Kyzylorda-news.kz. 2022 жылғы “Үлкен дулыға” додасында топ жарған қазақстандық Елена Рыбакина бағалы олжадан бөлек қомақты жүлделерге ие болмақ. Биылғы чемпионатқа 2 млн фунт стерлинг (1 145 240 000 теңге) сомасында чек беріледі.
Өкінішке қарай, Елена Рыбакина осы соманы бүтіндей еншілей алмайды, өйткені Ұлыбританияда шетелдік спортшыларға тағайындалған жүлде қорының 40-тан 50% – на дейінгі көлемде салық бар.
Сондай-ақ, қазақстандық теннисші Wimbledon-нан кейін әлемдегі үздік 10 теннисшінің қатарына да кіре алмайды. Өйткені Әйелдер теннис қауымдастығы (WTA) бірнеше ай бұрын теннисшілерге Wimbledon-да өнер көрсеткені үшін рейтинг бойынша ұпай тағайындамау туралы шешім қабылдады.
<blockquote>
 “Бұл – ерекше сезім. Матчқа дейін және оның барысында да қатты қобалжыдым. Ішім алай-дүлей. Қарсыласыма керемет ойыны үшін алғыс айтамын. Көрермендерге де рақмет. Олардың алдында өнер көрсету мен үшін үлкен мәртебе, мұндағы атмосфера керемет. Турнирдің екінші аптасында да төбе көрсетемін деп ойламадым, ал турнирдің жеңімпазы болу – мүмкін емес жағдай секілді, әлі сене алмай тұрмын. Қазіргі сезімімді сипаттау үшін сөз таппай тұрмын. Командама да көп рақмет, оларсыз мен бұл биікке көтеріле алмас едім. Үйдегі мен үшін тақымын қысып отырған ата-анама жасаған бар жақсылығы үшін рақмет!”- деді Елена Рыбакина.
</blockquote>
<a href="https://kaz.zakon.kz/6009764-rybakina-ulken-dulyga-turnirindegi-zhenisi-ushin-1-mlrd-tengeden-astam-syiaky-alady.html">Zakon.kz</a>

Рыбакина «Үлкен дулыға» турниріндегі жеңісі үшін 1 млрд теңгеден астам сыйақы алады

Kyzylorda-news.kz. Өткен тәулікте коронавирус инфекциясын жұқтырған 477 жағдай тіркелді.
Оның ішінде: Нұр-Сұлтан қаласында – 120, Алматы қаласында – 165, Шымкент қаласында – 44, Ақмола облысында – 14, Алматы облысында – 40, Шығыс Қазақстан облысында – 1, Жамбыл облысында – 17, Батыс Қазақстан облысында – 4, Қарағанды облысында – 34, Қостанай облысында – 7, Қызылорда облысында – 9, Маңғыстау облысында – 5, Павлодар облысында – 5, Солтүстік Қазақстан облысында – 5, Түркістан облысында – 7.
Елімізде коронавирус инфекциясын жұқтырғандар саны 1 309 434 жетті.

Қызылордада 9 адамнан коронавирус анықталды

Kyzylorda-news.kz. Қазақстанның бірінші ракеткасы Елена Рыбакина Уимблдонның чемпионы атанды.
Рыбакина Уимблдон әлемнің 2-ракеткасы, тунистік Онс Жабермен бас жүлдені сарапқа салды. Бұл екеуінің де «Үлкен дулыға» жарысындағы алғашқы финалы.
Осыған дейін қарсыластар үш рет кездесіп, соның екеуінде Онс Жабер жеңіске жеткен еді. Бір сағат 50 минутқа созылған кездесуде жерлесіміз үш сетте 3:6, 6:2, 6:2 жалпы есебімен жеңіске жетті.
Осылайша, Елена Рыбакина қазақстандық теннисшілер арасында тұңғыш рет жекелей сында «Үлкен дулыға» жарысының жеңімпазы атанды.

Ел тарихында тұңғыш рет: Рыбакина Уимблдон турнирінің чемпионы атанды

Kyzylorda-news.kz. 10 шілдеде Нұр-Сұлтан қаласы мен еліміздің тоғыз облысында дауылды ескерту жарияланды.
Синоптиктер&nbsp;Нұр-Сұлтанда&nbsp;күндіз найзағай ойнайды деп болжайды. Күндіз солтүстік-шығыстан жел соғады, екпіні 15-20 м/с жетеді.
Ақмола облысының&nbsp;оңтүстігінде, шығысында найзағай ойнайды деп күтіледі. Облыстың оңтүстік-шығысында солтүстік-шығыстан соққан желдің екпіні 15-20 м/с құрайды.
Күндіз&nbsp;Қарағанды облысының&nbsp;солтүстігінде қатты жаңбыр жауады. Түнде және таңертең облыстың солтүстік-шығысында тұман түседі. Облыстың солтүстігінде, шығысында найзағай ойнап, бұршақ түседі. Облыстың солтүстігінде солтүстік-шығыстан жел соғады, екпіні 15-20 м/с жетеді.
Күндіз&nbsp;Батыс Қазақстан облысының&nbsp;оңтүстік-батысында +35°C дейін қатты ыстық болады.
Күндіз&nbsp;Ақтөбе облысының&nbsp;солтүстігінде найзағай ойнайды.
Күндіз&nbsp;Қостанай облысының&nbsp;оңтүстік-шығысында найзағай ойнайды. Солтүстік-шығыстан жел соғады, күндіз облыстың оңтүстік-шығысында соққан желдің екпіні 15-20 м/с жетеді.
Қызылорда облысының&nbsp;басым бөлігінде және Қызылордада төтенше өрт қаупі сақталады.
Павлодар облысының&nbsp;оңтүстігінде найзағай ойнап, бұршақ түседі. Солтүстік-шығыстан жел соғады, күн күркіреген кездегі екпіні 15-20 м/с жетеді.
Күндіз&nbsp;Атырау облысында&nbsp;қатты ыстық: +37°C. Облыстың басым бөлігінде төтенше өрт қаупі сақталады. Атырауда күндіз қатты ыстық: +35…+37°C.
Күндіз&nbsp;Жамбыл облысының&nbsp;таулы аудандарында найзағай ойнап, бұршақ түседі деп күтіледі. 10-11 шілдеде солтүстік-батыстан жел соғады, таулы аудандарда соққан желдің екпіні 15-20 м/с жетеді.

Жексенбіге арналған ауа райы болжамы

Kyzylorda-news.kz. Облыс әкімі Нұрлыбек Нәлібаев қызылордалықтарды Құрбан айт мерекесімен құттықтады.
Құрметті жерлестер! Қадірлі мұсылман қауым! 
Сіздерді қасиетті Құрбан айт мерекесімен шын жүректен құттықтаймын! 
Бұл – барша мұсылман қауымын ізгі амал жасауға шақыратын ұлық мейрам. Қасиетті мереке тек құрбандық шалумен шектелмейді, ағайын арасындағы ауызбіршілікті сақтауға, қиналғанға қамқор, жоқ-жұқанға жәрдем жасайтын, мұқтажға мейірім төгетін жан жылуын білдіреді. Адамзат баласын имандылыққа ұйытып, жоққа сабыр, барға қанағат етуге үндейді. Осындай ортақ мүдде орайында жанашырлық сезімнің амалдары орындалады. 
Ұлт болып ұйысқан тұтастығымыз нығайып, бірлігімізді бекемдеген мәртебелі мизан мейрамда шалған құрбандықтарыңыз бен ізгі ниеттеріңіз сауаптан жазылсын! 
Жерлестеріміздің қасиетті күндердегі тілеген дұғалары қабыл болып, ырзық-несібе арта берсін! 
Құрбан айт әрбір отбасына амандық, елімізге ынтымақ әкелсін! 
Айт қабыл болсын!

Аймақ басшысы Құрбан айт мейрамымен құттықтады

Kyzylorda-news.kz. Мемлекет басшысы Қазақстан халқын бүгінгі мейраммен құттықтады.
Қымбатты отандастар! Сіздерді күллі мұсылман қауымы үшін қасиетті Құрбан айт мерекесімен шын жүректен құттықтаймын!
Бұл – имандылық пен адамгершіліктің, мейірімділік пен жанашырлықтың мейрамы. Мұсылмандар осы күндерде мұқтаж жандарға көмектесіп, қамқорлық көрсетеді. Бір-біріне ізгі тілектерін айтып, жақсылық жасауға ұмтылады.
Құрбан айт мейрамы елімізде рухани құндылықтарды берік орнықтырып, қоғамдағы татулық пен тұрақтылықты сақтау жолында ерекше рөл атқарады.
Бұл мереке Қазақстанда тұратын түрлі этнос және конфессия өкілдерінің өзара сыйластығы мен құрметін арттырып, достығын нығайта түседі. Халықты береке-бірлікке шақырып, ырыс-ынтымағын еселейді. Бейбітшілік пен ізгіліктің бастауы болған ата дініміздің басты мәні – осында.
Бүгінгі ұлық мейрамда шалған құрбандықтарыңыз бен тілеген дұға-тілектеріңіз қабыл болсын!
Баршаңызға зор денсаулық, бақ-береке тілеймін!

Қасым-Жомарт Тоқаев қазақстандықтарды Құрбан айт мерекесімен құттықтады

Kyzylorda-news.kz. Биыл Қызылорда облысында мемлекеттік бюджет есебінен 60,6 млрд. теңгені құрайтын 106 жоба жүзеге асуда. Бұл туралы облыс әкімінің міндетін атқарушы Мархабат Жайымбетов хабарлады.
Президент көрсетілетін мемлекеттік қызметтің барлық түрін жаңғыртып отырудың маңыздылығын ескеріп, олардың кешенді және сапалы болуға тиіс екенін айтады Мемлекет басшысы.
Осы орайда облыс әкімі Нұрлыбек Нәлібаевтың тапсырмасымен аймақта жүзеге асырылатын құрылыс жобаларының тиімділігін әрі сапасын қадағалайтын арнайы Кеңес құрылып, жұмыс жасауда. Жоспарланған жобалар кеңесте жан-жақты талқыланып, тиімділері ғана қолдау тауып отыр. Бұл ең алдымен бюджет қаржысын тиімді пайдалануға септігін тигізеді. Сонымен қатар, халық үшін қажетті нысандарды салуды көздейді. Яғни, басымдылық әлеуметтік нысандарға беріліп отыр. 
Бүгін облыс әкімінің міндетін атқарушы Мархабат Жайымбетовтың төрағалығымен облыс көлемінде мемлекеттік бюджет есебінен салынып жатқан құрылыс нысандарының жағдайы талқыланды.
<blockquote>
 Бүгінгі күні мемлекеттік бюджет есебінен 60,6 млрд. теңгені құрайтын 106 жобаны жүзеге асыруға 2022 жылға 21,9 млрд. теңге бөлінді. Осы қаржыны толық игеріп, құрылыс нысандарын мерзімінде және сапалы жүргізілуін қамтамасыз етуіміз қажет, – деді М. Жайымбетов.
</blockquote>
Аталмыш жобалар бойынша облыстық құрылыс, сәулет және қала құрылысы басқармасының басшысы, Қызылорда қаласы мен барлық аудан әкімдерінің салаға жауапты орынбасарлары баяндап берді. 
Сонымен қатар, биыл облыстық құрылыс, сәулет және қала құрылысы басқармасы арқылы 25 нысанның құрылысы жүргізілуде. Жыл соңына дейін 14 әлеуметтік нысан іске қосылады. Ал, қалған 8 нысан 2023 жылы пайдалануға беріледі деп жоспарлануда.
<img src="https://kyzylorda-news.kz/wp-content/uploads/2022/07/fb_img_1657288140675.jpg" alt="" />

Қызылорда облысында 106 нысанның құрылысы жүріп жатыр

Kyzylorda-news.kz. Аймақ басшысының алдағы жылу беру маусымын іркіліссіз өткізу жөніндегі тапсырмасын орындау мақсатында бүгін облыс әкімінің орынбасары Мархабат Жайымбетовтің төрағалығымен көппәтерлі тұрғын үйлерді басқарудың жаңа формасы мәселелері бойынша жиын өтті. Мәжіліске аудан әкімдері, тиісті басқарма басшылары мен коммуналдық мекеме басшылары қатысты.
Қазіргі таңда тіршілікті қамтамасыз етуші кәсіпорындар мен әлеуметтік сала нысандарының алдағы жылу беру маусымына дайындығы бекітілген кестеге сәйкес жүруде. Тұтынушыларды электр және жылу энергиясымен, газбен, сумен қамтамасыз ететін коммуналдық кәсіпорындардың жөндеу жұмыстары 67%-ға орындалды.
Әлеуметтік нысандар бойынша орындалуы – 40% (автономды қазандықтарды жөндеу, мектеп және балабақшалардың ағымдағы және күрделі жөндеулері, т.б.). Биыл 23 әлеуметтік нысанның жылу қазандықтарын қайта жаңғырту жұмыстарына республикалық және облыстық бюджеттен қаржы бөлініп, іске асуда.
Қала және аудан әкімдіктерінің жоспарларына сәйкес әлеуметтік сала нысандарына алдағы жылу беру маусымында 34 мың тонна, тұрғындарға 142 мың тонна көмір отыны қажет. Нақты бүгінгі күнге жеткізілгені: тұрғындарға 3,5 мың тонна, әлеуметтік салаға 1,1 мың тонна. 
Мархабат Жайымбетұлы қала, аудан әкімдеріне, сала басшыларына алдағы жылу беру маусымында көмір тапшылығын болдырмау мақсатында қазірден бастап тиісті жұмыстарды атқаруды, сондай-ақ, облыс көлемінде көмір отынының бағасын тұрақты ұстап тұру үшін қала және аудан әкімдіктерімен меморандумдар жасап, халықтың көмірді кедергісіз сатып алуын және қауіпсіз қолжетімділікті қамтамасыз етуді қатаң тапсырды. Сонымен бірге, облыс тұрғындары да алдағы күзгі-қысқы жылыту маусымына қазірден бастап қамданғаны жөн деп ескертті.
Жауапты басшыларға мекемелер 1 қазанда күзгі-қысқы мезгілге дайындық паспортын алып, толық дайын болу қажеттілігі ескертілді. 
Жиында көппәтерлі тұрғын үйлерді басқарудың жаңа формасын құру мәселесі талқыланды. 
Мемлекет басшысының 2020 жылғы 1 қыркүйектегі «Мүлік иелерінің бірлестігі» институтын енгізу туралы тапсырмасына орай облыстағы 913 көпқабатты тұрғын үй толығымен басқарудың жаңа формасымен құрылды. Оның ішінде 12 меншік иелерінің бірлестігі және 901 жәй серіктестік. 
Осы мақсатта облыс бойынша басқарудың жаңа нысандарына қатысты нормативтік құқықтық актілерін бекіту және ақпараттандыруға арналған іс-шара жоспары бекітілді. 
Енді облыс тұрғындары да көппәтерлі тұрғын үйлерді басқарудың жаңа формасына, яғни «Мүлік иелерінің бірлестігі» мен «Жәй серіктестікке» көшулері қажет.

Қызылорда: Жылу беру маусымына дайындық жұмыстары пысықталды

Kyzylorda-news.kz. Бүгін мұсылман қауым Құрбан айтты мерекелеуді бастады.
Бүгін басталған Құрбан айт мейрамы үш күнге созылады.
Қазақстан мұсылмандары діни басқармасының мәліметіне қарағанда Һижри жыл санауы бойынша 1443 жылдың зұлхижжа айының басталуы 30 маусым болып бекітілген.
Арапа күні 8 шілдеге сәйкес келеді. Ал 9 шілде – Құрбан айт мерекесінің алғашқы күні. Бұл күндері құрбандыққа мал шалып, азығы жоқ, мұқтаж жандарға таратып береді. Ислам түсінігі бойынша жоқ-жітік жандарға көмектесу сауапты іс.
Сондай-ақ, мұсылмандар құлшылық етіп, көбірек жақсы амалдар жасауға тырысқаны жөн.
Сондай-ақ, мереке кезінде Құрбан айт намазы оқылады.
Айта кетейік, әр өңірде намаз оқудың бекітілген уақыты бар. Қазақстан мұсылмандары діни басқармасы таратқан ақпаратқа сәйкес өңірлердегі бас имамдар Құрбан айт мейрамына орай брифинг өткізіп, БАҚ арқылы халыққа аталған мерекенің мән-жайын кеңінен түсіндірді.
Аталған мерекеге тән міндет – Құрбан шалу. Еске сала кетейік, құрбандыққа шалатын малға және союға қатысты қойылатын арнайы талаптар бар.
Осы орайда қазақстандықтар Qurban2022.kz сайты арқылы өтінім бере отырып, онлайн режимде де құрбандық шала алады.
Одан бөлек, еліміздің санитариялық-эпидемиологиялық бақылау комитеті сақтық шарасы мақсатында құрбандыққа ветеринарлық анықтамасы бар малды ғана союды ұсынып отыр.
ҚазАқпарат

Бүгін Құрбан айт мейрамы басталды

9 шілдеге арналған ауа райы божамы жарияланды.
Қызылорда облысының&nbsp;басым бөлігінде төтенше өрт қаупі сақталады. Қызылорда қаласында төтенше өрт қаупі сақталады.

Сенбіде күн райы қандай болады?

<a href="https://kyzylorda-news.kz/">Kyzylorda-news.kz.</a> Қызылорда *облысынан статистикаға сәйкес 2022 жылдың 1 мамырына 13,8 млн. долларды құрайтын 29,6 мың тонна ауыл шаруашылығы өнімдері (күріш, балық өнімдері, бидай қалдығы, қамыс) экспортталды. Өнімдер әлемнің 19 мемлекетіне экспортталды.*
Барлық экспортталған өнімнің 91,9 пайызын құрайтын облыстың негізгі дақылы – күріш өнімі, Ресей, Беларусь, Қырғызстан, Әзірбайжан, Өзбекстан, Моңғол мемлекеті, Тәжікстан, Түркмения, Украина, Грузия, Литва, Түркия және Ирак мемлекеттеріне экспортталып отыр.
Облым әкімдігінің хабарламасына сәйкес есепті кезеңге 27,2 мың тонна күріш өнімі экспортталып, былтырғы жылдың сәйкесті кезеңімен салыстырғанда 94,7 пайызды құраған.
Сондай-ақ, облыстан Ресей, Әзербайжан, Польша, Грузия, Литва, Германия, Чехия және Австрия мемлекеттеріне 1060,4 тонна балық, Германия, Дания және Нидерланды мемлекеттеріне 1 155,3 тонна&nbsp; қамыс және Ресейге мен Өзбекстанға 155,0 тонна бидай қалдығы жөнелтілді.

Қызылорда облысында экспорт әлеуеті артуда

Қазақстан және Қызылорда облысының жаңалықтары: Басты жаңалықтар old