Kyzylorda-news.kz Бүгін «AMANAT» партиясының қалалық филиалының жанындағы партиялық бақылау комиссиясының мүшелері «Ауыл аманаты» жобасы аясында ашылған кәсіпкерлік жұмыстарын саралады.
Солардың бірі – «Ерниязова» жеке кәсіпкерлігі. Жоба аясында 8,6 млн. теңге қаражат алған кәсіпкер жартылай фабрикатталған өнім шығаруда.
Бүгінде қаладағы «Балқаймақ, Дәстүр» сынды ірі дүкендерге өз өнімдерін ұсынуда.
Алғашқыда Сабалақ саяжайында өз цехіміздің жұмысын бастадық. Бірақ, тұтынушыларға қатынау қолайсыз болғандықтан қала орталығынан ғимарат нысанын жалдадық. Соның арқысында, өз өнімдеріміз де тез өтуде. Бүгінде 3 адамды жұмыспен қамтып отырмыз. «Ауыл аманаты» секілді жобалардың көбейіп, халыққа жақсы жағдай жасалғанын қалаймыз. Жоба аясында 6 ай несие каникулы да бар. Ендігі кезекті несиемді де төлеуді бастаймын. Бүгінде 28-ден аса өнім шығарып отырмыз,-деді Гүлзира Ерниязова.
Айта кетейік, «Ауыл аманаты» жобасы аясында өткен жылы 253,1 млн. теңгеге 27 жоба несиелендірілген болатын. Оның ішінде, өңдеу өнеркәсіп саласында 14 жобаға 112, 859 млн. теңге, мал шаруашылығында 7 жобаға 74,4 млн. теңге, егін шаруашылығында 5 жобаға 55,2 млн. теңге және қызмет көрсету саласында 1 жобаға 8,6 теңге бағытталды.
Жалпы қаржыландырылған 27 жобаның 25 толық іске асырылды.
