Kyzylorda-news.kz. Қызылордада төтенше жағдай режимін бұзған діни бірлестік жетекшісі әкімшілік жауапкершілікке тартылды.
Елімізде төтенше жағдай режимі кезінде Қызылорда облысының Полиция департаменті экстремизмге қарсы іс-қимыл басқармасының қызметкерлерімен жүргізілген мониторинг барысында 2020 жылдың 5 сәуір күні Қызылорда қаласындағы мөлтек аудандардың бірінде орналасқан “Полная Евангелия” христиандық діни бірлестігінде жексенбілік ғибадаттарды өткізу дерегі анықталды.
Тексеру барысында діни жоралғыға 12 адам қатысып, олардың санитарлық-эпидемиологиялық талаптарды сақтамағандығы белгілі болды.
Төтенше жағдай режимін бұзған бұл діни бірлестіктің жетекшісі Қызылорда қалалық мамандандырылған әкімшілік сотының 7 сәуірдегі қаулысымен ҚР Әкімшілік құқық бұзушылықтар туралы кодексінің 476-бабы 6-бөлігі бойынша (төтенше жағдай режимін бұзу) әкімшілік жауапкершілікке тартылып, оған 26 510 теңге көлемінде әкімшілік айыппұл салынды.