Kyzylorda-news.kz. Қызылорда облысының әкімі Гүлшара Әбдіқалықова сырбойылықтарды ел Тәуелсіздігінің 30 жылдығымен құттықтады.
ҚЫМБАТТЫ ЖЕРЛЕСТЕР! Сіздерді еліміздің ең басты ұлық мерекесі – қастерлі де қасиетті ТӘУЕЛСІЗДІГІМІЗДІҢ 30 ЖЫЛДЫҚ МЕРЕЙТОЙЫМЕН шын жүректен құттықтаймын!
Бұл – әлем картасында ойып өз орнын алған Қазақстанның орда бұзар жасы!
Бабалар ұланғайыр жерімізді ақ найзаның ұшымен, ақ білектің күшімен қорғап, сан ғасыр егемен ел болуды арман етсе, сол арманына 1991 жылы ұрпағының қолы жетті.
Тәуелсіздік – бұл ең асыл, киелі құндылық қана емес, келер ұрпақ алдындағы үлкен жауапкершілік! Әлемдегі қандай халық үшін де азат ел болудан асқан ұлы мақсат жоқ. Егемен ел бола алмай жүрген мемлекеттер қаншама. Соларды еске алсақ, Тәуелсіз ел екенімізге шүкіршілік дейміз!
Тәуелсіз Қазақстанның бүгінге дейін жеткен жетістігі мен алған биігінде әрбір сырбойылық азаматтың лайықты үлесі бар. Қандай да бір ісіміз жемісті, нәтижелі болса, ол сіз бен біздің үйлесімді тірлігіміз бен берекелі бірлігіміздің арқасында деп білемін.
Сіздерді ең маңызды ұлттық мерекемізбен құттықтай отырып, әр отбасына амандық, ырыс-құт тілеймін!
Сүйікті Отанымыз – Тәуелсіз Қазақстанымызды одан әрі нығайту жолында аянбай еңбек ете берейік! Еліміз еңселі, Тәуелсіздігіміз тұғырлы, ғұмыры мәңгілік болсын! ТӘУЕЛСІЗДІК КҮНІ ҚҰТТЫ БОЛСЫН!

Гүлшара Әбдіқалықова: Тәуелсіз Қазақстанның бүгінге дейін жеткен жетістігінде әрбір сырбойылық азаматтың лайықты үлесі бар

<a href="https://kyzylorda-news.kz/">Kyzylorda-news.kz.</a> Қызылорда облысы аумағында автомобиль жолдарының жалпы ұзындығы – 3398 шақырымды құрайды. Оның 1016 шақырымы – республикалық, 557 шақырымы – облыстық, 1825 шақырымы – аудандық маңызы бар автомобиль жолдары болып табылады. Әсіресе, қыс мезгілінде табиғат тосын мінез танытқан тұста жолда көліктің жүруі қиындайды. Жауапты мамандар бұл бағыттағы дайындық жұмыстарының барысын Өңірлік коммуникациялар қызметінде өткен брифингте айтып берді.
<blockquote>
 «Автожолдарды тазалауға арналған 157 бірлік әр түрлі техника қарастырылған. Қыс мезгілінде республикалық және облыстық маңызы бар жолдардағы қатынасты үзбеу үшін арнайы қор әзірленген. Онда қазір 9,9 тонна бензин, 22,5 тонна дизель отыны бар. Сондай-ақ инертті материалдан 5843 тонна құм, 2310 тонна тұз, 195 тонна көмір қоры бар. Облыс бойынша жалпы 506 дана ескерту жол белгілері орнатылған. Мұнан бөлек, облысаралық автожолдарда 13 жылыту пункттері жұмыс жасайды. Тұрақты жол қауіпсіздігін қамтамасыз ету бағытында қажетті техникалар мен инертті материалдар дайындыққа келтіріліп, облыс әкімдігі тарапынан тиісті жұмыстар өз деңгейінде атқарылуда», – деді облыстық жолаушылар көлігі және автомобиль жолдары басқармасы басшысының орынбасары Дамир Тілеуов.
</blockquote>

Қызылордада жолдағы қауіпсіздікті сақтауға техникалар әзір

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай бүгін бірқатар білім саласының қызметкерлері марапатталды. Асқар Тоқмағамбетов атындағы мәдениет үйінде өткен салтанатты жиынға облыс әкімі аппаратының басшысы Ерлан Райғаниев, облыстық білім басқармасының басшысы Ақзира Қасымова және аймағымыздағы үздік педагогтар мен білім беру саласының қызметкерлері қатысты.
Мерекелік жиынға қатысқан Ерлан Телманұлы аймақ ұстаздарын мерейлі мерекемен құттықтап, Сыр өңірінің жан-жақты дамуында Сыр ұстаздарының да үлесі мол екендігін тілге тиек етті.
Салтанатты шарада өз ісімен дараланған 40-тан астам білім саласының қызметкерлеріне ҚР Білім және ғылым министрінің құрмет грамотасы мен мерекелік төсбелгі табыстап, облыс әкімінің алғыс хаттарымен марапаттады.
Ұстаздар құрметіне арналған салтанатты шарада құрметті қонақтар ұйымға жаңадан қабылданған “жасұландықтарға” галстук тағып, шара соңы концерттік бағдарламаға ұласты.
<img src="https://kyzylorda-news.kz/wp-content/uploads/2021/12/266366667_1257194278117108_4844942956685354639_n-1.jpg" alt="" />
<img src="https://kyzylorda-news.kz/wp-content/uploads/2021/12/266268702_1257194321450437_2514151105380662875_n.jpg" alt="" />
<img src="https://kyzylorda-news.kz/wp-content/uploads/2021/12/266075272_1257194398117096_3446503055490119344_n.jpg" alt="" />
<img src="https://kyzylorda-news.kz/wp-content/uploads/2021/12/266375240_1257194354783767_7021149075852888454_n.jpg" alt="" />

Тәуелсіздік күні қарсаңында қызылордалық ұстаздар марапатталды

<a href="https://kyzylorda-news.kz/">Kyzylorda-news.kz.</a>&nbsp;Сырбойлық ұстаздар білім берумен қатар өздерін дамытуға да баса назар аударады. Тәуелсіздіктің 30 жылдық мерекесіне орай ұйымдастырылған қос бірдей конкурстан жалағаштық 2 ұстаздың мерейі үстем болды. Өңірлік коммуникациялар қызметінде өткен баспасөз конференциясына қатысып, жетістіктерімен бөлісті.
<blockquote>
 «Биыл Егемендігімізді алып, өзге елдермен иық тірескенімізге – 30 жыл толды. Қазіргі таңда білім саласы үлкен жетістіктерге жетіп, арамызда жас ғалымдар көбейді. Өздеріңіз білетіндей, бүгінде жас ұрпақтың білім алуына үлкен мүмкіндіктер жасалған. Облысымызда он жыл ішінде халықаралық және республиалық олимпиадалар мен ғылыми жобаларда 500-ге жуық оқушы оқ бойы оза шауып, аймақ абыройын асқақтатып, жүлделі орындардан көрінді. Еркін қалықтаған Тәуелсіздік перзенттері бүгінде әлемнің ең ақылды жастары деп айтуымызға болады. Төл тарихымызбен ұлттық құндылықтарымызды дәріптеуге негізделген білім беру жүйесі жеткіншектеріміз бен ұстаздарымыздың биік белесті бағындыруына ықпал жасап келеді», – деді облыстық білім басқармасының басшысы Ақзира Қасымова.
</blockquote>
Жалағаш ауданы Темірбек Жүргенов атындағы №123 мектеп-лицейінің ағылшын тілі пәні мұғалімі Айсана Намурадин «Медиа» – жаңа медиа-жобаларды іске асыру бағыты бойынша 3 млн. теңге көлеміндегі гранттың жеңімпазы атанды. Ал №33 мектебінің мұғалімі Сымбат Жәнібай «Үздік өзін-өзі тану мұғалімі» республикалық байқауында топ жарды.
<blockquote>
 «Тәуелсіздік жылдарында мемлекетіміз жастарды қолдауға басымдық беріп, осы бағытта көптеген шараны жүзеге асырды. Соңғы уақытта ел жастарына көңіл бөлу, оларды барынша жан-жақты қолдау ісі ерекше қарқын алды. «Тәуелсіздік ұрпақтары» гранты мен секілді жас буынды қолдау ісін ілгерілетіп қана қоймай, алдағы уақытта игі қадамдарға кеңінен жол ашатынына сенімім мол», – деді Айсана Намурадин.
</blockquote>
Байқаудың мақсаты – өзін өзі тану идеяларын жүзеге асыру бойынша озық педагогикалық тәжірибені анықтау болды. Байқау 3 кезеңнен және 9 турдан тұрды. Нәтижесінде, «Үздік өзін өзі тану мұғалімі» құрметті атағын иелендім. Бұл жетістік тек өзімнің емес мектебімнің, ауданның, облыстың жетістігі деп білемін, – деді Сымбат Жәнібай.
Басқарма басшысы осындай талантты ұстаздарды қолдау бағытындағы жұмыстар жалғаса беретіндігін жеткізді.

Ақзира Қасымова: Талантты ұстаздарды қолдау бағытындағы жұмыстар жалғасады

<a href="https://kyzylorda-news.kz/">Kyzylorda-news.kz.</a>&nbsp;Құмды және сортаң жерлерде өсетін сексеуіл – шөлге төзімді, адам мен қоршаған ортаға пайдасы қашан да ұшан-теңіз болған. Қазір де солай. Діңі мен бұтақтары қатты, тамыры тереңнен су соратын ол шаңды дауылға төтеп бере алады, жерді сор мен құм құрсауынан сақтайды.
Деректерге сүйенсек, жер көлемі 272 миллион гектарды (2 724 902 км²) алып жатқан Қазақстан территориясының тең жарымынан көбі шөлейтті және құмды. «Балығы тайдай тулаған» Арал теңізінің тартылуынан еліміздегі сортаң жерлер одан сайын ұлғайды. Әлемде төртінші үлкен теңіз болған Аралдың бұл күнде 4 миллион 600 мың гектар жері құрғап қалды. Оның 2,2 миллион гектардан астамы Қазақстан, ал 2,3 миллионы Өзбекстан аумағында жатыр. Сөйтіп, ірі Аралқұм шөлі қалыптасты. Мамандардың есебінше, жыл сайын осы жерлерден ауаға 100 миллион тоннадан астам улы тұз, шаң мен құм көтеріліп, дүниенің әр қиырына тарауда. Осылайша, Аралдағы экологиялық апат өңірлік қана емес, жаһандық күрделі мәселеге айналды. «Мұндай зиянды тұз түйіршіктері желдің екпінімен осылай жайыла берсе, онда Арктикаға дейін жетіп, мұздардың еруін жылдамдатуы мүмкін» деп, экологтар дабыл қағуда. Мұздықтар суға айналса, оның салдарын елесетудің өзі қорқынышты.
<img src="https://kyzylorda-news.kz/wp-content/uploads/2021/12/sek.jpg" alt="" />
Бұл – проблеманың бір жағы. Өзгесі де оңай емес. Дауыл тұрса болды, Аралдың қаңсыған түбіне құм жиналып, біртіндеп көшіп, жақын маңдағы елдімекендерге қауіп төндіруде. Бұрын теңіз жағасында тұрған Ақеспе, Шижаға, Сазды, Қосаман, Көне Қаратерең, Аралқұм сынды ауылдардың біраз бөлігі бүгінде құм құрсауында қалған. Аралдан шаң араласқан зиянды тұздың көтерілуін тежеп, құмның көшуін тоқтатып, тығырықтан шығарудың жалғыз жолы – теңіздің кеуіп кеткен табанына сексеуілді көптеп отырғызып, көгалдандыру. Ғалымдар пікірі осыған саяды.
Қазіргі кезде бірнеше жоба қолға алынған. Мәселен, соңғы 2 жылда Аралдың ұлтанына 5 миллион сексеуіл көшеті отырғызылыпты. Бір таңқаларлығы, 1 түп сексеуіл 4 тонна құмды тоқтатып, жылжытпай ұстап тұра алады екен. Мұндайда: «Неге 4 тонна?» – деген сұрақ туатыны заңды. Сарапшылардың есебінше, 1 үйді толық көміп тастауға дәл осынша мөлшерде құм жеткілікті. Яғни, бір қарағанда кіп-кішкентай ғана болып көрінетін 1 түп сексеуіл тұтас бір үйді сусылдаған құмның астында қалудан сақтайды.
<img src="https://kyzylorda-news.kz/wp-content/uploads/2021/12/aral-1.jpg" alt="" />
Қызылорда облысы әкімдігінің дерегінше, өңірде 3,4 миллион гектар орман алқабы бар, оның 89 пайызын сексеуіл алып жатыр. Ал 2022-2025 жылдар аралығында Аралдың құрғаған бөлігіне 1,1 млн гектар сексеуіл отырғызу жоспарланып отыр. Оған қоса, 500 мың гектар аумақ картаға түсірілмек. Биыл сор болып жатқан 100 мың гектар жерге тікұшақпен сексеуіл тұқымы себілмек. Жоспар бойынша бұл жұмыс осы желтоқсан айында басталуы тиіс. Өте баяу өсетіндіктен, мамандар бұл сексеуілдер 2030, тіпті 2040 жылдары ғана орманға айналады деп топшылауда.
Осы тұста атап өтерлігі, Аралдың экологиялық проблемасын шешуге шет мемлекеттер мен халықаралық ұйымдар да атсалысуда. Биыл көктемде Қазақстанның Ауыл шаруашылығы министрлігі мен Корея Республикасының Орман шаруашылығы қызметі бірігіп, Арал теңізінің кепкен табанының 5 мың гектар аумағына сексеуіл отырғызды. Ал сәуірде Еуропалық Одақтың қаржылай қолдауымен Арал ауданында екі сексеуіл жылыжайы және туманарий ашылды. Жоба мақсаты – сексеуілді жабық жерде өсіріп, тамыр жайдыру. Ал 2022 жылдың көктемінен бастап осы жылыжайларда күтіп-бапталған 2000 сексеуіл көшеті кенезесі кепкен жерлерге отырғызылады. Екі жылда бұл көшеттер Аралқұмның 10 гектардай алқабын жауып, 8 мың тоннаға жуық құмға тосқауыл болмақ.
Экология, геология және табиғи ресурстар министрлігінің мәліметіне қарағанда, алдағы уақытта Арал табанында сексеуіл отырғызудың арнайы бағдарламасы қабылданбақ. Өзбекстанмен тәжірибе алмасып, ғалымдардың бірлескен экспедициясы ұйымдастырылады.
Осылайша, ғасыр проблемасына айналған Аралдағы экологиялық апатпен күресу үшін көп жұмыс істелуде. Бірақ, бір әттегенайы, теңіздің қайта қалпына келмейтіні. Мамандар осылай дейді. Өйткені, оған құятын Сырдария мен Әмударияның суы азайып кеткен. Сондықтан, Аралдың әбден кеуіп, сортаңға айналған түбін көгалдандырудан басқа жол жоқ. Ол үшін «Қызыл кітапқа» енген сексеуілді көздің қарашығындай қорғап, оны көбейтіп, тиімді пайдалану – басты міндет.
«Ағаш бар жерде, өмiр бар» деп жатады. Арал экологиялық апат аймағы емес, адамдардың өмір сүруіне, жан-жануарлардың тіршілігіне қолайлы ортаға айналу үшін сексеуілдің қаншалықты маңызды екенін осы деректерден-ақ аңғаруға болады. Осындайда ақын Сырбай Мәуленовтың сексеуіл жайлы: «Еккен оны түркімен, Қоймаған соң құм қаптап. Жолды апат-бүліктен, Сексеуілдер тұр сақтап» деген өлең жолдары еске түседі. Иә, ебін тапса сексеуілді орманға айналдыруға болады. Шаңды дауылға төтеп беріп, құмға да тосқауыл бола алатын бұл қайсар ағаш Арал проблемасын аз да болса шешіп жатса, бір міндеттің орындалғаны.
<a href="https://www.inform.kz/kz/aldagy-ush-zhylda-araldyn-kurgagan-boligine-1-1-mln-gektar-sekseuil-egiledi_a3874239">ҚазАқпарат</a>

Алдағы үш жылда Аралдың құрғаған бөлігіне 1,1 млн гектар сексеуіл егіледі

<a href="https://kyzylorda-news.kz/">Kyzylorda-news.kz.</a> Ел Тәуелсіздігінің 30 жылдығына орай Ә.Тәжібаев атындағы Қызылорда облыстық әмбебап ғылыми кітапханасында үш тілде жарыққа шыққан «Сыр – Алаштың анасы» атты тарихи құнды кітаптың тұсауы кесілді.
Салтанатты шараға облыс әкімінің орынбасары, редакциялық алқа төрағасы Серік Ахмет, облыстық мәслихаттың хатшысы, тарих ғылымдарының кандидаты Наурызбай Байқадамов, техника ғылымдарының докторы, профессор, ҚР ҰҒА академигі Қылышбай Бисенов, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы, «Рухани жаңғыру» орталығының директоры, тарих ғылымдарының кандидаты Уәлихан Ибраев және ардагерлер мен ұстаздар, қоғам белсенділері қатысты.
Кітапта аймақтың ерте дәуірден бастап бүгінгі күнге дейінгі тарихы, экономикасы, қоғамдық-саяси және рухани-мәдени өміріндегі қол жеткізген табыстары мен жетістіктері үш тілде әзірленген. Кіріспесі Қазақстан Республикасының Тұңғыш Президенті – Елбасы Нұрсұлтан Назарбаевтың, Мемлекет басшысы Қасым-Жомарт Тоқаевтың және осы кітаптың идея авторы, облыс әкімі Гүлшара Әбдіқалықованың құттықтауымен басталады.
«Сыр – Алаштың анасы» кітабы логикалық тұрғыдан тізбектелген бірнеше бөлімдерден, яғни, облыс туралы жалпы ақпарат, облыс тарихына арналған, облыстың экономикалық әлеуеті, «Сыр елі – жыр елі», әлеуметтік салаға арналған, «Рухани жаңғыру» бөлімдерінен тұрады. Сонымен қатар, Қызылорда, Байқоңыр қалалары мен аудандардағы соңы серпіліс, үдемелі экономикалық дамуы мен қоғамдық-мәдени өмірдегі өзекті ақпараттар берілген.
Кітаптың тұсаукесер рәсімін облыс әкімінің орынбасары, редакциялық алқа төрағасы Серік Әбжәліұлы Ахмет ашты. Жинақтың мазмұны мен көркемдік-идеялық ерекшелігіне кеңінен тоқталып, бұл кітап Сыр елінің Тәуелсіздікке деген тартуы болмақ деді.
<blockquote>
 «Баршаңызды Тәуелсіздіктің 30 жылдық мерейтой аясында оқырманға жол тартқан жаңа кітаптың жарыққа шығуымен құттықтаймын. Редакциялық алқамен ойласа келе кітапты «Сыр – Алаштың анасы» деп атауымыздың үлкен символдық мәні бар. Халқымыздың сан ғасырлық тарихында Сыр өзенінің бойы ұлы өркениеттердің ошағы болып қана қоймай, барша дала халқына қиналғанда пана, сүрінгенде сүйеніш болғаны тарихтан белгілі. Бұл сөз бүгінде тек облыс халқына ғана емес, барша қазақстандықтарға және алыс-жақын шетелдік қонақтарымызға да таныс деп айтсақ қателеспейміз. Ал, сыртқы мұқабасының түсін де кездейсоқ таңдаған жоқпыз. Сыр топырағының түсімен үйлесім табуының өзі тарихтан тамыр тартқан туынды екенін дәлелдейді. Ал, Қорқыт ата ескерткішін бейнелеу арқылы өңіріміздің тарихы өте тереңде екенін және Сыр елінің жыр елі екенін ұғындыруды жөн санадық. Сыр елінің тарихына қаныққысы келген әрбір оқырман бұл еңбектен көп дүниені саралай алады деген ойдамын», – деді облыс әкімінің орынбасары.
</blockquote>
Келелі басқосуда облыстық мәслихаттың хатшысы, тарих ғылымдарының кандидаты Наурызбай Байқадамов іргелі ізденістерге құрылған жаңа кітап оқырманға олжалы сый болғалы тұрғанын қаперге салды. Ал, техника ғылымдарының докторы, профессор, ҚР ҰҒА академигі Қылышбай Бисенов бұл кітап тұтас Сыр елінің даму динамикасын айшықтап беретін құнды мұраға айналатынын атап өтті. Сондай-ақ, Қорқыт Ата атындағы Қызылорда университетінің «Қорқыттану» ғылыми орталығының жетекшісі, филология ғылымдарының докторы, профессор Бағдат Кәрібозұлы бұл кітаптың тың тарихи деректерге негізделіп, бұрын-сонды жарық көрмеген ақпараттармен толықтырылып шығуы үлкен ізденістен туған еңбек деп жоғары бағасын берді.
Алқалы отырыста «Рухани жаңғыру» орталығының директоры, тарих ғылымдарының кандидаты Уәлихан Ибраев кітаптың киелі жерлер географиясына негізделген тарихи орындар мен аңыз болып жеткен оқиғаларға сүйеніп жазылуының өзіндік мәні жоғары екенін мақтанышпен жеткізді.
Жиында жаңа кітаптың тұсауы кесіліп, қалың көпшілікке жол тартты. Жарыққа шыққан кітаптар өңірдің барлық кітапханаларына таратылатын болады.
Айта кету керек, тарихи жинақ аймақтың тұрмысын, рухани-мәдени даму белестерін саралау, қазына-жауһарларымызды белсенді насихаттауға үндейді. Бұл қоғамды адамның жаңа келбетін қалыптастыруда өңірде жүзеге асып жатқан «Сыр елі» мега жобасының ажырамас бөлігінің бірі болмақ.
<img src="https://kyzylorda-news.kz/wp-content/uploads/2021/12/kitap.jpg" alt="" />
<img src="https://kyzylorda-news.kz/wp-content/uploads/2021/12/kitap1.jpg" alt="" />

Тәуелсіздікке тарту: Қызылордада «Сыр – алаштың анасы» кітабы жарыққа шықты

**<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 640 адам коронавирус індетінен емделіп шықты, деп хабарлайды **coronavirus2020.kz.
Нұр-Сұлтан қаласында – 89,
Алматы қаласында – 44,
Шымкент қаласында – 0,
Ақмола облысында – 63,
Ақтөбе облысында – 10,
Алматы облысында – 19,
Атырау облысында – 19,
Шығыс Қазақстан облысында – 22,
Жамбыл облысында – 17,
Батыс Қазақстан облысында – 55,
Қарағанды облысында – 134,
Қостанай облысында – 6,
Қызылорда облысында – 5,
Маңғыстау облысында – 0,
Павлодар облысында – 72,
Солтүстік Қазақстан облысында – 78,
Түркістан облысында – 7.
Елімізде барлығы 949 397 адам COVID-19-дан емделіп, сауығып шықты.

5 қызылордалық коронавирустан жазылды

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 397 адамда коронавирус індеті ПТР арқылы расталып ауырғаны белгілі болды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 53,
Алматы қаласы – 19,
Шымкент қаласы – 5,
Ақмола облысы – 65,
Ақтөбе облысы – 6,
Алматы облысы – 12,
Атырау облысы – 5,
Шығыс Қазақстан облысы – 12,
Жамбыл облысы – 1,
Батыс Қазақстан облысы – 5,
Қарағанды облысы – 81,
Қостанай облысы – 14,
Қызылорда облысы – 1,
Маңғыстау облысы – 2,
Павлодар облысы – 57,
Солтүстік Қазақстан облысы – 57,
Түркістан облысы – 2.
Жалпы ел бойынша ауырғандар саны 980372.

Қызылордада өткен тәулікте 1 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-Министрінің орынбасары Роман Скляр мен РФ Үкіметі төрағасының орынбасары Юрий Борисовтың төрағалығымен өткен пленарлық отырыста «Байқоңыр» кешені бойынша 7 үкіметаралық комиссия жұмысының қорытындысы шығарылды.
Келіссөздер барысында тараптар Қазақстан-Ресей ынтымақтастығының “Байқоңыр” кешенін бірлесіп пайдалану перспективалары мен одан әрі дамытуға, сондай-ақ Байқоңыр қаласының әлеуметтік жағдайын жақсартуға қатысты өзекті бағыттардағы мәселелерді талқылады.
Оның ішінде, Байқоңыр қаласындағы РФ орта мектептерінде міндетті пәндер ретінде «Қазақстан тарихы», «Қазақ тілі мен әдебиеті» пәндерін енгізу туралы мәселе қаралып, Үкіметаралық комиссияның шешімімен РФ Білім министрлігі мен ҚР Білім және ғылым министрлігіне Байқоңыр қаласындағы РФ орта мектептерінде «Қазақстан тарихы» және «Қазақ тілі мен әдебиеті» пәндерін енгізу туралы мәселені пысықтау жөнінде хаттамалық тапсырма берілді.
Комиссия отырысында Қызылорда облысының әкімі Гүлшара Әбдіқалықова баяндама жасап, бірлескен жұмыс нәтижесінде Байқоңыр қаласы бойынша бірқатар мәселелердің оң шешімін тапқанын мәлімдеді.
<blockquote>
 «Байқоңыр қаласында жұмыс істейтін Ресей мектептерінде “Қазақ тілі мен әдебиеті”, “Қазақстан тарихы” пәндерін оқытуға қатысты Қазақстан тарапының бастамасын қолдағаны үшін Ресейлік әріптестерімізге ризашылығымды білдіргім келеді. Өз кезегінде Қызылорда облысының әкімдігі мектептерді тиісті біліктіліктегі қажетті педагогикалық құраммен және оқу-әдістемелік кешендермен қамтамасыз етуге көмек көрсетуге дайын. 
 «Байқоңыр» кешені жөніндегі Үкіметаралық комиссияның жалпы үйлестіруімен ҚР мен РФ мемлекеттік органдарының бірлескен іс-қимылдарының арқасында қаланың әлеуметтік-экономикалық ахуалын жақсарту жөніндегі іс-шаралар кешені іске асырылып жатқанын атап өткім келеді. Бүгінде бізде Байқоңыр қаласы тұрғындарының өмір сүру деңгейін жақсарту және “Байқоңыр”кешенінің одан әрі табысты жұмыс істеуі үшін бар мәселелерді бірлесіп шешуге мүмкіндік бар», – деді аймақ басшысы.
</blockquote>
Екіжақты келісім арқылы Байқоңыр қаласындағы РФ орта мектептерінде білім алатын ҚР азаматтарына өздерінің мемлекеттік тілін дамытуына, патриоттық және рухани-адамгершілікке тәрбиелеу, ҚР заңнамасына сәйкес мемлекеттік білім гранттарын алуға тең қолжетімділікті қамтамасыз ету үшін жағдай жасалатын болады.
Сондай-ақ, комиссия отырысында «Байқоңыр» кешеніндегі пайдаланылмай тұрған нысандарды жалға беруден шығару, есептен шығару және кәдеге жарату, Байқоңыр қаласының жылу электр станциясына табиғи газды жеткізу мәселелері бойынша екіжақты тараптардың ұстанымына қарай ортақ шешім қабылданатын болады.
Еске салайық, қазіргі таңда, Байқоңыр қаласында 12 мектеп жұмыс істейді, оның ішінде 5 мектеп ҚР Білім беру стандарттары бойынша және 7 – РФ Білім беру стандарттары бойынша оқытуда. Мұнда барлығы 9 232 оқушы білім алады.

Байқоңыр қаласындағы Ресей мектептерінде «Қазақстан тарихы» мен «Қазақ тілі мен әдебиеті» пәндері оқытылады

Kyzylorda-news.kz. Қызылорда облысының әкімі Гүлшара Әбдіқалықова еңбек ардагері Майдан Мәселееваны 70 жасқа толған мерейтойымен құттықтады.
Аймақ басшысы еңбек ардагерінің елдің әлеуметтік-экономикалық жағдайын дамытуға, оның ішінде әлеуметтік саланың өркендеуіне еңбегі зор екенін атап өтіп, Сыр жұртшылығы атынан құттықтауын жеткізді.
<blockquote>
 Егемендігіміздің бастауында тұрған Тұңғыш Президентімізбен бірге бүгінгі ел ағалары, ардагерлеріміз мемлекетіміздің, Сыр өңірінің аяғынан тұрып, нығаюына зор үлес қосты. 
 Тарихы терең, топырағы кенен біздің Сыр елі – ұлттың бағына туған талай қайраткер тұлғаларды тербеткен өңір. Сондай азаматтарға лайықты құрмет көрсетіп, ғибратты ғұмырын жастарға үлгі етуді дәстүрге айналдырып келеміз. 
 Бүгін, міне, осындай қайраткер тұлғамыз, еңбек ардагері Майдан Аяшқызы Мәселеева апамыздың 70 жасқа толған мерейлі күніне орай жиналып отырмыз. 
 Майдан апамыз дүниежүзін жайлаған экономикалық дағдарыс кезінде жұмыссыздық деңгейінің өсуі, жалақы мен зейнетақы, балалар жәрдемақысының бірнеше айлап берілмеуі салдарынан халықтың тұрмыс-тіршілігі төмендеп, күрделі жағдай орын алған кезеңде облыс тұрғындарының әл-ауқатын арттыруға еселі еңбек етті. 
 Облыстың тәуелсіздік жылдарында әлеуметтік-экономикалық даму тарихында Майдан Аяшқызының да өз қолтаңбасы бар. Сізді Сыр жұртшылығы атынан 70 жасқа толған мерейтойыңызбен тағы да құттықтаймыз! Сізге ұзақ ғұмыр, мықты денсаулық, отбасыңызға бақ-береке, амандық тілейміз, – деді Гүлшара Әбдіқалықова.
</blockquote>
Кездесуде облыс әкімі еңбек ардагеріне әлеуметтік-экономикалық дамуына сіңірген еңбегі үшін Президент Жарлығымен бекітілген ҚР Тәуелсіздігінің 30 жылдығы мерекелік медалін және облыстың ең жоғары наградасы – Қызылорда облысының «Құрмет» грамотасын табыстап, қазақ дәстүріне сай иығына ақ жаулық пен қамзол жапты. 
Кездесуде Майдан Мәселееваны замандас әріптестері, еңбек ардагерлері Нажмадин Мұсабаев, Камал Шөкеновтың жұбайы Длара Раимбердиева және Раиса Көзденова құттықтап, мерейтой иесінің өмір жолынан естеліктер айтты. 
Майдан Мәселеева 1951 жылы 13 желтоқсанда Өзбекстан Республикасында дүниеге келген. Семей қаржы-экономикалық колледжін, Қазақ мемлекеттік басқару академиясын бітірген. 
Еңбек жолын 1971 жылы Қармақшы аудандық қаржы бөлімінде аға экономисттен бастап, мемлекеттік кірістер инспекциясының бастығы, меңгерушінің орынбасары, салық инспекциясының бастығы, салық инспекциясы бастығының бірінші орынбасары, облыстық жұмыспен қамтуды үйлестіру және әлеуметтік бағдарламалар басқармасының басшысы, облыс әкімінің кеңесшісі, облыс әкімі аппараты басшысының орынбасары қызметтерін абыройлы атқарды. 
Ел мүддесі жолындағы ізгі істері үшін «Құрмет» орденімен марапатталды.
<img src="https://kyzylorda-news.kz/wp-content/uploads/2021/12/fb_img_1639253824336.jpg" alt="" />
<img src="https://kyzylorda-news.kz/wp-content/uploads/2021/12/fb_img_1639253826979.jpg" alt="" />
<hr />

Еңбек ардагері Майдан Мәселеева 70 жасқа толды

Kyzylorda-news.kz. Бүгін, 11 желтоқсанда ел Тәуелсіздігінің 30 жылдығы аясында Қызылорда қаласы «Достық» үйінде «Сыр журналистикасының тарихы» 5 томдығының тұсаукесері өтті.
<img src="https://kyzylorda-news.kz/wp-content/uploads/2021/12/img-20211211-wa0065.jpg" alt="" />
Мерекелік шараға облыс әкімінің орынбасары Серік Ахмет, облыстық мәслихат хатшысы Наурызбай Байқадамов, Қазақстан Журналистер одағының төрағасы Сейітқазы Матаев, ҚР Парламент Сенатының депутаты Нұртөре Жүсіп, «Бас редакторлар клубы» ҚБ президенті Бибігүл Жексенбай, Л.Гумилев атындағы ЕҰУ түркітану кафедрасының профессоры, ҚР Ұлттық Ғылым академиясының корреспондент мүшесі Амантай Шәріп және Түркістан облысындағы БАҚ басшылары, қызылордалық қаламгерлер, зиялы қауым өкілдері қатысты.
<img src="https://kyzylorda-news.kz/wp-content/uploads/2021/12/img-20211211-wa0046.jpg" alt="" />
«Сыр журналистикасының тарихы» еңбегінің ерекшелігі, Сыр өңіріндегі бұқаралық ақпарат құралдарының өткені мен бүгінін қызылордалық журналистердің өздері саралап, зерттеп жазып шықты. Шығармашылық топ бұған екі жыл уақыт арнады. Кітап жазу барысында Сыр журналистикасының тарихына қатысты бұрын-соңды қалам тербеген аға-әріптестердің, ғалымдардың еңбегі пайдаланылды.
<img src="https://kyzylorda-news.kz/wp-content/uploads/2021/12/img-20211211-wa0062.jpg" alt="" />
Мұнымен қоса Мәскеу, Алматы қалаларындағы, Қызылорда облысындағы архивтерден, кітапханалардан нақты мәліметтер, тың деректер алынды.
<img src="https://kyzylorda-news.kz/wp-content/uploads/2021/12/img-20211211-wa0064.jpg" alt="" />
Бестомдық кітап қазақ журналистикасы әрі өлкетану үшін үлкен қазына болғалы тұр. Себебі, ҚР Тұңғыш Президенті – Елбасы Н.Ә.Назарбаев Алаштың анасы деп баға берген Сыр бойы шежіресінің бір парағы – бұқаралық ақпарат құралдарының бай тарихы алғаш рет жүйеленіп, жазылды. Ауқымды жоба көмескі тартқан тарихты қайта түгендеу, қалам ұстаған кешегі әрі бүгінгі буынның азды-көпті еңбегін дәріптеу, талдап-таразылау, ғылыми айналымға қосу, жас журналистерге кәсіби бағдар беру секілді мақсаттарды көздеді. Сондықтан, бұл еңбек оқырмандардың, әсіресе, журналистердің, ғалымдардың назарын аударып, қызығушылығын тудырып отыр.
<img src="https://kyzylorda-news.kz/wp-content/uploads/2021/12/img-20211211-wa0063.jpg" alt="" />
Басқосуда Қызылорда облысы әкімінің орынбасары Серік Ахмет Тұңғыш Президент Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласымен үндескен игі бастаманың тағылымдық мәні зор екенін жеткізді.
<img src="https://kyzylorda-news.kz/wp-content/uploads/2021/12/img-20211211-wa0056.jpg" alt="" />
<blockquote>
 “Елбасы Нұрсұлтан Әбішұлы Назарбаев айтқандай: «Жалпақ жұртыңды, исі Алашыңды қадірлеу – алдымен өзің туған өлкенің тарихы мен табиғатын танудан, тұлғаларын ардақтаудан басталады». Расында, қай салада болмасын жаңаша даму жолына түсу үшін, сол саланың өткен жолы мен тарихын түгендеу, тұлғалардың еңбегінен тағылым алу маңызды. Бүгінгі тұсауы кесілгелі тұрған 5 томдық еңбектің негізгі миссиясы да осы. Яғни, телегей-теңіз ақпарат ғасырында, дәстүрлі медианың жаңа медиамен күш біріктіріп дамудың жаңа сатысына көтерілген кезеңінде, Сыр елінің барлық бұқаралық ақпарат құралдарының тарихын түгендеп, қоғамға, халыққа және жалпы өз-өзімізге есеп беру деп білеміз. Сондықтан, бұл кітаптың Тәуелсіздігіміздің 30 жылдық мерейтойы қарсаңында оқырманға жол тартуы біз үшін үлкен мәртебе, зор қуаныш” – деді Серік Ахмет.
</blockquote>
Сыр перзенті, ҚР Парламенті Сенатының депутаты Нұртөре Жүсіп тарихты түгендеуде баспасөздің орны ерекше екенін атап өтті.
<img src="https://kyzylorda-news.kz/wp-content/uploads/2021/12/img-20211211-wa0055.jpg" alt="" />
<blockquote>
 “Баспасөз елдің әр кезеңдегі өмірін, тыныс-тіршілігін, мысалы, сонау тарихтың ақтаңдақ жылдарынан бастап бүгінгі Тәуелсіздік тұсындағы іргелі істерді тайға таңба басқандай таспаға түсіріп келеді. Архивтердегі сарғайған газет беттерін парақтасақ, еліміздің бір ғасырлық өмір тарихының көрінісін табуға болады. Бұл ретте бестомдық деректерді жинақтауда еңбек еткен жүрген барша азаматтарға, «Сыр медиа» ЖШС бас директоры Аманжол Оңғарбаевқа, қолдау танытқан облыс әкімдігіне ризашылығымыз зор», – деді Нұртөре Жүсіп.
</blockquote>
Қазақстан Журналистер Одағының төрағасы Сейітқазы Матаев бестомдықтың шығуы айтулы оқиға екенін атады. Бұрын-соңды мұндай жоба болмағанын айта келе сырбойылық журналистер және Сыр журналистикасы ақпарат кеңістігінде өзгелерге үлгі болатынын жеткізді.
<img src="https://kyzylorda-news.kz/wp-content/uploads/2021/12/img-20211211-wa0054.jpg" alt="" />
<blockquote>
 “Қазақ журналистикасының тарихын түгендеуде сырбойылық журналистердің бастамасы өте құптарлық іс”, – деді Сейітқазы Матаев.
</blockquote>
Белгілі ғалым Амантай Шәріп те кітапқа жоғары бағасын берді.
<img src="https://kyzylorda-news.kz/wp-content/uploads/2021/12/img-20211211-wa0050.jpg" alt="" />
<blockquote>
 “Сыр журналистикасының тарихы» – ғылыми еңбек. Яғни естеліктер жинағы емес, ғылыми тағылымды еңбектеп топтастырылған. Бұған дейін журналистердің тарихы жолы жүйеленіп, бір арнаға түскен жоқ. Осы тұрғыдан алғанда бір ғылыми зерттеу институты көтеретін еңбек деп бағалау керек”, – деді ол.
</blockquote>
Бұдан бөлек, «Бас редакторлар клубы» ҚБ президенті Бибігүл Жексенбай жаңа кітаптың қазіргідей ақпарат ағыны қарқынды, журналистиканың жаңа кезеңінде таптырмайтын құрал болатынын айтты.
<img src="https://kyzylorda-news.kz/wp-content/uploads/2021/12/img-20211211-wa0053.jpg" alt="" />
<blockquote>
 “Журналистиканың басты миссиясы – ағартушылық. Ал, бұл кітап осы міндет үдесінен шығып отыр. Бестомдық кітапты шығару барысында архив құжаттары, көптеген ғылыми еңбектер парақталған, ғалымдар пікірі ескерілген. Жалпы, құнды туындыда өткен мен бүгін, қаламы қарымды қаламгерлердің жүріп өткен өнеге болар өмір жолы көрініс тапқан. Бұл қазіргідей ақпарат ағыны қарқынды, журналистиканың жаңа кезеңінде таптырмайтын құрал болмақ”, – дейді Бибігүл Жексенбай.
</blockquote>
Жиын соңында «Сыр медиа» ЖШС бас директоры, облыстық мәслихат депутаты Аманжол Оңғарбаев бұл бір күнде, бір айда дүниеге келген еңбек еместігін тарқатып айтты.
<img src="https://kyzylorda-news.kz/wp-content/uploads/2021/12/img-20211211-wa0059.jpg" alt="" />
<blockquote>
 “Ел дамуының маңызды кезеңінде Қазақ журналистикасының – Қазақ сөз өнерінің бір қайнар бұлағы ретінде сырбойылық қалам ұстаған қауымның ел алдында берген есебіндей осы бір сындарлы еңбек жарық көріп отыр. Тарихқа зер салсақ, сонау ХІХ ғасырдың аяғы мен ХХ ғасырдың басында республиканың түкпір-түкпірінде жарық көрген мерзімді басылымдар Сыр бойына да тарай бастады. Олардың қатарында «Дала уалаяты», «Қазақ» газеттері, «Айқап» журналы, «Абай» журналы болды. Мұнымен қоса Орда қаласынан шығып тұрған «Қазақстан» газеті, Семей қаласында жарық көрген Алаш партиясының органы «Сарыарқа» газеті, Мұстафа Шоқай негізін қалаған әрі шығарған «Бірлік туы» газеттері де ішінара Сыр бойына тарап тұрды. Жай тарап қана қойған жоқ, бүгінгі тілмен айтқанда, алғашқы газетке қаржылай қолдау білдірген меценаттардың ішінде сырбойылықтардың болуы да бүгінгі туған жерге туын тіккен ұрпақ үшін үлкен мақтаныш сезімін тудырады. Мәселен, 1913 жылы «Қазақ» газетінің басылып шығуына қаржылай қолдау білдірген сырбойылық Ахмет ишан Оразайұлын көпшілік біле бермейді. Әдетте мерзімді басылымдар қоғамдық пікір қалыптастырады десек, аталған газеттер мемлекеттік идеологияға әсер етті. Осы тұрғыдан келгенде бұл бестомдықты Алашқа ана, талайға пана болған Сыр бойының шежіресі деп қарауға болады”, – деді Аманжол Сақыпұлы.
</blockquote>
Сонымен қатар, ол «бұл кітапты журналист деген атын кіршіксіз қорғаған, кешегі қаламгер-қайраткерлердің ізін парасаттылықпен жалғаған аға буынның алдындағы парызымыздың бір өтеуіндей деп қабылдасаңыздар болады» деп атап өтті.
<img src="https://kyzylorda-news.kz/wp-content/uploads/2021/12/img-20211211-wa0048-1.jpg" alt="" />
Жиын соңында жаңа кітаптың бестомдықтың тұсауы кесілді. Бұдан кейін өмірден өткен қаламгердің рухына арнап ас беріліп, құран бағышталды.
Осы іс-шарада «Сыр медиа» ЖШС жариялаған мемлекет және қоғам қайраткері Т.Жүргенов атындағы, қаламгерлер Айжарық Сәдібекұлы, Әскербек Рахымбекұлы, Әділхан Бәймен атындағы шығармашылық байқаулардың жүлдегерлері марапатталды.
Айта кетейік, Сыр бойында жарық көрген бұқаралық ақпарат құралдарының тарихын зерттеп-зерделеген жинақтың І томы облыс әкімі Гүлшара Әбдіқалықованың алғысөзінен бастау алған. Сонымен бірге «Сыр медиа» ЖШС бас директоры, филология ғылымдарының кандидаты Аманжол Сақыпұлының, филология ғылымдарының докторы Құлбек Ергөбектің, Қорқыт ата атындағы Қызылорда университетінің доценті, тарих ғылымдарының кандидаты Сағат Тайманның жалпы қазақ баспасөзіне жасаған талдау ойлары, Сыр журналистикасына айтылған пайым-пікірлері берілген.
Жалпы I томда ғасырға жуық тарихы бар облыстық «Сыр бойы», «Кызылординские вести» газеттері және «Ақмешіт жастары» басылымы қамтылған. Сондай-ақ «Сыр медиа» ЖШС-ның құрылу кезеңі жайлы айтылады.
Кітаптың ІІ томында облыс аумағына кіретін қалалық газет және аудандардың мемлекеттік басылымы қамтылған. Бұл үнжариялардың тарихи кезеңі, онда жарық көрген тақырыптардың ауқымы, жалпы қоғам дамуындағы газеттің рөлі жайында қызықты мағлұматтар бар.
Кітаптың ІІІ томы қазіргі күні заманауи цифрлық мүмкіндіктер арқылы Сыр бойынан республика аумағына тарайтын «Қазақстан» РТРК облыстық филиалының және Қызылорда қоғамдық телекомпаниясының тарихына арналады. Сондай-ақ бүгінде жабылып қалған облыстық радионың 80 жылға жуық тарихы да оқырманын бей-жай қалдырмайды. Аз уақыт болса да Қазалыдан хабар таратқан «Серік ТВ» және қызылордалық жастардың құлағында үні қалған СЕТА радиосы жайлы да азды-көпті мәлімет бар. Жаңа медианың жолашары болған «Qyzylorda news» ақпараттық агенттігі және оның азаматтық медианы дамытудағы рөлі жайында айтылады. Бұл томда облыстағы баспа ісі жайлы да жазылған.
Жинақтың ІV томында берілген Сыр бойында жарық көрген бұқаралық ақпарат құралдарының үлкен бір легі жекеменшік басылымдар тарихы жаңа дәуірдегі жаңа Қазақстанның тынысындай әсер қалдырады. Сондай-ақ тәуелсіздіктің алғашқы жылдары ашылып, кейін қаржы тапшылығынан жабылып қалған қанатқақты ірілі-ұсақты газеттер, мұнымен қоса жоғары және орта оқу орындарының, басқармалардың ведомстволық басылымдары қамтылды.
Бесінші кітап «БАҚ саласындағы Сыр мақтаныштары» және «Практикалық журналистика» деген екі бөлімнен тұрады. «БАҚ саласындағы Сыр мақтаныштары» жай ғана анықтамалық емес, сырбойылық қалам ұстаған қауымның шеберлік бастау-бұлағы деп ұсынылып отыр. «Практикалық журналистика» бөлімінде сырбойылық журналистердің тәжірибесі, жас журналистер үшін шеберлік дәрістері жинақталған.

«Сыр журналистикасының тарихы» 5 томдығының тұсаукесері өтті

<a href="https://kyzylorda-news.kz/">Kyzylorda-news.kz.</a> Қызылорда қаласындағы «Достық» үйінде «Сыр журналистикасының тарихы» 5 томдығының тұсаукесері өтті.
Шара барысында Қазақстан Журналистер Одағының төрағасы Сейітқазы Матаев бестомдықтың шығуы айтулы оқиғаға екенін айтты.
<blockquote>
 «Мұндай кітаптар басқа өңірлерге үлгі болады. Өңірлер арасында сырбойылық журналистердің бастама көтеріп, руханиятты дамыту үшін қажетті кітапты қолға алуы құптарлық және көпке үлгі», -деді Сейітқазы Матаев.
</blockquote>

Қазақстан және Қызылорда облысының жаңалықтары: Басты жаңалықтар old