптамасы да сатып алынды. Оны осы аптаның ішінде Қазақстанға әкеледі.&nbsp;
<blockquote>
 “Сонымен қатар “Тамифлю” препаратының 49 мың қаптамасын сатып алдық. Ол да аптаның аяғына дейін дәріханаларға түседі”, – дейді Бюрабекова.
</blockquote>

Министрлік парацетамолды күніне неше рет ішуге болатынын айтты

<a href="https://kyzylorda-news.kz/">Kyzylorda-news.kz</a>. Дүйсенбі күні Мемлекет басшысы коронавирус індетінің таралуына қарсы күрес шаралары жөнінде кеңес өткізгені белгілі. Осы кеңесте әлемді екі өкпесінен қысып тұрған қауіпті аурудың еліміздегі ахуалы сараланып, Президент Қасым-Жомарт Кемелұлы Үкіметтің алдына халықтың денсаулығын қорғау жөнінде нақты тапсырмалар жүктеді.
Қасым-Жомарт Тоқаев өз сөзінде дер кезінде жарияланған қатаң карантин шаралары уақыттан ұтып, эпидемияның қатты өршіп кетпеуіне мүмкіндік бергенін, Өкінішке қарай, Төтенше жағдай режимі тоқтатылғаннан кейін барлық карантин шаралары босаңсып кеткенін, биылғы 11 мамырда шектеулер алынғаннан кейін вирустың таралуы 7 есе өскенін жеткізді.
Кеңесте өңірлердегі ауруханаларда науқастар жататын орынға, медицина кадрларына, дәрі-дәрмекке, медициналық құрал-жабдықтарға тапшылық қатты байқалатынын ашық айтқан Президент ел Үкіметіне осы кемшіліктерді тез арада жоюға тапсырма берді.
“Пандемиямен күрес жөніндегі барлық шешімдерді, оның әлеуметтік және экономикалық теріс әсерлерін жоюды Премьер-Министр басшылық ететін тиісті Мемлекеттік комиссия аясында пысықтауды тапсырамын. Мемлекеттік комиссия ең маңызды деген ресурстардың таралуын бір орталықтан бақылауды қамтамасыз етуі тиіс. Қазіргі эпидемиологиялық ахуалды тұрақтандыру үшін шұғыл шаралар қабылдау мақсатында Мемлекеттік комиссияға екі күннің ішінде биылғы наурыз-мамыр айларындағыдай қатаң карантин режимін енгізу мәселесі бойынша маған ұсыныс әзірлеп, енгізуді тапсырамын”, – деді кеңесте Қазақстан Президенті.
Бұл – өте дұрыс және қазіргі уақытта өте қажетті шешім.
Себебі, күн сайын еліміздегі ахуал, статистикадағы сандар өзгеруде. Яғни, коронавирус жұқтырған адамдардың саны көбейіп жатыр.
Демек, біз қауіпті кезеңде өмір сүріп жатырмыз. Сақтанбасақ біз де бұл індетті жұқтырып алуымыз әбден мүмкін.
Жасыратыны жоқ, соңғы уақытта бейқам жүрген жандардың қатары көбейді. Арамызда көшеде бетпердесіз жүріп, қауіпсіздік шаралары туралы мүлде ұмытқандар бар.
Сондықтан да, елімізде, облыстар мен өңірлерде карантин талаптарын қатаңдатсақ ғана бұл ауруға тосқауыл бола аламыз. Кеселдің таралуын өзгеден көрмей, өзіміз қауіпсіздікті қатаң сақтауға тиіспіз. Сонда ғана бұл індетті алыстатып, жақсы күндерді жақындатамыз.
Бастысы – жақындарымыздың денсаулығы мен амандығы өзіміздің қолымызда екенін естен шығармайық. Оларға жанашыр болайық!
“Иә, бұл – қауіпті ауру. Оны емдейтін вакцина әлі жасалған жоқ. Бірақ оны қауіпті екен деп байбалам салып, үрейге бой алдырмау керек. Сондай-ақ жөнсіз әрекетке барып, дәрігерлерге тіл тигізіп, санитарлық режимді бұзуға жол берілмейді. Ал науқастанып қалғандар сарыуайымға, пессимизмге салынбағаны жөн. Ем алумен қатар, ағзаның күші, адамның көңіл-күйі оның құлантаза айығып кетуіне ықпал етеді. Денсаулық сақтау министрлігі және санитарлық дәрігерлердің ұсынымдары мен талаптарын естен шығармауды сұраймын. Мұның бәрі мемлекеттің ең басты игілігі – сіздердің, Қазақстан Республикасы азаматтарының өмірі мен денсаулығын қорғауға арналған”, – деген Мемлекет басшысының сөздері баршамызды ойлантуы тиіс.
Сондықтан да әрбір қызылордалықты осынау қиын сәтте халқымыздың амандығы үшін барынша сабырлы, ұстамды және қоғам алдында жауапкершілікті болуға шақырамын!
Құрметті жерлестер!
Келеңсіз күндердің көбі кетіп, азы қалды. Халқымызда «Барына қанағат, жоғына сабыр» деген де жақсы сөз бар. Олай болса, бүгінімізге шүкіршілік жасап, сабыр сақтап, егер алда тек жақсы күндер болып, қалыпты өмірге тезірек оралуды ойласақ, карантин талаптарын қатаң сақтап, үйде болайық!
Сыр жұртшылығы осынау сындарлы сәтте ауызбіршілік танытып, аты жаман дертпен күреске өз үлестерін қосады&nbsp; деп сенемін!
Қиындықты еңсеруге, әрине, әрбіріміз де жауаптымыз!
Барынша төзімділік пен сабырлылық танытайық!
Бахытжан САЙЛЫБАЕВ,
Қызылорда облыстық қоғамдық кеңес төрағасы,
М.Мәметова атындағы Қызылорда педагогикалық жоғары колледжі директоры

Бахытжан Сайлыбаев: Жақындарымыздың амандығы өзіміздің қолымызда екенін естен шығармауға тиіспіз

<a href="https://kyzylorda-news.kz/">Kyzylorda-news.kz.</a>Денсаулық сақтау вице-министрі Людмила Бюрабекова елде коронавируспен ауыр және орта дәрежеде ауырып жатқан адамдар ғана ауруханаға жатқызылатынын мәлім етті, деп хабарлайды <a href="https://www.inform.kz/kz/koronavirustyn-zhenil-turine-shaldykkandar-auruhanaga-zhatkyzylmaydy_a3667984">ҚазАқпарат.</a> 
<blockquote>
 «Қазіргі таңда коронавируспен ауыр және орта дәрежеде жатқан науқастар ғана ауруханаға жатқызылады. Сонымен қатар КВИ расталмаған, алайда пневмониямен түскен адамдар да ауруханада емделеді. Ал КВИ-ді жеңіл немесе белгісі жоқ күйде көтеретіндер амбулаториялық жағдайда емделуі тиіс. Себебі онсыз да стационардағы төсек-орын бос емес. Сол себепті КВИ-ді жеңіл немесе белгісі жоқ күйде көтеретін азаматтар үйінде емделіп, уческелік дәрігердің бақылауында болуы тиіс», – деді Людмила Бюрабекова ОКҚ-да өткен баспасөз мәслихатында.
</blockquote>

Коронавирустың жеңіл түріне шалдыққандар ауруханаға жатқызылмайды

<a href="https://kyzylorda-news.kz/">Kyzylorda-news.kz</a>.Алматының бас санитар дәрігері Жандарбек Бекшин коронавирус жұқтырды. Бұл туралы санитар дәрігердің өзі айтты. Ол қазіргі кезде үйінде оқшауланып, жұмысын қашықтан істеп жатыр.
<blockquote>
 «Ауырып қалдым, жағдайым дұрыс, симптомдар байқалмайды. Бұл COVID-19, бірақ симптомсыз түрі. Қашықтан жұмыс істеп жатырмын, себебі ауыратын уақыт жоқ», – деді Бекшин.
</blockquote>

Жандарбек Бекшин коронавирус жұқтырды

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 1604 адам коронавирус індетімен ауырғаны белгілі болды, деп хабарлайды <a href="https://www.coronavirus2020.kz/">Coronavirus2020.kz.</a> 
Аймақтар бойынша: 
Нұр-Сұлтан қаласы – 110 
Алматы қаласы – 113 
Шымкент қаласы – 69 
Ақмола облысы – 92 
Ақтөбе облысы – 37 
Алматы облысы – 98 
Атырау облысы – 229 Шығыс 
Қазақстан облысы – 98 
Жамбыл облысы – 48 Батыс 
Қазақстан облысы – 149 
Қарағанды ​​облысы – 191 
Қостанай облысы – 32 
Қызылорда облысы – 45 
Маңғыстау облысы – 71 
Павлодар облысы – 89 
Солтүстік Қазақстан облысы – 81 
Түркістан облысы – 52 
Жалпы ел бойынша ауырғандар саны – 41 055.

Қазақстанда коронавирус жұқтырғандар саны 41 мыңнан асып кетті

<a href="https://kyzylorda-news.kz/">Kyzylorda-news.kz.</a>Қазақстанда ауыр өкпе қабынуы кезінде дексаметазон қолданылатын болды.
Бұл препарат елімізде өлім көрсеткішін төмендетуі мүмкін. ДДСҰ бұған дейін дексаметазонның кішігірім дозасын қолдану арқылы ауыр науқастар арасындағы өлім-жітімді төмендетуге болатынын мәлімдеген болатын. Қазақстанда коронавирустық инфекцияны емдеу туралы хаттама толықтырылды, деп хабарлады ҚР Денсаулық сақтау вице-министрі Людмила Бюрабекова өзінің “Facebook” парақшасында.
<blockquote>
 «Хаттамаға амбулаториялық кезеңдегі емдеу схемасы кіреді: гидроксихлорохин және лопинавир/ритонавир. Сонымен қатар енді стационардағы науқастар Жапония мен Ресейде COVID-19-ды емдеу кезінде кеңінен қолданылатын «Фавипиравир» препаратын алады. Ауыр өкпе қабынуы кезінде Дексаметазон қолданылатын болады. &nbsp;COVID-19 патогенезінің негізгі буынында микро және макротромбоздың дамуын ескере отырып, антикоагулянттық терапия схемалары жаңартылады», – деді Людмила Бюрабекова.
</blockquote>
COVID-19-ды емдеудің жаңартылған хаттамасының толық мәтінін мына <a href="https://m.facebook.com/story.php?story_fbid=3196425803757430&id=100001701255212">сілтемеден</a> оқи аласыздар.

Короновирусты емдеу тәсілі өзгерді

<a href="https://kyzylorda-news.kz/">Kyzylorda-news.kz.</a> «Қайсар» басшылығы команданың 25 ойыншысы коронавирус жұқтырды деген ақпаратқа қатысты жауап берді.
<blockquote>
 «1 шілдеде футболдан ел біріншілігі жалғасады. Сондықтан талапқа сәйкес «Қайсар» футбол клубы өткен сәрсенбіде тест тапсырған болатын. Тест нәтижесімен кейбір футболшылардан оң нәтиже анықталды. Бүгін команда екінші мәрте қайта сынамадан өтті. Тест нәтижесі барлығында да теріс нәтижені көрсетті. Футболшылардың денсаулығы қалыпты жағдайда. Ойыншылар алдағы кездесуге дайындығын жүргізуде», – деп мәлім етті «Қайсар» басшылығы.
</blockquote>
Мұнан бұрын «Қайсар» футбол клубының бас жаттықтырушысы Стойчо Младенов команданың 25 ойыншысы коронавируске шалдыққанын айтқан болатын.
Естеріңізге сала кетелік, 1 шілдеде ел біріншілігі жалғасады. Бұл турда «Қайсар» өз алаңында «Тараз» командасын қабылдайды. Сондай-ақ аталған турда «Тобыл» мен «Каспий», «Қызылжар» мен «Оқжетпес», «Қайрат» пен «Жетісу», «Ордабасы» мен «Шахтер» командалары кездеседі.

Қазақстан және Қызылорда облысының жаңалықтары: COVID-19