<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің 3-курс студенті Шапағат Сағадатқызы «Орхун» академиялық ұтқырлық бағдарламасы аясында Түркияның Конья қаласындағы Селжук университетінде білім алуда. Ол аталған университеттің Әдебиет факультетінде (Edebiyat Fakültesi) психология мамандығы бойынша оқуын жалғастырып, шетелдегі студенттік тәжірибесімен бөлісті.Шапағат университетке оқуға қабылданған сәттен бастап академиялық ұтқырлық бағдарламасына қызығушылық танытқан. Қорқыт ата атындағы Қызылорда университеті ұсынған мүмкіндікті тиімді пайдаланып, білімін жетілдіруді және өзін жаңа ортада сынап көруді мақсат еткен.<blockquote>«Түркияға келген сәтте жүрегімде қуаныш пен қобалжу қатар болды. Жаңа ел, жаңа орта, жаңа армандар – бәрі ерекше сезім сыйлады. Сол кезде үлкен арманыма қарай алғашқы қадамымды жасағанымды түсіндім», – дейді ол.</blockquote>Селжук университетіндегі дәрістер түрік тілінде жүргізіледі. Шапағат сапар алдында арнайы тілдік курстарға қатысып, түрік тілін меңгеру арқылы жаңа білім беру ортасына алдын ала дайындалған. Бұл оның оқу үдерісіне еркін араласып, шетелдік білім беру жүйесіне бейімделуіне мүмкіндік берді.Студентке түрік халқының қонақжайлығы, ақжарқын мінезі мен мейірімділігі ерекше әсер қалдырған. Оның айтуынша, шетелде білім алу жаңа мәдениетпен танысуға, дүниетанымын кеңейтуге және өмірге өзгеше көзқараспен қарауға ықпал еткен.Оқудан бос уақытында Шапағат Түркияның көрікті жерлерін аралап, елдің тарихи-мәдени және табиғи ерекшеліктерімен танысқан. Ол Конья қаласымен қатар, таңғажайып табиғатымен танымал Каппадокия мен көгілдір теңізі, әсем жағажайларымен ерекшеленетін Фетхиеге саяхаттаған.<blockquote>«Академиялық ұтқырлық – мен үшін білім мен жарқын естеліктерді тоғыстырған ерекше мүмкіндік. Бұл бағдарлама арқылы өзімді жаңа қырымнан танып, дүниетанымымды кеңейттім, өзге мәдениетті түсінуді және жаңа ортаға бейімделуді үйрендім. Сондай-ақ өз күшіме сеніп, армандарыма бір қадам жақындай түстім», – дейді Шапағат.</blockquote>Ол университет студенттерін академиялық ұтқырлық бағдарламаларына белсенді қатысып, өзге елде білім алуға және жаңа мүмкіндіктерді пайдалануға шақырады. Шапағаттың пікірінше, академиялық ұтқырлық – жай ғана саяхат емес, білім мен тәжірибеге, жаңа орта мен ұмытылмас естеліктерге бастайтын маңызды қадам.

Шапағат Сағадатқызы шетелдегі студенттік тәжірибесімен бөлісті

<a href="https://kyzylorda-news.kz/">Kyzylorda-news.kz</a> Қызылорда қаласындағы Назарбаев Зияткерлік мектебінің оқушылары Айшабиби Ерланқызы мен Гайнижамал Берікқызы жасанды интеллект негізінде жұмыс істейтін QOLDAU AI веб-платформасын әзірледі. Жоба ым-ишараны нақты уақыт режимінде танып, оны мәтін мен дыбыстық хабарламаға айналдыруға мүмкіндік береді. Оқушылар өз әзірлемесін алғаш рет Қызылорда қаласындағы есту қабілеті бұзылған балаларға арналған №6 арнайы мектеп-интернатында сынақтан өткізді.Платформаны пайдалану үшін қарапайым веб-камера мен интернетке қосылу жеткілікті. Жүйе қазақ ым тіліндегі ишараларды танып, оларды мәтіндік және дыбыстық форматқа түрлендіреді. Бұл есту қабілеті бұзылған адамдардың айналасындағылармен қарым-қатынас жасауын жеңілдетуге бағытталған. Сонымен қатар пайдаланушыларға қосымша бағдарламалар орнатудың қажеті жоқ.<img src="https://knadmin.beoblood.kz/uploads/NI_Sh_be678b67ce.jpeg" alt="НИШ..jpeg">Сынақ барысында мектеп-интернат тәрбиеленушілері платформаны қолданып көріп, өз әсерлерімен бөлісті. Педагогтер жобаның тәжірибелік маңызын атап өтіп, жүйе танитын ым-ишаралар қорын кеңейтуді ұсынды. Сондай-ақ олар бұл технологияның балалардың жазбаша сөйлеу дағдыларын дамытуға қосымша құрал бола алатынына назар аударды.<blockquote>– Мамандар мен ата-аналарға пайдалы көмекші бола алатын осындай платформа әзірлегені үшін оқушыларға алғысымды білдіремін. Ым-ишара тіліндегі кейбір қимылдарды нақтылап, жетілдіру қажет. Алдағы уақытта платформада оқыту материалдары мен бейнесабақтардың көбірек болғанын қалаймыз, – деді ым-ишара тілі маманы Зухра Қалжанова.</blockquote><img src="https://knadmin.beoblood.kz/uploads/Whats_App_Image_2026_10_22_at_14_09_16_5a52bde91c.jpeg" alt="НИШ">QOLDAU AI жобасын жетілдіру жұмыстары физика пәнінің мұғалімі Айнұр Құрақбаева мен Қызылорда қаласындағы NIS директорының ғылыми-әдістемелік жұмыс жөніндегі орынбасары Мадина Рашитованың жетекшілігімен жалғасуда. Сынақ кезінде алынған пікірлер мен ұсыныстар оқушыларға платформаны болашақ пайдаланушылардың қажеттіліктеріне сай жетілдіруге мүмкіндік береді.Жаңа технологияны таныстыру екі білім беру ұйымы арасындағы кездесудің бір бөлігі болды. NIS оқушылары Республика күніне орай мектеп-интернат тәрбиеленушілеріне арнап «Қазақстан – менің мақтанышым» атты сурет байқауын да ұйымдастырды. Балалар туған елдің мәдениеті, салт-дәстүрлері мен көрікті жерлерін бейнелейтін акварель жұмыстарын ұсынды. Байқау жеңімпаздары мектеп-интернат тәрбиеленушілері дайындаған концерттік бағдарлама аясында марапатталды.<img src="https://knadmin.beoblood.kz/uploads/NI_Sh_f688f56cd0.jpeg" alt="НИШ.jpeg"><img src="https://knadmin.beoblood.kz/uploads/NI_Sh_1add01c747.jpeg" alt="НИШ.jpeg">

Қызылордалық NIS оқушылары ым-ишара тілін аударатын жасанды интеллект платформасын әзірледі

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде сот медицинасы саласының ардагері, «Алтын дәрігер» төсбелгісінің иегері Қамбар Сексеновтің 70 жылдық мерейтойы қарсаңында «Сот медицинасы» дәрісханасының салтанатты ашылу рәсімі өтті.Осы салаға 47 жылға жуық ғұмырын арнаған Қамбар Өмірзақұлының кәсіби жолы осы саланың даму тарихымен тығыз байланысты. Мерейтой иесінің құрметіне ашылған дәрісхана білім алушылардың сот медицинасы бағытындағы білімін жетілдіруге және тәжірибе мен білім сабақтастығын нығайтуға мүмкіндік береді.Салтанатты ашылу рәсімінде университеттің Басқарма мүшесі – академиялық мәселелер жөніндегі проректор Дана Абдрашева мерейтой иесін құттықтап, оның еңбек жолындағы жетістіктерін атап өтті.Қызылорда облысы Әділет департаментінің басшысы Баукен Әлмеш Қамбар Сексеновке құрмет грамотасын табыстады. Ал Қазақстан Республикасы Әділет министрлігі Сот сараптамалары орталығының Қызылорда облысы бойынша сот сараптамалары институтының директоры Ержан Фархадұлы Орталық директоры Бақытжан Байтілесовтің атынан құттықтауын жеткізді.Сондай-ақ Қырғыз Республикасы Жүсіп Баласағұн атындағы Қырғыз ұлттық университетінің профессоры, заң ғылымдарының докторы Бактыбек Батырбаев университет ректоры Догдурбек Чонтоевтің құттықтауын табыстады. Қамбар Өмірзақұлының әріптесі, отставкадағы полиция полковнигі Қошманов Максұт Ахметұлы да мерейтой иесіне ізгі тілегін білдірді.Жаңа дәрісхана болашақ заңгерлердің білімін тереңдетуге, сот медицинасы саласының ерекшеліктерін меңгеруіне және кәсіби даярлығын арттыруға үлес қосады. Сонымен қатар бұл бастама сала ардагерлерінің еңбегін ұлықтап, кейінгі ұрпаққа өнеге етуге бағытталған.<img src="https://knadmin.beoblood.kz/uploads/Whats_App_Image_2026_10_16_at_23_14_59_1_025659380a.jpeg" alt="коркыт"><img src="https://knadmin.beoblood.kz/uploads/Whats_App_Image_2026_10_16_at_23_15_00_d0b0c5fe18.jpeg" alt="коркыт ">

Қорқыт ата университетінде «Сот медицинасы» дәрісханасы ашылды

<a href="https://kyzylorda-news.kz/">Kyzylorda-news.kz</a> Қызылорда қаласында «BILIM TOUR» білім беру жобасы өтеді. Жоба аясында 10-11 сынып оқушылары тәжірибелі ҰБТ сарапшыларынан пән бойынша тегін сабақ алып, мамандық таңдау мен жоғары оқу орнына түсу бойынша кәсіби бағдар ала алады.&nbsp;«BILIM TOUR» – жоғары сынып оқушыларына ҰБТ-ға дайындық барысында практикалық көмек көрсетуге және мамандық таңдауда кәсіби бағдар беруге бағытталған әлеуметтік білім беру жобасы. &nbsp;Жоба қатысушыларына ҰБТ дайындығына арналған оқу материалдары тегін таратылады. Сондай-ақ оқушылар арасында дайындық курстарына жолдамалар мен оқу құралдары ойнатылады. «BILIM TOUR» жобасы аясында табысталатын сыйлықтардың жалпы құны 3 миллион теңгені құрайды.Жобаны 2021 жылдан бері оқушыларды ҰБТ-ға дайындап келе жатқан «Glucose» білім беру орталығы ұйымдастырады. Қызылордадан кейін Bilim tour Қазалы, Жетісай және Шымкент қалаларында жалғасып, өңір оқушыларына тегін дайындық сабақтары мен кәсіби бағдар алу мүмкіндігін ұсынады.

Қызылорда қаласында «BILIM TOUR» білім беру жобасы өтеді

<a href="https://kyzylorda-news.kz/">Kyzylorda-news.kz</a> Қазақстан ұлттық құрамасы Корея Республикасының Инчхон қаласында өткен FIRST Global Challenge 2026 халықаралық спорттық робототехника чемпионатында әлемдік рейтингтің үздік төрттігіне енді. Байқауға әлемнің 185 елінен командалар қатысты. Бұл туралы Оқу-ағарту министрлігі мәлім етті.Қазақстандық оқушылар іріктеу кезеңіндегі 11 кездесудің барлығында жеңіске жетіп, плей-офф кезеңіне жолдама алды. Жарыс қорытындысы бойынша ұлттық құрама әлемдік рейтингте төртінші орынға ие болып, инженерлік дайындық пен командалық жұмыстың жоғары деңгейін көрсетті.Қазақстан құрамасы бұған дейін төрт жыл қатарынан FIRST Global Challenge чемпионатының жеңімпазы атанған болатын. Биылғы нәтиже де отандық оқушылардың халықаралық аренадағы бәсекеге қабілеттілігін тағы бір мәрте дәлелдеді.Ұлттық құрама сапында Алматы қаласындағы М. Ганди атындағы №92 мектеп-лицейінің 9–11-сынып оқушылары Хусейн Мақсұт, Нұртас Серік, Аспандияр Бердали және Арнур Абдулла, сондай-ақ Ы. Алтынсарин атындағы №159 гимназиясының оқушысы Ерасыл Ендібай өнер көрсетті.Ұлттық құрама Оқу-ағарту министрлігінің «Дарын» республикалық ғылыми-практикалық орталығы мен USTEM Foundation қоғамдық қоры бірлесіп ұйымдастырған іріктеу нәтижесінде жасақталды. Бұл жұмысқа Жасанды интеллект және цифрлық даму министрлігі, Astana Hub халықаралық инновациялық кластері қатысып, Astana Motors құрамындағы OMODA &amp; JAECOO брендтері қолдау көрсетті.Сурет: Оқу-ағарту министрлігі

Қазақстандық жас робототехниктер әлемнің үздік төрттігіне енді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінде «Kyzylorda-news.kz» ақпараттық агенттігінің алғашқы бас редакторы Елібай Жікібаевтың туғанына 70 жыл толуына арналған «Аймақтық ақпараттық агенттіктерді ЖИ технологиялары арқылы дамыту, модернизациялау және бәсекеге қабілеттілігін арттыру стратегиялары» атты ғылыми жоба байқауының қорытынды отырысы өтті.Байқаудың негізгі мақсаты – жасанды интеллект технологияларын аймақтық журналистикада тиімді пайдалану жолдарын қарастыру, студенттердің инновациялық идеяларын қолдау және ақпараттық агенттіктердің жұмысын жетілдіруге бағытталған ғылыми-практикалық ұсыныстарды саралау.Жиынға Қорқыт ата атындағы Қызылорда университетінің журналистика мамандығының оқытушылар құрамы, студенттері, «Сыр медиа» ЖШС басшылығы, «Kyzylorda-news.kz» АА ұжымы және Елібай Зұлқарнайұлының әйелі Ұлтусын Агбаева мен бауырлары қатысты.Жиынның ашылуында Қорқыт ата атындағы Қызылорда университетінің «Қазақ тілі мен әдебиеті және журналистика» білім беру бағдарламасының жетекшісі, аға оқытушы, филология ғылымдарының кандидаты Гүлзира Оралова мен «Сыр медиа» ЖШС бас директоры Марат Аралбаев сөз сөйлеп, байқаудың маңызына тоқталды. Олар Елібай Зұлқарнайұлының кәсіби маман ретіндегі қызметі жайлы айтып, журналистика саласындағы цифрлық өзгерістерге бейімделудің, заманауи технологияларды меңгерудің және болашақ мамандардың кәсіби әлеуетін арттырудың өзектілігін атап өтті.Іс-шараның маңызды бөлігі Елібай Зұлхарнайұлы Жікібаевтың өмірі мен кәсіби қызметіне арналды.2011 жылы Қызылорда облысында қазақ және орыс тілдерінде жарық көрген «Kyzylorda-news.kz» интернет басылымы өңірдегі жаңа медианың қалыптасуына үлес қосты. Басылымның негізгі идеясының авторы – белгілі журналист, филология ғылымдарының кандидаты Аманжол Оңғарбаев. Ал интернет газеттің алғашқы бас редакторы қызметіне журналист, сол кезеңде «Караван» газетінің Қызылорда облысындағы меншікті тілшісі болған Елібай Жікібаев тағайындалды.Ол кезде интернет басылымдардың жұмысы енді қалыптасып, әлеуметтік желілер бүгінгідей кең таралмаған. Осындай кезеңде жаңа ақпараттық жобаның жұмысын жолға қою, редакциялық ұжымды қалыптастыру және жедел ақпарат тарату ісін ұйымдастыру үлкен жауапкершілікті талап етті. Елібай Зұлқарнайұлы журналистикадағы мол тәжірибесін осы міндеттерді орындауға жұмсап, өңірлік интернет басылымның дамуына еңбек сіңірді.Кездесу барысында Елібай Жікібаевпен бірге еңбек еткен Насреддин Бахманов естеліктерін бөлісті. Сондай-ақ «Сыр бойы» газетінің бас редакторы, Қазақстан Журналистер одағының Қызылорда облыстық филиалының төрағасы Қуат Шарабидинов журналистің кәсіби болмысы мен әріптестік қарым-қатынасы туралы пікір білдірді. Естеліктерде Елібай Жікібаевтың журналистикаға адалдығы, жауапкершілігі және жаңа ақпараттық жобаларды жүзеге асырудағы еңбегін атап өтті.Айта кетейік, аталған байқауға Қорқыт ата атындағы Қызылорда университеті Гуманитарлық-педагогикалық институтының «Қазақ тілі мен әдебиеті және журналистика» білім беру бағдарламасы бойынша журналистика мамандығында білім алатын 3–4-курс студенттері қатысты.<img src="https://knadmin.beoblood.kz/uploads/Whats_App_Image_2026_10_13_at_18_32_34_18a84abe73.jpeg" alt="Ғылыми жоба.jpeg">Байқау талаптарына сәйкес, қатысушылар журналистика және медиаменеджмент, IT, дата-журналистика, инновациялық шешімдер мен контент әзірлеу бағыттары бойынша ғылыми жобаларын ұсынды. Жобаларда аймақтық ақпараттық агенттіктердің жұмысын жетілдіру, редакциялық үдерістерге заманауи технологияларды енгізу және медиа өнімдерінің сапасын арттыру мәселелеріне басымдық берілді.Байқауға барлығы сегіз жоба келіп түсті. Сараптау қорытындысы бойынша олардың ішінен төрт жоба іріктеліп, авторлары қорытынды жиында өз жұмыстарын таныстырды.Жобаларды бағалау комиссиясының төрағасы Жәнібек Исаев байқауды сараптау жұмыстары туралы сөз сөйледі. Ол жасанды интеллектіні медиа саласына енгізудің теориялық негіздерімен қатар, оның нақты редакциялық міндеттерді шешудегі қолданбалы маңызын атап өтті.Байқау қорытындысы бойынша 3-орынды Ж-24-1 оқу тобының студенті Қарақат Медетқызы, 2-орынды Ж-23-3 оқу тобының студенті Зейнеп Сәрсенмұратова, 1-орынды Ж-23-1 оқу тобының студенттері Ақбота Сейтқасымова мен Ердос Есқали иеленді. Жеңімпаздарға диплом және қаржылай сыйлық табысталды. Басқа қатысушылар Алғыс хатпен марапатталды.Елібай Жікібаевтың 70 жылдығына арналған байқау оның журналистика саласындағы еңбегін еске алумен қатар, кейінгі буынның кәсіби ізденісіне жол ашты.Мұндай іс-шаралар университет пен «Сыр медиа» ЖШС арасында ғылыми және тәжірибелік жұмысты жалғастыруға, студенттердің тың идеяларын қолдауға және өңірлік журналистиканы заманауи талаптарға сай дамытуға мүмкіндік береді.<img src="https://knadmin.beoblood.kz/uploads/Whats_App_Image_2026_10_13_at_18_32_40_1b1dedeb3d.jpeg" alt="Ғылыми жоба.jpeg">Сурет: Нұрболат Нұржаубай

Қорқыт ата атындағы Қызылорда университетінде ғылыми жоба байқауының қорытынды отырысы өтті

<a href="https://kyzylorda-news.kz/">Kyzylorda-news.kz</a> Премьер-министрдің орынбасары – Ұлттық экономика министрі Серік Жұманғарин Үкімет отырысында осы жылдың 9 айындағы әлеуметтік-экономикалық даму туралы баяндама жасады, деп хабарлайды <a href="https://baq.kz/qazaqstan-ekonomikasy-zhyl-basynan-42-ga-osti-320049086/">BAQ.KZ тілшісі.</a>Айтуынша, биыл экономика бірқатар тежеуші факторлар жағдайында дамуда.Біріншіден, бұл мұнай өндірісінің азаюы және мұнай секторының жалпы ішкі өнімнің өсуіне теріс үлесі. Биыл 9 айдың қорытындысы бойынша мұнай өндіру 8,3%-ға қысқарып, 69,4 млн тоннаны құрады. Екіншіден, теңгенің нығаюы экспортқа бағдарланған салалар мен бюджет кірістеріне тежегіш әсер етуде. Үшіншіден, тұтынушылық кредиттеу өсуінің баяулауы тұтынушылық сұранысты тежеуде, - деп атап өтті вице-премьер.Айта кетерлігі, жылдық мәнде тұтынушылық кредиттердің өсуі 2025 жылғы тамыздағы 26,4%-дан ағымдағы жылғы тамызда 10,4%-ға дейін төмендеген.<blockquote>Аталған факторларға қарамастан, Қазақстан экономикасы өсуін жалғастыруда және оң динамиканы көрсетуде. Тоғыз айдың қорытындысы бойынша экономиканың өсуі 4,2%-ды құрады. Экономиканың өсуі шикізатқа қатысты емес сектор есебінен қамтамасыз етілді, ол бағалау бойынша 5,4%-ға өсті. Салалар арасында құрылыс, өңдеу өнеркәсібі, көлік қызметтері және сауда ең жоғары қарқын көрсетуде. Осы салалардың жалпы ішкі өнімнің өсуіне қосқан жиынтық үлесі 75%-дан асады, - деді Серік Жұманғарин.</blockquote>Сурет: shutterstock

Қазақстан экономикасы жыл басынан бері 4,2%-ға өсті

<a href="https://kyzylorda-news.kz/">Kyzylorda-news.kz</a> Жалағаш ауданында 2026 жылдың алғашқы жартыжылдығында әлеуметтік-экономикалық даму көрсеткіштері оң нәтижемен қорытындыланды. Бұл туралы Өңірлік коммуникациялар қызметінің ақпарат алаңында өткен баспасөз конференциясында аудан әкімі Ардақ Ибраимов мәлімдеді.Жыл басынан бері аудан экономикасының негізгі бағыттарында тұрақты өсім қалыптасты. Өнеркәсіп өнімінің көлемі 110,7 пайызға, өңдеу өнеркәсібі 100,1 пайызға, инвестициялар көлемі 113,2 пайызға жетті. Сонымен қатар бөлшек сауда, ауыл шаруашылығы, құрылыс және тұрғын үй пайдалануға беру көрсеткіштері де жоспардан жоғары орындалған.<blockquote>«Бірінші жартыжылдықта аудан бюджеті нақтыланып, толық көлемде игерілді. Бұл инфрақұрылымдық және әлеуметтік жобаларды уақытылы жүзеге асыруға мүмкіндік берді. Кәсіпкерлікті қолдау бағытындағы жұмыстар да жалғасуда. Бүгінде ауданда 2541 шағын және орта кәсіпкерлік субъектісі тіркелсе, оның 2471-і тұрақты жұмыс істеп тұр. Қаржы институттары арқылы кәсіпкерлердің 56 жобасы қаржыландырылды. Ауыл тұрғындарының табысын арттыруға бағытталған «Ауыл аманаты» жобасы аясында биыл 37 жоба қаржыландырылып, 39 жаңа жұмыс орны ашылды», - деді аудан әкімі.</blockquote>Өңірдегі ең ауқымды жобалардың бірі швейцариялық «Харвест Агро Холдинг» компаниясының техникалық қарасора, жүгері және мақсары өсіру әрі қайта өңдеу жобасы. Жалпы құны 68 млрд теңгені құрайтын өндіріс іске қосылғанда жыл сайын ондаған мың тонна ауыл шаруашылығы өнімі өндіріліп, өңделетін болады. Биылдың өзінде компания 26,3 млрд теңге инвестиция салып, 7 мың гектар алқапқа егіс орналастырып, 142 жаңбырлатып суару қондырғысын іске қосқан. Қазіргі таңда жоба аясында 100 адам тұрақты жұмыспен қамтылған.Бұдан бөлек, ауданда жалпы құны 70 млрд теңгені құрайтын алты инвестициялық жоба жоспарланып, оның бесеуі іске асырылды. Нәтижесінде 120 жаңа жұмыс орны құрылды.<blockquote>«Мемлекет басшысы мен Үкіметтің, облыс әкімдігінің қолдауының арқасында аудан экономикасында тұрақты өсім қалыптасты. Инвестициялық жобалар өндірісті әртараптандыруға, жаңа жұмыс орындарын ашуға және тұрғындардың әл-ауқатын арттыруға мүмкіндік беріп отыр. Алдағы уақытта бұл бағыттағы жұмыстар жалғасын табады», – деді аудан әкімі Ардақ Ибраимов.</blockquote><figure class="image"><img src="https://knadmin.beoblood.kz/uploads/zhala_ash_kimi_5358095635.jpg" alt="жалағаш әкімі брифинг .jpg"></figure>Фото: pixabay

Жалағашта инвестициялық жобалар қарқын алды

<a href="https://kyzylorda-news.kz/">Kyzylorda-news.kz</a> Шиелі ауданында соңғы үш жылда ауданның өз кірісі 5,3 млрд теңгеден 7,5 млрд теңгеге дейін өсіп, 141 пайыздық өсім көрсетті. Бұл қаражат әлеуметтік нысандарды дамытуға және тұрғындардың әл-ауқатын арттыруға бағытталуда. Сонымен қатар облыс әкімінің тапсырмасына сәйкес салық түсімдерін ұлғайту мақсатында арнайы жұмыс топтары тұрақты жұмыс жүргізуде. Бұл туралы Өңірлік коммуникациялар қызметінің ақпарат алаңында өткен баспасөз конференциясында Шиелі ауданының әкімі Айтбай Жандарбеков таныстырды.<blockquote>«Жыл басынан бері аудан экономикасының негізгі макроэкономикалық көрсеткіштері де оң нәтижеге қол жеткізді. Өнеркәсіп өнімінің көлемі 44 млрд 6 млн теңгені, өңдеу өнеркәсібі 37 млрд 848 млн теңгені құрады. Ауыл шаруашылығы саласында 5 млрд 711 млн теңгенің өнімі өндіріліп, өткен жылдың сәйкес кезеңімен салыстырғанда 105,1 пайызға орындалды. Инвестиция тарту көлемі өткен жылдың сәйкес кезеңінен 105,2 пайызға артты. Осы кезеңде 37 мың 753 шаршы метр тұрғын үй пайдалануға беріліп, бұл көрсеткіш өткен жылмен салыстырғанда 104,5 пайызды құрады. Бөлшек сауда көлемі де 6 млрд 971 млн теңгеге жетіп, тұрақты өсім сақталды. Экономиканың тұрақты дамуы аудан тұрғындарының әл-ауқатын арттырудың басты кепілі. Сондықтан инвестиция тарту, өндірісті ұлғайту және бюджет кірістерін көбейту бағытындағы жұмыстар жүйелі түрде жалғасады», – деді аудан әкімі Айтбай Жандарбеков.<figure class="image"><img src="https://knadmin.beoblood.kz/uploads/brifing_shieli_a3053066e3.jpg" alt="брифинг шиелі.jpg"></figure></blockquote>Фото: t.me/tengenomika/ РСК Кызылорда&nbsp;

Шиеліде экономикалық өсімнің оң динамикасы сақталды 

<a href="https://kyzylorda-news.kz/">Kyzylorda-news.kz</a> Шиелі ауданында спорт кешендері, көпірлер, газ және электр желілері, әлеуметтік нысандар құрылысы кезең-кезеңімен жүзеге асырылуда. Жаңғыртылған Шиелі теміржол вокзалы пайдалануға беріліп, тұрғындарға қолайлы жағдай жасалды. Сонымен қатар жолдарды қайта жаңғырту, елді мекендерді газдандыру және электр желілерін жаңарту жұмыстары жалғасып жатыр. Бұл туралы Өңірлік коммуникациялар қызметінде өткен баспасөз конференциясында Шиелі ауданының әкімі Айтбай Жандарбеков баяндады.Тұрғын үй саласында соңғы жылдары жүздеген пәтер халық игілігіне берілсе, биыл тағы да жаңа көпқабатты тұрғын үйлердің құрылысы басталады. Аудан халқы сапалы ауыз сумен толық қамтылған.<blockquote>«Білім саласында үш ауысымды мектеп жоқ. Биыл Ұлттық бірыңғай тестілеудің орташа көрсеткіші өсіп, аудан облыс бойынша үздік үштіктің қатарына енді. Денсаулық сақтау саласында магниттік-резонанстық томография аппараты іске қосылып, медициналық мекемелерге жөндеу жұмыстары жүргізілуде. Абаттандыру бағытында «Таза Қазақстан» акциясы аясында санитарлық тазалық, көгалдандыру және қоғамдық кеңістіктерді көркейту жұмыстары күшейтілді. Белсенді тұрғындар мен еріктілердің еңбегі арнайы марапатталып келеді. Халыққа қолайлы орта қалыптастыру біздің негізгі міндетіміз. Сондықтан құрылыс, жол, тұрғын үй, білім мен денсаулық сақтау салаларындағы жобаларды сапалы әрі уақытылы аяқтауға ерекше мән береміз», – деді аудан әкімі Айтбай Жандарбеков.</blockquote>

Шиеліде әлеуметтік және инфрақұрылымдық жобалар қарқын алды 

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен Үкімет жанындағы «Заң мен тәртіп» конституциялық қағидатын іске асыру жөніндегі ведомствоаралық комиссия отырысы өтті. Оған облыс әкімі Мұрат Ергешбаев селекторлық режим арқылы қатысты.«Заң мен тәртіп» – мемлекетіміздің конституциялық деңгейде бекітілген негізгі қағидаттарының бірі. Жиында Премьер-министр құқық үстемдігін қамтамасыз ету, қоғамдық қауіпсіздікті нығайту және заңға бағыну мәдениетін қалыптастырудың маңыздылығына тоқталды.<blockquote>«Нағыз патриот – бірінші кезекте заңға бағынатын, тәртіпті сақтайтын, тазалықты бағалайтын, табиғатты аялайтын еңбекқор, білімді азамат. Сондықтан дәл осындай құндылықтарды бәріміз кеңінен насихаттауымыз, ілгерілетуіміз қажет. Тәртіп болмаса, елімізде экономикалық, әлеуметтік, саяси және басқа мақсаттарға қол жеткізу мүмкін емес», – деп атап өтті Олжас Бектенов.</blockquote>Жиында құқықтық мәдениетті қалыптастыру, қауіпсіз өмір сүру ортасын құру, мемлекеттік органдардың ашықтығын қамтамасыз ету, азаматтық қоғаммен әріптестікті дамыту және азаматтық белсенділікті арттыру мәселелері қаралды. Сондай-ақ қоғамдық қауіпсіздік жүйесін цифрландыру, бейнебақылау жүйелерін кеңейту, құқықбұзушылықтардың алдын алу және халықтың құқықтық сауаттылығын арттыру бағытындағы жұмыстар талқыланды.Комиссия отырысынан кейін өткен мәжілісте аталған мәселелерге орай жауапты сала басшыларына нақты тапсырмалар берілді.Аймақ басшысы өңірдегі қоғамдық-саяси ахуалдың тұрақтылығын, қоғамдық қауіпсіздікті сақтаудағы, азаматтардың мемлекеттік органдарға сенімін нығайтудағы жұмысты жүйелі жүргізуді тапсырды.Жұмыс барысында ақпараттық-түсіндірумен шектелмей, нақты нәтижеге қол жеткізу міндеті қойылды. Сонымен қатар, қылмыс деңгейі өскен бағыттар мен аумақтарға қосымша талдау жүргізіп, алдын алу жағын күшейту керек.Әсіресе, қоғамдық орындарда жасалатын және отбасылық-тұрмыстық құқықбұзушылықтардың, қайталанып, сондай-ақ алкогольдік масаң күйде жасалатын қылмыстың алдын алуға басымдық беру маңызды. Осы ретте «Ішімдіксіз ауыл» бастамасын қолдау, заңсыз алкоголь саудасының жолын кесу, алкогольге тәуелді азаматтарды емдеу және әлеуметтік бейімдеуге баса мән беру қажет.Айта кету керек, &nbsp;өңірде «Заң мен тәртіп» идеологиясын іске асыру аясында құқықтық мәдениетті қалыптастыру, халықтың құқықтық сауаттылығын арттыру және құқықбұзушылықтың алдын алу бағытындағы іс-шаралар тұрақты өткізіліп келеді.&nbsp;

«Заң мен тәртіп»: Қоғамдық қауіпсіздікті қамтамасыз ету мәселелері қаралды

Қызылорда қаласында Республика күні және &nbsp;«Алтын күз – 2026» дәстүрлі мерекесі аясында «Сыр маржаны - 2026» ұлттық ат бәйгесі ұйымдастырылды.Бәйгені облыс әкімі Мұрат Ергешбаев, ҚР Құрылтай депутаты Жарқынбек Амантайұлы, зиялы қауым өкілдері мен ел ағалары тамашалады. Аймақ басшысы &nbsp;қатысушыларға сәттілік тіледі.&nbsp;<img src="https://knadmin.beoblood.kz/uploads/FB_IMG_1792909017229_e9a840e3e3.jpg" alt="FB_IMG_1792909017229.jpg">«Баршаңызды ұлттық мерекеміз – Республика күнімен, &nbsp;береке-бірлікті айшықтайтын дәстүрлі «Алтын күз» мерекесімен шын жүректен құттықтаймын! Алтын күзде халқымыз егінін жинап, қамбасын толтырады. Егініміз бітік шықты деп, қуаныш тойын тойлап, ат шаптырып, бәйге береді. Дана халқымыз «Жылқы болған жерде бәйге де бар» деген. Атқа қонса, айбарланып, рухтанатын ерлеріміз үшін жылқы ұлттық сана-сезім, рухани болмыс, әдет-ғұрып, мәдениет пен өнердің тұтас бір бөлігі. &nbsp;Өңірімізде ұлттық спорт түрлерімен шұғылданушылар саны 30 мыңға жуықтап, түрлі додаларда сынға түсіп жүр.&nbsp; Бүгінгі бәйгеде &nbsp;тұлпарлар дүбірі, шабандоздар шеберлігі көпшілікке қуаныш сыйласын! Еліміздің еңсесі биік, Тәуелсіздігіміз тұғырлы, бірлігіміз бекем болсын!», - деді аймақ басшысы.<img src="https://knadmin.beoblood.kz/uploads/FB_IMG_1792909041932_0f3053cc03.jpg" alt="FB_IMG_1792909041932.jpg">ЖАРЫС НӘТИЖЕСІТай бәйге, 5 шақырым: ІІІ орын - Әли Мағжанұлы, Шымкент қаласы. ІІ орын - Самат Айбар, Қызылорда қаласы. І орын - Мақсат Дауылбай, Қызылорда облысы, Жалағаш ауданы.Құнан бәйге, 11 шақырым: ІІІ орын - Санжар Бақтыбай, Алматы облысы Балқаш ауданы. ІІ орын - Нұрасыл Өсер, Жамбыл облысы Меркі ауданы. І орын - Әділжан Төлеген, Алматы облысы.Топ бәйге, 15 шақырым: ІІІ орын - Санжар Бақтыбай, Алматы облысы Қарасай ауданы. ІІ орын - Болат Әлімшайқы, Алматы облысы Ұзынағаш ауданы. І орын - Нұрасыл Өсер, Жамбыл облысы Меркі ауданы.Аламан бәйге, 25 шақырым:&nbsp; ІІІ орын - Қалилулла Тағылыталап, Атырау облысы Жылыой ауданы. ІІ орын - Ахмет Анас, Алматы облысы. І орын - Ерсұлтан Тілеуғабыл, Жамбыл облысы Қордай ауданы.Жеңімпаздарға қаржылай сертификаттар табысталды.<img src="https://knadmin.beoblood.kz/uploads/FB_IMG_1792909011772_3ab19b3fc7.jpg" alt="FB_IMG_1792909011772.jpg">

Қызылордада ат бәйгесі ұйымдастырылды 

Облыс әкімі Мұрат Ергешбаев «Ақмаржан» агромәдени фестивалі аясында Қызылорда қаласында өткен «Алтын күз – 2026» ауыл шаруашылығы өнімдерінің жәрмеңкесін аралады.Жәрмеңкеде барлық аудандар мен Қызылорда қаласының шаруалары тұрғындарға 450 жүк көлігімен 1200 тоннадан астам өнім ұсынды. Өнімдер нарықтағыдан төмен бағамен сатылуда.<img src="https://knadmin.beoblood.kz/uploads/FB_IMG_1792904437924_7ddf77db56.jpg" alt="FB_IMG_1792904437924.jpg">Сауда сөрелерінен Сырдың брендіне айналған ақ күріш, Аралдың балығы мен ас тұзы, табиғи сүт өнімдері, ет, көкөніс, жеміс-жидек және бақша өнімдері табылады. &nbsp;Әсіресе, балық, құрт, ірімшік, күріш, көкөніс пен жеміс-жидекке тұтынушылар сұранысы жоғары болды.Қармақшы ауданынан 70 көлікпен 150 тоннаға жуық өнім жеткізілсе, Жалағаш ауданының шаруалары 200 тоннаға жуық өнім ұсынды. Сырдария ауданынан 50 көлікке тиелген 200 тонна өнім әкелінді.<img src="https://knadmin.beoblood.kz/uploads/FB_IMG_1792904444501_aaab154eed.jpg" alt="FB_IMG_1792904444501.jpg">Арал ауданынан 75 тоннаға жуық өнім, оның ішінде 15 тонна балық, 25 тонна көкөніс, 25 тонна жеміс-жидек, 3 тонна ас тұзы және 5 тонна ет өнімдері жеткізілді. Теңізді өлкенің балығына тұрғындар ерекше қызығушылық танытты.Қазалы ауданының шаруалары күріш, ет, балық, көкөніс, бақша өнімдерімен қатар, &nbsp;Қазалы кәмпиттерін де ұсынды. Тұрғындар 10–15 пайыз төмен бағамен сатып алды.<img src="https://knadmin.beoblood.kz/uploads/FB_IMG_1792904390958_5a200281b8.jpg" alt="FB_IMG_1792904390958.jpg">Жаңақорған ауданынан 50 көлікпен 65 тонна картоп, 25 тонна асқабақ, 60 тоннадан астам көкөніс пен жеміс-жидек саудаға шықты. Сатылымда ет, балық және кондитерлік өнімдер де бар.Қызылорда қаласының жәрмеңкесінен тұрғындар &nbsp;күріш, ет пен балық, қауын-қарбыз, картоп, сәбіз, пияз, асқабақ, көкөніс, жеміс-жидек, сүт және кондитерлік өнімдер сатып алды.Ал Тасбөгет кентінің орталық алаңында Шиелі ауданының шаруалары 150 тоннадан астам өнімін &nbsp;ұсынды. Тұрғындарға күріш, картоп, бақша өнімдері, асқабақ, ет, сүт, көкөніс және бакалея өнімдері, &nbsp;сонымен қатар 30 бас тоқты әкелінді.<img src="https://knadmin.beoblood.kz/uploads/FB_IMG_1792904426357_2aa3f8e227.jpg" alt="FB_IMG_1792904426357.jpg">

«Алтын күз – 2026» ауыл шаруашылығы өнімдерінің жәрмеңкесі өтті

<a href="https://kyzylorda-news.kz/">Kyzylorda-news.kz</a> «Таза Қазақстан» экологиялық акциясына атсалысу мақсатында полиция қызметкерлері арасында профилактикалық жұмыстар жалғасуда.Атқарылған жұмыстардың нәтижесінде, апта көлемінде облысымызда қоғамдық орындарды ластаудың 214 дерегі анықталып, құқық бұзушылық жасаған жеке тұлғаларға қатысты ҚР ӘҚБтК-нің &nbsp;434-2-бабымен (қоғамдық орындарды ластау) 96 және ҚР ӘҚБтК-нің 505-бабымен (абаттандыру қағидаларын бұзу) 118 әкімшілік хаттамалар рәсімделіп, тиісті шаралар қолданылды.<img src="https://knadmin.beoblood.kz/uploads/image_10_aac90aa924.png" alt="Полиция Нурболат Нуржаубай (10).png">Сурет: Нұрболат Нұржаубай

«Таза Қазақстан»: Апта көлеміндегі рейд нәтижесінде 214 құқық бұзушылықтың жолы кесілді

<a href="https://kyzylorda-news.kz/">Kyzylorda-news.kz</a> Қорқыт ата атындағы Қызылорда университетінің Біліктілікті арттыру және қосымша білім беру орталығының ұйымдастыруымен Сырдария ауданы Отбасын қолдау орталығының әлеуметтік қызметкерлеріне арналған 40 сағаттық біліктілікті арттыру курсы өтті.«Әлеуметтік жұмыстың заманауи бағыттары» атты курс әлеуметтік сала мамандарының кәсіби білімін жетілдіруге, заманауи әлеуметтік жұмыс әдістерін меңгеруге бағытталды. Оқу бағдарламасы аясында әлеуметтік қызмет көрсету стандарттары, кәсіби этика, әлеуметтік теңсіздік пен кедейлік мәселелері, әлеуметтік қауіпсіздік, сондай-ақ отбасылармен және қарттармен жұмыс жүргізудің ерекшеліктері қарастырылды.<img src="https://knadmin.beoblood.kz/uploads/or_yt_universiteti_biliktilikti_arttyru_kursy_3_6b5f6b826f.jpeg" alt="Қорқыт университеті біліктілікті арттыру курсы 3.jpeg">Сонымен қатар тұрмыстық және отбасылық зорлық-зомбылықтың алдын алу, әлеуметтік жұмыстың гендерлік аспектілері, әлеуметтік салада жасанды интеллектіні қолдану, супервизия және мамандарға кәсіби қолдау көрсету мәселелеріне назар аударылды.Курстың тәжірибелік бөлімінде қатысушылар «№1 Қызылорда арнаулы әлеуметтік қызметтер көрсету орталығы» коммуналдық мемлекеттік мекемесіне барып, онда тұратын қарияларға арналған сабақтар өткізді. Сондай-ақ Талсуат ауылында орналасқан Қызылорда облысының жұмыспен қамтуды үйлестіру және әлеуметтік бағдарламалар басқармасына қарасты «Арнаулы әлеуметтік қызметтер көрсету балалар орталығы» коммуналдық мемлекеттік мекемесіне барып, теориялық білімді тәжірибемен ұштастырды.<img src="https://knadmin.beoblood.kz/uploads/or_yt_universiteti_biliktilikti_arttyru_kursy_7315aa089d.jpeg" alt="Қорқыт университеті біліктілікті арттыру курсы.jpeg">

Сырдария: Отбасын қолдау орталығының әлеуметтік қызметкерлеріне біліктілікті арттыру курсы өтті

<a href="https://kyzylorda-news.kz/">Kyzylorda-news.kz</a> Қазалы ауданында мемлекет пен бизнес өкілдері арасындағы байланысты нығайту, кәсіпкерлікті дамытудағы өзекті мәселелерді талқылау, қаржылық қолдау тетіктерін түсіндіру және жаңа бастамаларға жол ашу мақсатында «BIZNES DIALOG: Мемлекет пен кәсіпкер» атты аудан кәсіпкерлерінің форумы өтті.Форумға аудан прокуроры орынбасарының міндетін атқарушы Әділбек Сағатбаев, облыстық кәсіпкерлік және өнеркәсіп басқармасының, «Атамекен» Ұлттық кәсіпкерлер палатасының, қаржы институттарының өкілдері, салалық мамандар мен аудан кәсіпкерлері қатысты.<img src="https://knadmin.beoblood.kz/uploads/azaly_k_sipkerler_forumy_2_1367c7087d.jpg" alt="Қазалы кәсіпкерлер форумы 2.jpg">Форум жұмысын аудан әкімінің орынбасары Жалғас Сүйеубаев ашып беріп, өңірде кәсіпкерлік саласында қол жеткізген оң нәтижелі жұмыстар жайында айтып өтті.<blockquote>– Мемлекет басшысы Қасым-Жомарт Тоқаев кәсіпкерлікті дамытуға, инвестиция тартуға және отандық өндірісті өркендетуге айрықша мән беріп келеді. Осы бағытта Қазалы ауданында да шағын және орта бизнесті қолдау, жаңа жұмыс орындарын ашу, инвестициялық жобаларды жүзеге асыру бойынша жүйелі жұмыстар жүргізілуде. Бүгінде ауданда 4 мыңнан астам шағын және орта кәсіпкерлік субъектісі тіркеліп, 8 мыңнан астам тұрғын осы салада еңбек етуде. Мемлекет басшысының тапсырмасына сәйкес елімізде жаңа жұмыс орындарын ашу, халықтың қажеттілігін қамтамасыз ету бағытындағы кәсіп түрлерін ашу, негізінен өнім өңдеуге, өндіруге басымдық беру жұмыстары қолға алынып келеді. Әрине, бұл бағытта біздіңде ауданымызда үлкен жұмыстар атқарылуда. Бұған байланысты аудан кәсіпкерлеріне аудан әкімдігі, облыстық салалық басқармалар тарапынан әрдайым қолдау көрсетілетін болады, - деді Жалғас Оңғарұлы.</blockquote><img src="https://knadmin.beoblood.kz/uploads/azaly_k_sipkerler_forumy_3_7bdd793f55.jpg" alt="Қазалы кәсіпкерлер форумы 3.jpg">Форум барысында кәсіпкерлікті қаржыландыру, мемлекеттік қолдау шаралары, инвестициялық жобаларды іске асыру және жасанды интеллект мүмкіндіктерін бизнес саласында тиімді пайдалану мәселелері қозғалды. Сонымен қатар, кәсіпкерлер өздерін толғандырған сұрақтарын қойып, сала мамандарынан нақты жауаптар алды. Кездесу өзара тәжірибе алмасуға және жаңа іскерлік байланыстар орнатуға мүмкіндік берді.Жиын аясында Қазалы ауданының әлеуметтік-экономикалық дамуына үлес қосып жүрген бірқатар кәсіпкерлерге облыс әкімі Мұрат Ергешбаевтың және аудан әкімі Алмасбек Есмахановтың «Алғыс хаттары» табысталды.Сондай-ақ форум бағдарламасы аясында жергілікті кәсіпкерлердің тігін өнімдері таныстырылып, сәнді киімдер көрсетілімі ұйымдастырылды.<img src="https://knadmin.beoblood.kz/uploads/azaly_k_sipkerler_forumy_4_06ec4fd2f2.jpg" alt="Қазалы кәсіпкерлер форумы 4.jpg">

Қазалыда «BIZNES DIALOG: мемлекет пен кәсіпкер» форумы өтті

<a href="https://kyzylorda-news.kz/">Kyzylorda-news.kz</a> Бүгін облыс әкімі Мұрат Ергешбаевтың төрағалығымен аймақтағы қоғамдық-саяси ахуал, қоғамдық қауіпсіздікті қамтамасыз ету мәселелері талқыланған мәжіліс өтті.Оған құқық қорғау органдарының бірінші басшылары, облыс әкімінің орынбасарлары, басқарма басшылары, білім беру ұйымдарының директорлары мен ата-аналар комитеттерінің төрағалары қатысты.Мемлекет басшысы бүгінгі Жолдауында қоғамдағы бірлік пен келісімді нығайтып, талап пен тәртіпке басымдық берудің маңызын атап өтті.«Жұмысты ойдағыдай орындау үшін, ең алдымен, бүкіл қоғамымыз тату болуы керек. Бірлік пен келісім болмаса, ешқандай реформа және ілгерілеу болмайтыны айдан анық. Қазір жаһандық сын-қатерлер әлдеқайда қауіпті сипат алған кезде қоғамымызда талап пен тәртіпке басымдық беруіміз қажет», – деді Президент.&nbsp;Мәжілісте қоғамдық тәртіпті, жол қауіпсіздігін сақтау, балалар қауіпсіздігі, жастар арасындағы құқықбұзушылықтың және отбасылық-тұрмыстық зорлық-зомбылықтың алдын алу мәселелері қаралды.Аймақ басшысы оқиға болған соң оның салдарымен күреспей, алдын алу тетіктерін күшейтудің маңызын атап өтті.<blockquote>«Бізге ең бірінші, адам өмірі қымбат, оның ішінде &nbsp;баланың өмірі мың есе бағалы. Ең басты мақсат &nbsp;– тұрғындардың қауіпсіздігін қамтамасыз ету. Қоғамдық тәртіпті сақтау, жастар арасындағы құқықбұзушылықтың алдын алу және тұрғындардың қауіпсіздігін қамтамасыз ету күнделікті бақылауда болуы тиіс. Соңғы төрт жылда жергілікті бюджеттен полиция органдарының материалдық-техникалық базасын жаңғыртуға 65 млрд теңгеге жуық қаражат бөлінді. Бұл – өңір тұрғындарының тыныштығы мен қауіпсіздігі үшін көрсетіліп отырған қолдау. Жыл басынан бері 1915 қылмыстық құқықбұзушылық тіркелген. Өткен жылмен салыстырғанда 8,8 % төмендеген. Дегенмен статистиканың жақсаруы жұмысты босаңсытпауы тиіс. Әсіресе балалардың, жасөспірімдердің қатысуымен болатын оқиғаларға мүлде бейжай қарауға болмайды.Соңғы апталардағы оқиғалар осы бағыттағы жұмысымызды қайта қарауды талап етеді. Әрқайсымыз жүктелген міндетімізді толық орындап, жауапты органдар өз құзыреті шегінде әрекет етіп, ортақ мақсатқа жұмылуы тиіс. Ол үшін күнделікті тәртіп, жауапкершілік, өзара үйлесім мен нақты нәтиже керек. Тұрғындар өзінің қауіпсіздігіне сенімді болып, балаларының амандығына алаңдамауы қажет. Біздің мақсатымыз – есеп үшін жұмыс істеу емес, халықтың тыныштығын қамтамасыз ету. Осы міндетті бәріміз бірдей түсініп, жауапкершілікпен атқаруға тиіспіз», – деді Мұрат Нәлқожаұлы.</blockquote>Мәжілісте қаладағы жастар көп жиналатын орындарда, ойын-сауық нысандары мен құқықбұзушылық қаупі жоғары аумақтарда профилактикалық жұмыстарды жандандыру, рейдтік іс-шараларды жүйелі жүргізу тапсырылды.Проблемалық аумақтарда жаяу патрульдеуге және учаскелік инспекторлардың тұрғындармен байланысынақатысты нақты шаралар қабылдау керек.Балалар мен жасөспірімдердің қауіпсіздігі үшін мектептерде және мектептен тыс ортада буллингтің, өзге де құқықбұзушылықтың алдын алуды жандандыру да – жұмыстың маңызды тармағы.Тәуекел тобындағы балалармен және олардың ата-аналарымен жұмысты күшейтіп, полиция, білім беру ұйымдары, психологтар мен әлеуметтік қызметтердің бірлескен іс-қимылын үйлестіру қажет.Отбасылық-тұрмыстық зорлық-зомбылықтың алдын алу, әлеуметтік қолдауды қажет ететін отбасыларды анықтау және балалардың қауіпсіздігін қамтамасыз ету бойынша жауапты органдардың жұмысына талдау жүргізіледі.Жиын қорытындысында қала және аудан әкімдеріне құқық қорғау органдарымен бірлескен профилактикалық жұмыстарды жандандырып, рейдтік іс-шараларды тұрақты жүргізу міндеттелді.<img src="https://knadmin.beoblood.kz/uploads/y_b_zushyly_ty_aldyn_alu_m_seleleri_2_e6f7121a37.jpg" alt="Құқықбұзушылықтың алдын алу мәселелері 2.jpg">

Бас тақырыптар