<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова өңірдегі бизнес өкілдерімен кездесті.
Жиынға облыстық мәслихат хатшысы Наурызбай Байқадамов, облыс әкімінің орынбасары Нұрлан Тілешев, салалық басқарма басшылары мен кәсіпкерлік саласындағы ұйым жетекшілері және жергілікті бизнес-қауымдастық өкілдері қатысты.
Іс-шара аясында аймақ басшысы жергілікті тауарөндірушілердің өнімдер көрмесімен танысты. Қызылорда қаласы және барлық аудан өнімдері арнайы сөреден орын тапты.
Кездесу барысында облыс әкімі пандемия қиындығына қарамастан кәсіп ашып, өңірде 2023 жылға дейінгі экономикалық даму жоспарының тиімді іске асырылуына және жаңа әрі сапалы жергілікті өнім түрлерін шығару ісінде белсенділік танытқан кәсіпкерлерге алғыс білдірді.
<blockquote>
 «Соңғы кездері облыста кәсіпкерлер балмұздақ, жантақ балы, шұжық, макарон бұйымдары, шоколад өнімдері, қауыннан жасалған чипсы, сиыр, жылқы, қой етінен консервілер, қарақұмық және күріш ботқасынан консервілер сияқты өнімдерді шығарып, оның халыққа қол жетімділігін қамтамасыз еттіңіздер. Мұнан бөлек, өнімнің кейбір түрлері бойынша облыстың өзін-өзі қамтамасыз ету деңгейі ұлғайды, нақты айтқанда макарон өнімдері 3,8-ден 5 пайызға, шұжық өнімдері 0,3-тен 3,1 пайызға, кондитерлік өнімдер 2,1-ден 2,5 пайызға дейін өсті. Өз тарапымыздан кәсіпкерлікті одан әрі дамытуға қолайлы жағдай жасау шараларын қарастырудамыз. Ірі жобалармен қатар шағын және орта бизнестің де жобаларын іске асыруға бағытталған «Байқоңыр» аймақтық әлеуметтік кәсіпкерлік корпорациясының қызметін толығымен қайта құрдық. Сәйкестендіру сертификаттары мен қажетті рұқсат құжаттарын алу бойынша жобаларға сүйемелдеу жұмыстары ұйымдастырылды. Сонымен қатар, «Қызылорда» өңірлік инвестициялық орталығының қызметі 5 жылға ұзартылды. Ішкі нарықты өз өнімдерімізбен қамтамасыз ету мақсатында біз «Қызылорда» өңірлік инвестициялық орталығы арқылы 2%-бен несиелендіру бағдарламасын іске қостық. Басты мәселе – сапалы жергілікті өнім шығарып, жаңа өндірістерді ашу. Сіздерді осы бағытта бірлесіп жұмыс істеуге шақырамын. Бұрын Қызылорда облысын тек мұнай мен күріш арқылы таныса, енді жаңа өнімдерді шығаруды қолға алайық»,-деді облыс әкімі.
</blockquote>
Айта кетейік, карантин кезінде кәсіпкерлерді қолдау бағытында бірқатар шаралар атқарылды. Облыстық кәсіпкерлік және туризм басқармасының басшысы Фердоуси Қожабергенов бизнесті дамыту және өз ісін ашуға бағытталған жұмыстар барысын баяндады. Атап айтқанда, биылдың өзінде шағын кәсіпкерлікті қолдауға 34,6 млрд. теңге қаржы бағытталып, 3 мыңнан аса жоба жүзеге асырылды.
Өткен жылмен салыстырғанда қолдау көрсетілген жобалардың саны 2,4 есеге, ал несие портфелі 1,8 есеге артты. Басқарма басшысы бағдарламаға қатысушылар санының артуына несиелендіру шартының жеңілдетілуі және кейбір банктермен іске қосылған «скоринг» құралы оң ықпалын тигізгенін мәлімдеді. Сондай-ақ, мемлекеттік бағдарламалар шеңберінде бизнесті несиелендіру бағытында облыста 7 банктің филиалы жұмыс жасаса, биыл олардың қатары облыста «Альфа Банк» филиалының ашылуымен толықты.
Бизнес-қауымдастыққа көрсетілген жан-жақты қолдаудың нәтижесінде 2020 жылы облыста тіркелген кәсіпкерлердің саны 4,3 пайызға, белсенді кәсіпкерлердің саны 5,1%-ға артып, өңіріміз көрсеткіштердің өсу қарқыны бойынша республика көлемінде І орынды иеленді.
Сондай-ақ, кездесуде «Атамекен» Қызылорда облыстық кәсіпкерлер палатасының директоры Ғалымбек Жақсылықов кәсіпкерлердің жұмысын жандандыруға қатысты бірқатар ұсыныстарын ортаға салды. Өз кезегінде аймақ басшысы ұсыныстарды саралай келе, қажетті жұмыстарды жүргізу үшін тиісті тапсырмалар берілетінін айтты.
Іс-шара барысында жергілікті кәсіпкерлер өз қызметтері туралы айтып, пікір білдірді. Мәселен, «ЛТД КАУ» жеке кәсіпкерлігінің басшысы Жансия Әлсейітова жартылай фабрикат өндірісін жүргізсе, «Қызылорда Сельхозпродукт» ЖШС директоры Константин Ким ет өнімдерін, ал «Сыздық ата» ЖШС директоры Ғабит Дүйсебаев асыл тұқымды мал өсіру мен ет өнімдерін шығарумен айналысуда. Сондай-ақ, «Аль-Асад» ЖШС директоры Тұрғали Шанкерей 20 жылдан астам уақыт бизнеспен айналысса да, 2 күн ішінде өтініш беріп, қажетті көмек алғанын Сыр өңірінде ғана орын алған ерекше жағдай екенін айтып, облыс әкіміне ризашылығын білдірді. 
Кездесу соңында бірқатар кәсіпкерлер өңір дамуына қосқан үлестері үшін облыс әкімінің Алғыс хатымен марапатталды.
<img src="https://kyzylorda-news.kz/wp-content/uploads/2021/12/akim-2.jpg" alt="" />
<img src="https://kyzylorda-news.kz/wp-content/uploads/2021/12/akim1-1.jpg" alt="" />
<img src="https://kyzylorda-news.kz/wp-content/uploads/2021/12/akimmm.jpg" alt="" />
<img src="https://kyzylorda-news.kz/wp-content/uploads/2021/12/akim3-1.jpg" alt="" />

Қызылордалық кәсіпкерлер жаңа өнім түрлерін көбейтуде

<a href="https://kyzylorda-news.kz/">Kyzylorda-news.kz.</a>&nbsp;Биыл Қызылорда облысында 2,8 мыңға жуық азамат «Бастау Бизнес» жобасына қатысып, оның 68 пайызы кәсібін ашуға қаржы алды. Осы және өзге де жаңалықтармен Кәсіпкерлер палатасының директоры Ғалымбек Жақсылықов бөлісті.
– Ғалымбек Жақсылықұлы, өткен жылдан басталған пандемия кәсіпкерлерге айтарлықтай сынақ болды. Жалпы биыл кәсіпкерлердің белсенділігі қандай?
– Соңғы екі жыл кәсіпкерлер үшін оңай болып жатқан жоқ. Дегенмен былтырмен салыстырғанда осы жылы кәсіппен айналысып жатқан, сондай-ақ айналысуға ниетті жандар еркін жұмыс істей бастады. Биыл кәсіпкерлік белсенділіктің артқанын несиелендіруден байқауға болады. Бір ғана «Бизнестің жол картасы» бағдарламасы шеңберінде биыл жергілікті кәсіпкерлер 1961 жобаға 29,1 млрд теңге несие алған. Бұл өткен жылмен салыстырғанда 2 есеге жуық артық (былтыр 15,7 млрд теңге). Кәсіпкерлер алған несиеге өндірістер ашып, жұмыс орындарын құрып жатыр. Биыл Кәсіпкерлер палатасының мамандары кәсіп ашуға қатысты 3,5 мың азаматқа 9 мыңнан астам кеңес берді. 930 кәсіпкерге қызмет көрсетіп, бухгалтерлік және салықтық есептілігін тапсырды, бизнес-жоспарларын әзірледі.
– Қызылордалықтар арасында «Бастау Бизнес» жобасы сұранысқа ие екенін білеміз. Биыл қанша адамды оқыттыңыздар?
– «Бастау Бизнес» жобасына әлі де сұраныс жоғары. Жоспарланған 2,5 мың азаматтың орнына осы жылы 2,8 мыңға жуық адам оқыды. Биыл оқыған бастаулықтардың 68 пайызының жобасы түрлі қаржы ұйымдары арқылы қаржыландырылып, кәсібін бастап кетті. Осы жылдың жағымды жаңалықтарының бірі – жоба аясында оқыған азаматтардың жобасын қаржыландыру үшін арнайы шағын қаржы ұйымы құрылды. Облыс әкімдігі және «Атамекен» Ұлттық кәсіпкерлер палатасының қолдауымен құрылған Atameken Qyzylorda микроқаржы ұйымы республика бойынша ең соңғы тіркелген қаржы институты болса да, қазір қаржыландыру бойынша 15 облыстың арасында 7 орында. Бүгінге дейін 63 бастаулыққа барлығы 218 млн теңге несие берді.
– Бизнес өкілдерінің құқығын қорғау бағытында қандай жұмыстар атқарылды?
– Жыл көлемінде палатаға түскен 541 өтініштің 126-сында бизнес өкілдері құқығын қорғауды сұраған. Заңгерлеріміз бұл өтініштердің 40 пайызында оң нәтижеге қол жеткізіп, мыңнан аса кәсіпкердің құқығын қорғап қала алды. Қосымша 965,2 млн теңге қаржысын да сақтап қалды. Қабылданған шаралардың негізінде кәсіпкерлердің қызметін жүргізуге кедергі келтірген 7 мемлекеттік қызметкер тәртіптік және әкімшілік жауапкершілікке тартылды. Кәсіпкерлерден түскен арыздар бойынша 31 жүйелі мәселені жинақтап, реестрге енгіздік. Оның 18–і жергілікті жерде шешуді қажет ететін проблемалар. Бүгінде оның 9–ы оң шешілді.
– Кәсіпкерлердің құқығын қорғау кеңесінің атқарған жұмысына тоқталсаңыз.
– Кәсіпкерлер палатасы жанында Кәсіпкерлер құқығын қорғау және сыбайлас жемқорлыққа қарсы іс-қимыл кеңесі жұмыс істейді. Кеңес кәсіпкерлік субъектілерінің құқығы мен заңды мүдделерін қамтамасыз ету мен қорғау және сыбайлас жемқорлыққа қарсы мәселелерді жедел әрі жүйелі шешу мақсатында құрылған. Осы жылы кеңестің 12 отырысы өтіп, 16 мәселе қаралды. Кеңес мүшелері кәсіпкерлердің құқығын қалпына келтіру бойынша мемлекеттік органдарға 21 ұсыныс берген болатын. Оның 14–і қолдау тапты. Нәтижесінде кеңестің жұмысы арқылы 500-ден аса кәсіпкердің құқығы қорғалды.
– Келер жылға жоспарларыңыз қандай?
– Келесі жылы да кәсіпкерлерге арналған қаржылай емес қолдау шараларымызды, «Бастау Бизнес» және өзге де жобаларымызды жалғастырамыз. Қызылордалықтарды келе жатқан жаңа жылмен құттықтаймын. Амандықта болайық.
– Сұхбатыңызға рақмет!

Ғалымбек Жақсылықов: Биыл бастаулықтардың 68 пайызы кәсібін ашты

<a href="https://kyzylorda-news.kz/">Kyzylorda-news.kz.</a>&nbsp;Қазақстанда өткен тәулікте 440 адамда коронавирус індеті ПТР арқылы расталды, деп хабарлайды <a href="https://www.coronavirus2020.kz/">coronavirus2020.kz.</a>
Аймақтар бойынша:
Нұр-Сұлтан қаласы – 85,
Алматы қаласы – 62,
Шымкент қаласы – 11,
Ақмола облысы – 34,
Ақтөбе облысы – 3,
Алматы облысы – 10,
Атырау облысы – 18,
Шығыс Қазақстан облысы – 14,
Жамбыл облысы – 6,
Батыс Қазақстан облысы – 11,
Қарағанды облысы – 58,
Қостанай облысы – 33,
Қызылорда облысы – 4,
Павлодар облысы – 44,
Солтүстік Қазақстан облысы – 41,
Түркістан облысы – 6.
Жалпы ел бойынша ауырғандар саны – 987 386.

Қызылордада 4 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> 30 желтоқсан күні атмосфералық ағындардың өтуіне байланысты ҚР батысында, шығысында және орталығында күн құбылмалы болады, қар жауып, жаяу бұрқасын соғып, жел күшейеді, деп хабарлайды Қазгидромет.
Қазақстанның қалған аумағында күн жауын-шашынсыз болады. Республика бойынша кей жерлерде тұман түседі.
Атырау облысының солтүстігінде, орталығында жаяу бұрқасын соғып, тұман түседі, көктайғақ болады.
Шығыс Қазақстан облысының солтүстігінде, шығысында жаяу бұрқасын соғып, батысында, орталығында жел күшейеді, жылдамдығы секундына 15-20 метрге жетеді.
Жамбыл облысының солтүстігінде, таулы, тау бөктері аудандарында тұман түсіп, солтүстік-шығысында, таулы аудандарда желдің жылдамдығы секундына 15-20 метрге жетеді, күндіз екпіні 23-28 м/с болады.
Түркістан облысының батысында, тау бөктеріндегі аудандарында тұман түсіп, күндіз таулы аудандарда жел 15-20 м/с жылдамдықпен еседі.
Алматы облысының солтүстігінде, оңтүстігінде тұман түсіп, Алакөл көлдері ауданында желдың жылдамдығы секундына 18-23 метрге жетеді.
Батыс Қазақстан облысының солтүстік-шығысында тұман түседі, облыстың оңтүстік-батысында жел 15-20 м/с жылдамдықпен соғады.
Ақтөбе облысының солтүстігінде тұман түсіп, күндіз облыстың орталығында желдің жылдамдығы секундына 18 метрге жетеді.
Қызылорда облысының орталығында тұман түсіп, күндіз жел 15-20 м/с жылдамдықпен соғады.
Қарағанды облысының оңтүстігінде тұман түсіп, облыстың оңтүстік-батысында жел 15-20 м/с-қа жетеді.
Ақмола, Солтүстік Қазақстан облыстарының оңтүстігінде, Маңғыстау облысының батысында, Қостанай облысының солтүстігінде тұман түседі.

30 желтоқсанға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Биыл елімізде тұңғыш рет ауыл әкімдерінің тікелей сайлауы өтті. Жиырма бесінші шілдеден бастап облыста 44 ауылдық округтің, 1 аудандық маңызы бар қаланың және 2 кент әкімін халық дауыс беру арқылы сайлады.
<blockquote>
 «ҚР Сайлау туралы» заңнамаға өзгерістер мен толықтырулар енгізілуінің басты мақсаты – жергілікті халықтың басқару жүйесіндегі белсенділігін арттыру және еліміздегі демократиялық процестерді одан әрі дамыту болып табылады. Осы жылы өткен ауыл әкімдерін сайлау барысында облыс бойынша жалпы саны 181 кандидат тіркелді. 118 кандидат өзін-өзі ұсынса, 63 үміткерді саяси партиялар додаға қосқан. Сайлауға қатысушы 181 кандидаттың 79 пайызы бюллетеньге енгізілді. 37 кандидат тиісті талаптарға сәйкес келмеді. саяси додада орташа бәсекелестік бір орынға 3 кандидатты құрады», – деді облыстық сайлау комиссиясының төрағасы Ғалым Баймырзаев.
</blockquote>
Жалпы 47 әкімнің сайлауының 36-ы әкімдердің өкілеттілік мерзімінің аяқталуына байланысты, 11-і мерзімінен бұрын тоқтатылуына байланысты өткізілген.
<blockquote>
 «Сайланған әкімдердің орташа жасы 47,4 жасты құрады. Біреуі әйел, қалғаны ер азаматтар. Сайланғандардың 23-і бұрынғы әкімдер. Сайлауды 628 байқаушы, 189 кандидаттардың сенім білдірген өкілдері қадағалады. Бір сайлау учаскесіне 9,6 байқаушыдан келді. Бұл деген ең жоғарғы көрсеткіш», – деді облыстық сайлау комиссиясы төрағасының орынбасары Болат Накипов.
</blockquote>
Айта кетейік, алдағы 2022 жылы өкілеттік мерзімі аяқталатын 21 әкімнің кезекті сайлауын өткізу жоспарланып отыр.

Қызылордада 2022 жылы 21 ауыл әкімі сайланады

<a href="https://kyzylorda-news.kz/">Kyzylorda-news.kz.</a> Қазақстанда 28 желтоқсандағы эпидемиологиялық жағдай бойынша ПТР арқылы 393 адам коронавируспен ауырғаны расталды, деп хабарлайды <a href="https://www.coronavirus2020.kz/">coronavirus2020.kz.</a>
Аймақтар бойынша:
Нұр-Сұлтан қаласы – 68,
Алматы қаласы – 52,
Шымкент қаласы – 14,
Ақмола облысы – 36,
Алматы облысы – 14,
Атырау облысы – 10,
Шығыс Қазақстан облысы – 27,
Жамбыл облысы – 4,
Батыс Қазақстан облысы – 9,
Қарағанды облысы – 56,
Қостанай облысы – 26,
Қызылорда облысы – 1,
Маңғыстау облысы – 5,
Павлодар облысы – 38,
Солтүстік Қазақстан облысы – 31,
Түркістан облысы – 2.
Жалпы ел бойынша ауырғандар саны – 986 946.

Қызылордада өткен тәулікте 1 адам коронавирус жұқтырды

Kyzylorda-news.kz. Бүгін облыс әкімі Гүлшара Әбдіқалықова жұмыс сапарымен Жалағаш ауданына барып, Тәуелсіздіктің 30 жылдығына орай әлеуметтік аз қамтылған отбасыларға жаңа тұрғын үйдің пәтер кілтін табыстады.
Салтанатты шарада облыс әкімі барша тұрғындарды мерейлі мерекемен құттықтап, құтты қоныс болуын тіледі.
<blockquote>
 Баршаңызды алдымен қадірлі де қасиетті Тәуелсіздігіміздің 30 жылдығы және Жаңа жыл мерекесімен құттықтаймын! 
 Сыр елі қарқынды даму үстінде. Жыл сайын өңірімізде түрлі жаңа нысандар бой көтеріп, көркейіп-көріктене түсуде. Уақыт өткен сайын аудан халқының саны артып келе жатқаны сөзсіз. Бір шаңырақтан өрбіген ұрпақ бірнеше отбасы болып, жаңа отау көбеюде. Сондықтан, халықты тұрғын үймен қамтамасыз ету күн тәртібіндегі мәселе ретінде менің назарымда болады. 
 Құрметті жаңа қоныс иелері! Жаңа баспаналарыңыз құтты болсын! Іші шаттыққа толып, балалардың күміс күлкісіне бөленсін!, – деді Гүлшара Әбдіқалықова.
</blockquote>
Жаңа тұрғын үй кілтін табыстау рәсімінде аудандық ардагерлер кеңесінің төрағасы Садық Әлиев көрсетілген қолдауға тұрғындар атынан алғыс білдіріп, мерекеге орай құттықтауын жеткізді.
Салтанатты шарадан соң аймақ басшысы 6 баланың анасы Әлия Қадырманованың шаңырағында болып, көпбалалы жанұяға газ плитасын сыйлады.
Айта кету керек, биыл облыс бойынша тұрғын үй құрылысына мемлекет қаржысы есебінен 9,8 млрд.теңге бөлініп, 61,8 мың шаршы метр тұрғын үй пайдалануға берілді. Жыл соңына дейін тағы 45 мың шаршы метр тұрғын үй пайдалануға берілетін болады.
Жалағаш ауданында биыл 1800 шаршы метр 30 тұрғын үй берілуде.
Мұнымен қоса аймақ басшысы биыл жаңадан бой көтерген Рәміздер аллеясыны барып, жұмысын саралады. Бас мердігер «Айбар-Ш» ЖШС. Ту тұғырының ұзындығы 25 метр, Тудың ұзындығы 3,6 метр құрайды. Жалпы аллея 50 сотық жерде орналасқан.
<img src="https://kyzylorda-news.kz/wp-content/uploads/2021/12/fb_img_1640704277824.jpg" alt="" />
<img src="https://kyzylorda-news.kz/wp-content/uploads/2021/12/fb_img_1640704283358.jpg" alt="" />
<img src="https://kyzylorda-news.kz/wp-content/uploads/2021/12/fb_img_1640704287368.jpg" alt="" />
<img src="https://kyzylorda-news.kz/wp-content/uploads/2021/12/fb_img_1640704293198.jpg" alt="" />
<img src="https://kyzylorda-news.kz/wp-content/uploads/2021/12/fb_img_1640704296821.jpg" alt="" />

Жалағашта 30 тұрғын үй пайдалануға берілді

<a href="https://kyzylorda-news.kz/">Kyzylorda-news.kz.</a> Еркін күрестен Қазақстан құрамасының капитаны Дәулет Ниязбеков спорттағы мансабын аяқтады. Бұл туралы <a href="https://olympic.kz/">Olimpic.kz</a> сайты хабарлады. Ақпаратты Қазақстан құрамасының бас бапкері Әсет Серікбаев растады.&nbsp;
«Токио олимпиадасында алған жарақатым оңай соқпады. Еш ренішім жоқ. Шабатын жерге дейін шаптым. Күреске ықыласымды оятқан, жолымды ашқан, бар білігін үйреткен жаттықтырушыларыма алғыс айтқым келеді. Иә, күреске тоймай кетіп барамын. Олимпиада жүлдесін алсам деген арманым орындалмады. (…). Осы дәрежеге жеткенім үшін де Аллаға шүкір», – дейді ол.&nbsp;
Айта кетейік, Дәулет Ниязбеков 2012 жылы Лондон және биыл өткен Токио Олимпиадасында өнер көрсетті.

Қызылордалық Дәулет Ниязбеков спорттағы мансабын аяқтады

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова жұмыс сапарымен Қармақшы ауданына барды.
Сапар барысында аймақ басшысы Тәуелсіздіктің 30 жылдық мерейтойы аясында көпбалалы аналарға 10 пәтерлі 5 тұрғын үйдің кілтін табыстады. Жаңа үйлер «Нұрлы жер» мемлекеттік бағдарламасы аясында салынған. Бір тұрғын үйдің жалпы ауданы 136,6 шаршы метрді құрайды.
Облыс әкімі Тәуелсіздіктің 30 жылдығы және жаңа жыл мерекесіне орай құттықтауын жеткізіп, әрбір шаңырақтың шаттыққа бөленуін тіледі.
<blockquote>
 «Баршаңызды еліміздің ең басты ұлық мерекесі – қастерлі Тәуелсіздігіміздің 30 жылдығымен және келе жатқан Жаңа 2022 жылмен шын жүректен құттықтаймын! Баспанаға мұқтаж көпбалалы, аз қамтылған отбасылар үшін мемлекетімізде тиісті жағдайлар жасалғаны белгілі. Жаңа жыл қарсаңында көпбалалы аналарға қуаныш сыйлау мақсатында кезекте тұрған отбасыларға табыстағалы тұрмыз. Қоныс тойларыңыз құтты болсын!Шаңырақтарыңызға шаттық, отбастарыңызға құт-береке, амандық тілеймін», – деді Гүлшара Әбдіқалықова.
</blockquote>
Сонымен қатар аймақ басшысы жақында құрылысы аяқталған жаз-қыс мезгілдерінде балалар демалысына арналған лагерьді бағамдап көрді. 140 орындық жыл бойы жұмыс істейтін лагерде медпункт, клуб, асхана, ұлдарға және қыздарға арналған бөлек жатын орындары орналасқан корпустар, спорттық ойын алаңдары, автотұрақ, шаруашылық және бу қазандығы ғимараттары бар. Бас мердігер «Промстройсервис-Е» ЖШС. 
Облыс әкімі оқушыларды қабылдау процесіне қажетті қадамдарды іске асырып, танымдық бағыттағы жұмыстарды осы лагерь арқылы жандандыру қажеттігін атап өтті.
<img src="https://kyzylorda-news.kz/wp-content/uploads/2021/12/akim-karmakshy.jpg" alt="" />
<img src="https://kyzylorda-news.kz/wp-content/uploads/2021/12/karmakshy1.jpg" alt="" />
<img src="https://kyzylorda-news.kz/wp-content/uploads/2021/12/269852656_213424090978843_5121710046010575384_n.jpg" alt="" />
<img src="https://kyzylorda-news.kz/wp-content/uploads/2021/12/269796865_213424057645513_1739807677394550441_n.jpg" alt="" />
<img src="https://kyzylorda-news.kz/wp-content/uploads/2021/12/269766287_213424100978842_9121806378912595466_n.jpg" alt="" />
<img src="https://kyzylorda-news.kz/wp-content/uploads/2021/12/karmakshy3.jpg" alt="" />

Қармақшыдағы көпбалалы аналарға баспаналар берілді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова Арал ауданына жұмыс сапарымен барып, бірқатар өндірістік және әлеуметтік нысандардың жұмысымен танысты және аудан орталығында баспана алуға кезекте тұрған аз қамтылған, көпбалалы отбасыларға жаңа пәтер кілтін табыстады.
Аймақ басшысының жұмыс сапары Арал ауданаралық ауруханадан басталды. 150 орындық ауруханада 385 қызметкер жұмыс істейді, ал ұйымға 68 мыңға жуық аудан тұрғыны тіркелген.
Облыс әкіміне аурухананың бас дәрігері Марат Ршымбетов жаңадан сатып алынған компьютерлік томография мен жылжымалы медициналық кешенін көрсетті. Жылжымалы медициналық кешен «Өнеркәсіпті дамыту қоры» АҚ-мен 5 жылға қаржы лизингі шартымен алынған. Кешен хирургиялық, гинекологиялық, рентген, УЗИ, офтальмология, жалпы қабылдау бөлмелерімен зертхана осы заманғы медициналық қондырғылармен жабдықталған. Жаңа құрылғы арқылы шалғай елді мекендердің тұрғындарына медициналық көмек көрсететін болады.
Мұнан кейін аймақ басшысы «Aral Sea Food» ЖШС-нің «Балықты тереңнен өңдеу» жобасының жұмысымен танысып, кәсіпорындағы жаңа құрал-жабдықтарды көріп, мамандармен тілдесті. Жоба аясында жылына 4 мың тонна өнделген балықтың сүбесі шығарылып, ішкі нарыққа және ТМД елдеріне ұсынылады. Сондай-ақ, кәсіпорын ішінен балық ұнтағын шығаратын цех іске қосылды. Кәсіпорында қолданылатын технология еуростандарт бойынша мақұлданды. Нысанда 50 адам жұмыспен қамтылған.
Сондай-ақ, Гүлшара Әбдіқалықова Арал қаласында салынған 18 екі пәтерлі үйдің кілтін табыстап, баспана иелерін келе жатқан Жаңа жыл мен қоныс тойларымен құттықтады.
<blockquote>
 «Бүгін, міне, Жаңа жыл қарсаңында үй кезегінде тұрған Арал тұрғындарына үйлердің кілтін табыстағалы тұрмыз. Қазан айында ғана біз осы маңдағы 1 қабатты 4 пәтерлі тұрғын үйлердің кілтін берген болатынбыз. Белгілі меценат Болат Өтемұратов Арал өңіріндегі қуаңшылық мәселесімен қатар, тұрғындардың әлеуметтік жағдайына да назар аударып, бірнеше отбасының баспаналы болуына демеушілік жасады. Бүгінгі таңда осы тұрғын үйлердің құрылысы аяқталып, барлық жағдайы жасалған жайлы баспана пайдалануға беріліп отыр. Тұрғындарға қуаныш сыйлаған құрылысшыларға, жұмысшыларға зор ризашылығымызды білдіреміз. Шаңырақтарыңызға шаттыққа толып, құт-береке кетпесін! Еліміз еңселі, Тәуелсіздігіміз мәңгілік болсын!», – деді облыс әкімі.
</blockquote>
Іс-шара барысында 10 көпбалалы, аз қамтылған отбасыға пәтер кілті табысталды.
Облыс әкімі жаңа пәтер алған көпбалалы ана Нұргүл Еділбаеваның үйін көріп, қоныс той иелерін құттықтады және оларға ас үй жиһазын сыйға тартты. Баспанаға қолы жеткен Нұргүл жолдасы Нұрболат екеуі де жұмыссыз, 7 бала тәрбиелеп отыр.
Айта кетейік, Тәуелсіздік алған жылдан бері Арал ауданында 324 697 шаршы метрді құрайтын тұрғын үй пайдалануға беріліп, 180 жас маман тұрғын үймен қамтамасыз етілді. Мұнан бөлек, ауданға қарасты шалғай елді мекендерде жаңадан 6 дәрігерлік-амбулатория, 1 фельдшерлік-акушерлік пункт, 7 медициналық бекет пен 38 білім ошағы жаңадан салынды. 4 мәдениет үйі, 2 клуб және 2 музей аудан халқына рухани қызмет етуде. Сондай-ақ, бұқаралық спортты дамыту бағытында ауданда 2 спорттық кешен, 1 стадион, 35 спорттық алаң пайдалануға берілсе, 3 спорт кешенінің құрылысы жүруде.
Әрі қарай облыс әкімі Жақсықылыш кентінде орналасқан «Аралтұз» АҚ ас тұзы және техникалық тұз өндірісінің жұмысымен танысты. Жұмысшылармен кездесіп, пікірлесті. Кәсіпорынның индустрияландыру бағдарламасы аясында 2014 және 2016 жылдары ашылған 2 цех «Construcciones Mecanicas J.SERRA,S.A.» испан технологиясы бойынша шығарылатын өнім отандық нарықта сатылады және ТМД елдеріне экспортталады. Қазіргі таңда нысанда үшінші цех пайдалануға беріліп, өндірістің қуаты 350 мың тоннадан 600 мың тоннаға дейін ұлғайтылды. Кәсіпорында мыңға жуық жұмысшы істейді.
Жұмыс сапары соңында аймақ басшысы Аралқұм ауылдық округіне қарасты Шөміш елді мекеніндегі «Aral Quartz» ЖШС-ның кварц құмын байыту бойынша тау-кен комбинатының І кезеңін іске қосу рәсіміне қатысты. Комбинат жылына 120 мың тонна байытылған кварц концентраты мен құрғақ құрылыс ұнтақтарын өндіреді, нысанда 70 жаңа жұмыс орын құрылды. Дайын өнімнің 30% ішкі нарыққа, 70% экспортқа шығарылады. 
Айта кетейік, комбинат өндіретін кварц құмы жуырда жұмысын бастаған шыны зауытының өндірісінде қолданылмақ. Бұл өнімге шетелден де сұраныс жоғары. Жобаның екінші кезеңінде цех қуаттылығын арттыру және өнім түрлерін көбейту мақсатында жаңа нысанның құрылысы басталды.
Аймақ басшысы жаңа өндірістің жұмысына сәттілік тілеп, цехты іске қосты.
<img src="https://kyzylorda-news.kz/wp-content/uploads/2021/12/koz.jpg" alt="" />
<img src="https://kyzylorda-news.kz/wp-content/uploads/2021/12/med.jpg" alt="" />
<img src="https://kyzylorda-news.kz/wp-content/uploads/2021/12/aral1.jpg" alt="" />
<img src="https://kyzylorda-news.kz/wp-content/uploads/2021/12/aral3.jpg" alt="" />
<img src="https://kyzylorda-news.kz/wp-content/uploads/2021/12/balyk1.jpg" alt="" />
<img src="https://kyzylorda-news.kz/wp-content/uploads/2021/12/balyk-2.jpg" alt="" />
<img src="https://kyzylorda-news.kz/wp-content/uploads/2021/12/twz.jpg" alt="" />
<img src="https://kyzylorda-news.kz/wp-content/uploads/2021/12/twz1.jpg" alt="" />
<img src="https://kyzylorda-news.kz/wp-content/uploads/2021/12/taw3.jpg" alt="" />
<img src="https://kyzylorda-news.kz/wp-content/uploads/2021/12/taw2-1.jpg" alt="" />

Арал ауданында 36 пәтер кілті беріліп, жаңа өндіріс орны ашылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында 15-16 желтоқсан күндері «Inno.Fest» Qyzylorda инновациялық идеялар фестивалі өткен болатын. «Цифрлық Қазақстан» мемлекеттік бағдарламасын жүзеге асыру және облыс тұрғындарының IT-саласына қызығушылығын арттыру және инновациялық IT жобаларды қолдау мақсатында өткен республикалық фестивальді ұйымдастырушылар Өңірлік коммуникациялар қызметінің баспасөз алаңында брифинг өткізіп, шараны қорытындылады.
Бұл іс-шара жаңа перспективалы инновациялық IT жобаларды анықтауға, өз идеясын жүзеге асыруға, ресурстарды, инвесторларды табуға, жобаны көпшілікке ұсынуға мүмкіндік береді.
<blockquote>
 «Фестивальде 1500-ге жуық қатысушы мен 200-ге жуық команда тіркелді. Фестивальге облыс жастарынан басқа Нұр-Сұлтан, Шымкент, Байқоңыр қалаларынан және Түркістан облысынан қатысушылар да қатысты. Жүлде қоры 2 400 000 теңгені құрады. Фестиваль қорытындысы бойынша әр секциядан 3 команда жеңіске лайық деп танылды. Әр жеңімпаз командаға 1 орын – 300 000 теңге, 2 орын – 200 000 теңге, 3 орын-100 000 теңге сертификаттары табысталды. Сонымен қатар, Қорқыт Ата атындағы Қызылорда университеті ректорының грантын «Кемеңгер», «IT жастары», «Эксклюзив», «Target», командаларынан 4 қатысушы, «Болашақ» университеті ректорының грантын «Smart Qyzylorda» секциясында бақ сынаған «Respond» командасының 4 қатысушы иеленді және «Болашақ» университеті таңдауы бойынша «Үздік жоба» номинациясы және 50 000 теңге сертификатпен «Ауыл teenagers» және «Falcon» командалары марапатталды», – деді «Ақпараттық технологиялар орталығы» КММ директоры Сәбит Ибадулла.
</blockquote>
«Ақпараттық технологиялар» секциясындағы «WinX» және «Nauan Engуneering» командалары Нұрсұлтан Назарбаев қорынан арнайы рюкзактарға (powerbank, фирмалық киім, сымсыз құлаққаптар, bottle) ие болды. Фестивальдің ең жас қатысушысы Қармақшы ауданы Т.Көмекбаев ауылынан 6 жасар Бағдәулет Ерболатұлына арнайы сыйлық берілді. Сонымен қатар, фестиваль барысында ерекшеленген командаларға фестиваль ұйымдастырушысы «Ақпараттық технологиялар орталығы» КММ атынан бағалы сыйлықтар табысталды.
Аstana Hub халықаралық технопаркі және Қызылорда қаласының IT паркімен бірлесіп, жүлделі орындарға ие болған жобаларды, сондай-ақ грант иегерлерін одан әрі дамыту жоспарлануда. Сонымен қатар, фестивальдің барлық қатысушыларына Қызылорда IT паркінде бағдарламалау бойынша курстарға 70% жеңілдік беріледі.

«Inno.Fest» Qyzylorda: Фестивальде 1500 қатысушы мен 200 команда тіркелді

Kyzylorda-news.kz. Фараби Болатұлы екінші мәрте әлем чемпионы атанды.
22-25 желтоқсан күндері аралығында Сербия мемлекетінің астанасы Белград қаласында өткен әмбебап жекпе-жектен әлем чемпионатында №19 Арал ауданының олимпиадалық резервтің балалар-жасөспірімдер мектебінің әмбебап жекпе-жек бөлімшесінің жаттықтырушысы, халықаралық дәрежедегі спорт шебері Фараби Сауытбаев финалдық жекпе-жекте Ресей құрамасының спортшысынан басым түсіп екінші мәрте әлем чемпионы атанды.
Атап өту қажет, жерлесіміз бұған дейін 2019 жылы Ресей Федерациясы, Анапа қаласында Әмбебап жекпе-жегі және пышақ лақтырудан ересектер арасында өткен Әлем чемпионатына қатысып 60кг салмақ дәрежесінде әлем чемпионы атанған болатын.
Қазақстан Республикасының «Спорт шебері» (грэпплингтен), Әмбебап жекпе-жек және пышақ лақтырудан ҚР-ның «Халықаралық дәрежедегі спорт шебері», жеңімпаз спортшымыз бүгінде Арал ауданының олимпиадалық резервтің мамандандырылған балалар-жасөспірімдер мектебінің әмбебап жекпе-жегі бөлімшесінде жаттықтырушы болып абыройлы қызмет жасап келеді. 
Бүгінде спорт шебері бапкерлік карерасында ауданымыздың жасөспірім спортшылары арасынан онға жуық ҚР чемпиондарын тәрбиелеп шығарған.

Қазақстан және Қызылорда облысының жаңалықтары: Басты жаңалықтар old