<a href="https://kyzylorda-news.kz/">Kyzylorda-news.kz</a>. Қала әкімі Нұрлыбек Нәлібаев шаһардағы бірқатар нысандарды аралады. Алдымен күрделі жөндеуден өткен «Су жүйесі» мекемесінің қазіргі тынысы мен жұмысын көруден бастаған қала басшысы жаңарған ғимараттың жаңалықтарына оң баға берді.
Мекеменің орналасқан ғимараты 1964 жылы бой көтерген. Содан бері жөндеу көрмеген нысанның тозығы жетіп, қызметкерлердің жұмыс істеуіне айтарлықтай қиындық туғызған. Былтыр жарты ғасырдан астам тарихы бар ғимараттың жаңа кейіпке енуіне «Жұмыспен қамту Жол картасының» шарапаты тиді. Бағдарлама аясында бөлінген қаржыға су жүйесінің өндірістік техникалық базасы жаңғыртылып, ғимараты жөнделді. Мекеме &nbsp;ауласы асфальтталып, цех және гаражы қалыпқа келтірілді. Сонымен бірге мекеменің тағы бір жаңалығы тұрғындардың ауыз су мәселесіне қатысты сауалдарын қабылдауға арналған диспетчерлік бөлім құрылған. Артықшылығы су жүйесінің мамандары бұрынғыдай үй-үйді аралап, тұрғындар қарызын жинаумен айналыспайды. Суға қарызыңыз болса қоңырау шалып не болмаса хабарлама жазу арқылы ескертеді. Ал тұрғындар қарызының бар жоғын анықтағысы келсе орталықтың байланыс номеріне (+77056903410) хабарласып, ақпарат алуға мүмкіндігі бар.
Аралау барысында мекеменің бүгінгі өзгерісі мен қол жеткен жетістігінің барлығы мемлекет тарапынан көрсетілген үлкен қолдаудың нәтижесі деген қала әкімі «Ғимараттарыңыз жаңарды. Ендігі ретте тұрғындарға үздіксіз қызмет көрсетіп, сапалы ауыз сумен қамту керек» – деді. Сонымен бірге&nbsp; қызметкерлердің айлығын уақытылы төлеп, үздік жұмысшыларға сыйақы беруді де үйлестіру керектігін де &nbsp;атап өтті. Сондай-ақ тұрғындармен тілдесіп, мекеменің қызмет көрсету сапасы жайында пікірлесті.
Өз кезегінде мекеме басшысы Марат Жәмиев қызметкерлердің айлығы бұрын 6-7 айға дейін кешіктірілсе қазір бір жүйеге келіп қалғандығын айтып, саладағы жағымды жаңалықтың бірі қаладағы ауыз су тарифы арзандап, 61 теңгеден 44 теңгеге төмендегендігін жеткізді.
Өткен жылы Сырдария өзенінің сол жағалауындағы жаңа қалада тұрып жатқан елдің қуанышын еселеп, көптің сүйіншілей айтқан хабарының бірі жаңа модульді жылу қазандағының іске қосылуы болды. Германия мен Италиядан әкелінген соңғы үлгідегі технологиялармен жабдықталған жаңа нысан еліміз бойынша цифрлық технологиямен жабдықталған жалғыз орталық. Бүгінде жылу орталығының бірінші кезеңі аяқталып, сол жағалау аумағында орналасқан 32 көпқабатты тұрғын үймен 2 әлеуметік нысанды («Рухани жаңғыру» және «Жастар орталығы») жылумен қамтамасыз етіп тұр. Мұндағы бір қазандықтың өзі 100 үйді жылумен қамтамасыз етуге қауқарлы. Орталық құрылысының екінші кезеңі толық іске қосылғанда сол жағалауды түгел жылумен қамтамасыз ететін болады.
<img src="https://kyzylorda-news.kz/wp-content/uploads/2021/02/151623429_2776347149298692_4314566983867571536_o.jpg" alt="" />
<img src="https://kyzylorda-news.kz/wp-content/uploads/2021/02/151647390_2776347242632016_8577615292680708043_o.jpg" alt="" />
<img src="https://kyzylorda-news.kz/wp-content/uploads/2021/02/151790513_2776347139298693_697952710970864103_o.jpg" alt="" />

Қызылордада ауыз су бағасы арзандаған

<a href="https://kyzylorda-news.kz/">Kyzylorda-news.kz.</a> Қызылордада ғалым, кәсіпкер Самалбек Қосанов бау-бақша орталығын ашты. Ауыл шаруашылығы ғылымдарының кандидаты өңірде ғылымды кәсіпке айналдыруға болатынын дәлелдеп жүрген азаматтардың бірі.
Кәсіпкердің айтуынша, бүгінгі күнге дейін аймақ азаматтары сапалы бау-бақша тұқымдары мен көшеттерін, қаламшаларын көршілес облыстардан алуға мәжбүр екен. Кейде тіпті уақыттың тапшылығынан сырттан да іздемей базардан шығу тегі белгісіз өнімдерді де алатын сәттер жиі кездеседі дейді.&nbsp;&nbsp;
<blockquote>
 «Бұл орталықты ашудағы мақсат – облыс және қала халқын сапалы тұқымдармен қамтамасыз ету, аймақ тұрғындарының егіншілікке деген қызығушылығын ояту, яғни бақша шаруашылығын кіріс көзі ретінде қарастырғанын қалаймын. Тұқымның сапасына ерекше мән беріп отырмыз. Ол үшін өндірушілермен әріптестік байланыс орнатып, тұқымдарды оригинаторлардан алуды жолға қойдық. Тұқымды шет елдік компаниялармен қоса көрші Шымкент қаласынан, сондай-ақ Жаңақорған ауданындағы «Сыр табиғаты» тұқым бағынан да алып отырмыз. Жаңақорғандық әріптестеріміздің жергілікті жеміс және сәндік екпе ағаштарын облыс орталығына әкеліп халыққа ұсынатын боламыз», – дейді «Жаса Агро» орталығының басшысы Самалбек Қосанов.
</blockquote>
Орталықта сапалы тұқымдардан өзге бау-бақшаға тамшылатып суғару үшін қажетті құралдар, тыңайтқыштар, жылыжайға қажетті жабдықтарға дейін бар. Кәсіпкер орталық жанынан жылыжай да салып қойған. Аталмыш жылыжайдан биыл 50 мың дана көкөністердің көшетін нарыққа шығармақ, алдағы уақытта көлемін 150-200 мың көшетке дейін арттырамыз дейді. Көшеттердің маусымынан кейін орнына қияр егіледі екен.
Орталықтан тұқым немесе өзге де бау-бақшаға қажетті заттарды алған адамдарға Самалбек Қосановтың өзі қолдануына қатысты кеңес беріп, өнімді одан әрі жетілдіруге үлес қосатынын жеткізді.
Мұнан өзге, ғалым-кәсіпкер алдағы уақытта Жұмыспен қамту орталығымен тығыз байланыс орнатып, жұмыссыз жүрген жандарды бау-бақшаның қыр-сырына үйретуді, үйретіп қана қоймай оқыған жандардың біліктілігін айқындайтын сертификаттар беруді көздеп отыр.
<blockquote>
 «Осыдан бірнеше жыл бұрын өңір дихандары бау-бақша өнімдері үшін субсидия ала алмай келді. Біз облыстық ауыл шаруашылығы басқармасымен бірге бұл мәселені министрлікке жеткізіп, нәтижесінде 2019 жылдан бері аймақ тұрғындары жеміс-жидек, бау-бақша өсіргені үшін мемлекеттік қолдауға ие бола алды. Бүгінгі ашылып тұрған орталық өңірімізде жергілікті өнімдердің қатарын арттыруға, әртараптандыруға үлесін қосады деп сенеміз. Кәсіпкерлер палатасы тарапынан Самалбек Қосановпен тығыз байланыстамыз. Бұл кісі алғаш кәсіпке бет бұрғанда бастамасына толық сүйемелдеу жасадық әлі де қаржылай емес қолдау тетіктері арқылы көмек көрсетудеміз», – деді Қызылорда облысы кәсіпкерлер палатасы директорының орынбасары Пірмұхаммед Сыздықов.
</blockquote>
<img src="https://kyzylorda-news.kz/wp-content/uploads/2021/02/whatsapp-image-2021-02-17-at-12.04.28-1.jpeg" alt="" />
<img src="https://kyzylorda-news.kz/wp-content/uploads/2021/02/whatsapp-image-2021-02-17-at-12.01.37.jpeg" alt="" />
<img src="https://kyzylorda-news.kz/wp-content/uploads/2021/02/whatsapp-image-2021-02-17-at-12.04.28.jpeg" alt="" />

Қызылордада «Жаса Агро» бау-бақша орталығы ашылды

<a href="https://kyzylorda-news.kz/">Kyzylorda-news.kz.</a> Қызылорда облысының Қызылорда қаласы мен Жаңақорған, Шиелі, Сырдария аудандарында «Қызылорда-Шымкент» және «Қызылорда-Қарабұтақ» жол учаскелерінде ақы алудың ашық жүйесін енгізуге қатысты қоғамдық тыңдау өтті.
Апта соңына дейін осы мәселе бойынша тыңдаулар Қызылорда облысының Жалағаш, Қармақшы, Қазалы аудандарында және Арал қаласында жалғасады.
Іс-шара барысында«ҚазАвтоЖол»ҰК» АҚ мамандары жергілікті тұрғындар мен кәсіпкерлерге ақы алудың ашық жүйесінің жұмыс істеу принциптерін, ақы төлеу тәсілдерін, сондай-ақ ақылы автожолдардың артықшылықтарын түсіндірді.Атап айтқанда, ақылы жолдардың өзін-өзі қаржыландыруға өтуі тас жолды сақтауға және жол бойындағы қызметті үздіксіз жақсартуға мүмкіндік береді. Бұл өз кезегінде жүргізушілер мен жолаушыларға қауіпсіз және ыңғайлы қозғалысты қамтамасыз етеді.
Жиын барысында тұрғындар: төлем мөлшері, тәсілдері, жеңілдіктер және т. б. сұрақтар мен пікірлерін айтты.«ҚазАвтоЖол»ҰК» АҚ өкілі Бауыржан Камалитден 2 және 3 санаттағы жолдарда жеке жеңіл көлік иелері төлемнен босатылғанын жеткізді.
Сондай-ақ, 1-санаттағы ақылы жолдарға іргелес өңірлердің тұрғындары үшін жеңілдік ретінде «жылдық абонемент» көзделген. Қаз автожол тарапынан Ұлы Отан соғысы ардагерлері және оған теңестірілген ардагерлер, мүмкіндіктері шектеулі азаматтар үшін жеңілдіктер енгізу туралы мәселе қаралуда.
«Қызылорда-Шымкент»,«Қызылорда-Қарабұтақ» жолдарында көлік құралы иесінің жеке шотын интернет, төлем жүйелері және екінші деңгейдегі банктердің мобильді қосымшалары арқылы толтыруды көздейтін «ашық жүйесі» енгізілетін болады.
Кейбір азаматтар көлік салығын төлегеніне қарамастан, жол жүру ақысын неге төлеу керегін алға тартты. Спикерлер жылжымалы мүлікке төленетін салықтың барлығы бірден автожолдарға емес, бірінші республикалық бюджетке түсіп, кейін денсаулық, білім беру, әлеуметтік төлемдер, инфрақұрылым құрылысы және т. б. түрлі мақсаттарға бөлінетінін түсіндірді.
Басқа салықтар сияқты, «көлік» салығы да жаңа жолдар салуға және ескі жолдарды жөндеуге бағытталуы мүмкін. Бірақ бұл мемлекеттік шығындар – жолдарда смарт-жүйелерді, қауіпсіздік жүйелерін енгізуді, жол төсемін жедел және тұрақты жөндеу мен тазалауды, жүргізушілер мен жолаушылардың демалуы үшін қолайлы жағдайлар жасауды көздемейді. Осы мақсаттар үшін мемлекет күрделі жөндеуден өткен республикалық маңызы бар автомобиль жолдарында ақы төлеу жүйесін енгізуді жоспарлап отыр.
Айта кетсек, қоғамдық тыңдауға қатысушылар көптеген идеялар мен ұсыныстарын айтты. Соның ішіндегі ең маңыздысы: арнайы ауылшаруашылық техникаларын жол ақысын төлеуден босату. Бұл аграрлық өнім бағасының өсуіне жол бермейді деп атап өтті қызылордалықтар.Азаматтардың барлық мәселелері мен өтініштері хаттамаға енгізіліп, ұлттық компания басшылығына жеткізілетін болады.
<img src="https://kyzylorda-news.kz/wp-content/uploads/2021/02/151594676_1232382497157260_420199191905618345_o.jpg" alt="" />
<img src="https://kyzylorda-news.kz/wp-content/uploads/2021/02/151478291_1232382493823927_3026930469099012136_o-1.jpg" alt="" />

Қызылордалықтар ауылшаруашылығы техникаларын ақылы жолдарда тегін жүргізуді ұсынды

<a href="https://kyzylorda-news.kz/">Kyzylorda-news.kz.</a> Синоптиктер 18-20 ақпанға арналған ауа райы болжамын жариялады, деп хабарлайды Қазгидромет.
18-19 ақпанда Оңтүстік Каспий циклоны Қазақстанның ауа райына ықпал етеді.
Жаңбыр мен қар түрінде жауын-шашын болады, республиканың солтүстік аймақтарында боран болады деп күтілуде. 19 ақпаннан бастап еліміздің басым бөлігінде ауа температурасы айтарлықтай төмендейді.
Солтүстік өңірлерде түнде -15-33 ℃ дейін, оңтүстікте 0, +5 ℃ дейін, кей жерлерде -10-15℃ болады. Республиканың кей аймақтарында тұман, көктайғақ болып, желдің күшеюі ықтимал.

Еліміздің кей жерлерінде 33 градусқа дейін аяз болады

<a href="https://kyzylorda-news.kz/">Kyzylorda-news.kz.</a> Қызылордада үй күтушісі үй иесінің алтын бұйымдарын қолды еткен.
Қызылорда қалалық Полиция басқармасына 1994 жылы туған қала тұрғыны арызданды.
Арызданушының айтуынша, үй күтушісі болып жұмыс жасайтын азаматша, жатын бөлмесіндегі сөмкенің ішінен &nbsp;алтын сағат пен жүзікті ұрлап, қолды еткен. Келтірілген материалдық шығын&nbsp; 150 мың теңге. Жәбірленуші күдіктінің ұрлыққа әрекет етуін бірнеше рет байқағандығын айтты.&nbsp; &nbsp;&nbsp;&nbsp;
Полиция қызметкерлерінің кәсіби және жедел әрекеттерінің арқасында бірнеше сағаттан кейін&nbsp; 1964 жылы туған&nbsp; күдікті әйел ұсталды.
Қазіргі уақытта Қазақстан Республикасы Қылмыстық кодексінің 188-бабының 1-бөлігі (Ұрлық) бойынша сотқа дейінгі тергеп-тексеру амалдары жүргізілуде. Күдіктіге қатысты ешқайда кетпеу және тиісті мінез-құлық туралы қолхат түрінде бұлтартпау шарасы қолданылды.

Қызылордада үй күтушісі сенімге селкеу түсірді

<a href="https://kyzylorda-news.kz/">Kyzylorda-news.kz.</a> Қызылорда облысында өткен жылы 8 жаңа спорт нысаны салынды. Бұл туралы аймақ басшысы Гүлшара Әбдіқалықова 2020 жылғы облыстың әлеуметтік-экономикалық дамуының қорытындылары бойынша халық алдындағы есепті кездесуінде айтты.
Қызылорда облысында өткен жылы бюджет есебінен 8 жаңа спорт нысаны салынды. Мемлекеттік-жекешелік әріптестік шеңберінде 60секциялы 5 жоба жүзеге асырылды. Арал ауданы Жақсықылыш кентінде 1 жобаның құрылысы жалғасуда.
<blockquote>
 «Биыл Қызылорда қаласының сол жағалауында көгалдағы хоккей және Тасбөгет кенті мен Ақай, III Интернационал ауылдарында денешынықтыру-сауықтыру кешені құрылыстарын бастаймыз», – деді облыс әкімі.
</blockquote>

Қызылорда облысында былтыр 8 жаңа спорт нысаны салынды

<a href="https://kyzylorda-news.kz/">Kyzylorda-news.kz.</a> Сыр өңірінде жыл сайын туындайтын су тапшылығын жою үшін қоймалар салынады. Бұл туралы аймақ басшысы Гүлшара Әбдіқалықова халық алдындағы есепті кездесуінде айтты.
<blockquote>
 «2020 жылы күрішшілеріміз гектарына 61,8 центнерден өнім алып, 550 мың тоннадан астам күріш жинап, жоғары көрсеткішке қол жеткізді. Аймағымызда вегетациялық кезеңде қайталанатын су тапшылығына байланысты ауылшаруашылығын әртараптандырудамыз. Өткен жылы пилоттық режимде Жаңақорған ауданында күздік бидай себілген 80 гектарға аквагельдер қолданылды. Нәтижесінде әр гектардан орта есеппен 18 центнерден өнім алдық», – деді Г.Наушақызы.
</blockquote>
Биыл өңірде тамшылатып суару әдісімен 3 мың гектарға қызанақ отырғызу және жаңбырлатып жүгері мен жоңышқа егуді бастау жоспарланып отыр. Алдағы жылдарда Мемлекет басшысының тапсырмасына сәйкес 158 мың гектар алқаптағы ирригациялық және дренаждық жүйелер мен 29 мың гектар суармалы жерді қалпына келтіру және айналымға енгізу жобаларын жүзеге асыру басталмақ.
<blockquote>
 «Өздеріңізге белгілі, жыл сайын жаз мезгілінде аймақта су тапшылығы орын алады. Әсіресе өткен жылы су тапшылығы қатты сезілді. Сырдария өзені арқылы келетін судың 70 пайызға жуығы қыс мезгілінде келеді. Сондықтан, алдағы уақытта қысқы тасқын суды жинақтау үшін 2,3 млрд. текше метр су жинайтын қоймалар салуды жоспарлап отырмыз», – деді аймақ басшысы аталған мәселеге орай.
</blockquote>

Қызылорда облысында 2,3 млрд текше метр су жинайтын қоймалар салынады

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова өңірдің 2020 жылғы әлеуметтік-экономикалық дамуының қорытындылары бойынша халық алдындағы есепті кездесуінде Сыр елінің агроөнеркәсіп саласында айтарлықтай өсім бар екендігін мәлімдеді.
Қазіргі таңда облыста 8,7 мың тоннадан астам әлеуметтік маңызы бар азық-түлік қоры қалыптасқан. Оның 2,2 мың тоннасы тұрақтандыру қорының өнімдері. Бұл мақсатқа 1,2 млрд. теңге бөлінді.
<blockquote>
 «Соңғы 5 жылда аграрлық сектордың жалпы өңірлік өнімдегі үлесі 4%-ға өсті. Бұл инвестициялардың жоғары өсу қарқынына, техникалық қайта жарақтандыруға және жаңа технологиялардың енгізілуіне байланысты. Тек соңғы жылдың өзінде агроөнеркәсіптік кешеннің негізгі капиталына салынған инвестициялар көлемі екі есеге өсті», – деді Гүлшара Наушақызы.
</blockquote>
Сонымен қатар, өңірде ауыл шаруашылығы өнімдерінің экспорты шамамен 9 пайызға өскен. Осы экспорттың 97 пайызы қайта өңделген өнімді құрайды.
2020 жылы алғаш рет шет елге қамыс экспортталды. Оның алғашқы 685 тоннасы Германияға жіберілді.
Сондай-ақ, Сыр елінен әлемнің 17 еліне ауыл шаруашылығы өнімдерінің 11 түрі экспортталды.

Сыр елінің агроөнеркәсіп саласында айтарлықтай өсім бар

<a href="https://kyzylorda-news.kz/">Kyzylorda-news.kz.</a> Биыл Қызылорда облысындағы Тереңөзек кенті көгілдір отынға қосылды. Ал, жақын арада Жосалы және Жалағаш кенттері табиғи газға қосылады. Бұл туралы Гүлшара Әбдіқалықова халық алдындағы есепті кездесуінде айтты.
Аймақ басшысының айтуынша, бүгінде облыс халқының 97 пайызы орталықтандырылған ауыз сумен, 65 пайызы табиғи газбен қамтылған.
2020 жылы 16 елді мекенде су құбыры және кәріз желілерін қайта жаңғырту бойынша жалпы құны 4 млрд. теңге болатын 27 жоба жүзеге асырылды. Осының нәтижесінде 100 мыңнан астам адам таза ауыз сумен қамтылған.
<blockquote>
 «Биыл ақпан айының басында Тереңөзек кентін газға қостық. Жақын арада қалған 2 аудан орталығы – Жосалы және Жалағаш кенттерін «көгілдір отынға» қосамыз», – деді облыс әкімі.
</blockquote>

Облыс әкімі: «Жақын арада Жосалы және Жалағаш кенттері табиғи газға қосылады»

<a href="https://kyzylorda-news.kz/">Kyzylorda-news.kz.</a> Сыр өңірінде кен орындарының сарқылуына байланысты жаңадан жұмыс орындары ашылатын болады. Бұл туралы аймақ басшысы Гүлшара Әбдіқалықова халық алдындағы есепті кездесуінде айтты.
Жасыратыны жоқ, өңір экономикасының негізгі проблемасы кен орындарының сарқылуы болып отыр. 2020 жылы мұнай өндіру көлемі 17,3 пайызға (960 мың тоннаға) азайса, ағымдағы жылы тағы 10,5 пайызға (500 мың тоннаға) қысқарады деп болжануда.
Ал, өңірде уран өндіру көлемінің 20 пайызға төмендеуі өнеркәсіптік өнім өндіру мен қайта өңдеу көрсеткішіне теріс әсер етті. Осының салдарынан құрамында уран бар шикізатты қайта өңдеу көлемі 28%-ға қысқарған.
<blockquote>
 «Мұнай мен уран өндірісінің төмендеу салдарын азайту үшін облыста кешенді шаралар қабылдануда. 2021 жылғы 26 қаңтарда Үкіметтің кеңейтілген отырысында Мемлекет басшысы Қасым-Жомарт Тоқаев Қызылорда облысының экономикалық күрделі жағдайын ескеріп, Үкіметке қолдау көрсетуді тапсырды. Осыған орай, біз өз тарапымыздан республикалық бюджеттен қаржылық қолдауды қажет ететін 110 жобаны әзірлеп, ұсындық», – деді бұл туралы өңір басшысы.
</blockquote>

Гүлшара Әбдіқалықова: «Қызылорда облысының экономикалық күрделі жағдайын жақсартуға 110 жоба ұсынылып отыр»

<a href="https://kyzylorda-news.kz/">Kyzylorda-news.kz.</a> «Жаңа жұмыс орындарын құру – біздің басым бағыттарымыздың бірі». Облыстың 2020 жылғы әлеуметтік-экономикалық дамуының қорытындылары бойынша халық алдындағы есепті кездесуінде осылай деген аймақ басшысы Гүлшара Әбдіқалықова өңірдегі жұмыссыздық мәселесіне де жан-жақты тоқталып өтті.
Оның айтуынша, «Ауыл – Ел бесігі», «Жұмыспен қамтудың Жол картасы» мемлекеттік бағдарламаларының арқасында өңірде жұмыссыздық деңгейі 4,9 пайыздан өспеген. Ал, бұл көрсеткіш республикада 5,0%-ды құрайды.
<blockquote>
 «Осы бағдарламалар аясында 2020 жылы тұрғын үй, жол және әлеуметтік салаларда 44,3 млрд. теңгеге 351 жоба жүзеге асырылды. Ал биыл 12,8 млрд. теңгеге 42 жобаны іске асыратын боламыз», – деді аймақ басшысы.
</blockquote>
Облыста өткен жыл бойынша 20 мыңнан астам жаңа жұмыс орны ашылған. Оның 15 мыңға жуығы тұрақты жұмыс орны. 
Сондай-ақ, өткен жылы халықтың нақты жалақысы 11,5 пайызға, ақшалай табысы 1,3 пайызға (83 641 теңге) өскен.

Сыр өңірінде 2020 жылы 15 мың тұрақты жұмыс орны ашылған

<a href="https://kyzylorda-news.kz/">Kyzylorda-news.kz.</a> Қызылорда облысына инвестиция тарту өткен жылы белгіленген межеден 27 пайызға өскен. Бұл туралы аймақ басшысы Гүлшара Әбдіқалықова 2020 жылғы облыстың әлеуметтік-экономикалық дамуының қорытындылары бойынша халық алдындағы есепті кездесуінде айтты.
<blockquote>
 «Облыс экономикасындағы кейбір көрсеткіштердің төмендеуіне қарамастан Үкіметпен жасалған Меморандум бойынша өңірге инвестиция тарту 230 млрд. теңге болып белгіленсе, біз көрсеткішті 27 пайызға артығымен орындап, 292 млрд. теңгеге жеткіздік», – деді Г.Наушақызы.
</blockquote>
Сондай-ақ, өңірде тұрғын үй салу көрсеткіші де артқан. Мәселен, өткен жылы тұрғын үй салу жоспары 591 мың шаршы метр болса, бұл көрсеткішті 609 мың шаршы метр өсіммен орындалған.
Бұдан бөлек, облыста өнеркәсіп өнімін өндіру 13,3%-ға, оның ішінде өңдеу өнеркәсібіндегі өндіріс 5,7%-ға, құрылыс 27,0%-ға, инвестициялар 26%-ға, тұрғын үйді пайдалануға беру 20%-ға төмендеген.

Қазақстан және Қызылорда облысының жаңалықтары: Басты жаңалықтар old