Kyzylorda-news.kz. Компаниялардағы басқарушылық лауазымдарда әйелдердің үлесін 30 пайызға дейін арттыру керек. Бұл туралы Ұлттық қоғамдық сенім кеңесінің төртінші отырысында Президент Қасым-Жомарт Тоқаев мәлім етті.
Президент мемлекеттің қатысуымен қызмет етіп жүрген көпшілік компанияларда әйелдердің үлесі әлі де төмен екенін, яғни 5-7 пайыз шамасында екенін айтты.
«Осындай жағдай ел тұрғындарының жартысынан астамын құрап тұрған әйелдердің әлеуетін толықтай жүзеге асыруға мүмкіндік бермейді», – деді Мемлекет басшысы.
Президент кеңес мүшелері бұл мәселені жан-жақты қарастырғанын, мемлекеттің қатысуы бар компаниялардың басшылық органдарында әйелдердің үлесін 30 пайызға дейін арттыру туралы міндетті норманы енгізу қажеттігін ұсынғанын айтты.
«Аталған бастаманы кезең-кезеңмен жүзеге асыру туралы ойластыруымыз керек деп санаймын. Бұл өз кезегінде бизнес саланы әйелдер үшін тартымды етіп, мамандандырылған халықаралық рейтингілерде Қазақстанның позицияларын жоғары көтереді», – деді Қ. Тоқаев.