Kyzylorda-news.kz. Аризона университетінің ғалымдары SARS-CoV-2 вирусы ауырсынуды басатындығын анықтады.
Вирустың бұл қабілеті инфекцияны жұқтырған кейбір адамдар неліктен ауру симптомдарын сезбейтінін, бірақ патогенді тарата алатындығын түсіндіреді.
Анестезияға пайдалы болуы мүмкін вирустың күтпеген қасиеті Pain журналында жарияланған мақалада айтылған.
Зерттеушілердің пікірінше, ауырсынуды басатын әсер коронавирустың адам жасушаларына енуіне мүмкіндік беретін S-ақуызына байланысты. Сонымен қатар бұл қосылыс ауырсыну сезімін қалыптастырумен байланысты сигналдардың берілуін тежейді. Бұл S-ақуыздың ACE2 рецепторымен ғана емес, сонымен қатар нейрондардағы мембраналық ақуыз нейропилин-1-мен де байланысатындығынан болады. Нейропилин-1 қан тамырларының дамуында маңызды рөл атқаратын және қатерлі ісік және ревматоидты артрит сияқты аурулармен байланысты эндотелий өсу факторымен (VEGF-A) байланысты. Бұл жағдайда нейрондық гиперқозғыштық пайда болып, ауырсынуға әкеледі. S-ақуыздармен байланысуы да осындай әсерге ие.
Ғалымдар алдағы зерттеулерде нейропилин-1-ді опиоидты емес препараттар көмегімен ауырсынуды жеңілдету үшін қалай қолдануға болатындығын зерттемек.
<a href="https://24.kz/kz/zha-aly-tar/bylu-manyzdy/item/427593-koronavirusty-pajdaly-asieti-any-taldy">Хабар 24</a>

Коронавирустың пайдалы қасиеті анықталды

Kyzylorda-news.kz. ҚР Бас мемлекеттік санитар дәрігерінің ҚР мемлекеттік шекарасындағы өткізу пункттерінде коронавирустық инфекция ауруының алдын алу жөніндегі шараларды одан әрі күшейту туралы қаулысы шықты.
Қаулыға сәйкес, 6 қазаннан бастап жолаушылар тасымалындағы тәртіптер өзгеріп, карантиндік талаптар күшейтіледі. Жаңа қаулы тәртібі бойынша, Қазақстан Республикасының азаматтары болып табылмайтын адамдар Қазақстан Республикасының Мемлекеттік шекарасын кесіп өткен кезде кем дегенде 72 сағат бұрын алынған ПТР әдісімен COVID-19-ға тесттен өткені туралы анықтама болмаған жағдайда кіруге жіберілмейді.
Сондай-ақ, Қазақстан Республикасына шетелден авиарейстермен келетін барлық адамдар термометриядан, сауалнамадан өтеді және Қазақстан Республикасының мемлекеттік шекарасын кесіп өткен кезде кем дегенде 72 сағат бұрын алынған ПТР әдісімен COVID-19-ға тесттен өткені туралы анықтаманы ұсынады. &nbsp;
<a href="https://turkystan.kz/article/119838-6-azannan-bastap-karantin-sharalary-k-shejtiledi?utm_source=fb&utm_medium=post&utm_campaign=cpc&fbclid=IwAR2wpkw8bKclG3n3R0ECUrWFxeNLi5fwNkaSvK4u_RRYDgeNO-GeGXHsXkY">Turkystan.kz</a>

Бүгіннен бастап карантин күшейтіледі

Kyzylorda-news.kz. Ресей Ғылым академиясының біріккен жоғары температура институтының мамандары COVID-19 таралуының жаңа моделін жасады. Олар адамдардың 60-70%-і емес, 3-10%-і ғана вирус жұқтырса да, ұжымдық иммунитетті қалыптастыруға болатынын анықтады, деп хабарлады Sputnik Қазақстан.
Ғалымдар вирусқа қарсы иммунитетті қалыптастыру үшін халықтың 60-70%-іне дейін инфекция жұқтыруы қажет емес екенін, карантиндік шаралардың тиімділігі көптеген факторға, соның ішінде ұлттық дәстүр мен өмір салтына байланысты екенін анықтаған. Осыған байланысты карантиндік шараларды таңдау және оңтайландыру әр ел үшін әр түрлі.
БЖТИ ғалымдарының моделі бойынша, жаңа вирустың нақты ерекшелігіне сәйкес, ауру ұзақтығының аз болуы және карантиндік шараларды тиімді қолдану ұжымдық иммунитет пайда болу шегін өзгертеді.
“Аурудың қарқынын едәуір төмендетуге және ұжымдық иммунитеттің қалыптасуына халықтың аз бөлігі, мәселен 3-10% -і вирус жұқтырған кезде де қол жеткізуге болатындығы анықталды”, – деп атап өтті институт ғалымдары.
Институт мамандары ұжымдық иммунитетті экономикалық зардаптар мен халықтың психологиялық жүктемесін барынша азайтуға бағытталған дұрыс карантиндік талаптар арқылы қалыптастыруға болатынын айтты.
<blockquote>
 “Ғалымдар коронавирус ағымының ұзақтығын, сондай-ақ, карантин талаптарын қолданылуын ескере келе, инфекцияның таралуын сипаттайтын жаңа математикалық үлгіні жариялады. Жаңа модель SARS-CoV-2 вирусын жұқтырған кезде инфекцияның сипаттамалық ерекшелігін ескеруге және қолданылған карантиндік шаралардың әсерін анықтауға мүмкіндік береді”, – деді институттың баспасөз қызметі.
</blockquote>
Институттың мәліметінше, жаңа модель қазіргі уақытта вирустың таралуын сипаттайтын екі негізгі модель – SIS моделі мен SIR моделіне қарағанда, статистикалық деректерге көбірек сәйкес келеді. Бұл модельдер дифференциалдық теңдеулер негізінде құрастырылған. Белгілі бір уақыт ішінде ауырғандар мен жазылып шыққандардың саны ескерілген.Бірінші, яғни SIS моделі бойынша COVID-19-тен айыққан адамда иммунитет қалыптаспайды және қайтадан ауырып қалуы мүмкін, ал SIR моделі науқас адамда ұзақ уақыт бойы вирусқа қарсы иммунитет сақталатынын болжайды.
Профессор Сергей Тригердің айтуынша, бұл модельдердің ешқайсысы COVID-19 ағымының мерзімдік ерекшеліктерін ескермейді. Демек, вирустарды тасымалдау үшін ең аз дегенде қанша уақыт кететінін және коронавирусқа шалдыққан адамдардың бір-бірімен байланыс орнатқан кездегі жұқтыру дәрежесін көрсетпейді.
<blockquote>
 “Қолданыстағы түсіндірмелерді зерттей отырып, вирустың аурудың бірінші күнінде емес, келесі күні көп таралатынын түсіндік. Бұл статистикалық мәліметтерге сәйкес келеді”, – деді Тригер.
</blockquote>
Оның айтуынша, институтта жасалған вирустың таралу моделі төрт параметрді ескереді: халық саны, вирус жұқтырған адамның бір тәулікте басқа адамдармен байланыс орнату көрсеткіші, инфекция ықтималдығы және вирус ағымының ұзақтығы. Эпидемияның динамикасы, әрине, халық арасында инфекция жұқтырғандардың бастапқы үлесіне де байланысты. Бұл модельде сондай-ақ, ресми статистиканы қолдану арқылы карантиндік шаралар ескеріледі.

Ғалымдар COVID-19-ға қарсы ұжымдық иммунитет қай жағдайда қалыптасатынын айтты

Kyzylorda-news.kz. Ресейлік дәрігер-терапевт Лариса Алексеева пәтерге коронавирустың енуінің жұртқа беймәлім жолын атады, деп хабарлайды Stan.kz.
Оның айтуынша, көптеген адамдар дүкендерде және қоғамдық көліктерде маска тағу арқылы инфекцияның таралуын болдырмауға болады деп санайды. Ол бұл қате пікір екенін алға тартты. Лариса Алексееваның сөзіне қарағанда, вирус ауырған көршілерден сорғыш арқылы пәтерге кіруі мүмкін.
<blockquote>
 “Сүзгілерді жиі ауыстыру керек. Жылына бір рет ауыстыру керек дейді, бірақ пандемия кезінде оны жиі жасау керек”, – деп түсіндірді ол.
</blockquote>
Сонымен қатар, дәрігер коронавирусты аяқ киім немесе киім арқылы да әкелуге болатынын еске салды.
<blockquote>
 “Мұнда аэрозоль форматындағы антисептиктерді қолдану тамаша нұсқа бола алады”, – деді Лариса Алексеева.
</blockquote>
Сондай-ақ, маман аяқ киімді сабынды суда жууға кеңес берді, өйткені сабын да вирустан қорғай алады.
<blockquote>
 “Айтпақшы, үйге әкелген әрбір нәрсені өңдеуіңіз керек. Мысалы, азық-түлік. Мен әр қаптаманы жылы суға жуамын”,- деп қорытындылады Алексеева.
</blockquote>

Коронавирустың таралуының жұртқа беймәлім жолы аталды

Kyzylorda-news.kz. АҚШ ғалымдары ересектерде коронавируспен байланысты қабыну синдромын анықтады, деп хабарлайды <a href="https://m.sputniknews.kz/world/20201004/15123741/COVID-19-sindrom.html">Sputnik Қазақстан.</a>
Бұған дейін мұндай синдром тек балаларда кездескен еді. Ал қазір бүлдіршіндер мен жасөспірімдерде коронавирустың асқынған түрі саналатын MIS-A синдромы ересек науқастарда да байқалып жатыр, деп хабарлады АҚШ-тың ауруларды бақылау және алдын алу орталығының сайты.
Мұндай синдром анықталған пациенттердің жүрек ырғағы бұзылып (аритмия), іші ауыра бастаған. Айта кетерлігі, олардың ешқайсысында бұған дейін жүрек және асқазан-ішек жолдары аурулары болмаған.
Америкалық мамандар 21-50 жас аралығындағы 16 науқастың жағдайын толық сипаттап берді. Олардың бәрінде аритмия анықталған, 12 адамның дене қызуы көтерілді, тек сегіз пациентте ғана респираторлық симптомдар байқалған. Салдарынан он адам жансақтау бөліміне түсті, екеуі қайтыс болды.
Ғалымдар коронавирусты жұқтыру мен MIS-A синдромының пайда болуы арасында қанша уақыт өтетінін әзірге анықтаған жоқ. Сондықтан олар бұл синдром COVID-19-дың ауыр түрі ме, жоқ әлде “инфекциядан кейінгі процесс” пе, ол жағын нақты айта алмай отыр.

COVID-19-бен байланысты қауіпті синдром байқала бастады: ғалымдар дабыл қақты

Kyzylorda-news.kz. Қазақстанда өткен тәулікте 62 адамда коронавирус індеті ПТР арқылы расталып ауырғаны белгілі болды. Бұл туралы www.coronavirus2020.kz хабарлайды.
Аймақтар бойынша:
Нұр-Сұлтан қаласы – 3
Алматы қаласы – 2
Шымкент қаласы – 1
Ақмола облысы – 3
Ақтөбе облысы – 1
Алматы облысы – 3
Атырау облысы – 2
Шығыс Қазақстан облысы – 18
Батыс Қазақстан облысы – 2
Қарағанды облысы – 6
Қостанай облысы – 2
Қызылорда облысы – 1
Павлодар облысы – 4
Солтүстік Қазақстан облысы – 13
Түркістан облысы – 1
Жалпы ел бойынша ауырғандар саны 108106.

Қызылордада коронавирус тіркелді

<a href="https://kyzylorda-news.kz/">Kyzylorda-news.kz.</a> Денсаулық сақтау министрі Алексей Цой карантиндік шараларды күшейтуге қатысты пікір білдірді, деп хабарлайды&nbsp;<a href="https://sputniknews.kz/">Sputnik Қазақстан</a>.
<blockquote>
 “Біз денсаулық сақтау саласын дайындап қойдық. Оны талай рет айттық. Ауруханадағы төсек орындардан бастап жасанды тыныс алдыру аппараттарына дейін бар. Бірақ бір нәрсеге кепілдік бере алмаймыз. Ол – әрбір адамның сақтық шараларын сақтап жүруі. Өкінішке қарай, бүгінде барлығы бірдей арақашықтықты сақтамайды, бетперде тақпайды”, – деді Цой орталық коммуникациялар қызметінде өткен онлайн брифингте.
</blockquote>
Министрдің айтуынша, бүгінде санитарлық нормаларды бұзу фактілері азаймай отыр. Айыпұл көлемі өсіп келеді. Осының өзі халықтың санитарлық нормаларды сақтау дәрежесін көрсетеді.
<blockquote>
 “Әзірге жағдай тұрақты. Бірақ санитарлық нормалар сақталмаса, карантиндік шаралар енгізілуі мүмкін. Сондықтан барлығы өз қолымызда. Егер сақтық шараларын сақтасақ, карантин енгізбеуге болады деп ойлаймын. Ал тәртіп бұзушылықтар тыйылмаса, қатаң карантин енгізу туралы кеңес беруге тура келеді”, – деп түсіндірді Цой.
</blockquote>
Айта кетейік, ведомствоаралық комиссияның шешімімен 5 қазаннан бастап коронавирустың таралуына жол бермеу мақсатында қосымша шаралар&nbsp;<a href="https://sputniknews.kz/society/20201001/15106680/koronavirusqa-qarsy-qosymsha-sharalar.html">енгізіледі</a>. Олар:
<ul>
<li>басқа елдермен әуе рейстерін қалпына келтіруді тоқтату;</li>
<li>бұған дейін ашылған әуе рейстерінің санын көбейтпеу;</li>
<li>Түркияға рейстерді қысқарту.</li>
</ul>
Бұдан бөлек, екінші санаттағы елдерден келетін азаматтар үшін міндетті талаптар бекітілді. Олар:
<ul>
<li>Дене қызуын өлшеу;</li>
<li>Сауалнама;</li>
<li>Коронавирусқа тест тапсырғаны туралы анықтама (мерзімі – 3 тәулік).</li>
</ul>

Санитарлық нормалар сақталмаса, қатаң карантин енгізілуі мүмкін – Цой

<a href="https://kyzylorda-news.kz/">Kyzylorda-news.kz</a>. Қазақстанда өткен тәулікте 65 адамда коронавирус індеті ПТР арқылы расталды.
Өткен тәулікте Шығыс Қазақстан мен Солтүстік Қазақстан облыстарында коронавирус жұқтырғандар саны көп. Түркістан, Маңғыстау облыстары мен Шымкентте вирус жұқтырғандар тіркелмеді.
Аймақтар бойынша:
<ul>
<li>Нұр-Сұлтан қаласы – 2</li>
<li>Алматы қаласы – 4</li>
<li>Ақмола облысы – 2</li>
<li>Ақтөбе облысы – 2</li>
<li>Алматы облысы – 5</li>
<li>Атырау облысы – 3</li>
<li>Шығыс Қазақстан облысы – 18</li>
<li>Жамбыл облысы – 2</li>
<li>Батыс Қазақстан облысы – 2</li>
<li>Қарағанды облысы – 6</li>
<li>Қостанай облысы – 2</li>
<li>Қызылорда облысы – 1</li>
<li>Павлодар облысы – 6</li>
<li>Солтүстік Қазақстан облысы – 10.</li>
</ul>
Жалпы ел бойынша ауырғандар саны 108 044.

Өткен тәулікте Қызылордада коронавирус тіркелді

Kyzylorda-news.kz. Дүниежүзілік денсаулық сақтау ұйымының болжамы бойынша күзгі маусымда пандемияның екінші кезеңі болуы мүмкін. Осыған орай, «COVID-19» пандемиясының екінші кезеңінде облыстағы инфекция жұқтырған науқастарды уақытылы қамтамасыз ету үшін дәрі-дәрмектер тізімі жасақталуда. Бұл туралы облыс әкімінің баспасөз қызметі хабарлады.
Пандемияның 1-кезеңінде орын алған дәрі-дәрмектер тапшылығын болдырмас үшін стационарлық және емханалық жағдайда жетіспеген дәрілік заттарға облыстық бас пульмонолог, облыстық бас инфекционистпен сараптама жасалып, «COVID-19» індетін емдеу хаттамасына сәйкес жасақталды. 
Тізімді жасақтау барысында короновирус және вирустық пневмония науқастарына 1-кезеңде қолданылған дәрілік препараттар негізге алынды.
Құрылған қорға дәрілік заттарды сатып алуға қажеттілік 350 млн. теңге қаражатты құрап отыр. 
Сонымен қатар, қажет болған жағдайда 21 инфекциялық және провизорлық төсек орындар қайта ашылатын болады. Жалпы саны 3000 орынды құрайды.
Сондай-ақ, 200 төсек орынды тез соғылатын модульді инфекциялық аурухана құрылысына жер бөлініп, қазіргі таңда дайындық жұмыстары жүргізілуде.
Қазақстан Республикасының Денсаулық сақтау министрлігіне 96 өкпені жасанды желдету (ИВЛ) аппаратына сұраныс беріліді. 
Жергілікті бюджеттен 4 флюро және 4 дана стационарлы рентген аппаратын сатып алу жоспарлануда.
2020 жылдың күз мезгіліндегі коронавирустық инфекциясының болжамды екінші толқынына жүйелі дайындық жұмыстары жүргізілуіне орай, 3500 медицина қызметкерлерінің резерві құрылды. 
Сонымен қатар, көпбейінді облыстық ауруханасы және Қазалы ауданаралық ауруханасы жанынан демеушілік көмек арқылы оттегі станциясын құру жоспарлануда.&nbsp;
Атап айтқанда, Петро Казахстан компаниясының демеушілігімен Қазалы ауданында жалпы құны 79,3 млн теңге құрайтын 1 оттегі станция салынатын болады. Осы станция арқылы Арал және Қармақшы аудандарын, Байқоңыр қаласын оттегімен қамтамасыз етіледі.
Ал, екінші оттегі станциясы ҚазГермұнай компаниясының демеушілігімен «Көпбейінді облыстық ауруханасы» ШЖҚ КМК базасынан салынатын болады. Жобаның құны 93,8 млн теңге. Бұл қала аумағындағы ауруханаларды және Сырдария, Жалағаш аудандарын қамтамасыз ететін болады. 
Үшінші оттегі станциясы Шиелі ауданында салынатын болады. Қазіргі таңда қаражат мәселесі шешілуде.
Емдеу мекемелеріне сұраныстары арқылы демеушілік көмекпен орталықтандырылған оттегі беретін құрылғылар орнатылатын болады.
Қыркүйек айында лизинг арқылы республикалық бюджеттен 40 дана автокөлік күтілуде. Оның 31-і қыркүйек айында, 7-уі қазан және 2-уі қараша айында күтілуде.

Қызылордада коронавирус инфекциясының екінші толқынына дайындық жұмыстары жүргізілуде

<a href="https://kyzylorda-news.kz/date/2020/09/30/">Kyzylorda-news.kz.</a> Қазақстанның ішкі істер министрі үкіметтің онлайн отырысында ведомство адамдардың жаппай коронавирус жұқтырмауы үшін не істейтінін айтып берді деп хабарлайды <a href="https://kaz.nur.kz/1877012-elimizdi-eki-oblysyna-koronavirus-saldarynan-kajtadan-blok-beket-kojyldy.html?utm_source=onesignal&utm_medium=webpush&fbclid=IwAR2HcheuuCCdIkDunwmPSf4S269VhjsUdHVuR4M8iDTPGqUAXRkLGI73QQg&utm_source=clipboard">KAZ.NUR.KZ.</a>
Ерлан Тұрғымбаетың хабарлауынша, облыстардың бас санитар дәрігерлерінің қаулысына сәйкес, Атырау және Ақтөбе облыстарына төрт блок-бекет пен екі санитарлық бекет қойылған.
Полиция 299 карантин нысанын қоршауға алды. Медициналық мекемелердің сұранысы бойынша, байланыстағы адамдардың орналасуын анықтау жұмыстары жүргізілуде.
Кейінірек, ведомствоның баспасөз қызметі бұл жұмыстардың коронавирус инфекциясына қарсы іс-шара аясында жасалғанын мәлімдеді.
Сонымен бірге, Ерлан Тұрғымбаев үкімет отырысында полиция денсаулық сақтау органдары мен әкімдік қызметкерлерімен, сондай-ақ қызмет көрсету нысандарымен бірге 50 мыңнан астам рейдтік іс-шаралар өткізгенін хабарлады.
Нәтижесінде карантин режимін бұзған 28 мың жағдай анықталған. Соның ішінде сауда орталықтары, дүкендер мен базарларда 4,6 мың ереже бұзушылық болған. Тағы 1,7 мыңы мейрамхана, кафе және басқа да қызмет көрсету нысандарына тиесілі.
Карантин тәртібін бұзғандардың басым бөлігі Қостанай, ШҚО, Түркістан, БҚО және Алматы облыстарынан анықталған.
Санитарлық-эпидемиологиялық талаптарды бұзғандарға әкімшілік хаттама толтырылған. Сонымен бірге, карантин режимін өрескел бұзған 15 мың жағдай тіркелді. Соның ішінде той жасап, ас берген 600 дерек бар.
Одан бөлек, 11,8 мың маска режимін сақтамаған азамат анықталды. Дәрілік заттарды заңсыз сатпақ болған 933 оқиғаның жолы кесілген. Медициналық препараттардың 98 мың орамы, 500 мың медициналық маска, 41 мың қолғап және тағы басқа заттар заңсыз айналымнан алынған.
Осындай ереже бұзғандары үшін полиция бөлімшесіне 605 адам, соның ішінде 349 медицина қызметкері жеткізілген.

Еліміздің екі облысына коронавирус салдарынан қайтадан блок-бекет қойылды

<a href="https://kyzylorda-news.kz/date/2020/09/23/">Kyzylorda-news.kz</a>. Қазақстандықтардың карантиндік-санитарлық талаптарды сақтамауы қатаң карантиннің қайта енгізілуіне әкеп соғуы мүмкін. Бұл туралы денсаулық сақтау министрі Алексей Цой мәлімдеді.
Министр елде эпидемиологиялық жағдай тұрақталса да, халық босаңсып кеткенін айтты.
<blockquote>
 “Бетперде кию, ара қашықтықты сақтау талаптары үнемі орындала бермейді. Бұл коронавирустың таралуына және карантин режимінің күшеюіне әкеп соғуы мүмкін. Мұндай жағдай қазір көптеген әлем елдерінде қайталанып жатыр”, – деді Цой үкімет отырысында.
</blockquote>
Айтуынша, карантин жеңілдетілгеннен кейін өңірлерде режим талабын бұзу фактілері 30,4%-тен 40,7%-ке дейін өскен. Он өңірде карантин режимін бұзу деректері жиілеген.
Сонымен қатар, ол адамдар маска тағу талабын да орындамайтынын атап өтті. 5-27 қыркүйек аралығында бетперде тақпағаны үшін 1 131 азаматқа айыппұл салынған.
Осыған байланысты министр әкімдерден карантин және маска режимінің сақталуын бақылауды күшейтуді, сондай-ақ, халық арасында түсіндіру жұмыстарын жүргізуді сұрады.
<a href="https://sputniknews.kz/">Sputnik Қазақстан</a>.

Денсаулық министрі: Қазақстанда карантин қатаңдатылуы мүмкін

<a href="https://kyzylorda-news.kz/date/2020/09/23/">Kyzylorda-news.kz.</a> Үкімет басшысы Асқар Мамин коронавирустың екінші толқынына жол бермес үшін санитарлық талаптарды сақтау шараларын күшейтуді тапсырды, деп хабарлайды&nbsp;<a href="https://sputniknews.kz/">Sputnik Қазақстан</a>.
<blockquote>
 “Жалпы елде эпидемиологиялық жағдай тұрақталды. Вирустың репродуктивтік деңгейі 0,93-ті құрап отыр, бұл қабылданып жатқан шаралардың тиімділігін көрсетеді. Дегенмен, әлемде және бірқатар шекара маңындағы елдерде эпидемияның тұрақсыздығын ескеріп, біз санитарлық талаптарды сақтау шараларын күшейтуіміз қажет”, – деді Мамин үкімет отырысында.
</blockquote>
Осыған байланысты, премьер-министр мүдделі мемлекеттік органдар мен өңірлердің әкімдеріне санитарлық-эпидемиологиялық шаралардың 100 пайыз дайындығын қамтамасыз етуды тапсырды.
Денсаулық сақтау министрлігіне жылжымалы медициналық кешендер мен жедел жәрдем көліктерін, қажетті техника мен жабдықты, жеке қорғану құралдарын сатып алып, оларды 15 қазанға дейін өңірлерге жеткізу міндеті жүктелді.
Сонымен қатар, ішкі істер және денсаулық сақтау министрліктері әкімдіктермен бірге санитарлық талаптардың сақталуын бақылайтын мониторинг топтардың жұмысын күшейтуі тиіс.
<blockquote>
 “Санитарлық режимді бұзудың кез келген жағдайының жолын кесу қажет”, – деді премьер.
</blockquote>
Денсаулық сақтау министрлігінің шет елдерден келетін азаматтарды бақылауға алуды күшейтуге қатысты ұсыныстары ведомствоаралық комиссияда қаралатын болды.
Сонымен қатар, Мамин медицина ұйымдары мен дәріханаларда дәрі-дәрмек пен жеке қорғаныш құралдарының болуын қамтамасыз етуді тапсырды. Облыстар мен қалаларда дәрінің бағасына бақылау жүргізіледі.

Қазақстан және Қызылорда облысының жаңалықтары: COVID-19