<a href="https://kyzylorda-news.kz/">Kyzylorda-news.kz.</a> Бүгін аймағымызда қаңтар айында өтетін ҰБТ басталды. Облыс бойынша 7 514 мектеп бітіруші түлектің 6 106-ы немесе 81% тестілеуге қатысуға өтініш білдірген. Бүгінгі алғашқы тестілеу күнінде 203 түлек білімлерін тексеріп, бақтарын сынауда.
Айта кету керек, биыл министрлік талапкерлерге қолайлы жағдай жасау үшін, сондай-ақ тестілеу тапсыру процесінің ашықтығы мен транспаренттілігін күшейту үшін бірқатар өзгеріс енгізді.
Ерекше білім беру қажеттіліктері бар түлектерге 2022 жылы қосымша уақыт берілді. Көру, есту, тірек-қимыл аппаратының функциялары бұзылған талапкерлерге тестілеу тапсырмаларын орындау үшін негізгі 240 минуттан бөлек қосымша 40 минут беріледі. Яғни, олар ҰБТ-ны 4 сағат 40 минут ішінде, басқаларға қарағанда ұзағырақ тапсыра алады. Сонымен қатар ерекше қажеттіліктері бар талапкерлерге арналған тапсырмалардың мазмұнына да өзгерістер енгізілді. Олар үшін суретсіз, сызбаларсыз және диаграммаларсыз тест нұсқалары жасалды.
Тестілеу «1 компьютер – 2 камера – 1 тестіленуші» қағидаты бойынша жүргізілуде. Оқуға түсушінің тест тапсыру орнында негізгі камерадан басқа, тестіленушінің дыбысын жазу және қозғалысын тіркеу үшін алдыңғы веб-камера орнатылады. Фронталды веб-камера талапкердің жеке басын сәйкестендіруге және ҰБТ кезінде бөгде адамдардың кіруін болдырмауға мүмкіндік береді. Сондай-ақ бұл қағидат емтихан тапсыру барысына бақылау жүргізу және тестілеудің ашықтығын қамтамасыз ету үшін қажет.
Сонымен қатар тапсыратын пәндер саны өзгерген жоқ – екі бейінді және үш міндетті пән қамтылады. Тест тапсырмалараның саны – 120. Оның ішінде Қазақстан тарихы бойынша – 15, математикалық сауаттылық бойынша – 15, оқу сауаттылығы – 20 және екі бейінді пәннен 35 тапсырмадан беріледі. Тестілеуді өткізу уақыты – 4 сағат (240 минут). ҰБТ нәтижесі бойынша талапкерлер ең жоғары 140 балл жинай алады.
Тестілеуге кірер кезінде қолмен тексеретін және рамалық металл іздегіштер қолданылады. Бұл талапкерлердің қауіпсіздігі үшін, ережелерді бұзудың және тыйым салынған заттарды (телефондар, шпаргалкалар және т.б.) алып өтудің алдын алу үшін де қажет. Қатысушылардан тыйым салынған заттар табылған жағдайда тестілеу автоматты түрде тоқтатылады.
Тестілеу кезінде мобильді және радиоэлектрондық байланыс сигналдарын басатын құрылғылар пайдаланылады. Ол аудиторияның (компьютерлік сыныптың) және бейнебақылау камераларының ауданына байланысты жұмыс істейді.
ҰБТ-2022 аяқталғаннан кейін күнтізбелік жылдың соңына дейін бейнежазбаларға талдау жүргізіледі. Тыйым салынған заттарды пайдалану және ережелерді бұзу фактілері анықталған жағдайда, оқуға түсушінің ҰБТ нәтижелері жойылады.
Қаңтар айындағы бұл ҰБТ қорытындысы бойынша ақылы негізде оқуға болады. Түлектер жазғы тестілеу негізінде грантқа үміткер бола алады.
Айта кетейік, Ұлттық бірыңғай тестілеу барлық санитарлық-эпидемиологиялық талаптарды қатаң сақтай отыра 22 ақпанға дейін жалғасады.

Қызылорда облысында ҰБТ басталды

<a href="https://kyzylorda-news.kz/">Kyzylorda-news.kz.</a> «Назарбаев Зияткерлік мектептері» дербес білім беру ұйымы 2022-2023 оқу жылында Назарбаев Зияткерлік мектептерінің 7-сыныптарында білім алу үшін «Өркен» білім грантын тағайындау конкурсын өткізуде.
Байқауға жалпы білім беретін мектептердің 6-сынып оқушылары қатыса алады. Ол үшін үміткерлер 21 ақпанға дейін келесі құжаттарды қабылдау комиссиясына өткізулері тиіс:
<ol>
<li>Конкурсқа қатысу үшін өтініш;</li>
</ol>
2. Сауалнама;
3. Үміткердің туу туралы куәлігінің көшірмесі, үміткердің ЖСН-і, бар болған жағдайда жеке бас құжатының көшірмесі, заңды өкілдің ЖСН-і көрсетілген жеке куәлігінің көшірмесі;
4. Үміткердің 6-сыныптың I жарты жылдығындағы үлгерімі мен тәртібі туралы табелінің көшірмесі. Талап етілген құжаттар оқитын мектеп басшысының қолымен расталып, тиісті білім беру ұйымының мөрімен бекітілуі керек.
5. Үміткердің графикалық файл түріндегі 1 МБ (мегабайт) кем емес көлемі 3х4 см. цифрлы фотосуреті немесе үміткердің фототүсірілімі құжат тапсыру кезінде қабылдау комиссиясында жасалынады.
Көрсетілген барлық құжаттар пластикалық тезтікпеге жинақталып, қабылдау комиссиясына ұсынылады.
Құжат қабылдау комиссиясы Қызылорда облысы бойынша Қызылорда қаласы Сұлтан Бейбарыс, 6 мекен-жайы бойынша дүйсенбі-жұма аралығында сағат 9.00-ден 18.00-ге дейін, ал сенбі күні 9.00-ден 13.00-ге дейін жұмыс жасайды. Үзіліс уақыты: 12.00-13.00.
Айта кету керек, келушілер ағымын реттеу үшін арнайы онлайн брондау қызметі іске қосылған. Бұл жүйе мектепке келу күні мен уақытын алдын ала белгілеуге мүмкіндік береді.
Онлайн брондау нұсқаулығы:
– Зияткерлік мектептің веб-сайтын ашу https://kzl.nis.edu.kz/
– «Үміткерлерге» / «Конкурстық іріктеу» бөліміне кіру;
– «Қабылдау комиссиясына арнайы кезекті брондау» қосымшасын ашу;
– Ашылған терезе арқылы күнтізбеде құжат тапсыру үшін мектепке келу күні мен уақытын таңдау;
– Өзіңіздің байланыс деректеріңізді көрсету;
– Брондауды растау;
– Барлық бөлімдер толтырылып, бронь жасалғаннан кейін сіз көрсеткен электрондық поштаға брондаудың расталғаны туралы хабарлама келеді.
Қабылдау комиссиясына құжаттарын ақпанның 21-не дейін толық өткізген үміткерлерге кешенді тестілеуге қатысу рұқсатнамасы беріледі. Кешенді тестілеу 2022 жылдың 14 және 15 сәуірінде өтеді. Бірінші күні үміткерлердің жаратылыстану-математикалық бағыттағы, яғни математика, сандық сипаттамалар мен жаратылыстану пәндерді игеру қабілеті бағаланса, екінші күні – қазақ, орыс және ағылшын тілдерінен тест тапсырмаларын орындайды.
Тестілеу нәтижелері кешенді тестілеудің екінші күнінен 40 күнтізбелік күн өткеннен кейін www.nis.edu.kz сайтында жарияланады. Соңғы шешім «Өркен» білім беру грантын тағайындау жөніндегі Республикалық комиссиямен қабылданады.
Құрметті жас өркен! Терең академиялық білім алып, кең ауқымды дағдыларды бойыңызға сіңіріп, үш немесе одан да көп тілді меңгеріп, еліміздің және әлемнің жетекші университеттеріне оқуға түсуді мақсат етсеңіз, біздің мектепке келіңіз!
Байланыс телефондары: 8 (7242) 40 23 75, 40 23 77

NIS-те білім алу үшін құжат қабылдау жалғасуда

<a href="https://kyzylorda-news.kz/">Kyzylorda-news.kz.</a> Оқушылардың арасында сырқаттанушылықтың күрт өсуіне жол бермеу үшін санитариялық-эпидемиологиялық талаптардың сақталуын қамтамасыз ету қажет. Бұл туралы бүгін Үкімет отырысында ҚР Денсаулық сақтау министрі Ажар Ғиният айтты, деп хабарлайды <a href="https://www.inform.kz/kz/karantin-sharalary-oryndalmasa-okushylar-onlayn-okidy-dsm_a3890310">ҚазАқпарат</a>.
<blockquote>
 «Халықаралық тәжірибені ескере отырып және елдегі күрделі эпидемиологиялық жағдайға байланысты Білім және ғылым министрлігі мен Біріккен ұлттар ұйымы Балалар қорының ұсынымдары бойынша білім беру ұйымдарында оқыту форматы қайта қаралды. Мәселен, барлық мектепке дейінгі ұйымдар, бастауыш сынып және қуаты 600 оқушыға дейінгі мектеп штаттық форматта жұмыс жасайды», – деді Ажар Ғиният.
</blockquote>
Министрдің атап өтуінше, 600-ден астам оқушысы бар білім беру ұйымдарында толтыру 50 пайыздан аспау керек. Бастауыш мектеп оқушылары штаттық режимде білім алады. Бұл ретте оқыту форматын таңдау кезінде міндетті түрде вакциналаумен қамту деңгейі ескеріледі. Ал жоғары оқу орындары мен колледждерде де сараланған тәсіл енгізілген: лекциялар – онлайн, қалған сабақтар икемді кесте бойынша штаттық режимде өтеді.
<blockquote>
 «Бұл ретте, балалардың арасында да ЖРВИ мен КВИ-ден сырқаттанушылықтың 1,3 есе көбейіп отырғанын ескеріп, санитариялық-эпидемиологиялық қадағалау органдары карантиндік шаралардың орындалуына мониторингіні жалғастыратынын және бұзушылықтар анықталған жағдайда, оқыту онлайн форматқа ауыстырылатынын атап өткен жөн. Осыған байланысты, облыстардың, Алматы, Нұр-Сұлтан және Шымкент қалаларының әкімдіктері оқушылардың арасында сырқаттанушылықтың күрт өсуіне жол бермеу үшін білім беру ұйымдарында санитариялық-эпидемиологиялық талаптардың сақталуын қамтамасыз етуі қажет», – деді ол.
</blockquote>

Карантин шаралары орындалмаса оқушылар онлайн оқиды

<a href="https://kyzylorda-news.kz/">Kyzylorda-news.kz.</a> Әнуар Жанғозин “Болашақ” Халықаралық бағдарламалар орталығының басқарма төрағасы болып тағайындалды, деп хабарлайды білім және ғылым министрлігінің баспасөз қызметі.
Жанғозин – президенттік жастар кадрлық резервінің мүшесі.
Ол 1986 жылы дүниеге келген. М.В. Ломоносов атындағы Мәскеу мемлекеттік университетін “Математика” мамандығы бойынша және “Назарбаев университетінің” магистратурасын “Білім беруді басқару” мамандығы бойынша тәмамдаған.
2008-2011 жылдары “Назарбаев Зияткерлік мектептері” әдістемелік процесс департаментінің менеджері, директордың орынбасары болып жұмыс істеді. 2011 жылдан 2016 жылға дейін Нұр-Сұлтан қаласында “Назарбаев Зияткерлік мектебінде” математика пәнінің мұғалімі, директор қызметін атқарған.
2017-2019 жылдары Нұр-Сұлтан қаласы білім басқармасының басшысы болды.
Қазақ, орыс және ағылшын тілдерін меңгерген.
<img src="https://kyzylorda-news.kz/wp-content/uploads/2022/01/15705699.jpg" alt="" />

&#8220;Болашақ&#8221; президенттік бағдарламасына жаңа басшы келді

<a href="https://kyzylorda-news.kz/">Kyzylorda-news.kz.</a> Оқу форматына қатысты өзгерістер енгізілді. 1-4 бастауыш сынып оқушылары штаттық форматта яғни мектепке барып білім алады. 600 оқушысы бар ауыл, қала мектептері де штаттық форматта жұмыс жасайды.
Бұл туралы бүгін Өңірлік коммуникациялар қызметінде өткен баспасөз конференциясында облыстық білім басқармасының басшысы Ақзира Қасымова мәлімдеді.
Сондай-ақ, колледждер аралас форматта оқиды. Практикалық, зертханалық, семинар сабақтар, өндірістік практика икемді кесте бойынша штаттық режимде, дәрістер онлайн түрде өткізіледі.
<blockquote>
 “Вакцина алған студенттер оқу ордасына келіп, сабаққа қатыса алады. Бүгіннен бастап аймақтағы 30 колледждегі 19 692 студент үшін екінші семестр аралас форматта басталды”,- дейді басқарма басшысы.
</blockquote>

Ақзира Қасымова: Оқу форматына қатысты өзгерістер енгізілді

<a href="https://kyzylorda-news.kz/">Kyzylorda-news.kz.</a> Халықаралық бағдарламалар орталығының президенті Айнұр Кәрібозова қызметінен кетті. Бұл туралы ол өзінің “Facebook” парақшасында хабарлады.
<blockquote>
 “Осы аптада Халықаралық бағдарламалар орталығындағы жұмысымды аяқтадым. Менің Орталықта жұмысымды тәмамдауым Президент Қасым-Жомарт Тоқаевтың «Болашақтың» бағдарын өзгерту ұсынысы жасалған тұста болуы өкінішті. Осы орайда менің Орталықтан кету шешімім бұдан ертерек қабылданғандығын, сонымен бірге Орталық президенті ретінде екі жарым жылдық кезеңде қаншама оң өзгерістерді қолға алуымды ескерсек, әрине, шешімнің оңай тимегендігін жеткізгім келеді, – деді ол.
</blockquote>
Осы жазбамда өзіме және оқырмандарыма есеп беру арқылы ең маңызды жетістіктерге тоқтап өтсем деймін:
1. Таусылмайтын квоталық санаттар алынып тасталды.
2. Алдын ала тілдік дайындықтың ендігіде қарастырылмауы нәтижесінде жылына 1,3 МЛРД теңге үнемделеді.
3. Ауылдық үміткерлерді қоспағанда іріктеу конкурсына енді әлемнің озық университеттерінен тек шартсыз шақыру хаты (UNCONDITIONAL) бар үміткерлер ғана қатыса алады.Мемлекеттік тілге қойылатын талап күшейтілді.
4. Іріктеу кезеңдері 6-дан 3-ке дейін қысқартылды. Бірінші және екінші іріктеу кезеңдері онлайн автоматтандырылған жүйеде аудио және видео жазбамен, античитинг бағдарламасының сүйемелдеуімен өтеді, үміткер аты-жөні толық шифрланған.
5. Көпшіліктің Болашақпен оқуға еңбек нарығының сұранысына сәйкес жолдау ұсынысы Басымды мамандықтар тізімінің шеңберінде еңбек нарығының ортамерзімді қажеттіліктерін ескерумен мемлекеттік органдар, ЖОО, қоғам қайраткерлері және ұйымдар өкілдерінен тұратын комиссиямен бекітіледі.
6. Пандемияның бірінші толқыны кезінде 2020 жылы біз шетелдік университеттермен оқу төлемақысына жеңілдік алу кессөздерін жүргізіп, 500 МЛН теңгеден аса үнемдеуге қол жеткіздік.
7. Орталыққа басшы болып келісімен мен өзім Сыбайлас жемқорлықпен күрес агенттігін Орталықты тексеруге шақырдым. Бұл өте дұрыс шешім болды. Қазірдің өзінде Антикордың ресми сайты мен менің ресми парақшамда сараптама нәтижесі мен әшекереленген сыбайлас жемқорлық тәуекелдері бұқараға қолжетімді.
Бұған қоса, мен Орталықтың 2009-2020 жылдардағы қаржы қызметіне ҚР Қаржы министрлігінің Ішкі мемлекеттік аудит комитетінің мемлекеттік аудитін өткізу бастамашысы болдым.
8. Сыртқы аудиттер алғаш рет KASE тізіміне кіретін компаниялармен жасалды, ал жылдық қаржы есептері Орталықтың сайтына қойылды.
9. Қатаң қадағалау нәтижесінде міндеттемелерін орындамаған стипендиаттардан 1,6 МЛРД аса теңге бюджетке қайтарылды (!)
10. Орталықтың шетелдегі өкілдері және үшінші вице-президент сияқты нысансыз шығыстар қысқартылды.
11. Квазимемлекеттік секторды 25% қысқарту шеңберінде Орталық штаты 2020 жылдан бастап 120-дан 110 қызметкерге қысқартылып, жалақы 30%-ға өсті, ал 2021 жылы штат 100 қызметкерге қысқартылып, жалақы қосымша 10%-ға өсті.
12. Ең маңызды сапалық нәтиже ретінде мен біздің Орталық стипендиаттардың оқуы мен түлектердің еңбек өтілімін қадағалаушы бақылау органнан біздің негізгі мониторинг міндеттемелерімізді сақтай отырып, оқуды ұйымдастыру мен еңбекпен қамтамасыз ету бойынша сенімді серіктеске айнала алғанымызды сызып айтамын.
<blockquote>
 “Бұған қоса, мен біздің Орталық пен «Болашақ» түлектері ассоциациясы арасындағы қарым-қатынастың жаңа сапалы деңгейге шыққанын ерекше мақтанышпен айтамын. Өйткені мақсатымыз бір – ол Отанымыздың игілігі үшін болашақтықтарды жұмылдырып, олардың жетістіктерін көрсету. Жалпы менің түлектер мен Бағдарламаның өзін қолда бар коммуникация тетіктері және БАҚ құралдары арқылы белсенді ілгерілетуім қазақстандықтардың «Болашақ» және Орталыққа сенімін біршама арттырғанына кәміл сенемін. Әріптестерім, стипендиаттар мен түлектер жадында 24/7 қолжетімді болған және жұмыста өмір сүрген басшы ретінде сақталатыныма үміттенемін. Барлық қол жеткізілген сапалық өзгерістерде қатысқан азаматтарға шынайы алғысымды білдіремін, – деді ол.
</blockquote>

Халықаралық бағдарламалар орталығының президенті Айнұр Кәрібозова қызметінен кетті

Kyzylorda-news.kz. ҚР Білім және ғылым министрлігі 2021–2022 жылдары орта білім мекемелерінде оқу жылының басталуы мен ұзақтығы, каникул кезеңдеріне қатысты 2021 жылғы 27 шілдедегі бұйрыққа өзгеріс енгізді.
2022 жылғы 13 қаңтардағы бұйрыққа сәйкес, меншік нысанына және қандай ведомствоға бағынатынына қарамастан, мектептердегі 2021–2022 оқу жылының кезеңі мынадай мерзімге белгіленді:
Оқу жылының ұзақтығы:
1-сыныптарда – 33 оқу аптасы, 2-11-інші (12) сыныптарда – 34 оқу аптасы;
Оқу жылы ішіндегі каникул кезеңдері:
1-11 (12) сыныптарда:
күзгі демалыс – 7 күн (2021 жылғы 1-7 қарашаны қоса алғанда), қысқы демалыс – 18 күн (2021 жылғы 30 желтоқсаннан бастап 2022 жылғы 16 қаңтарды қоса алғанда), көктемгі демалыс – 12 күн (2022 жылғы 19-30 наурызды қоса алғанда).
Сондай-ақ 1-сыныптарға арналған 7 күн қосымша каникул 2022 жылғы 7-13 ақпан аралығына белгіленді.

Қазақстандық оқушылардың каникул мерзімі бекітілді

Kyzylorda-news.kz. Қызылорда облысының білім басқармасының бұйрығына сәйкес, “Цифрлық түзету” пилоттық жобасы №5 көру қабілеті бұзылған балалардың 
арнайы (тузету) мектеп-интернатына ендіріліп, тірек білім беру ұйымы ретінде бекітілген болатын. Ерекше қажеттілігі бар балаларға цифрлық білім беруді мақсат тұтқан жоба бүгінде тиімді жүзеге асырылуда. Бүгін қаламызда орналасқан №5 мектеп-интернатына барған облыстық білім басқармасының басшысы Ақзира Қасымоваға осы бағыттағы жүйелі жұмыстар таныстырылды.
“Цифрлық түзету” пилоттық жобасын ендіруге дайындық жұмыстары өткен жылдан бастау алған. Бүгінде аталған жоба аясында цифрлыққа негізделген білім беру ұйымына 9 интерактивті панельі мен робототехника құрылғылары, музыкалық аппарат алынып, кабинет жасақталды. Көру қабілеті нашар балалардың білім алуына қолайлы 8 ноутбук-планшет жене 2 моноблоктармен жасақталып, “Bilimland”,” I-Mektep”,” Twig-bilim ” цифрлық білім беру ресурстарына қолжетімділік қамтамасыз етілді.
Барлық компьютерлер мен интерактивті панельдер интернет желісіне толық косылу арқылы балаларға көзге арналған жаттығулар аудио және видео түрінде жүргізіліп, түзетуге арналған ресурстардың базасы жинақталуда.
Сонымен қатар, экологиялық-биологиялық білім беруді дамыту бағытында шағын жылыжай іске қосылып, бүгінде түрлі тәжірибелер жасалынуда. Балалардың бос уақытын тиімді ұйымдастыру мақсатында шеберхана мен спорт алаңы жабдықталып, кітапхана Coworking-аймақ ретінде бейімделіп, керкем әдебиеттер мен арнайы кітаптармен толықтырылды.
<blockquote>
 Аймағымызда 35 интернаттық мекемелер жұмыс жасайды. Бүгінде мектеп-интернаттары көрсетіліп жатқан қолдаулардан кейін жағдайлары жақсаруда. Соның бір көрінісі осы №5 көру қабілеті бұзылған балалардың арнайы (тузету) мектеп-интернаты. Аталмыш білім беру ұйымы өткен жылы толық жөндеуден өтіп, жаңа спорт алаңдары мен жылыжай іске қосылып, қазіргі таңда балалардың білім алу жағдайларын жақсарту мақсатында жобалар енгізілуде, – деді Ақзира Бақтыбайқызы.
</blockquote>
“Цифрлық түзету” жобасы аясында қаламыздағы Жасыл мектеп, IT-мектептердің тәжірибесі осы интернатқа ендірілетіндігін айта кету керек.
Басқарма басшысы мектеп-интернатын аралап, балалардың оқулықтары мен оқу-әдістемелік базасымен танысып, жүргізілген күрделі жөндеу мен цифрлық жоба аясында атқарылып жатқан жұмыстарға өзінің оң бағасын берді.
Сондай-ақ, Ақзира Бақтыбайқызы алдағы уақытта аймақтық олимпиадаларға ерекше білім беруді қажет ететін балаларды да қатыстырып, ол үшін арнайы секция ашуды тапсырды.
<img src="https://kyzylorda-news.kz/wp-content/uploads/2022/01/fb_img_1642760712053.jpg" alt="" />
<img src="https://kyzylorda-news.kz/wp-content/uploads/2022/01/fb_img_1642760718630.jpg" alt="" />
<img src="https://kyzylorda-news.kz/wp-content/uploads/2022/01/fb_img_1642760722247.jpg" alt="" />

“Цифрлық түзету” пилоттық жобасы өз нәтижесін беруде

<a href="https://kyzylorda-news.kz/">Kyzylorda-news.kz.</a> 2022 жылы ЖОО-да оқу гранттарының саны тағы 5 мыңға артады. ҚР білім және ғылым министрлігі баспасөз қызметі осылайша гранттардың жалпы саны 61 мыңға дейін жететінін айтты, деп хабарлайды <a href="https://stan.kz/2022-zhili-studentterge-arnalgan-granttar-sani-5-minga-kobeye-358842/">Stan.kz</a>.
2021 жылы кадрларды даярлауға арналған мемлекеттік білім беру тапсырысы 5 мыңға – 51 мыңнан 56 мың грантқа дейін ұлғайтылды. Жаңа гранттар студенттер арасында сұранысқа ие және өзекті мамандықтарға бөлінетін болады.
Мемлекет басшысының тапсырмасы бойынша жоғары білімнің қолжетімділігін арттыру үшін 2025 жылға дейін білім беру гранттарының саны кезең-кезеңімен тағы 15 мыңға артады. Сондай-ақ білім беру гранттарын бөлу кезінде азаматтардың әлеуметтік осал санаттары үшін квоталар беру көзделген.
<blockquote>
 “Президенттің қолдауының арқасында қазақстандық мектептердің түлектері мемлекеттік бюджет есебінен оқуға мүмкіндік алады. Мысалы, өткен жылы біз 75 мыңнан астам өтінім алдық. Оның ішінде 56 мыңнан астам талапкер грантқа ие болды. Биыл гранттар саны 61 мыңға жетеді. Президенттің тапсырмасы бойынша біз халықтың әлеуметтік осал топтарынан шыққан балалар үшін квоталар санын ұлғайттық. Яғни, көпбалалы немесе толық емес отбасылардан шыққан балалар, сондай – ақ ерекше қажеттіліктері бар балаларды тәрбиелеп отырған талапкерлерге грант алу үшін әлдеқайда көп мүмкіндіктер қарастырылады”, – деп хабарлады Білім және ғылым вице-министрі Қуаныш Ерғалиев.
</blockquote>

2022 жылы студенттерге арналған гранттар саны 5 мыңға көбейеді

<a href="https://kyzylorda-news.kz/">Kyzylorda-news.kz.</a> Қызылорда облыстық білім басқармасының тарапынан аймақтық санитарлық дәрігердің қаулысына өзгеріс енгізу үшін бірқатар ұсыныстар жолданған болатын. Берілген ұсыныстар мақұлданып, нәтижесінде бүгін жаңа қаулыға сәйкес, контингенті 600 оқушыға дейінгі облыс және аудан орталықтарындағы мектептер дәстүрлі оқыту форматына көшіріледі.
Ал 600-ден астам оқушысы бар қала мектептері қашықтықтан оқытылса, 600-ден астам оқушысы бар ауыл мектептері штаттық форматында жұмыс жасайтын болады.
Сонымен қатар мектеп әкімшілігінің шешіміне сәйкес, санитариялық-эпидемиологиялық талаптарды қатаң сақтай отырып 1-2 сынып оқушыларына оқу офлайн форматта жүргізілетін болады.
Ал, колледж студенттері үшін аралас форматтағы оқу ұйымдастырылып, барлық лекциялар онлайн түрде жүргізіліп, практикалық, лабораториялық сабақтар штаттық режимде жалғасатын болады.
Айта кету керек, вакцина қабылдаған оқушылар мен студенттерді мектеп немесе колледж қабырғасында отырып білім алуына рұқсат етіледі.

Қызылордада бірқатар мектептер дәстүрлі оқыту форматына көшірілді

<a href="https://kyzylorda-news.kz/">Kyzylorda-news.kz.</a> Әлемдік білім және ғылым қауымдастығына ену мақсатында Қорқыт ата атындағы Қызылорда университеті шетелдік оқу орындарымен тығыз байланыс орнатты. Өткен жылы Ресей, Түркия, АҚШ, Корея, Англия, Канада, Швейцария, Болгария елдерінен келген 15 ғалым білім алушыларға дәрістер сериясын жүргізді.
Дәріс барысында бакалавриат, магистратура, докторантура бағдарламаларында білім алушылар шетелдік ғалымдармен бірлесіп ғылыми-зерттеу және ғылыми-тәжірибелік кеңес беру жұмыстарын жүзеге асыруға мүмкіндік алды.
Айталық, Канададағы Лейкхед университетінің профессоры, философия докторы Сет Агбо докторанттарға SCOPUS және&nbsp; Web of Science&nbsp; шетелдік басылымдарына&nbsp; мақала жариялауға&nbsp; байланысты дәріс өткізді.
Сабақ барысында докторанттар тақырыпты құрылымдау мен тірек сөздерді дұрыс жазуды меңгерді.
<blockquote>
 – Шетелдік дәріскер импакт факторы жоғары peer-reviewed журналдарға мақаланы рәсімдеп, жариялаудың қыр-сырын үйретті. Докторанттар профессордың кеңесі бойынша мақала тақырыбын құрылымдап, тірек сөздерді тиімді пайдаланып, редакторлар мен рецензенттердің назарын аудартуға арналған бөлігін, яғни аннотацияны жазу бойынша тың ақпараттармен танысты. Келешекте peer-reviewed шетелдік басылымда жариялайтын мақаламыздың тақырыбын, тірек сөздерін, аннотацияны дайындап қойдық. Дәріс кезінде кіріспенің әр сөйлеміне сілтеме міндетті түрде жасалуы қажет екенін меңгердік. Зерттеу барысында сапалық талдау жасау қажет екенін түсіндік. Бұл сабақта импакт факторы жоғары журналдарға мақала жариялауды үйренгенім үшін қуаныштымын, – деді «Қазақ тілі мен әдебиеті» білім беру бағдарламасы бойынша докторант Эльмира Ибрагимова.
</blockquote>
Ал, “Бухгалтерлік есеп және аудит” кафедрасының меңгерушісі, экономика ғылымдарының докторы, Қазан мемлекеттік аграрлық университетінің профессоры Гузалия Клычова «Желілік (қос дипломды) оқыту шеңберінде магистрлерді дайындау бағыттары бойынша негізгі білім беретін кәсіби бағдарламаны (БББЖ) әзірлеу» тақырыбында біліктілік арттыру курсын өткізді.
&nbsp;Курстың мақсаты – екі университеттің білім беру бағдарламаларын салыстыру, ресейлік тәжірибені зерделеу.&nbsp;
<blockquote>
 &nbsp;Қазір «Академиялық ұтқырлық», «Қос диплом» бағдарламасы білім беру қызметтері нарығында жоғары сұранысқа ие. Мұндай курстар білікті оқытушылар мен жұмыс берушілер тарапынан кадрларға қойылатын талаптарды күшейту үшін қажет. Ал «Қос диплом» бағдарламасы бойынша екі ел университеттерінің білім беру бағдарламаларын салыстыра отырып, оны жүзеге асыруда мамандар үшін үлкен септігін тигізері анық, – деді университеттің білім беру бағдарламаларын басқару бөлімінің бастығы, физика-математика ғылымдарының кандидаты Айсұлу Мұхамбетжан.
</blockquote>
Ғылым саласында тәжірибесі мол шетелдік ғалымдар білім алушыларға курсты онлайн және офллайн форматта жүргізді. Айта кету керек, университетке Г.В.Плеханова атындағы Ресей экономикалық университетінен Наталия Фоминых, Англияның Суррей университетінен Вячеслав Филимонов,&nbsp; Ресей ғылым академиясының «Информатика және менеджмент» Федералдық ғылыми-зерттеу орталығынан Елена Софронова, Ресейдегі Санкт-Петербург мемлекеттік университетінен Татьяна Лыпкань, Гарвард университетінен Нурлан Кенжеахмет, Корея Республикасының Каннам университетінен Фил Ким, Ресей халықтар достығы университетінен Давид Казарян, Оңтүстік Орал мемлекеттік аграрлық университетінен Сакен Ширьязов, «Дубна» мемлекеттік университетінен Владимир Мележик, Тракия университетінен Николай Иванов, Ресей Федерациясындағы Қазан федералды университетінен Ирина Галкина, Швейцарияның Солтүстік-Батыс қолданбалы ғылымдар және өнер университетінен Марина Питер, Түркияның Догус университетінен Айфер Еркен келді.
<img src="https://kyzylorda-news.kz/wp-content/uploads/2022/01/sheteldik-daerisker2.jpg" alt="" />
<img src="https://kyzylorda-news.kz/wp-content/uploads/2022/01/sheteldik-daerisker3.jpg" alt="" />

Шетелдік ғалымдар білім алушыларға дәрістер сериясын жүргізді

<a href="https://kyzylorda-news.kz/">Kyzylorda-news.kz.</a> Білім және ғылым министрлігі коронавирус инфекциясының өршуіне байланысты көктемгі семестр аралас форматта өтетінін мәлімдеді. Ол 24 қаңтарда басталады, деп хабарлайды&nbsp;<a href="https://sputnik.kz/">Sputnik Қазақстан</a>. &nbsp;
Ресми мәліметке сәйкес, университет шешімі бойынша оқу процесі толығымен дәстүрлі форматта немесе аралас форматта ұйымдастырылуы мүмкін. Ондайда дәрістер онлайн, ал практикалық және зертханалық сабақтар офлайн режимде өтеді. Студенттердің практикасы да солай. Әрбір өңірдегі санитарлық-эпидемиологиялық жағдайға қарай оқу онлайн форматта басталуы мүмкін, артынан аралас форматқа ауысуға болады.
<blockquote>
 “Бұл ретте жоғары оқу орындары каскадтық әдісті қолдана алады, яғни студенттердің бір жерге жиналуын барынша азайту үшін сабақ оқу курсына/оқу бағыттарына байланысты 24 қаңтар мен 6 ақпан аралығында кезең-кезеңімен ұйымдастырылуы мүмкін. Мысалы, 1 курс студенттері сабақты 24 қаңтарда, 2 курс студенттері 31 қаңтарда және 3-4 курс студенттері 7 ақпанда бастаса болады”, – делінген ресми хабарламада.
</blockquote>
Білім және ғылым министрлігі 1-курс студенттеріне онлайн форматта оқуға рұқсат беріп отыр. Бірақ ол үшін университет келісім алуы қажет. Ал аралас формат болса, басқа қаладан келетін студенттерді жатақханаға орналастыру керек.
Жоғары оқу орындарында санитарлық-эпидемиологиялық режим міндетті түрде сақталады. Негізгі талаптар:
<ul>
<li>маска режимін қамтамасыз ету;</li>
<li>жоғары оқу орнының аумағына, оқу ғимараттарына, кітапханаларға және жатақханаларға кіреберісте Ashyq қосымшасын қолдану;</li>
<li>тұмаудың белгілері бар (жөтел, мұрыннан су ағу, дене температурасы 37-ден жоғары) адамдарды оқу корпустарына кіргізбеу.</li>
</ul>
Жоғары оқу орындары студенттерінен ПТР-тест талап етілмейді. Ресми мәліметке сәйкес, бүгінгі таңда жоғары оқу орындары студенттерінің 81 проценті, ал профессор-оқытушылар құрамының 94 проценті екпе салдырды.

Қазақстан және Қызылорда облысының жаңалықтары: Білім

Қызылорда облысында ҰБТ басталды

NIS-те білім алу үшін құжат қабылдау жалғасуда

Карантин шаралары орындалмаса оқушылар онлайн оқиды

“Болашақ” президенттік бағдарламасына жаңа басшы келді

Ақзира Қасымова: Оқу форматына қатысты өзгерістер енгізілді

Халықаралық бағдарламалар орталығының президенті Айнұр Кәрібозова қызметінен кетті

Қазақстандық оқушылардың каникул мерзімі бекітілді

“Цифрлық түзету” пилоттық жобасы өз нәтижесін беруде

2022 жылы студенттерге арналған гранттар саны 5 мыңға көбейеді

Қызылордада бірқатар мектептер дәстүрлі оқыту форматына көшірілді

Шетелдік ғалымдар білім алушыларға дәрістер сериясын жүргізді

Алдағы семестрде студенттер аралас форматта оқиды

Қазақстан және Қызылорда облысының жаңалықтары: Білім

Қызылорда облысында ҰБТ басталды

NIS-те білім алу үшін құжат қабылдау жалғасуда

Карантин шаралары орындалмаса оқушылар онлайн оқиды

&#8220;Болашақ&#8221; президенттік бағдарламасына жаңа басшы келді

Ақзира Қасымова: Оқу форматына қатысты өзгерістер енгізілді

Халықаралық бағдарламалар орталығының президенті Айнұр Кәрібозова қызметінен кетті

Қазақстандық оқушылардың каникул мерзімі бекітілді

“Цифрлық түзету” пилоттық жобасы өз нәтижесін беруде

2022 жылы студенттерге арналған гранттар саны 5 мыңға көбейеді

Қызылордада бірқатар мектептер дәстүрлі оқыту форматына көшірілді

Шетелдік ғалымдар білім алушыларға дәрістер сериясын жүргізді

Алдағы семестрде студенттер аралас форматта оқиды

“Болашақ” президенттік бағдарламасына жаңа басшы келді