<a href="https://kyzylorda-news.kz/">Kyzylorda-news.kz.</a> Қызылорда облысы әкімінің орынбасары Мархабат Жайымбетов облыстағы екінші деңгейлі банк басшыларымен кездесті.
Кездесу барысында мемлекеттік бағдарламалар аясында несиелендірудің өзекті мәселелері тақырыбында сөз қозғалды. Сонымен қатар, жыл соңына дейінгі жоспарлар талқыланды.
Басқосуда Кәсіпкерлік және туризм басқармасының басшысы Фердоуси Қожабергенов 2021 жылы қаржыландырылған жобалар мен биылғы жылдың жоспары жайында атап өтті.
Сондай-ақ, “Даму” қорының облыстық филиал директоры Ж. Ермағанбет мемлекеттік бағдарламаларға енгізілген өзгерістерді баяндады.
Осы ретте, Мархабат Жайымбетов банк басшыларына өңірде шағын және орта бизнестің қаржыландыру жұмыстарын күшейтуге шақырып, жаппай кәсіпкерліктің дамуындағы банктердің ерекше ролін айтып өтті.

Мархабат Жайымбетов екінші деңгейлі банк және қаржы институттары басшыларымен кездесті

Kyzylorda-news.kz. Президент Мемлекеттік күзет қызметінің жұмысымен танысты, деп хабарлайды Ақорда.
Қасым-Жомарт Тоқаев Мемлекеттік күзет қызметінің 30 жылдығына арналған салтанатты іс-шараға қатысып, сала қызметкерлерін құттықтады.
Мемлекет басшысы бұл құрылымның ұлттық қауіпсіздікті қамтамасыз ету жүйесінде аса маңызды рөл атқаратынын, күзет қызметкерлеріне айрықша жауапкершілік жүктелгенін атап өтті.
<blockquote>
 «Ел басшылығының қауіпсіздігін қамтамасыз ету, стратегиялық нысандарды, сондай-ақ шетелден келген мәртебелі меймандарды қорғау оңай жұмыс емес. Сіздер осы міндетті абыроймен атқарып келесіздер. Бұл 30 жыл ішінде қалыптасқан игі дәстүр, сабақтастық екені сөзсіз. Бүгінде Күзет қызметінің әлеуеті орасан зор. Жауынгерлік техникалық және жедел әрекет ету мүмкіндіктері мол. Шын мәнінде, Мемлекеттік күзет қызметін нағыз патриоттардың ұжымы деуге болады. Ең жауапты сәтте Отан үшін аянбай, адал қызмет етіп келесіздер», – деді Қасым-Жомарт Тоқаев.
</blockquote>
Президент қазіргі шиеленісті геосаяси жағдайда Мемлекеттік күзет қызметінің түрлі сын-қатерлер мен қауіптерге дер кезінде төтеп беру мүмкіндігінің аса маңызды екеніне тоқталды.
<blockquote>
 «Жеке құрамның білімі мен біліктілігін одан әрі дамытып, мемлекеттік күзеттің бүкіл жүйесін жетілдіру қажет. Мемлекеттік күзет қызметі – ерекше құрылым. Сондықтан оған қойылатын талап та әрқашан жоғары болмақ. Сіздер жүктелген міндетті шұғыл әрі тиімді атқарады деп сенемін. Мінсіз қызметтеріңіз үшін баршаңызға шынайы ризашылығымды білдіремін», – деді Қазақстан Президенті.
</blockquote>
Мемлекет басшысы сала қызметкерлерінің еңбегіне табыс тілеп, бірқатарын мемлекеттік наградалармен марапаттады. Атап айтқанда І және ІІ дәрежелі «Айбын» ордендері, «Жауынгерлік ерлігі үшін» медальдары табысталып, Президенттің Алғысы жарияланды.
Қасым-Жомарт Тоқаев марапаттау рәсімінен кейін мерекелік концертті тамашалады.

Президент Мемлекеттік күзет қызметінің жұмысымен танысты

*<a href="https://kyzylorda-news.kz/">Kyzylorda-news.kz.</a>&nbsp;Шиелі ауданына жұмыс сапары кезінде облыс әкімі Нұрлыбек Нәлібаев актив отырысын өткізді.*
Жиында аудан әкімі Нариман Мақұлбеков экономикалық көрсеткіштерге тоқталып, шешімін тапқан және аудан халқы үшін өзекті мәселелерге қатысты ұсынысын білдірді.
Аймақ басшысы негізгі экономикалық көрсеткіштерді бақылауда ұстап, өңірдегі кәсіпкерлерге қолдау көрсетуді, инвестиция тарту бойынша кешенді шаралар қабылдауды тапсырды.
Басқосуда Шиелі ауданының құрметті азаматы, сала ардагерлері Рахым Мауяев, Пердәлі Архабаев пен Шиелі кентінің ардагерлер кеңесінің төрағасы Болат Күлімбетов ел ішінде ауызбірліктен асқан бақыт жоқ екенін тілге тиек етіп, аймақ басшысына тілеулестігін танытып, Президент ұсынған әрбір бастаманы қолдауға шақырды.
<img src="https://kyzylorda-news.kz/wp-content/uploads/2022/04/fb_img_1650488229885.jpg" alt="" />

Нұрлыбек Нәлібаев Шиелі ауданына жұмыс сапарымен барды

*<a href="https://kyzylorda-news.kz/">Kyzylorda-news.kz.</a> Бүгін Қазақстанның басым бөлігіне атмосфералық фронттар әсер етеді. Салдарынан жаңбыр жауады, оңтүстіктің таулы аудандарында және солтүстікте қатты жауын-шашын жауады, деп хабарлайды Қазгидромет.*
Республика бойынша жел күшейеді, солтүстікте тұман түсіп, оңтүстікте найзағай ойнайды, бұршақ жауып, дауыл тұрады.
Күндіз Қызылорда облысында күн ашық, облыс орталығында жел 15-20 м/с артады.

21 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бүгін Қазақстан және КСРО халық артисі, Халық қаһарманы Роза Бағланованың 100 жылдығы аясында туған жері Сыр елінде әншінің ескерткіші ашылды.
Облыс орталығының қақ төрінен орын алған ескерткіштің ашылу салтанатында Қызылорда облысының әкімі Нұрлыбек Машбекұлы құттықтау сөз сөйлеп, Роза Тәжібайқызының ұлы Тәжен мен келіні Марал өз лебіздерін білдірді.
Ескерткіштің ашылу рәсімі Роза Бағланованың 100 жылдығына арналған «Ақмаңдайлым» республикалық әншілер конкурсына ұласып жатыр.
<img src="https://kyzylorda-news.kz/wp-content/uploads/2022/04/zhenis.jpg" alt="" />

Қызылордада Роза Бағланованың ескерткіші ашылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында бірінші болып күріш дәні Шиелі ауданында себілді.
Бүгін облыс әкімі Нұрлыбек Нәлібаев Қазақстанның Еңбек Ері Абзал Ералиевпен және бірқатар зиялы қауым өкілдерімен бірге егіс алқабында алғашқы дән себу шарасына қатысты.
Шиелі ауданындағы “Ақмая” шаруашылығының егіс алқабында өткен жиын «Дала күні» семинар-кеңесімен жалғасты.
Аймақ басшысы ел қамбасының астыққа толуын, мол өнім алуды тілеп, шаруа азаматтарының еңбегі нәтижелі болуын тіледі.
«Дала күні» семинар-кеңесі барысында ауылшаруашылығы саласындағы өзекті мәселелер сөз болып, шаруа қожалық иелері ортақ мәселелерді талқылады. Бірқатар басқарма басшылары мен аудан әкімдері егін егу бағытында баяндама жасап, алдағы іске асатын жоспарларын тізбектеді. 
Биылғы жылы өңірде 185,6 мың гектарға ауыл шаруашылығы дақылдарын орналастыру межеленген. Оның ішінде дәндi дақылдар 90,8 мың гектарды, майлы дақылдар 5,3 мың гектарды, мал азықтық дақылдар 70 мың гектарды, картоп, көкөнiс, бақша 19,4 мың гектарды құрайды. 
Негізгі дақыл – күріш егу мен оны суға бастыру жұмыстары ауа райы жағдайына байланысты облыс шаруашылықтарында ішінара басталса, бүгіннен бастап жаппай кіріскелі отыр. Күріш егу және суға бастыру жұмыстарын мамыр айының 30 дейін бітіру жоспарланып отыр. Ал, картоп, көкөніс, бақша, жүгері және тағыда басқа дақылдарды егуді оңтайлы мерзімдерін сақтай отырып, мамыр айының үшінші онкүндігі мен маусым айының бірінші онкүндіктерінде аяқталатын болады.
Аймақ басшысы Сыр маржанының көлемін мейілінше қысқартпай, егін науқанына қатысты нақты міндеттерді жүктеді.
<blockquote>
 «Аймағымыз бірден-бір күрішке бейімделген, халқы осы кәсіпке маманданған ел, оның үстіне күріш егілмесе топырақ тұзданып, инженерлік жерлерден айырылып қаламыз, сондықтан мейлінше күрішті қысқартпауға тырысамыз. Сыр дихандарына ата кәсібін жалғастыруға мүмкіндік жасап, азық-түлік өндіру көлемін арттыру басты бағытымыз болмақ. Биыл ауылшаруашылық дақылдарының көлемін оңтайлы мерзімінде егілуін, көктемгі дала жұмыстарын қаржыландыруды ұйымдастырып, қажетті тұқым, минералды тыңайтқыштар, жанар-жағармай және қосалқы бөлшектермен қамтамасыз етілуін қадағалау қажет. Себілетін күріш тұқымының сапасын анықтау үшін зертханалық зерттеуден толық өткізуді қамтамасыз етіп, егіске су алуды келісілген кестеге сәйкес ұйымдастыруды тапсырамын», – деді Нұрлыбек Нәлібаев.
</blockquote>
Жиын соңында облыс әкімі су жолдарының, су насостары мен гидротехникалық құрылыстардың, су бекеттерінің толық дайындығын және вегетациялық кезеңде кестеге сай су мөлшерімен қамтамасыз етуді, егіске қажетті судың белгіленген лимитке сәйкес алынуын тапсырды.
<img src="https://kyzylorda-news.kz/wp-content/uploads/2022/04/278566040_285726753748576_6603695818110023583_n.jpg" alt="" />
<img src="https://kyzylorda-news.kz/wp-content/uploads/2022/04/278296296_285726680415250_6477783321828701128_n.jpg" alt="" />

Қызылорда облысында күріш дәні себілді (ВИДЕО)

<a href="https://kyzylorda-news.kz/">Kyzylorda-news.kz.</a> ҚР Қорғаныс министрі Руслан Жақсылықов Қазақстанда әскери парад ұйымдастыруға қатысты туралы пікір білдірді, деп хабарлайды <a href="https://lenta.inform.kz/kz/bir-askeri-parad-otkizuge-shamamen-4-mlrd-tenge-ketedi-korganys-ministri_a3924943">ҚазАқпарат</a>.
<blockquote>
 «Қазіргі уақытта Қазақстан Қарулы Күштерінің алдында маңызды міндеттер тұр. Оларды Жоғарғы Бас қолбасшы айқындап берді. Бәрін жүзеге асыру және бюджеттен қаражат сұрау – бәрін шығын. Мәселен, жанар-жағармай материалдары, іссапар шығындары, жеке құрамның тамақтануы бар. Жақында ғана оқу-жаттығуды аяқтадық. Мұнда бізге қайсысы маңызды – оқу-жаттығу өткізіп, жауынгерлік әзірлігімізді тексеру ме әлде шеру жасау ма? Бұл ретте біз Жоғарғы Бас қолбасшының тапсырмаларын іске асыруды ескеріп, Қарулы Күштердің жауынгерлік дайындығымен айналысқан орынды деп санаймыз», – деді Қорғаныс министрі Мәжіліс отырысынан кейін тілшілерге берген сұхбатында.
</blockquote>
Министр 7 мамыр – ҚР Қарулы Күштері күні мен 9 мамырды шатастырмау қажеттігін айтты.
<blockquote>
 «Шеру Жеңіс Күніне емес, Қарулы Күштердің 30 жылдығына арналған еді. Бұл айырмашылықты салыстырып көріңіздер. Жеңіс күніне ардагерлерімізге құрмет көрсететін іс-шаралар жоспарланған. Олардың бәрі өткізіледі. Атқарушы билік органдары ардагерлерге жоспарлы түрде төлем жасайды. Біз оларға құрмет көрсетеміз және құттықтаймыз», – деп атап өтті Р. Жақсылықов.
</blockquote>
Сонымен бірге ведомство басшысы «Қазақстан бұдан былай парад өткізбейтін болды ма?» деген сұраққа жауап берді.
<blockquote>
 «Бәріміз түсінеміз, шеру өткізу – патриоттық сезімді көрсетудің бір жолы. Бұған дейін пандемия болғанын білесіздер, онда шеру жасайтын қажеттілік болмады. Ал қазір біз жауынгерлік әзірлікті арттырумен айналысып жатырмыз. Келесі жылы экономикалық жағдайымыз мүмкіндік беріп жатса, шеру өткіземіз. (…) Жалпы бір шеру өткізуге орта есеппен 4 млрд теңгеден астам қаржы жұмсалады», – деп түсіндірді Қорғаныс министрі.
</blockquote>

Руслан Жақсылықов: Бір әскери парад өткізуге шамамен 4 млрд. теңге кетеді

<a href="https://kyzylorda-news.kz/">Kyzylorda-news.kz.</a> Қазалы ауданында полиция шақырып, өзі туған нәрестені көшеден тауып алғаны жөнінде жалған айтқан әйелге қатысты қылмыстық іс қозғалды.
Оқиға аудан орталығы – Әйтеке би кентінің шеткі аймағында болған. Кент тұрғыны өзі дүниеге алып келген шақалақты көшеден тауып алдым деп полицияға жалған айтқан.
<blockquote>
 «Әйел қазір босанған шақалақ екеуі перзентханада ем қабылдауда. Оқиға бойынша ҚР Қылмыстық кодексінің 119-бабы 1-бөлігімен сотқа дейінгі тергеп-тексеру басталды», – делінген Қызылорда облыстық полиция департаментінің хабарламасында.
</blockquote>

Қазалылық әйел өз баласын «көшеден тауып алдым» деп полиция шақырған

<a href="https://kyzylorda-news.kz/">Kyzylorda-news.kz.</a> Қызылорда қаласының тұрғындары ауыз сумен Қызылжарма және Қызылорда жер асты су кені арқылы қамтамасыз етіледі.
Қазіргі таңда күнделікті 58 ұңғымадан тәулігіне 70 мың текше метр ауыз су өндіріліп тұтынушыға таратылып отыр. Бұл туралы «Қызылорда су жүйесі» мекемесі басшысының бірінші орынбасары Нұрлан Өтепов баяндады.
<blockquote>
 «Бүгінгі күнге кәсіпорын 82 671 тұтынушыға қызмет көрсетеді. Тұтынушылардың басым көпшілігі ауыз суды жасыл-желектер мен бау-бақшаларды суаруға пайдаланады. Бұл өз кезегінде ауыз су қысымының төмендеуіне әкеледі. Үнемдеу мәселелерін тұтынушыларға түсіндіру мақсатында ауыз суды көгалдандыру жұмыстарына белгіленген уақыт аралығында, яғни түнгі 00:00 мен 06:00 аралығында пайдалануды ескертіп, түсіндірме жұмыстары жүргізіліп келеді. Су ысырабына жол бермеу мақсатында кәсіпорынның инспектор-бақылаушыларымен күнделікті рейд жұмыстары ұйымдастырылып, заң бұзушылықтар дер кезінде анықталып қалыпқа келтірілуде», – деді Нұрлан Кеңесұлы.
</blockquote>

Қызылордада 58 ұңғымадан тәулігіне 70 мың текше метр ауыз су шығады

*<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаев Жаңақорған ауданында бірқатар нысандарды аралап, аудан активімен кездесті.*
Алдымен аймақ басшысы «Абдулла» шаруа қожалығының құс фабрикасының құрылысымен танысты. Жобаның құрылысы өткен жылы «Аграрлық несие корпорациясы» АҚ қолдауымен бастау алды. Толық іске қосылғаннан кейін фабрика облыс халқы тұтынатын құс етінің 33 пайызын қамтамасыз етпек. Неміс технологиясымен салынатын нысанда 120 жергілікті маман жұмыспен қамтылатын болады. 
Құрылыс жұмыстарымен танысқан облыс әкімі мұндай өзекті әрі тиімді жобаларды қолдау қажет екенін жеткізіп, өндірісті уақытылы іске қосылуына жұмыс жүргізу қажет екенін алға тартты.
Мұнан соң облыс әкімі Жаңақорған кентінде салынып жатқан 300 орындық мектептің жағдайымен танысты. Құрылыстың бас мердігері – «ҚазҚұрылыс» ЖШС. Білім ордасының құрылысы пандемия шектеуі салдарынан кешіктіріліп, жаңа оқу жылында пайдалануға берілмек. Аймақ басшысы мердігер компания басшысына мектеп құрылысын сапалы әрі уақытылы жүргізуді міндеттеді.
Әрі қарай актив отырысында Нұрлыбек Нәлібаев жаңа аудан әкімі Мұрат Тілеумбетовті таныстырып, бұрынғы аудан басшысы Руслан Рүстемовке абыройлы қызметі үшін алғысын жеткізді. Сондай-ақ, аудан экономикасын дамытуға бағытталған инвестициялар мен жобалардың сәтті жүзеге асқанын тілге тиек етті.
<blockquote>
 “Өткен жылы әлемдік пандемияның салдарынан қалыптасқан дағдарысқа қарамастан Қызылорда қаласы мен аудандар арасында Жаңақорған ауданы барлық негізгі макроэкономикалық көрсеткіштер бойынша жоспарлы межені асыра орындаған бірегей аудан болды. Облысқа тартылған инвестициялардың 11 пайызы осы ауданға тиесілі. Мал шаруашылығы бойынша 2021 жылдың қорытындысымен «Озат аудан» атанды. Облыста тұңғыш рет кәсіпкерлік мақсаттағы жер учаскелері электронды форматтағы аукционмен өткізілді. Нәтижесінде, жер сатудан бюджетке түсетін түсім 10 есеге дейін артты. Қазіргі уақытта Жаңақорған кентінде жылына 3,5 мың тонна құс етін өндіретін құс фабрикасының құрылысы жүруде”, – деді Н.Нәлібаев.
</blockquote>
Жиында аймақ басшысы индустрияландыру, шағын және орта бизнесті қолдау және ауыл шаруашылығы саласын жаңа бағытта дамыту қажеттігін еске салып, Президенттің «Жаңа Қазақстан» бастамасына қолдау білдіріп, әріптестерін ел дамуы жолында аянбай еңбек етуге шақырды.
Жиын соңында аудан ардагерлері Зинабдин Шермаганбетов пен Серқожа Ыдырысов игі лебіздерін білдіріп, ақ батасын берді.
<img src="https://kyzylorda-news.kz/wp-content/uploads/2022/04/fb_img_1650407132929.jpg" alt="" />
<hr />
<img src="https://kyzylorda-news.kz/wp-content/uploads/2022/04/fb_img_1650407141192.jpg" alt="" />
<img src="https://kyzylorda-news.kz/wp-content/uploads/2022/04/fb_img_1650407147499.jpg" alt="" />

Нұрлыбек Нәлібаев Жаңақорған ауданына барды

Kyzylorda-news.kz. Қазақстан Республикасы Президенті Әкімшілігі мен Жаңақорған аудандық мәслихатының келісімдері бойынша облыс әкімінің өкімімен Жаңақорған ауданының әкімі лауазымына Тілеумбетов Мұрат Жолкелдіұлы тағайындалды.
Облыс әкімі Нұрлыбек Нәлібаев жаңа аудан әкімін таныстырып, қызметіне сәттілік тіледі.
Мұрат Тілеумбетов 1963 жылы Қызылорда облысында дүниеге келген.
Ол Жамбыл гидромелиоративтік құрылыс институтын «инженер-құрылысшы» және Қорқыт Ата атындағы Қызылорда мемлекеттік университетін «экономист» мамандықтары бойынша бітірген.
Еңбек жолын 1985 жылы Қызылорда құрылыс трестінің жұмысшысы ретінде бастап, аталған мекемеде мастер, инженер-жабдықтаушы және шағын кәсіпорын директоры лауазымында 1995 жылға дейін қызмет атқарған.
1995-2010 жылдары «Интертич-Кезнар» шағын өндірістік кәсіпорнының өкілі, «Ақ маржан» акционерлік қоғамына қарасты «Реалбаза» мекемесінің директоры, «Жабдықтау» жауапкершілігі шектеулі серіктестігінің бас директоры болған.
2010-2013 жылдары Қызылорда облысының мемлекеттік мүлік және жекешелендіру департаментінің бас маманы, бөлім бастығы;
2013-2014 жылдары Қызылорда қаласы әкімінің орынбасары;
2014-2017 жылдары Қызылорда облысының құрылыс, сәулет және қала құрылысы басқармасының басшысы;
2017-2019 жылдары «Жаңақұрылыс», «Қызылорда тазалығы», «Автобус паркі» ЖШС-де басшылық қызметтер атқарған.
2017-2019 жылдары Қылылорда облысының жолаушылар көлігі және автомобиль жолдары басқармасының бөлім басшысы, басқарма басшының орынбасары болған.
2020 жылдың сәуір айынан бастап Қызылорда облысының жолаушылар көлігі және автомобиль жолдары басқармасының басшысы қызметін атқарып келді.

Жаңақорған ауданының әкімі тағайындалды

Kyzylorda-news.kz. Бүгін ҚР Премьер-Министрі Әлихан Смайыловтың төрағалығымен селекторлық режимде Үкімет отырысы өткізіліп, елдегі шағын және орта бизнесті дамыту және кәсіптік білім беру оқу орындарында маман даярлау мәселелері қаралды.
Жиынға тиісті сала басшылары мен барлық өңірдің әкімдері қатысты.
Үкімет басшысы Ұлттық экономика министрлігіне «Атамекен» ҰКП-мен бірге “Шағын және орта кәсіпкерлікті дамыту” тұжырымдамасын сапалы іске асыруды, мемлекеттік органдармен бірге тәуекелдерді басқару жүйесінің негізінде бизнесті мемлекеттік бақылау жүйесін автоматтандыру жөніндегі Жол картасын әзірлеуді тапсырды.
Жиыннан кейін Нұрлыбек Нәлібаев облыстық кәсіпкерлік және туризм басқармасының басшысына шағын және орта бизнесті дамытуға ынталы кәсіпкерлерді белсенді түрде тартып, оларды мемлекеттік бағдарламалар шеңберінде қолдау қажет екенін, ал білім басқармасының басшысына мамандарды даярлау бағытында еңбек нарығында жоғары сұранысқа ие жұмысшы кадрларды оқыту бойынша әрбір басқармадан ұсыныс жинақтап, талдау жасауды тапсырды.

Қазақстан және Қызылорда облысының жаңалықтары: Басты жаңалықтар old