Kyzylorda-news.kz. Ел Тәуелсіздігінің 30 жылдық мерейтойы аясында ұйымдастырылған, Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы өз мәресіне жетті.
Салтанатты шарада облыс әкімінің орынбасары Серік Ахмет жыр додасының жеңімпаздарын құттықтап, жауһар өнерді дәріптейтін байқаудың Сыр елінде бастау алуы рухани сабақтастықты жалғап отырғанын жеткізді.
<blockquote>
 Бабаларымыздың таңдайында тат баспаған асыл сөздерін бүгінге жеткізіп, қастерлеп жүрген белгілі жырау Алмас Алматов пен оның дарабоз шәкірттерінің халық қазынасын дәріптеп келе жатқан еңбегі бүгін тағы бір биіктен көрінді. 
 Мәресіне жетіп отырған жыр додасы – осы сөзіміздің айғағы. Жыраулық дәстүр – қазақтың рухын көтеретін, рухани кемелдігін көрсететін бекзат өнер. Сол өнерді өр үнімен асқақататып, жан-дүниемізге ізгілік пен тазалық тарту еткен бүгінгі байқау қатысушыларына барша тыңдарман атынан алғыс білдіремін. Сонымен қатар, мәртебелі өнерді өз дәрежесінде әділ бағалап, өрен жүйріктерді анықтаған қазылар алқасы мүшелеріне де шын жүректен рахмет айтамын,-деді Серік Ахмет.
</blockquote>
Жыр додаға 13 жыр жүйрігі қатысып, бақтарын сынады. Белгілі жырау Алмас Алматов төрағалық еткен қазылар алқасының шешімімен бас жүлде Арал ауданынының тумасы, атақты жыршы-жырау Айбек Тәңірбергеновке табысталды. Бас жүлде иегерін облыс әкімінің орынбасары марапаттады.
Байқаудың жүлделі І орны қызылордалық Серік Жақсығұловқа берілсе, ІІ орынды ақтөбелік Демеубай Жолымбетов жеңіп алды. ІІІ орынды Павлодар қаласынан Бөкен Жігер, Қызылорда қаласынан Жақсан Жәнібек және Арал ауданынан Бексұлтан Орынбасар өзара бөлісті. Ал, қалған 7 қатысушыға ынталандыру сыйлығы бұйырды. 
Айта кету керек, бас жүлде иесіне 500 мың. теңге табысталды. Ал, І орынға 300 мың, ІІ орынға 200 мың және ІІІ орын иелеріне 100 мың теңгеден берілді.
<img src="https://kyzylorda-news.kz/wp-content/uploads/2021/09/fb_img_1632537492197.jpg" alt="" />
<hr />

Республикалық жыршы-жыраулар байқауында Айбек Тәңірбергенов бас жүлде алды

<a href="https://kyzylorda-news.kz/ru/obshestvo/">Kyzylorda-news.kz</a>. Мемлекет басшысы өз Жолдауында әлеуметтік-еңбек саласы бойынша бірқатар атқарылуы тиіс тапсырмаларды атап өтті. Басымдық берген бағыттардың бірі − ең төменгі жалақы мөлшерін 42 500 теңгеден 60 мың теңгеге дейін арттыру. Облыста жыл басынан бері тоғыз мыңнан аса адам ең төменгі жалақы мөлшері бойынша қоғамдық жұмыспен қамтылғанын ескерсек, бұл аймақ азаматтарына үлкен қолдау болмақ.
Өңірлік коммуникациялар қызметінде өткен брифингте облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева Жолдаудан туындайтын міндеттерді және алда атқарылар жұмыстарды баяндады.
<blockquote>
 “Ел Президенті биылғы Жолдауында көші-қон процестерінің еңбек нарығын күшейтуге әсерін атап өткен болатын. Осыған байланысты көші-қон саясатының жаңа тұжырымдамасын әзірлеу тапсырылды. “Еңбек” бағдарламасына қатысушыларға және олардың отбасы мүшелеріне 75 АЕК мөлшерінде материалдық көмек беріледі. Бұл көмектер қоныс аударған азаматтарға тұрғылықты жерге келгеннен кейін ғана беріледі. Жаңа бес жылдық кезеңге арналған жобада оңтүстіктен солтүстік өңірлерге ішкі ынтымақты арттыру үшін қолайлы жағдаймен қамтамасыз ету басты міндет болып саналады”, – деді Жанар Жұмабекқызы.
</blockquote>
Сонымен қатар “Еңбек” бағдарламасы аясындағы атқарылып жатқан жұмыстарды баяндады. Айтуынша көші-қон жұмыстары еңбек нарығына үлкен әсер етуде. Жалпы 2017 жылдан бері 730 отбасы солтүстік өңірлерге қоныс аударған. Ал биылғы жылы теріскейге 57 отбасы көшіп барды.
Келесі кезекте Жанар Дәулетбаева 2022 жылдың 1 қаңтарынан бастап “Еңбек” мемлекеттік бағдарламасы аясында азаматтарға 60 мың теңге көлемінде жалақы берілетіндігін атап өтіп, биылдан бастап іске қосылған жаңа жобаларға да тоқталды.
Бұл “Ұрпақтар сабақтастығы” және “Алғашқы жұмыс орны” деп аталатын жобалар. “Ұрпақтар сабақтастығы” бағдарламасы 18 айға ұйымдастырылса, екінші жоба ешқандай еңбек өтілімі жоқ жас мамандарға арналған. Ол екі жылға жоспарланған.
Жалпы халықты жұмыспен қамту бойынша статистикалық деректерге сүйенсек, осы жылы аймақтағы жұмыс күшінің саны – 344,1 мың адамды құрады. Жұмыспен қамту деңгейі – 61 пайыз. Сондай-ақ өңірде 22 475 жаңа жұмыс орындары ашылған. Оның 60 пайызы тұрақты жұмыс орындары. Жұмыспен қамтудың 2020-2021 жылдарға арналған жол картасы шеңберінде 1400 ге жуық жұмыс орнын ашуға мүмкіндік беретін 6 жоба мақұлданды. Жобаларды жүзеге асыру барысында 90 пайыз жұмысшы күші жергілікті жерден алынып, орташа есеппен 85 мың теңгеден жалақы төленді.

Жанар Дәулетбаева: «Еңбек» бағдарламасына қатысушыларға  материалдық көмек беріледі

*<a href="https://kyzylorda-news.kz/ru/obshestvo/">Kyzylorda-news.kz</a>. Ел Тәуелсіздігінің 30 жылдық мерейтойы аясында Н.Бекежанов атындағы облыстық музыкалық драма театрында Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы бастау алды.*
Ұлттық өнерді ұлықтап, мәдени мұраларды дәріптеуді көздейтін жыршы-жыраулар байқауының ашылу рәсіміне облыс әкімі Гүлшара Әбдіқалықова қатысып, жыр-керуеніне жиналған халықты Тәуелсіздігінің 30 жылдығымен құттықтап, додаға қатысушы жыршыларға сәттілік тіледі.
<blockquote>
 «Сыр елі – жыр елі» атанған қасиетті өлкеміз – тума таланттардың бесігі болған, дауылпаз Сыр сүлейлері шыққан өңір. Абыз Қорқыттан бастау алатын жыраулық дәстүрдің мектебін қалыптастырған Шораяқтың Омары, Балқы Базар, Қарасақал Ерімбет, Кете Жүсіп, Дүр Оңғар, Тұрмағамбет, Нартай, Нұртуғандай дүлдүлдер дүниеге келген жер. Бүгінгі республикалық дәстүрлі орындаушылардың байқауы Арқа мен Батыстың, Жетісу мен Сырдың дарындарын тоғыстырып, Сыр жерінде жырдың жалауын желбіреткен күн десек қателеспейміз. 
 Олай болса, байқауға қатысушы өнер саңлақтарына көмейлеріңізден күміс әуен төгілсін деген тілек білдіремін! Тәуелсіздігіміз тұғырлы, ғұмыры мәңгі болсын!, – деді Гүлшара Әбдіқалықова.
</blockquote>
Жыр додасында дәстүрлі өнердің әлемдік деңгейде насихатталуына және талантты өнерпаздардың кәсіби білім алуына елеулі үлес қосқан белгілі жырау Алмас Алматов төрелік жасап, жырау, Қазақстанның еңбек сіңірген қайраткері, өнертану ғылымдарының кандидаты, Қазақ Ұлттық Өнер университетінің профессоры Эльмира Жаңабергенова, Қазақстанның еңбек сіңірген қайраткері, филология ғылымдарының кандидаты, Құрманғазы атындағы Қазақ Ұлттық консерваториясының аға оқытушысы Ұлжан Байбосынова, қоғам қайраткері, өнер жанашыры Рзақұл Нұртаев, жыршы-жырау, «Мәдениет саласының үздігі» төсбелгісінің иегері Майра Сарсенбаева қазылық етуде.
Байқауға 13 жыр жүйрігі қатысып, егемен елдің өркенді істерін арқау етіп, даңқты өнер иесі Кете Жүсіп Ешниязұлының мол мұрасын бүгінге ұрпаққа аманаттау мақсатында ұлттық өнерді ұлықтады.
Жыр додасына Ақтөбе қаласынан Демеубай Жолымбетов, Маңғыстау облысынан Амангелді Сәңкібаев, Павлодар облысы Бөкен Жігер, Алматы қаласынан Бақыт Тоғжанова, Қызылорда қаласынан Әділхан Қуаңбаев, Болат Баймұратов, Серік Жақсығұлов, Жақсан Жәнібек, Малика Алдамжарова қатысуда. Сондай-ақ, Арал ауданынан Айбек Тәңірбергенов пен Бексұлтан Орынбасар, Шиелі ауданынан Мұхамедәлі Бекпейісов және Қармақшы ауданынан Әлішер Мырзағалиев көрерменге ұлық өнерді тағы бір дәріптеді.
Байқау барысында Жүсіп Ешниязұлының бұрын соңды көп орындалмай жүрген айтыстары, термелері және «Шәһзада», «Сұрмерген», «Мекер қатын» дастандарымен қатар Ел Тәуелсіздігінің 30 жылдығына арналған арнау жырлар орындалуда.
Айта кетейік, жыр байқауы кешке дейін жалғасып, жүйрік жеңімпаздар марапатталады.
<img src="https://kyzylorda-news.kz/wp-content/uploads/2021/09/242664978_3738264646276577_5262404616285524503_n.jpg" alt="" />
<img src="https://kyzylorda-news.kz/wp-content/uploads/2021/09/242692985_3738265426276499_3246591966889410785_n.jpg" alt="" />

Сыр елінде «Жырлансын, Тәуелсіздік жыр бұлағы» атты республикалық жыршы-жыраулар байқауы басталды

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; ҚР Тәуелсіздігінің 30 жылдығына орай Сыр сүлейі Кете Жүсіп Ешниязұлының 150 жылдығына арналған «Жырлансын, Тәуелсіздік жыр бұлағы» атты республикалық жыршы-жыраулар байқауы өтеді. Ұлттық мұра – жыраулық өнерді насихаттауға арналған шара 24 қыркүйек күні болады. Бұл туралы Өңірлік коммуникациялар қызметінде өткен баспасөз конференциясында облыстық мәдениет, архивтер және құжаттама басқармасының басшысы Асқарбек Есжанов мәлімдеді.
<blockquote>
 «Даңқты өнер иесінің мол мұрасын бүгінге ұрпаққа аманаттау мақсатында өткелі отырған байқауға Ақтөбе қаласынан белгілі жыр жампозы Демеубай Жолымбетов және Маңғыстау жерінен қазыналы қарт жырау Амангелді Сәңкібаев, Кереку топырағынан Бөкен Жігер, Алматы қаласынан Бақыт Тоғжановалар келді. Сондай-ақ Сыр елінің дәстүрлі өнерін республикалық деңгейде паш етіп жүрген жыр жүйріктері Айбек Тәңірбергенов, Серік Жақсығұлов, Күнсұлу Түрікпен, Марат Сүгірбай, Болат Баймұратов, Әділхан Қуаңбаевтар мен қатар жас жыршыларымыз барлығы 15 талапкер байқауда бақ сынамақ. Байқау барысында Жүсіп Ешниязұлының бұрын соңды көп орындалмай жүрген айтыстары, термелері және «Шәһзада», «Сұрмерген», «Мекер қатын» дастандарымен қатар Ел Тәуелсіздігінің 30 жылдығына арналған арнау жырлар орындалады», – деді Асқарбек Темірбекұлы.
</blockquote>
Жыр додасында өңіріміздегі дәстүрлі өнердің әлемдік деңгейде насихатталуына және талантты өнерпаздардың кәсіби білім алуына аянбай еңбек етіп жүрген жырау Алмас Алматов төрағалық жасайды. Сонымен бірге байқауда жырау, Қазақстанның еңбек сіңірген қайраткері, өнертану ғылымдарының кандидаты, Қазақ Ұлттық Өнер университетінің профессоры Эльмира Жаңабергенова, Қазақстанның еңбек сіңірген қайраткері, филология ғылымдарының кандидаты, Құрманғазы атындағы Қазақ Ұлттық консерваториясының аға оқытушысы Ұлжан Байбосынова, қоғам қайраткері, өнер жанашыры Рзақұл Нұртаев, жыршы-жырау Майра Сарсенбаева қазылық етеді. Байқау 2 кезең бойынша өткізіледі. Бір ерекшелігі – уақытқа шектеу қойылмайды. Сахнаға шыққан жыраулар сағаттап жыр айтуға мүмкіндігі бар.
Брифингте Қазақстанның еңбек сіңірген қайраткері, жырау Алмас Алматов та республикалық байқау туралы пікірін білдірді.
<blockquote>
 «Өнер – мұрагер ұрпақтары арқылы дәстүрлі сипатқа айналады. Ал, мұрагері жоқ өнер жойылады, өледі не жоғалады. Иә, әрбір ұлт өзінің тілі, діні, ділімен безбенделетін болса, қазақ өнерінің түпқазығы осы жыр өнері. Ол адамның ақыл, ес, жад, зерде көзіменен төрттағандалып, мың жылдықтардың мұрасын миллиондаған жол жыр күйінде осы бір сана арқылы бізге жеткізді. Мұның құндылығы да сол. Ал бүгінде ұрпақты сол баба мәдениетіне, аталардың мұрасына қарай бейімдеп, тәрбиелеу ұйымдастырылайын деп отырған шараның басты мақсаты», – деді Алмас Алматов.
</blockquote>
Одан әрі облыстық халық шығармашылығын дамыту және мәдени-продюсерлік орталығының директоры Жанат Құрамысова байқаудың басты мақсаты – өңірдің брэнді болып саналатын жыраулық, шайырлық, ақындық өнерді дамыту, ұлы тұлғалардың өнерін ұлықтау екенін айтып, шараның маңыздылығына тағы бір мәрте тоқталды.
Айта кету керек, Жүсіп Ешниязұлы қазіргі Қызылорда облысы, Қармақшы ауданы, Тұрмағамбет ауылында 1871 жылы дүниеге келіп, 1927 жылы дүниеден өткен. Жастайынан әкесі Ешнияздан тәлім алған ол халық арасында кеңінен танымал болумен қатар, ел билігіне араласып болыс болған. 1898 жылдардан бастап ақын шығармалары ауыз әдебиеті нұсқаларын зерттеушілердің назарына ілініп, жинақтала бастайды.

Қызылордада республикалық жыршы-жыраулар байқауы өтеді

<a href="https://kyzylorda-news.kz/ru/obshestvo/">Kyzylorda-news.kz</a>.&nbsp; Биылғы жылдың сегіз айында облыстық еңбек саласын бақылау басқармасы әр түрлі меншектегі 104 мекеме мен кәсіпорындарға тексеріс жұмыстарын жүргізген. Нәтижесінде 8 кәсіпорынның 1911 жұмыскеріне 209,6 млн.теңге жалақы қарызы төленген. Сондай-ақ жұмыскерлердің еңбек құқықтарын қорғау және жалақы бойынша берешекті өндіріп алу мақсатында жауапты органдармен бірлесіп, апта сайын салыстырмалы акті жасалған.
Бұл туралы Өңірлік коммуникациялар қызметінде өткен баспасөз конференциясында облыстық еңбек саласын бақылау басқармасының басшысы Төреахмет Жолымбетов мәлімдеді.
<blockquote>
 «Облыс бойынша қазіргі таңда үш айдан астам жалақыдан қарызы бар мекемелер тіркелмеген. Жыл басынан бері басқармалармен жеке және заңды тұлғалардың 539 өтініштері қаралып, белгіленген тәртіппен тиісті жауаптар алынды. Кәсіпорындар мен мекемелерде жалақы төлемін кешіктіру фактілері анықталған жағдайда, дереу әрекет ету шаралары қолданылады. Бұл кәсіпорындардағы мәселелер мемлекеттік кірістер департаментінің бақылауында. Жоспардан тыс тексерулер мен жазатайым оқиғаларды арнайы тергеп – тексеру барысында 20 кәсіпорында 1230 – ге жуық жұмыскерлермен ақпарттық-түсіндірме жұмыстары жүзеге асырылды. Аймақта басқа мемлекеттің жұмыс күші тартылған 3 кәсіпорында 9 заң бұзушылық анықталып, оларды жою бойынша 2 нұсқама берілген. Сондай-ақ, облыстағы басқармамен өндірістік жарақаттану жағдайлары мен еңбек қауіпсіздігінің жай-күйіне тоқсан сайын талдау жүргізілуде. Есепті кезеңде 7 кәсіпорында 1007 жұмыс орындары еңбек жағдайлары бойынша аттестаттаудан өткізілген», -деді Төрахмет Сайлаубайұлы.
</blockquote>
Басқармамен жұмыс берушілерге «Цифрлық Қазақстан» кешенді бағдарламасы аясында қабылданған «Еңбек шарттары есебінің бірыңғай жүйесі» атты автоматтандырылған ақпараттық жүйесіне жұмыскерлердің еңбек шарттарының электронды түрде тіркеу жұмыстарын жүргізу қажеттігі кеңінен насихатталуда. Нәтижесінде, биылғы жылы аталған жүйеге облыстағы 2066 субъектілердің 23 746 жұмыскерлерінің еңбек шарттары тіркелген

Қызылордалық жұмысшылар жалақысын уақытылы алып жүр ме?

*<a href="https://kyzylorda-news.kz/ru/obshestvo/">Kyzylorda-news.kz</a>. Бүгін облыс әкімі Гүлшара Әбдіқалықованың төрағалығымен мемлекеттік сатып алу мәселелеріне қатысты кездесу өтті. Жиында облыстық мемлекеттік сатып алу басқармасының басшысы Ғалым Едігеев атқарылған жұмыстарды баяндады.*
Жыл басынан бері тапсырыс берушілермен 2944 конкурстың 2808-і немесе 95% жарияланды. Нәтижесімен, 1363 сатып алуы бойынша 5 млрд. теңге үнемделген.
Қалған 1445 конкурстың және жыл соңына дейін өткізу жоспарланған 136 сатып алудың өткізілуі бақылауда. 
Жарияланған сатып алулардың 945 – басқармамен ұйымдастырылып, былтырмен салыстырғанда 40%-ға көбейіп отыр.
Ал, қала және ауданның бірыңғай ұйымдастырушыларымен 1573 мемлекеттік сатып алу конкурстары жарияланып, бұл көрсеткіш 36%-ға артқан. 
Тапсырыс берушілермен 290 дербес конкурс ұйымдастырылып, былтырға қарағанда 50 бірлікке азайған. 
Яғни, барлық өткізілген сатып алулардың 90% бірыңғай ұйымдастырушыларымен жүргізілуі оларға деген сенімнің былтырмен салыстырғанда, артқанын көрсетіп отыр.
Облыс әкімі Гүлшара Әбдіқалықова мемлекеттік сатып алу конкурстарының заң аясында өтуін қатаң бақылауда ұстап, бөлінген қаржының уақытылы игерілуін тапсырды.
<img src="https://kyzylorda-news.kz/wp-content/uploads/2021/09/242594880_3734923909943984_5155269984781627303_n.jpg" alt="" />

Қызылорда: Мемлекеттік сатып алу саласында 5 млрд. теңге үнемделді

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін облыс әкімі Гүлшара Әбдіқалықова Қызылорда қаласындағы бірқатар нысандарды аралап, сол жағалауда жүріп жатқан құрылыс барысын бағамдап, абаттандыру жұмыстарын көрді. 
Апаттық тұрғын үйлерде тұрып жатқан азаматтарға арналған 50 пәтерлік 1 көпқабатты тұрғын үйдің салыну барысын бақылаған облыс әкімі мердігер компания басшысына құрылыс жұмыстарын уақытылы әрі сапалы түрде аяқтауды тапсырды.
Мұнан кейін аймақ басшысы №4 кварталды жалғайтын магистральды жылу желілерінің және сол жағалауды аяқ сумен қамтамасыз ететін су бұрғылау ұңғымасының жобасымен танысты.
Сырдария өзенінің сол жағалауын аяқ сумен қамтамасыз ететін су бұрғылау ұңғымаларының құрылысы жүргізудегі мақсат – инженерлік іздестіру жұмыстары. Қазіргі таңда мемлекеттік сатып алу конкурсы аяқталып, жеңімпаз мердігер мекеме анықталуда.
Сонымен қатар, өңір басшысы №4 тұрғын кварталындағы абаттандыру жұмыстарын көрді. Жобаны жүзеге асыруға жауапты мердігерге абаттандыру ісін желтоқсан айында аяқтайды. 
Нысандардағы жұмысты саралаған облыс әкімі алдағы жылу маусымына дайындық барысын пысықтап, аяқ су мәселесі бойынша жұмыстарды жеделдетуді жүктеді. Сондай-ақ, абаттандыруды сапалы жүргізу қажет екенін баса айтты.
<img src="https://kyzylorda-news.kz/wp-content/uploads/2021/09/242486518_3732281313541577_7386170217250613831_n.jpg" alt="" />
<img src="https://kyzylorda-news.kz/wp-content/uploads/2021/09/242490537_3732281133541595_46847899378504755_n.jpg" alt="" />

Облыс әкімі сол жағалаудағы құрылыс барысын аралап көрді

<a href="https://kyzylorda-news.kz/ru/obshestvo/">Kyzylorda-news.kz</a>. Ауа райына байланысты көпқабатты үйлерге жылу жылдағыдан ерте берілуі мүмкін. Дайындық жұмыстары бекітілген іс-шаралар жоспарына сәйкес атқарылуда. Бұл туралы бүгін Өңірлік коммуникациялар қызметінде өткен баспасөз конференциясында облыстық энергетика және тұрғын үй-коммуналдық шаруашылық басқармасы басшысының орынбасары Ерлан Жаңабаев мәлімдеді.
Бүгінде аймақтағы 1064 әлеуметтік нысанға және 708 бу қазандығына жөндеу жұмыстары жасалды. Сонымен қатар, «Қызылордажылуэлектрорталығы» кәсіпорны бойынша 17 дана автономды-блокты модульдік қазандықтарға да ағымдағы жөндеу жүргізілді. Бұдан бөлек 4,3 шақырым кварталішілік жылу желілері жаңартылды. Кәсіпорын резервуарларында 4,6 мың тонна мазуттың авариялық қоры бар.
<blockquote>
 «Сондай-ақ, ауа райы күрт өзгерсе, 9 градустан төмендесе, көпқабатты үйлерге жылу беріле бастайды. Біз оған дайынбыз. Мәселен, былтыр ауа райының салқындауына байланысты 10 қазан күні жылу берілген болатын», – дейді Е.Жаңабаев.
</blockquote>
Айта кету керек, жалпы тұрғын үй-коммуналдық шаруашылық және әлеуметтік сала нысандарының 2021-2022 жылдардағы жылыту маусымына дайындық жұмыстары кестеге сәйкес жүргізілуде және облыстық штабтың тұрақты бақылауында.

Қызылордада жылу ерте берілуі мүмкін

<a href="https://kyzylorda-news.kz/ru/obshestvo/">Kyzylorda-news.kz</a>. 15 қыркүйектен бастап медициналық-санитариялық көмек ұйымындарына еркін таңдау науқаны басталды. Бұл науқан екі айға жалғаспақ. Бүгінгі таңда облыс бойынша қордың денсаулық сақтау субъектілерінің деректер базасында 21 емхана тіркелген. Оның 62 пайызы мемлекеттік болса, 38 пайызы жеке меншік. Тұрғындар үшін тіркеу науқаны мен емхананы еркін таңдау мүмкіндігі консультациялық-диагностикалық қызметтерге, ауруханаларда емделуге және кез келген жоспарлы медициналық қызметтерді пайдалануға құқық береді. Бұл жөнінде “Әлеуметтік медициналық сақтандыру қоры” КЕАҚ Қызылорда облысы бойынша филиалының директоры Бақыт Исмаханбетов мәлімдеді.
<blockquote>
 “Бұл науқанның басты мақсаты − халыққа қызмет көрсететін медициналық ұйымның тиімді әрі сапалы болуын қамтамасыз ету. Егер медициналық ұйымның қызметі қанағаттандырмаған жағдайда тұрғындарға таңдау құқығы беріледі. Өткен жылғы емханаларда тіркеу науқанының қорытындысы бойынша, өңірдің екі мыңнан аса тұрғыны БМСК ұйымын еркін таңдау қызметін пайдаланды. Олардың көпшілігі өтініш беру арқылы тіркелсе, қалған азаматтар egov.kz порталы арқылы онлайн қызметті таңдаған. Сондай-ақ, азаматтар емхананы еркін таңдау құқығын пайдаланбаған болса, қазіргі таңда тіркеліп тұрған БМСК ұйымында қала береді”, – деді Бақыт Торғайбайұлы.
</blockquote>
Бастапқы медициналық-санитариялық көмек ұйымына үш тәсіл арқылы тіркелуге болады. Олар: тікелей таңдалған медициналық ұйымға жүгіну арқылы және электронды үкімет порталы көмегімен онлайн түрде тіркелу. Сондай-ақ, халыққа қызмет көрсету орталықтарында өтініш беруге мүмкіндік қарастырылған. Тіркеу науқаны − емхананы ауыстырудың жалғыз мүмкіндігі болып табылмайды. Бұл рәсімді жылына бір рет еркін таңдау құқығымен жасауға болады.
<blockquote>
 “Егер азамат тұрғылықты жерін және жұмыс пен оқу орнын ауыстырған жағдайда да емхананы қайта таңдауға құқылы екенің айтқым келеді. Азаматтардың кейбір жекелеген санаттары тікелей емханаға бекітіле алады. Ол үшін еркін нысандағы өтініш пен жеке басты куәландыратын құжатты қоса беру қажет. Аталмыш санаттарға зейнеткерлер, мүмкіндігі шектеулі жандар, заң бойынша тағайындалған қорғаншылар немесе қамқоршылар, сондай-ақ патронат тәрбиешілер мен басқа да азаматтар жатады. Жыл сайынғы бекіту науқанын өткізуге жауапкершілік аумақтық денсаулық сақтау басқармаларына жүктелгендігін атап өткен жөн», – деді Бақыт Исмаханбетов.
</blockquote>

Бақыт Исмаханбетов: Емхананың қызметі қанағаттандырмаса таңдау  құқығы беріледі

<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімі Гүлшара Әбдіқалықова қаладағы бірқатар нысандарды аралау барысында Белкөл кентіне де барды. Аймақ басшысына елді-мекеннің әлеуметтік-экономикалық дамуы таныстырылды.
Кентте биыл мемлекеттік бағдарламалар арқылы 9 жоба қаржыландырылған. Елді-мекенде жыл басынан бері 24 кәсіпкерлік субъектісі тіркеліп, олардың жалпы саны 235-ке жетті.
Кент тұрғындарының басым бөлігі қалаға қатынап жұмыс істейді. Осы ретте облыс әкімі елді-мекеннің жол-инфрақұрылымдық дамуына айрықша назар аударуды тапсырды.
Аймақ басшысы жаңадан салынған қатты тұрмыстық қалдықтарды сұрыптау кешеніндегі жағдайын көрді. Полигон «Белкөл» кентінен 7,5 шақырым қашықтықта, экологиялық-санитарлық талаптарға сәйкес қалдықтардың өңдеу үлесін арттыру бағытында салынған. Өткен жылы пайдалануға берілген нысан күніне 16-17 тонна, жылына 60 мың тонна қатты тұрмыстық қалдықтарды сұрыптап, өңдеуге қауқарлы. Қазір кешенде 40-ға жуық адам жұмыспен қамтылған.
Ауданы 20 гектар қоқыстарды сұрыптау кешенімен және жарамсыз қоқыстарды көму алаңдарымен қамтамасыз етілген полигонға орташа есеппен күніне 110 тонна көлемінде қаладан жиналған тұрмыстық қалдықтар қабылданады. Осы қалдықтарға сұрыптау және көму жұмыстары жүргізіледі. 2020 жылы Қызылорда қаласы бойынша жиналған 27 мың тонна қатты тұрмыстық қалдықтардың 21,8 пайызына сұрыптау және өңдеу жұмыстары жүргізіліп, 115 тонна сұрыпталған шикізат өнімдері (пластмасса, стекло, қағаз) қайталама пайдалану үшін мүдделі кәсіпкерлерге жөнелтілген.
Облыс әкімі бұл жоба тек коммуналдық сала үшін ғана емес, экономикалық және экологиялық маңызды жоба екенін алға тартып, облыс орталығының тазалығын сақтау үшін тиісті жұмыстарды жүйелі жүргізуді тапсырды.
<img src="https://kyzylorda-news.kz/wp-content/uploads/2021/09/242456411_3732296546873387_7523932468422179367_n.jpg" alt="" />
<img src="https://kyzylorda-news.kz/wp-content/uploads/2021/09/242464580_3732296656873376_2516325031874250923_n.jpg" alt="" />
<img src="https://kyzylorda-news.kz/wp-content/uploads/2021/09/242474630_3732296450206730_1623573341250998304_n.jpg" alt="" />

Облыс әкімі Белкөл кентіндегі тұрмыстық қатты қалдықтарды сұрыптау кешенінің жағдайымен танысты

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда өткен тәулікте 2693 адамда коронавирус індеті ПТР арқылы расталып ауырғаны белгілі болды. Бұл туралы &nbsp;<a href="https://www.coronavirus2020.kz/ru">www.coronavirus2020.kz</a>&nbsp;хабарлайды.
Аймақтар бойынша:
Нұр-Сұлтан қаласы – 191,
Алматы қаласы – 549,
Шымкент қаласы – 125,
Ақмола облысы – 143,
Ақтөбе облысы – 133,
Алматы облысы – 256,
Атырау облысы – 69,
Шығыс Қазақстан облысы – 135,
Жамбыл облысы – 55,
Батыс Қазақстан облысы – 99,
Қарағанды облысы – 431,
Қостанай облысы – 105,
Қызылорда облысы – 56,
Маңғыстау облысы – 38,
Павлодар облысы – 192,
Солтүстік Қазақстан облысы – 79,
Түркістан облысы – 37.
Жалпы ел бойынша ауырғандар саны 870059.

Қызылордада 56 адамнан вирус табылды

Kyzylorda-news.kz. Бүгін облыс әкімі Гүлшара Әбдіқалықова өңір жастарымен кездесіп, пікірлесе отырып ұсыныстарын тыңдады. Алдымен, Гүлшара Әбдіқалықова Ә.Тәжібаев атындағы әмбебап-ғылыми кітапханасының коворкинг орталығында «Кітап құрттары» клубының мүшелерімен кездесті.
2019 жылдың ақпан айында кітапқұмар жастардың бастамасымен ашылған клубта 100-ге жуық мүше бар. Оқуға ынталы жастар әр сенбі сайын түрлі жанрдағы кітаптар мен фильмдерді талқылап, кері байланысқа шығады.
Басқосу барысында клуб жетекшісі Талғат Меңдібаев клубтың Қазалы ауданында бөлімшесі ашылғанын және алдағы уақытта басқа аудандарда ашу жоспарда бар екенін жеткізді. Сонымен бірге ізденімпаз студенттерге арнап Қорқыт ата университетінде қосымша курс та жұмысын бастағанын тілге тиек етті.
Кездесуде жастар аймақ басшысымен кітап оқу мәдениеті туралы еркін ой қозғады. Гүлшара Әбдіқалықова интеллектуалды ұлт қалыптастыруда кітап оқудың маңыздылығын қаперге салып, жастарды “Жаңа гуманитарлық білім. Қазақ тіліндегі 100 жаңа оқулық” жобасы аясында қазақ тілінде жарыққа шыққан кітаптарды оқуға шақырды.
Жастармен тілдескен облыс әкіміне клуб оқырмандары атынан “Қыз Жібек” дастанын табыстады. Сонымен бірге қала ішінде жастарды оқуға жетелейтін бірнеше идеяларын ұсыныс ретінде қалдырды.
Кездесу соңында аймақ басшысы жастар тарапынан айтылған ұсыныс-пікірлерді ескеріп, алдағы уақытта жастар кеңесінде талқылатынын тілге тиек етті.
Биыл мектептер мен университеттерде оқу жылы дәстүрлі форматта басталды. Қашықтан білім алып келген жастар оқу орындарына барып, санитариялық талаптарды сақтай отырып, білім алуда. Бұл ретте облыс әкімі Қорқыт ата атындағы Қызылорда университетінің №5 жатақханасына барды. Нысанның жағдайын бақылап, студенттердің тұрмысымен танысты.
Жастар өңір басшысына көкейде жүрген сауалдарын қойып, жатақханадағы қызықты сәттерін айтып, түрлі бастамалардан туындаған идеяларын ортаға салды.
Жатақхана ғимараты 400 студентке арналған. Мұнда бос уақыттарын тиімді өткізуі үшін шығармашылық жұмыстармен айналысып, кітап оқып, демалыс бөлмелерінде тыныға алады. Жастар ұйымдары жатақханалардағы тәрбиелік іс-шараларды жоғары деңгейде өткізуге ықпал етеді. 
Сонымен қатар №5 студенттік жатақхана ауласында спорттық ойындарға арналған алаң жабдықталған. Өткен жылы футбол алаңы күрделі жөндеуден өтті.
Облыс әкімі сөз соңында жатақханада санитарлық нормаларды қатаң сақтап, ауланы көркейту және көгалдандыру жұмыстарын тұрақты жүргізіп отыру қажеттігін еске салды. 
Университетте білім алатын жастар бос уақытын спорттық кешендерде өткізеді. Өңір басшысы университет базасындағы «Сейхун» спорттық-сауықтыру кешенін аралап көрді. Нысанның материалдық-техникалық базасымен танысты. 2010 жылы пайдалануға берілген спорт кешенінде минифутбол, волейбол, гандболдан жарыстар мен барлық деңгейдегі түрлі спартакиадалар өткізіліп тұрады. Ал, жүзу бассейніне келушілерді білікті нұсқаушылар, медицина қызметкерлері бақылап отырады.
Спорт-сауықтыру кешенінде студенттерге шағын футбол, волейбол, жүзу, үстел теннисі сияқты спорт секциялары түрінде дене шынықтыру сабақтары ұйымдастырылады. Сонымен қатар, кешен қала тұрғындарына сабақтан тыс уақытта ақылы қызмет көрсетеді. Жақында нысанның шатыры күрделі жөндеуден өткен.
Аймақ басшысы бұқаралық спортпен тұрақты түрде айналысу жастардан бастау алу қажеттігін атап өтті. Бұл ретте өңірде университет базасынан бөлек, түрлі секцияларға тегін қатысу мүмкіндігі қарастырылғанын еске салды.
<img src="https://kyzylorda-news.kz/wp-content/uploads/2021/09/fb_img_1632323950345.jpg" alt="" />
<img src="https://kyzylorda-news.kz/wp-content/uploads/2021/09/fb_img_1632323945214.jpg" alt="" />
<img src="https://kyzylorda-news.kz/wp-content/uploads/2021/09/fb_img_1632323939863.jpg" alt="" />

Қазақстан және Қызылорда облысының жаңалықтары: Басты жаңалықтар old